ᠨᠢᠭᠡ ᠴᠠᠭ ᠦᠶᠡ ᠨᠢᠭᠡ ᠴᠠᠭ ᠦᠶᠡᠶ᠋ᠢᠨᠢᠶᠠᠨ ᠤᠳᠭᠠ ᠤᠷᠠᠯᠢᠭᠲᠠᠢ᠃ ᠡᠷᠳᠡᠨᠠᠴᠠ ᠢᠨᠠᠭ᠍ᠰᠢ ᠲᠤᠮᠳᠠᠳᠤ ᠭᠠᠳᠠᠭᠠᠳᠤᠶ᠋ᠢᠨ ᠤᠳᠭᠠ ᠤᠷᠠᠯᠢᠬ᠍ᠴᠢᠳ ᠲᠤᠭᠠᠯᠠᠰᠢ ᠦᠭᠡᠢ ᠤᠯᠠᠨ ᠤᠳᠭᠠ ᠤᠷᠠᠯᠢᠭᠤᠨ ᠪᠦᠳᠦᠭᠡᠯᠢ ᠵᠤᠬᠢᠶᠠᠨ ᠪᠦᠳᠦᠭᠡᠵᠦ᠍᠂ ᠮᠠᠨᠤ ᠡᠨᠡ ᠦᠶᠡᠳᠤ ᠤᠯᠠᠮᠵᠢᠯᠠᠨ ᠦᠯᠡᠳᠡᠭᠡᠵᠡᠢ᠃ ᠲᠡᠳᠡᠭᠡᠷᠤᠨ ᠲᠤᠳᠤᠷᠠᠬᠢ ᠲᠡᠦᠭᠡᠨ ᠱᠢᠭ᠌ᠰᠢᠯᠳᠡᠶ᠋ᠢ ᠲᠤᠭᠤᠯᠵᠤ᠂ ᠴᠠᠭ ᠦᠶᠡᠶ᠋ᠢᠨ ᠱᠢᠯᠭᠠᠯᠳᠠᠶ᠋ᠢ ᠲᠠᠭᠠᠭᠠᠵᠤ ᠬᠦᠮᠦᠨ ᠲᠦᠷᠦᠯᠬᠢᠳᠡᠨᠤ ᠲᠡᠦᠭᠡᠨᠳᠤ ᠤᠳᠤ ᠪᠤᠯᠳᠠᠯᠠ ᠬᠢᠯᠠᠯᠵᠠᠭ᠍ᠰᠠᠭᠠᠷ ᠪᠠᠢᠭᠠ ᠱᠢᠯᠢᠳᠡᠭ ᠰᠤᠩᠭᠤᠳᠠᠭ ᠪᠦᠳᠦᠭᠡᠯᠤᠳ ᠪᠤᠯ ᠬᠦᠮᠦᠨ ᠲᠦᠷᠦᠯᠬᠢᠳᠡᠨᠤ ᠦᠵᠡᠯ ᠰᠠᠨᠠᠭᠠ ᠰᠤᠶᠤᠯᠤᠨ ᠡᠷᠬᠢᠮ ᠨᠠᠨᠳᠢᠨ ᠦᠪ ᠮᠦᠨ᠃ ᠶᠡᠷᠦᠩᠭᠡᠢ ᠱᠦᠵᠢ ᠰᠢᠶ᠋ᠢᠨ ᠫᠢᠩ ᠤᠯᠠᠨ ᠤᠳᠠᠭᠠᠶ᠋ᠢᠨ ᠶᠠᠷᠢᠶᠠᠳᠠᠭᠠᠨ ᠲᠤᠮᠳᠠᠳᠤ ᠭᠠᠳᠠᠭᠠᠳᠤᠶ᠋ᠢᠨ ᠡᠷᠳᠡᠨ ᠡᠳᠦᠭᠡᠬᠢᠶ᠋ᠢᠨ ᠰᠤᠩᠭᠤᠳᠠᠭ ᠪᠦᠳᠦᠭᠡᠯᠠᠴᠠ ᠡᠰᠢ ᠲᠠᠳᠠᠵᠤ ᠪᠠᠢᠭ᠍ᠰᠠᠨ ᠪᠦᠭᠡᠳ 《ᠭᠡᠰᠡᠷ》᠂ 《ᠵᠠᠩᠭᠠᠷ》᠂ 《ᠮᠠᠨᠠᠰ》 ᠵᠡᠷᠭᠡ ᠮᠠᠨᠤ ᠤᠯᠤᠰᠤᠨ ᠴᠦᠭᠡᠨ ᠲᠤᠭᠠᠳᠤ ᠦᠨᠳᠦᠰᠦᠳᠡᠨᠤ ᠡᠷᠳᠡᠨᠤ ᠰᠤᠩᠭᠤᠳᠠᠭ ᠪᠦᠳᠦᠭᠡᠯᠤᠨ ᠲᠤᠬᠠᠢ ᠬᠡᠳᠦᠨᠳᠡ ᠦᠨᠳᠦᠷ ᠦᠨᠡᠯᠡᠯᠳᠡ ᠦᠭ᠌ᠴᠦ ᠦᠩᠭᠡᠷᠡᠭ᠌ᠰᠡᠨ ᠪᠢᠯᠠ᠃
《ᠤᠳᠭᠠ ᠤᠷᠠᠯᠢᠭᠤᠨ ᠬᠤᠪᠢ ᠵᠠᠶᠠᠭᠠ ᠤᠯᠤᠰᠤᠨ ᠬᠤᠪᠢ ᠵᠠᠶᠠᠭᠠᠲᠠᠢ ᠬᠤᠯᠪᠤᠯᠳᠤᠵᠤ᠂ ᠤᠳᠭᠠ ᠤᠷᠠᠯᠢᠭᠤᠨ ᠠᠮᠢᠨ ᠰᠤᠳᠠᠰᠤ ᠤᠯᠤᠰᠤᠨ ᠠᠮᠢᠨ ᠰᠤᠳᠠᠰᠤᠲᠠᠢ ᠬᠤᠯᠪᠤᠯᠳᠤᠵᠤ ᠪᠠᠢᠳᠠᠭ᠃》 ᠱᠢᠨᠡ ᠴᠠᠭ ᠦᠶᠡᠳᠤ ᠮᠠᠨᠤ ᠤᠷᠤᠨᠤ ᠤᠳᠭᠠ ᠤᠷᠠᠯᠢᠭ᠍ᠴᠢᠳ ᠦᠨᠳᠦᠰᠦᠳᠡᠨᠤ ᠵᠤᠷᠢᠭ ᠰᠠᠨᠠᠭᠠᠨᠤ ᠭᠠᠯ ᠪᠠᠮᠪᠠᠷᠢ ᠦᠨᠳᠦᠷ ᠡᠷᠬᠦᠵᠦ᠍᠂ ᠬᠡᠬᠦᠳᠡᠭ ᠴᠡᠭᠡᠵᠢᠨᠳᠡᠭᠡᠨ ᠶᠡᠭᠡ ᠵᠢᠷᠤᠮᠢ ᠪᠠᠭ᠍ᠳᠠᠭᠠᠨ᠂ ᠪᠤᠳᠤᠯ ᠰᠡᠳᠭᠢᠯᠳᠡᠭᠡᠨ ᠠᠷᠠᠳ ᠲᠦᠮᠡᠨᠢ ᠪᠤᠳᠤᠵᠤ᠂ ᠡᠬᠦᠷᠭᠡ ᠬᠠᠷᠢᠭᠤᠴᠠᠯᠭᠠᠶ᠋ᠢ ᠮᠦᠷᠦᠨᠳᠡᠭᠡᠨ ᠡᠬᠦᠷᠭᠡᠯᠡᠵᠦ᠍᠂ ᠴᠠᠭ ᠦᠶᠡᠶ᠋ᠢᠨ ᠬᠦᠰᠡᠯ ᠰᠠᠨᠠᠭᠠᠶ᠋ᠢ ᠲᠤᠰᠭᠠᠭ᠍ᠰᠠᠨ᠂ ᠠᠷᠠᠳ ᠲᠦᠮᠡᠨᠤ ᠲᠡᠮᠡᠴᠡᠯᠢ ᠢᠯᠡᠷᠡᠬᠦᠯᠦᠭ᠌ᠰᠡᠨ᠂ ᠦᠨᠳᠦᠰᠦᠳᠡᠨᠤ ᠵᠤᠷᠢᠭ ᠰᠠᠨᠠᠭᠠᠶ᠋ᠢ ᠬᠦᠭ᠌ᠵᠢᠭᠡᠭ᠌ᠰᠡᠨ᠂ ᠡᠷᠬᠢᠮ ᠲᠡᠭᠡᠳᠦ ᠵᠠᠩ ᠴᠢᠨᠠᠷᠢ ᠬᠦᠮᠦᠵᠢᠬᠦᠯᠦᠭ᠌ᠰᠡᠨ ᠦᠯᠡᠮᠵᠢᠭᠡᠨ ᠱᠢᠯᠢᠳᠡᠭ ᠪᠦᠳᠦᠭᠡᠯᠢ ᠵᠤᠬᠢᠶᠠᠨ ᠪᠦᠳᠦᠭᠡᠵᠦ᠍᠂ ᠲᠤᠮᠳᠠᠳᠤᠶ᠋ᠢᠨ ᠦᠨᠳᠦᠰᠦᠳᠡᠨᠤ ᠠᠭᠤᠤ ᠶᠡᠭᠡ ᠰᠡᠷᠬᠦᠨ ᠮᠠᠨᠳᠤᠯᠳᠠᠶ᠋ᠢᠨ ᠴᠠᠭ ᠦᠶᠡᠶ᠋ᠢᠨ ᠤᠳᠭᠠ ᠤᠷᠠᠯᠢᠭᠤᠨ ᠤᠷᠬᠢᠯᠢ ᠴᠤᠭ᠍ᠴᠠᠯᠠᠬᠤᠪᠠᠷ ᠬᠦᠴᠦᠯᠡᠨ ᠴᠢᠷᠮᠠᠢᠨᠠᠮ！
《ᠲᠡᠯᠡᠭᠡᠢ ᠲᠡᠭᠡᠷᠡ ᠶᠠᠮᠠᠷᠪᠠ ᠬᠦᠮᠦᠨᠤ ᠬᠦᠴᠦᠨ ᠪᠠ ᠮᠠᠲ᠋ᠧᠷᠢᠶᠠᠯᠢᠶᠠᠷ ᠪᠠᠷᠢᠵᠤ ᠦᠯᠦ᠍ ᠲᠡᠢᠯᠬᠦ᠌ ᠤᠷᠳᠤᠨ ᠬᠠᠷᠰᠢ᠂ ᠬᠤᠳᠠ ᠪᠠᠬᠢᠯᠡᠯᠳᠡᠶ᠋ᠢ ᠦᠰᠦᠭ ᠪᠢᠴᠢᠭᠢᠶᠠᠷ ᠪᠡᠶᠡᠯᠡᠬᠦᠯᠵᠦ᠍ ᠲᠡᠢᠯᠳᠡᠭ》 ᠬᠡᠵᠦ᠍ ᠬᠢᠳᠠᠳᠤᠨ ᠠᠯᠳᠠᠷᠳᠤ ᠵᠤᠬᠢᠶᠠᠯᠴᠢ ᠱᠧᠨ ᠼᠦᠩ ᠸᠧᠨ ᠶᠠᠷᠢᠵᠤ ᠦᠩᠭᠡᠷᠡᠭ᠌ᠰᠡᠨ ᠪᠢᠯᠠ᠃ ᠱᠢᠯᠢᠳᠡᠭ ᠰᠤᠩᠭᠤᠳᠠᠭ ᠪᠦᠳᠦᠭᠡᠯ ᠰᠡᠳᠭᠢᠯᠢ ᠤᠮᠳᠠᠯᠠᠵᠤ ᠲᠠᠮᠢᠷᠢ ᠱᠢᠮᠡᠵᠢᠬᠦᠯᠵᠦ᠍᠂ ᠬᠡᠪ ᠰᠤᠷᠳᠠᠯᠢ ᠬᠦᠳᠦᠯᠦᠨ ᠲᠠᠭᠠᠭᠤᠯᠵᠤ᠂ ᠦᠨᠡᠨ ᠰᠠᠢᠨ ᠰᠠᠢᠬᠠᠨ ᠬᠦᠮᠦᠨᠢ ᠬᠦᠮᠦᠵᠢᠬᠦᠯᠬᠦ᠌ᠳᠤ ᠲᠤᠯᠢ ᠪᠤᠯᠳᠠᠭ᠃ ᠦᠨᠦᠳᠦᠷ ᠪᠢᠳᠡ 《ᠰᠤᠩᠭᠤᠳᠠᠭ ᠪᠦᠳᠦᠬᠡᠯ · ᠦᠬᠦᠯᠡᠬᠦᠢ》 ᠤᠨᠴᠠ ᠤᠬᠠᠭᠠᠯᠠᠯ ᠮᠡᠳᠡᠬᠡᠯᠡᠯᠢ ᠪᠡᠯᠡᠳᠭᠡᠵᠦ᠍᠂ ᠮᠠᠨᠤ ᠤᠷᠤᠨᠤ ᠬᠡᠰᠡᠭ ᠵᠤᠬᠢᠶᠠᠯᠴᠢ ᠱᠢᠬᠦᠮᠵᠢᠯᠡᠭ᠌ᠴᠢᠶ᠋ᠢᠨ 《ᠰᠤᠩᠭᠤᠳᠠᠭ ᠪᠦᠳᠦᠬᠡᠯ》 ᠤᠨ ᠲᠤᠬᠠᠢ ᠦᠵᠡᠯᠳᠡ ᠤᠢ᠍ᠢᠯᠠᠭᠠᠯᠳᠠ ᠲᠦᠷᠦᠭ᠌ᠳᠡᠯᠠᠴᠠ ᠤᠯᠠᠨᠲᠠᠢ ᠬᠤᠪᠢᠶᠠᠯᠴᠠᠵᠦ᠍ ᠪᠠᠢᠨᠠᠮ！
ᠬᠠᠢᠷᠬᠠᠨ᠄ ᠦᠪᠦᠷ ᠮᠤᠩᠭᠤᠯᠤᠨ ᠶᠡᠭᠡ ᠰᠤᠷᠭᠠᠭᠤᠯᠢᠶ᠋ᠢᠨ ᠫᠷᠦᠹᠧᠰᠰᠤᠷ᠂ ᠳ᠋ᠤᠺᠲ᠋ᠤᠷᠠᠨᠲᠤᠨ ᠵᠢᠯᠤᠭᠤᠳᠤᠭ᠍ᠴᠢ ᠪᠠᠭ᠍ᠰᠢ᠃ ᠪᠧᠯᠬᠢ ᠤᠯᠤᠰᠤᠨ ᠯᠸᠤᠸᠢᠨ ᠶᠡᠭᠡ ᠰᠤᠷᠭᠠᠭᠤᠯᠢᠶ᠋ᠢᠨ ᠳ᠋ᠣᠺᠲ᠋ᠣᠷᠠᠨᠲᠤᠨ ᠵᠢᠯᠤᠭᠤᠳᠤᠭ᠍ᠴᠢ ᠪᠠᠭ᠍ᠰᠢ᠃ 《ᠬᠤᠯᠠᠶ᠋ᠢᠨ ᠴᠠᠰᠤᠳᠠᠢ ᠠᠭᠤᠯᠠ》᠂ 《ᠠᠷᠢᠭ ᠤᠰᠤᠨᠤ ᠴᠠᠭᠠᠨ ᠲᠤᠭᠤᠷᠤᠤ》᠂ 《ᠠᠭ᠍ᠯᠠᠭᠤᠨ ᠦᠨᠳᠦᠷ》 ᠵᠡᠷᠬᠡ ᠱᠢᠯᠦᠭᠤᠨ ᠳᠡᠬᠦᠪᠦᠷᠢ᠂ 《ᠱᠢᠨᠡ ᠡᠷᠢᠨᠤ ᠮᠤᠩᠭᠤᠯ ᠱᠢᠯᠦᠭᠲᠠᠬᠢ ᠤᠳᠤᠬᠢᠴᠢ ᠤᠷᠤᠰᠭᠠᠯ ᠪᠦᠯᠦᠭ》᠂ 《ᠤᠤᠭᠠᠯ ᠰᠤᠶᠤᠯᠤᠨ ᠱᠢᠯᠦᠭ ᠵᠦᠢ》᠂ 《ᠤᠳᠤ ᠦᠶᠡᠶ᠋ᠢᠨ ᠮᠤᠩᠭᠤᠯ ᠱᠢᠯᠦᠭᠤᠨ ᠶᠡᠷᠦᠩᠭᠡᠢᠯᠡᠭ᠌ᠰᠡᠨ ᠰᠤᠳᠤᠯᠤᠯ》 ᠵᠡᠷᠭᠡ ᠱᠢᠯᠦᠭ ᠵᠦᠢᠶ᠋ᠢᠨ ᠰᠣᠳᠣᠯᠭᠠᠨᠤ ᠪᠦᠳᠦᠬᠡᠯᠲᠠᠢ᠃ ᠦᠪᠡᠷᠳᠡᠭᠡᠨ ᠵᠠᠰᠠᠬᠤ ᠤᠷᠤᠨᠤ 《ᠰᠤᠯᠤᠩᠭᠠ ᠱᠠᠩᠨᠠᠯ》᠂ ᠤᠳᠭᠠ ᠵᠤᠬᠢᠶᠠᠯᠤᠨ 《ᠳᠤᠷᠤᠨᠠ ᠱᠠᠩᠨᠠᠯ》 ᠪᠠ ᠦᠪᠦᠷ ᠮᠤᠩᠭᠤᠯᠤᠨ ᠶᠡᠭᠡ ᠰᠤᠷᠭᠠᠭᠤᠯᠢᠶ᠋ᠢᠨ ᠵᠠᠬᠢᠷᠤᠯᠤᠨ 《ᠡᠷᠳᠡᠮᠢ ᠬᠦᠬᠢᠬᠦᠯᠬᠦ᠌ ᠱᠠᠩᠨᠠᠯ》 ᠵᠡᠷᠬᠡᠶ᠋ᠢ ᠲᠤᠰᠴᠦ᠍ ᠦᠡᠭ᠌ᠬᠡᠷᠡᠵᠡᠢ᠃
ᠰᠤᠩᠭᠤᠳᠠᠭ ᠬᠢᠬᠡᠳ ᠰᠤᠩᠭᠤᠳᠠᠬ᠍ᠵᠢᠭᠤᠯᠤᠯᠤᠨ ᠠᠰᠠᠭᠤᠳᠠᠯᠳᠤ
● ᠬᠠᠢᠷᠬᠠᠨ
ᠰᠤᠩᠭᠤᠳᠠᠭ ᠭᠡᠳᠡᠭ ᠤᠬᠠᠭ᠍ᠳᠠᠬᠤᠨᠢ ᠠᠩᠭ᠌ᠯᠢᠪᠠᠷ 《ᠺᠠᠨᠤᠨ》 ᠭᠡᠵᠦ᠍᠂ ᠬᠢᠳᠡᠳᠢᠶᠠᠷ 《经典》 ᠭᠡᠳᠡᠭ᠃ ᠠᠯᠢ ᠠᠯᠢᠨᠢ ᠴᠤ᠌ ᠱᠠᠱᠢᠨ᠂ ᠡᠷᠭᠡ ᠰᠦᠷ ᠬᠢᠭᠡᠳ ᠰᠤᠳᠤᠷ ᠪᠢᠴᠢᠭᠲᠠᠢ ᠬᠤᠯᠪᠤᠭᠠᠲᠠᠢ᠃ ᠤᠷᠠᠨ ᠵᠤᠬᠢᠶᠠᠯ ᠳᠤᠮᠳᠠᠬᠢ 《ᠰᠤᠩᠭᠤᠳᠠᠭ》 ᠭᠡᠬᠦ᠌ ᠤᠬᠠᠭ᠍ᠳᠠᠬᠤᠨᠨᠢ ᠠᠯᠢ ᠡᠷᠳᠡᠨᠤ ᠫᠯᠠᠲ᠋ᠤ᠋᠂ ᠠᠷᠢᠰᠲ᠋ᠤᠲ᠋ᠧᠯ ᠬᠢᠭᠡᠳ ᠺᠦᠩᠽᠢ ᠨᠠᠷᠤᠨ ᠲᠢᠭ ᠰᠲ᠋ᠢᠯᠢ ᠪᠤᠶᠤ ᠤᠷᠠᠨ ᠪᠦᠳᠦᠭᠡᠯᠢ ᠰᠤᠩᠭᠤᠳᠠᠭ᠍ᠵᠢᠭᠤᠯᠬᠤ ᠠᠵᠢᠯᠯᠠᠭᠠᠯᠤᠭᠠ ᠬᠤᠯᠪᠤᠭᠠᠲᠠᠢ᠃ ᠭᠡᠪᠡᠴᠤ᠌ ᠡᠬᠦᠨᠤ ᠳᠡᠦᠭᠡ ᠭᠠᠷᠤᠯᠢ ᠠᠳᠡ ᠳᠡᠯᠭᠡᠨ ᠦᠬᠦᠯᠡᠬᠦ᠌ ᠰᠠᠨᠠᠭᠠ ᠦᠭᠡᠢ᠂ ᠰᠤᠨᠢᠷᠬᠠᠯᠳᠠᠢ ᠨᠦᠬᠦᠳ ᠯᠢᠤ ᠢ ᠴᠢᠩᠤᠨ 《ᠰᠤᠩᠭᠤᠳᠠᠭ》᠂ ᠯᠢᠤ ᠱᠢᠶᠤᠤ ᠱᠢᠨᠤ 《ᠰᠤᠩᠭᠤᠳᠠᠭ》᠂ ᠪᠤᠶᠠᠨᠳᠤᠭ᠍ᠳᠠᠬᠤ᠂ ᠶ᠊ ᠳᠡᠮᠦᠷᠵᠢᠨ ᠨᠠᠷᠤᠨ ᠮᠤᠩᠭᠤᠯ ᠤᠷᠠᠨ ᠵᠤᠬᠢᠶᠠᠯᠤᠨ ᠰᠤᠩᠭᠤᠳᠠᠭ᠍ᠵᠢᠯᠤᠨ ᠠᠰᠠᠭᠤᠳᠠᠯᠤᠨ ᠳᠤᠬᠠᠢ ᠦᠬᠦᠯᠡᠯ᠂ ᠬᠠᠷᠤᠯᠳ᠋ · ᠪᠯᠦᠮᠤᠨ 《ᠦᠷᠦᠨᠡᠳᠡᠬᠢᠨᠤ ᠳᠦᠪ ᠰᠤᠳᠤᠷ》᠂ F.R. ᠯᠸᠧᠢᠰᠤᠨ 《ᠠᠭᠤᠤ ᠶᠡᠭᠡ ᠤᠯᠠᠮᠵᠢᠯᠠᠯ》 ᠵᠡᠷᠭᠡ ᠨᠤᠮᠢ ᠡᠷᠢᠵᠤ ᠤᠩᠱᠢᠭᠠᠷᠠᠢ᠃
ᠤᠷᠠᠨ ᠵᠤᠬᠢᠶᠠᠯᠤᠨ 《ᠰᠤᠩᠭᠤᠳᠠᠭ》 ᠭᠡᠳᠡᠭᠨᠢ ᠭᠡᠳᠦᠨ ᠳᠠᠯᠳᠠ ᠤᠳᠭᠠᠶ᠋ᠢ ᠨᠢᠭᠤᠴᠠᠯᠠᠵᠤ ᠪᠠᠢᠳᠠᠭ᠃ ᠨᠢᠭᠡᠨᠢ᠂ ᠤᠷᠠᠯᠢᠭᠤᠨ ᠤᠷᠭᠠᠨᠢᠭ ᠴᠤᠭ᠍ᠴᠠᠪᠠᠷ ᠤᠯᠠᠨᠠᠴᠠ ᠴᠤᠯᠭᠤᠷᠠᠭ᠍ᠰᠠᠨ； ᠬᠤᠶᠡᠷᠲᠤ᠌᠂ ᠡᠷᠭᠡ ᠰᠦᠷᠳᠤ ᠴᠢᠨᠠᠷᠲᠠᠢ᠂ ᠦᠶᠡ ᠦᠶᠡᠶ᠋ᠢᠨ ᠡᠷᠳᠡᠮᠳᠡᠨ ᠮᠡᠷᠭᠡᠵᠢᠯᠳᠡᠳ ᠬᠢᠭᠡᠳ ᠠᠯᠪᠠᠨᠤ ᠳᠠᠯᠠᠶ᠋ᠢᠨ ᠨᠤᠳᠠᠯᠠᠯ ᠰᠠᠢᠱᠢᠶᠠᠯᠢ ᠤᠯᠤᠭ᠍ᠰᠠᠨ； ᠭᠤᠷᠪᠠ᠂ ᠰᠡᠵᠢᠭ᠌ᠯᠡᠵᠦ᠍ ᠪᠤᠯᠤᠰᠢ ᠦᠭᠡᠢ ᠱᠢᠨᠵᠢᠲᠠᠢ᠂ ᠤᠷᠠᠨ ᠵᠤᠬᠢᠶᠠᠯᠤᠨ ᠪᠠᠢᠷᠢ ᠰᠠᠭᠤᠷᠢᠨᠢ ᠤᠩᠭᠤᠨ ᠳᠠᠷᠬᠠᠨ᠃
ᠤᠷᠠᠨ ᠵᠤᠬᠢᠶᠠᠯᠤᠨ ᠳᠡᠦᠭᠡᠨᠳᠤ ᠶᠠᠷᠢᠶᠠᠨ ᠦᠭᠡᠢ ᠰᠤᠩᠭᠤᠳᠠᠭ — ᠰᠤᠩᠭᠤᠳᠠᠭ ᠪᠦᠳᠦᠭᠡᠯ ᠪᠠ ᠰᠤᠩᠭᠤᠳᠠᠭ ᠵᠤᠬᠢᠶᠠᠯᠴᠢ ᠤᠷᠤᠱᠢᠨᠠ᠃ ᠤᠷᠪᠠᠭᠤᠯᠤᠭᠠᠳ ᠭᠡᠯᠡᠪᠡᠯ ᠤᠷᠠᠨ ᠵᠤᠬᠢᠶᠠᠯᠤᠨ ᠳᠡᠦᠭᠡ ᠪᠤᠯ ᠳᠠᠷᠤᠢ ᠶᠡᠭᠡᠪᠴᠢᠯᠡᠨ ᠰᠤᠩᠭᠤᠳᠠᠭ ᠪᠦᠳᠦᠭᠡᠯ ᠪᠠ ᠰᠤᠩᠭᠤᠳᠠᠭ ᠵᠤᠬᠢᠶᠠᠯᠴᠢᠶ᠋ᠢᠨ ᠳᠡᠦᠭᠡ ᠶᠤᠮ᠃ ᠰᠤᠩᠭᠤᠳᠠᠭ ᠪᠦᠳᠦᠭᠡᠯ᠂ ᠰᠤᠩᠭᠤᠳᠠᠭ ᠵᠤᠬᠢᠶᠠᠯᠴᠢ ᠦᠭᠡᠢ ᠤᠷᠠᠨ ᠵᠤᠬᠢᠶᠠᠯᠤᠨ ᠳᠡᠦᠭᠡᠶ᠋ᠢ ᠰᠡᠳᠭᠢᠬᠦ᠌ᠶ᠋ᠢᠨ ᠠᠷᠭᠠ ᠦᠭᠡᠢ᠃ ᠠᠰᠠᠭᠤᠳᠠᠯᠤᠨ ᠠᠨᠢᠰᠤᠨᠢ 《ᠰᠤᠩᠭᠤᠳᠠᠭ》 ᠢ ᠭᠡᠷᠬᠢᠨ ᠬᠢᠨᠠᠨ ᠳᠤᠭ᠍ᠳᠠᠭᠠᠬᠤᠳᠤ ᠪᠤᠢ᠃ ᠶᠠᠮᠠᠷ 《ᠪᠠᠷᠢᠮᠵᠢᠶᠡ》 ᠪᠠᠷ᠂ 《ᠭᠡᠨ》 （ᠪᠠᠢᠭᠤᠯᠤᠮᠵᠢ）᠂ 《ᠭᠡᠷᠬᠢᠨ》 （ᠠᠷᠭᠠ ᠭᠡᠮᠵᠢᠶᠡ） ᠬᠢᠨᠠᠨ ᠳᠤᠭ᠍ᠳᠠᠭᠠᠭ᠍ᠰᠠᠨ ᠭᠡᠳᠡᠭᠨᠢ ᠴᠢᠬᠤᠯᠠ᠃
ᠤᠷᠠᠨ ᠵᠤᠬᠢᠶᠠᠯᠤᠨ ᠰᠤᠩᠭᠤᠳᠠᠭᠤᠨ 《ᠪᠠᠷᠢᠮᠵᠢᠶᠡ》 ᠳᠤ ᠬᠠᠮᠤᠭᠤᠨ ᠴᠢᠬᠤᠯᠠᠨᠢ ᠭᠤᠸᠠ ᠵᠦᠢᠶ᠋ᠢᠨ ᠪᠠᠷᠢᠮᠵᠢᠶᠡ᠂ ᠳᠠᠷᠤᠢ ᠤᠷᠠᠯᠢᠭᠤᠨ ᠤᠷᠭᠠᠨᠢᠭ ᠴᠤᠭ᠍ᠴᠠᠶ᠋ᠢᠨ 《ᠴᠤᠯᠭᠤᠷᠠᠭ᠍ᠰᠠᠨ ᠱᠢᠨᠵᠢ》 ᠪᠤᠯᠤᠨᠠ᠃ ᠦᠷᠦᠨᠡᠳᠡᠬᠢᠨᠤ 《ᠬᠤᠮᠧᠷᠤᠨ ᠳᠤᠤᠯᠢᠰ》᠂ 《ᠳᠡᠭ᠌ᠷᠢᠯᠢᠭ ᠳᠤᠤᠯᠢᠰ》᠂ ᠱᠧᠺᠧᠰᠫᠧᠷᠤᠨ ᠵᠦᠴᠦᠭᠡ᠂ ᠭᠤᠢᠲ᠋ᠧᠤᠨ 《ᠹᠠᠦ᠋ᠰᠲ》； ᠬᠢᠳᠡᠳ ᠦᠨᠳᠦᠰᠦᠳᠡᠨᠤ ᠴᠢᠦᠢ ᠶᠤᠸᠠᠨ᠂ ᠯᠢ ᠪᠠᠢ᠂ ᠳ᠋ᠦ᠋ ᠹᠦ᠋ ᠨᠠᠷᠤᠨ ᠱᠢᠯᠦᠭ᠂ ᠼᠤᠤ ᠱᠢᠤᠸᠠᠢ ᠴᠢᠨᠤ 《ᠤᠯᠠᠭᠠᠨ ᠠᠰᠠᠷᠤᠨ ᠵᠡᠬᠦᠳᠦᠨ》； ᠮᠤᠩᠭᠤᠯ ᠦᠨᠳᠦᠰᠦᠳᠡᠨᠤ 《ᠵᠠᠩᠭᠠᠷ》᠂ 《ᠭᠡᠰᠡᠷ》᠂ 《ᠮᠤᠩᠭᠤᠯᠤᠨ ᠨᠢᠭᠤᠴᠠ ᠳᠤᠪᠴᠢᠶᠠᠨ》᠂ ᠢᠨᠵᠠᠨᠨᠠᠰᠢᠶ᠋ᠢᠨ 《ᠬᠦᠭᠡ ᠰᠤᠳᠤᠷ》᠂ 《ᠨᠢᠭᠡᠨ ᠳᠠᠪᠬᠤᠷ ᠠᠰᠠᠷ》 ᠤᠨ ᠴᠤᠯᠭᠤᠷᠠᠭ᠍ᠰᠠᠨ ᠱᠢᠨᠵᠢᠨᠢ ᠰᠡᠵᠢᠭ᠌ᠯᠡᠰᠢ ᠦᠭᠡᠢ ᠭᠡᠳᠡᠭ； ᠬᠤᠶᠠᠳᠤᠭᠠᠷ ᠪᠠᠷᠢᠮᠵᠢᠶᠡᠨᠢ ᠴᠠᠭ ᠦᠶᠡᠶ᠋ᠢᠨ （ᠳᠡᠦᠭᠡᠨ） ᠱᠢᠯᠭᠠᠯᠳᠠᠶ᠋ᠢ ᠳᠠᠭᠠᠭᠠᠭ᠍ᠰᠠᠨ ᠱᠢᠨᠵᠢᠲᠠᠢ ᠪᠠᠢᠬᠤ᠃ ᠨᠢᠭᠡᠨ ᠦᠶᠡᠶ᠋ᠢᠨ ᠴᠤᠤᠳᠤ ᠪᠦᠳᠦᠭᠡᠯᠨᠢ ᠭᠡᠳᠦᠨ ᠠᠷᠪᠠᠨ ᠵᠢᠯᠤᠨ ᠳᠠᠷᠠᠭᠠ ᠪᠤᠶᠤ ᠭᠡᠳᠦᠨ ᠵᠠᠭᠤᠨ ᠵᠢᠯᠤᠨ ᠳᠠᠷᠠᠭᠠ ᠳᠠᠭ ᠴᠢᠮᠡᠭᠡ ᠦᠭᠡᠢ ᠪᠤᠯᠵᠤ ᠳᠡᠦᠭᠡᠨ ᠳᠤᠭᠤᠰᠤᠨᠳᠤ ᠳᠠᠷᠤᠭ᠍ᠳᠠᠴᠢᠬᠠᠳᠠᠭ᠃ ᠤᠯᠠᠩᠬᠢ ᠳᠡᠯᠭᠡᠷᠡᠮᠡᠯ ᠵᠤᠬᠢᠶᠠᠯ᠂ ᠬᠢᠯᠪᠠᠷᠴᠢᠯᠠᠭ᠍ᠰᠠᠨ ᠪᠦᠳᠦᠭᠡᠯ ᠪᠤᠶᠤ ᠠᠯᠪᠠᠨᠤ ᠳᠠᠯᠠᠠᠴᠠ 《ᠵᠤᠷᠢᠭᠤᠳᠠ ᠳᠠᠷᠬᠠᠨᠴᠢᠯᠠᠭ᠍ᠰᠠᠨ》 ᠪᠦᠳᠦᠭᠡᠯᠨᠢ ᠡᠢᠮᠦᠷᠬᠦᠦ 《ᠴᠤᠤᠳᠤ ᠪᠦᠳᠦᠭᠡᠯ》 ᠪᠠᠢᠳᠠᠭ᠃ ᠠᠩᠭ᠌ᠯᠢᠶ᠋ᠢᠨ ᠨᠡᠷᠡᠳᠤ ᠱᠢᠬᠦᠮᠵᠢᠯᠡᠭ᠌ᠴᠢ ᠰᠠᠮᠢᠤᠯ · ᠵᠤᠨᠰᠤᠨᠤ ᠦᠵᠡᠬᠦ᠌ᠪᠠᠷ ᠰᠤᠩᠭᠤᠳᠠᠭ ᠪᠦᠳᠦᠭᠡᠯᠨᠢ ᠬᠠᠮᠤᠭᠤᠨ ᠨᠠᠭᠠᠳᠤ ᠵᠠᠬᠠᠨᠢ ᠵᠠᠭᠤᠨ ᠵᠢᠯᠤᠨ ᠱᠢᠯᠭᠠᠯᠳᠠᠶ᠋ᠢ ᠳᠠᠭᠠᠭᠠᠬᠤ ᠭᠡᠷᠡᠭ᠌ᠳᠡᠢ᠃ ᠦᠭᠡᠷᠡᠪᠠᠷ ᠭᠡᠯᠡᠪᠡᠯ᠂ ᠪᠦᠳᠦᠭᠡᠯ ᠨᠡᠢᠳᠡᠯᠡᠭ᠌ᠳᠡᠭ᠌ᠰᠡᠨᠤ ᠵᠠᠭᠤᠨ ᠵᠢᠯᠤᠨ ᠳᠠᠷᠠᠭᠠ ᠴᠤ᠌ ᠬᠦᠮᠦᠰᠤᠨ ᠬᠠᠯᠠᠭᠤᠨ ᠰᠡᠳᠭᠢᠯ ᠪᠠᠭᠤᠷᠠᠭᠠ ᠦᠭᠡᠢ᠂ ᠳᠠᠰᠤᠷᠠᠯᠳᠠ ᠦᠭᠡᠢ ᠰᠤᠳᠤᠯᠤᠨ ᠶᠠᠷᠢᠯᠴᠠᠵᠤ ᠤᠩᠱᠢᠵᠤ ᠪᠠᠢᠬᠤ ᠭᠡᠷᠡᠭ᠌ᠳᠡᠢ ᠭᠡᠨᠡ； ᠭᠤᠷᠪᠠᠳᠤᠭᠠᠷ ᠪᠠᠷᠢᠮᠵᠢᠶᠡᠨᠢ ᠤᠷᠤᠨᠢ ᠳᠠᠪᠠᠭ᠍ᠰᠠᠨ ᠪᠠᠷᠢᠮᠵᠢᠶᠡ᠃ ᠵᠢᠩᠬᠢᠨᠢ ᠰᠤᠩᠭᠤᠳᠠᠭ ᠪᠦᠳᠦᠭᠡᠯᠨᠢ ᠳᠡᠦᠭᠡᠨ ᠱᠢᠯᠭᠠᠯᠳᠠᠶ᠋ᠢ ᠳᠠᠭᠠᠭᠠᠬᠤᠪᠠᠷ ᠪᠠᠷᠠᠬᠤ ᠦᠭᠡᠢ᠂ ᠤᠯᠤᠰ ᠦᠨᠳᠦᠰᠦᠳᠡᠨᠤ ᠬᠢᠵᠠᠭᠠᠷᠢ ᠳᠠᠪᠠᠵᠤ ᠪᠦᠬᠦ᠌ ᠬᠦᠮᠦᠨ ᠳᠦᠷᠦᠯᠬᠢᠳᠡᠨᠳᠤ ᠬᠦᠯᠢᠶᠡᠭ᠌ᠳᠡᠬᠦ᠌ 《ᠳᠦᠭᠡᠮᠡᠯ ᠱᠢᠨᠵᠢ》 ᠲᠠᠢ ᠪᠠᠢᠬᠤ ᠭᠡᠷᠡᠭ᠌ᠳᠡᠢ᠂ ᠳᠠᠩ ᠭᠠᠭ᠍ᠴᠠ ᠶᠠᠮᠠᠷ ᠨᠢᠭᠡᠨ ᠦᠨᠳᠦᠰᠦᠳᠡᠨᠳᠤ ᠳᠤᠬᠢᠷᠠᠳᠠᠭ 《ᠰᠤᠩᠭᠤᠳᠠᠭ ᠪᠦᠳᠦᠭᠡᠯ》 ᠨᠢ ᠵᠢᠩᠬᠢᠨᠢ ᠶᠤᠰᠤᠨᠤ ᠰᠤᠩᠭᠤᠳᠠᠭ ᠪᠦᠳᠦᠭᠡᠯ ᠪᠢᠰᠢ ᠪᠠᠢᠯᠳᠠᠢ᠃
ᠬᠤᠶᠠᠳᠤᠭᠠᠷ ᠳᠤᠮᠤ ᠠᠰᠠᠭᠤᠳᠠᠯ ᠪᠤᠯ 《ᠭᠡᠨ》 （ᠪᠠᠢᠭᠤᠯᠤᠮᠵᠢ） ᠬᠢᠨᠠᠨ ᠳᠤᠭ᠍ᠳᠠᠭᠠᠬᠤ ᠪᠤᠢ ᠭᠡᠳᠡᠭ ᠠᠰᠠᠭᠤᠳᠠᠯ ᠪᠤᠯᠤᠨᠠ᠃ ᠡᠬᠦᠨᠳᠤ ᠭᠤᠤᠯᠳᠠᠭᠤ ᠬᠤᠶᠡᠷ ᠳᠤᠮᠤ ᠬᠦᠴᠦᠨ ᠵᠦᠢᠯ ᠤᠷᠤᠱᠢᠨᠠ᠃ ᠨᠢᠭᠡᠨᠢ᠂ ᠮᠡᠳᠡᠯᠭᠡᠶ᠋ᠢᠨ ᠡᠷᠭᠡ ᠰᠦᠷᠳᠡᠨ — ᠮᠡᠷᠭᠡᠵᠢᠯᠤᠨ ᠳᠠᠷᠬᠠᠳ ᠬᠢᠨᠠᠨ ᠳᠤᠭ᠍ᠳᠠᠭᠠᠨᠠ； ᠬᠤᠶᠡᠷᠨᠢ᠂ ᠪᠠᠢᠭᠤᠯᠤᠮᠵᠢᠶ᠋ᠢᠨ ᠡᠷᠭᠡ ᠰᠦᠷᠳᠡᠨ — ᠠᠯᠪᠠᠨ ᠵᠠᠰᠠᠭᠠᠴᠠ ᠬᠢᠨᠠᠨ ᠳᠤᠭ᠍ᠳᠠᠭᠠᠨᠠ᠃ ᠤᠯᠠᠩᠬᠢ ᠪᠠᠢᠳᠠᠯᠳᠤ ᠳᠡᠭᠡᠷᠡᠬᠢ ᠬᠤᠶᠡᠷ ᠬᠦᠴᠦᠨᠢ ᠢᠯᠭᠠᠨ ᠰᠠᠯᠭᠠᠬᠤᠳᠤ ᠬᠦᠴᠢᠷᠳᠡᠢ᠃ ᠳᠠᠩ ᠭᠠᠭ᠍ᠴᠠ ᠠᠯᠪᠠᠨ ᠵᠠᠰᠠᠭᠠᠴᠠ ᠬᠢᠨᠠᠨ ᠳᠤᠭ᠍ᠳᠠᠭᠠᠭ᠍ᠰᠠᠨ 《ᠰᠤᠩᠭᠤᠳᠠᠭ》 ᠪᠦᠳᠦᠭᠡᠯᠨᠢ ᠮᠡᠷᠭᠡᠵᠢᠯᠤᠨ ᠳᠠᠷᠬᠠᠳᠤᠨ ᠵᠦᠪᠱᠢᠶᠡᠷᠡᠯᠢ ᠤᠯᠬᠤ ᠦᠭᠡᠢ ᠪᠤᠯ ᠠᠶᠠᠨᠳᠠᠭᠠᠨ ᠳᠡᠦᠭᠡᠨ ᠳᠠᠢᠰᠠᠨᠠᠴᠠ ᠠᠷᠢᠯᠵᠤ ᠤᠳᠤᠭᠠ ᠳᠤᠭᠤᠰᠤ ᠪᠤᠯᠤᠨᠠ᠃
ᠭᠤᠷᠪᠠᠳᠤᠭᠠᠷᠨᠢ 《ᠭᠡᠷᠬᠢᠨ》 （ᠠᠷᠭᠠ ᠭᠡᠮᠵᠢᠶᠡ） ᠬᠢᠨᠠᠨ ᠳᠤᠭ᠍ᠳᠠᠭᠠᠭ᠍ᠰᠠᠨ ᠭᠡᠳᠡᠭ ᠠᠰᠠᠭᠤᠳᠠᠯ᠂ ᠳᠠᠷᠤᠢ ᠰᠤᠩᠭᠤᠳᠠᠭ᠍ᠵᠢᠭᠤᠯᠤᠯᠤᠨ ᠠᠵᠢᠯᠯᠠᠭᠠᠶ᠋ᠢᠨ ᠠᠰᠠᠭᠤᠳᠠᠯ ᠪᠤᠯᠤᠨᠠ᠃ ᠬᠠᠮᠤᠭᠤᠨ ᠦᠷᠡ ᠪᠦᠳᠦᠮᠵᠢᠲᠠᠢᠨᠢ ᠤᠷᠠᠨ ᠵᠤᠬᠢᠶᠠᠯᠤᠨ ᠳᠡᠦᠭᠡᠪᠠᠷ ᠳᠠᠷᠬᠠᠯᠠᠬᠤ ᠠᠷᠭᠠ᠃ ᠡᠬᠦᠨᠢ 《ᠳᠡᠦᠭᠡᠴᠢᠯᠡᠨ ᠳᠠᠷᠬᠠᠯᠠᠬᠤ ᠠᠷᠭᠠ》 ᠭᠡᠮᠡᠨ ᠨᠡᠷᠡᠢᠳᠴᠤ᠌ ᠪᠤᠯᠤᠨᠠ᠃ ᠳᠡᠦᠭᠡᠴᠢᠯᠡᠨ ᠳᠠᠷᠬᠠᠯᠠᠬᠤ ᠠᠷᠭᠠᠨᠢ ᠶᠡᠭᠡ ᠳᠦᠯᠦᠪ ᠭᠤᠷᠪᠠᠨ ᠠᠯᠬᠤᠮᠢᠶᠠᠷ ᠪᠡᠶᠡᠯᠡᠭ᠌ᠳᠡᠨᠡ᠃ ᠶᠠᠭᠤᠨᠤ ᠡᠮᠦᠨᠡ ᠰᠤᠳᠤᠯᠤᠨ ᠱᠢᠬᠦᠮᠵᠢᠯᠡᠵᠦ᠍᠂ ᠳᠠᠷᠠᠭᠠᠨᠢ ᠤᠷᠠᠨ ᠵᠤᠬᠢᠶᠠᠯᠤᠨ ᠳᠡᠦᠭᠡᠳᠤ ᠳᠠᠷᠬᠠᠯᠠᠨ ᠤᠷᠤᠭᠤᠯᠵᠤ᠂ ᠭᠤᠳᠠᠭᠠᠷᠲᠤ ᠶᠡᠭᠡ ᠰᠤᠷᠭᠠᠭᠤᠯᠢᠶ᠋ᠢᠨ ᠰᠤᠷᠬᠤ ᠪᠢᠴᠢᠭ ᠪᠤᠯᠭᠠᠵᠤ ᠰᠤᠩᠭᠤᠳᠠᠭ ᠪᠠᠢᠷᠢ ᠰᠠᠭᠤᠷᠢᠶ᠋ᠢᠨᠢ ᠳᠤᠭ᠍ᠳᠠᠭᠠᠬᠤ᠃ ᠡᠬᠦᠨᠠᠴᠠ ᠭᠠᠳᠠᠨᠠ᠂ 《ᠡᠷᠭᠡ ᠰᠦᠷᠳᠤ ᠰᠤᠩᠭᠤᠮᠠᠯᠳᠤ ᠤᠷᠤᠭᠤᠯᠬᠤ ᠠᠷᠭᠠ》᠂ 《ᠱᠠᠩᠨᠠᠨ ᠬᠦᠬᠢᠬᠦᠯᠬᠦ᠌ ᠠᠷᠭᠠ》᠂ 《ᠪᠠᠭᠠ ᠳᠤᠮᠳᠠᠳᠤ ᠰᠤᠷᠭᠠᠭᠤᠯᠢᠶ᠋ᠢᠨ ᠰᠤᠷᠬᠤ ᠪᠢᠴᠢᠭᠲᠤ ᠤᠷᠤᠭᠤᠯᠬᠤ ᠠᠷᠭᠠ》 ᠭᠡᠬᠦ᠌ ᠮᠡᠳᠦ ᠤᠯᠠᠨ ᠠᠷᠭᠠ ᠵᠠᠮ ᠪᠠᠢᠳᠠᠭ᠃
ᠤᠬᠤᠷᠬᠠᠨ ᠱᠢᠭ᠋ 《ᠴᠠᠭ ᠦᠶᠡᠴᠢᠯᠡᠯ》 ᠳᠤ ᠠᠪᠴᠤ᠌ ᠦᠵᠡᠪᠡᠯ᠂ 《ᠰᠤᠩᠭᠤᠳᠠᠭ᠍ᠵᠢᠭᠤᠯᠬᠤ》 ᠠᠵᠢᠯᠯᠠᠭᠠᠨᠢ ᠭᠤᠸᠠ ᠵᠦᠢᠶ᠋ᠢᠨ ᠪᠤᠰᠤ᠂ ᠤᠷᠠᠯᠢᠭᠤᠨ ᠪᠤᠰᠤ᠂ ᠮᠡᠷᠭᠡᠵᠢᠯᠤᠨ ᠪᠤᠰᠤ ᠡᠯᠧᠮᠧᠨ᠋ᠲᠤᠨ ᠬᠠᠷᠱᠢᠯᠠᠯᠳᠤ ᠤᠴᠠᠷᠠᠬᠤᠨᠢ ᠯᠠᠪᠳᠠᠢ ᠪᠠᠢᠵᠤ ᠴᠦᠭᠡᠨ ᠪᠤᠰᠤ 《ᠴᠠᠭ ᠦᠶᠡᠶ᠋ᠢᠨ》 ᠰᠤᠩᠭᠤᠳᠠᠭ ᠪᠤᠶᠤ ᠬᠠᠭᠤᠷᠮᠠᠭ ᠰᠤᠩᠭᠤᠳᠠᠭ — ᠵᠤᠬᠢᠶᠠᠯᠴᠢ ᠪᠠ ᠵᠤᠬᠢᠶᠠᠯ ᠪᠦᠳᠦᠭᠡᠯᠢ 《ᠳᠠᠷᠬᠠᠯᠠᠳᠠᠭ》᠃ ᠡᠨᠡᠨᠢ ᠳᠡᠯᠡᠭᠡᠢᠶ᠋ᠢᠨ ᠤᠷᠠᠨ ᠵᠤᠬᠢᠶᠠᠯᠤᠨ ᠳᠡᠦᠭᠡᠨᠳᠤ ᠴᠤ᠌ ᠮᠠᠰᠢ ᠳᠦᠭᠡᠮᠡᠯ ᠦᠵᠡᠭ᠌ᠳᠡᠯ᠃ ᠭᠡᠪᠡᠴᠤ᠌ ᠤᠷᠳᠤ 《ᠴᠠᠭ ᠦᠶᠡᠴᠢᠯᠡᠯ》 — ᠭᠡᠳᠦᠨ ᠵᠠᠭᠤᠨ ᠵᠢᠯ᠂ ᠴᠢᠨᠠᠭ᠍ᠰᠢᠯᠠᠨ ᠮᠢᠩᠭᠠᠨ ᠵᠢᠯᠢᠶᠠᠷ ᠭᠡᠮᠵᠢᠶᠡᠯᠡᠬᠦ᠌ ᠦᠶᠡᠳᠤ᠂ 《ᠴᠠᠭ ᠦᠶᠡᠶ᠋ᠢᠨ》 ᠭᠡᠮᠡᠭ᠌ᠳᠡᠭ᠌ᠰᠡᠨ ᠬᠠᠭᠤᠷᠮᠠᠭ ᠰᠤᠩᠭᠤᠳᠠᠭᠨᠢ ᠠᠶᠠᠨᠳᠠᠭᠠᠨ ᠳᠡᠦᠭᠡᠨ ᠱᠢᠭ᠌ᠰᠢᠭᠡᠨᠳᠤ ᠬᠠᠶᠠᠭ᠍ᠳᠠᠵᠤ᠂ ᠵᠢᠩᠬᠢᠨᠢ ᠰᠤᠩᠭᠤᠳᠠᠭᠨᠢ ᠳᠤᠨᠤᠵᠤ ᠦᠯᠡᠳᠡᠳᠡᠭ᠃ ᠳᠡᠦᠭᠡᠶ᠋ᠢᠨ ᠤᠷᠳᠤ ᠬᠠᠷᠠᠭᠠᠯᠠᠯ ᠪᠠ ᠴᠠᠭ ᠦᠶᠡᠶ᠋ᠢᠨ ᠤᠢᠷᠠ ᠬᠠᠷᠠᠭᠠᠯᠠᠯ ᠬᠤᠶᠡᠷᠢ ᠳᠤᠬᠢᠷᠠᠮᠵᠢᠳᠠᠢ ᠤᠶᠠᠯᠳᠤᠭᠤᠯᠵᠦ᠍᠂ ᠭᠤᠸᠠ ᠰᠠᠢᠬᠠᠨᠤ 《ᠪᠢᠯᠢᠭᠤᠨ ᠨᠢᠳᠤ》 ᠪᠠᠷ ᠨᠡᠪᠳᠡ ᠳᠤᠯᠢᠳᠠᠵᠤ ᠴᠢᠳᠠᠪᠠᠯ 《ᠰᠤᠩᠭᠤᠳᠠᠭ》 ᠢ ᠨᠡᠩ ᠤᠨᠤᠪᠴᠢᠳᠠᠢ ᠡᠵᠡᠮᠳᠡᠵᠦ᠍ ᠴᠢᠳᠠᠨᠠ᠃
1947 ᠤᠨᠠᠴᠠ ᠡᠬᠢᠯᠡᠵᠦ᠍ ᠪᠤᠳᠤᠪᠠᠯ᠂ ᠮᠤᠩᠭᠤᠯ ᠦᠨᠳᠦᠰᠦᠳᠡᠨᠤ ᠤᠳᠤ ᠦᠶᠡᠶ᠋ᠢᠨ ᠤᠷᠠᠨ ᠵᠤᠬᠢᠶᠠᠯ ᠳᠠᠯᠠᠨ ᠭᠡᠳᠦᠭᠡᠨ ᠵᠢᠯᠤᠨ ᠳᠡᠦᠭᠡᠲᠠᠢ ᠪᠤᠯᠵᠤ ᠪᠤᠢ᠃ ᠰᠠᠮᠢᠤᠯ · ᠵᠤᠨᠰᠤᠨᠤ 《ᠬᠠᠮᠤᠭ ᠨᠠᠭᠠᠳᠤ ᠵᠠᠬᠠᠨᠢ ᠵᠠᠭᠤᠨ ᠵᠢᠯᠤᠨ ᠱᠢᠯᠭᠠᠯᠳᠠ》 ᠭᠡᠳᠡᠭ ᠪᠠᠷᠢᠮᠵᠢᠶᠡᠪᠠᠷ ᠭᠡᠮᠵᠢᠪᠡᠯ᠂ ᠦᠨᠦᠳᠦᠷ ᠪᠢᠳᠡ ᠤᠳᠤ ᠦᠶᠡᠶ᠋ᠢᠨ 《ᠰᠤᠩᠭᠤᠳᠠᠭ》 ᠢ ᠶᠠᠷᠢᠯᠴᠠᠬᠤ ᠴᠠᠭ ᠬᠤᠭᠤᠴᠠᠭᠠ ᠠᠷᠠᠢ ᠪᠤᠯᠤᠭᠠ ᠦᠭᠡᠢ ᠪᠠᠢᠨᠠ᠃ ᠭᠡᠪᠡᠴᠤ᠌ ᠨᠢᠭ᠍ᠳᠠᠯᠠᠨ ᠦᠵᠡᠪᠡᠯ 《ᠳᠡᠦᠭᠡᠶ᠋ᠢᠨ ᠱᠢᠯᠭᠠᠯᠳᠠ》 ᠭᠡᠳᠡᠭ ᠪᠤᠯ ᠨᠢᠭᠡ ᠬᠡᠢᠰᠪᠦᠷᠢ ᠤᠬᠠᠭ᠍ᠳᠠᠬᠤᠨ ᠳᠡᠳᠦᠢ᠃ ᠳᠡᠦᠭᠡᠶ᠋ᠢᠨ ᠱᠢᠯᠭᠠᠯᠳᠠᠨᠢ ᠡᠴᠦᠰᠤᠨ ᠡᠴᠦᠰᠲᠡᠭᠡᠨ ᠤᠷᠠᠨ ᠪᠦᠳᠦᠭᠡᠯᠤᠨ ᠳᠤᠰ ᠴᠠᠭ ᠦᠶᠡᠶ᠋ᠢᠨ ᠦᠨᠡᠯᠡᠯᠳᠡ ᠬᠢᠭᠡᠳ ᠳᠠᠰᠤᠷᠠᠯᠳᠠ ᠦᠭᠡᠢ ᠳᠠᠬᠢᠨ ᠦᠨᠡᠯᠡᠯᠳᠡ ᠳᠡᠭᠡᠷᠡ ᠪᠤᠢ ᠪᠤᠯᠳᠠᠭ᠃ ᠡᠢᠮᠤᠠᠴᠠ ᠪᠢᠳᠡ ᠱᠢᠭ 《ᠳᠤᠰ ᠴᠠᠭ ᠦᠶᠡᠶ᠋ᠢᠨ ᠮᠡᠷᠭᠡᠵᠢᠯᠳᠡᠨ》 ᠤ ᠦᠨᠡᠯᠡᠯᠳᠡᠨᠢ ᠮᠦᠨ ᠴᠤ᠌ 《ᠳᠡᠦᠭᠡᠶ᠋ᠢᠨ ᠦᠨᠡᠯᠡᠯᠳᠡ》 ᠶ᠋ᠢᠨ ᠵᠦᠢ ᠶᠤᠰᠤᠨᠤ ᠨᠢᠭᠡᠨ ᠭᠡᠰᠡᠭ᠂ ᠴᠢᠨᠠᠭ᠍ᠰᠢᠯᠠᠨ ᠬᠠᠮᠤᠭᠤᠨ ᠴᠢᠬᠤᠯᠠ ᠨᠢᠭᠡᠨ ᠭᠡᠰᠡᠭ ᠶᠤᠮ᠃ ᠵᠦᠪᠭᠡᠨ ᠪᠢᠳᠡᠨᠤ ᠰᠤᠩᠭᠤᠳᠠᠭᠢ ᠬᠢᠨᠠᠨ ᠳᠤᠭ᠍ᠳᠠᠭᠠᠭ᠍ᠰᠠᠨ ᠪᠠᠷᠢᠮᠵᠢᠶᠡᠨᠢ ᠶᠡᠭᠡᠪᠴᠢᠯᠡᠨ ᠭᠤᠸᠠ ᠵᠦᠢᠶ᠋ᠢᠨ᠂ ᠤᠷᠠᠯᠢᠭᠤᠨ᠂ ᠮᠡᠷᠭᠡᠵᠢᠯᠤᠨ ᠪᠠᠢᠳᠠᠭ ᠪᠤᠯ ᠡᠨᠡ ᠬᠦ᠌ ᠬᠢᠨᠠᠨ ᠳᠤᠭ᠍ᠳᠠᠭᠠᠯᠳᠠᠨᠢ ᠬᠦᠴᠦᠨᠲᠠᠢ ᠪᠠᠢᠬᠤᠨᠢ ᠶᠠᠷᠢᠶᠠᠨ ᠦᠭᠡᠢ᠃
ᠤᠳᠤ ᠦᠶᠡᠶ᠋ᠢᠨ ᠤᠷᠠᠨ ᠵᠤᠬᠢᠶᠠᠯᠳᠤ 《ᠰᠤᠩᠭᠤᠳᠠᠭ》 — ᠰᠤᠩᠭᠤᠳᠠᠭ ᠵᠤᠬᠢᠶᠠᠯᠴᠢ ᠪᠠ ᠰᠤᠩᠭᠤᠳᠠᠭ ᠪᠦᠳᠦᠭᠡᠯ ᠪᠠᠢᠬᠤ ᠤᠤ？ ᠬᠡᠪᠡᠯ᠂ ᠮᠢᠨᠤ ᠪᠤᠳᠤᠬᠤᠪᠠᠷ ᠪᠠᠢᠨᠠ᠃ ᠰᠤᠩᠭᠤᠳᠠᠭᠢ ᠳᠤᠭ᠍ᠳᠠᠭᠠᠬᠤ ᠪᠠᠷᠢᠮᠵᠢᠶᠡ ᠳᠦᠮᠡ ᠮᠢᠩᠭᠠ ᠪᠠᠢᠭ᠍ᠰᠠᠨ ᠴᠤ᠌ ᠬᠠᠮᠤᠭᠤᠨ ᠴᠢᠬᠤᠯᠠᠨᠢ ᠨᠢᠭᠡᠨ ᠵᠦᠢᠯ᠂ ᠳᠠᠷᠤᠢ ᠤᠷᠠᠨ ᠵᠤᠬᠢᠶᠠᠯᠤᠨ ᠳᠡᠦᠭᠡᠶ᠋ᠢᠨ ᠳᠠᠷᠬᠠᠯᠠᠯ᠃ ᠳᠡᠦᠭᠡᠨᠳᠤ ᠳᠠᠷᠬᠠᠯᠠᠭ᠍ᠳᠠᠭ᠍ᠰᠠᠨ ᠵᠤᠬᠢᠶᠠᠯᠴᠢ ᠪᠠ ᠵᠤᠬᠢᠶᠠᠯ ᠪᠦᠳᠦᠭᠡᠯᠨᠢ ᠳᠠᠷᠤᠢ 《ᠰᠤᠩᠭᠤᠳᠠᠭ》 ᠮᠦᠨ᠃ ᠦ᠊ · ᠱᠤᠭᠠᠷᠠ᠂ ᠰᠦᠶᠦᠭᠡ᠂ ᠮ᠊ · ᠵᠠᠯᠫᠦ᠋ᠩᠭᠠ ᠵᠡᠷᠭᠡ ᠤᠷᠠᠨ ᠵᠤᠬᠢᠶᠠᠯᠤᠨ ᠳᠡᠦᠭᠡᠴᠢᠳᠤᠨ ᠠᠳᠠᠯᠢ ᠪᠤᠰᠤᠪᠠᠷ ᠭᠡᠪᠯᠡᠯᠤᠨ 《ᠮᠤᠩᠭᠤᠯ ᠦᠨᠳᠦᠰᠦᠳᠡᠨᠤ ᠤᠳᠤ ᠦᠶᠡᠶ᠋ᠢᠨ ᠤᠷᠠᠨ ᠵᠤᠬᠢᠶᠠᠯᠤᠨ ᠳᠡᠦᠭᠡ》 ᠳᠤ ᠶᠡᠭᠡ ᠳᠦᠯᠦᠪ ᠠᠳᠠᠯᠢᠪᠳᠤᠷ ᠵᠤᠬᠢᠶᠠᠯᠴᠢ ᠪᠠ ᠵᠤᠬᠢᠶᠠᠯ ᠪᠦᠳᠦᠭᠡᠯᠢ ᠰᠤᠩᠭᠤᠨ ᠳᠠᠷᠬᠠᠯᠠᠭ᠍ᠰᠠᠨ ᠪᠠᠢᠪᠠ᠃ ᠡᠬᠦᠨᠳᠤ ᠪᠠᠢᠷᠢ ᠳᠤᠭ᠍ᠳᠠᠭᠠᠯᠳᠠ᠂ ᠰᠤᠩᠭᠤᠯᠳᠠ ᠪᠠ ᠦᠨᠡᠯᠡᠯᠳᠡᠶ᠋ᠢᠨ ᠳᠠᠯᠠᠪᠠᠷ ᠡᠳᠦᠢ ᠳᠡᠳᠦᠢ ᠢᠯᠭᠠᠭᠠ ᠪᠠ ᠵᠦᠷᠢᠶᠡᠲᠠᠢ ᠴᠤ᠌᠂ ᠶᠡᠷᠦᠩᠭᠡᠢ ᠵᠠᠷᠴᠢᠮ ᠪᠠ ᠭᠡᠪᠱᠢᠯᠤᠨ ᠳᠠᠯᠠᠪᠠᠷ ᠨᠢᠭᠡᠳᠦᠯᠳᠡᠢ᠃ ᠡᠨᠡᠨᠢ ᠦᠨᠡᠯᠡᠭ᠌ᠳᠡᠬᠦᠨ ᠪᠠ ᠦᠨᠡᠯᠡᠭ᠌ᠴᠢᠶ᠋ᠢᠨ ᠬᠤᠭᠤᠷᠤᠨᠳᠤᠬᠢ᠂ ᠠᠳᠠᠯᠢ ᠪᠤᠰᠤ ᠦᠨᠡᠯᠡᠭ᠌ᠴᠢᠶ᠋ᠢᠨ ᠬᠤᠭᠤᠷᠤᠨᠳᠤᠬᠢ ᠵᠠᠢᠨᠢ ᠭᠡᠳᠦ ᠤᠢᠷᠠᠠᠴᠠ ᠪᠤᠯᠤᠭ᠍ᠰᠠᠨ 《ᠠᠳᠠᠯᠢᠱᠢᠯ》 ᠤᠨ ᠦᠵᠡᠭ᠌ᠳᠡᠯ ᠶᠤᠮ᠃
ᠡᠢᠮᠤᠠᠴᠠ᠂ ᠦᠨᠦᠳᠦᠷ ᠪᠢᠳᠡ ᠪᠦᠬᠦᠨᠤ ᠦᠨᠡᠯᠡᠵᠦ᠍ ᠪᠠᠢᠭᠠ 《ᠰᠤᠩᠭᠤᠳᠠᠭ》 — ᠨᠠ᠊ · ᠰᠠᠢᠨᠴᠤᠭ᠍ᠳᠤ᠂ ᠠ᠊ · ᠤᠳᠽᠡᠷ᠂ ᠪ᠊ · ᠪᠦᠷᠢᠨᠪᠠᠬᠢ᠂ ᠴᠢᠮᠡᠳᠳᠤᠷᠵᠢ᠂ ᠮᠠᠯᠴᠢᠨᠬᠦᠦ᠂ ᠳᠤᠭᠠᠷᠰᠦ᠋ᠷᠦᠩ᠂ ᠭᠡᠷᠡᠯᠴᠤᠭ᠍ᠳᠤ᠂ ᠴᠤᠭ᠍ᠳᠤᠨᠠᠷᠠᠨ᠂ ᠨ᠊ · ᠰᠠᠢᠱᠢᠶᠠᠯᠳᠤ᠂ ᠬᠠ᠊ · ᠳ᠋ᠠᠮᠪᠢᠵᠠᠯᠰᠠᠨ᠂ ᠮ᠊ · ᠠᠰᠠᠷ᠂ ᠠᠷᠳᠠᠢ᠂ ᠴᠢ᠊ · ᠮᠡᠷᠭᠡᠨ᠂ ᠯ᠊ · ᠤᠳᠽᠡᠷ᠂ ᠨᠤᠯᠮᠠᠰᠡᠷᠡᠩ᠂ ᠨᠠ᠊ · ᠰᠤᠩᠳᠤᠢ᠂ ᠠᠶᠤᠩᠭᠠ᠂ ᠯᠢᠭ᠌ᠳᠡᠨ᠂ ᠰᠠᠢᠨᠪᠠᠶᠠᠷ᠂ ᠪᠠᠳᠤᠮᠦᠩᠭᠡ᠂ ᠪᠦᠭᠡᠳᠡᠯᠭᠡᠷ᠂ ᠮ᠊ · ᠬᠠᠰᠪᠠᠭᠠᠨᠠ᠂ ᠤᠶᠠᠭᠠᠳᠠᠢ᠂ ᠭᠠ᠊ · ᠱᠢᠷᠠᠪᠵᠠᠮᠰᠤ᠂ ᠪᠠᠳᠪᠠ᠂ ᠪ᠊ · ᠭᠡᠷᠡᠯᠳᠦ᠂ ᠮᠠᠨᠳᠤᠮᠤᠢ᠂ ᠴᠢ᠊ · ᠤᠳᠭᠤᠨᠴᠢᠮᠡᠭ᠂ ᠰᠤᠪᠤᠳ᠂ ᠪᠦᠷᠢᠨᠳᠡᠬᠦᠰ᠂ ᠪ᠊ · ᠵᠤᠷᠢᠭ᠍ᠳᠤ᠂ ᠦᠯᠵᠡᠢᠪᠦ᠋ᠷᠢᠨ᠂ ᠪ᠊ · ᠪᠤᠶᠠᠨᠬᠡᠱᠢᠭ᠂ ᠳ᠋᠊ · ᠰᠡᠷᠡᠨᠸᠠᠩᠵᠢᠯ᠂ ᠲ᠊ · ᠭᠤᠮᠪᠤᠵᠠᠪ᠂ ᠰ᠊ · ᠤᠳᠭᠤᠨᠪᠠᠶᠠᠷ᠂ ᠷᠢᠨ᠊ · ᠰᠡᠴᠡᠨᠴᠤᠭ᠍ᠳᠤ ᠨᠠᠷᠨᠢ ᠴᠠᠭ ᠦᠶᠡᠶ᠋ᠢᠨ ᠤᠢᠷᠠ ᠬᠠᠷᠠᠭᠠᠯᠠᠯᠠᠴᠠ ᠬᠢᠨᠠᠨ ᠳᠤᠭ᠍ᠳᠠᠭᠠᠭ᠍ᠳᠠᠭ᠍ᠰᠠᠨ 《ᠴᠠᠭ ᠦᠶᠡᠶ᠋ᠢᠨ ᠰᠤᠩᠭᠤᠳᠠᠭ》 ᠵᠤᠬᠢᠶᠠᠯᠴᠢ ᠪᠤᠯᠬᠤᠨᠢ ᠯᠠᠪᠳᠠᠢ᠃ ᠳᠡᠳᠡ ᠨᠡᠷᠤᠨ ᠳᠤᠮᠳᠠᠠᠴᠠ 《ᠵᠢᠩᠬᠢᠨᠢ ᠰᠤᠩᠭᠤᠳᠠᠭ》 ᠪᠤᠯᠵᠤ ᠵᠠᠷᠢᠮᠨᠢ ᠳᠤᠨᠤᠵᠤ ᠦᠯᠡᠳᠡᠨᠡ᠂ ᠳᠡᠳᠡᠨᠡᠷᠤᠨ ᠪᠦᠳᠦᠭᠡᠯᠠᠴᠠ ᠤᠨᠴᠠ ᠵᠠᠷᠢᠮᠨᠢ ᠤᠨ ᠴᠠᠭᠤᠨ ᠳᠤᠭᠤᠰᠤᠨᠳᠤ ᠪᠤᠯᠠᠭ᠍ᠳᠠᠯ ᠦᠭᠡᠢ ᠮᠦᠩᠭᠡᠶ᠋ᠢᠨ ᠬᠢᠯᠪᠠᠭᠠᠲᠠᠢ ᠪᠤᠯᠵᠤ ᠢᠯᠡᠷᠡᠨᠡ᠃ ᠭᠡᠪᠡᠴᠤ᠌ ᠡᠨᠡᠨᠢ ᠳᠡᠦᠭᠡᠶ᠋ᠢᠨ ᠤᠷᠳᠤ ᠬᠠᠷᠠᠭᠠᠯᠠᠯᠤᠨ ᠳ᠋ᠦᠩ ᠤᠴᠢᠷ ᠦᠨᠦᠳᠦᠷ ᠪᠢᠳᠡ ᠤᠨᠢᠰᠤᠭᠠ ᠳᠠᠭᠠᠵᠤ ᠪᠠᠢᠭᠠ ᠶᠤᠮ ᠱᠢᠭ᠋ 《ᠭᠡᠨ ᠭᠡᠨ》 ᠭᠡᠵᠦ᠍ ᠵᠢᠭᠠᠨ ᠨᠡᠷᠡᠯᠡᠬᠦ᠌ᠨᠢ ᠢᠨᠢᠶᠡᠳᠦᠮᠳᠡᠢ᠃ ᠬᠦᠮᠦᠨ ᠪᠦᠬᠦᠨ ᠦᠪᠡᠷᠤᠨᠢᠶᠠᠨ ᠳᠠᠭᠠᠪᠤᠷᠢᠲᠠᠢ ᠪᠦᠭᠡᠳ ᠡᠯᠡ ᠵᠤᠬᠢᠶᠠᠯᠴᠢᠳ ᠴᠦᠮ ᠪᠡᠶᠡᠳᠡᠭᠡᠨ ᠢᠳᠡᠭᠡᠯᠲᠠᠢᠨᠢ ᠶᠠᠷᠢᠶᠠᠨ ᠦᠭᠡᠢ᠃ ᠭᠡᠪᠡᠴᠤ᠌ ᠳᠡᠦᠭᠡ ᠭᠡᠭ᠌ᠴᠢ ᠶᠠᠭᠤᠮᠠ ᠳᠦᠪ ᠭᠤᠤᠯᠴᠢ ᠮᠦᠷᠳᠡᠭᠡᠨ ᠬᠠᠢᠷᠠ ᠨᠠᠢᠷ ᠦᠭᠡᠢ ᠳᠤᠯᠠ 《ᠮᠢᠳᠠᠷᠠᠰᠢ ᠦᠭᠡᠢ ᠬᠤᠵᠢᠮᠤᠨ ᠮᠡᠷᠭᠡᠳ》 ᠵᠠᠭᠤ ᠮᠢᠩᠭᠠᠨ ᠵᠢᠯᠤᠨ ᠳᠠᠷᠠᠭᠠ ᠳᠡᠳᠡ ᠨᠡᠷᠤᠨ ᠪᠦᠳᠦᠭᠡᠯᠢ ᠤᠢᠭᠠ ᠦᠭᠡᠢ ᠤᠯᠠᠨᠳᠠ 《ᠳᠠᠬᠢᠨ ᠦᠨᠡᠯᠡᠬᠦ᠌》 ᠦᠶᠡᠳᠤ ᠵᠢᠩᠬᠢᠨᠢ ᠰᠤᠩᠭᠤᠳᠠᠭ ᠰᠠᠶᠢ ᠪᠤᠢ ᠪᠤᠯᠤᠨᠠ᠃ ᠠᠳᠡ ᠨᠠᠳᠠᠳᠦ ᠳᠠᠭᠠᠯᠠᠭ᠍ᠳᠠᠭ᠍ᠰᠠᠨ 《ᠰᠤᠩᠭᠤᠳᠠᠭ ᠪᠦᠳᠦᠭᠡᠯ》 ᠤᠳᠢ ᠵᠢᠭ᠍ᠰᠠᠭᠠᠨ ᠦᠷᠦᠵᠦ᠍ ᠲᠠ ᠪᠦᠬᠦᠨᠳᠤ ᠵᠤᠭᠠ ᠪᠤᠯᠭᠠᠰᠤ᠃ 《ᠬᠦᠭᠡ ᠳᠤᠷᠭᠠᠨ ᠳᠡᠷᠯᠢᠭ》᠂ 《ᠡᠷᠡᠯᠭᠡᠭ ᠪᠠᠭᠠᠳᠤᠷ ᠳᠤᠭ᠍ᠴᠢ ᠮᠢᠨᠢ》᠂ 《ᠮᠦᠩᠬᠦᠨ ᠳᠡᠯᠡᠭᠡᠢᠶ᠋ᠢᠨ ᠡᠵᠡᠳ》᠂ 《ᠠᠮᠢᠯᠠᠯᠤᠨ ᠪᠡᠯᠭᠡᠳᠦ ᠴᠡᠴᠡᠭ》᠂ 《ᠪᠤᠳᠢ ᠴᠠᠭᠠᠨ ᠬᠦᠷᠦᠭᠡᠰᠦᠨᠤ ᠨᠠᠮᠳᠠᠷ》᠂ 《ᠪᠠᠭᠠᠷᠢᠨ ᠬᠡᠬᠦᠦᠶ᠋ᠢᠨ ᠤᠨᠠᠭᠠ》᠂ 《ᠵᠠᠯᠠᠭᠤ ᠳᠠᠮᠢᠷᠴᠢᠳ》᠂ 《ᠬᠦᠭ᠌ᠰᠢᠨ ᠬᠤᠩᠭᠤᠷᠤᠨ ᠮᠢᠨᠢ ᠴᠢᠷᠠᠢᠶ᠋ᠢᠨ ᠠᠳᠤᠷᠢᠶᠡ》᠂ 《ᠦᠯᠵᠡᠢᠵᠢᠷᠭᠠᠯᠤᠨ ᠳᠤᠷᠠᠳᠭᠠᠯ》᠂ 《ᠨᠤᠳᠤᠭᠤᠨ ᠵᠤᠨ》 （ᠳᠡᠬᠦᠪᠦᠷᠢ）᠂ 《ᠠᠯᠮᠠᠰᠤᠨ ᠳᠠᠭᠤᠤ》᠂ 《ᠤᠨᠠᠭᠠᠨ ᠪᠦᠷᠢᠳᠦ》᠂ 《ᠡᠵᠢ ᠨᠠᠭᠤᠷ》᠂ 《ᠴᠡᠴᠡᠭ᠌ᠳᠤ ᠳᠠᠯᠠ》᠂ 《ᠭᠡᠭᠡᠨᠤ ᠦᠯᠢᠭᠡᠷ》᠂ 《ᠰᠠᠩᠷᠤᠪᠤᠨᠬᠢᠨ》᠂ 《ᠠᠯᠳᠠᠨ ᠪᠦᠷᠬᠦᠳ》᠂ 《ᠮᠠᠨᠠᠭ᠍ᠳᠠᠭ᠍ᠰᠠᠨ ᠭᠠᠯ》᠂ 《ᠪᠤᠳᠤᠯᠤᠨ ᠴᠡᠩᠭᠡᠷ ᠢᠷᠭᠤᠢ》 （ᠳᠡᠬᠦᠪᠦᠷᠢ）᠂ 《ᠳᠦᠭᠡᠷᠢᠭ᠌ᠰᠡᠨ ᠵᠡᠬᠦᠳᠦ》 （ᠳᠡᠬᠦᠪᠦᠷᠢ）᠂ 《ᠠᠳᠤᠭᠤᠴᠢᠨᠤ ᠳᠠᠭᠤᠤ》 （ᠮᠦᠴᠡᠯᠭᠡ ᠱᠢᠯᠦᠭ）᠂ 《ᠨᠠᠪᠴᠢᠨᠳᠤ ᠡᠷᠬᠦᠬᠦ᠌ ᠳᠠᠭᠤᠤ》᠂ 《ᠳᠤᠷᠠᠳᠭᠠᠯ ᠪᠤᠯᠠᠰᠢ ᠱᠢᠪᠠᠭᠤ》 （ᠳᠡᠬᠦᠪᠦᠷᠢ）᠂ 《ᠬᠠᠢᠷᠠᠶ᠋ᠢᠨ ᠱᠢᠬᠦᠳᠡᠷᠢ》 （ᠳᠡᠬᠦᠪᠦᠷᠢ）᠂ 《ᠵᠢᠩᠤᠨ ᠬᠤᠩᠬᠤᠨᠤ ᠳᠤᠤᠨᠢᠯ》 （ᠳᠡᠬᠦᠪᠦᠷᠢ）᠂ 《ᠭᠤᠷᠪᠠᠳᠤᠭᠠᠷ ᠭᠠᠷᠠᠭᠤᠨ ᠳᠤᠩᠬᠠᠭ》᠂ 《ᠬᠢᠵᠢᠶᠠᠯᠢ ᠨᠠᠰᠤ》᠂ 《ᠦᠳᠡᠰᠢᠶ᠋ᠢᠨ ᠳᠤᠯᠠᠭᠠᠨ》᠂ 《ᠨᠡᠢᠭᠡᠮ ᠵᠢᠷᠤᠮ ᠭᠤᠸᠠᠢ》᠂ 《ᠳᠠᠷᠬᠠᠨ ᠴᠡᠩᠭᠡᠷ ᠠᠭᠤᠯᠠᠰ》᠂ 《ᠵᠠᠰᠠᠭᠤᠨ ᠬᠤᠳᠤᠭᠤᠷ》᠂ 《ᠪᠦᠰᠡᠬᠦᠢ ᠪᠠᠷᠠᠭᠠᠨ ᠽᠠᠮᠪᠦᠯᠢᠩ》᠂ 《ᠳᠦᠷᠦᠶ᠋ᠢᠨ ᠬᠠᠷᠠ ᠬᠦᠮᠦᠰ》᠂ 《ᠬᠤᠨᠤ ᠴᠠᠭᠠᠨ ᠦᠳᠦ》᠂ 《ᠠᠷᠪᠠᠰ ᠠᠭᠤᠯᠠᠨᠤ ᠡᠬᠦᠯᠡ ᠮᠠᠨᠠᠨ》᠂ 《ᠬᠦᠮᠦᠨ ᠶᠠᠰᠤᠳᠤ ᠬᠠᠳᠠ》᠂ 《ᠬᠠᠳᠠᠨ ᠴᠤᠤᠷᠠᠢ》᠂ 《ᠬᠠᠷᠢᠬᠤ ᠭᠡᠷᠡᠯ》᠂ 《ᠮᠤᠩᠭᠤᠯᠵᠢᠨ ᠠᠪᠤ》᠂ 《ᠪᠤᠭᠤᠷᠤᠯ ᠭᠠᠯ》᠂ 《ᠭᠤᠷᠮᠤᠰᠤᠨ ᠳᠠᠭᠠᠳᠭᠠᠯ》᠂ 《ᠨᠠᠮᠤᠷᠤᠨ ᠨᠠᠪᠴᠢ》᠂ 《ᠬᠠᠨ ᠳᠡᠯᠡᠭᠡᠢ》᠂ 《ᠬᠠᠷᠠ ᠱᠢᠷᠤᠢᠶ᠋ᠢᠨ ᠭᠠᠵᠠᠷ》᠂ 《ᠨᠡᠬᠦᠳᠡᠯᠤᠨ ᠱᠢᠪᠠᠭᠤ》᠂ 《ᠡᠯᠡᠰᠦᠨ ᠬᠦᠨᠳᠤ》᠂ 《ᠳᠡᠭ᠌ᠷᠢᠶ᠋ᠢᠨ ᠰᠠᠯᠬᠢ》᠂ 《ᠴᠠᠰᠤᠨᠤ ᠮᠠᠷᠺ》᠂ 《ᠨᠢᠭᠤᠴᠠ ᠳᠤᠪᠴᠢᠶᠠᠨᠠᠴᠠ ᠳᠠᠰᠤᠷᠠᠭ᠍ᠰᠠᠨ ᠠᠳᠤᠭᠤ》᠂ 《ᠳᠦᠷᠦᠭᠡᠨ ᠳᠡᠭᠡᠷᠡ ᠦᠨᠳᠡᠢᠭ᠌ᠰᠡᠨ ᠳᠡᠯᠡᠭᠡᠢ》᠂ 《ᠢᠷᠡᠬᠦ᠌ ᠵᠠᠭᠤᠨᠤ ᠬᠤᠩᠬᠤᠨ ᠳᠠᠭᠤᠨ》᠂ 《ᠤᠭᠤᠷᠠᠭ ᠴᠠᠭᠠᠨ ᠡᠷᠬᠢᠴᠡᠬᠦᠯᠦᠯ》᠂ 《ᠠᠯᠠᠭᠠᠨ ᠳᠡᠭᠡᠷᠡ ᠱᠢᠷᠬᠢᠭ᠌ᠰᠡᠨ ᠮᠦᠩᠭᠡᠶ᠋ᠢᠨ ᠤᠰᠤᠨ》᠂ 《ᠬᠤᠯᠠᠶ᠋ᠢᠨ ᠴᠡᠩᠭᠡᠷ ᠳᠤᠤᠺᠢᠣ᠋》᠂ 《ᠡᠷᠳᠡᠨᠤ ᠪᠠᠭᠠᠳᠤᠷᠤᠨ ᠱᠤᠩᠬᠤᠷ》 ᠁ ᠭᠡᠬᠦ᠌ ᠮᠡᠳᠦ᠃
ᠰᠡᠬᠦᠯᠤᠨ ᠦᠶᠡᠳᠤ ᠢᠯᠡᠷᠡᠭ᠌ᠰᠡᠨ ᠢᠳᠡᠷ ᠵᠠᠯᠠᠭᠤ ᠤᠷᠠᠨ ᠪᠦᠳᠦᠭᠡᠯᠴᠢᠳ ᠮᠠᠨᠢ ᠶᠠᠭ ᠦᠰᠦᠨ ᠪᠤᠢᠵᠢᠵᠤ ᠬᠤᠪᠢᠷᠠᠨ ᠳᠡᠬᠦᠯᠳᠡᠷᠵᠢᠬᠦ᠌ ᠱᠠᠳᠤᠨᠳᠠᠭᠠᠨ ᠪᠠᠢᠭᠠ ᠤᠴᠢᠷ᠂ ᠭᠡᠳᠦ ᠡᠷᠳᠡ 《ᠰᠤᠩᠭᠤᠳᠠᠭ᠍ᠵᠢᠭᠤᠯᠤᠨ》 ᠦᠨᠡᠯᠡᠬᠦ᠌ᠨᠢ ᠭᠡᠨᠡᠨ ᠮᠦᠷᠳᠡᠭᠡᠨ ᠬᠠᠷᠢᠭᠤᠴᠠᠯᠭᠠ ᠠᠯᠳᠠᠭ᠍ᠰᠠᠨ ᠠᠵᠢᠯᠯᠠᠭᠠ ᠪᠤᠯᠬᠤᠨᠢ ᠯᠠᠪᠳᠠᠢ᠂ ᠠᠳᠡ ᠵᠢᠭ᠍ᠰᠠᠭᠠᠬᠤᠶ᠋ᠢ ᠪᠤᠯᠢᠰᠤ᠃
ᠠᠩᠭ᠌ᠯᠢᠶ᠋ᠢᠨ ᠵᠤᠬᠢᠶᠠᠯᠴᠢ ᠡᠸᠳᠸᠠᠷ · ᠹᠤᠷᠰᠲ᠋ᠧᠷᠤᠨ ᠦᠵᠡᠬᠦ᠌ᠪᠠᠷ ᠤᠷᠠᠨ ᠵᠤᠬᠢᠶᠠᠯᠤᠨ ᠰᠤᠩᠭᠤᠳᠠᠭ ᠭᠡᠳᠡᠭ ᠶᠠᠭᠤᠮᠠᠨᠢ ᠶᠠᠭ ᠨᠢᠭᠡᠨ ᠳᠤᠮᠤ ᠳᠦᠬᠦᠷᠢᠭ ᠭᠡᠯᠪᠡᠷᠢᠲᠠᠢ ᠬᠤᠭᠤᠯᠠᠨ ᠱᠢᠷᠡᠭᠡᠲᠠᠢ ᠠᠳᠠᠯᠢ᠃ ᠠᠳᠠᠯᠢ ᠪᠤᠰᠤ ᠴᠠᠭ ᠦᠶᠡᠶ᠋ᠢᠨ ᠵᠤᠬᠢᠶᠠᠯᠴᠢᠳ （ᠪᠠ ᠪᠦᠳᠦᠭᠡᠯ） ᠨᠢ ᠡᠨᠡ ᠱᠢᠷᠡᠭᠡᠨᠳᠤ ᠢᠷᠡᠵᠤ᠂ ᠬᠢᠷᠢ ᠳᠡᠩᠴᠡᠭ᠌ᠰᠡᠨᠨᠢ ᠨᠢᠭᠡᠨ ᠰᠠᠭᠤᠳᠠᠯ ᠤᠯᠵᠤ᠂ ᠳᠡᠰ ᠪᠠᠭᠤᠷᠠᠭ᠍ᠰᠠᠨᠨᠢ ᠬᠠᠷᠠᠮᠰᠠᠯᠳᠠᠢᠪᠠᠷ ᠱᠢᠷᠡᠭᠡᠨᠠᠴᠠ ᠬᠦᠭᠡᠭᠡᠭ᠌ᠳᠡᠳᠡᠭ᠃ ᠵᠠᠷᠢᠮ 《ᠠᠪᠤᠷᠭᠤ ᠵᠤᠬᠢᠶᠠᠯᠴᠢ》 ᠨᠢ ᠮᠦᠩᠭᠡᠶ᠋ᠢᠨ ᠰᠠᠭᠤᠳᠠᠯᠳᠤ ᠦᠨᠢᠳᠡ ᠰᠠᠭᠠᠳᠠᠵᠤ ᠪᠠᠢᠬᠤᠳᠤ᠂ ᠬᠦᠪᠡᠭᠡ ᠵᠠᠬᠠᠶ᠋ᠢᠨ ᠵᠤᠬᠢᠶᠠᠯᠴᠢᠳᠨᠢ ᠳᠠᠰᠤᠷᠠᠯᠳᠠ ᠦᠭᠡᠢ ᠰᠤᠯᠢᠭ᠍ᠳᠠᠵᠤ ᠪᠠᠢᠳᠠᠭ᠃ 《ᠮᠦᠩᠭᠡᠶ᠋ᠢᠨ ᠰᠠᠭᠤᠳᠠᠯ》 ᠨᠢ ᠴᠤ᠌ ᠠᠪᠤᠷᠭᠤ ᠵᠤᠬᠢᠶᠠᠯᠴᠢᠳᠤᠨ ᠱᠢᠨᠡ ᠨᠡᠮᠡᠭ᠌ᠳᠡᠯᠢᠶᠠᠷ ᠤᠷᠤᠨ ᠪᠠᠢᠷᠢᠪᠠᠨ ᠳᠠᠰᠤᠷᠠᠯᠳᠠ ᠦᠭᠡᠢ ᠰᠤᠯᠢᠨᠠ᠃ 《ᠠᠭᠤᠯᠠ ᠤᠰᠤᠨᠠ ᠦᠶᠡ ᠪᠦᠷᠢᠳᠤ ᠱᠢᠨᠡ ᠠᠪᠢᠶᠠᠰᠳᠠᠨᠢ ᠬᠦᠯᠢᠶᠡᠵᠦ᠍᠂ ᠦᠪᠡᠷ ᠦᠪᠡᠷᠤᠨ ᠤᠳᠭᠠ ᠤᠶᠠᠩᠭᠠᠪᠠᠷ ᠭᠡᠳᠦᠨ ᠵᠠᠭᠤᠨᠢ ᠳᠠᠭᠠᠭᠤᠯᠤᠮᠤᠢ》᠃ ᠦᠨᠳᠦᠰᠦᠳᠡᠨᠤ ᠤᠷᠠᠨ ᠵᠤᠬᠢᠶᠠᠯᠤᠨ ᠳᠡᠦᠭᠡᠨᠳᠤ ᠳᠡᠳᠦᠢ ᠪᠢᠰᠢ᠂ ᠬᠠᠷᠢᠨ ᠳᠡᠯᠡᠭᠡᠢᠶ᠋ᠢᠨ ᠤᠷᠠᠨ ᠵᠤᠬᠢᠶᠠᠯᠤᠨ ᠳᠡᠦᠭᠡᠨᠳᠤ ᠰᠠᠭᠤᠳᠠᠯ ᠤᠯᠵᠤ᠂ ᠴᠢᠨᠠᠭ᠍ᠰᠢᠯᠠᠨ ᠮᠦᠩᠭᠡᠶ᠋ᠢᠨ ᠰᠠᠭᠤᠳᠠᠯ ᠤᠯᠵᠤ ᠰᠠᠭᠤᠬᠤᠨᠢ ᠵᠤᠬᠢᠶᠠᠯᠴᠢᠳ ᠪᠢᠳᠡᠨᠤ ᠳᠡᠭᠡᠳᠦ ᠬᠦᠰᠡᠯᠡᠩ ᠪᠤᠯᠬᠤ ᠶᠤᠰᠤᠳᠠᠢ ᠪᠤᠯᠪᠠᠤ᠃