— ᠬᠤᠷᠴᠢᠨ ᠵᠡᠬᠦᠨ ᠭᠠᠷᠤᠨ ᠳᠤᠮᠳᠠᠳᠤ ᠬᠤᠰᠢᠭᠤᠨ ᠎ᠤ ᠪᠤᠤᠺᠠᠡᠭ ᠪᠠᠯᠭᠠᠰᠤ ᠵᠢᠨ ᠳᠠᠷᠬᠠᠨ ᠨᠡᠢᠬᠡᠮ ᠲᠤᠭᠤᠷᠢᠭ᠎ᠤᠨ ᠪᠠᠢ ᠭᠤᠸᠠᠡᠭ ᠶᠤᠸᠠᠨ ᠎ᠤ ᠬᠢᠨ᠎ᠢ ᠲᠡᠮᠲᠡᠭᠯᠡᠪᠡ

— ᠮᠠᠨ᠎ᠤ ᠨᠡᠢᠬᠡᠮ ᠲᠤᠭᠤᠷᠢᠭ᠎ᠤᠨ ᠪᠠᠢ ᠭᠤᠸᠠᠡᠭ ᠶᠤᠸᠠᠨ ᠎ᠤ ᠬᠢᠨ ᠪᠤᠯ ᠭᠤᠷᠪᠠᠨ ᠦᠨᠳᠦᠰᠦᠲᠡᠨ ᠵᠢᠡᠷ ᠪᠦᠷᠢᠯᠳᠦᠭᠰᠡᠨ ᠳᠦᠷᠪᠡᠨ ᠦᠶ᠎ᠡ ᠪᠡᠷ ᠵᠢᠨᠨ ᠬᠠᠮᠲᠤ ᠠᠮᠢᠳᠤᠷᠠᠵᠦ ᠪᠠᠢᠭ᠎ᠠ ᠲᠤᠮᠤ ᠭᠡᠷ ᠪᠦᠯᠢ ᠶᠤᠮ᠃ ᠪᠠᠢ ᠭᠤᠸᠠᠡᠭ ᠶᠤᠸᠠᠨ᠎ᠤ ᠠᠪᠤ ᠡᠵᠢ ᠨᠢ ᠪᠦᠷ ᠶᠡᠷᠡ ᠭᠠᠷᠴᠦ ᠪᠠᠢᠭ᠎ᠠ ᠪᠦᠬᠡᠳ ᠠᠪᠤ ᠨᠢ ᠨᠢᠬᠡᠨᠲᠡ ᠬᠡᠪᠲᠡᠷᠢ ᠎ᠳᠤ ᠤᠷᠤᠭᠠᠳ ᠬᠦᠳᠡᠯᠵᠦ ᠳᠡᠢᠯᠬᠦ ᠦᠬᠡᠢ ᠪᠤᠯᠴᠢᠬᠠᠵᠠᠢ᠃ ᠡᠨᠡ ᠪᠠᠢᠳᠠᠯ᠎ᠳᠤ ᠪᠠᠢ ᠭᠤᠸᠠᠡᠭ ᠶᠤᠸᠠᠨ ᠎ᠤ ᠠᠬ᠎ᠠ ᠡᠬᠡᠴᠢ ᠳᠡᠬᠦᠦ ᠬᠡᠳᠦᠬᠦᠯᠡ ᠪᠠᠨ ᠬᠠᠷᠢᠯᠴᠠᠨ ᠡᠬᠡᠯᠵᠢ ᠬᠠᠯᠠᠭ᠎ᠠ ᠪᠡᠷ ᠵᠢᠵᠢᠬᠦᠷᠯᠡᠨ ᠨᠠᠰᠤᠲᠠᠢ ᠠᠪᠤ ᠪᠠᠨ ᠲᠤᠡᠭ ᠰᠠᠢᠬᠠᠨ ᠠᠰᠠᠷᠠᠨ ᠰᠤᠪᠢᠯᠠᠵᠦ ᠪᠠᠢᠨ᠎ᠠ ᠰᠢᠦ ᠭᠡᠬᠦ ᠪᠤᠤᠺᠠᠡᠭ ᠪᠠᠯᠭᠠᠰᠤ ᠵᠢᠨ ᠳᠠᠷᠬᠠᠨ ᠨᠡᠢᠬᠡᠮ ᠲᠤᠭᠤᠷᠢᠭ ᠎ᠤᠨ ᠠᠵᠢᠯᠲᠠᠨ ᠎ᠤ ᠲᠠᠨᠢᠯᠴᠠᠭᠤᠯᠭ᠎ᠠ ᠪᠡᠷ ᠪᠢᠳᠡ ᠪᠠᠢ ᠭᠤᠸᠠᠡᠭ ᠶᠤᠸᠠᠨ ᠎ᠤ ᠭᠡᠷ ᠲᠤ᠌ ᠨᠢ ᠬᠦᠷᠦᠭᠰᠡᠨ ᠶᠤᠮ᠃

ᠤᠷᠢᠳᠠᠪᠠᠷ ᠮᠡᠳᠡᠭᠳᠡᠭᠰᠡᠨ ᠴᠤ᠌ ᠦᠬᠡᠢ ᠪᠡᠷ ᠭᠡᠨᠡᠳᠳᠡ ᠪᠡᠷ ᠡᠬᠦᠳᠡ ᠵᠢ ᠨᠢ ᠲᠤᠭᠰᠢᠭᠠᠳ ᠠᠯᠬᠤᠭᠠᠳ ᠤᠷᠤᠬᠤ᠎ᠳᠤ ᠯᠠ ᠬᠢᠯᠠ ᠴᠢᠯᠠ᠂ ᠴᠡᠪᠡᠷ ᠲᠡᠭᠰᠢᠭᠡᠨ ᠰᠠᠭᠤᠵᠦ ᠪᠠᠢᠭᠰᠠᠨ ᠡᠴᠡ ᠨᠢ ᠡᠨᠡ ᠭᠡᠷ᠎ᠤᠨ ᠬᠦᠮᠦᠰ ᠎ᠤᠨ ᠠᠵᠢᠯᠴᠢ ᠬᠦᠳᠡᠯᠮᠦᠷᠢᠴᠢ᠂ ᠠᠷᠢᠭᠤᠨ ᠴᠡᠪᠡᠷᠴᠢ ᠭᠡᠳᠡᠭ ᠨᠢ ᠮᠡᠳᠡᠭᠳᠡᠨ᠎ᠡ᠃ ᠦᠲᠡᠯᠦᠬᠡ ᠨᠠᠰᠤᠲᠠᠨ ᠨᠢ ᠤᠳᠠᠭᠠᠨ ᠡᠳᠦᠷ ᠵᠢᠡᠷ ᠬᠡᠪᠲᠡᠵᠦ ᠦᠳᠭᠡᠨ ᠰᠢᠨᠭᠭᠡᠨ᠎ᠳᠤ ᠪᠠᠨ ᠵᠦᠪ ᠦᠬᠡᠢ ᠪᠤᠯᠴᠢᠬᠠᠭᠰᠠᠨ ᠠᠳᠠᠯ᠎ᠠ ᠦᠴᠦᠬᠡᠨ ᠴᠤ᠌ ᠦᠨᠦᠷ ᠲᠡᠨᠦᠷ ᠦᠬᠡᠢ ᠡᠢᠮᠦ ᠰᠠᠢᠬᠠᠨ ᠴᠡᠪᠡᠷ ᠴᠡᠮᠴᠡᠭᠡᠷ ᠠᠰᠠᠷᠠᠵᠦ ᠰᠤᠪᠢᠯᠠᠨ᠎ᠠ ᠭᠡᠳᠡᠭ ᠦᠷ᠎ᠡ ᠬᠡᠦᠬᠡᠳ ᠪᠤᠯᠤᠭᠰᠠᠳ᠎ᠤᠨ ᠨᠠᠷᠢᠨ ᠨᠢᠮᠪᠠᠢ ᠠᠰᠠᠷᠠᠨ ᠰᠤᠪᠢᠯᠠᠯᠳᠠ ᠡᠴᠡ ᠰᠠᠯᠵᠦ ᠴᠢᠳᠠᠬᠤ ᠦᠬᠡᠢ ᠨᠢ ᠮᠡᠳᠡᠭᠡᠵᠢ᠃ ᠲᠡᠷᠡ ᠭᠠᠷᠠᠭ ᠨᠢ ᠶᠠᠭ ᠪᠠᠢ ᠭᠤᠸᠠᠡᠭ ᠶᠤᠸᠠᠨ᠎ᠤ ᠠᠬ᠎ᠠ ᠪᠠᠢ ᠭᠤᠸᠠᠡᠭ ᠶᠧ ᠵᠢᠨ ᠠᠪᠤ ᠪᠠᠨ ᠠᠰᠠᠷᠠᠬᠤ ᠵᠢᠵᠢᠬᠦᠷ ᠲᠠᠭᠠᠷᠠᠵᠦ ᠳᠡᠬᠦᠦ ᠵᠢᠨ ᠎ᠳᠡᠭᠡᠨ ᠢᠷᠡᠵᠦ ᠠᠪᠤ ᠪᠠᠨ ᠰᠤᠪᠢᠯᠠᠵᠦ ᠪᠠᠢᠪᠠ᠃

ᠤᠢᠯᠠᠭᠠᠭᠰᠠᠨ ᠵᠢᠡᠷ᠂ ᠪᠠᠢ ᠭᠤᠸᠠᠡᠭ ᠶᠤᠸᠠᠨ᠎ᠤ ᠠᠪᠤ ᠵᠢ ᠪᠠᠢ ᠬᠤᠡᠭ ᡁᠢ ᠭᠡᠳᠡᠭ᠂ ᠮᠠᠨᠵᠦ ᠦᠨᠳᠦᠰᠦᠲᠡᠨ᠂ ᠡᠨᠡ ᠵᠢᠯ ᠶᠡᠷᠡᠨ ᠳᠦᠷᠪᠡᠲᠡᠢ᠃ ᠡᠵᠢ ᠨᠢ ᠬᠤ᠌ ᠬᠦᠢ ᠯᠠᠨ ᠭᠡᠳᠡᠭ᠂ ᠬᠢᠲᠠᠳ ᠦᠨᠳᠦᠰᠦᠲᠡᠨ᠂ ᠡᠨᠡ ᠵᠢᠯ ᠶᠡᠷᠡᠨ ᠨᠢᠬᠡ ᠬᠦᠷᠴᠦ ᠪᠤᠢ᠃ ᠲᠡᠳᠡᠨ ᠎ᠤ ᠳᠡᠭᠡᠳᠦ ᠵᠢᠨ ᠨᠤᠲᠤᠭ ᠨᠢ ᠯᠢᠶᠤᠤᠨᠢᠡᠭ ᠮᠤᠵᠢ ᠪᠦᠬᠡᠳ ᠰᠡᠬᠦᠯᠡᠷ ᠨᠢ ᠡᠪᠦᠬᠡ ᠵᠢᠨ ᠬᠢᠨᠢ ᠦᠶ᠎ᠡ᠎ᠳᠤ ᠲᠠᠢ ᠫᠢᠡᠭ ᠴᠤᠸᠠᠨ᠎ᠳᠤ ᠨᠡᠬᠦᠵᠦ ᠰᠠᠭᠤᠷᠢᠰᠢᠨ᠂ ᠶᠡᠬᠡ ᠬᠦᠦ ᠪᠠᠢ ᠭᠤᠸᠠᠡᠭ ᠶᠧ ᠪᠠᠨ ᠨᠢᠷᠠᠢ ᠪᠠᠢᠬᠤ᠎ᠳᠤ ᠨᠢ ᠪᠤᠤᠺᠠᠡᠭ ᠪᠠᠯᠭᠠᠰᠤᠨ᠎ᠳᠤ ᠨᠡᠬᠦᠨ ᠢᠷᠡᠵᠦ ᠠᠮᠢᠳᠤᠷᠠᠭᠰᠠᠨ ᠭᠡᠳᠡᠭ᠃ ᠲᠡᠢᠮᠦ ᠪᠡᠷ ᠵᠢᠨᠨ ᠠᠬ᠎ᠠ ᠨᠢ ᠪᠤᠯᠬᠤ ᠪᠠᠢ ᠭᠤᠸᠠᠡᠭ ᠶᠧ ᠵᠢᠨ ᠲᠦᠷᠦᠭᠰᠡᠨ ᠨᠤᠲᠤᠭ ᠨᠢ ᠲᠠᠢ ᠫᠢᠡᠭ ᠴᠤᠸᠠᠨ ᠪᠠᠢᠬᠤ᠎ᠳᠤ᠂ ᠳᠡᠬᠦᠦ ᠨᠢ ᠪᠤᠯᠤᠭᠰᠠᠨ ᠪᠠᠢ ᠭᠤᠸᠠᠡᠭ ᠶᠤᠸᠠᠨ᠎ᠤ ᠲᠦᠷᠦᠭᠰᠡᠨ ᠨᠤᠲᠤᠭ ᠨᠢ ᠪᠤᠤᠺᠠᠡᠭ ᠪᠠᠯᠭᠠᠰᠤ ᠪᠤᠯᠬᠤ ᠠᠵᠢ᠃ ᠲᠡᠳᠡ ᠠᠬ᠎ᠠ ᠡᠭᠡᠴᠢ ᠳᠡᠬᠦᠦ ᠲᠠᠪᠤᠭᠤᠯᠠ᠂ ᠪᠠᠢ ᠭᠤᠸᠠᠡᠭ ᠶᠧ ᠬᠠᠮᠤᠭ ᠶᠡᠬᠡ ᠨᠢ᠂ ᠪᠠᠢ ᠭᠤᠸᠠᠡᠭ ᠶᠤᠸᠠᠨ ᠬᠤᠶᠠᠳᠤᠭᠠᠷ ᠨᠢ᠂ ᠲᠡᠳᠡ ᠬᠤᠶᠠᠭᠤᠯᠠ᠎ᠳᠤ ᠭᠤᠷᠪᠠᠨ ᠬᠡᠦᠬᠡᠨ ᠳᠡᠬᠦᠦ ᠲᠠᠢ ᠶᠤᠮ ᠭᠡᠨ᠎ᠡ᠃ ᠠᠬ᠎ᠠ ᠡᠭᠡᠴᠢ ᠳᠡᠬᠦᠦ ᠲᠠᠪᠤᠭᠤᠯᠠ ᠪᠠᠨ ᠮᠠᠨᠵᠦ ᠪᠤᠯᠤᠨ ᠬᠢᠲᠠᠳ ᠬᠤᠶᠠᠷ ᠦᠨᠳᠦᠰᠦᠲᠡᠨ᠎ᠤ ᠠᠪᠤ ᠡᠵᠢ ᠡᠴᠡ ᠲᠦᠷᠦᠭᠰᠡᠨ ᠪᠤᠯᠪᠠᠴᠦ ᠡᠷᠦᠬᠡ ᠠᠮᠠ ᠵᠢᠨ ᠳᠠᠨᠭᠰᠠᠨ ᠳᠡᠭᠡᠷ᠎ᠡ ᠪᠠᠨ ᠪᠦᠷ ᠮᠠᠨᠵᠦ ᠦᠨᠳᠦᠰᠦᠲᠡᠨ ᠵᠢᠡᠷ ᠶᠠᠪᠤᠵᠦ ᠪᠠᠢᠭ᠎ᠠ ᠠᠵᠢ᠃

— ᠮᠢᠨᠦ ᠳᠡᠬᠦᠦ ᠪᠤᠯᠤᠨ ᠳᠡᠬᠦᠦ ᠪᠡᠷᠢ ᠪᠦᠷ ᠵᠢᠷᠠ ᠭᠠᠷᠴᠦ ᠳᠠᠯᠠ ᠤᠢᠷᠠᠳᠤᠵᠦ ᠪᠠᠢᠨ᠎ᠠ᠃ ᠳᠡᠬᠦᠦ ᠮᠠᠨᠢ ᠤᠮᠪᠤᠯᠤ ᠪᠠᠨ ᠰᠤᠷᠭᠠᠭᠤᠯᠢ᠎ᠳᠤ ᠬᠦᠷᠭᠡᠵᠦ ᠲᠤᠰᠤᠭᠠᠳ ᠡᠳᠦᠷ᠎ᠤᠨ ᠬᠡᠳᠦ ᠤᠳᠠᠭ᠎ᠠ ᠨᠠᠭᠠᠰᠢ ᠴᠠᠭᠠᠰᠢ ᠬᠦᠶᠦᠬᠡᠳ ᠶᠠᠭᠠᠷᠠᠦ᠂ ᠦᠳᠡ᠎ᠳᠤ ᠰᠠᠶᠢ ᠤᠮᠪᠤᠯᠤ ᠪᠠᠨ ᠲᠤᠰᠤᠭᠠᠳ ᠬᠠᠷᠢᠵᠦ ᠢᠷᠡᠨ᠎ᠡ᠃ ᠮᠢᠨᠦ ᠳᠡᠬᠦᠦ ᠪᠡᠷᠢ ᠪᠠᠰᠠ ᠬᠤᠪᠴᠠᠰᠤ ᠬᠤᠨᠠᠷ ᠤᠬᠢᠶᠠᠵᠦ ᠴᠡᠪᠡᠷᠯᠡᠬᠦ᠂ ᠭᠤᠷᠪᠠᠨ ᠡᠷᠡᠨ᠎ᠤ ᠬᠤᠭᠤᠯᠠ ᠪᠡᠯᠡᠳᠭᠡᠭᠡᠳ ᠡᠳᠦᠷᠵᠢᠨ ᠶᠠᠭᠠᠷᠡᠦ᠂ ᠰᠠᠶᠢᠬᠠᠨ ᠨᠤᠭᠤᠭ᠎ᠠ ᠠᠪᠬᠤ ᠪᠡᠷ ᠵᠡᠬᠡᠯᠢ ᠎ᠳᠤ ᠭᠠᠷᠴᠠᠢ᠃ ᠪᠢ ᠴᠤ᠌ ᠪᠤᠯ ᠡᠨᠳᠡ ᠢᠷᠡᠪᠡᠯ ᠠᠪᠤ ᠪᠠᠨ ᠰᠤᠪᠢᠯᠠᠬᠤ ᠡᠴᠡ ᠤᠨᠳᠤᠤ ᠶᠠᠭᠤ ᠴᠤ᠌ ᠬᠢᠵᠦ ᠪᠠᠢᠬᠤ ᠦᠬᠡᠢ᠃ ᠬᠡᠦᠬᠡᠳ ᠪᠦᠷ ᠬᠤᠪᠢ ᠬᠤᠪᠢᠨ ᠎ᠤ ᠠᠵᠢᠯ ᠎ᠳᠠᠭᠠᠨ ᠶᠠᠭᠠᠷᠡᠦ᠃ ᠠᠪᠤ ᠮᠢᠨᠢ ᠬᠡᠪᠲᠡᠷᠢ ᠎ᠳᠤ ᠤᠷᠤᠭᠠᠳ ᠨᠢᠬᠡᠨᠳᠡ ᠵᠢᠯ ᠭᠠᠷᠤᠢ ᠪᠤᠯᠴᠢᠬᠠᠵᠠᠢ᠂ ᠴᠡᠷ ᠵᠢᠨᠨ ᠭᠠᠷᠭᠠᠵᠦ ᠳᠡᠢᠯᠬᠦ ᠦᠬᠡᠢ ᠪᠦᠬᠡᠳ ᠬᠠᠭᠠᠰ ᠴᠠᠭ ᠪᠤᠯᠬᠤ ᠦᠬᠡᠢ ᠵᠤᠷᠯᠤᠡᠭ ᠎ᠳᠤ ᠤᠷᠤᠨ᠎ᠠ᠃ ᠡᠢᠮᠦ ᠡᠴᠡ ᠡᠳᠦᠷ ᠰᠦᠨᠢ ᠵᠢᠨ ᠬᠤᠪᠢᠨ ᠎ᠳᠤ ᠬᠤᠷᠢᠨ ᠲᠦᠷᠪᠡᠨ ᠴᠠᠭ ᠵᠢᠡᠷ ᠬᠠᠵᠠᠭᠤ ᠡᠴᠡ ᠨᠢ ᠬᠦᠮᠦᠨ ᠰᠠᠯᠵᠦ ᠳᠡᠢᠯᠬᠦ ᠦᠬᠡᠢ ᠪᠤᠯᠴᠢᠬᠠᠭᠰᠠᠨ ᠵᠢᠡᠷ ᠮᠠᠨ᠎ᠤ ᠠᠬ᠎ᠠ ᠡᠭᠡᠴᠢ ᠳᠡᠬᠦᠦ ᠲᠠᠪᠤᠭᠤᠯᠠ ᠪᠠᠨ ᠡᠭᠡᠯᠵᠢᠯᠡᠨ ᠰᠤᠪᠢᠯᠠᠵᠦ ᠪᠠᠢᠨ᠎ᠠ᠃ ᠮᠢᠨᠦ ᠳᠡᠬᠦᠦ ᠪᠠᠢ ᠭᠤᠸᠠᠡᠭ ᠶᠤᠸᠠᠨ᠎ᠤ ᠡᠳᠦᠷ᠎ᠤᠨ ᠠᠵᠢᠯ ᠶᠠᠭᠠᠷᠠᠦ ᠪᠤᠯᠬᠤᠷ ᠲᠡᠬᠦᠨ᠎ᠳᠤ ᠡᠳᠦᠷ ᠪᠤᠯᠭᠠᠨ᠎ᠤ ᠤᠷᠤᠢ ᠵᠢᠨ ᠬᠤᠭᠤᠯᠠᠨ᠎ᠤ ᠳᠠᠷᠠᠭ᠎ᠠ ᠰᠦᠨᠢ ᠵᠢᠨ 12 ᠴᠠᠭ ᠪᠤᠯᠳᠠᠯ᠎ᠠ ᠠᠪᠤ ᠵᠢ ᠰᠤᠪᠢᠯᠠᠬᠤ ᠡᠬᠡᠯᠵᠢ ᠲᠤᠬᠢᠷᠠᠭᠤᠯᠵᠠᠢ᠃ ᠪᠤᠰᠤᠳ ᠴᠠᠭ ᠨᠢ ᠪᠦᠷ ᠪᠢᠳᠡᠨ᠎ᠤ ᠡᠭᠡᠯᠵᠢ ᠵᠢᠨ ᠬᠦᠮᠦᠰ᠎ᠤᠨ ᠬᠢ᠂ ᠪᠢᠳᠡ ᠤᠤᠯ ᠎ᠳᠠᠭᠠᠨ ᠬᠡᠳᠦᠬᠦᠯᠡ ᠪᠠᠨ ᠬᠦᠮᠦᠨ ᠪᠦᠷᠢ ᠠᠷᠪᠠᠨ ᠡᠳᠦᠷ ᠵᠢᠡᠷ ᠡᠭᠡᠯᠵᠢᠯᠡᠵᠦ ᠪᠠᠢᠵᠠᠢ᠃ ᠡᠨᠡ ᠵᠢᠯ᠎ᠤᠨ ᠡᠬᠢᠨ ᠡᠴᠡ ᠨᠠᠭᠠᠰᠢ ᠭᠤᠷᠪᠠᠨ ᠬᠡᠦᠬᠡᠨ ᠳᠡᠬᠦᠦ ᠬᠤᠭᠤᠷᠤᠨᠳᠦ ᠪᠠᠨ ᠵᠦᠪᠳᠡᠭᠡᠳ ᠨᠠᠳᠠ ᠵᠢ ᠪᠠᠰᠠ ᠳᠠᠯᠠ ᠭᠠᠷᠴᠦ ᠨᠠᠰᠤ ᠠᠬᠢᠵᠦ ᠪᠠᠢᠨ᠎ᠠ ᠬᠡᠮᠡᠨ ᠲᠡᠳᠡ ᠬᠦᠮᠦᠨ ᠪᠤᠯᠭᠠᠨ 11 ᠡᠳᠦᠷ ᠠᠪᠤ ᠵᠢ ᠰᠤᠪᠢᠯᠠᠬᠤ ᠪᠡᠷ ᠪᠤᠯᠵᠦ᠂ ᠨᠠᠳᠠ ᠰᠠᠶᠢ ᠨᠢᠬᠡ ᠯᠠ ᠭᠠᠷᠠᠭ ᠎ᠤᠨ ᠵᠢᠵᠢᠬᠦᠷ ᠲᠤᠬᠢᠷᠠᠭᠤᠯᠤᠭᠠᠳ ᠪᠠᠢᠭ᠎ᠠ ᠨᠢ ᠡᠨᠡ᠃ ᠲᠡᠢᠮᠦ ᠪᠡᠷ ᠵᠢᠨᠨ ᠪᠢ ᠶᠠᠭ ᠪᠦᠲᠦᠨ ᠨᠢᠬᠡ ᠰᠠᠷ᠎ᠠ ᠠᠮᠠᠷᠠᠭᠠᠳ ᠰᠠᠶᠢ ᠨᠢᠬᠡ ᠭᠠᠷᠠᠭ ᠎ᠤᠨ ᠠᠪᠤ ᠵᠢ ᠰᠤᠪᠢᠯᠠᠬᠤ ᠵᠢᠵᠢᠬᠦᠷ ᠲᠠᠭᠠᠷᠠᠳᠠᠭ ᠭᠡᠵᠦ ᠪᠠᠢ ᠭᠤᠸᠠᠡᠭ ᠶᠧ ᠬᠡᠯᠡᠬᠡᠳ ᠢᠨᠢᠶᠡᠵᠦ ᠪᠠᠢᠯ᠎ᠠ᠃

ᠪᠠᠢ ᠭᠤᠸᠠᠡᠭ ᠶᠧ ᠪᠤᠤ ᠯᠦᠡᠭ ᠱᠠᠨ ᠪᠠᠯᠭᠠᠰᠤ ᠵᠢᠨ ᠬᠠᠨᠭᠭᠠᠨ ᠪᠤᠷᠤᠯᠠᠭᠤᠯᠬᠤ ᠬᠤᠷᠰᠢᠶ᠎ᠠ ᠡᠴᠡ ᠠᠵᠢᠯ ᠡᠴᠡ ᠪᠠᠨ ᠠᠮᠠᠷᠠᠵᠦ ᠤᠳᠤ ᠴᠤ᠌ ᠭᠡᠰᠡᠨ ᠪᠤᠤ ᠯᠦᠡᠭ ᠱᠠᠨ ᠪᠠᠯᠭᠠᠰᠤ ᠵᠢᠨ ᠪᠠᠢᠰᠢᠡᠭ ᠭᠡᠷ ᠲᠤ᠌ ᠪᠠᠨ ᠰᠠᠭᠤᠵᠦ ᠪᠤᠢ᠃ ᠡᠮᠦᠨ᠎ᠡ ᠬᠡᠳᠦᠨ ᠵᠢᠯ ᠠᠪᠤ ᠡᠵᠢ ᠨᠢ ᠪᠠᠢ ᠭᠤᠸᠠᠡᠭ ᠶᠧ ᠵᠢᠨ ᠲᠡᠨᠳᠡ ᠰᠠᠭᠤᠵᠦ ᠪᠠᠢᠭᠰᠠᠨ ᠵᠢᠨᠨ ᠪᠠᠢᠰᠢᠡᠭ ᠭᠡᠷ ᠡᠪᠦᠯ ᠎ᠳᠡᠭᠡᠨ ᠬᠦᠢᠲᠡᠨ᠂ ᠨᠠᠰᠤᠲᠠᠢ ᠬᠦᠮᠦᠰ ᠵᠤᠷᠯᠤᠡᠭ᠎ᠳᠤ ᠤᠷᠤᠬᠤ᠎ᠳᠤ  ᠲᠦᠬᠦᠮ ᠦᠬᠡᠢ ᠵᠡᠷᠭᠡ ᠰᠢᠯᠲᠠᠭᠠᠨ ᠡᠴᠡ ᠪᠤᠯᠵᠦ ᠰᠡᠬᠦᠯ ᠎ᠤᠨ ᠲᠠᠪᠤ ᠳᠤᠯᠤᠭᠠᠨ ᠵᠢᠯ᠎ᠳᠤ ᠬᠤᠶᠠᠳᠤᠭᠠᠷ ᠬᠦᠦ ᠪᠠᠢ ᠭᠤᠸᠠᠡᠭ ᠶᠤᠸᠠᠨ᠎ᠤ ᠬᠢᠨ᠎ᠳᠡᠭᠡᠨ ᠪᠠᠢᠨᠭᠭᠤ ᠰᠠᠭᠤᠳᠠᠭ ᠪᠤᠯᠤᠭᠰᠠᠨ ᠨᠢ ᠡᠨᠡ ᠠᠵᠢ᠃ ᠪᠠᠢ ᠭᠤᠸᠠᠡᠭ ᠶᠧ ᠬᠡᠳᠦᠢᠪᠡᠷ ᠦᠪᠡᠷ ᠵᠢᠨᠨ ᠪᠠᠰᠠ ᠳᠠᠯᠨᠨ ᠨᠢᠬᠡ ᠬᠦᠷᠴᠦ ᠰᠠᠬᠠᠯ ᠦᠰᠦ ᠨᠢ ᠴᠠᠢᠵᠦ ᠰᠠᠨᠴᠢᠭ ᠨᠢ ᠪᠤᠭᠤᠷᠤᠯᠳᠤᠨ ᠨᠢᠷᠤᠭᠤ ᠨᠢ ᠪᠦᠭᠲᠦᠢᠭᠰᠡᠨ ᠪᠤᠯᠪᠠᠴᠦ ᠦᠷ᠎ᠡ ᠬᠡᠦᠬᠡᠳ᠎ᠤᠨ ᠶᠤᠰᠤ ᠪᠡᠷ ᠡᠯᠪᠡᠷᠢᠯ ᠵᠢᠷᠤᠮ᠎ᠢ ᠬᠦᠢᠴᠡᠳᠭᠡᠨ᠂ ᠦᠲᠡᠯᠦᠬᠡ ᠠᠪᠤ ᠪᠠᠨ ᠰᠤᠪᠢᠯᠠᠬᠤ ᠪᠡᠷ ᠰᠠᠷ᠎ᠠ ᠵᠢᠨ ᠨᠢᠬᠡ ᠤᠳᠠᠭ᠎ᠠ ᠳᠡᠬᠦᠦ ᠵᠢᠨ ᠬᠢᠨ ᠎ᠳᠡᠭᠡᠨ ᠬᠦᠷᠴᠦ ᠢᠷᠡᠭᠡᠳ ᠠᠪᠤ ᠪᠠᠨ ᠰᠤᠪᠢᠯᠠᠬᠤ ᠪᠠᠨ ᠪᠠᠷᠢᠮᠲᠠᠯᠠᠭᠰᠠᠭᠠᠷ ᠪᠠᠢᠨ᠎ᠠ᠃ ᠬᠡᠯᠡᠵᠦ ᠶᠠᠷᠢᠬᠤ ᠪᠠ ᠶᠠᠪᠤᠵᠦ ᠰᠠᠭᠤᠬᠤ ᠡᠴᠡ ᠨᠢ ᠪᠠᠢ ᠭᠤᠸᠠᠡᠭ ᠶᠧ ᠭᠡᠭᠴᠢ ᠨᠠᠮ ᠲᠦᠯᠬᠡᠨ ᠵᠠᠡᠭ ᠠᠭᠠᠯᠢ ᠲᠠᠢ᠂ ᠲᠤᠡᠭ ᠶᠡᠬᠡ ᠬᠡᠪ ᠪᠤᠯᠪᠠᠰᠤᠷᠠᠯ ᠲᠠᠢ ᠬᠦᠮᠦᠨ ᠭᠡᠳᠡᠭ ᠨᠢ ᠢᠯᠡ ᠮᠡᠳᠡᠭᠳᠡᠨ᠎ᠡ᠃ ᠪᠠᠢ ᠭᠤᠸᠠᠡᠭ ᠶᠤᠸᠠᠨ᠎ᠤ ᠶᠡᠷᠡ ᠭᠠᠷᠴᠦ ᠪᠠᠢᠬᠤ ᠨᠠᠰᠤᠲᠠᠢ ᠡᠵᠢ ᠭᠡᠭᠴᠢ ᠲᠡᠢᠮᠦ ᠯᠠ ᠦᠨᠭᠭᠢᠶᠡᠮᠦᠷᠴᠢ ᠵᠢᠰᠦ ᠴᠢᠷᠠᠢ ᠲᠠᠢ ᠬᠦᠮᠦᠨ ᠪᠦᠬᠡᠳ ᠪᠢᠳᠡᠨ᠎ᠳᠤ ᠰᠠᠨᠳᠠᠯᠢ ᠠᠪᠴᠦ ᠦᠭᠭᠦᠨ ᠤᠰᠤ ᠴᠠᠢ ᠤᠢᠷᠠᠲᠤᠭᠤᠯᠬᠤ ᠭᠡᠵᠦ ᠮᠠᠢᠵᠢᠬᠢᠨᠠᠬᠤ ᠨᠢ ᠠᠰᠪᠤᠷ ᠴᠠᠢᠯᠭᠠᠨ ᠬᠠᠯᠭᠤᠮᠰᠤᠭ ᠵᠠᠡᠭ ᠲᠠᠢ ᠬᠦᠮᠦᠨ ᠭᠡᠳᠡᠭ ᠨᠢ ᠲᠤᠳᠤᠷᠠᠬᠠᠢ᠃

— ᠡᠨᠡ ᠳᠡᠯᠡᠬᠡᠢ᠎ᠳᠤ ᠡᠵᠢ ᠠᠪᠤ ᠭᠡᠳᠡᠭ ᠡᠷᠬᠢᠬᠡᠳ ᠤᠯᠳᠠᠰᠢ ᠦᠬᠡᠢ ᠡᠷᠳᠡᠨᠢ᠃ ᠨᠠᠳᠠ ᠵᠢ ᠲᠦᠬᠦᠬᠡ ᠤᠷᠤᠬᠤ ᠲᠡᠷᠡ ᠴᠠᠭ ᠡᠴᠡ ᠡᠬᠢᠯᠡᠨ ᠮᠠᠨ᠎ᠤ ᠠᠮᠢᠳᠤᠷᠠᠯ ᠲᠡᠢᠮᠦ ᠴᠢᠨᠡᠭᠡᠯᠢᠭ ᠪᠢᠰᠢ ᠪᠠᠢᠭᠰᠠᠨ᠃ ᠭᠡᠪᠡᠴᠦ ᠠᠬᠠᠰ ᠵᠠᠬᠠᠰ ᠵᠢᠨᠨ ᠬᠦᠨᠳᠦᠳᠭᠡᠨ᠂ ᠠᠪᠤ ᠡᠵᠢ ᠪᠠᠨ ᠬᠦᠨᠳᠦᠯᠡᠬᠦ ᠵᠢ ᠮᠢᠨᠦ ᠠᠪᠤ ᠡᠵᠢ ᠮᠠᠨᠤᠰ ᠲᠤ᠌ ᠦᠪᠡᠷ ᠎ᠤᠨ ᠪᠡᠶ᠎ᠡ ᠪᠡᠷ ᠵᠢᠨᠨ ᠳᠠᠭᠤᠷᠢᠶᠠᠯ ᠪᠤᠯᠵᠦ ᠦᠵᠡᠬᠦᠯᠵᠦ ᠰᠤᠷᠭᠠᠵᠠᠢ᠃ ᠪᠢᠳᠡᠨ᠎ᠢ ᠪᠠᠭ᠎ᠠ ᠪᠠᠢᠬᠤ ᠎ᠳᠤ ᠮᠢᠨᠦ ᠡᠪᠦᠬᠡ ᠲᠠᠯ᠎ᠠ ᠪᠡᠶ᠎ᠡ ᠵᠢᠨ ᠲᠠᠮᠪᠠᠷᠠᠯ᠎ᠳᠤ ᠨᠡᠷᠪᠡᠭᠳᠡᠭᠰᠡᠨ ᠪᠦᠬᠡᠳ ᠮᠢᠨᠦ ᠡᠮᠡᠭᠡ ᠪᠤᠯ ᠨᠡᠡᠭ ᠨᠢᠬᠡ ᠨᠠᠰᠤ ᠪᠡᠷ ᠵᠢᠨᠨ ᠬᠦᠨᠳᠦ ᠠᠭᠤᠰᠬᠢᠨ ᠡᠪᠡᠳᠴᠢᠨ ᠎ᠳᠤ ᠲᠠᠷᠴᠢᠯᠠᠭᠠᠭᠳᠠᠵᠦ᠂ ᠰᠡᠬᠦᠯᠳᠡᠵᠦ ᠢᠷᠡᠭᠡᠳ ᠵᠢᠯ᠎ᠤᠨ ᠬᠡᠳᠦ ᠤᠳᠠᠭ᠎ᠠ ᠡᠮᠨᠡᠯᠬᠡ ᠎ᠳᠤ ᠰᠠᠭᠤᠳᠠᠭ ᠪᠠᠢᠭᠰᠠᠨ ᠶᠤᠮ᠃ ᠤᠨᠴᠠᠭᠠᠢᠯᠠᠨ ᠡᠪᠦᠯ ᠪᠤᠯᠬᠤ ᠲᠠᠢ ᠵᠡᠷᠭᠡ ᠡᠮᠡᠭᠡ ᠵᠢᠨ ᠮᠢᠨᠢ ᠬᠠᠭᠤᠴᠢᠨ ᠠᠷᠬᠠᠭ ᠬᠦᠳᠡᠯᠬᠦ ᠨᠢ ᠬᠡᠴᠡᠬᠦᠦ ᠪᠤᠯᠴᠢᠬᠠᠳᠠᠭ᠃ ᠲᠡᠢᠮᠦ ᠡᠴᠡ ᠲᠤᠬᠠᠢ ᠵᠢᠨ ᠦᠶᠡᠰ ᠬᠡᠳᠦᠢᠪᠡᠷ ᠮᠠᠨ᠎ᠤ ᠠᠮᠢᠳᠤᠷᠠᠯ ᠲᠤᠡᠭ ᠬᠦᠴᠢᠷᠲᠡᠢ ᠪᠠᠢᠭᠰᠠᠨ ᠴᠤ᠌ ᠡᠪᠦᠯ ᠪᠤᠯᠪᠠᠯ ᠭᠡᠷ ᠵᠢᠨᠨ ᠲᠤᠯᠠᠭᠠᠨ ᠪᠠᠢᠯᠭᠠᠬᠤ ᠵᠢ ᠬᠢᠴᠢᠶᠡᠵᠦ ᠨᠡᠬᠦᠷᠡᠰᠦ ᠵᠢ ᠵᠤᠭᠰᠤᠭᠠᠯ ᠦᠬᠡᠢ ᠰᠢᠲᠠᠭᠠᠳᠠᠭ᠃ ᠬᠡᠷᠪᠡ ᠡᠮᠡᠭᠡ ᠵᠢᠨ ᠡᠪᠡᠳᠴᠢᠨ ᠨᠢ ᠬᠦᠨᠳᠦᠷᠡᠵᠦ ᠡᠮᠨᠡᠯᠬᠡ᠎ᠳᠤ ᠰᠠᠭᠤᠬᠤ᠎ᠳᠤ ᠬᠦᠷᠪᠡᠯ ᠪᠢᠳᠡ ᠨᠡᠬᠦᠷᠡᠰᠦ ᠪᠠᠨ ᠠᠷᠪᠢᠯᠠᠬᠤ ᠵᠢ ᠪᠤᠳᠤᠵᠦ ᠭᠠᠯ ᠵᠢᠨᠨ ᠵᠤᠭᠰᠤᠭᠠᠴᠢᠬᠠᠳᠠᠭ ᠪᠠᠢᠭᠰᠠᠨ ᠶᠤᠮ᠃ ᠲᠡᠭᠡᠭᠡᠳ ᠨᠢᠬᠡ ᠵᠢᠯ ᠎ᠤᠨ ᠡᠪᠦᠯ ᠮᠢᠨᠦ ᠡᠮᠡᠭᠡ ᠬᠤᠷᠢ ᠭᠠᠷᠤᠢ ᠡᠳᠦᠷ ᠵᠢᠡᠷ ᠡᠮᠨᠡᠯᠬᠡ ᠎ᠳᠤ ᠰᠠᠭᠤᠬᠤ᠎ᠳᠤ ᠪᠢᠳᠡ ᠨᠡᠬᠦᠷᠡᠰᠦ ᠪᠠᠨ ᠠᠷᠪᠢᠯᠠᠵᠦ ᠭᠠᠯ ᠬᠢᠭᠰᠡᠨ ᠦᠬᠡᠢ ᠪᠤᠯᠬᠤᠷ ᠮᠢᠨᠦ ᠲᠡᠬᠦᠦ ᠪᠠᠢ ᠭᠤᠸᠠᠡᠭ ᠶᠤᠸᠠᠨ᠎ᠤ ᠬᠦᠯ ᠭᠠᠷ ᠨᠢ ᠪᠦᠷ ᠬᠦᠯᠡᠢᠳᠡᠯ᠎ᠡ ᠬᠦᠯᠳᠡᠴᠢᠬᠡᠭᠰᠡᠨ ᠰᠢᠦ ᠭᠡᠵᠦ ᠬᠡᠯᠡᠬᠦ ᠎ᠳᠤ ᠪᠠᠢ ᠭᠤᠸᠠᠡᠭ ᠶᠧ ᠵᠢᠨ ᠨᠢᠳᠤᠨ ᠎ᠳᠤ ᠨᠢᠯᠪᠤᠰᠤ ᠴᠢᠢᠯᠭᠡᠨᠡᠵᠦ ᠪᠠᠢᠯ᠎ᠠ᠃ ᠲᠡᠢᠮᠦ ᠡ！ ᠬᠠ ᠬᠢᠰᠬᠢᠭᠰᠡᠨ ᠭᠠᠵᠠᠷ ᠭᠤᠶ᠎ᠠ ᠭᠡᠳᠡᠭ ᠬᠠᠭᠤᠴᠢᠨ᠎ᠤ ᠦᠬᠡ ᠪᠠᠢᠳᠠᠭ᠃ ᠨᠢᠬᠡᠨ ᠡᠯᠪᠡᠷᠢᠯ ᠵᠢᠷᠤᠮ ᠲᠠᠢ ᠰᠠᠢᠨ ᠬᠡᠦᠬᠡᠳ᠎ᠢ ᠬᠦᠮᠦᠵᠢᠬᠦᠯᠬᠦ᠎ᠳᠤ ᠬᠡᠳᠦᠨ ᠦᠶ᠎ᠡ ᠵᠢᠨ ᠬᠦᠮᠦᠰ᠎ᠤᠨ ᠬᠢᠴᠢᠶᠡᠯ ᠵᠢᠳᠬᠦᠯ ᠱᠠᠭᠠᠷᠲᠠᠭᠳᠠᠨ᠎ᠠ ᠭᠡᠳᠡᠭ ᠤᠷᠤ ᠲᠠᠢ ᠦᠬᠡ ᠪᠠᠢᠵᠠᠢ᠎ᠳᠠ᠃

ᠪᠠᠢ ᠭᠤᠸᠠᠡᠭ ᠶᠧ ᠲᠠᠢ ᠪᠠᠬᠠᠨ ᠵᠤᠭᠤᠭᠳᠠᠵᠦ ᠰᠠᠭᠤᠳᠠᠯ᠎ᠠ ᠭᠠᠳᠠᠨ᠎ᠠ ᠡᠴᠡ ᠪᠠᠢ ᠭᠤᠸᠠᠡᠭ ᠶᠤᠸᠠᠨ ᠎ᠤ ᠡᠬᠡᠨᠡᠷ ᠨᠤᠭᠤᠭ᠎ᠠ ᠮᠢᠬ᠎ᠠ ᠠᠪᠴᠦ ᠢᠷᠡᠭᠡᠳ ᠶᠠᠭᠠᠷᠠᠯᠲᠠᠢ ᠭᠡᠭᠴᠢ ᠭᠠᠯ ᠲᠤᠭᠤᠭ᠎ᠠ ᠲᠠᠢ ᠪᠠᠨ ᠨᠤᠴᠤᠯᠳᠤᠵᠦ ᠦᠳᠡ ᠵᠢᠨ ᠬᠤᠭᠤᠯᠠ ᠪᠠᠨ ᠪᠡᠯᠡᠳᠭᠡᠵᠦ ᠡᠬᠢᠯᠡᠪᠡ᠃ ᠳᠡᠮᠡᠢ ᠤᠳᠠᠭᠰᠠᠨ ᠦᠬᠡᠢ ᠪᠠᠢ ᠭᠤᠸᠠᠡᠭ ᠶᠤᠸᠠᠨ ᠴᠤ᠌ ᠪᠠᠭ᠎ᠠ ᠰᠤᠷᠭᠠᠭᠤᠯᠢ ᠵᠢᠨ ᠵᠢᠷᠭᠤᠳᠤᠭᠠᠷ ᠤᠨ᠎ᠳᠤ ᠰᠤᠷᠤᠯᠴᠠᠵᠦ ᠪᠠᠢᠭ᠎ᠠ ᠤᠮᠪᠤᠯᠤ ᠬᠦᠦ ᠪᠠᠢ ᠪᠤᠤ ᠲᠢᠶᠠᠨ ᠵᠢᠨᠨ ᠲᠤᠰᠤᠭᠠᠳ ᠠᠪᠤᠭᠠᠳ ᠢᠷᠡᠵᠡᠢ᠃ ᠪᠠᠢ ᠭᠤᠸᠠᠡᠭ ᠶᠤᠸᠠᠨ ᠭᠡᠭᠴᠢ ᠠᠬ᠎ᠠ ᠪᠠᠨ ᠪᠤᠳᠤᠪᠠᠯ ᠦᠨᠳᠦᠷ ᠨᠠᠷᠢᠬᠠᠨ ᠪᠡᠶ᠎ᠡ ᠲᠠᠢ ᠪᠦᠬᠡᠳ ᠦᠰᠦ ᠭᠡᠵᠢᠬᠡ ᠨᠢ ᠠᠬ᠎ᠠ ᠡᠴᠡ ᠪᠠᠨ ᠢᠯᠡᠬᠦᠦ ᠴᠠᠢᠴᠢᠬᠠᠭᠰᠠᠨ ᠬᠠᠷᠠᠪᠲᠤᠷ ᠵᠢᠰᠦ ᠲᠠᠢ ᠬᠦᠮᠦᠨ ᠪᠠᠢᠯ᠎ᠠ᠃  

— ᠠᠪᠤ ᠡᠵᠢ ᠮᠠᠨᠢ ᠡᠪᠡᠳᠴᠢᠨ ᠡᠮᠭᠡᠭ ᠲᠠᠢ ᠡᠪᠦᠬᠡ ᠡᠮᠡᠭᠡ ᠵᠢ ᠲᠡᠷᠡ ᠮᠡᠲᠦ ᠰᠠᠢᠨ ᠠᠰᠠᠷᠠᠵᠦ ᠰᠤᠪᠢᠯᠠᠭᠰᠠᠨ ᠪᠦᠬᠡᠳ ᠪᠢᠳᠡ ᠴᠤ᠌ ᠭᠡᠰᠡᠨ ᠡᠪᠦᠬᠡ ᠡᠮᠡᠭᠡ ᠵᠢᠨ ᠵᠢᠨᠨ ᠠᠭᠰᠢᠭᠤᠨ ᠰᠢᠨᠭᠭᠡᠨ᠎ᠢ ᠠᠰᠬᠠᠬᠤ ᠡᠴᠡ ᠡᠬᠢᠯᠡᠬᠡᠳ ᠲᠡᠳᠡᠨ᠎ᠢ ᠠᠰᠠᠷᠠᠵᠦ ᠰᠤᠪᠢᠯᠠᠬᠤ ᠠᠵᠢᠯ᠎ᠳᠤ ᠬᠦᠯ ᠬᠤᠢᠰᠢ ᠦᠬᠡᠢ ᠤᠷᠤᠯᠴᠠᠳᠠᠭ ᠪᠠᠢᠭᠰᠠᠨ ᠶᠤᠮ᠃ ᠨᠠᠰᠤᠲᠠᠨ ᠵᠢᠨᠨ ᠠᠰᠠᠷᠠᠵᠦ ᠨᠢᠯᠬᠠᠰ ᠵᠢᠨᠨ ᠬᠠᠢᠷᠠᠯᠠᠨ᠂ ᠭᠡᠷ ᠵᠠᠭᠤᠷ᠎ᠠ ᠪᠠᠨ ᠡᠶ᠎ᠡ ᠨᠠᠢᠷᠲᠠᠢ ᠠᠮᠢᠳᠤᠷᠠᠬᠤ ᠨᠢ ᠮᠠᠨ᠎ᠤ ᠭᠡᠷ ᠎ᠤᠨ ᠬᠡᠳᠦᠨ ᠦᠶ᠎ᠡ ᠵᠢᠨ ᠬᠦᠮᠦᠰ᠎ᠤᠨ ᠰᠢᠯᠢᠳᠡᠭ ᠤᠳᠤᠮᠰᠢᠯ ᠪᠤᠯᠴᠢᠬᠠᠵᠠᠢ᠃ ᠮᠢᠨᠦ ᠡᠬᠡᠨᠡᠷ ᠬᠢᠲᠠᠳ ᠬᠦᠮᠦᠨ᠂ ᠪᠢᠳᠡ ᠬᠤᠶᠠᠭᠤᠯᠠ ᠡᠴᠡ ᠨᠢᠬᠡ ᠬᠦᠦ ᠨᠢᠬᠡ ᠦᠬᠢᠨ ᠲᠠᠢ᠂ ᠬᠦᠦ ᠵᠢᠨ ᠪᠡᠷᠢ ᠪᠤᠯᠤᠨ ᠦᠬᠢᠨ᠎ᠤ ᠬᠦᠷᠭᠡᠨ ᠪᠦᠷ ᠮᠤᠨᠭᠭᠤᠯ ᠦᠨᠳᠦᠰᠦᠲᠡᠨ᠃ ᠲᠡᠢᠮᠦ ᠪᠡᠷ ᠵᠢᠨᠨ ᠮᠠᠨ᠎ᠤ ᠭᠡᠷ ᠴᠢᠨᠢ ᠭᠤᠷᠪᠠᠨ ᠦᠨᠳᠦᠰᠦᠲᠡᠨ ᠲᠠᠢ ᠲᠤᠮᠤ ᠭᠡᠷ ᠪᠦᠯᠢ᠂ ᠪᠢ ᠳᠡᠭᠡᠷ᠎ᠡ ᠪᠠᠨ ᠶᠡᠷᠡ ᠭᠠᠷᠴᠦ ᠪᠠᠢᠭ᠎ᠠ ᠨᠠᠰᠤᠲᠠᠨ ᠠᠪᠤ ᠡᠵᠢ ᠲᠠᠢ᠂ ᠳᠤᠤᠷ᠎ᠠ ᠪᠠᠨ ᠠᠷᠪᠠ ᠭᠠᠷᠤᠭᠰᠠᠨ ᠤᠮᠪᠤᠯᠤ ᠲᠠᠢ ᠪᠠᠨ ᠤᠳᠤ ᠨᠡᠢᠲᠡ ᠳᠤᠯᠤᠭᠠᠨ ᠠᠮᠠ ᠬᠦᠮᠦᠨ ᠬᠠᠮᠲᠤ ᠠᠮᠢᠳᠤᠷᠠᠵᠦ ᠪᠠᠢᠨ᠎ᠠ᠃ ᠬᠠᠯᠠᠭᠤᠨ ᠲᠤᠯᠠᠭᠠᠨ ᠬᠡᠷ ᠪᠦᠯᠢ ᠭᠡᠳᠡᠭ ᠬᠠᠢᠷ᠎ᠠ ᠬᠠᠷᠢᠭᠤᠴᠠᠯᠭ᠎ᠠ ᠬᠤᠶᠠᠷ ᠳᠡᠭᠡᠷ᠎ᠡ ᠲᠤᠭᠲᠠᠵᠦ ᠪᠠᠢᠳᠠᠭ᠂ ᠪᠦᠷ ᠨᠢᠬᠡ ᠭᠡᠷ᠎ᠤᠨ ᠬᠦᠮᠦᠨ ᠪᠤᠯᠴᠢᠬᠠᠭᠰᠠᠨ ᠪᠢᠳᠡᠨ᠎ᠳᠤ ᠦᠨᠳᠦᠰᠦᠲᠡᠨ ᠤᠭᠰᠠᠭ᠎ᠠ ᠵᠢᠨ ᠭᠠᠳᠠᠭᠤᠷᠴᠢᠯᠠᠯ ᠭᠡᠵᠦ ᠶᠠᠭ ᠦᠬᠡᠢ ᠪᠦᠬᠡᠳ ᠬᠠᠷᠢᠯᠴᠠᠨ ᠬᠦᠨᠳᠦᠳᠭᠡᠨ ᠬᠠᠷᠢᠯᠴᠠᠨ ᠬᠠᠮᠵᠢᠯᠴᠠᠨ ᠬᠠᠷᠢᠯᠴᠠᠨ ᠰᠤᠷᠤᠯᠴᠠᠭᠰᠠᠭᠠᠷ ᠢᠷᠡᠵᠡᠢ᠃ ᠵᠢᠱ᠌ᠢᠶᠡᠯᠡᠪᠡᠯ ᠮᠤᠨᠭᠭᠤᠯ ᠦᠨᠳᠦᠰᠦᠲᠡᠨ ᠎ᠤ ᠤᠳᠬ᠎ᠠ ᠤᠷᠠᠯᠢᠭ ᠎ᠢ ᠪᠢ ᠮᠠᠰᠢ ᠪᠠᠬᠠᠷᠬᠠᠳᠠᠭ᠂ ᠲᠡᠢᠮᠦ ᠪᠡᠷ ᠵᠢᠨᠨ ᠤᠳᠤ ᠪᠢ ᠪᠢᠴᠢᠬᠠᠨ ᠤᠮᠪᠤᠯᠤ ᠪᠠᠢ ᠪᠤᠤ ᠲᠢᠶᠠᠨ ᠵᠢᠨᠨ ᠮᠤᠷᠢᠨ ᠬᠤᠭᠤᠷ ᠰᠤᠷᠭᠠᠵᠦ ᠪᠠᠢᠬᠤ ᠪᠦᠬᠡᠳ ᠡᠮᠦᠨᠡᠬᠡᠨ ᠾᠧᠪᠧᠢ ᠮᠤᠵᠢ ᠵᠢᠨ ᠱᠢ ᠵᠢᠶᠠ ᠵᠤᠸᠠᠡᠭ ᠎ᠳᠤ ᠪᠤᠯᠤᠭᠰᠠᠨ ᠳᠤᠮᠳᠠᠳᠤ ᠤᠯᠤᠰ ᠪᠤᠯᠤᠨ ᠴᠠᠭᠠᠨ ᠤᠷᠤᠰ᠎ᠤᠨ ᠬᠠᠮᠲᠤᠷᠠᠯᠴᠠᠭᠰᠠᠨ ᠠᠵᠢᠯᠯᠠᠭ᠎ᠠ ᠎ᠳᠤ ᠲᠤᠭᠯᠠᠯᠲᠠ ᠭᠠᠷᠭᠠᠭᠠᠳ ᠢᠷᠡᠭᠰᠡᠨ ᠨᠢ ᠡᠨᠡ ᠰᠢᠦ！ ᠭᠡᠵᠦ ᠪᠠᠢ ᠭᠤᠸᠠᠡᠭ ᠶᠤᠸᠠᠨ ᠰᠢᠷᠡᠭᠡᠨ ᠳᠡᠭᠡᠷ᠎ᠡ ᠡᠴᠡ ᠪᠠᠨ ᠤᠮᠪᠤᠯᠤ ᠵᠢᠨ ᠵᠢᠨᠨ ᠮᠤᠨᠭᠭᠤᠯ ᠲᠡᠷᠯᠢᠭ ᠡᠮᠦᠰᠦᠬᠡᠳ ᠮᠤᠷᠢᠨ ᠬᠤᠭᠤᠷ ᠲᠠᠲᠠᠵᠦ ᠪᠠᠢᠭ᠎ᠠ ᠰᠡᠬᠦᠳᠡᠷ᠎ᠢ ᠪᠢᠳᠡᠨ᠎ᠳᠤ ᠠᠪᠴᠦ ᠦᠵᠡᠬᠦᠯᠪᠡ᠃

ᠢᠨᠭᠭᠢᠵᠦ ᠡᠨᠡ ᠲᠡᠷᠡ ᠵᠢ ᠵᠤᠭᠤᠭᠳᠠᠨ ᠪᠠᠢᠳᠠᠯ᠎ᠠ ᠡᠬᠦᠳᠡ ᠳᠤᠤᠭᠠᠷᠴᠦ ᠪᠠᠢ ᠭᠤᠸᠠᠡᠭ ᠶᠤᠸᠠᠨ᠎ᠤ ᠬᠦᠦ ᠪᠠᠢ ᠫᠧᠡᠭ ᠴᠧᠡᠭ ᠨᠢ ᠡᠬᠡᠨᠡᠷ ᠸᠠᠡᠭ᠎ᠳ᠋ᠠᠨ ᠲᠠᠢ ᠪᠠᠨ ᠤᠷᠤᠭᠠᠳ ᠢᠷᠡᠬᠦ ᠨᠢ ᠲᠡᠷᠡ᠃ ᠡᠳᠡᠨ᠎ᠤ ᠭᠡᠷ᠎ᠤᠨ ᠬᠦᠮᠦᠰ ᠡᠬᠦᠳᠡ ᠪᠠᠨ ᠠᠯᠬᠤᠭᠠᠳ ᠤᠷᠤᠵᠦ ᠢᠷᠡᠬᠦ ᠎ᠳᠤ ᠯᠠ ᠬᠦᠮᠦᠨ ᠪᠤᠯᠭᠠᠨ᠎ᠤ ᠴᠢᠷᠠᠢ ᠎ᠳᠤ ᠵᠤᠯ ᠵᠢᠷᠭᠠᠯ᠎ᠤᠨ ᠮᠦᠰᠢᠶᠡᠳᠦ ᠲᠤᠳᠤᠷᠠᠵᠦ ᠪᠠᠢᠬᠤ ᠵᠢ ᠪᠢᠳᠡ ᠰᠤᠷᠪᠤᠯᠵᠢᠯᠠᠭᠴᠢ ᠬᠦᠮᠦᠨ᠎ᠤ ᠬᠢᠷᠬᠠᠢ ᠨᠢᠳᠦ ᠪᠡᠷ ᠠᠵᠢᠭᠯᠠᠵᠦ ᠠᠮᠵᠢᠯ᠎ᠠ᠃ ᠭᠡᠷ ᠲᠤ᠌ ᠨᠢ ᠰᠤᠷᠪᠤᠯᠵᠢᠯᠠᠬᠤ ᠪᠡᠷ ᠢᠷᠡᠭᠰᠡᠨ ᠮᠠᠨᠤᠰ᠎ᠢ ᠲᠡᠳᠡ ᠦᠯᠦ ᠲᠠᠨᠢᠬᠤ ᠬᠦᠮᠦᠨ᠂ ᠶᠠᠷᠰᠢᠭ ᠲᠦᠪᠡᠭ ᠲᠠᠢ ᠤᠯᠤᠰ ᠭᠡᠵᠦ ᠲᠦᠪᠡᠭᠰᠢᠶᠡᠭᠰᠡᠨ ᠮᠠᠶᠢᠭ ᠶᠠᠭ ᠦᠬᠡᠢ ᠪᠦᠬᠡᠳ ᠪᠦᠷ ᠯᠡ ᠦᠬᠡᠳᠡ ᠴᠢᠷᠠᠢ ᠲᠠᠢ ᠠᠭᠤᠯᠵᠠᠵᠦ᠂ ᠢᠳᠡᠬᠦᠯᠵᠦ ᠤᠤᠭᠤᠯᠭᠠᠬᠤ ᠬᠡᠮᠡᠨ ᠬᠠᠯᠭᠤᠮᠰᠤᠭ ᠨᠢ ᠠᠷᠭ᠎ᠠ ᠦᠬᠡᠢ ᠪᠠᠢᠯ᠎ᠠ᠃

— ᠪᠢ ᠬᠤᠰᠢᠭᠤᠨ᠎ᠤ ᠲᠤᠷᠰᠢᠯᠲᠠ ᠵᠢᠨ ᠦᠨᠳᠦᠷ ᠵᠡᠷᠭᠡ ᠵᠢᠨ ᠳᠤᠮᠳᠠᠳᠤ ᠰᠤᠷᠭᠠᠭᠤᠯᠢ ᠎ᠳᠦ ᠠᠩᠭᠯᠢ ᠬᠡᠯᠡ ᠵᠢᠭᠠᠵᠦ ᠪᠤᠢ᠃ ᠮᠠᠨ ᠎ᠤ ᠶᠡᠷᠡ ᠭᠠᠷᠤᠭᠰᠠᠨ ᠬᠠᠳᠠᠮ ᠡᠪᠦᠬᠡ ᠡᠮᠡᠬᠡ ᠪᠢᠳᠡᠨ ᠲᠠᠢ ᠬᠠᠮᠲᠤ ᠠᠮᠢᠳᠤᠷᠠᠳᠠᠭ ᠪᠤᠯᠬᠤᠷ ᠮᠠᠨ᠎ᠤ᠎ᠳᠤ ᠠᠪᠠᠭ᠎ᠠ ᠪᠤᠯᠤᠨ ᠠᠪᠠᠭ᠎ᠠ ᠡᠭᠡᠴᠢ ᠨᠠᠷ ᠪᠠᠢᠨᠭᠭᠤ ᠢᠷᠡᠵᠦ ᠡᠪᠦᠬᠡ ᠡᠮᠡᠭᠡ ᠵᠢ ᠬᠠᠷᠠᠭᠠᠯᠵᠠᠳᠠᠭ᠂ ᠤᠳᠤ ᠪᠤᠯ ᠨᠡᠡᠭ ᠡᠬᠡᠯᠵᠢ ᠬᠠᠯᠠᠭ᠎ᠠ ᠪᠡᠷ ᠵᠢᠵᠢᠬᠦᠷᠯᠡᠵᠦ ᠪᠠᠢᠨ᠎ᠠ᠂ ᠡᠬᠦᠨ᠎ᠳᠤ ᠨᠢ ᠪᠢᠳᠡ ᠴᠤ᠌ ᠭᠡᠰᠡᠨ ᠶᠡᠬᠡ ᠪᠠᠶᠠᠷᠯᠠᠵᠦ ᠲᠠᠯᠠᠷᠬᠠᠵᠦ ᠶᠠᠪᠤᠳᠠᠭ᠃ ᠨᠡᠡᠭ ᠵᠢᠯ ᠴᠠᠭᠠᠨ ᠰᠠᠷ᠎ᠠ ᠪᠤᠶᠤ ᠪᠠᠶᠠᠷ ᠳᠤᠷᠠᠰᠬᠠᠯ᠎ᠤᠨ ᠡᠳᠦᠷ ᠪᠤᠯ ᠮᠠᠨᠠᠢᠬᠢᠨ᠎ᠳᠤ ᠨᠠᠰᠤᠲᠠᠢ ᠵᠠᠯᠠᠭᠤ ᠪᠦᠬᠦᠳᠡᠭᠡᠷ ᠵᠢᠨᠨ ᠴᠤᠭᠯᠠᠷᠠᠭᠠᠳ ᠬᠦᠷ ᠪᠠᠶᠠᠷ ᠵᠢᠡᠷ ᠪᠢᠯᠬᠠᠳᠠᠭ᠃ ᠡᠪᠦᠬᠡ ᠡᠮᠡᠭᠡ ᠨᠠᠷ ᠡᠴᠡ ᠤᠯᠠᠮᠵᠢᠯᠠᠭᠰᠠᠨ ᠰᠢᠯᠢᠳᠡᠭ ᠤᠯᠠᠮᠵᠢᠯᠠᠯ ᠪᠠᠢᠬᠤ ᠪᠤᠯᠬᠤᠷ ᠮᠠᠨ᠎ᠤ ᠭᠡᠷ ᠬᠦᠮᠦᠨ ᠠᠮᠠ ᠤᠯᠠᠨᠲᠠᠢ᠂ ᠦᠨᠳᠦᠰᠦᠲᠡᠨ ᠠᠳᠠᠯᠢ ᠪᠤᠰᠤ ᠪᠤᠯᠪᠠᠴᠤ ᠬᠡᠷᠡᠬᠦᠯ ᠶᠠᠷᠬᠢᠶᠠᠨ ᠭᠡᠵᠦ ᠬᠡᠵᠢᠶᠡᠳᠡ ᠪᠠᠢᠳᠠᠭ ᠦᠬᠡᠢ᠂ ᠤᠴᠢᠷ ᠨᠢ ᠪᠢᠳᠡ ᠪᠠᠰᠠ ᠬᠤᠵᠢᠮ ᠪᠦᠷ ᠦᠲᠡᠯᠦᠨ᠎ᠡ᠂ ᠦᠲᠡᠯᠵᠦ ᠬᠦᠭᠰᠢᠷᠡᠬᠦ ᠡᠴᠡ ᠮᠤᠯᠲᠤᠷᠠᠵᠦ ᠴᠢᠳᠠᠬᠤ ᠬᠦᠮᠦᠨ ᠦᠬᠡᠢ᠂ ᠲᠡᠢᠮᠦ ᠪᠡᠷ ᠵᠢᠨᠨ ᠦᠷ᠎ᠡ ᠬᠡᠦᠬᠡᠳ ᠲᠤ᠌ ᠪᠠᠨ ᠰᠠᠢᠨ ᠳᠠᠭᠤᠷᠢᠶᠠᠯ ᠪᠤᠯᠬᠤ ᠵᠢ ᠪᠢᠳᠡ ᠪᠦᠷ ᠬᠢᠴᠢᠶᠡᠳᠡᠭ᠃ ᠤᠳᠤ ᠮᠢᠨᠦ ᠬᠦᠦ ᠴᠤ᠌ ᠡᠪᠦᠬᠡ ᠡᠮᠡᠭᠡ ᠪᠠᠨ ᠬᠠᠮᠵᠢᠨ ᠨᠠᠰᠤᠲᠠᠢ ᠡᠯᠦᠨᠴᠡ ᠪᠠᠨ ᠠᠰᠠᠷᠠᠬᠤ᠎ᠳᠤ ᠲᠤᠰᠠ ᠳᠡᠮ ᠪᠤᠯᠴᠢᠬᠠᠳᠠᠭ ᠰᠢᠦ᠃ ᠡᠨᠡ ᠨᠢᠬᠡ ᠭᠡᠷ᠎ᠤᠨ ᠵᠢᠨᠨ ᠰᠠᠢᠨ ᠰᠠᠢᠬᠠᠨ᠎ᠤ ᠲᠦᠯᠦᠬᠡ ᠦᠳᠡᠯᠦᠬᠡ ᠵᠠᠯᠠᠭᠤ ᠪᠦᠬᠦᠳᠡᠬᠡᠷ ᠵᠢᠨᠨ ᠨᠢᠬᠡ ᠯᠠ ᠰᠡᠳᠬᠢᠯ ᠵᠢᠡᠷ ᠴᠢᠷᠮᠠᠢᠵᠦ ᠪᠠᠢᠳᠠᠭ ᠡᠴᠡ ᠶᠠᠳᠠᠷᠠᠯᠲᠠᠢ ᠪᠠᠢᠭᠰᠠᠨ ᠴᠤ᠌ ᠵᠢᠷᠭᠠᠯᠲᠠᠢ ᠰᠠᠨᠠᠭᠳᠠᠳᠠᠭ ᠭᠡᠵᠦ ᠪᠠᠢ ᠭᠤᠸᠠᠡᠭ ᠶᠤᠸᠠᠨ᠎ᠤ ᠬᠦᠦ ᠪᠡᠷᠢ ᠸᠠᠡᠭ᠎ᠳ᠋ᠠᠨ ᠰᠤᠷᠪᠤᠯᠵᠢᠯᠠᠭ᠎ᠠ ᠬᠦᠯᠢᠶᠡᠬᠦ᠎ᠳᠡᠭᠡᠨ ᠬᠡᠯᠡᠵᠦ ᠪᠠᠢᠯ᠎ᠠ᠃ 

《ᠦᠰᠬᠦ ᠮᠠᠯ ᠎ᠤᠨ ᠵᠢᠰᠦ ᠨᠢ ᠨᠢᠬᠡ᠂ ᠦᠬᠡᠳᠡᠯᠡᠬᠦ ᠭᠡᠷ᠎ᠤᠨ ᠦᠬᠡ ᠨᠢ ᠨᠢᠬᠡ ᠭᠡᠳᠡᠭ》 ᠵᠢᠡᠷ᠂ ᠪᠠᠢ ᠭᠤᠸᠠᠡᠭ ᠶᠤᠸᠠᠨ᠎ᠤ ᠨᠢᠬᠡ ᠭᠡᠷ᠎ᠤᠨ ᠬᠡᠨ ᠨᠢ ᠪᠤᠯᠪᠠᠴᠦ ᠬᠠᠢᠷ᠎ᠠ ᠪᠢᠯᠬᠠᠭᠰᠠᠨ ᠬᠠᠯᠠᠭᠤᠨ ᠳᠤᠯᠠᠭᠠᠨ ᠭᠡᠷ ᠪᠦᠯᠢ ᠪᠡᠷ ᠵᠢᠨᠨ ᠪᠠᠬᠠᠷᠬᠠᠵᠦ᠂ ᠬᠤᠪᠢ ᠬᠤᠪᠢᠨ ᠎ᠳᠤ ᠪᠠᠨ ᠪᠦᠷ ᠵᠤᠯ ᠵᠢᠷᠭᠠᠯ ᠵᠢᠠᠨ ᠨᠠᠨᠳᠢᠩᠨᠠᠵᠤ᠂ ᠨᠠᠰᠤᠲᠠᠨ ᠵᠢᠨᠨ ᠬᠦᠨᠳᠦᠯᠡᠨ ᠨᠢᠯᠬᠠᠰ ᠵᠢᠨᠨ ᠬᠠᠢᠷᠠᠯᠠᠵᠤ᠂ ᠲᠤᠰ ᠲᠤᠰ᠎ᠤᠨ ᠬᠤᠪᠢᠳᠠᠭᠰᠠᠨ ᠠᠵᠢᠯ᠎ᠳᠤ ᠪᠠᠨ ᠰᠢᠭᠤᠷᠬᠠᠢᠯᠠᠨ ᠠᠵᠠ ᠵᠢᠷᠭᠠᠯᠲᠤ ᠠᠮᠢᠳᠤᠷᠠᠯ ᠵᠢᠨᠨ ᠴᠤᠭᠴᠠᠯᠠᠵᠦ ᠪᠠᠢᠭ᠎ᠠ ᠨᠢ ᠪᠠᠬᠠᠳᠤᠭᠤᠰᠢᠲᠠᠢ᠃ ᠲᠡᠳᠡ ᠡᠨᠡ ᠮᠡᠲᠦ ᠪᠡᠷ ᠭᠤᠷᠪᠠᠨ ᠦᠨᠳᠦᠰᠦᠲᠡᠨ᠎ᠤ ᠬᠦᠮᠦᠰ ᠨᠢᠬᠡ ᠭᠡᠷ ᠪᠦᠯᠢ᠎ᠳᠤ ᠳᠦᠷᠪᠡᠨ ᠦᠶ᠎ᠡ ᠪᠡᠷ ᠵᠢᠨᠨ ᠡᠶ᠎ᠡ ᠨᠠᠢᠷᠲᠠᠢ ᠬᠠᠮᠲᠤ ᠠᠮᠢᠳᠤᠷᠠᠵᠦ᠂ ᠠᠨᠠᠷ᠎ᠤᠨ ᠦᠷ᠎ᠡ ᠮᠡᠲᠦ ᠪᠦᠯᠬᠦᠮᠳᠡᠨ ᠨᠢᠬᠲᠠᠷᠠᠵᠦ᠂ ᠦᠨᠳᠦᠰᠦᠲᠡᠨ᠎ᠤ ᠪᠦᠯᠬᠦᠮᠳᠡᠯ᠎ᠤᠨ ᠦᠯᠢᠬᠡᠷ ᠵᠢᠱ᠌ᠢᠶ᠎ᠡ ᠪᠤᠯᠵᠦ ᠨᠡᠢᠲᠡ ᠲᠦᠮᠡᠨ ᠎ᠳᠡᠭᠡᠨ ᠱᠠᠭᠰᠢᠭᠳᠠᠨ ᠪᠠᠢᠨ᠎ᠠ᠃