ᠱᠢᠨᠡ ᠭᠡᠷᠲᠡᠭᠡᠨ ᠨᠡᠬᠦᠵᠦ᠍ ᠤᠷᠤᠬᠤ ᠪᠤᠯᠵᠦ᠍᠂ ᠬᠤᠷᠢᠶᠠᠵᠦ᠍ ᠪᠠᠢᠬ᠍ᠰᠠᠨ ᠨᠤᠮᠤᠳᠢᠶᠠᠨ ᠲᠢᠭᠯᠡᠬᠦ ᠵᠠᠭᠤᠷᠠ ᠰᠠᠨᠠᠭᠠᠨᠳᠤ ᠦᠭᠡᠢᠪᠠᠷ ᠠᠩᠬᠠ ᠲᠤᠮᠳᠠᠳᠦ᠍ᠶ᠋ᠢᠨ ᠦᠶᠡᠶ᠋ᠢᠨ ᠪᠢᠴᠢᠭ᠌ᠰᠡᠨ 《ᠪᠠᠷᠠᠭᠠ ᠬᠤᠳᠠᠯᠳᠤᠬ᠍ᠴᠢ》 ᠭᠡᠳᠡᠭ ᠵᠤᠬᠢᠶᠠᠯᠢᠤᠯᠤᠭᠠᠳ ᠦᠵᠡᠴᠢᠭᠡᠪᠡ᠃ ᠡᠬᠦᠨᠢ ᠠᠪᠤ ᠮᠢᠨᠢ ᠬᠡᠴᠢᠨᠡᠨ ᠵᠢᠯ ᠬᠣᠷᠢᠶᠠᠨ ᠬᠠᠳᠠᠭᠠᠯᠠᠵᠦ᠍᠂ ᠡᠮᠦᠨᠡ ᠬᠡᠳᠦᠨ ᠵᠢᠯ ᠰᠠᠶᠢ ᠨᠠᠳᠠᠳᠤ ᠦᠭ᠌ᠭᠦᠭ᠌ᠰᠡᠨ ᠪᠢᠯᠡ᠃ ᠡᠨᠡ ᠵᠤᠬᠢᠶᠠᠯ ᠪᠤᠯ ᠪᠠᠷᠤᠭ ᠮᠢᠨᠤ ᠠᠩᠬᠠ ᠪᠢᠴᠢᠭ᠌ᠰᠡᠨ ᠲᠡᠮᠳᠡᠭ᠌ᠯᠡᠨ ᠲᠤᠭᠠᠴᠢᠬ᠍ᠰᠠᠨ ᠵᠤᠬᠢᠶᠠᠯ ᠪᠤᠯᠤᠨᠠ᠃ ᠵᠤᠬᠢᠶᠠᠯᠢ ᠮᠢᠨᠤ ᠠᠩᠬᠠ ᠲᠤᠮᠳᠠᠳᠦ᠍ᠶ᠋ᠢᠨ ᠦᠶᠡᠶ᠋ᠢᠨ ᠮᠤᠩᠭᠤᠯ ᠬᠡᠯᠡᠨᠤ ᠪᠠᠭ᠍ᠰᠢ᠂ ᠮᠦᠨ ᠠᠩᠬᠢᠶ᠋ᠢᠨ ᠡᠷᠬᠢᠯᠡᠭᠴᠢ ᠴᠧᠩ ᠢᠤᠢ ᠪᠠᠭ᠍ᠰᠢ᠂ ᠤᠯᠠᠭᠠᠨ ᠪᠢᠷᠢᠶᠠᠷ ᠴᠤᠬᠤᠮ ᠬᠠᠭᠤᠳᠠᠰᠦ ᠲᠦᠬᠦᠷᠡᠩ ᠤᠯᠠᠢᠲᠠᠯᠠ ᠵᠠᠰᠠᠬ᠍ᠰᠠᠨ ᠪᠠᠢᠯᠠ᠃ ᠬᠤᠯᠪᠤᠬᠤ ᠡᠭᠡᠱᠢᠭᠤᠨ ᠲᠦᠷᠢᠮᠠᠴᠠ ᠵᠦᠷᠢᠴᠡᠭ᠌ᠰᠡᠨ ᠬᠡᠳᠦᠨ ᠪᠤᠷᠤᠭᠤ ᠦᠰᠦᠭᠢ ᠵᠦᠪᠢᠶᠠᠷ ᠵᠠᠯᠠᠷᠠᠭᠤᠯᠤᠨ ᠪᠢᠴᠢᠵᠦ᠍ ᠦᠭ᠌ᠭᠦᠭᠡᠳ᠂ ᠨᠤᠷᠱᠢᠭᠤ ᠰᠤᠨᠵᠢᠷᠠᠭᠤ ᠬᠡᠰᠡᠭᠢ ᠬᠡᠳᠦᠨ ᠭᠠᠵᠠᠷ ᠪᠦᠬᠦᠯᠢ ᠤᠯᠠᠭᠠᠨ ᠮᠦᠷᠢᠶᠠᠷᠨᠢ ᠬᠠᠰᠦᠵᠦ᠍᠂ ᠠᠮᠢᠳᠤᠯᠢᠭ ᠰᠠᠢᠬᠠᠨ ᠲᠦᠷᠰᠦᠯᠡᠭ᠌ᠰᠡᠨ ᠬᠡᠰᠡᠭᠲᠤᠨᠢ ᠵᠢᠷᠤᠭᠠᠰᠦᠯᠠᠵᠦ᠍ ᠪᠠᠢᠭᠠᠳ ᠴᠤᠬᠤᠯᠲᠠ ᠪᠢᠴᠢᠵᠦ᠍᠂ ᠵᠤᠬᠢᠶᠠᠯᠤᠨ ᠠᠷᠣᠳᠤᠨᠢ ᠤᠨᠤᠵᠦ ᠠᠯᠳᠠᠬ᠍ᠰᠠᠨ ᠭᠠᠵᠠᠷᠢ ᠳ᠋ᠦᠩᠨᠡᠭ᠌ᠰᠡᠨ ᠮᠠᠶᠢᠭᠢᠶᠠᠷ ᠶᠡᠷᠦᠩᠬᠡᠢ ᠴᠤᠬᠤᠯᠲᠠ ᠪᠢᠴᠢᠭ᠌ᠰᠡᠨ ᠪᠠᠢᠨᠠ᠃
ᠴᠧᠩ ᠢᠤᠢ ᠪᠠᠭ᠍ᠰᠢ ᠦᠨᠳᠦᠷ ᠪᠢᠷᠠᠯᠢᠭ ᠪᠡᠶᠡᠲᠠᠢ᠂ ᠲᠦᠬᠦᠷᠢᠭ᠌ ᠴᠢᠷᠠᠢᠲᠠᠢ᠂ ᠢᠨᠢᠶᠡᠪᠡᠯ ᠵᠠᠪᠠᠵᠢᠶ᠋ᠢᠨᠢ ᠲᠠᠭᠠᠭᠠᠳ ᠤᠯᠠᠨ ᠬᠤᠨᠢᠶᠠᠰᠦ ᠭᠠᠷᠴᠦ᠍᠂ ᠠᠭᠤᠷᠯᠠᠪᠠᠯ ᠨᠢᠳᠦ᠍ᠨᠢ ᠬᠤᠨᠳᠠᠭᠠᠨ ᠴᠢᠨᠡᠬᠡᠨ ᠪᠤᠯᠤᠭᠠᠳ ᠴᠤᠬᠤᠮ ᠰᠦᠷᠲᠡᠢ ᠬᠠᠷᠠᠬ᠍ᠳᠠᠳᠠᠭ ᠪᠠᠢᠬ᠍ᠰᠠᠨ᠃ ᠲᠠᠮᠠᠬᠢ ᠲᠠᠳᠠᠳᠠᠭ ᠪᠤᠯᠬᠤᠷ ᠱᠢᠳᠦ᠍ᠨᠢ ᠱᠢᠷᠠᠪᠲᠦᠷ᠃ ᠪᠢ ᠮᠤᠩᠭᠤᠯ ᠬᠡᠯᠡᠨᠤ ᠬᠢᠴᠢᠶᠡᠯᠤᠨ ᠲᠦᠯᠦᠭᠡᠯᠡᠭ᠌ᠴᠢ ᠪᠤᠯᠬᠤᠷ ᠲᠠᠰᠭᠠᠯ ᠵᠦᠭᠡᠭᠡᠵᠦ᠍᠂ ᠪᠠᠭ᠍ᠰᠢᠶ᠋ᠢᠨ ᠠᠯᠪᠠᠨ ᠭᠡᠷᠲᠤ ᠪᠠᠢᠩᠭᠤ ᠤᠴᠢᠳᠠᠭ᠃ ᠵᠠᠪᠰᠠᠷᠯᠠᠭᠠᠶᠢᠨ ᠲᠠᠮᠢᠷᠤᠨ ᠴᠠᠭᠲᠤ ᠬᠠᠷᠭᠤᠪᠠᠯ ᠪᠠᠭᠰᠢ ᠨᠠᠮᠠᠶ᠋ᠢ ᠬᠤᠷᠱᠢᠶᠠᠨᠳᠤ ᠵᠠᠷᠤᠵᠦ᠍ ᠲᠠᠮᠠᠬᠢ ᠠᠪᠴᠢᠷᠠᠭᠤᠯᠳᠠᠭ᠃ 《ᠮᠦᠸᠧ ᠵᠢᠤᠢ》 ᠭᠡᠳᠡᠭ ᠲᠠᠮᠠᠬᠢ᠂ ᠪᠠᠷᠤᠭ ᠲᠠᠪᠢ ᠵᠢᠷᠠᠨ ᠮᠦᠩᠬᠦ᠌ᠶ᠋ᠢᠨᠬᠢ᠃
ᠬᠤᠷᠱᠢᠶᠠᠨᠳᠤ ᠬᠦᠶᠦᠳᠡᠭ ᠦᠭᠡᠢ ᠵᠠᠪᠰᠠᠷᠯᠠᠭᠠᠶᠢᠨ ᠲᠠᠮᠢᠷᠲᠤ ᠪᠤᠯ ᠪᠢ ᠪᠦᠬᠦ᠌ ᠰᠤᠷᠤᠬ᠍ᠴᠢᠶ᠋ᠢᠨ ᠡᠮᠦᠨᠡ ᠭᠠᠷᠴᠦ᠍ ᠵᠤᠬ᠍ᠰᠤᠭᠠᠳ ᠲᠠᠮᠢᠷ ᠲᠠᠭᠠᠭᠤᠯᠤᠨ ᠬᠢᠳᠡᠭ᠃ ᠡᠬᠦᠨᠢ ᠮᠦᠨ ᠴᠧᠩ ᠪᠠᠭ᠍ᠰᠢ᠂ ᠲᠠᠮᠢᠷᠤᠨ ᠪᠠᠭ᠍ᠰᠢᠳᠤ ᠬᠡᠯᠡᠵᠦ᠍ ᠪᠠᠢᠭᠠᠳ ᠲᠤᠬᠢᠷᠠᠭᠤᠯᠤᠬ᠍ᠰᠠᠨ ᠶᠤᠮ᠃ ᠪᠢ ᠪᠦᠬᠦ᠌ ᠬᠦᠴᠦ᠍ᠪᠠᠨ ᠱᠢᠪᠬᠠᠵᠦ᠍᠂ ᠵᠠᠪᠰᠠᠷᠯᠠᠭᠠᠶᠢᠨ ᠲᠠᠮᠢᠷᠢ ᠲᠦᠷᠢᠮᠵᠢᠬᠦᠨ ᠰᠠᠢᠬᠠᠨ ᠬᠢᠳᠡᠭ᠃ ᠪᠦᠬᠦᠳᠡᠶ᠋ᠢᠨ ᠡᠮᠦᠨᠡ ᠲᠠᠭᠠᠭᠤᠯᠤᠬ᠍ᠴᠢ ᠪᠤᠯᠤᠨᠠ ᠭᠡᠳᠡᠭ ᠬᠡᠴᠢᠨᠡᠨ ᠵᠢᠷᠭᠠᠯᠲᠠᠢ ᠠᠵᠦ᠍ ᠪᠤᠢ ᠳ᠋ᠠ᠃ ᠮᠤᠩᠭᠤᠯ ᠬᠡᠯᠡᠨᠤ ᠬᠢᠴᠢᠶᠡᠯ ᠲᠡᠭᠡᠷᠡ ᠬᠡᠨ ᠬᠢᠴᠢᠶᠡᠯ ᠤᠩᠱᠢᠬᠤ ᠪᠤᠢ？ ᠬᠡᠨ ᠦᠬᠦᠯᠡᠪᠦᠷᠢ ᠵᠤᠬᠢᠶᠠᠬᠤ ᠪᠤᠢ？ ᠭᠡᠭ᠌ᠰᠡᠭᠡᠷ ᠪᠢ ᠬᠠᠮᠤᠭᠤᠨ ᠲᠦᠷᠦᠬᠦᠨᠳᠤ ᠬᠠᠮᠤᠭᠤᠨ ᠦᠨᠳᠦᠷ ᠬᠢᠷᠢᠪᠠᠷ ᠭᠠᠷ ᠡᠷᠬᠦᠳᠡᠭ᠃ ᠪᠢ ᠤᠳᠤᠢ ᠵᠢᠭᠠᠬᠠᠨ ᠪᠡᠶᠡᠲᠠᠢ ᠪᠤᠯᠬᠤᠷ ᠤᠯᠵᠦ᠍ ᠬᠠᠷᠠᠬᠤ ᠦᠭᠡᠢᠠᠴᠠᠨᠢ ᠠᠶᠤᠭᠠᠳ ᠲᠡᠭᠡᠳᠡᠭ ᠪᠢᠵᠠ᠃ 《ᠵᠠ᠂ ᠪᠠᠢ ᠯᠦᠩ ᠶᠡᠭᠡ ᠰᠠᠢᠬᠠᠨ ᠤᠩᠱᠢᠯᠠ》᠂ 《ᠡᠨᠡ ᠦᠬᠦᠯᠡᠪᠦᠷᠢᠶ᠋ᠢ ᠮᠠᠰᠢ ᠭᠤᠢᠳᠠ ᠰᠠᠢᠬᠠᠨ ᠵᠤᠬᠢᠶᠠᠵᠠᠢ》 ᠭᠡᠪᠡᠯ ᠴᠤᠬᠤᠮ ᠪᠠᠯ ᠪᠤᠷᠠᠮ ᠬᠦᠯᠬᠦᠭ᠌ᠰᠡᠨᠠᠴᠠ ᠠᠮᠲᠠᠲᠠᠢ᠃ ᠨᠢᠭᠡ ᠡᠳᠦᠷ ᠮᠢᠨᠤ ᠪᠢᠴᠢᠭ᠌ᠰᠡᠨ 《ᠪᠠᠷᠠᠭᠠ ᠬᠤᠳᠠᠯᠳᠦᠬ᠍ᠴᠢ》 ᠭᠡᠳᠡᠭ ᠵᠤᠬᠢᠶᠠᠯᠢ ᠴᠧᠩ ᠪᠠᠭ᠍ᠰᠢ ᠤᠯᠠᠨᠤ ᠡᠮᠦᠨᠡ ᠤᠩᠱᠢᠵᠦ᠍ ᠦᠭᠴᠡᠢ᠃ ᠮᠢᠨᠤ ᠴᠢᠷᠠᠢ ᠤᠪ ᠤᠯᠠᠭᠠᠨ ᠪᠠᠢᠬ᠍ᠰᠠᠨᠠᠴᠠᠪᠠᠨ ᠪᠠᠭ᠍ᠠᠨ ᠴᠠᠢᠵᠦ᠍᠂ ᠡᠴᠦᠰᠲᠡᠭᠡᠨ ᠪᠤᠷᠤᠪᠳᠦᠷ ᠦᠩᠭᠡᠲᠠᠢ ᠪᠤᠯᠤᠭᠠᠳ ᠵᠤᠬ᠍ᠰᠤᠬ᠍ᠰᠠᠨ ᠪᠠᠢᠭᠠ ᠶᠤᠮ᠃ ᠵᠢᠷᠦᠬᠡ ᠪᠤᠯᠬᠢᠯᠠᠨ ᠲᠦᠭ᠌ᠰᠢᠵᠦ᠍᠂ ᠲᠤᠭᠤᠵᠦ᠍ ᠪᠠᠢᠬ᠍ᠰᠠᠨ ᠲᠡᠷᠡ ᠨᠢᠭᠡ ᠦᠬᠢᠨᠢᠪᠠᠨ ᠱᠢᠷᠪᠢᠮᠡᠷ ᠱᠢᠷᠪᠢᠮᠡᠷ ᠰᠠᠨᠠᠬ᠍ᠳᠠᠭᠠᠳ ᠪᠤᠯᠳᠠᠭ ᠦᠭᠡᠢ᠂ ᠪᠦᠵᠦᠩ ᠲᠠᠤᠯᠠᠢ ᠡᠪᠦᠷᠯᠡᠭ᠌ᠰᠡᠨ ᠱᠢᠭ᠂ ᠵᠦᠷᠵᠢᠶ᠋ᠢᠨ ᠱᠢᠬᠢᠷ ᠡᠮᠬᠦᠭ᠌ᠰᠡᠨ ᠮᠡᠲᠦ᠍᠃ ᠴᠧᠩ ᠪᠠᠭ᠍ᠰᠢ ᠴᠤᠬᠤᠯᠲᠠᠪᠠᠨ ᠤᠩᠱᠢᠵᠦ᠍ ᠲᠠᠭᠤᠰᠤᠬ᠍ᠰᠠᠨ ᠪᠠᠢᠳᠠᠯᠠ ᠮᠢᠨᠤ ᠴᠢᠬᠢ ᠱᠤᠤᠭᠢᠭᠠᠳ ᠪᠠᠢᠮᠠᠷ ᠰᠠᠨᠠᠬ᠍ᠳᠠᠬ᠍ᠰᠠᠨ ᠶᠤᠮ᠂ ᠬᠠᠮᠲᠦ ᠨᠦᠬᠦᠳᠤᠨ ᠠᠯᠠᠭᠠ ᠲᠠᠱᠢᠯᠲᠠ᠂ ᠬᠠᠮᠠᠷᠢ ᠬᠠᠪᠴᠢᠭᠤᠯᠤᠭᠠᠳ ᠰᠤᠪᠤᠳᠤᠨ ᠬᠡᠯᠬᠢᠶᠡ ᠲᠠᠰᠤᠷᠠᠭᠤᠯᠵᠠᠢ᠃ ᠪᠠᠭ᠍ᠰᠢᠶ᠋ᠢᠨ ᠴᠤᠬᠤᠯᠲᠠ ᠲᠤᠳᠤᠷᠠᠠᠴᠠ 《ᠠᠮᠢᠳᠤᠷᠠᠯᠤᠨ ᠦᠨᠡᠨᠠᠴᠠ ᠤᠷᠠᠯᠢᠭᠤᠨ ᠦᠨᠡᠨ ᠢᠷᠡᠨᠡ》 ᠭᠡᠳᠡᠭ ᠦᠭᠡᠶ᠋ᠢ ᠪᠢ ᠲᠠᠰᠤ ᠴᠡᠬᠡᠵᠢᠯᠡᠵᠠᠢ᠃ ᠮᠢᠨᠤ ᠨᠠᠰᠦᠪᠠᠷᠢᠶᠠᠨ ᠪᠠᠷᠢᠮᠳᠠᠯᠠᠵᠦ᠍ ᠢᠷᠡᠭ᠌ᠰᠡᠨ ᠵᠤᠬᠢᠶᠠᠨ ᠪᠦᠳᠦᠭᠡᠯᠭᠡᠶ᠋ᠢᠨ ᠬᠡᠪ ᠨᠠᠮᠪᠠ ᠴᠤ᠌ ᠡᠨᠡ ᠬᠦ᠌ ᠦᠭᠡᠨᠠᠴᠠ ᠡᠱᠢᠲᠠᠢ ᠪᠢᠯᠡ᠃
ᠴᠧᠩ ᠪᠠᠭ᠍ᠰᠢ ᠬᠡᠯᠡᠨ ᠵᠦᠢᠶ᠋ᠢ ᠮᠠᠰᠢ ᠴᠢᠬᠤᠯᠠᠴᠢᠯᠠᠳᠠᠭ ᠪᠠᠢᠯᠠ᠃ 《ᠡᠭᠡᠱᠢᠭ ᠵᠤᠬᠢᠴᠠᠬᠤ ᠶᠤᠰᠤ》᠂ 《ᠭᠡᠢᠬᠦᠯᠦᠭ᠌ᠴᠢ ᠵᠤᠬᠢᠴᠠᠬᠤ ᠶᠤᠰᠤ》᠂ 《ᠬᠤᠯᠪᠤᠬᠤ ᠡᠭᠡᠱᠢᠭᠤᠨ ᠲᠦᠷᠢᠮ》 ᠁ ᠭᠡᠳ ᠲᠤᠰᠭᠠᠢᠯᠠᠨ ᠬᠡᠯᠡᠨ ᠵᠦᠢᠶ᠋ᠢᠨ ᠬᠢᠴᠢᠶᠡᠯᠤᠨ ᠴᠠᠭ ᠭᠠᠷᠭᠠᠵᠦ᠍ ᠪᠠᠢᠭᠠᠳ ᠮᠠᠰᠢ ᠨᠠᠷᠢᠯᠢᠭ᠂ ᠴᠢᠩᠭᠠ ᠤᠪᠤᠷᠢᠶᠠᠷ ᠵᠢᠭᠠᠳᠠᠭ᠃ ᠬᠢᠴᠢᠶᠡᠯᠤᠨ ᠪᠢᠴᠢᠭ᠂ ᠬᠡᠯᠡᠨ ᠵᠦᠢ᠂ ᠵᠤᠬᠢᠶᠠᠨ ᠪᠢᠴᠢᠯᠭᠡ ᠭᠡᠵᠦ᠍ ᠭᠤᠷᠪᠠᠨ ᠰᠠᠯᠪᠤᠷᠢᠪᠠᠷ ᠰᠠᠯᠭᠠᠨ ᠵᠢᠭᠠᠳᠠᠭ ᠪᠠᠢᠬ᠍ᠰᠠᠨ᠃ ᠬᠡᠷᠪᠡ ᠬᠡᠳᠦ ᠤᠳᠠᠭᠠ ᠭᠡᠯᠡᠵᠦ᠍ ᠦᠭ᠌ᠭᠦᠭ᠌ᠰᠡᠨ ᠪᠠᠢᠳᠠᠯᠠ ᠤᠢᠯᠠᠭᠠᠵᠦ᠍ ᠴᠡᠭᠡᠵᠢᠯᠡᠬᠦ᠌ ᠦᠭᠡᠢ᠂ ᠪᠤᠷᠤᠭᠤ ᠦᠰᠦᠭ ᠪᠢᠴᠢᠭᠡᠳ ᠪᠠᠢᠪᠠᠯ᠂ ᠲᠠᠰᠭᠠᠯᠢ ᠴᠢᠨᠢ ᠪᠦᠬᠦᠳᠡᠶ᠋ᠢᠨ ᠡᠮᠦᠨᠡ ᠲᠡᠯᠭᠡᠵᠦ᠍ ᠪᠠᠢᠭᠠᠳ ᠮᠠᠰᠢ ᠴᠢᠩᠭᠠ ᠱᠢᠷᠦᠬᠦᠨ ᠱᠢᠬᠦᠮᠵᠢᠯᠡᠳᠡᠭ᠃ ᠴᠢᠩᠭᠠ ᠪᠠᠭ᠍ᠰᠢᠠᠴᠠ ᠱᠢᠯᠢᠳᠡᠭ ᠰᠤᠷᠤᠬ᠍ᠴᠢ ᠭᠠᠷᠤᠨᠠ ᠭᠡᠳᠡᠭ ᠨᠡᠬᠡᠷᠡᠨ ᠶᠤᠰᠤᠲᠠᠢ ᠦᠭᠡ᠃ ᠴᠧᠩ ᠪᠠᠭ᠍ᠰᠢ ᠬᠡᠯᠡᠨ ᠵᠦᠢᠶ᠋ᠢ ᠢᠩᠬᠢᠵᠦ᠍ ᠴᠢᠩᠭᠠ ᠲᠦᠷᠢᠮᠵᠢᠬᠦᠨ ᠵᠢᠭᠠᠬ᠍ᠰᠠᠨᠠᠴᠠ᠂ ᠮᠠᠨᠤ ᠬᠠᠮᠲᠦ ᠰᠤᠷᠤᠬ᠍ᠴᠢ ᠨᠠᠷ ᠪᠠᠷᠤᠭ ᠪᠤᠷᠤᠭᠤ ᠦᠰᠦᠭ ᠪᠢᠴᠢᠳᠡᠭ ᠦᠭᠡᠢ᠃
ᠭᠠᠭ᠍ᠴᠠᠬᠠᠨ ᠬᠠᠢᠷᠴᠠᠭᠢᠶᠠᠷ ᠲᠠᠮᠠᠬᠢ ᠠᠪᠳᠠᠭ ᠪᠠᠢᠬ᠍ᠰᠠᠨ ᠴᠧᠩ ᠪᠠᠭ᠍ᠰᠢ ᠮᠢᠨᠢ ᠭᠠᠴᠢᠬ᠍ᠳᠠᠵᠦ᠍ ᠲᠦᠪᠡᠭ᠌ᠳᠡᠭ᠌ᠰᠡᠨ ᠰᠤᠷᠤᠬ᠍ᠴᠢᠳᠢᠶᠠᠨ ᠦᠪᠡᠷᠤᠨ ᠬᠡᠤᠭᠡᠳ ᠲᠡᠭᠦᠤᠨᠡᠷ ᠮᠡᠳᠦ ᠡᠨᠡᠷᠢᠨ ᠬᠠᠢᠷᠠᠯᠠᠳᠠᠭ᠃ ᠰᠤᠷᠭᠠᠭᠤᠯᠢᠶ᠋ᠢᠨ ᠪᠠᠢᠷᠢᠳᠤ ᠰᠠᠭᠤᠳᠠᠭ ᠰᠤᠷᠤᠬ᠍ᠴᠢᠳ ᠬᠤᠭᠤᠯᠠᠨ ᠵᠤᠭᠤᠰᠢᠶᠠᠨ ᠲᠤᠱᠢᠶᠠᠵᠦ᠍ ᠲᠡᠢᠯᠬᠦ᠌ ᠦᠭᠡᠢ ᠪᠤᠯ ᠴᠧᠩ ᠪᠠᠭ᠍ᠰᠢ ᠤᠷᠤᠯᠠᠨ ᠲᠤᠱᠢᠶᠠᠵᠦ᠍ ᠦᠭ᠌ᠳᠡᠭ᠃ ᠦᠪᠡᠷᠤᠨ ᠭᠡᠷᠠᠴᠠᠪᠠᠨ ᠬᠤᠷᠢ ᠭᠤᠴᠢᠨ ᠵᠢᠩ ᠡᠷᠳᠡᠨᠢ ᠱᠢᠰᠢᠶᠢ ᠲᠤᠭᠤᠢᠳᠠᠭᠠᠨ ᠠᠴᠢᠵᠦ᠍ ᠢᠷᠡᠭᠡᠳ ᠬᠤᠭᠤᠯᠠᠨ ᠭᠡᠷᠲᠤ ᠰᠤᠷᠤᠬ᠍ᠴᠢᠪᠠᠨ ᠤᠷᠤᠯᠠᠨ ᠲᠤᠱᠢᠶᠠᠳᠠᠭ ᠴᠤ᠌ ᠪᠠᠢᠯᠠ᠃ ᠰᠤᠷᠤᠬ᠍ᠴᠢᠳᠤᠨᠢᠶᠠᠨ ᠲᠠᠪᠠᠭᠤᠯᠢᠭ ᠲᠠᠯᠠᠶ᠋ᠢ ᠤᠢᠯᠠᠭᠠᠨ ᠮᠡᠳᠡᠵᠦ᠍᠂ ᠪᠠᠢᠩᠭᠤ ᠤᠷᠮᠠᠱᠢᠭᠤᠯᠤᠨ ᠬᠦᠬᠢᠬᠦᠯᠳᠡᠭ᠃ ᠮᠠᠨᠤ ᠠᠩᠬᠢᠶ᠋ᠢᠨ ᠵᠢᠨᠪᠤᠤ ᠲᠷᠠᠺᠲ᠋ᠤᠷ ᠵᠢᠯᠤᠭᠤᠳᠴᠦ᠍ ᠴᠢᠳᠠᠳᠠᠭᠢ ᠮᠡᠳᠡᠭᠡᠳ᠂ ᠰᠤᠷᠭᠠᠭᠤᠯᠢᠶ᠋ᠢᠨ ᠲᠠᠷᠢᠶᠠ ᠲᠠᠩᠨᠠᠬᠤ ᠪᠤᠯᠬᠤᠳᠤ ᠵᠢᠨᠪᠤᠤᠪᠠᠷ ᠵᠢᠯᠤᠭᠤᠳᠤᠭᠤᠯᠵᠦ᠍ ᠦᠵᠡᠪᠡ᠃ ᠲᠡᠷᠡ ᠵᠢᠨᠪᠤᠤ ᠤᠳᠤ ᠮᠠᠱᠢᠨ ᠬᠤᠳᠠᠯᠳᠦᠵᠦ᠍ ᠵᠠᠰᠠᠳᠠᠭ ᠪᠤᠵᠠᠭᠠᠢ ᠺᠤᠮᠫᠠᠨᠢᠶ᠋ᠢᠨ ᠵᠠᠬᠢᠷᠤᠯ ᠪᠤᠯᠤᠭᠠᠳ ᠭᠠᠴᠠᠭᠠᠨᠠᠴᠠᠨᠢ ᠭᠠᠷᠤᠬ᠍ᠰᠠᠨ ᠤᠶᠤᠳᠠᠨᠳᠤ ᠬᠡᠳᠦᠢ ᠬᠡᠳᠦᠢ ᠵᠤᠭᠤᠰ ᠲᠤᠰᠠᠯᠠᠯᠠ ᠭᠡᠵᠦ᠍ ᠠᠯᠳᠠᠷᠱᠢᠵᠦ᠍ ᠶᠠᠪᠤᠭᠠ ᠶᠤᠮ᠃
ᠪᠢ ᠲᠤᠭᠠᠨᠤ ᠤᠬᠠᠭᠠᠨ᠂ ᠹᠢᠽᠢᠺ ᠬᠤᠶᠠᠷ ᠲᠦᠷᠦᠯᠤᠨ ᠬᠢᠴᠢᠶᠡᠯᠳᠡᠭᠡᠨ ᠠᠨᠠᠢ ᠪᠠᠢᠬ᠍ᠰᠠᠨᠢᠶᠠᠷ ᠬᠤᠶᠠᠷ ᠵᠢᠯ ᠲᠠᠪᠳᠠᠵᠦ᠍ ᠪᠠᠢᠮᠠᠨ ᠰᠠᠶᠢ ᠦᠨᠳᠦᠷ ᠲᠤᠮᠳᠠᠳᠦ᠍ᠳᠤ ᠱᠢᠯᠭᠠᠵᠦ᠍ ᠤᠷᠤᠬ᠍ᠰᠠᠨ ᠶᠤᠮ᠃ ᠲᠠᠪᠳᠠᠵᠦ᠍ ᠪᠠᠢᠬᠤ ᠬᠤᠭᠤᠴᠠᠭᠠᠨᠳᠤ᠂ ᠨᠢᠭᠡ ᠤᠳᠠᠭᠠ ᠰᠤᠷᠭᠠᠭᠤᠯᠢᠶ᠋ᠢᠨ ᠬᠠᠨᠠᠶ᠋ᠢᠨ ᠰᠤᠨᠢᠨ ᠭᠠᠷᠭᠠᠬᠤ ᠪᠤᠯᠬᠤᠳᠤ ᠴᠧᠩ ᠪᠠᠭ᠍ᠰᠢ ᠨᠠᠮᠠᠶ᠋ᠢ ᠲᠠᠭᠤᠳᠠᠵᠦ᠍᠂ 《ᠮᠢᠨᠤ ᠬᠦᠰᠡᠯᠡᠩ》 ᠭᠡᠳᠡᠭ ᠱᠢᠯᠦᠭ ᠪᠢᠴᠢᠬᠦᠯᠵᠦ᠍᠂ ᠨᠠᠷᠢᠨ ᠰᠠᠢᠬᠠᠨ ᠵᠠᠰᠠᠵᠦ᠍ ᠪᠠᠢᠭᠠᠳ ᠰᠤᠷᠭᠠᠭᠤᠯᠢᠶ᠋ᠢᠨ ᠬᠠᠨᠠᠶ᠋ᠢᠨ ᠰᠤᠨᠢᠨᠳᠤ ᠨᠡᠢᠳᠡᠯᠡᠪᠡ᠃ ᠠᠷᠤᠳᠤᠨᠢ ᠲᠠᠭᠠᠭᠤᠯᠤᠬ᠍ᠰᠠᠨ ᠴᠤᠬᠤᠯᠲᠠ ᠲᠤᠳᠤᠷᠠᠪᠠᠨ 《᠁ ᠪᠠᠢ ᠯᠦᠩᠤᠨ ᠵᠤᠬᠢᠶᠠᠨ ᠪᠢᠴᠢᠯᠭᠡ᠂ ᠴᠢᠨᠠᠬ᠍ᠰᠢᠯᠠᠨ ᠮᠤᠩᠭᠤᠯ ᠬᠡᠯᠡᠨᠤ ᠬᠢᠷᠢ ᠬᠡᠮᠵᠢᠶᠡᠨᠢ ᠨᠢᠭᠡᠨᠳᠡ ᠠᠩᠬᠠ ᠲᠤᠮᠳᠠᠳᠦ᠍ᠶ᠋ᠢᠨ ᠬᠡᠪᠴᠢᠶᠡᠠᠴᠠ ᠬᠤᠯᠠ ᠲᠠᠪᠠᠭ᠍ᠰᠠᠨ ᠁》 ᠭᠡᠵᠦ᠍ ᠵᠤᠷᠢᠬ᠍ᠵᠢᠭᠤᠯᠵᠠᠢ᠃ ᠡᠢᠮᠤ ᠰᠠᠢᠨ ᠪᠠᠭ᠍ᠰᠢ ᠪᠠᠢᠬ᠍ᠰᠠᠨᠠᠴᠠ ᠪᠢ ᠠᠷᠪᠠᠨ ᠬᠡᠳᠦᠨ ᠵᠢᠯ ᠮᠤᠩᠭᠤᠯ ᠭᠡᠯᠡᠨᠤ ᠬᠢᠴᠢᠶᠡᠯᠤᠨ ᠲᠦᠯᠦᠭᠡᠯᠡᠭ᠌ᠴᠢ ᠶᠠᠪᠤᠵᠦ᠍᠂ ᠲᠤᠭᠠ᠂ ᠹᠢᠽᠢᠺᠤᠨ ᠬᠢᠴᠢᠶᠡᠯ ᠲᠡᠭᠡᠷᠡ ᠨᠢᠭᠤᠵᠦ᠍ ᠪᠠᠢᠭᠠᠳ ᠤᠯᠠᠨ ᠨᠤᠮ ᠤᠩᠱᠢᠵᠦ᠍᠂ ᠦᠪᠦᠷ ᠮᠤᠩᠭᠤᠯᠤᠨ ᠪᠠᠭ᠍ᠰᠢᠶ᠋ᠢᠨ ᠶᠡᠭᠡ ᠰᠤᠷᠭᠠᠭᠤᠯᠢᠶ᠋ᠢᠨ ᠮᠤᠩᠭᠤᠯ ᠬᠡᠯᠡᠨᠤ ᠰᠠᠯᠪᠤᠷᠢᠳᠤ ᠱᠢᠯᠭᠠᠨ ᠤᠷᠤᠵᠦ᠍᠂ ᠮᠤᠩᠭᠤᠯ ᠬᠡᠯᠡᠨᠤ ᠪᠠᠭ᠍ᠰᠢᠪᠠᠷ ᠠᠷᠪᠠᠨ ᠬᠤᠶᠠᠷ ᠵᠢᠯ ᠠᠵᠢᠯᠯᠠᠵᠦ᠍᠂ ᠤᠳᠭᠠ ᠤᠷᠠᠯᠢᠭᠤᠨ ᠬᠤᠯᠪᠤᠭᠠᠨᠳᠤ ᠮᠤᠩᠭᠤᠯ ᠰᠡᠳᠭᠦᠯ ᠵᠢᠷᠭᠤᠭᠠᠨ ᠵᠢᠯ ᠨᠠᠢᠷᠠᠭᠤᠯᠵᠦ᠍᠂ ᠮᠤᠩᠭᠤᠯᠢᠶᠠᠷᠢᠶᠠᠨ ᠶᠢᠰᠦᠨ ᠨᠤᠮ ᠪᠢᠴᠢᠵᠦ᠍᠂ ᠵᠢᠷᠭᠤᠭᠠᠨ ᠨᠤᠮ ᠤᠷᠴᠢᠭᠤᠯᠵᠦ᠍᠂ ᠬᠤᠶᠠᠷ ᠨᠤᠮ ᠭᠤᠤᠯᠯᠠᠨ ᠨᠠᠢᠷᠠᠭᠤᠯᠵᠠᠢ᠃
ᠪᠢ ᠶᠡᠭᠡ ᠰᠤᠷᠭᠠᠭᠤᠯᠢᠪᠠᠨ ᠲᠡᠬᠦᠰᠦᠭᠡᠳ ᠬᠠᠷᠢ ᠬᠤᠱᠢᠭᠤᠨᠳᠤ ᠪᠠᠭ᠍ᠰᠢᠶ᠋ᠢᠨ ᠠᠯᠪᠠ ᠠᠪᠴᠤ᠌᠂ ᠮᠤᠩᠭᠤᠯ ᠬᠡᠯᠡ ᠵᠢᠭᠠᠵᠦ ᠪᠠᠢᠬᠤᠳᠠᠭᠠᠨ ᠨᠢᠭᠡ ᠤᠳᠠᠭᠠ ᠴᠧᠩ ᠪᠠᠭ᠍ᠰᠢᠶ᠋ᠢᠨ ᠤᠳᠠᠰᠦᠶ᠋ᠢ ᠲᠤᠰᠤᠬ᠍ᠰᠠᠨ ᠪᠢᠯᠡ᠃ ᠪᠠᠭ᠍ᠰᠢᠶ᠋ᠢᠨ ᠪᠠᠭᠠ ᠬᠦᠤ ᠪᠠᠶᠠᠰᠤᠯᠨᠢ ᠦᠨᠳᠦᠷ ᠲᠤᠮᠳᠠᠳᠦ᠍ᠪᠠᠨ ᠲᠡᠬᠦᠰᠦᠭᠡᠳ ᠶᠡᠭᠡ ᠰᠤᠷᠭᠠᠭᠤᠯᠢᠳᠤ ᠱᠢᠯᠭᠠᠨ ᠤᠷᠤᠵᠦ᠍ ᠲᠡᠢᠯᠦᠭ᠌ᠰᠡᠨ ᠦᠭᠡᠢ ᠪᠤᠯᠬᠤᠷ ᠮᠠᠨᠤ ᠰᠤᠷᠭᠠᠭᠤᠯᠢ ᠳ᠋ᠦ ᠲᠠᠪᠳᠠᠨ ᠦᠵᠡᠬᠦ᠌ ᠰᠠᠨᠠᠭᠠᠲᠠᠢ ᠨᠠᠮᠠᠶ᠋ᠢ ᠡᠷᠢᠭ᠌ᠰᠡᠨ ᠪᠠᠢᠵᠠᠢ᠃ ᠪᠢ ᠲᠡᠷᠡ ᠲᠤᠤᠷᠠᠨᠢ ᠵᠠᠬᠢᠷᠤᠯ ᠶ᠋ᠢᠡᠨ ᠤᠴᠢᠵᠦ᠍ ᠡᠷᠢᠭᠰᠡᠨᠳᠤ᠄ 《ᠮᠠᠨᠤ ᠰᠤᠷᠤᠬ᠍ᠴᠢ ᠲᠤᠳᠠᠵᠦ᠍ ᠪᠠᠢᠬᠤᠳᠤ ᠴᠢ ᠮᠡᠳᠡᠬᠦ᠌ ᠦᠭᠡᠢ ᠶᠤᠮ ᠤᠤ？ ᠪᠠᠭ᠍ᠰᠢᠲᠠᠢᠪᠠᠨ ᠰᠠᠢᠬᠠᠨ ᠬᠡᠯᠡᠯᠴᠡ᠂ ᠬᠡᠳᠦᠢ ᠠᠷᠪᠢᠨ ᠢᠷᠡᠪᠡᠯ ᠲᠡᠳᠦᠢ ᠰᠠᠢᠨ》 ᠭᠡᠪᠡ᠃ ᠲᠡᠭᠡᠭᠡᠳ ᠲᠡᠷᠡ ᠵᠢᠯᠨᠢ ᠮᠢᠨᠤ ᠲᠦᠷᠦᠭ᠌ᠰᠡᠨ ᠨᠤᠳᠤᠭ ᠪᠠᠵᠢᠯᠠᠭᠠᠠᠴᠠ ᠲᠤᠯᠤᠭᠠᠨ ᠰᠤᠷᠤᠬ᠍ᠴᠢ ᠢᠨᠳᠡᠷ ᠬᠤᠶᠠᠳᠤᠭᠠᠷ ᠲᠤᠮᠳᠠᠳᠦ ᠰᠤᠷᠭᠠᠭᠤᠯᠢᠳᠤ ᠲᠠᠪᠳᠠᠵᠦ᠍ ᠦᠵᠡᠭᠡᠳ᠂ ᠲᠤᠯᠤᠭᠤᠯᠠᠪᠠᠨ ᠪᠦᠷ ᠶᠡᠭᠡ ᠰᠤᠷᠭᠠᠭᠤᠯᠢᠶ᠋ᠢᠨ ᠵᠢᠩᠬᠢᠨᠢ ᠠᠩᠬᠢᠳᠤ ᠱᠢᠯᠭᠠᠨ ᠤᠷᠤᠪᠠ᠃ ᠪᠢ ᠦᠪᠡᠷᠤᠨ ᠲᠦᠷᠦᠭ᠌ᠰᠡᠨ ᠨᠤᠲᠤᠭᠲᠠᠭᠠᠨ ᠬᠢᠭ᠌ᠰᠡᠨ ᠬᠠᠮᠤᠭ ᠤᠮᠤᠬ᠍ᠰᠢᠯᠲᠠᠢ ᠤᠴᠢᠷᠤᠨ ᠨᠢᠭᠡᠨᠢ ᠡᠨᠡ ᠪᠢᠯᠡ᠃ ᠶᠠᠭ ᠲᠡᠷᠡ ᠵᠤᠨᠨᠢ ᠪᠢ ᠠᠷᠤ ᠭᠡᠷᠲᠡᠭᠡᠨ ᠬᠠᠷᠢᠭᠠᠳ ᠴᠧᠩ ᠪᠠᠭ᠍ᠰᠢᠲᠠᠢᠪᠠᠨ ᠠᠱᠢᠲᠠᠢ ᠰᠠᠢᠬᠠᠨ ᠠᠭᠤᠯᠵᠠᠪᠠ᠃ ᠪᠢ ᠬᠠᠱᠢᠶᠠᠨᠳᠠᠭᠠᠨ ᠠᠵᠢᠯ ᠬᠢᠵᠦ᠍ ᠪᠠᠢᠬᠤᠳᠤ ᠴᠧᠩ ᠪᠠᠭ᠍ᠰᠢ ᠬᠦᠷᠢᠶᠡᠨᠠᠴᠠᠪᠠᠨ ᠤᠯᠵᠦ᠍ ᠦᠵᠡᠭᠡᠳ ᠨᠠᠮᠠᠶ᠋ᠢ ᠲᠠᠯᠠᠯᠤᠨ ᠲᠠᠭᠤᠳᠠᠪᠠ᠃ ᠬᠡᠷᠡᠮ ᠦᠰᠦᠷᠦᠭᠡᠳ ᠲᠠᠯᠪᠢᠭᠠᠳ ᠤᠴᠢᠬ᠍ᠰᠠᠨ ᠴᠢᠨᠢ ᠪᠠᠭ᠍ᠰᠢ ᠡᠵᠢ ᠲᠦᠷᠬᠦᠮᠳᠡᠭᠡᠨ ᠶᠠᠪᠤᠬ᠍ᠰᠠᠨ ᠪᠠᠢᠵᠦ᠍᠂ ᠴᠧᠩ ᠪᠠᠭ᠍ᠰᠢ ᠭᠡᠷᠲᠡᠭᠡᠨ ᠭᠠᠭ᠍ᠴᠠᠭᠠᠷ ᠪᠠᠢᠬ᠍ᠰᠠᠨ ᠠᠵᠢ᠃ ᠴᠧᠩ ᠪᠠᠭ᠍ᠰᠢ᠄ 《ᠬᠦᠢ᠂ ᠪᠠᠢ ᠯᠦᠩ ᠡ᠂ ᠴᠢᠨᠤ ᠰᠠᠢᠨᠢᠶᠠᠷ ᠮᠢᠨᠤ ᠪᠠᠶᠠᠰᠦᠯ ᠪᠠᠰᠠ ᠶᠡᠭᠡ ᠰᠤᠷᠭᠠᠭᠤᠯᠢᠶ᠋ᠢᠨ ᠵᠢᠩᠬᠢᠨᠢ ᠠᠩᠬᠢᠳᠤ ᠤᠷᠤᠴᠢᠬᠠᠯᠠ᠂ ᠪᠠᠭ᠍ᠰᠢᠨᠢ ᠴᠢᠮᠠᠶ᠋ᠢ ᠬᠤᠭᠤᠯᠠᠨ ᠭᠡᠷᠲᠤ ᠵᠠᠯᠠᠬᠤᠳᠠᠭᠠᠨ ᠲᠠᠭᠠᠷᠠᠨᠠ᠂ ᠭᠡᠶᠡ᠂ ᠭᠡᠷᠲᠤ ᠮᠢᠬᠠ ᠨᠤᠭᠤᠭᠠ ᠪᠦᠷ ᠪᠡᠯᠡᠨ ᠪᠠᠢᠬᠤ ᠶᠤᠮ ᠴᠢᠨᠢ ᠬᠤᠶᠠᠭᠤᠯᠠᠭᠡᠷᠲᠤ ᠰᠡᠯᠡᠬᠦᠬᠡᠨ ᠰᠠᠭᠤᠵᠦ᠍ ᠵᠤᠭᠤᠬ᠍ᠳᠠᠴᠢᠬᠠᠶᠠ᠂ ᠪᠤᠯᠬᠤ ᠤᠤ？》 ᠭᠡᠨᠡ᠃ ᠪᠢ ᠪᠠᠰᠠ ᠡᠷᠡᠭᠡᠯᠡᠭᠰᠡᠨ ᠦᠭᠡᠢ᠂ ᠲᠡᠭᠡᠭᠡᠳ ᠠᠩᠬᠢᠶ᠋ᠢᠨ ᠪᠠᠭ᠍ᠰᠢᠲᠠᠢᠪᠠᠨ ᠬᠠᠨᠵᠦᠨ ᠭᠤᠤᠯᠳᠤ ᠱᠢᠷᠡᠭᠡ ᠬᠠᠪᠴᠢᠨ ᠰᠠᠭᠤᠵᠦ᠍ ᠪᠠᠢᠭᠠᠳ ᠠᠱᠢᠬᠦᠢ ᠵᠤᠭᠤᠬ᠍ᠳᠠᠵᠦ᠍᠂ ᠬᠠᠷᠠ ᠠᠷᠢᠬᠢᠠᠴᠠᠨᠢ ᠬᠠᠯᠠᠰᠲᠠᠯᠠ ᠠᠪᠴᠠᠢ᠃ 《ᠠᠢ᠂ ᠲᠡᠷᠡ ᠦᠶᠡᠳᠤ ᠦᠨᠳᠦᠷ ᠲᠤᠮᠳᠠᠳᠦ᠍ᠳᠤ ᠰᠤᠷᠤᠬ᠍ᠴᠢ ᠢᠯᠡᠬᠦᠤ ᠤᠷᠤᠭᠤᠯᠬᠤᠳᠤ ᠰᠤᠷᠭᠠᠭᠤᠯᠢᠠᠴᠠ ᠵᠦᠪᠱᠢᠶᠡᠷᠡᠳᠡᠭ ᠦᠭᠡᠢ᠂ ᠰᠠᠢᠨ ᠰᠤᠷᠤᠬ᠍ᠴᠢᠶ᠋ᠢ ᠵᠠᠪᠠᠯ ᠪᠠᠭ᠍ᠰᠢᠶ᠋ᠢᠨ ᠰᠤᠷᠭᠠᠭᠤᠯᠢᠳᠤ ᠱᠢᠯᠭᠠᠭᠤᠯᠤᠨᠠ᠂ ᠶᠠᠷᠢᠶᠠᠨ ᠦᠭᠡᠢ ᠠᠩᠬᠢᠶ᠋ᠢᠨ ᠪᠠᠭ᠍ᠰᠢ ᠪᠤᠯᠤᠬ᠍ᠰᠠᠨ ᠮᠢᠨᠤ ᠬᠠᠷᠢᠭᠤᠴᠠᠯᠭᠠ ᠪᠠᠰᠠ ᠪᠠᠢᠨᠠ᠃ ᠪᠢ ᠶᠡᠷᠦᠨᠢ ᠠᠮᠢᠨᠠ ᠮᠡᠲᠦ᠍ᠶ᠋ᠢᠨ ᠬᠡᠳᠦᠬᠦᠯᠡᠶ᠋ᠢ ᠪᠦᠷ ᠦᠨᠳᠦᠷ ᠲᠤᠮᠳᠠᠳᠦ᠍ᠳᠤ ᠶᠠᠪᠤᠭᠤᠯᠤᠬ᠍ᠰᠠᠨ ᠪᠤᠯ ᠲᠠᠭᠠᠷᠠᠬᠤ ᠪᠠᠢᠵᠠᠢ᠃ ᠲᠡᠭᠡᠭ᠌ᠰᠡᠨ ᠪᠤᠯ ᠦᠪᠦᠷ ᠮᠤᠩᠭᠤᠯᠤᠨ ᠶᠡᠭᠡ ᠰᠤᠷᠭᠠᠭᠤᠯᠢᠳᠤ ᠴᠤ᠌ ᠪᠠᠲᠤᠲᠠᠢ ᠱᠢᠯᠭᠠᠭᠠᠳ ᠤᠷᠤᠴᠢᠬᠠᠨᠠ ᠱᠢᠤ᠂ ᠡᠨᠡᠬᠦ᠌ ᠤᠴᠢᠷᠲᠤ ᠪᠢ ᠶᠡᠬᠡᠬᠡᠨ ᠭᠡᠮᠱᠢᠳᠡᠭ ᠶᠤᠮ ᠡ᠂ ᠨᠢᠭᠡ ᠰᠠᠢᠨᠨᠢ ᠮᠢᠨᠤ ᠪᠠᠢ ᠯᠦᠩ ᠮᠤᠩᠭᠤᠯ ᠬᠡᠯᠡᠪᠠᠨ ᠰᠠᠢᠨ ᠰᠤᠷᠴᠦ᠍᠂ ᠵᠤᠬᠢᠶᠠᠯᠴᠢ ᠪᠤᠯᠴᠢᠬᠠᠵᠠᠢ᠃ ᠪᠢ ᠮᠠᠰᠢ ᠤᠮᠤᠬ᠍ᠰᠢᠳᠠᠭ ᠱᠢᠤ ᠁》 ᠭᠡᠵᠦ᠍ ᠬᠡᠯᠡᠵᠦ᠍ ᠪᠠᠢᠬ᠍ᠰᠠᠨᠢᠨᠢ ᠴᠡᠭᠡᠵᠢᠯᠡᠵᠦ᠍ ᠪᠠᠢᠨᠠ᠃ ᠲᠡᠮᠡᠢ ᠤᠳᠠᠯ ᠦᠭᠡᠢ ᠮᠢᠨᠤ ᠠᠪᠤ ᠡᠵᠢ ᠪᠦᠷ ᠬᠤᠱᠢᠭᠤᠨ ᠲᠦᠪᠲᠤ ᠨᠡᠬᠦᠵᠦ᠍ ᠶᠠᠪᠤᠬ᠍ᠰᠠᠨᠪᠤᠯᠬᠤᠷ ᠴᠧᠩ ᠪᠠᠭ᠍ᠰᠢᠲᠠᠢ ᠠᠭᠤᠯᠵᠠᠬᠤ ᠲᠤᠬᠢᠶᠠᠯ ᠬᠤᠪᠤᠷ ᠪᠤᠯᠵᠠᠢ᠃
ᠡᠨᠡ ᠵᠢᠯ ᠬᠢᠩᠭᠠᠨ ᠠᠢᠮᠠᠭ ᠪᠤᠷᠤᠭᠠᠨ ᠬᠤᠷᠠ ᠲᠡᠭ᠌ᠰᠢ᠂ ᠵᠢᠯᠤᠨ ᠦᠩᠭᠡ ᠮᠦᠨ ᠰᠠᠢᠨ᠃ ᠪᠢ ᠲᠤᠰᠭᠠᠢᠯᠠᠨ ᠲᠦᠷᠦᠭ᠌ᠰᠡᠨ ᠨᠤᠳᠤᠭ ᠪᠠᠵᠢᠯᠠᠭᠠᠳᠠᠭᠠᠨ ᠬᠠᠷᠢᠵᠦ᠍᠂ ᠠᠩᠬᠠ ᠲᠤᠮᠳᠠᠳᠦ᠍ᠶ᠋ᠢᠨ ᠬᠠᠮᠳᠦ ᠰᠤᠷᠤᠬ᠍ᠴᠢᠳᠢᠶᠠᠨ ᠴᠤᠬ᠍ᠯᠠᠭᠣᠯᠵᠦ ᠪᠠᠢᠮᠠᠨ ᠬᠠᠨᠳᠠᠯᠠ ᠬᠡᠳᠦᠨ ᠡᠳᠦᠷ ᠨᠠᠢᠷᠠᠯᠳᠤᠪᠠ᠃ ᠨᠠᠢᠷᠤᠨ ᠰᠠᠢᠬᠠᠨᠳᠤ ᠵᠢᠷᠭᠠᠵᠦ᠍ ᠶᠠᠪᠤᠬᠤᠶ᠋ᠢᠨ ᠬᠢᠷᠢ ᠰᠡᠳᠭᠢᠯ ᠵᠢᠷᠤᠭᠡᠨᠳᠤ ᠲᠤᠷᠠᠰᠤᠬ᠍ᠳᠠᠭᠠᠳ ᠪᠠᠢᠬ᠍ᠰᠠᠨᠨᠢ ᠮᠢᠨᠤ ᠴᠧᠩ ᠪᠠᠭ᠍ᠰᠢᠶ᠋ᠢᠨ ᠬᠡᠭᠡᠨ ᠲᠦᠷᠬᠦ᠌ ᠪᠠᠢᠯᠠ᠃ ᠮᠢᠨᠤ ᠴᠧᠩ ᠪᠠᠭ᠍ᠰᠢ ᠨᠠᠰᠤ ᠪᠠᠷᠠᠭᠠᠳ ᠨᠢᠭᠡᠨᠲᠡ ᠭᠤᠷᠪᠠᠨ ᠵᠢᠯ ᠪᠤᠯᠴᠢᠬᠠᠵᠠᠢ᠃
ᠬᠠᠮᠳᠦ ᠰᠤᠷᠤᠬ᠍ᠴᠢᠶ᠋ᠢᠨ ᠨᠠᠢᠷ ᠦᠨᠳᠦᠷᠯᠡᠵᠦ᠍᠂ ᠨᠠᠮᠠᠶ᠋ᠢ ᠬᠡᠷᠲᠡᠭᠡᠨ ᠪᠤᠴᠠᠬᠤᠶ᠋ᠢᠨ ᠦᠶᠡᠪᠠᠷ᠂ ᠵᠢᠨᠪᠤᠤ ᠭᠤᠸᠠᠢ ᠬᠠᠯᠠᠰᠴᠢᠬᠠᠵᠦ᠍᠄ 《ᠪᠠᠢ ᠯᠦᠩ ᠴᠢ ᠬᠡᠳᠦᠢ ᠰᠠᠢᠨ ᠶᠠᠪᠤᠯᠠ ᠭᠡᠳ ᠪᠦᠷ ᠴᠧᠩ ᠪᠠᠭ᠍ᠰᠢᠶ᠋ᠢᠨ ᠰᠠᠢᠨᠢᠶᠠᠷ ᠱᠢᠦ᠂ ᠴᠧᠩ ᠪᠠᠭ᠍ᠰᠢ ᠠᠮᠢᠨᠠ ᠲᠠᠨᠤ ᠬᠤᠶᠠᠭᠤᠯᠠᠶ᠋ᠢ ᠦᠪᠡᠷᠤᠨᠢᠶᠠᠨ ᠬᠡᠤᠭᠡᠳ ᠮᠡᠳᠦ ᠰᠠᠨᠠᠬ᠍ᠰᠠᠨ ᠱᠢᠳᠡ᠂ ᠪᠢ ᠴᠧᠩ ᠪᠠᠭ᠍ᠰᠢᠪᠠᠨ ᠰᠠᠨᠠᠵᠦ᠍ ᠪᠠᠢᠨᠠ ᠁》 ᠭᠡᠳ ᠪᠦᠬᠦᠳᠡᠶ᠋ᠢᠨ ᠨᠢᠳᠦ᠍ᠶ᠋ᠢ ᠵᠠᠢᠷᠲᠦᠭᠤᠯᠵᠠᠢ᠃