8 ᠰᠠᠷ᠎ᠠ᠎ᠶ᠋ᠢᠨ 22 ᠎ᠤᠨ ᠡᠳᠦᠷ᠂ ᠦᠪᠦᠷ ᠮᠤᠩᠭᠤᠯ᠎ᠤᠨ ᠠᠷᠠᠳ᠎ᠤᠨ ᠬᠡᠪᠯᠡᠯ᠎ᠤᠨ ᠬᠤᠷᠢᠶᠠᠨ᠎ᠠᠴᠠ ᠬᠡᠪᠯᠡᠬᠦᠯᠦᠭ᠌ᠰᠡᠨ᠂ ᠡᠷᠳᠡᠮᠳᠡᠨ ᠰᠦᠮᠪᠦᠷᠪᠠᠳᠤ᠂ ᠳ᠋ᠤᠺᠲ᠋ᠤᠷ ᠡ᠊ · ᠬᠠᠰᠳᠤᠶᠠᠭ᠎ᠠ᠎ᠶ᠋ᠢᠨ ᠭᠤᠤᠯᠯᠠᠨ ᠨᠠᠢᠷᠠᠭᠤᠯᠤᠬ᠍ᠰᠠᠨ 《ᠬᠢᠳᠡᠳ ᠮᠤᠩᠭᠤᠯ ᠱᠢᠨ᠎ᠠ ᠦᠬᠡᠰ᠎ᠤᠨ ᠲᠠᠢᠯᠪᠤᠷᠢ ᠲᠤᠯᠢ》 （ᠬᠤᠶᠠᠳᠤᠭᠠᠷ ᠬᠡᠪᠯᠡᠯ） ᠎ᠶ᠋ᠢᠨ ᠨᠤᠮ ᠲᠠᠷᠬᠠᠭᠠᠬᠤ ᠶᠤᠰᠤᠯᠠᠯ ᠬᠦᠬᠡᠬᠤᠳᠠ᠎ᠶ᠋ᠢᠨ ᠨᠤᠮ᠎ᠤᠨ ᠰᠠᠩ᠎ᠳᠤ ᠤᠳᠭ᠎ᠠ ᠲᠡᠬᠦᠯᠳᠡᠷ ᠶᠠᠪᠤᠬ᠍ᠳᠠᠯ᠎ᠠ᠃ 

ᠱᠢᠨ᠎ᠠ ᠦᠬᠡᠰ᠎ᠨᠢ ᠰᠤᠶᠤᠯ᠎ᠤᠨ ᠡᠬᠦᠳᠦᠯᠳᠡ ᠪᠦᠬᠡᠳ ᠱᠢᠨᠠᠴᠢᠯᠠᠯᠳᠠ᠎ᠶ᠋ᠢᠨ ᠠᠴᠢᠶᠠᠯᠬᠠᠴᠢ ᠮᠦᠨ᠃ ᠲᠡᠷᠡ᠎ᠨᠢ ᠬᠦᠮᠦᠰ᠎ᠤᠨ ᠦᠬᠡᠰ᠎ᠤᠨ ᠰᠠᠩ᠎ᠢ ᠪᠠᠶᠠᠯᠢᠬ᠍ᠵᠢᠭᠤᠯᠵᠤ᠂ ᠬᠡᠯᠡᠨ᠎ᠤ ᠬᠡᠷᠡᠭ᠌ᠯᠡᠬᠡᠨ᠎ᠢ ᠤᠯᠠᠮ ᠠᠮᠢᠳᠤ ᠲᠦᠷᠰᠦᠯᠢᠭ ᠪᠤᠯᠭᠠᠬᠤ ᠲᠠᠳᠦᠢ ᠦᠬᠡᠢ ᠴᠠᠭ ᠦᠶ᠎ᠠ᠎ᠶ᠋ᠢᠨ ᠴᠤᠭ ᠵᠢᠪᠬᠤᠭ᠎ᠠ᠎ᠶ᠋ᠢ ᠬᠠᠷᠠᠭᠤᠯᠵᠤ ᠪᠠᠢᠳᠠᠭ᠃ ᠬᠠᠮᠢᠶ᠎ᠠ ᠪᠦᠬᠦᠢ ᠪᠠᠢᠭᠤᠯᠭ᠎ᠠ ᠨᠢᠬᠡᠴᠢ᠎ᠶ᠋ᠢᠨ ᠪᠦᠷᠢᠳᠭᠡᠯ᠎ᠢ ᠦᠨᠳᠦᠰᠦᠯᠡᠪᠡᠯ᠂ ᠦᠬᠡᠷᠡᠴᠢᠯᠠᠯᠳᠠ ᠨᠡᠬᠡᠬᠡᠯᠳᠡ᠎ᠠᠴᠠ ᠨᠠᠭᠠᠰᠢ᠂ ᠮᠠᠨ᠎ᠤ ᠤᠯᠤᠰ᠎ᠲᠤ ᠵᠢᠯ ᠪᠤᠯᠭᠠᠨ 1000 ᠭᠠᠷᠤᠢ ᠱᠢᠨ᠎ᠠ ᠨᠡᠷ᠎ᠡ ᠦᠬᠡ ᠨᠡᠷ᠎ᠡ ᠲᠤᠮᠢᠶ᠎ᠠ ᠡᠬᠦᠰᠦᠨ ᠭᠠᠷᠴᠤ᠌ ᠪᠤᠢ ᠪᠦᠬᠡᠳ ᠲᠡᠳᠡᠬᠡᠷ ᠴᠣ᠌ ᠱᠢᠨ᠎ᠠ ᠦᠬᠡᠰ᠎ᠨᠢ ᠱᠢᠨᠵᠢᠯᠡᠬᠡᠨ᠎ᠤ ᠡᠯ᠎ᠡ ᠲᠦᠷᠦᠯ᠎ᠤᠨ ᠰᠤᠨᠢᠨ ᠰᠡᠳᠬᠦᠯ᠎ᠳᠤ ᠲᠡᠪᠳᠡᠮᠵᠢ ᠶᠡᠬᠡᠳᠡᠢ ᠢᠯᠡᠷᠡᠳᠡᠭ᠃ ᠡᠳᠡᠬᠡᠷ ᠦᠬᠡᠰ᠎ᠢ ᠴᠠᠭ ᠠᠯᠳᠠᠯ ᠦᠬᠡᠢ ᠮᠤᠩᠭᠤᠯ ᠬᠡᠯᠡᠨ᠎ᠳᠤ ᠤᠷᠴᠢᠭᠤᠯᠤᠨ ᠬᠡᠷᠡᠭ᠌ᠯᠡᠭ᠌ᠴᠢᠳ᠎ᠲᠤ ᠠᠱᠢᠬ᠍ᠯᠠᠭᠤᠯᠬᠤ ᠪᠤᠯ ᠰᠤᠳᠤᠯᠤᠭᠠᠴᠢ ᠪᠠ ᠲᠤᠯᠢᠴᠢᠳ᠎ᠤᠨ ᠲᠦᠯᠬᠢᠵᠤ ᠪᠤᠯᠤᠰᠢ ᠦᠬᠡᠢ ᠡᠬᠦᠷᠬᠡ᠂ ᠡᠨᠡ ᠪᠤᠯ ᠲᠠᠷᠤᠢ ᠰᠦᠮᠪᠦᠷᠪᠠᠳᠤ ᠨᠡᠷ᠎ᠤᠨ ᠨᠦᠷᠢ ᠶᠡᠭᠡ ᠬᠦᠳᠡᠯᠮᠦᠷᠢ ᠤᠷᠤᠭᠤᠯᠵᠤ ᠲᠤᠰ ᠲᠤᠯᠢ ᠪᠢᠴᠢᠭ᠎ᠢ ᠬᠢᠵᠤ ᠪᠦᠳᠦᠬᠡᠭ᠌ᠰᠡᠨ᠎ᠤ ᠬᠢᠨᠢ ᠤᠭ ᠰᠠᠨᠠᠭ᠎ᠠ ᠪᠤᠯᠤᠨ᠎ᠠ᠃

ᠮᠡᠳᠡᠬᠡᠵᠢ᠂ 《ᠬᠢᠳᠡᠳ ᠮᠤᠩᠭᠤᠯ ᠱᠢᠨ᠎ᠠ ᠦᠬᠡᠰ᠎ᠤᠨ ᠲᠠᠢᠯᠪᠤᠷᠢ ᠲᠤᠯᠢ》 ᠎ᠶ᠋ᠢᠨ ᠠᠩᠬᠠᠨ᠎ᠤ ᠬᠡᠪᠯᠡᠯ 2007 ᠤᠨ᠎ᠳᠤ ᠬᠡᠪᠯᠡᠭ᠌ᠳᠡᠵᠦ᠍ ᠦᠨᠦᠳᠦᠷ ᠪᠤᠯᠬᠤ᠎ᠳᠤ ᠨᠢᠬᠡᠨᠳᠡ ᠠᠷᠪᠠᠨ ᠬᠡᠳᠦᠨ ᠵᠢᠯ᠎ᠤᠨ ᠨᠢᠭᠤᠷ᠎ᠢ ᠦᠵᠡᠵᠤ ᠪᠠᠢᠨ᠎ᠠ᠃ ᠰᠠᠶᠢᠬᠠᠨ ᠬᠡᠪᠯᠡᠭ᠌ᠳᠡᠵᠤ ᠪᠠᠢᠭ᠎ᠠ ᠬᠤᠶᠠᠳᠤᠭᠠᠷ ᠬᠡᠪᠯᠡᠯ᠎ᠨᠢ ᠠᠩᠬᠠᠨ᠎ᠤ ᠬᠡᠪᠯᠡᠯ᠎ᠤᠨ ᠵᠠᠷᠢᠮ ᠠᠭᠤᠯᠭ᠎ᠠ᠎ᠳᠤ ᠨᠠᠯᠢᠶᠠᠳ ᠵᠠᠰᠠᠯᠳᠠ ᠤᠷᠤᠭᠤᠯᠤᠬ᠍ᠰᠠᠨ ᠪᠦᠬᠡᠳ ᠵᠠᠰᠠᠨ ᠱᠢᠨᠡᠴᠢᠯᠡᠭ᠌ᠰᠡᠨ᠂ ᠬᠠᠰᠤᠬ᠍ᠰᠠᠨ᠂ ᠨᠡᠮᠡᠭ᠌ᠰᠡᠨ ᠵᠡᠷᠬᠡ ᠠᠭᠤᠯᠭ᠎ᠠ 70% ᠎ᠶ᠋ᠢ ᠲᠠᠪᠠᠵᠤ᠂ ᠪᠦᠷᠢᠮᠦᠰᠦᠨ ᠲᠠᠬᠢᠵᠤ ᠨᠠᠢᠷᠠᠭᠤᠯᠤᠬ᠍ᠰᠠᠨ ᠬᠡᠵᠤ ᠬᠡᠯᠡᠵᠤ ᠪᠤᠯᠤᠨ᠎ᠠ᠃ ᠲᠠᠷᠤᠢ ᠮᠠᠨ᠎ᠤ ᠤᠯᠤᠰ᠎ᠤᠨ ᠦᠬᠡᠷᠡᠴᠢᠯᠠᠯᠳᠠ ᠨᠡᠬᠡᠬᠡᠯᠳᠡ᠎ᠠᠴᠠ ᠨᠠᠭᠠᠱᠢᠬᠢ ᠲᠦᠴᠢᠬᠡᠳ ᠵᠢᠯ᠎ᠤᠨ ᠬᠤᠭᠤᠴᠠᠭᠠᠨ᠎ᠳᠤ ᠪᠤᠢ ᠪᠤᠯᠤᠬ᠍ᠰᠠᠨ 20000 ᠭᠠᠷᠤᠢ ᠨᠡᠢᠬᠡᠮ᠎ᠤᠨ ᠬᠡᠷᠡᠭ᠌ᠯᠡᠬᠡᠨ᠎ᠤ ᠦᠬᠡ᠂ ᠱᠢᠨ᠎ᠠ ᠦᠬᠡ᠂ ᠱᠢᠨ᠎ᠡ ᠨᠡᠷ᠎ᠠ ᠲᠤᠮᠢᠶ᠎ᠠ ᠵᠢᠴᠢ ᠱᠢᠨ᠎ᠠ ᠦᠬᠡᠰ᠎ᠲᠠᠢ ᠬᠤᠯᠪᠤᠬ᠍ᠳᠠᠯ ᠪᠦᠬᠦᠢ ᠮᠡᠳᠡᠭᠡ ᠵᠠᠩᠬᠢ᠎ᠶ᠋ᠢ ᠬᠠᠮᠤᠷᠤᠭᠤᠯᠤᠬ᠍ᠰᠠᠨ ᠪᠠᠢᠨ᠎ᠠ᠃

ᠲᠤᠰ ᠲᠤᠯᠢ ᠪᠢᠴᠢᠭ᠎ᠨᠢ ᠦᠩᠬᠡᠷᠡᠭ᠌ᠰᠡᠨ᠎ᠤ ᠲᠤᠯᠢ ᠪᠢᠴᠢᠭ᠎ᠤᠳ᠎ᠤᠨ ᠲᠤᠯᠤᠭᠠᠢ ᠦᠬᠡ᠎ᠶ᠋ᠢ ᠯᠡ ᠲᠦᠬᠦᠮᠬᠡᠨ ᠤᠷᠴᠢᠭᠤᠯᠳᠠᠭ ᠬᠠᠭᠤᠴᠢᠨ ᠵᠠᠬ᠍ᠪᠤᠷ᠎ᠢ ᠡᠪᠳᠡᠵᠤ᠂ ᠱᠢᠨ᠎ᠠ ᠦᠬᠡ᠎ᠶ᠋ᠢᠨ ᠢᠷᠠᠯ ᠭᠠᠷᠤᠯ ᠵᠢᠴᠢ ᠤᠳᠭ᠎ᠠ ᠰᠠᠨᠠᠭᠠᠨ᠎ᠳᠤ ᠲᠤᠪᠴᠢ ᠲᠤᠳᠤᠷᠠᠭᠤᠨ ᠲᠠᠢᠯᠪᠤᠷᠢ ᠬᠢᠬᠦ᠌᠎ᠶ᠋ᠢᠨ ᠬᠠᠮᠳᠤ ᠬᠡᠷᠡᠭ᠌ᠯᠡᠭ᠌ᠴᠢᠳ᠎ᠲᠤ ᠤᠭ ᠦᠬᠡ᠎ᠶ᠋ᠢᠨ ᠤᠳᠭ᠎ᠠ ᠰᠠᠨᠠᠭ᠎ᠠ᠂ ᠰᠤᠶᠤᠯ᠎ᠤᠨ ᠠᠭᠤᠯᠬᠤᠨ᠎ᠢ ᠲᠤᠭᠤᠷᠠᠳᠠᠯ᠎ᠠ ᠤᠢ᠍ᠢᠯᠠᠭᠠᠭᠤᠯᠬᠤ᠎ᠪᠠᠷ ᠴᠢᠷᠮᠠᠢᠬ᠍ᠰᠠᠨ᠎ᠨᠢ ᠢᠯᠡᠳᠳᠡ᠃ ᠪᠠᠰᠠ 28 ᠨᠠᠢᠳᠠ᠎ᠶ᠋ᠢᠨ ᠬᠡᠷᠡᠭ᠌ᠯᠡᠬᠡᠨ᠎ᠤ ᠮᠡᠳᠡᠯᠬᠡ᠎ᠶ᠋ᠢ ᠬᠠᠪᠰᠤᠷᠭᠠᠬ᠍ᠰᠠᠨ᠎ᠨᠢ ᠲᠤᠯᠢ ᠪᠢᠴᠢᠭ᠎ᠢᠶᠠᠨ ᠦᠪᠡᠷᠮᠢᠴᠡ ᠤᠨᠴᠠᠯᠢᠭ᠎ᠲᠠᠢ ᠪᠤᠯᠭᠠᠨ ᠨᠠᠢᠷᠠᠭᠤᠯᠵᠤ ᠴᠢᠳᠠᠬ᠍ᠰᠠᠨ ᠪᠠᠢᠨ᠎ᠠ᠃