2024 ᠤᠨᠤ ᠲᠡᠯᠭᠡᠷ ᠵᠤᠨ ᠫᠠᠷᠢᠰᠤᠨ ᠣᠯᠢᠮᠫᠢᠺᠤᠨ ᠲᠠᠮᠢᠷᠤᠨ ᠴᠤᠭ᠍ᠯᠠᠭᠠᠨ ᠵᠢᠡᠷ ᠬᠠᠯᠬᠢᠯᠠᠵᠤ ᠦᠩᠭᠡᠷᠡᠯᠡ᠃ ᠫᠠᠷᠢᠰᠤᠨ ᠣᠯᠢᠮᠫᠢᠺᠤᠨ ᠲᠠᠮᠢᠷᠤᠨ ᠴᠤᠭ᠍ᠯᠠᠭᠠᠨ ᠨᠢ ᠳᠡᠯᠡᠬᠡᠢ ᠨᠡᠢᠲᠡᠳᠦ ᠪᠠᠰᠠ ᠨᠢᠭᠡᠨ ᠤᠳᠠᠭᠠᠨᠤ ᠪᠡᠶᠡᠶ᠋ᠢᠨ ᠲᠠᠮᠢᠷᠤᠨ ᠦᠪᠡᠳᠡᠭᠰᠢ ᠨᠠᠢᠷᠢ ᠰᠤᠨᠢᠷᠬᠠᠭᠤᠯᠤᠭᠰᠠᠨ ᠲᠡᠳᠦᠢ ᠦᠭᠡᠢ᠂ 《ᠬᠠᠷᠢᠯᠴᠠᠨ ᠤᠢᠯᠠᠭᠠᠯᠴᠠᠬᠤ·ᠨᠦᠬᠦᠷᠯᠡᠯ· ᠪᠦᠯᠬᠦᠮᠳᠡᠯ·ᠡᠷᠭᠡ ᠲᠡᠭᠰᠢ ᠪᠡᠷ ᠦᠷᠢᠰᠦᠯᠳᠦᠬᠦ》 ᠣᠯᠢᠮᠫᠢᠺᠤᠨ ᠲᠠᠮᠢᠷᠤᠨ ᠵᠣᠷᠢᠭ ᠰᠠᠨᠠᠭᠠᠶ᠋ᠢ ᠴᠢᠨᠠᠭᠰᠢᠳᠠ ᠤᠯᠠᠮᠵᠢᠯᠠᠨ ᠪᠠᠳᠠᠷᠠᠭᠤᠯᠤᠭᠰᠠᠨ ᠪᠠᠢᠨᠠ᠃ ᠮᠠᠨᠤ ᠤᠯᠤᠰᠤᠨ ᠪᠡᠶᠡᠶ᠋ᠢᠨ ᠲᠠᠮᠢᠷᠤᠨ ᠲᠥᠯᠥᠭᠡᠯᠡᠭ᠌ᠴᠢᠳᠦᠨ ᠪᠦᠯᠬᠦᠮ 《ᠨᠡᠩ ᠲᠦᠷᠭᠡᠨ᠂ ᠨᠡᠩ ᠦᠨᠳᠦᠷ᠂ᠨᠡᠩ ᠬᠦᠴᠦᠷᠭᠡᠭ — ᠨᠡᠩ ᠪᠦᠯᠬᠦᠮᠳᠡᠯ ᠲᠠᠢ》 ᠪᠠᠢᠬᠤ ᠵᠢ ᠭᠦᠢᠴᠡᠳ ᠢᠯᠡᠷᠡᠭᠦᠯᠵᠦ᠂ ᠡᠯᠡ ᠤᠷᠤᠯᠳᠤᠭᠠᠨᠤ ᠲᠥᠷᠥᠯ ᠵᠦᠢᠯᠳᠤ ᠪᠦᠬᠦ ᠰᠡᠳᠬᠢᠯ ᠪᠦᠬᠦ ᠵᠤᠷᠢᠭ ᠵᠢᠡᠷ ᠡᠷᠡᠯᠬᠡᠭ᠌ᠯᠡᠨ ᠲᠡᠮᠡᠴᠡᠵᠦ ᠤᠨᠴᠠ ᠰᠠᠢᠨ ᠬᠢᠷᠢ ᠪᠦᠳᠦᠮᠵᠢ ᠵᠢ ᠲᠠᠰᠤᠷᠠᠯᠳᠠ ᠦᠭᠡᠢ ᠰᠤᠨᠤᠷᠳᠠᠭᠤᠯᠵᠤ᠂ ᠲᠤᠮᠳᠠᠳᠤ ᠵᠢᠨ ᠪᠡᠶᠡ ᠵᠢᠨ ᠲᠠᠮᠢᠷᠤᠨ ᠬᠦᠴᠦᠷᠭᠡᠭᠵᠢᠯᠢ ᠲᠡᠯᠡᠭᠡᠢ ᠳ᠋ᠤ ᠭᠠᠢᠬᠠᠭᠤᠯᠵᠤ᠂ ᠲᠤᠮᠳᠠᠳᠤ ᠤᠯᠤᠰᠤᠨ ᠪᠡᠶᠡ ᠵᠢᠨ ᠲᠠᠮᠢᠷᠤᠨ ᠦᠢᠯᠡᠰᠤᠨ ᠬᠦᠭᠵᠢᠯᠳᠡ ᠵᠢᠨ ᠬᠢᠯᠠᠯᠵᠠᠮᠠ ᠬᠠᠭᠤᠳᠠᠰᠤ ᠵᠢ ᠪᠢᠴᠢᠭᠯᠡᠭᠰᠡᠨ ᠪᠠᠢᠨᠠ᠃
ᠫᠠᠷᠢᠰᠤᠨ ᠤᠯᠢᠮᠫᠢᠺᠤᠨ ᠲᠠᠮᠢᠷᠤᠨ ᠴᠤᠭᠯᠠᠭᠠᠨ ᠳ᠋ᠤ ᠥᠪᠥᠷ ᠮᠣᠩᠭᠣᠯ ᠨᠤᠲᠤᠭᠲᠠᠢ ᠪᠤᠶᠤ ᠦᠪᠦᠷ ᠮᠤᠩᠭᠤᠯᠤᠨ ᠠᠩᠭᠢ ᠵᠢᠨ ᠲᠠᠮᠢᠷᠴᠢᠳ 《ᠲᠡᠰᠪᠦᠷᠢ ᠬᠠᠳᠠᠭᠤᠵᠢᠯᠳᠠᠢ᠂ ᠴᠤᠴᠠᠯᠳᠠ ᠦᠭᠡᠢ ᠤᠷᠤᠭᠰᠢᠯᠠᠵᠤ᠂ ᠵᠤᠷᠢᠭᠰᠠᠨ ᠳ᠋ᠠᠭᠠᠨ ᠵᠠᠪᠠᠯ ᠬᠦᠷᠬᠦ》 ᠮᠤᠩᠭᠤᠯ ᠮᠤᠷᠢᠨᠤ ᠵᠤᠷᠢᠭ ᠰᠠᠨᠠᠭᠠ ᠵᠢ ᠬᠦᠢᠴᠡᠳ ᠪᠠᠳᠠᠷᠠᠭᠤᠯᠤᠨ᠂ ᠤᠯᠤᠰ ᠣᠷᠣᠨᠳ᠋ᠠᠭᠠᠨ ᠡᠷᠬᠢᠮ ᠲᠡᠭᠡᠳᠦ ᠢᠷᠠᠭᠤ ᠠᠯᠳᠠᠷᠢ ᠲᠡᠮᠡᠴᠡᠨ ᠤᠯᠤᠭᠰᠠᠨ ᠪᠠᠢᠨᠠ᠃ ᠲᠤᠰ ᠬᠤᠭᠤᠴᠠᠭᠠᠨ ᠳ᠋ᠤ ᠪᠢᠳᠡ ᠡᠳᠡᠭᠡᠷ ᠲᠠᠮᠢᠷᠴᠢᠨᠤ ᠢᠷᠠᠭᠤ ᠠᠯᠳᠠᠷᠢ ᠤᠨᠴᠠᠯᠠᠨ ᠲᠡᠮᠳᠡᠭᠯᠡᠵᠦ᠂ ᠨᠡᠩ ᠤᠯᠠᠨ ᠦᠪᠦᠷ ᠮᠤᠩᠭᠤᠯ ᠨᠤᠳᠤᠭᠳᠠᠢ ᠪᠤᠶᠤ ᠦᠪᠦᠷ ᠮᠤᠩᠭᠤᠯᠤᠨ ᠠᠩᠬᠢ ᠵᠢᠨ ᠲᠠᠮᠢᠷᠴᠢᠳᠤᠨ ᠤᠯᠤᠰ ᠤᠷᠤᠨᠤ ᠢᠷᠠᠭᠤ ᠠᠯᠳᠠᠷᠤᠨ ᠲᠦᠯᠦᠭᠡ ᠦᠷᠬᠦᠯᠵᠢᠯᠡᠨ ᠲᠡᠮᠡᠴᠡᠬᠦ ᠵᠢ ᠤᠷᠢᠶᠠᠯᠠᠨ ᠵᠤᠷᠢᠬᠵᠢᠭᠤᠯᠤᠨᠠᠮ！ᠤᠯᠢᠮᠫᠢᠺᠤᠨ ᠲᠠᠮᠢᠷᠴᠢᠳᠤᠨ ᠤᠯᠤᠰ ᠤᠷᠤᠨᠤ ᠢᠷᠠᠭᠤ ᠠᠯᠳᠠᠷᠤᠨ ᠲᠦᠯᠦᠭᠡ ᠡᠷᠡᠯᠭᠡᠭᠯᠡᠨ ᠲᠡᠮᠡᠴᠡᠬᠦ ᠵᠤᠷᠢᠭ ᠰᠠᠨᠠᠭᠠ ᠨᠢ ᠦᠨᠳᠦᠰᠦᠳᠡᠨ ᠨᠤᠬᠦᠳᠤᠨ ᠠᠷᠠᠳ ᠲᠦᠮᠡᠨᠤ ᠠᠵᠢᠯ ᠦᠢᠯᠡᠰ ᠵᠢᠡᠨ ᠤᠷᠤᠭᠰᠢ ᠠᠬᠢᠭᠤᠯᠬᠤ ᠬᠦᠴᠦᠷᠭᠡᠭ ᠶᠡᠭᠡ ᠬᠦᠳᠡᠯᠭᠡᠬᠦ ᠬᠦᠴᠦᠨ ᠪᠤᠯᠬᠤ ᠨᠢ ᠲᠠᠮᠵᠢᠭ ᠦᠭᠡᠢ᠃
ᠶᠠᠩ ᠵᠢᠶᠠ ᠢᠦᠶ
ᠡᠮᠡᠭᠳᠡᠢ ᠵᠢᠨ 20 ᠺᠢᠯᠤᠮᠸᠲᠷᠤᠨ ᠠᠯᠬᠤᠭᠠ
ᠤᠷᠤᠯᠳᠤᠭᠠᠨᠤ ᠠᠯᠳᠠᠨ ᠮᠸᠳᠠᠯᠤᠨ ᠡᠵᠡᠨ
ᠲᠤᠬᠠᠢ ᠵᠢᠨ ᠭᠠᠵᠠᠷᠤᠨ ᠴᠠᠭ ᠵᠢᠡᠷ 8 ᠰᠠᠷᠠ ᠵᠢᠨ 1 ᠤ᠋ ᠡᠳᠦᠷ᠂ ᠫᠠᠷᠢᠰᠤᠨ ᠣᠯᠢᠮᠫᠢᠺᠤᠨ ᠲᠠᠮᠢᠷᠤᠨ ᠴᠤᠭ᠍ᠯᠠᠭᠠᠨᠤ ᠡᠮᠡᠭ᠌ᠲᠡᠶᠶ᠋ᠢᠨ 20 ᠺᠢᠯᠣᠮᠧᠲ᠋ᠷᠦᠨ ᠠᠯᠬᠤᠭᠠ ᠤᠷᠤᠯᠳᠤᠭᠠᠨᠤ ᠰᠢᠢᠳᠪᠦᠷᠢᠳᠦ ᠤᠷᠤᠯᠳᠤᠭᠠᠨ ᠳ᠋ᠤ ᠲᠤᠮᠳᠠᠳᠤ ᠤᠯᠤᠰᠤᠨ ᠲᠠᠮᠢᠷᠴᠢᠨ ᠶᠠᠩ ᠵᠢᠶᠠ ᠢᠤᠢ 1 ᠴᠠᠭ 25 ᠮᠢᠨᠦ᠋ᠲ 54 ᠰᠧᠺᠦ᠋ᠨ᠋ᠳ᠋ᠤᠨ ᠬᠢᠷᠢ ᠪᠦᠲᠦᠮᠵᠢ ᠪᠡᠷ ᠮᠠᠩᠯᠠᠢᠯᠠᠵᠤ᠂ ᠮᠠᠨᠤ ᠤᠯᠤᠰᠤᠨ ᠠᠩᠭᠢᠵᠢᠨ ᠲᠤᠰ ᠬᠤᠭᠤᠴᠠᠭᠠᠨᠤ ᠤᠯᠢᠮᠫᠢᠺᠤᠨ ᠲᠠᠮᠢᠷᠤᠨ ᠴᠤᠭᠯᠠᠭᠠᠨᠤ ᠠᠷᠪᠠᠨ ᠨᠢᠭᠡᠳᠦᠭᠡᠷ ᠠᠯᠲᠠᠨ ᠮᠧᠳᠠᠯᠢ ᠤᠯᠵᠠᠢ᠃
ᠶᠠᠩ ᠵᠢᠶᠠ ᠢᠦᠢ 1996 ᠣᠨᠳᠤ ᠦᠬᠠᠢ ᠬᠤᠳᠠᠳᠤ ᠲᠦᠷᠦᠵᠦ᠍᠂ 2010 ᠣᠨᠳᠤ ᠠᠯᠬᠤᠭᠠ ᠤᠷᠤᠯᠳᠤᠭᠠᠨᠤ ᠲᠤᠰᠭᠠᠢ ᠪᠣᠯᠪᠠᠰᠤᠷᠠᠯ ᠵᠢᠡᠨ ᠡᠬᠢᠯᠡᠭᠦᠯᠪᠡ᠃ 2012 ᠣᠨᠤ ᠯᠣᠨᠳᠣᠨᠤ ᠣᠯᠢᠮᠫᠢᠺᠤᠨ ᠲᠠᠮᠢᠷᠤᠨ ᠴᠤᠭ᠍ᠯᠠᠭᠠᠨᠤ ᠳᠠᠷᠠᠭᠠ᠂ ᠲᠤᠬᠠᠶᠶ᠋ᠢᠨ ᠦᠶᠡᠳᠦ 16 ᠨᠠᠰᠤᠲᠠᠶ ᠪᠠᠢᠭᠰᠠᠨ ᠶᠠᠩ ᠵᠢᠶᠠ ᠢᠦᠶ ᠤᠯᠤᠰᠤᠨ ᠠᠩᠭᠢᠳᠤ ᠱᠢᠯᠵᠢᠪᠡ᠃ 2017 ᠣᠨᠤ 8 ᠰᠠᠷᠠᠳᠤ᠂ ᠯᠣᠨᠳᠣᠨᠳᠤ ᠪᠤᠯᠤᠭᠰᠠᠨ ᠬᠦᠨᠳᠦ ᠬᠥᠩᠭᠡᠨ ᠪᠡᠶᠡ ᠵᠢᠨ ᠲᠠᠮᠢᠷᠤᠨ ᠳᠡᠯᠡᠬᠡᠶᠶ᠋ᠢᠨ ᠮᠠᠩᠯᠠᠶ ᠱᠢᠯᠭᠠᠷᠠᠭᠤᠯᠬᠤ ᠤᠷᠤᠯᠳᠤᠭᠠᠨᠤ ᠡᠮᠡᠭ᠌ᠲᠡᠶᠶ᠋ᠢᠨ 20 ᠺᠢᠯᠣᠮᠧᠲ᠋ᠷᠦᠨ ᠠᠯᠬᠤᠭᠠ ᠤᠷᠤᠯᠳᠤᠭᠠᠨᠳᠤ᠂ ᠶᠠᠩ ᠵᠢᠶᠠ ᠢᠦᠶ 1 ᠴᠠᠭ 26 ᠮᠢᠨᠦ᠋ᠲ 18 ᠰᠧᠺᠦ᠋ᠨ᠋ᠳ᠋ᠤᠨ ᠬᠢᠷᠢ ᠪᠦᠲᠦᠮᠵᠢ ᠪᠡᠷ ᠬᠤᠪᠢ ᠬᠥᠮᠦᠨᠦ ᠬᠠᠮᠤᠭᠤᠨ ᠰᠠᠢᠨ ᠬᠢᠷᠢ ᠪᠦᠲᠦᠮᠵᠢᠶ᠋ᠢ ᠡᠭᠦᠳᠦᠭ᠌ᠰᠡᠨ ᠪᠥᠭᠡᠳ ᠠᠯᠲᠠᠨ ᠮᠧᠳᠠᠯ ᠣᠯᠪᠠ᠃ 2021 ᠣᠨᠤ ᠪᠥᠬᠥ᠌ ᠤᠯᠤᠰᠤᠨ ᠠᠯᠬᠤᠭᠠ ᠤᠷᠤᠯᠳᠤᠭᠠᠨᠤ ᠮᠠᠩᠯᠠᠶ ᠱᠢᠯᠭᠠᠷᠠᠭᠤᠯᠬᠤ ᠤᠷᠤᠯᠳᠤᠭᠠᠨ ᠵᠢᠴᠢ ᠲᠣᠣᠺᠢᠣ᠋ᠶ᠋ᠢᠨ ᠣᠯᠢᠮᠫᠢᠺᠤᠨ ᠲᠠᠮᠢᠷᠤᠨ ᠴᠤᠭ᠍ᠯᠠᠭᠠᠨᠤ ᠱᠢᠯᠭᠠᠷᠠᠭᠤᠯᠬᠤ ᠤᠷᠤᠯᠳᠤᠭᠠᠨᠳᠤ ᠲᠡᠷᠡ 1 ᠴᠠᠭ 23 ᠮᠢᠨᠦ᠋ᠲ 49 ᠰᠧᠺᠦ᠋ᠨ᠋ᠳ᠋ᠦᠨ ᠬᠢᠷᠢ ᠪᠦᠲᠦᠮᠵᠢᠪᠡᠷ ᠡᠮᠡᠭ᠌ᠲᠡᠶᠶ᠋ᠢᠨ 20 ᠺᠢᠯᠣᠮᠧᠲ᠋ᠷᠦᠨ ᠠᠯᠬᠤᠭᠠ ᠤᠷᠤᠯᠳᠤᠭᠠᠨᠤ ᠲᠥᠷᠥᠯ ᠵᠦᠶ᠋ᠯᠦᠨ ᠳᠡᠯᠡᠬᠡᠶᠶ᠋ᠢᠨ ᠲᠡᠮᠳᠡᠭ᠌ᠯᠡᠯᠢ ᠡᠭᠦᠳᠦᠭᠰᠡᠨ ᠪᠥᠭᠡᠳ ᠣᠲᠣ ᠪᠣᠯᠲᠠᠯᠠ ᠪᠠᠲᠤᠯᠠᠭᠰᠠᠭᠠᠷ ᠪᠠᠢᠨᠠ᠃
2021 ᠣᠨᠳᠤ ᠶᠠᠩ ᠵᠢᠶᠠ ᠢᠦᠶ ᠲᠣᠣᠺᠢᠣ᠋ᠶ᠋ᠢᠨ ᠣᠯᠢᠮᠫᠢᠺᠤᠨ ᠲᠠᠮᠢᠷᠤᠨ ᠴᠤᠭ᠍ᠯᠠᠭᠠᠨᠳᠤ 2 ᠮᠢᠨᠦ᠋ᠲ ᠵᠤᠭᠰᠤᠭᠠᠬᠤ ᠪᠡᠷ ᠲᠣᠷᠭᠠᠭ᠍ᠳᠠᠭᠠᠳ ᠬᠠᠷᠠᠮᠰᠠᠯᠲᠠᠢ ᠪᠡᠷ ᠱᠠᠩᠨᠠᠯᠤᠨ ᠮᠧᠲᠠᠯ ᠤᠯᠵᠤ ᠳᠡᠢᠯᠦᠭᠰᠡᠨ ᠦᠭᠡᠢ᠃ 2023 ᠤᠨᠤ ᠬᠠᠩᠵᠧᠦ᠍ᠶ᠋ᠢᠨ ᠠᠽᠢᠶᠠ ᠲᠢᠪᠦᠨ ᠲᠠᠮᠢᠷᠤᠨ ᠴᠤᠭ᠍ᠯᠠᠭᠠᠨ ᠳᠡᠭᠡᠷᠡ᠂ ᠶᠠᠩ ᠵᠢᠶᠠ ᠢᠦᠶ ᠡᠮᠡᠭ᠌ᠲᠡᠶᠶ᠋ᠢᠨ 20 ᠺᠢᠯᠣᠮᠧᠲ᠋ᠷᠦᠨ ᠠᠯᠬᠤᠭᠠ ᠤᠷᠤᠯᠳᠤᠭᠠᠨᠤ ᠱᠢᠶ᠋ᠳᠪᠦᠷᠢᠲᠦ ᠤᠷᠤᠯᠳᠤᠭᠠᠨᠳᠤ 1 ᠴᠠᠭ 30 ᠮᠢᠨᠦ᠋ᠲ 03 ᠰᠧᠺᠦ᠋ᠨ᠋ᠳ᠋ᠢᠶᠡᠷ ᠮᠠᠩᠯᠠᠢᠯᠠᠪᠠ᠃
ᠫᠠᠷᠢᠰᠤᠨ ᠣᠯᠢᠮᠫᠢᠺᠦᠨ ᠲᠠᠮᠢᠷᠤᠨ ᠴᠤᠭ᠍ᠯᠠᠭᠠᠨᠳ᠋ᠤ 20 ᠺᠢᠯᠣᠮᠧᠲ᠋ᠷᠦᠨ ᠠᠯᠬᠤᠭᠠ ᠤᠷᠤᠯᠳᠤᠭᠠᠨᠤ ᠠᠯᠲᠠᠨ ᠮᠧᠲᠠᠯᠢ ᠤᠯᠤᠭᠰᠠᠨ ᠵᠢᠡᠷ᠂ ᠶᠠᠩ ᠵᠢᠶᠠ ᠢᠦᠢ ᠣᠯᠢᠮᠫᠢᠺᠤᠨ ᠲᠠᠮᠢᠷᠤᠨ ᠴᠤᠭ᠍ᠯᠠᠭᠠᠨᠤ ᠮᠠᠩᠯᠠᠶ᠂ ᠳᠡᠯᠡᠬᠡᠶᠶ᠋ᠢᠨ ᠮᠠᠩᠯᠠᠶ ᠱᠢᠯᠭᠠᠷᠠᠭᠤᠯᠬᠤ ᠤᠷᠤᠯᠳᠤᠭᠠᠨᠤ ᠮᠠᠩᠯᠠᠶ ᠪᠠ ᠳᠡᠯᠡᠬᠡᠶᠶ᠋ᠢᠨ ᠲᠡᠮᠳᠡᠭ᠌ᠯᠡᠯᠢ ᠡᠭᠦᠳᠦᠭᠰᠡᠨ ᠵᠡᠷᠭᠡ ᠠᠯᠳᠠᠷ ᠭᠠᠪᠢᠶᠠ ᠵᠢ ᠪᠦᠷᠢᠳᠦᠭᠦᠯᠦᠭᠰᠡᠨ ᠪᠠᠢᠨᠠ᠃
ᠯᠢ ᠴᠢᠶᠠᠨ
ᠡᠮᠡᠭᠳᠡᠢ ᠵᠢᠨ ᠪᠤᠺᠰ ᠤᠨ ᠲᠡᠮᠡᠴᠡᠭᠡᠨ ᠤ 75
ᠺᠢᠯᠣᠭ᠌ᠷᠠᠮᠤᠨ ᠲᠡᠰᠤᠨ ᠠᠯᠳᠠᠨ ᠮᠸᠳᠠᠯᠤᠨ ᠡᠵᠡᠨ
ᠪᠡᠭᠡᠵᠢᠩᠤᠨ ᠴᠠᠭ ᠵᠢᠡᠷ 8 ᠰᠠᠷᠠ ᠵᠢᠨ 11ᠤ᠋ ᠡᠳᠦᠷᠤᠨ ᠦᠷᠯᠦᠭᠡ᠂ ᠫᠠᠷᠢᠰᠤᠨ ᠤᠯᠢᠮᠫᠢᠺᠤᠨ ᠲᠠᠮᠢᠷᠤᠨ ᠴᠤᠭᠯᠠᠭᠠᠨᠤ ᠡᠮᠡᠭᠲᠡᠢ ᠵᠢᠨ 75 ᠺᠢᠯᠤᠭ᠌ᠷᠠᠮᠤᠨ ᠳᠡᠰᠤᠨ ᠪᠤᠺᠰᠤᠨ ᠲᠡᠮᠡᠴᠡᠭᠡᠨᠤ ᠰᠢᠢᠳᠪᠦᠷᠢᠲᠦ ᠤᠷᠤᠯᠳᠤᠭᠠᠨᠳᠤ᠂ ᠳᠤᠮᠳᠠᠳᠤ ᠤᠯᠤᠰᠤᠨ ᠲᠦᠯᠦᠭᠡᠯᠡᠭᠴᠢᠳᠤᠨ ᠠᠩᠭᠢ ᠵᠢᠨ ᠦᠪᠦᠷ ᠮᠤᠩᠭᠤᠯᠤᠨ ᠲᠠᠮᠢᠷᠴᠢᠨ ᠯᠢ ᠴᠢᠶᠠᠨ ᠠᠯᠲᠠᠨ ᠮᠧᠲᠠᠯ ᠤᠯᠪᠠ᠃
ᠯᠢ ᠴᠢᠶᠠᠨ 1990 ᠤᠨ ᠳ᠋ᠤ ᠾᠧᠨᠠᠨᠤ ᠱᠠᠩᠴᠢᠤ ᠬᠣᠲᠠᠳᠤ ᠲᠦᠷᠦᠵᠡᠢ᠃ 2006 ᠣᠨᠳᠤ ᠡᠴᠢᠭᠡ ᠡᠬᠡᠪᠡᠨ ᠳᠠᠭᠠᠵᠤ ᠣᠷᠳᠣᠰᠲᠤ ᠢᠷᠡᠵᠦ᠍᠂ ᠮᠥᠨ ᠵᠢᠯᠳᠡᠭᠡᠨ ᠥᠪᠥᠷ ᠮᠣᠩᠭᠣᠯᠤᠨ ᠪᠡᠶᠡᠶ᠋ᠢᠨ ᠲᠠᠮᠢᠷᠤᠨ ᠠᠵᠢᠯ ᠮᠡᠷᠭᠡᠵᠢᠯᠦᠨ ᠳᠡᠭᠡᠳᠦ ᠰᠤᠷᠭᠠᠭᠤᠯᠢᠳᠤ ᠣᠷᠣᠵᠤ ᠰᠤᠷᠤᠯᠴᠠᠪᠠ᠃ 2007 ᠣᠨᠳᠤ᠂ ᠯᠢ ᠴᠢᠶᠠᠨ ᠳᠤᠮᠳᠠᠳᠤ ᠤᠯᠤᠰᠤᠨ ᠪᠤᠺᠰᠤᠨ ᠠᠩᠭᠢᠶ᠋ᠢᠨ ᠳᠠᠰᠭᠠᠯᠵᠢᠭᠤᠯᠤᠭ᠍ᠴᠢ ᠬᠠᠳᠠᠨᠪᠠᠭᠠᠲᠤᠷᠲᠤ ᠰᠤᠩᠭᠤᠭᠳᠠᠵᠤ᠂ ᠥᠪᠥᠷ ᠮᠣᠩᠭᠣᠯᠤᠨ ᠥᠪᠡᠷᠲᠡᠭᠡᠨ ᠵᠠᠰᠠᠬᠤ ᠣᠷᠣᠨᠤ ᠪᠤᠺᠰᠤᠨ ᠠᠩᠭᠢᠳᠤ ᠤᠷᠤᠵᠤ᠂ ᠪᠤᠺᠰᠤᠨ ᠲᠠᠮᠢᠷᠴᠢᠨᠤ ᠭᠠᠷᠤᠭᠠ ᠪᠠᠨ ᠡᠯᠬᠦᠵᠡᠢ᠃ ᠤᠯᠠᠨ ᠵᠢᠯᠦᠨ ᠲᠤᠷᠰᠢ᠂ ᠯᠢ ᠴᠢᠶᠠᠨ ᠣᠯᠠᠨ ᠤᠯᠤᠰᠤᠨ ᠤᠷᠤᠯᠳᠤᠭᠠᠨ ᠳᠤ ᠤᠳᠠᠭᠠ ᠲᠠᠷᠠᠭᠠᠯᠠᠨ ᠤᠷᠤᠯᠴᠠᠵᠤ᠂ ᠤᠯᠠᠨᠲᠠ ᠱᠠᠩᠨᠠᠯ ᠤᠨ ᠮᠸᠳᠠᠯ ᠵᠢᠡᠷ ᠡᠩᠭᠡᠷ ᠵᠢᠡᠨ ᠮᠢᠯᠢᠶᠠᠯᠭᠠᠵᠤ᠂ ᠲᠡᠯᠡᠭᠡᠢ ᠳ᠋ᠤ ᠠᠯᠳᠠᠷᠳᠠᠢ ᠪᠤᠺᠰᠴᠢᠨ ᠪᠤᠯᠤᠭᠰᠠᠨ ᠪᠠᠢᠨᠠ᠃
2016 ᠣᠨᠳᠤ᠂ ᠷᠢᠦ᠋ ᠳ᠋ᠢ ᠿᠸᠨ᠋ᠸᠢ᠌ᠷᠦ᠋ ᠵᠢᠨ ᠣᠯᠢᠮᠫᠢᠺᠤᠨ ᠲᠠᠮᠢᠷᠤᠨ ᠴᠤᠭ᠍ᠯᠠᠭᠠᠨᠤ ᠡᠮᠡᠭ᠌ᠲᠡᠢᠶ᠋ᠢᠨ ᠪᠤᠺᠰᠤᠨ ᠲᠡᠮᠡᠴᠡᠭᠡᠨᠤ 75 ᠺᠢᠯᠣᠭ᠌ᠷᠠᠮᠤᠨ ᠲᠡᠰᠤᠨ ᠬᠦᠷᠡᠯ ᠮᠧᠳᠠᠯ ᠢ ᠤᠯᠵᠤ᠂ ᠥᠪᠥᠷ ᠮᠣᠩᠭᠣᠯᠤᠨ ᠡᠮᠡᠭ᠌ᠲᠡᠶ ᠲᠠᠮᠢᠷᠴᠢᠳᠤᠨ ᠲᠤᠳᠤᠷᠠ ᠣᠯᠢᠮᠫᠢᠺᠤᠨ ᠲᠠᠮᠢᠷᠤᠨ ᠴᠤᠭ᠍ᠯᠠᠭᠠᠨᠤ ᠱᠠᠩᠨᠠᠯᠤᠨ ᠮᠧᠳᠠᠯᠢ ᠣᠯᠤᠭ᠍ᠰᠠᠨ ᠠᠩᠬᠠᠳᠠᠭ᠍ᠴᠢ ᠬᠥᠮᠦᠨ ᠪᠤᠯᠵᠠᠢ； 2021ᠤᠨ ᠳ᠋ᠤ ᠲᠣᠣᠺᠢᠣ᠋ᠶ᠋ᠢᠨ ᠣᠯᠢᠮᠫᠢᠺᠤᠨ ᠲᠠᠮᠢᠷᠤᠨ ᠴᠤᠭ᠍ᠯᠠᠭᠠᠨᠳᠤ ᠯᠢ ᠴᠢᠶᠠᠨ ᠳᠠᠬᠢᠨᠲᠠ ᠤᠯᠤᠰᠤᠨ ᠠᠩᠭᠢᠶ᠋ᠢ ᠲᠥᠯᠥᠭᠡᠯᠡᠨ ᠣᠷᠣᠯᠴᠠᠵᠤ᠂ ᠡᠮᠡᠭ᠌ᠲᠡᠶᠶ᠋ᠢᠨ ᠪᠤᠺᠰᠤᠨ ᠲᠡᠮᠡᠴᠡᠭᠡᠨᠤ 75 ᠺᠢᠯᠣᠭ᠌ᠷᠠᠮᠤᠨ ᠲᠡᠰᠤᠨ ᠮᠥᠩᠭᠥᠨ ᠮᠧᠳᠠᠯᠢ ᠤᠯᠵᠤ᠂ ᠥᠪᠥᠷ ᠮᠣᠩᠭᠣᠯᠤᠨ ᠲᠠᠮᠢᠷᠴᠢᠳᠤᠨ ᠬᠢᠯᠢᠶ᠋ᠢᠨ ᠭᠠᠳᠠᠨᠠᠬᠢ ᠣᠯᠢᠮᠫᠢᠺᠤᠨ ᠲᠠᠮᠢᠷᠤᠨ ᠴᠤᠭ᠍ᠯᠠᠭᠠᠨᠤ ᠬᠠᠮᠤᠭᠤᠨ ᠰᠠᠢᠨ ᠬᠢᠷᠢ ᠪᠦᠲᠦᠮᠵᠢ ᠵᠢ ᠡᠭᠦᠳᠴᠡᠢ᠃
2023 ᠣᠨᠤ 10 ᠰᠠᠷᠠ ᠳ᠋ᠤ᠂ ᠬᠠᠩᠵᠧᠦ᠍ᠶ᠋ᠢᠨ ᠠᠽᠢᠶᠠ ᠲᠢᠪᠦᠨ ᠲᠠᠮᠢᠷᠤᠨ ᠴᠤᠭ᠍ᠯᠠᠭᠠᠨᠤ ᠪᠤᠺᠰᠤᠨ ᠲᠡᠮᠡᠴᠡᠭᠡᠨᠤ ᠡᠮᠡᠭ᠌ᠲᠡᠶ ᠵᠢᠨ 75 ᠺᠢᠯᠣᠭ᠌ᠷᠠᠮᠤᠨ ᠲᠡᠰᠤᠨ ᠱᠢᠶ᠋ᠳᠪᠦᠷᠢᠲᠦ ᠤᠷᠤᠯᠳᠤᠭᠠᠨᠳᠤ ᠯᠢ ᠴᠢᠶᠠᠨ ᠡᠨᠡᠳᠭᠡᠭᠦᠨ ᠲᠠᠮᠢᠷᠴᠢᠨᠢ ᠢᠯᠠᠵᠤ᠂ ᠠᠯᠲᠠᠨ ᠮᠧᠳᠠᠯ ᠵᠢᠡᠷ ᠡᠩᠭᠡᠷ ᠵᠢᠡᠨ ᠮᠢᠯᠢᠶᠠᠯᠭᠠᠭᠰᠠᠨ ᠪᠥᠭᠡᠳ ᠫᠠᠷᠢᠰᠤᠨ ᠣᠯᠢᠮᠫᠢᠺᠤᠨ ᠲᠠᠮᠢᠷᠤᠨ ᠴᠤᠭ᠍ᠯᠠᠭᠠᠨᠳᠤ ᠣᠷᠣᠯᠴᠠᠬᠤ ᠬᠢᠷᠢ ᠬᠡᠮᠢ ᠣᠯᠤᠭ᠍ᠰᠠᠨ ᠪᠠᠢᠨᠠ᠃ ᠲᠤᠰ ᠬᠤᠭᠤᠴᠠᠭᠠᠨᠤ ᠤᠯᠢᠮᠫᠢᠺᠤᠨ ᠲᠠᠮᠢᠷᠤᠨ ᠴᠤᠭᠯᠠᠭᠠᠨᠳᠤ ᠠᠯᠲᠠᠨ ᠮᠧᠲᠠᠯ ᠤᠯᠤᠭᠰᠠᠨ ᠵᠢᠡᠷ ᠯᠢ ᠴᠢᠶᠠᠨ ᠪᠦᠬᠦ ᠠᠯᠲᠠᠨ ᠮᠧᠲᠠᠯᠢ ᠪᠦᠷᠢᠳᠦᠭᠦᠯᠦᠭᠰᠡᠨ ᠳᠤᠮᠳᠠᠳᠤ ᠤᠯᠤᠰᠤᠨ ᠠᠩᠬᠠᠨᠤ ᠪᠤᠺᠰᠴᠢᠨ ᠪᠤᠯᠵᠤ᠂ ᠮᠦᠨᠴᠦ ᠭᠤᠷᠪᠠᠨ ᠬᠤᠭᠤᠴᠠᠭᠠᠨᠤ ᠤᠯᠢᠮᠫᠢᠺᠤᠨ ᠲᠠᠮᠢᠷᠤᠨ ᠴᠤᠭᠯᠠᠭᠠᠨᠳᠤ ᠪᠤᠺᠰᠤᠨ ᠬᠦᠷᠡᠯ᠂ ᠮᠦᠩᠬᠦ᠂ ᠠᠯᠳᠠ ᠭᠤᠷᠪᠠᠨ ᠵᠦᠢᠯᠤᠨ ᠮᠧᠲᠠᠯᠢ ᠤᠯᠤᠭᠰᠠᠨ ᠮᠠᠨᠤ ᠤᠯᠤᠰᠤᠨ ᠠᠩᠬᠠᠳᠠᠭᠴᠢ ᠡᠮᠡᠭᠲᠡᠢ ᠪᠤᠺᠰᠴᠢᠨ ᠪᠤᠯᠤᠭᠰᠠᠨ ᠪᠠᠢᠨᠠ᠃
ᠶᠠᠩ ᠯᠢᠦ
ᠡᠮᠡᠭᠳᠡᠢ ᠵᠢᠨ ᠪᠤᠺᠰ ᠤᠨ ᠲᠡᠮᠡᠴᠡᠭᠡᠨᠤ 66
ᠺᠢᠯᠣᠭ᠌ᠷᠠᠮᠤᠨ ᠲᠡᠰᠤᠨ ᠮᠦᠩᠬᠦᠨ ᠮᠸᠳᠠᠯᠤᠨ ᠡᠵᠡᠨ
ᠪᠡᠭᠡᠵᠢᠩᠤᠨ ᠴᠠᠭ ᠵᠢᠡᠷ 8 ᠰᠠᠷᠠ ᠵᠢᠨ 7 ᠤ᠋ ᠦᠷ ᠵᠢᠡᠷ᠂ ᠫᠠᠷᠢᠰᠤᠨ ᠣᠯᠢᠮᠫᠢᠺᠦᠨ ᠲᠠᠮᠢᠷᠤᠨ ᠴᠤᠭ᠍ᠯᠠᠭᠠᠨᠤ ᠪᠤᠺᠰᠤᠨ ᠲᠡᠮᠡᠴᠡᠭᠡᠨᠤ ᠡᠮᠡᠭᠳᠡᠢ ᠵᠢᠨ 66 ᠺᠢᠯᠣᠭ᠌ᠷᠠᠮᠤᠨ ᠲᠡᠰᠤᠨ ᠬᠠᠭᠠᠰ ᠰᠢᠢᠳᠪᠦᠷᠢᠳᠦ ᠤᠷᠤᠯᠳᠤᠭᠠᠨ ᠳ᠋ᠤ᠂ ᠦᠪᠦᠷ ᠮᠤᠩᠭᠤᠯᠤᠨ ᠲᠠᠮᠢᠷᠴᠢᠨ ᠶᠠᠩ ᠯᠢᠦ 4 ᠄ 1 ᠪᠡᠷ ᠦᠷᠢᠰᠦᠯᠳᠦᠭᠴᠢ ᠡᠳᠡᠭᠡᠳ ᠵᠢᠡᠨ ᠢᠯᠠᠵᠤ᠂ 8 ᠰᠠᠷᠠ ᠵᠢᠨ 10ᠤ᠋ ᠡᠳᠦᠷᠤᠨ ᠰᠢᠢᠳᠪᠦᠷᠢᠳᠦ ᠤᠷᠤᠯᠳᠤᠭᠠᠨ ᠳ᠋ᠤ ᠮᠦᠩᠬᠦᠨ ᠮᠸᠳᠠᠯ ᠭᠠᠷᠳᠠᠯᠠ᠃
ᠶᠠᠩ ᠯᠢᠦ 1992 ᠣᠨᠳᠤ ᠤᠯᠠᠭᠠᠨᠬᠠᠳᠠ ᠬᠣᠲᠠᠶ᠋ᠢᠨ ᠠᠷᠤ ᠬᠣᠷᠴᠢᠨ ᠬᠣᠱᠢᠭᠤᠨᠳᠤ ᠳᠦᠷᠦᠵᠦ᠍᠂ 2007 ᠣᠨᠳᠤ ᠪᠤᠺᠰᠤᠨ ᠲᠡᠮᠡᠴᠡᠭᠡᠨᠦ ᠵᠠᠮ ᠵᠢᠡᠨ ᠡᠯᠭᠦᠵᠦ᠂ 2008 ᠣᠨᠳᠤ ᠥᠪᠥᠷ ᠮᠣᠩᠭᠣᠯᠤᠨ ᠪᠤᠺᠰᠤᠨ ᠲᠡᠮᠡᠴᠡᠭᠡᠨᠦ ᠠᠩᠭᠢᠳᠤ ᠣᠷᠣᠵᠤ᠂ 2013 ᠣᠨᠳᠤ ᠤᠯᠤᠰᠤᠨ ᠪᠤᠺᠰᠤᠨ ᠲᠡᠮᠡᠴᠡᠭᠡᠨᠦ ᠠᠩᠭᠢᠳᠤ ᠡᠯᠰᠡᠭ᠌ᠳᠡᠪᠡ᠃ ᠲᠡᠷᠡ ᠤᠷᠢᠳ ᠬᠣᠵᠢᠳ ᠪᠦᠬᠦ᠌ ᠤᠯᠤᠰᠤᠨ ᠤᠷᠤᠯᠳᠤᠭᠠᠨᠤ ᠠᠯᠲᠠᠨ ᠮᠧᠳᠠᠯᠢ 7᠂ ᠮᠥᠩᠭᠥᠨ ᠮᠧᠳᠠᠯ ᠢ 7᠂ ᠬᠦᠷᠡᠯ ᠮᠧᠳᠠᠯᠢ 5᠂ ᠳᠡᠯᠡᠬᠡᠶᠶ᠋ᠢᠨ ᠤᠷᠤᠯᠳᠤᠭᠠᠨᠤ ᠠᠯᠲᠠᠨ ᠮᠧᠳᠠᠯᠢ 1᠂ ᠮᠥᠩᠭᠥᠨ ᠮᠧᠳᠠᠯᠢ 1 ᠣᠯᠵᠤ᠂ 2020 ᠤᠨᠳᠤ ᠤᠯᠤᠰᠤᠨ ᠠᠪᠤᠷᠭᠤ ᠲᠠᠮᠢᠷᠴᠢᠨᠤ ᠴᠤᠯᠠ ᠵᠢ ᠬᠦᠷᠲᠡᠭᠰᠡᠨ ᠪᠠᠢᠨᠠ᠃
2023 ᠣᠨᠤ 3 ᠰᠠᠷᠠᠳᠤ ᠡᠨᠡᠳᠭᠡᠭᠦᠨ ᠱᠢᠨᠡ ᠳ᠋ᠸᠯᠢᠳ᠋ᠤ ᠶᠠᠪᠤᠭᠳᠠᠭᠰᠠᠨ ᠡᠮᠡᠭ᠌ᠲᠡᠶᠶ᠋ᠢᠨ ᠳᠡᠯᠡᠬᠡᠶᠶ᠋ᠢᠨ ᠪᠤᠺᠰᠤᠨ ᠲᠡᠮᠡᠴᠡᠭᠡᠨᠦ ᠮᠠᠩᠯᠠᠶ ᠱᠢᠯᠭᠠᠷᠠᠭᠤᠯᠬᠤ ᠤᠷᠤᠯᠳᠤᠭᠠᠨᠤ 63 — 66 ᠺᠢᠯᠣᠭ᠌ᠷᠠᠮᠤᠨ ᠳᠡᠰᠲᠸ᠋ ᠮᠠᠩᠯᠠᠢᠯᠠᠪᠠ᠃ ᠮᠦᠨ ᠵᠢᠯᠤᠨ 10 ᠰᠠᠷᠠᠳᠤ᠂ ᠬᠠᠩᠵᠧᠦ ᠵᠢᠨ ᠠᠽᠢᠶᠠ ᠲᠢᠪᠦᠨ ᠲᠠᠮᠢᠷᠤᠨ ᠴᠤᠭ᠍ᠯᠠᠭᠠᠨᠳᠤ ᠪᠤᠺᠰᠤᠨ ᠡᠮᠡᠭ᠌ᠲᠡᠶᠶ᠋ᠢᠨ 66 ᠺᠢᠯᠣᠭ᠌ᠷᠠᠮᠤᠨ ᠲᠡᠰᠤᠨ ᠠᠯᠲᠠᠨ ᠮᠧᠳᠠᠯᠢ ᠤᠯᠵᠤ᠂ ᠫᠠᠷᠢᠰᠤᠨ ᠣᠯᠢᠮᠫᠢᠺᠤᠨ ᠲᠠᠮᠢᠷᠤᠨ ᠴᠤᠭ᠍ᠯᠠᠭᠠᠨᠳᠤ ᠣᠷᠣᠯᠴᠠᠬᠤ ᠡᠷᠬᠡ ᠵᠢ ᠤᠯᠤᠭᠰᠠᠨ ᠪᠦᠭᠡᠳ ᠦᠪᠦᠷ ᠮᠤᠩᠭᠤᠯᠤᠨ ᠪᠤᠺᠰᠤᠨ ᠠᠩᠭᠢ ᠵᠢᠨ ᠠᠽᠢᠶᠠ ᠵᠢᠨ ᠠᠯᠲᠠᠨ ᠮᠧᠲᠠᠯ ᠦᠭᠡᠢ ᠪᠠᠢᠭᠰᠠᠨ ᠲᠡᠦᠬᠡ ᠵᠢ ᠡᠴᠦᠰᠯᠡᠭᠦᠯᠪᠡ᠃
ᠫᠠᠷᠢᠰᠤᠨ ᠤᠯᠢᠮᠫᠢᠺᠤᠨ ᠲᠠᠮᠢᠷᠤᠨ ᠴᠤᠭᠯᠠᠭᠠᠨ ᠪᠣᠯ ᠶᠠᠩ ᠯᠢᠦ ᠵᠢᠨ ᠠᠩᠬᠠ ᠤᠳᠠᠭᠠ ᠤᠷᠤᠯᠴᠠᠵᠤ ᠪᠦᠬᠦᠢ ᠣᠯᠢᠮᠫᠢᠺᠤᠨ ᠲᠠᠮᠢᠷᠤᠨ ᠴᠤᠭ᠍ᠯᠠᠭᠠᠨ ᠪᠣᠯᠤᠨᠠ᠃
ᠨᠢᠦ ᠭᠤᠸᠠᠩ ᠱᠧᠩ
4 × 200 ᠮᠧᠲᠷᠤᠨ ᠴᠢᠯᠦᠭᠡᠲᠦ ᠤᠮᠪᠠᠯᠲᠠ ᠵᠢᠨ
ᠰᠢᠢᠳᠪᠦᠷᠢᠳᠦ ᠤᠷᠤᠯᠳᠤᠭᠠᠨ ᠳ᠋ᠤ ᠲᠠᠪᠰᠢᠪᠡ
ᠪᠡᠭᠡᠵᠢᠩᠤᠨ ᠴᠠᠭ ᠵᠢᠡᠷ 7 ᠰᠠᠷᠠ ᠵᠢᠨ 30ᠤ᠋ ᠤᠷᠤᠢ᠂ ᠫᠠᠷᠢᠰᠤᠨ ᠤᠯᠢᠮᠫᠢᠺᠤᠨ ᠲᠠᠮᠢᠷᠤᠨ ᠴᠤᠭᠯᠠᠭᠠᠨᠤ ᠤᠮᠪᠠᠯᠲᠠ ᠵᠢᠨ ᠲᠦᠷᠦᠯᠤᠨ ᠦᠷᠢᠰᠦᠯᠳᠦᠭᠡᠨᠳᠤ ᠦᠪᠦᠷ ᠮᠤᠩᠭᠤᠯᠤᠨ ᠲᠠᠮᠢᠷᠴᠢᠨ ᠨᠢᠦ ᠭᠤᠸᠠᠩ ᠱᠧᠩ ᠠᠩᠭᠢ ᠵᠢᠨ ᠨᠦᠬᠦᠳ ᠲᠠᠢ ᠪᠠᠨ ᠳᠤᠮᠳᠠᠳᠤ ᠤᠯᠤᠰᠤᠨ ᠠᠩᠭᠢ ᠵᠢ ᠲᠦᠯᠦᠭᠡᠯᠡᠨ ᠡᠷᠡᠭᠲᠡᠢ ᠵᠢᠨ 4×200 ᠮᠧᠲᠷᠤᠨ ᠴᠢᠯᠦᠭᠡᠲᠦ ᠤᠮᠪᠠᠯᠲᠠ ᠵᠢᠨ ᠪᠡᠯᠡᠳᠬᠡᠯ ᠤᠷᠤᠯᠳᠤᠭᠠᠨᠳᠤ ᠤᠷᠤᠯᠴᠠᠭᠰᠠᠨ ᠪᠦᠭᠡᠳ ᠬᠤᠶᠠᠳᠤᠭᠠᠷ ᠪᠤᠤᠭᠢᠶᠠ ᠵᠢ ᠳᠠᠮᠵᠢᠭᠤᠯᠵᠤ ᠰᠢᠢᠳᠪᠦᠷᠢᠲᠦ ᠤᠷᠤᠯᠳᠤᠭᠠᠨᠳᠤ ᠳᠡᠪᠰᠢᠪᠡ᠃ ᠲᠡᠷᠡ ᠪᠡᠷ ᠲᠤᠰ ᠪᠤᠤᠭᠢᠶᠠ ᠤᠷᠤᠯᠳᠤᠭᠠᠨᠤ ᠲᠦᠯᠦᠭᠡ ᠡᠭᠦᠨ ᠡᠴᠡ ᠡᠮᠦᠨᠡ ᠶᠠᠪᠤᠭᠳᠠᠭᠰᠠᠨ ᠡᠷᠡᠭᠲᠡᠢ ᠵᠢᠨ 200 ᠮᠧᠲᠷᠤᠨ ᠡᠷᠪᠡᠬᠡᠢ ᠤᠮᠪᠠᠯᠲᠠ ᠵᠢᠨ ᠪᠡᠯᠡᠳᠬᠡᠯ ᠤᠷᠤᠯᠳᠤᠭᠠᠨᠤ ᠡᠷᠬᠡ ᠪᠠᠨ ᠲᠠᠶᠠᠭᠳᠠᠭᠰᠠᠨ ᠪᠠᠢᠨᠠ᠃
ᠨᠢᠦ ᠭᠤᠸᠠᠩ ᠱᠧᠩ 2004 ᠤᠨᠳᠤ ᠲᠦᠷᠦᠵᠡᠢ᠃ 2018 ᠤᠨᠳᠤ ᠦᠪᠦᠷ ᠮᠤᠩᠭᠤᠯᠤᠨ ᠤᠮᠪᠠᠯᠲᠠ ᠵᠢᠨ ᠠᠩᠭᠢ ᠳ᠋ᠤ ᠰᠤᠩᠭᠤᠭᠳᠠᠵᠤ᠂ 2022 ᠤᠨᠳᠤ ᠠᠩᠬᠠ ᠤᠳᠠᠭᠠ ᠳᠡᠯᠡᠬᠡᠢ ᠵᠢᠨ ᠮᠠᠩᠯᠠᠢ ᠰᠢᠯᠭᠠᠷᠠᠭᠤᠯᠬᠤ ᠤᠷᠤᠯᠳᠤᠭᠠᠨᠳᠤ ᠤᠷᠤᠯᠴᠠᠵᠤ᠂ ᠡᠷᠡᠭᠲᠡᠢ ᠵᠢᠨ 200 ᠮᠧᠲᠷᠤᠨ ᠡᠷᠪᠡᠬᠡᠢ ᠤᠮᠪᠠᠯᠲᠠ ᠵᠢᠨ ᠤᠷᠤᠯᠳᠤᠭᠠᠨᠳᠤ 1 ᠮᠢᠨᠦ᠋ᠲ 55 ᠰᠧᠺᠦ᠋ᠨ᠋ᠳ᠋ 27 ᠵᠢᠨ ᠬᠤᠪᠢ ᠬᠦᠮᠦᠨᠤ ᠬᠠᠮᠤᠭ ᠰᠠᠢᠨ ᠬᠢᠷᠢ ᠪᠦᠲᠦᠮᠵᠢ ᠪᠡᠷ 10 ᠳ᠋ᠤᠭᠠᠷᠲᠤ ᠤᠷᠤᠵᠠᠢ᠃ ᠬᠠᠩᠵᠧᠦ ᠵᠢᠨ ᠠᠽᠢᠶᠠ ᠲᠢᠪᠤᠨ ᠲᠠᠮᠢᠷᠤᠨ ᠴᠤᠭᠯᠠᠭᠠᠨᠳᠤ᠂ ᠨᠢᠦ ᠭᠤᠸᠠᠩ ᠱᠧᠩ ᠳᠤᠮᠳᠠᠳᠤ ᠤᠯᠤᠰᠤᠨ ᠠᠩᠭᠢ ᠵᠢ ᠲᠦᠯᠦᠭᠡᠯᠡᠨ ᠤᠷᠤᠯᠴᠠᠵᠤ᠂ ᠠᠩᠭᠢ ᠵᠢᠨ ᠨᠠᠢᠵᠠ ᠸᠠᠩ ᠱᠦᠨ᠂ ᠸᠠᠩ ᠬᠤᠤ ᠢᠦᠢ᠂ ᠫᠠᠨ ᠵᠠᠨ ᠯᠧ ᠲᠠᠢ ᠬᠠᠮᠲᠤ ᠪᠡᠷ ᠡᠷᠡᠭᠲᠡᠢ ᠵᠢᠨ 4×200 ᠮᠧᠲᠷᠤᠨ ᠴᠢᠯᠦᠭᠡᠲᠦ ᠤᠮᠪᠠᠯᠲᠠ ᠵᠢᠨ ᠪᠤᠤᠭᠢᠶᠠ ᠤᠷᠤᠯᠳᠤᠭᠠᠨᠳᠤ 7 ᠮᠢᠨᠦ᠋ᠲ 03 ᠰᠧᠺᠦ᠋ᠨ᠋ᠳ᠋ 40 ᠵᠢᠨ ᠬᠢᠷᠢ ᠪᠦᠲᠦᠮᠵᠢ ᠪᠡᠷ ᠮᠦᠩᠭᠦᠨ ᠮᠧᠲᠠᠯ ᠤᠯᠵᠠᠢ᠂ ᠡᠨᠡ ᠨᠢ ᠮᠠᠨᠤ ᠤᠷᠤᠨᠤ ᠤᠮᠪᠠᠯᠲᠠ ᠵᠢᠨ ᠲᠦᠷᠦᠯ ᠵᠦᠢᠯᠤᠨ ᠳᠡᠯᠡᠬᠡᠢ ᠵᠢᠨ ᠲᠤᠮᠤ ᠤᠷᠤᠯᠳᠤᠭᠠᠨᠳᠤ ᠤᠯᠤᠭᠰᠠᠨ ᠬᠠᠮᠤᠭᠤᠨ ᠰᠠᠢᠨ ᠬᠢᠷᠢ ᠪᠦᠲᠦᠮᠵᠢ ᠪᠤᠯᠤᠨᠠ᠃
ᠵᠤ᠌ ᠶᠠ ᠮᠢᠩ
ᠡᠷᠡᠭ᠌ᠲᠡᠶᠶ᠋ᠢᠨ ᠭᠤᠷᠪᠠᠨ ᠠᠯᠬᠤᠮᠤᠨ ᠬᠣᠯᠠ
ᠬᠠᠷᠠᠢᠯᠲᠠ ᠳ᠋ᠤ ᠠᠷᠪᠠᠳᠤᠭᠠᠷ ᠲᠸ᠋ ᠤᠷᠤᠪᠠ
ᠪᠡᠭᠡᠵᠢᠩᠦᠨ ᠴᠠᠭᠢᠶᠠᠷ 8 ᠰᠠᠷᠠᠶ᠋ᠢᠨ 8 ᠤ᠋ ᠡᠳᠦᠷᠦᠨ ᠥᠷᠯᠥᠭᠡ᠂ ᠫᠠᠷᠢᠰᠤᠨ ᠣᠯᠢᠮᠫᠢᠺᠤᠨ ᠲᠠᠮᠢᠷᠤᠨ ᠴᠤᠭ᠍ᠯᠠᠭᠠᠨᠤ ᠡᠷᠡᠭ᠌ᠲᠡᠶᠶ᠋ᠢᠨ ᠭᠤᠷᠪᠠᠨ ᠠᠯᠬᠤᠮᠤᠨ ᠬᠣᠯᠠ ᠬᠠᠷᠠᠢᠯᠲᠠᠶ᠋ᠢᠨ ᠬᠢᠷᠢ ᠬᠡᠮᠦᠨ ᠤᠷᠤᠯᠳᠤᠭᠠᠨᠳᠤ ᠥᠪᠥᠷ ᠮᠣᠩᠭᠣᠯ ᠨᠤᠲᠤᠭᠲᠠᠢ ᠵᠠᠯᠠᠭᠤ ᠲᠠᠮᠢᠷᠴᠢᠨ ᠵᠦ᠍ ᠶᠠ ᠮᠢᠩ 16 ᠮᠧᠲᠷ 91 ᠵᠢᠨ ᠬᠢᠷᠢ ᠪᠦᠲᠦᠮᠵᠢᠪᠡᠷ 8 ᠳ᠋ᠤᠭᠠᠷᠲᠤ ᠤᠷᠤᠵᠤ᠂ 8 ᠰᠠᠷᠠ ᠵᠢᠨ 10 ᠤ᠋ ᠡᠳᠦᠷᠤᠨ ᠰᠢᠢᠳᠪᠦᠷᠢᠳᠦ ᠤᠷᠤᠯᠳᠤᠭᠠᠨ ᠳ᠋ᠤ ᠠᠷᠪᠠᠳᠤᠭᠠᠷ ᠲᠸ᠋ ᠤᠷᠤᠵᠠᠢ᠃
ᠵᠦ᠍ ᠶᠠ ᠮᠢᠩ 1994 ᠣᠨᠳᠤ ᠬᠦᠯᠦᠨ ᠪᠤᠢᠷ ᠬᠤᠲᠠ ᠵᠢᠨ ᠣᠷᠴᠣᠨᠤ ᠥᠪᠡᠷᠲᠡᠭᠡᠨ ᠵᠠᠰᠠᠬᠤ ᠬᠣᠱᠢᠭᠤᠨᠤ ᠳ᠋ᠠ ᠶᠠᠩ ᠱᠦ᠍ ᠪᠠᠯᠭᠠᠰᠤᠨᠳᠤ ᠳᠦᠷᠦᠵᠡᠢ᠃ 2013 ᠣᠨᠳᠤ ᠮᠦᠭ᠌ᠳᠡᠨᠦ ᠪᠡᠶᠡᠶ᠋ᠢᠨ ᠲᠠᠮᠢᠷᠤᠨ ᠳᠡᠭᠡᠳᠦ ᠰᠤᠷᠭᠠᠭᠤᠯᠢᠳᠤ ᠱᠢᠯᠭᠠᠨ ᠣᠷᠣᠵᠤ᠂ 2015 ᠣᠨᠤ 11 ᠰᠠᠷᠠᠳᠤ ᠯᠢᠶᠣᠤᠨᠢᠩᠤᠨ ᠬᠦᠨᠳᠦ ᠬᠥᠩᠭᠡᠨ ᠪᠡᠶᠡ ᠵᠢᠨ ᠲᠠᠮᠢᠷᠤᠨ ᠠᠩᠭᠢᠳᠤ ᠣᠷᠣᠵᠠᠢ᠃ 2016 ᠣᠨᠳᠤ ᠪᠦᠬᠦ᠌ ᠤᠯᠤᠰᠤᠨ ᠬᠦᠨᠳᠦ ᠬᠥᠩᠭᠡᠨ ᠪᠡᠶᠡ ᠵᠢᠨ ᠲᠠᠮᠢᠷᠤᠨ ᠮᠠᠩᠯᠠᠶ ᠱᠢᠯᠭᠠᠷᠠᠭᠤᠯᠬᠤ ᠤᠷᠤᠯᠳᠤᠭᠠᠨᠤ ᠡᠷᠡᠭ᠌ᠲᠡᠶᠶ᠋ᠢᠨ ᠭᠤᠷᠪᠠᠨ ᠠᠯᠬᠤᠮᠤᠨ ᠬᠣᠯᠠ ᠬᠠᠷᠠᠢᠯᠲᠠᠶ᠋ᠢᠨ ᠮᠠᠩᠯᠠᠶ᠂ 2019 ᠣᠨᠳᠤ ᠳᠣᠯᠣᠳᠤᠭᠠᠷ ᠬᠤᠭᠤᠴᠠᠭᠠᠨᠤ ᠳᠡᠯᠡᠬᠡᠶᠶ᠋ᠢᠨ ᠴᠡᠷᠢᠭ ᠬᠦᠮᠦᠨᠤ ᠲᠠᠮᠢᠷᠤᠨ ᠴᠤᠭ᠍ᠯᠠᠭᠠᠨᠤ ᠡᠷᠡᠭ᠌ᠲᠡᠶᠶ᠋ᠢᠨ ᠭᠤᠷᠪᠠᠨ ᠠᠯᠬᠤᠮᠤᠨ ᠬᠣᠯᠠ ᠬᠠᠷᠠᠢᠯᠲᠠᠶ᠋ᠢᠨ ᠮᠠᠩᠯᠠᠶ ᠪᠤᠯᠵᠠᠢ᠃ 2021 ᠣᠨᠳᠤ ᠲᠣᠣᠺᠢᠣ᠋ᠶ᠋ᠢᠨ ᠣᠯᠢᠮᠫᠢᠺᠤᠨ ᠲᠠᠮᠢᠷᠤᠨ ᠴᠤᠭ᠍ᠯᠠᠭᠠᠨᠤ ᠡᠷᠡᠭ᠌ᠲᠡᠶᠶ᠋ᠢᠨ ᠭᠤᠷᠪᠠᠨ ᠠᠯᠬᠤᠮᠤᠨ ᠬᠣᠯᠠ ᠬᠠᠷᠠᠢᠯᠲᠠᠶ᠋ᠢᠨ ᠮᠥᠩᠭᠥᠨ ᠮᠧᠳᠠᠯᠢ ᠣᠯᠵᠤ᠂ ᠳᠤᠮᠳᠠᠳᠤ ᠤᠯᠤᠰᠤᠨ ᠠᠩᠭᠢ ᠵᠢᠨ ᠲᠤᠰ ᠲᠦᠷᠦᠯ ᠵᠦᠢᠯᠤᠨ ᠤᠯᠢᠮᠫᠢᠺᠤᠨ ᠲᠠᠮᠢᠷᠤᠨ ᠴᠤᠭᠯᠠᠭᠠᠨᠤ ᠬᠠᠮᠤᠭᠤᠨ ᠰᠠᠢᠨ ᠬᠢᠷᠢ ᠪᠦᠲᠦᠮᠵᠢ ᠵᠢ ᠰᠢᠨᠡᠳᠬᠡᠪᠡ᠃
2023 ᠣᠨᠤ 10 ᠰᠠᠷᠠᠳᠤ᠂ 17 ᠮᠧᠲ᠋ᠷ 13 ᠵᠢᠨ ᠬᠢᠷᠢ ᠪᠦᠲᠦᠮᠵᠢ ᠪᠡᠷ ᠬᠠᠩᠵᠧᠦ ᠵᠢᠨ ᠠᠽᠢᠶᠡ ᠲᠢᠪᠤᠨ ᠤᠯᠢᠮᠫᠢᠺᠤᠨ ᠲᠠᠮᠢᠷᠤᠨ ᠴᠤᠭᠯᠠᠭᠠᠨᠤ ᠬᠦᠨᠳᠦ ᠬᠦᠩᠭᠡᠨ ᠪᠡᠶᠡ ᠵᠢᠨ ᠲᠠᠮᠢᠷᠤᠨ ᠡᠷᠡᠭᠲᠡᠢ ᠵᠢᠨ ᠭᠤᠷᠪᠠᠨ ᠠᠯᠬᠤᠮᠤᠨ ᠬᠤᠯᠠ ᠬᠠᠷᠠᠢᠯᠲᠠ ᠵᠢᠨ ᠠᠯᠲᠠᠨ ᠮᠧᠲᠠᠯᠢ ᠰᠢᠬᠦᠷᠴᠦ᠂ 2024 ᠣᠨᠳᠤ᠂ ᠪᠥᠬᠥ᠌ ᠤᠯᠤᠰᠤᠨ ᠬᠦᠨᠳᠦ ᠬᠥᠩᠭᠡᠨ ᠪᠡᠶᠡ ᠵᠢᠨ ᠲᠠᠮᠢᠷᠤᠨ ᠮᠠᠩᠯᠠᠶ ᠱᠢᠯᠭᠠᠷᠠᠭᠤᠯᠬᠤ ᠤᠷᠤᠯᠳᠤᠭᠠᠨ ᠵᠢᠴᠢ ᠪᠥᠬᠥ᠌ ᠤᠯᠤᠰᠤᠨ ᠬᠦᠨᠳᠦ ᠬᠥᠩᠭᠡᠨ ᠪᠡᠶᠡ ᠵᠢᠨ ᠲᠠᠮᠢᠷᠤᠨ ᠲᠣᠮᠣ ᠱᠠᠩᠨᠠᠯᠲᠤ ᠤᠷᠤᠯᠳᠤᠭᠠᠨᠤ ᠶᠡᠷᠦᠩᠬᠡᠶ ᠱᠢᠶ᠋ᠳᠪᠦᠷᠢᠲᠦ ᠤᠷᠤᠯᠳᠤᠭᠠᠨᠤ ᠡᠷᠡᠭ᠌ᠲᠡᠶᠶ᠋ᠢᠨ ᠭᠤᠷᠪᠠᠨ ᠠᠯᠬᠤᠮᠤᠨ ᠬᠣᠯᠠ ᠬᠠᠷᠠᠢᠯᠲᠠᠶ᠋ᠢᠨ ᠱᠢᠶ᠋ᠳᠪᠦᠷᠢᠲᠦ ᠤᠷᠤᠯᠳᠤᠭᠠᠨᠳᠤ 16 ᠮᠧᠲᠷ 70 ᠵᠢᠨ ᠬᠢᠷᠢ ᠪᠦᠲᠦᠮᠵᠢᠪᠡᠷ ᠮᠠᠩᠯᠠᠢᠯᠠᠵᠤ᠂ 7 ᠰᠠᠷᠠᠶ᠋ᠢᠨ 4 ᠤ᠋ ᠡᠳᠦᠷ ᠳᠤᠮᠳᠠᠳᠤ ᠤᠯᠤᠰᠤᠨ ᠤᠯᠤᠰᠤᠨ ᠬᠦᠨᠳᠦ ᠬᠥᠩᠭᠡᠨ ᠪᠡᠶᠡ ᠵᠢᠨ ᠲᠠᠮᠢᠷᠤᠨ ᠠᠩᠭᠢᠶ᠋ᠢᠨ 2024 ᠣᠨᠤ ᠫᠠᠷᠢᠰᠤᠨ ᠣᠯᠢᠮᠫᠢᠺᠤᠨ ᠲᠠᠮᠢᠷᠤᠨ ᠴᠤᠭ᠍ᠯᠠᠭᠠᠨᠳᠤ ᠣᠷᠣᠯᠴᠠᠬᠤ ᠲᠠᠮᠢᠷᠴᠢᠨᠤ ᠨᠡᠷᠡᠰᠲᠦ ᠰᠣᠩᠭᠣᠭ᠍ᠳᠠᠭᠰᠠᠨ ᠪᠠᠢᠨᠠ᠃
（ᠮᠠᠲᠧᠷᠢᠶᠠᠯ ᠪᠠ
ᠭᠡᠷᠡᠯ
ᠵᠢᠷᠤᠭᠤᠳᠢ ᠬᠠᠮᠢᠶᠠ ᠪᠦᠬᠦᠢ
ᠰᠦᠯᠵᠢᠶᠡ ᠡᠴᠡ
ᠠᠰᠢᠭᠯᠠᠪᠠ）