ᠦᠨᠳᠦᠷ ᠠᠭᠤᠯᠠ ᠵᠢ ᠳᠠᠪᠠᠨ ᠦᠷᠭᠡᠨ ᠮᠦᠷᠡᠨ ᠢ᠋ ᠭᠠᠳᠤᠯᠵᠦ ᠤᠷᠢᠬᠠᠨ ᠬᠠᠪᠤᠷ ᠠᠶᠠᠨᠤ ᠰᠢᠪᠠᠭᠤᠳ ᠲᠠᠢ ᠪᠠᠨ ᠬᠠᠮᠳᠤ ᠡᠮᠦᠨᠡ ᠵᠦᠭ ᠡᠴᠡ ᠲᠡᠮᠡᠦᠯᠦᠭᠰᠡᠭᠡᠷ ᠦᠨᠳᠦᠷᠯᠢᠭ ᠤ᠋ᠨ ᠦᠷᠦᠴᠡᠨ ᠳ᠋ᠦ ᠰᠠᠭᠠᠳᠠᠳᠠᠭ᠃ ᠡᠷᠬᠡ ᠠᠯᠢᠶᠠᠬᠠᠨ ᠬᠠᠪᠤᠷᠤᠨ ᠰᠠᠯᠬᠢᠨ ᠬᠠᠪᠤᠷᠤᠨ ᠬᠤᠭᠤᠰ ᠪᠤᠯᠬᠤ ᠦᠶᠡᠰ ᠤᠮᠠᠷᠠ ᠵᠢᠨ ᠡᠭᠡ ᠭᠠᠵᠠᠷ ᠲᠦ᠍ ᠪᠤᠷᠤᠭᠠᠨ ᠰᠢᠪᠡᠷᠡᠭᠦᠯᠵᠦ ᠰᠡᠷᠪᠡᠭᠡᠨᠡᠨᠡ᠂ ᠴᠠᠰᠤ ᠰᠢᠭᠤᠷᠠᠭᠤᠯᠵᠤ ᠲᠡᠷᠪᠡᠯᠵᠡᠨᠡ᠂ ᠡᠯᠡᠰᠦ ᠪᠤᠵᠢᠭᠢᠨᠠᠭᠤᠯᠤᠨ ᠭᠤᠩᠬᠠᠯᠵᠠᠨᠠ᠃ ᠬᠠᠪᠤᠷᠤᠨ ᠰᠠᠯᠬᠢᠨᠤ ᠦᠰᠪᠦᠷᠢ ᠵᠢᠨ ᠵᠢᠭᠠᠯ ᠰᠢᠬᠤᠬᠢᠯᠠᠬᠤ ᠢᠨᠢᠶᠡᠬᠦ ᠪᠠᠶᠠᠰᠬᠤ ᠲᠠᠭᠤᠨᠳᠤ ᠠᠮᠢᠵᠢᠷᠠᠯᠤᠨ ᠪᠠᠶᠠᠰᠤᠯ ᠨᠢᠭᠤᠭᠳᠠᠵᠦ ᠪᠠᠢᠬᠤ ᠪᠤᠯᠬᠤᠷ ᠡᠭᠡ ᠭᠠᠵᠠᠷ᠂ ᠠᠮᠢᠳᠠᠨ ᠵᠢᠷᠭᠤᠭᠠᠨ ᠵᠦᠢᠯ ᠬᠦᠭᠡᠷᠦᠯᠳᠦᠨᠡ᠂ ᠬᠦᠰᠡᠨᠡ᠂ ᠦᠬᠦᠭᠡᠷᠳᠡᠨᠡ᠃ ᠠᠯᠢᠶᠠ ᠲᠦᠢᠳᠭᠡᠷ ᠭᠡᠦᠭᠡᠳ ᠵᠢᠡᠨ ᠬᠡᠨ ᠬᠦᠮᠦᠨ ᠴᠦ᠍ ᠠᠳᠠ ᠦᠵᠡᠳᠡᠭ ᠦᠭᠡᠢ ᠬᠠᠷᠢᠨ ᠬᠠᠢᠷᠠ ᠵᠢᠨ ᠪᠦᠪᠡᠢ ᠪᠡᠷ ᠵᠢᠡᠨ ᠠᠷᠭᠠᠳᠠᠵᠦ ᠰᠤᠷᠭᠠᠳᠠᠭ ᠰᠢᠬ ᠬᠠᠪᠤᠷᠤᠨ ᠬᠤᠭᠤᠰᠤᠨ ᠰᠠᠯᠬᠢᠨᠢ ᠵᠢᠩ ᠲᠠᠢ ᠭᠡᠵᠦ ᠬᠡᠨ ᠬᠦᠮᠦᠨ ᠴᠦ᠍ ᠠᠳᠠᠯᠠᠳᠠᠭ ᠦᠭᠡᠢ᠃ ᠵᠢᠩᠳᠡᠬᠦᠨ ᠠᠷᠠᠨᠰᠢᠨᠤ ᠬᠢᠨᠢ ᠴᠠᠭᠠᠨᠠ ᠨᠢᠭᠤᠭᠳᠠᠭᠰᠠᠨ ᠠᠮᠢᠵᠢᠷᠠᠯᠤᠨ ᠢᠯᠴᠢ᠂ ᠠᠮᠢᠯᠠᠯᠤᠨ ᠴᠢᠬᠢᠭ ᠲᠦ᠍ᠨᠢ ᠲᠠᠳᠠᠭᠳᠠᠵᠦ᠂ ᠬᠦᠮᠦᠰ ᠬᠠᠪᠤᠷᠤᠨ ᠰᠠᠯᠬᠢᠨ ᠵᠢᠡᠷ ᠢᠯᠪᠢᠬᠦᠯᠬᠦ ᠲᠤᠷᠠᠳᠠᠢ᠃
ᠭᠡᠭᠡᠷᠡ ᠬᠦᠳᠡᠭᠡ ᠭᠠᠷᠴᠤ᠂ ᠴᠢᠬᠢᠭ ᠤ᠋ᠨ ᠦᠨᠦᠷ ᠰᠡᠩᠬᠢᠨᠡᠭᠦᠯᠦᠭᠰᠡᠨ ᠬᠠᠪᠤᠷ ᠤ᠋ᠨ ᠬᠤᠭᠤᠰᠤᠨ ᠰᠠᠯᠬᠢᠨ ᠳ᠋ᠦ ᠢᠯᠪᠢᠬᠦᠯᠦᠨ ᠪᠤᠳᠠᠩ ᠲᠠᠳᠠᠭᠰᠠᠨ ᠰᠠᠭᠠᠷᠠᠯ ᠬᠦᠭᠡ ᠲᠡᠭᠷᠢᠳᠤ ᠵᠡᠯᠡᠯᠡᠨ ᠨᠢᠰᠴᠦ ᠭᠠᠩᠭᠠᠷ ᠭᠤᠩᠭᠤᠷ ᠭᠠᠩᠭᠠᠨᠠᠯᠳᠤᠬᠤ ᠨᠡᠬᠦᠳᠡᠯᠤᠨ ᠰᠢᠪᠠᠭᠤᠳᠢ ᠬᠠᠷᠠᠵᠦ᠂ ᠬᠠᠭᠳᠠᠨᠤ ᠲᠤᠤᠷᠠ ᠡᠴᠡ ᠴᠤᠬᠤᠢᠬᠰᠠᠨ ᠨᠢᠯᠬᠠ ᠨᠤᠭᠤᠭᠠ᠂ ᠴᠡᠩᠭᠡᠷ ᠢᠷᠭᠤᠢ ᠪᠡᠷ ᠰᠡᠳᠬᠢᠯ ᠵᠢᠡᠨ ᠪᠠᠶᠠᠰᠬᠠᠬᠤ ᠭᠡᠳᠡᠭ ᠤᠷᠳᠤᠬᠠᠨ ᠡᠪᠦᠯᠢ ᠲᠤᠭᠤᠯᠤᠭᠰᠠᠨ ᠪᠡᠶᠡ ᠰᠡᠳᠬᠢᠯᠤᠨ ᠨᠢᠭᠡᠨ ᠶᠤᠰᠤᠨᠤ ᠵᠢᠷᠭᠠᠯ ᠪᠤᠶᠤ᠃ ᠬᠠᠰᠢᠶᠠᠨᠤ ᠮᠠᠯ ᠬᠦᠯ ᠨᠢᠷᠤᠭᠤ ᠪᠠᠨ ᠵᠢᠬᠢᠯᠭᠡᠵᠦ ᠰᠤᠨᠢᠶᠠᠨ ᠴᠢᠬᠢᠭᠤᠨ ᠦᠨᠦᠷ ᠲᠠᠢ ᠰᠠᠯᠬᠢᠨᠤ ᠲᠠᠮᠵᠢᠭᠤᠯᠤᠭᠰᠠᠨ ᠨᠤᠭᠤᠭᠠ ᠵᠢᠨ ᠦᠨᠦᠷ ᠲᠦ᠍ ᠱᠠᠩᠳᠠᠭᠤᠷᠠᠨᠠ᠃ ᠬᠤᠳᠠ ᠲᠦᠬᠦᠷᠡᠩ ᠲᠦᠯᠤᠨ ᠲᠠᠭᠤᠨ᠃ ᠬᠠᠪᠤᠷ ᠬᠤᠭᠤᠰᠯᠠᠬᠤᠳᠤ ᠲᠦᠯ ᠲᠤᠰᠬᠤ ᠠᠵᠢᠯ ᠰᠢᠪᠳᠤᠷᠠᠭᠠᠨᠳᠠᠭᠠᠨ ᠤᠷᠤᠳᠠᠭ ᠴᠦ᠍ ᠲᠠᠭᠠ ᠲᠠᠮᠠᠭᠠᠯᠠᠬᠤ᠂ ᠦᠷᠢᠶᠡ ᠬᠠᠭᠠᠷᠢᠬᠤ᠂ ᠠᠳᠤᠭᠤ ᠲᠡᠯᠯᠡᠬᠦ᠂ ᠲᠡᠮᠡᠭᠡ ᠰᠠᠮᠨᠠᠬᠤ᠂ ᠬᠤᠷᠠᠭᠠ ᠢᠮᠨᠡᠬᠦ ᠠᠵᠢᠯ ᠦᠷᠬᠦᠯᠵᠢᠯᠡᠭᠡᠳ ᠬᠠᠪᠤᠷᠤᠨ ᠬᠤᠳᠠ ᠪᠠᠶᠠᠰᠤᠯ᠂ ᠨᠠᠷᠬᠢᠶᠠᠨ ᠵᠢᠡᠷ ᠲᠦᠬᠦᠷᠡᠩ ᠤᠷᠳᠤ ᠡᠳᠦᠷᠢ ᠡᠪᠭᠡᠨᠡ᠃
ᠦᠷ ᠵᠢᠡᠷ ᠪᠤᠰᠴᠤ ᠲᠦᠯ ᠲᠤᠰᠤᠨ ᠡᠳᠦᠷᠵᠢᠨ ᠶᠠᠭᠠᠷᠠᠭᠰᠠᠨ ᠡᠵᠢ ᠮᠢᠨᠢ ᠭᠤᠯᠤᠩᠬᠠᠢ ᠪᠠᠨ ᠠᠪᠤᠭᠤᠯᠵᠦ᠂ ᠢᠰᠢᠭᠡ ᠬᠤᠷᠠᠭᠠ ᠪᠠᠨ ᠤᠬᠵᠢᠬᠤ ᠵᠢᠨ ᠲᠠᠭᠠᠤ ᠲᠠᠰᠢᠩ ᠨᠠᠷᠠᠨᠢ ᠬᠠᠷᠠᠭᠠᠳ 《ᠡᠳᠦᠷ ᠨᠡᠯᠢᠶᠡᠳ ᠳᠠᠯᠪᠢᠴᠢᠬᠠᠯᠠ》 ᠭᠡᠵᠤ ᠨᠢᠷᠤᠭᠤ ᠪᠠᠨ ᠲᠡᠨᠢᠢᠯᠭᠡᠨ ᠦᠬᠦᠯᠡᠨᠡ᠃ ᠬᠤᠶᠠᠷ ᠦᠵᠦᠬᠦᠷᠤᠨ ᠨᠠᠷᠠᠨ ᠵᠢᠡᠷ ᠠᠵᠢᠯ ᠠᠳᠠᠯ ᠵᠢᠠᠨ ᠲᠤᠬᠢᠷᠠᠭᠤᠯᠵᠤ ᠶᠠᠪᠤᠳᠠᠭ ᠮᠠᠯᠴᠢᠳ ᠡᠭᠡᠯᠵᠢᠯᠡᠬᠦ ᠤᠯᠠᠷᠢᠯ᠂ ᠡᠷᠬᠢᠬᠦ ᠨᠠᠷᠨ ᠵᠢ ᠠᠨᠳᠠᠬᠤ ᠦᠭᠡᠢ ᠰᠠᠢᠨ ᠮᠡᠳᠡᠳᠡᠭ ᠪᠢᠯᠡ᠃
ᠬᠠᠪᠤᠷᠤᠨ ᠬᠤᠭᠤᠰ ᠪᠤᠯᠬᠤᠳᠤ ᠬᠦᠯᠳᠡᠬᠦᠦ ᠬᠦᠷᠦᠰᠦ ᠬᠦᠭᠡᠪᠦᠷᠢᠯᠡᠨ ᠭᠡᠰᠴᠤ ᠲᠠᠷᠢᠶᠠᠴᠢᠳ ᠲᠠᠷᠢᠶᠠᠨ ᠭᠠᠵᠠᠷ ᠵᠢᠠᠨ ᠤᠷᠪᠠᠭᠤᠯᠤᠨ᠂ ᠪᠤᠷᠳᠤᠭᠤᠷ ᠤᠷᠤᠭᠤᠯᠵᠤ᠂ ᠲᠠᠷᠢᠶᠠᠨ ᠦᠷᠡ ᠰᠤᠩᠭᠤᠨ᠂ ᠲᠠᠷᠢᠶᠠᠯᠠᠩᠤᠨ ᠮᠠᠰᠢᠨ ᠵᠢᠡᠨ ᠰᠡᠯᠪᠢᠵᠦ᠂ ᠬᠠᠶᠠ ᠵᠠᠷᠢᠮᠡᠳ ᠨᠢ ᠰᠢᠨᠡ ᠵᠢ ᠬᠤᠳᠠᠯᠳᠤᠨ ᠠᠪᠴᠤ ᠤᠨᠳᠠᠵᠤ ᠬᠡᠪᠳᠡᠬᠦ ᠪᠠᠨ ᠤᠮᠠᠷᠳᠠᠨ ᠶᠠᠭᠠᠷᠠᠯᠳᠤᠵᠠᠭᠠᠨᠠ᠃《ᠵᠢᠯᠤᠨ ᠡᠬᠢᠨ ᠬᠠᠪᠤᠷ ᠲᠠᠭᠠᠨ》 ᠶᠤᠮ ᠴᠢᠨᠢᠳᠠ᠃ ᠵᠡᠬᠦᠨ ᠠᠢᠯᠤᠨ ᠰᠢᠨᠡ ᠠᠪᠤᠭᠰᠠᠨ ᠮᠠᠰᠢᠨ ᠲᠤᠩ ᠰᠠᠢᠨ᠂ ᠡᠨᠡ ᠵᠢᠯ ᠲᠠᠷᠢᠶᠠ ᠲᠦᠷᠦᠪᠡᠯ ᠡᠷᠬᠢᠬᠦ ᠵᠢᠯ ᠪᠢ ᠪᠠᠰᠠ ᠨᠢᠭᠡ ᠵᠢ ᠠᠪᠤᠨᠠ ᠭᠡᠵᠦ ᠠᠢᠯᠤᠨ ᠠᠬᠠ ᠠᠳᠠᠭᠠ ᠲᠠᠢ ᠨᠢ ᠠᠷᠭᠠ ᠦᠭᠡᠢ ᠰᠦᠪᠡᠭᠡ ᠪᠡᠨ ᠲᠤᠯᠵᠦ ᠵᠤᠭᠰᠤᠭᠠᠳ ᠦᠪᠡᠷ ᠲᠦ᠍ ᠪᠠᠨ᠂ ᠡᠰᠡᠬᠦᠯᠡ ᠦᠰᠦ ᠭᠡᠵᠢᠭᠡ ᠵᠢ ᠨᠢ ᠦᠷᠪᠦᠢᠯᠭᠡᠨ ᠬᠡᠢᠰᠬᠦ ᠬᠠᠪᠤᠷᠤᠨ ᠬᠤᠭᠤᠰᠤᠨ ᠰᠠᠯᠬᠢᠨᠳᠤ ᠰᠢᠪᠡᠨᠡᠨᠡ᠃
ᠡᠯᠡᠰᠦ ᠲᠠᠢ ᠰᠠᠯᠬᠢᠨ ᠳ᠋ᠦ ᠭᠤᠶᠠᠳᠠᠭᠤᠯᠵᠤ᠂ ᠰᠠᠭᠠᠷᠢᠨ ᠬᠠᠴᠠᠷ ᠲᠠᠢ ᠬᠦᠶᠦᠯᠳᠦᠬᠦ ᠬᠡᠦᠬᠡᠳ ᠤ᠋ᠳ 《ᠤᠷᠢᠬᠠᠨ ᠬᠠᠪᠤᠷ ᠢ᠋ ᠬᠡᠨ ᠬᠤᠶᠠᠷ ᠬᠤᠪᠢᠶᠠᠬᠰᠠᠨ ᠪᠤᠢ？》 ᠭᠡᠵᠤ ᠶᠡᠬᠡ ᠬᠦᠮᠦᠨ ᠤ᠋ ᠶᠠᠷᠢᠶᠠᠨ ᠡᠴᠡ ᠬᠡᠰᠡᠭ ᠪᠤᠰᠠᠭ ᠰᠤᠨᠤᠰᠤᠬᠰᠠᠨ ᠵᠢᠠᠨ ᠱᠤᠯᠤᠭᠠᠨᠠᠯᠳᠤᠨ ᠬᠠᠪᠤᠷ ᠤ᠋ᠨ ᠬᠤᠭᠤᠰ ᠢ᠋ ᠢᠳᠡᠭᠡᠨ ᠤᠮᠳᠠᠭᠠᠨ ᠤ᠋ ᠬᠤᠪᠢᠷᠠᠯᠳᠠ ᠪᠡᠷ ᠡᠬᠢᠯᠡᠵᠤ ᠮᠡᠳᠡᠷᠡᠳᠡᠭ᠃ ᠰᠢᠬᠢᠷ ᠪᠤᠤᠪᠤ ᠡᠯᠪᠡᠭ ᠴᠠᠭᠠᠨ ᠰᠠᠷᠠ ᠳ᠋ᠦ ᠰᠢᠯᠢᠵᠤ ᠰᠤᠩᠭᠤᠵᠤ ᠢᠳᠡᠳᠡᠭ ᠪᠠᠢᠬᠰᠠᠨ ᠮᠠᠨ ᠤ᠋ ᠪᠢᠴᠢᠬᠠᠨ ᠵᠢᠭᠠᠯ ᠤ᠋ᠳ ᠵᠢᠯ ᠬᠠᠭᠤᠴᠢᠷᠠᠵᠤ᠂ ᠬᠠᠪᠤᠷ ᠬᠠᠭᠠᠰᠯᠠᠵᠤ ᠢᠷᠡᠬᠦ ᠪᠡᠷ ᠬᠠᠮᠤᠭ ᠡᠴᠡ ᠭᠤᠯᠤᠵᠤ ᠪᠠᠢᠬᠰᠠᠨ ᠬᠠᠳᠠᠭᠤ ᠬᠠᠭᠠᠰ ᠪᠤᠤᠪᠤ ᠪᠠᠨ ᠬᠤᠷᠭᠤ ᠵᠢᠨ ᠢᠷᠤᠭᠠᠷ ᠡᠴᠡ ᠡᠷᠢᠨ ᠬᠠᠢᠵᠤ᠂ ᠬᠠᠶᠠ ᠨᠢᠭᠡ ᠬᠤᠶᠠᠷ ᠤᠯᠤᠭᠠᠳ ᠢᠳᠡᠴᠢᠭᠡᠬᠦ ᠶᠤᠮ ᠪᠤᠯ ᠬᠠᠪᠢ ᠵᠢᠨ ᠵᠢᠭᠠᠯ ᠤ᠋ᠳ ᠲᠠᠭᠠᠨ ᠬᠡᠳᠦᠨ ᠬᠤᠨᠤᠭ ᠵᠢᠡᠷ ᠭᠠᠢᠬᠠᠭᠤᠯᠵᠤ ᠭᠠᠷᠳᠠᠭ᠃ ᠪᠠᠩᠰᠢ᠂ ᠱᠠᠯᠪᠢᠩ᠂ ᠮᠢᠬᠠ ᠱᠦᠯᠦ ᠵᠢᠨ ᠪᠠᠷᠠ ᠬᠤᠭᠤᠯᠠᠨ ᠰᠢᠷᠡᠭᠡᠨ ᠡᠴᠡ ᠳᠠᠰᠤᠷᠠᠵᠤ᠂ ᠵᠠᠷᠢᠮ ᠳ᠋ᠠᠭᠠᠨ ᠴᠠᠭᠠᠨ ᠭᠤᠯᠢᠷ᠂ ᠳᠤᠳᠤᠷᠭᠠ ᠪᠤᠳᠠᠭᠠ ᠴᠦ᠍ ᠬᠤᠪᠤᠷᠳᠠᠵᠤ᠂ ᠰᠢᠰᠢ ᠵᠢᠨ ᠭᠤᠯᠢᠷ᠂ ᠰᠠᠭᠠᠭ ᠤ᠋ᠨ ᠭᠤᠯᠢᠷ᠂ ᠨᠠᠷᠢᠮᠤ ᠵᠡᠷᠭᠡ ᠨᠢ ᠭᠤᠤᠯᠯᠠᠵᠤ᠂ ᠴᠠᠭ ᠴᠠᠭ ᠬᠤᠪᠢᠷᠠᠳᠠᠭ ᠦᠭᠡᠢ ᠲᠠᠪᠤᠰᠤᠯᠠᠭᠰᠠᠨ ᠨᠤᠭᠤᠭᠠ᠂ ᠰᠢᠷᠠ ᠪᠤᠷᠴᠠᠭ ᠤ᠋ᠨ ᠵᠠᠭᠤᠰᠢ ᠰᠢᠷᠡᠭᠡᠨ ᠳ᠋ᠦ ᠡᠭᠡᠯᠵᠢᠯᠡᠨ ᠭᠠᠷᠴᠤ᠂ ᠬᠠᠪᠤᠷᠤᠨ ᠬᠠᠷᠠᠰᠤ ᠴᠠᠭᠤᠨ ᠠᠮᠳᠠ ᠵᠢ ᠮᠡᠳᠡᠷᠡᠬᠦᠯᠦᠨᠡ᠃
ᠦᠷᠯᠦᠭᠡᠨ ᠤ᠋ ᠨᠠᠮᠵᠢᠭᠤᠨ ᠪᠠᠢᠳᠠᠯ ᠵᠢᠡᠷ ᠡᠳᠦᠷ ᠤ᠋ᠨ ᠴᠠᠭ ᠠᠭᠤᠷ ᠢ᠋ ᠦᠷᠭᠦᠯᠵᠢ ᠲᠦᠰᠦᠭᠡᠯᠡᠳᠡᠭ ᠡᠮᠡᠭᠡ ᠭᠠᠳᠠᠨᠠ ᠲᠤᠮᠤ ᠲᠤᠭᠤᠭᠠᠨ ᠳ᠋ᠦ ᠮᠤᠨᠭᠭᠤᠯ ᠪᠤᠳᠠᠭᠠ᠂ ᠡᠷᠳᠡᠨᠢ ᠰᠢᠰᠢ ᠬᠠᠭᠤᠷᠠᠬᠤ ᠪᠡᠷ ᠪᠡᠯᠡᠳᠭᠡᠵᠤ ᠪᠠᠢᠳᠠᠯᠠ ᠰᠠᠯᠬᠢᠨ ᠳᠡᠭᠳᠡᠵᠤ᠂ ᠠᠵᠢᠯ ᠢ᠋ ᠨᠢ ᠰᠠᠭᠠᠳᠠᠬᠤ ᠪᠡᠷ 《ᠬᠠᠪᠤᠷ ᠤ᠋ᠨ ᠳᠡᠭᠷᠢ ᠬᠠᠭᠠᠰ ᠲᠠᠢ ᠬᠤᠭᠤᠰ ᠲᠠᠢ》 ᠭᠡᠵᠤ ᠳᠠᠩᠳᠠ ᠪᠠᠨ ᠠᠷᠭᠠ ᠪᠠᠷᠠᠬᠳᠠᠨ ᠶᠠᠷᠢᠳᠠᠭ᠃ ᠬᠠᠪᠤᠷ ᠤ᠋ᠨ ᠬᠤᠭᠤᠰ ᠪᠤᠯᠬᠤ ᠪᠡᠷ ᠯᠠ ᠴᠠᠭ ᠠᠭᠤᠷ ᠭᠡᠵᠤ ᠤᠯᠠᠮ ᠯᠠ ᠤᠷᠪᠠᠭᠠᠨ ᠬᠦᠷᠪᠡᠭᠡᠨ ᠲᠠᠢ ᠪᠤᠯᠵᠤ᠂ ᠦᠳᠡ ᠵᠢᠨ ᠡᠮᠦᠨᠡ ᠴᠠᠰᠤ ᠬᠠᠶᠠᠯᠠᠨ ᠬᠤᠢᠰᠠᠭᠠᠨᠠᠵᠦ ᠪᠠᠢᠭᠰᠠᠨ ᠵᠢᠡᠨ ᠦᠳᠡ ᠵᠢᠨ ᠬᠤᠢᠨᠠ ᠪᠤᠯᠬᠤᠳᠤ ᠨᠠᠷᠠᠨ ᠪᠤᠷᠤᠭᠠᠨ ᠲᠠᠢ ᠨᠠᠮᠢᠷᠠᠭᠤᠯᠴᠢᠬᠠᠨᠠ᠃ ᠨᠢᠮᠭᠡᠨ ᠵᠦᠭᠡᠯᠡᠨᠢ ᠡᠮᠦᠰᠴᠦ᠂ ᠨᠠᠷᠬᠢᠶᠠ ᠨᠠᠰᠤᠨᠤ ᠭᠠᠯᠪᠢᠷ ᠵᠢᠡᠨ ᠭᠠᠢᠬᠠᠭᠤᠯᠬᠤ ᠭᠡᠵᠦ ᠶᠠᠭᠠᠷᠠᠭᠰᠠᠨ ᠭᠡᠦᠬᠡᠨᠴᠤᠳ 《ᠬᠠᠪᠤᠷ ᠤ᠋ᠨ ᠰᠠᠯᠬᠢᠨ ᠬᠠᠪᠢᠷᠭᠠ ᠨᠡᠪᠳᠡᠯᠳᠡᠭ ᠶᠤᠮ》 ᠭᠡᠵᠤ ᠬᠤᠢᠨᠠ ᠡᠴᠡ ᠪᠠᠨ ᠡᠵᠢ ᠪᠡᠷ ᠵᠢᠠᠨ ᠨᠡᠭᠡᠭᠦᠯᠵᠤ᠂ ᠳᠠᠭᠤᠯᠭᠠᠵᠤ᠂ ᠪᠠᠰᠠ ᠬᠢᠮᠤᠷᠠᠨ ᠬᠠᠨᠢᠶᠠᠯᠭᠠᠵᠦ ᠪᠠᠢᠪᠠᠴᠤ᠂ ᠪᠤᠯᠵᠤᠭᠠᠨᠳᠠᠭᠠᠨ ᠭᠡᠵᠦ 《ᠲᠤᠷᠠᠳᠤ ᠰᠢᠷᠠ ᠦᠭᠡᠢ》 ᠮᠤᠷᠳᠠᠳᠠᠭ᠃
ᠬᠠᠪᠤᠷ 《ᠬᠠᠯᠠ ᠶᠡᠬᠡᠳᠡᠢ》 ᠭᠡᠵᠤ ᠪᠠᠭᠠ ᠪᠠᠢᠬᠤᠳᠠᠭᠠᠨ ᠵᠤᠨ ᠢᠷᠡᠬᠦ ᠵᠢ ᠡᠳᠦᠷ ᠲᠤᠭᠠᠯᠠᠨ ᠬᠦᠯᠢᠶᠡᠳᠡᠭ ᠪᠠᠢᠬᠰᠠᠨ ᠶᠤᠮ᠃ ᠦᠭᠡᠯᠡᠢ ᠪᠤᠯᠤᠭᠠᠳ ᠯᠠ ᠰᠠᠶᠢ ᠬᠦᠯᠳᠡᠬᠦᠦ ᠵᠢ ᠭᠡᠰᠭᠡᠵᠤ᠂ ᠬᠦᠢᠳᠡᠨ ᠢ᠋ ᠲᠤᠯᠠᠭᠠᠯᠠᠵᠤ᠂ ᠬᠠᠢᠯ ᠤ᠋ᠨ ᠤᠰᠤ ᠵᠢ ᠬᠠᠷᠴᠢᠬᠢᠨᠠᠭᠤᠯᠵᠤ᠂ ᠬᠠᠬᠳᠠ ᠬᠦᠪᠦᠷᠡᠭᠦᠯᠵᠤ᠂ ᠡᠪᠦᠯ ᠤ᠋ᠨ ᠬᠦᠢᠳᠡᠨ ᠰᠠᠯᠬᠢᠨ ᠢ᠋ ᠬᠦᠭᠡᠭᠡᠨ ᠶᠠᠪᠤᠭᠤᠯᠵᠦ ᠦᠩᠰᠢᠭ ᠵᠤᠨ ᠢ᠋ ᠵᠢᠷᠤᠬᠯᠠᠬᠤ ᠵᠢᠨ ᠲᠦᠯᠦᠭᠡ ᠭᠤᠷᠪᠠᠨ ᠰᠠᠷᠠ ᠪᠡᠷ ᠳᠡᠮᠡᠴᠡᠯ ᠬᠢᠵᠤ᠂ ᠦᠪᠡᠷ ᠲᠦ᠍ ᠪᠠᠨ ᠪᠠᠢᠳᠠᠭ ᠪᠦᠬᠦ ᠵᠦᠢᠯ ᠢ᠋ ᠡᠬᠡ ᠭᠠᠵᠠᠷ᠂ ᠠᠮᠢᠳᠠᠨ ᠭᠤᠤᠯᠳᠠᠨ ᠳ᠋ᠦ ᠦᠯᠡᠳᠡᠭᠡᠵᠤ᠂ ᠠᠴᠢ ᠭᠠᠪᠢᠶᠠ ᠪᠠᠨ ᠵᠤᠨ ᠳ᠋ᠦ ᠦᠭᠬᠦᠭᠡᠳ ᠪᠤᠴᠠᠳᠠᠭ ᠵᠢᠯᠤᠨ ᠡᠬᠢᠨ ᠬᠠᠪᠤᠷ ᠬᠠᠮᠤᠭ ᠦᠭᠬᠢᠶᠡᠮᠦᠷᠴᠢ ᠪᠤᠯᠬᠤ ᠵᠢ ᠤᠬᠠᠭᠠᠷᠠᠪᠠ᠃
ᠬᠠᠪᠤᠷᠤᠨ ᠬᠤᠭᠤᠰᠤᠨ ᠰᠡᠪᠡᠯᠵᠡᠬᠦ ᠰᠠᠯᠬᠢᠨ᠂ ᠬᠠᠴᠠᠷ ᠢ᠋ ᠢᠯᠪᠢᠨ ᠬᠠᠵᠠᠭᠤ ᠳ᠋ᠦ ᠢᠷᠡᠵᠤ᠂ ᠵᠠᠮ ᠤ᠋ᠨ ᠬᠠᠵᠠᠭᠤ ᠵᠢᠨ ᠦᠩᠭᠡᠷᠡᠭᠰᠡᠨ ᠵᠢᠯ ᠤ᠋ᠨ ᠦᠬᠦᠰᠢᠷᠡᠭᠰᠡᠨ ᠨᠠᠪᠴᠢᠰ ᠢ᠋ ᠬᠡᠢᠰᠭᠡᠨ᠂ ᠬᠦᠯᠦᠭᠡᠯᠡᠭᠰᠡᠨ ᠮᠤᠳᠤᠳᠤᠨ ᠨᠠᠮᠠᠭᠠ ᠲᠠᠢ ᠶᠠᠭᠤ ᠨᠢᠭᠡ ᠵᠢ ᠰᠢᠪᠡᠨᠡᠯᠳᠦᠨ ᠠᠯᠢᠶᠠᠷᠬᠠᠨᠠ᠃ ᠡᠬᠦᠯᠡᠰ ᠡᠪᠬᠡᠷᠡᠯᠳᠦᠨ ᠬᠤᠷᠡ ᠵᠢᠨ ᠦᠨᠦᠷ ᠨᠠᠭᠠᠰᠢᠯᠠᠨᠠ᠃ ᠬᠠᠪᠤᠷ ᠬᠠᠭᠠᠰᠯᠠᠴᠢᠬᠠᠭᠰᠠᠨ ᠶᠤᠮ ᠴᠢᠨᠢ ᠵᠦᠢᠯᠤᠨ ᠴᠡᠴᠡᠭ ᠲᠡᠯᠭᠡᠷᠡᠬᠦ ᠵᠤᠨ ᠢᠷᠡᠬᠦ ᠤᠳᠠᠨᠠ ᠤᠤᠳᠠ᠃