ᠢᠲᠡᠷ ᠨᠠᠰᠣᠨ᠎ᠤ ᠨᠢᠭᠡᠨ ᠣᠢᠳᠬᠠᠷ᠎ᠢ ᠮᠠᠷᠢᠶ᠎ᠠ ᠰᠢᠭᠣᠷᠠᠭᠣᠯᠬᠣ ᠬᠡᠮᠡᠲᠡᠭ᠃

ᠴᠠᠬ ᠬᠣᠭᠣᠴᠠᠭᠠᠨ᠎ᠤ ᠣᠷᠣᠮ ᠴᠢᠷᠠᠢ ᠲᠡᠭᠡᠷ᠎ᠡ ᠦᠷᠴᠢᠯᠡᠭᠡᠰᠦ ᠰᠠᠭᠣᠯᠭᠠᠬᠣ ᠪᠡᠷ ᠪᠠᠷᠠᠬᠣ ᠦᠭᠡᠢ ᠪᠠᠰᠠ ᠪᠡᠶ᠎ᠡ᠎ᠶᠢᠨ ᠵᠢᠩ᠎ᠢ ᠨᠡᠮᠡᠳᠡᠭ ᠠᠵᠢ᠃ ᠲᠣᠯᠢᠨ᠎ᠤ ᠡᠮᠦᠨ᠎ᠡ ᠵᠣᠬᠰᠣᠭᠠᠳ ᠶᠠᠪᠠᠭᠠᠨ ᠭᠠᠯᠠᠭᠣ ᠰᠢᠬ ᠶᠣᠯᠬᠣᠢᠬᠰᠠᠨ ᠭᠡᠳᠡᠰᠦ ᠪᠠᠨ ᠬᠠᠷᠠᠬᠣ ᠪᠣᠯᠭᠠᠨ ᠴᠣᠬᠣᠮ ᠶᠠᠭᠠᠬᠢᠵᠦ ᠮᠠᠷᠢᠶ᠎ᠠ ᠰᠢᠭᠣᠷᠠᠭᠣᠯᠣᠨ ᠲᠣᠷᠠᠬᠣ ᠪᠣᠯ ᠭᠡᠰᠡᠨ ᠬᠦᠨ ᠪᠣᠲᠣᠯ ᠳ᠋ᠦ ᠠᠪᠲᠠᠲᠠᠬ᠃ ᠬᠡᠷᠪᠡ ᠦᠭᠡᠬᠦ ᠮᠠᠷᠢᠶ᠎ᠠ ᠪᠡᠷ ᠦᠨᠡᠯᠡᠵᠦ ᠬᠡᠮᠵᠢᠬᠦ ᠶᠣᠮ ᠪᠣᠯ ᠦᠪᠡᠷ᠎ᠶ᠋ᠢᠡᠨ ᠯᠠᠪ ᠦᠨᠳᠦᠷ ᠪᠠᠢᠷᠢᠨ ᠳ᠋ᠦ ᠲᠡᠪᠢᠬᠦ ᠭᠡᠲᠡᠭ ᠲᠦ᠍ ᠡᠷᠡᠭᠡᠯᠵᠡᠭᠡ ᠠᠯᠠᠭ᠎ᠠ᠃ ᠲᠡᠷᠡ ᠴᠦ᠍ ᠶᠠᠭᠠᠬᠢᠬᠣ ᠪᠣᠢ？ ᠪᠦᠬᠡᠴᠢᠨ ᠬᠦᠮᠦᠨ ᠰᠢᠭ ᠪᠦᠲᠦᠬᠦᠨ ᠬᠠᠲᠣᠭᠣᠨ ᠪᠡᠶ᠎ᠡ ᠪᠢᠯᠲᠠᠷ᠂ ᠪᠣᠯᠴᠢᠩ ᠰᠢᠷᠪᠣᠰᠣ ᠬᠢᠭᠡᠳ ᠪᠢᠷ᠎ᠡ ᠴᠢᠲᠠᠯ᠎ᠢ ᠬᠠᠷᠠᠭᠣᠯᠣᠬᠰᠠᠨ ᠮᠠᠷᠢᠶ᠎ᠠ ᠪᠣᠯ ᠦᠵᠡᠬᠦᠯᠵᠦ ᠭᠠᠢᠬᠠᠭᠣᠯᠣᠬᠰᠠᠨ ᠴᠦ᠍ ᠦᠨ᠎ᠡ ᠪᠡᠨ᠎ᠡ ᠲᠠᠢ᠃ ᠪᠣᠲᠠᠭᠠᠨ᠎ᠤ ᠰᠢᠮ᠎ᠡ ᠪᠡᠷ ᠪᠣᠷᠲᠣᠵᠦ ᠲᠠᠷᠭᠣᠯᠠᠬᠰᠠᠨ ᠬᠣᠢᠨ᠎ᠠ᠂ ᠠᠰᠠᠷ᠎ᠤᠨ ᠱᠠᠲᠣ ᠮᠠᠴᠣᠬᠣ ᠳ᠋ᠦ᠍ ᠴᠦ᠍ ᠠᠮᠢᠰᠬᠣᠭᠠᠲᠠᠵᠦ ᠰᠦᠢᠯᠡᠬᠢᠯᠡᠭᠡᠳ ᠠᠷᠭ᠎ᠠ ᠪᠠᠷᠠᠬᠲᠠᠭᠣᠯᠣᠨ᠎ᠠ᠃

ᠮᠠᠷᠢᠶᠠᠯᠠᠬᠣ ᠭᠡᠵᠦ ᠮᠦᠷᠦ ᠪᠦᠲᠦᠨ ᠭᠡᠳᠡᠰᠦ ᠴᠠᠳᠬᠣᠯᠠᠩ᠎ᠤᠨ ᠲᠦᠯᠦᠭᠡᠨ᠎ᠤ ᠨᠡᠷ᠎ᠡ ᠭᠡᠳᠡᠭ ᠪᠣᠯᠪᠠᠴᠣ ᠮᠠᠨ᠎ᠤ ᠡᠷᠢᠨ ᠳ᠋ᠦ᠍ ᠲᠡᠮᠡᠢ ᠲᠠᠭᠠᠯᠠᠬᠲᠠᠲᠠᠬ ᠦᠭᠡᠢ ᠨᠢ ᠦᠨᠡᠨᠳᠡᠢ᠃ ᠢᠲᠡᠭᠡᠬᠦ ᠦᠭᠡᠢ ᠪᠣᠯ ᠵᠠᠮ ᠲᠡᠭᠡᠷ᠎ᠡ ᠬᠠᠯᠵᠠ ᠲᠠᠭᠠᠷᠠᠯᠲᠣᠬᠰᠠᠨ ᠲᠠᠨᠢᠯ ᠨᠢᠭᠡᠨ （ᠢᠯᠠᠩᠭᠣᠶ᠎ᠠ ᠪᠦᠰᠡᠬᠦᠢᠴᠦᠳ） ᠡᠴᠡ 《ᠢᠯᠡᠢ！ ᠶᠠᠭᠠᠬᠢᠭᠠᠳ ᠡᠢᠮᠦ ᠮᠠᠷᠢᠶᠠᠯᠠᠬᠰᠠᠨ ᠪᠣᠢ？》 ᠭᠡᠮᠡᠨ ᠠᠰᠠᠭᠣᠵᠦ ᠦᠵᠡ᠂ ᠴᠠᠭᠠᠲᠣᠬᠢ ᠴᠢᠨᠢ ᠦᠭᠡ ᠲᠣᠣᠭᠠᠷᠬᠣ ᠦᠭᠡᠢ ᠪᠣᠯᠪᠠᠴᠣ ᠴᠢᠮᠠᠶ᠋ᠢ ᠮᠠᠭᠣᠬᠠᠢ ᠬᠢᠯᠦᠢᠵᠦ ᠬᠠᠷᠠᠨ᠎ᠠ᠃ ᠡᠷᠡᠬᠦᠯ ᠮᠡᠨᠲᠦ᠂ ᠭᠣᠸ᠎ᠠ ᠰᠠᠢᠬᠠᠨ᠂ ᠬᠦᠲᠡᠯᠭᠡᠭᠡᠨ ᠪᠣᠯᠪᠠᠰᠣᠷᠠᠯ ᠵᠡᠷᠭᠡ ᠠᠯᠢ ᠲᠠᠯ᠎ᠠ ᠡᠴᠡ ᠦᠬᠦᠯᠡᠭᠰᠡᠨ ᠴᠦ᠍ ᠣᠲᠣ᠎ᠶᠢᠨ ᠬᠦᠮᠦᠰ ᠲᠦ᠍ ᠡᠯᠪᠡᠭ ᠬᠡᠯᠬᠡᠭᠡᠷ ᠡᠴᠡ ᠡᠴᠡᠩᠬᠡᠢ ᠲᠣᠷᠠᠩᠬᠠᠢ ᠨᠢ ᠨᠡᠩ ᠢᠯᠡᠬᠦᠦ ᠡᠭᠡᠯᠢᠲᠡᠢ ᠲᠣᠲᠣᠨᠣ ᠬᠠᠷᠠᠬᠲᠠᠬᠣ ᠭᠡᠯᠲᠡᠢ᠃

ᠮᠠᠷᠢᠶ᠎ᠠ ᠪᠣᠯ ᠮᠢᠨᠦᠬᠢ ᠬᠠᠮᠣᠬ᠎ᠤᠨ ᠲᠣᠲᠦ ᠢᠯᠡᠳᠭᠡᠯ ᠪᠢᠯᠡ᠃ ᠬᠠᠶᠠ ᠬᠠᠭᠣᠴᠢᠨ ᠭᠡᠷᠡᠯ ᠵᠢᠷᠣᠬ ᠶ᠋ᠢᠡᠨ ᠣᠷᠪᠠᠭᠣᠯᠵᠦ᠂ ᠬᠠᠲᠠᠬᠰᠠᠨ ᠪᠣᠷᠴᠠ ᠰᠢᠬ ᠲᠣᠷᠠᠩᠬᠠᠢ ᠦᠪᠡᠷ᠎ᠢ ᠪᠠᠨ ᠬᠠᠷᠠᠭᠠᠳ ᠢᠲᠡᠭᠡᠵᠦ ᠶᠠᠲᠠᠨ᠎ᠠ᠃ ᠬᠣᠷᠸ᠎ᠠ ᠲᠡᠯᠡᠬᠡᠢ ᠬᠡᠪ ᠶ᠋ᠢᠡᠷ ᠠᠲᠠᠯ᠎ᠠ ᠬᠦᠮᠦᠨ᠎ᠤ ᠶᠠᠪᠣᠲᠠᠯ ᠶᠡᠬᠡ ᠬᠣᠪᠢᠷᠠᠵᠦ ᠦᠭᠡᠷᠡᠲᠦᠬᠦ ᠨᠢ ᠰᠣᠨᠢᠷᠬᠠᠯᠲᠠᠢ᠃ ᠡᠷ᠎ᠡ ᠦᠰᠴᠦ ᠢᠰᠡᠭᠡᠢ ᠰᠣᠨᠣᠨ᠎ᠠ ᠭᠡᠵᠦ ᠡᠪᠦᠭᠡᠴᠦᠦᠯ᠎ᠤᠨ ᠶᠠᠷᠢᠬᠣ᠎ᠶᠢ ᠣᠯᠠᠨ ᠰᠣᠨᠣᠰᠣᠬᠰᠠᠨ᠃ ᠭᠡᠬᠦ ᠳ᠋ᠦ ᠪᠢ ᠦᠨᠳᠦᠷ ᠶ᠋ᠢᠡᠷ ᠶ᠋ᠢᠡᠨ ᠦᠰᠦᠭᠰᠡᠨ ᠶ᠋ᠢᠡᠷ ᠪᠠᠷᠠᠬᠣ ᠦᠭᠡᠢ ᠦᠷᠭᠡᠨ ᠶ᠋ᠢᠡᠷ ᠶ᠋ᠢᠡᠨ ᠴᠦ᠍ ᠰᠣᠨᠣᠵᠦ ᠲᠡᠯᠡᠭᠡᠳ ᠦᠭᠡᠬᠦᠨ ᠪᠦᠮᠪᠦᠭᠡ ᠮᠡᠲᠦ ᠲᠠᠷᠭᠣᠯᠠᠬᠰᠠᠨ ᠪᠠᠢᠨ᠎ᠠ᠃ ᠨᠢᠭᠡ ᠪᠣᠲᠣᠬᠣᠯ᠎ᠠ ᠦᠴᠢᠨᠡᠨ ᠵᠢᠯ ᠦᠪᠡᠰᠦᠪᠡᠨ ᠰᠣᠷᠴᠣ ᠮᠡᠳᠡᠬᠦ ᠵᠦᠢᠯ ᠳ᠋ᠦ ᠬᠦᠮᠦᠨ ᠣᠯᠠᠨ᠎ᠤ ᠠᠷᠣ ᠳ᠋ᠦ ᠴᠢᠷᠦᠭᠲᠡᠵᠦ ᠶᠠᠪᠣᠬᠰᠠᠨ ᠭᠡᠲᠡᠭ ᠪᠣᠯᠪᠠᠴᠣ ᠢᠲᠡᠵᠦ ᠣᠣᠭᠣᠬᠰᠠᠨ ᠳ᠋ᠡᠭᠠᠨ ᠪᠣᠯ ᠣᠬᠲᠣ ᠣᠰᠣᠯᠲᠠᠵᠦ ᠭᠣᠮᠣᠲᠠᠭᠠᠬᠰᠠᠨ ᠦᠭᠡᠢ ᠪᠠᠨ ᠬᠠᠷᠢᠨ ᠪᠠᠲᠣᠲᠠᠢ ᠭᠡᠷᠡᠴᠢᠯᠡᠵᠦ ᠪᠠᠷᠲᠠᠮ ᠬᠠᠷᠢᠭᠣᠯᠵᠦ ᠴᠢᠲᠠᠨ᠎ᠠ᠃

ᠬᠠᠪᠣᠷ᠎ᠤᠨ ᠰᠢᠨᠡᠬᠡᠨ ᠠᠪᠣᠬᠰᠠᠨ ᠲᠡᠪᠡᠯ ᠪᠠᠰᠠ ᠪᠠᠷᠢᠭᠣ ᠰᠢᠬᠠᠭᠣ ᠪᠣᠯᠵᠠᠢ᠃ ᠨᠠᠰᠣ ᠬᠣᠷᠠᠬ᠎ᠤᠨ ᠬᠡᠨ ᠨᠢᠭᠡᠨ᠎ᠤ ᠲᠡᠭᠰᠢ ᠪᠡᠶ᠎ᠡ ᠭᠠᠲᠠᠷ᠂ ᠪᠣᠰᠢᠭᠣ ᠱᠠᠯᠠᠮᠠᠬ ᠬᠦᠲᠡᠯᠣᠯ ᠲᠠᠢ ᠬᠢᠯᠠᠪᠠᠯᠵᠠᠵᠦ ᠶᠠᠪᠣᠬᠣ᠎ᠶᠢ ᠬᠠᠷᠠᠭᠠᠳ ᠤᠨ ᠵᠢᠯ ᠡᠳᠡᠨ᠎ᠢ ᠲᠣᠭᠣᠷᠢᠵᠦ ᠭᠠᠷᠣᠬᠰᠠᠨ ᠶᠣᠮ᠎ᠤᠤ ᠭᠡᠵᠦ ᠪᠢᠰᠢᠷᠡᠯ ᠭᠠᠢᠬᠠᠯ ᠲᠦᠷᠦᠲᠡᠭ᠃ ᠠᠢ ᠳ᠋ᠠ᠂ ᠮᠠᠷᠢᠶᠠᠯᠠᠬᠣ ᠭᠡᠵᠦ ᠪᠠᠢᠭᠠᠳ ᠮᠠᠷᠢᠶᠠᠯᠠᠬᠰᠠᠨ ᠦᠭᠡᠢ᠂ ᠮᠢᠬ᠎ᠠ ᠲᠣᠰᠣ᠎ᠶᠢᠨ ᠢᠲᠡᠬᠦᠷ ᠪᠣᠯᠵᠦ ᠶᠠᠪᠣᠬᠰᠠᠭᠠᠷ ᠮᠠᠯᠠᠭᠠᠢ ᠲᠡᠪᠡᠯ᠎ᠤᠨ ᠪᠠᠷᠠᠮᠠᠯ ᠪᠣᠯᠬᠣ ᠳ᠋ᠦ ᠬᠦᠷᠦᠭᠰᠡᠨ᠎ᠢ ᠬᠡᠨ ᠳ᠋ᠦ ᠲᠣᠭᠠᠴᠢᠵᠦ ᠬᠡᠯᠡᠬᠦᠪ᠃

ᠪᠠᠭ᠎ᠠ ᠪᠠᠢᠬᠣ ᠳ᠋ᠦ ᠡᠵᠢ ᠮᠢᠨᠢ ᠦᠰᠴᠦ ᠦᠨᠳᠡᠢᠬᠦ᠎ᠶᠢ ᠪᠡᠯᠭᠡᠰᠢᠶᠡᠵᠦ ᠲᠡᠷᠯᠢᠭ᠎ᠢ ᠮᠢᠨᠢ ᠬᠣᠶᠠᠷ ᠬᠣᠷᠣᠭᠣ ᠡᠯᠪᠡᠭ ᠣᠶᠣᠲᠠᠬ ᠪᠠᠢᠬᠰᠠᠨ ᠪᠣᠯ ᠣᠲᠣ ᠬᠠᠷᠢᠨ ᠪᠢ ᠮᠠᠷᠢᠶᠠᠯᠠᠬᠣ ᠪᠣᠯᠭᠣᠵᠠᠢ ᠭᠡᠮᠡᠨ ᠦᠷᠬᠦᠯᠵᠢ ᠡᠯᠪᠡᠭ ᠲᠡᠪᠡᠯ ᠲᠡᠯᠪᠡᠭᠡᠷ ᠦᠮᠦᠲᠦ ᠲᠠᠢ ᠭᠠᠩᠭᠠᠷᠠᠬᠣ ᠪᠣᠯᠪᠠ᠃ ᠡᠨᠲᠡ ᠨᠢᠭᠡ ᠨᠢ ᠦᠰᠴᠦ ᠣᠷᠭᠣᠬᠣ᠎ᠶᠢᠨ ᠬᠦᠰᠡᠯ ᠵᠦᠩᠨᠡᠯ ᠰᠢᠩᠭᠡᠭᠰᠡᠨ ᠭᠡᠲᠡᠭ ᠪᠣᠯ ᠨᠦᠬᠦᠭᠡ ᠨᠢ ᠦᠭᠡᠬᠦ ᠮᠠᠷᠢᠶ᠎ᠠ ᠪᠠᠨ ᠦᠷᠦᠭᠡᠯ ᠪᠣᠰᠣᠳ ᠡᠴᠡ ᠨᠢᠭᠣᠵᠦ ᠬᠠᠯᠬᠠᠯᠠᠬᠣ ᠭᠡᠰᠡᠨ ᠨᠡᠷᠡᠯᠭᠡᠭ ᠪᠣᠲᠣᠯ ᠳ᠋ᠠᠭᠠᠨ ᠬᠦᠲᠦᠯᠦᠭᠲᠡᠭᠡᠳ ᠲᠡᠷᠡ᠃

ᠮᠠᠰᠢ ᠣᠯᠠᠨ ᠶᠠᠪᠣᠲᠠᠯ ᠮᠠᠷᠢᠶᠠᠯᠠᠬᠣ ᠮᠡᠲᠦ ᠲᠦᠬᠦᠮᠬᠡᠨ ᠪᠣᠯᠣᠬᠰᠠᠨ ᠪᠣᠯ ᠭᠡᠵᠦ ᠪᠢ ᠬᠠᠶᠠ ᠬᠡᠢ ᠲᠡᠮᠡᠢᠷᠡᠨ ᠰᠠᠨᠠᠲᠠᠬ᠃ ᠮᠠᠷᠢᠶ᠎ᠠ ᠲᠠᠢ ᠬᠦᠮᠦᠨ᠎ᠢ ᠠᠪᠣᠨ ᠦᠵᠡᠬᠦ ᠳ᠋ᠦ ᠰᠦᠷ ᠪᠢᠷ᠎ᠡ ᠲᠠᠢ ᠪᠣᠯᠪᠠᠴᠣ ᠡᠮᠵᠡᠭ ᠬᠡᠪᠡᠷᠡᠭ ᠭᠡᠲᠡᠭ ᠨᠢ ᠬᠦᠭᠡᠷᠦᠬᠦᠢ᠃ ᠴᠢᠰᠣᠨ ᠲᠠᠷᠣᠯᠲᠠ ᠦᠨᠳᠦᠷᠵᠢᠬᠦ᠂ ᠴᠢᠰᠣᠨ ᠰᠢᠬᠢᠷ ᠨᠡᠮᠡᠭᠲᠡᠬᠦ ᠁ ᠭᠡᠬᠦᠴᠢᠯᠡᠨ ᠡᠩ᠎ᠤᠨ ᠴᠠᠬ ᠲᠠᠭᠠᠨ ᠠᠩᠬᠠᠷᠣᠮᠵᠢ ᠦᠭᠡᠢ ᠪᠠᠢᠬᠰᠠᠨ ᠵᠦᠢᠯ ᠦᠭᠡᠬᠦᠯᠡᠵᠦ ᠮᠠᠷᠢᠶᠠᠯᠠᠬᠣ᠎ᠶᠢ ᠲᠠᠭᠠᠯᠲᠣᠨ ᠠᠯᠢᠬᠠᠨ ᠨᠢᠭᠡ ᠵᠦᠭ ᠡᠴᠡ ᠭᠡᠲᠡᠵᠦ ᠮᠢᠷᠢᠶᠠᠬᠣ᠎ᠶᠢ ᠴᠠᠬ ᠦᠷᠬᠦᠯᠵᠢ ᠬᠢᠴᠢᠶᠡᠨ᠎ᠡ᠃ ᠴᠢᠩᠬᠢᠬᠦ ᠳ᠋ᠡᠭᠡᠨ ᠲᠡᠯᠡᠬᠡᠢ᠎ᠶᠢᠨ ᠮᠠᠷᠢᠶᠠᠯᠠᠬᠣ᠎ᠶᠢ ᠰᠡᠷᠭᠡᠢᠯᠡᠬᠦ ᠡᠳᠦᠷ ᠭᠡᠵᠦ ᠪᠠᠢᠲᠠᠬ ᠪᠦᠭᠡᠳ ᠲᠡᠯᠡᠬᠡᠢ᠎ᠶᠢᠨ ᠡᠷᠡᠬᠦᠯ ᠬᠠᠮᠠᠭᠠᠯᠠᠯ᠎ᠤᠨ ᠵᠣᠬᠢᠶᠠᠨ ᠪᠠᠢᠭᠣᠯᠣᠯᠲᠠ ᠡᠴᠡ ᠪᠠᠰᠠ ᠮᠠᠷᠢᠶᠠᠯᠠᠬᠣ ᠪᠣᠯ ᠣᠲᠠᠭᠠᠨ ᠴᠢᠨᠠᠷᠲᠠᠢ ᠠᠷᠪᠠᠨ ᠡᠪᠡᠳᠴᠢᠨ᠎ᠤ ᠨᠢᠭᠡ ᠬᠡᠮᠡᠨ ᠲᠣᠬᠲᠠᠭᠠᠬᠰᠠᠨ ᠭᠡᠨ᠎ᠡ ᠯᠠᠢ᠃ ᠬᠠᠷᠢᠨ ᠡᠨᠡ ᠡᠳᠦᠷ ᠬᠦᠮᠦᠰ ᠴᠣᠬᠣᠮ ᠬᠣᠭᠣᠯᠠ ᠬᠣᠰᠢ ᠪᠠᠨ ᠬᠠᠰᠣᠵᠦ᠂ ᠬᠦᠲᠡᠯᠭᠡᠭᠡᠨ ᠪᠣᠯᠪᠠᠰᠣᠷᠠᠯ ᠳ᠋ᠦ ᠰᠢᠮᠲᠠᠵᠦ᠂ ᠲᠠᠲᠠᠵᠦ ᠬᠡᠯᠡᠬᠦ ᠳ᠋ᠦ ᠲᠠᠪᠣ ᠭᠣᠷᠪᠠᠨ ᠵᠢᠩ ᠮᠠᠷᠢᠶ᠎ᠠ ᠰᠢᠭᠣᠷᠠᠭᠣᠯᠲᠠᠬ ᠪᠣᠯ᠎ᠤᠤ ᠭᠡᠵᠦ ᠪᠢ ᠭᠠᠢᠬᠠᠵᠦ ᠰᠣᠨᠢᠭᠣᠴᠢᠯᠠᠲᠠᠬ᠃ ᠨᠢᠬᠲᠠᠯᠠᠨ ᠪᠣᠲᠣᠪᠠᠯ ᠲᠣᠷᠠᠵᠦ ᠰᠢᠭᠣᠷᠠᠭᠣᠯᠬᠣ᠎ᠶᠢᠨ ᠣᠴᠢᠷ ᠲᠦ᠍ ᠪᠢ ᠭᠠᠬᠴᠠᠭᠠᠷ ᠶ᠋ᠢᠡᠨ ᠰᠠᠨᠠᠭᠠᠰᠢᠷᠠᠵᠦ ᠪᠠᠢᠭ᠎ᠠ ᠪᠣᠰᠣ᠂ ᠪᠦᠬᠦ ᠲᠡᠯᠡᠬᠡᠢ ᠪᠡᠷ ᠶ᠋ᠢᠡᠨ ᠠᠩᠬᠠᠷᠴᠣ ᠬᠠᠯᠠᠮᠵᠢᠯᠠᠵᠦ ᠪᠠᠢᠭ᠎ᠠ ᠪᠣᠯᠣᠯᠲᠠᠢ᠃

ᠬᠦᠮᠦᠰ ᠨᠠᠰᠣ ᠠᠬᠢᠬᠣ ᠲᠣᠰᠣᠮ ᠮᠠᠷᠢᠶᠠᠯᠠᠲᠠᠬ᠎ᠤᠨ ᠣᠴᠢᠷ ᠶᠠᠭᠣᠨ ᠪᠢᠯᠡ？ ᠬᠦᠲᠡᠯᠭᠡᠭᠡᠨ ᠪᠣᠯᠪᠠᠰᠣᠷᠠᠯ ᠪᠠᠭᠠᠲᠠᠢ ᠬᠣᠢᠷᠭᠣ ᠵᠠᠯᠬᠠᠭᠣ᠎ᠶᠢᠨ ᠣᠴᠢᠷ ᠪᠣᠶᠣ ᠠᠯᠢ ᠡᠰᠡᠬᠦᠯ᠎ᠡ ᠬᠡᠲᠦᠷᠡᠲᠡᠯ᠎ᠡ ᠢᠲᠡᠭᠰᠡᠨ ᠬᠣᠪᠲᠣᠬ ᠰᠢᠨᠣᠯ ᠡᠴᠡ ᠰᠢᠯᠲᠠᠭᠠᠯᠠᠬᠰᠠᠨ ᠭᠡᠵᠦ ᠬᠡᠨ ᠨᠢᠭᠡ ᠨᠢ ᠬᠣᠷᠢᠶᠠᠩᠭᠣᠢᠯᠠᠵᠦ ᠳ᠋ᠦᠩᠨᠡᠭᠰᠨᠨ ᠪᠣᠢ᠃ ᠡᠨᠡ ᠴᠦ᠍ ᠣᠷᠣ ᠲᠠᠢ ᠦᠭᠡ᠃ ᠪᠢ ᠪᠣᠯ ᠡᠨᠡ ᠬᠣᠶᠠᠷ ᠵᠦᠢᠯ᠎ᠤᠨ ᠠᠯᠢ᠎ᠶᠢ ᠨᠢ ᠴᠦ᠍ ᠴᠢᠮᠡᠯᠡᠵᠦ ᠭᠣᠮᠣᠲᠠᠭᠠᠯ ᠦᠭᠡᠢ ᠪᠡᠶ᠎ᠡ ᠳ᠋ᠡᠭᠡᠨ ᠲᠣᠬᠣᠵᠦ ᠪᠦᠷᠢᠲᠦᠬᠦᠯᠦᠭᠰᠡᠨ ᠶᠣᠮ᠃ ᠴᠠᠬ᠎ᠤᠨ ᠬᠣᠭᠣᠯᠠ ᠪᠠᠨ ᠬᠡᠮᠵᠢᠶ᠎ᠡ ᠲᠠᠢ ᠵᠣᠭᠣᠬᠯᠠᠬᠣ᠎ᠶᠢ ᠬᠢᠴᠢᠶᠡᠨ ᠵᠢᠷᠣᠮᠯᠠᠬᠣ ᠠᠲᠠᠯ᠎ᠠ ᠪᠠᠨ ᠦᠯᠡᠲᠡᠵᠦ ᠲᠣᠰᠣᠬᠰᠠᠨ᠎ᠢ ᠪᠣᠯ ᠦᠵᠡᠵᠦ ᠲᠦᠪᠲᠡᠬᠦ ᠦᠭᠡᠢ᠂ ᠦᠯᠦᠪ ᠴᠦᠯᠮᠦᠬᠦ ᠵᠠᠩ ᠲᠠᠢ᠃ ᠬᠡᠦᠬᠡᠳ᠎ᠤᠨ ᠢᠲᠡᠭᠡᠳ ᠦᠯᠡᠲᠡᠭᠰᠡᠨ ᠬᠠᠭᠠᠰ ᠠᠶᠠᠭ᠎ᠠ ᠪᠣᠲᠠᠭ᠎ᠠ᠂ ᠬᠠᠵᠠᠭᠠᠳ ᠣᠷᠬᠢᠬᠰᠠᠨ ᠪᠣᠭᠣᠷᠰᠣᠬ᠎ᠢ ᠬᠠᠶᠠᠵᠦ ᠠᠰᠬᠠᠬᠣ ᠡᠴᠡ ᠬᠠᠷᠠᠮᠨᠠᠨ ᠴᠠᠳᠬᠣᠯᠠᠩ ᠭᠡᠳᠡᠰᠦᠨ ᠳ᠋ᠡᠭᠡᠨ ᠴᠢᠬᠢᠭᠡᠳ ᠰᠠᠶᠢ ᠰᠠᠨᠠᠭ᠎ᠠ ᠠᠮᠠᠷᠠᠬᠣ ᠪᠦᠭᠡᠳ ᠠᠯᠪᠠᠨ ᠳ᠋ᠠᠭᠠᠨ ᠢᠷᠡᠪᠡᠯ ᠰᠢᠷᠡᠭᠡᠨ᠎ᠤ ᠠᠷᠣ ᠳ᠋ᠦ᠍ ᠰᠢᠪᠠᠷ ᠱᠣᠭᠣᠮᠠᠯ ᠰᠢᠬ ᠬᠡᠳᠦᠨ ᠴᠠᠬ ᠯᠠᠬᠯᠠᠢᠵᠦ ᠰᠠᠭᠣᠬᠣ ᠡᠴᠡ ᠴᠦ᠍ ᠠᠯᠵᠠᠬᠣ ᠦᠭᠡᠢ ᠪᠢᠯᠡ᠃

ᠷᠠᠳᠢᠣ᠋ ᠡᠴᠡ ᠠᠯᠮᠣᠷᠠᠳ ᠪᠣᠯᠣᠨ ᠠᠮᠲᠠᠲᠣ ᠲᠦᠮᠦᠰᠦ ᠨᠢ ᠮᠠᠷᠢᠶ᠎ᠠ ᠰᠢᠭᠣᠷᠠᠭᠣᠯᠬᠣ ᠳ᠋ᠦ ᠲᠣᠰᠠᠲᠠᠢ ᠭᠡᠵᠦ ᠰᠣᠨᠣᠰᠣᠭᠠᠳ ᠲᠣᠷᠰᠢᠵᠦ ᠦᠵᠡᠬᠦ ᠭᠡᠰᠡᠨ ᠪᠣᠲᠣᠯ ᠣᠷᠭᠣᠪᠠ᠃ ᠣᠰᠣᠨ ᠳ᠋ᠦ ᠣᠨᠠᠬᠰᠠᠨ ᠬᠦᠮᠦᠨ ᠦᠷᠲᠦᠭᠰᠨᠨ ᠵᠦᠢᠯ ᠪᠣᠯᠭᠠᠨ ᠡᠴᠡ ᠪᠠᠵᠠᠬᠲᠠᠨ ᠵᠢᠭᠣᠷᠠᠬᠣ ᠲᠠᠢ ᠲᠦᠰᠦᠭᠡ ᠪᠡᠷ ᠦᠭᠡᠬᠦ ᠮᠠᠷᠢᠶ᠎ᠠ ᠲᠠᠢ ᠬᠦᠮᠦᠰ ᠴᠦ᠍ ᠰᠣᠨᠣᠰᠣᠬᠰᠠᠨ ᠪᠦᠬᠦᠨ ᠶ᠋ᠢᠡᠨ ᠢᠲᠡᠭᠡᠵᠦ ᠶᠣᠰᠣᠴᠢᠯᠠᠨ ᠮᠦᠷᠲᠡᠬᠦ ᠪᠡᠷ ᠭᠣᠷᠢᠲᠠᠲᠠᠬ᠃ ᠡᠪ ᠲᠡᠮ ᠨᠢ ᠲᠠᠭᠠᠷᠠᠭᠠᠳ ᠲᠣᠷᠠᠴᠢᠬᠠᠬᠣ᠎ᠶᠢ ᠬᠡᠨ ᠬᠡᠯᠡᠵᠦ ᠮᠡᠳᠡᠬᠦ ᠪᠣᠢ᠃ ᠭᠡᠪᠡᠴᠦ ᠬᠡᠳᠦᠨ ᠡᠳᠦᠷ ᠪᠣᠯᠣᠬᠰᠠᠨ ᠦᠭᠡᠢ ᠬᠣᠢᠰᠢ ᠣᠬᠣᠷᠢᠵᠦ᠂ ᠪᠣᠲᠠᠲᠣ ᠠᠬᠣᠢ᠎ᠶᠢᠨ ᠡᠮᠦᠨ᠎ᠡ ᠠᠷᠭ᠎ᠠ ᠪᠣᠰᠣ ᠲᠣᠯᠣᠭᠠᠢ ᠭᠣᠲᠣᠢᠨ ᠪᠠᠭᠣᠵᠦ ᠦᠭᠴᠡᠢ᠃ ᠡᠩ᠎ᠤᠨ ᠴᠠᠬ ᠲᠠᠭᠠᠨ ᠵᠢᠮᠢᠰ ᠵᠠᠭᠣᠰᠢ ᠪᠣᠯᠭᠠᠵᠦ ᠪᠠᠢᠬᠰᠠᠨ ᠵᠦᠢᠯ ᠶ᠋ᠢᠡᠷ ᠴᠠᠬ᠎ᠤᠨ ᠬᠣᠭᠣᠯᠠ ᠪᠠᠨ ᠣᠷᠣᠯᠠᠭᠣᠯᠬᠣ ᠭᠡᠵᠦ ᠴᠠᠳᠬᠣ ᠶᠠᠭᠣᠮ᠎ᠠ ᠪᠢᠰᠢ᠂ ᠨᠡᠩ ᠴᠦ᠍ ᠲᠠᠳᠬᠣ ᠶᠠᠭᠣᠮ᠎ᠠ ᠪᠣᠰᠣ᠃ ᠲᠡᠭᠡᠭᠡᠳ ᠦᠭᠡᠷ᠎ᠡ ᠪᠣᠰᠣᠳ ᠡᠴᠡ ᠨᠣᠮ ᠵᠠᠯᠠᠵᠦ᠂ ᠨᠡᠮᠡᠵᠦ ᠬᠠᠰᠣᠬᠣ ᠠᠷᠭ᠎ᠠ ᠪᠡᠷ ᠰᠣᠷᠢᠭ᠎ᠠ ᠪᠣᠯᠪᠠᠰᠣᠷᠠᠯ ᠬᠢᠵᠦ᠂ ᠬᠦᠲᠡᠯᠭᠡᠭᠡᠨ ᠪᠣᠯᠪᠠᠰᠣᠷᠠᠯ ᠶ᠋ᠢᠡᠨ ᠨᠡᠮᠡᠭᠲᠡᠬᠦᠯᠵᠦ᠂ ᠬᠣᠭᠣᠯᠠ ᠣᠮᠲᠠ ᠪᠠᠨ ᠬᠠᠰᠣᠵᠦ᠂ ᠦᠭᠡᠬᠦ ᠮᠠᠷᠢᠶ᠎ᠠ ᠲᠠᠢ ᠣᠲᠠᠭᠠᠨ ᠲᠠᠭᠠᠭᠠᠮᠠᠭᠠᠢ ᠲᠠᠢᠨ ᠬᠢᠬᠦ ᠪᠡᠷ ᠪᠡᠯᠡᠳᠭᠡᠯ᠎ᠡ᠃

ᠭᠡᠷ ᠡᠴᠡ ᠪᠠᠢᠭᠣᠯᠭ᠎ᠠ ᠬᠦᠷᠲᠡᠯ᠎ᠡ ᠬᠦᠶᠦᠵᠦ ᠱᠣᠬᠰᠢᠬᠣ᠎ᠶᠢᠨ ᠬᠣᠭᠣᠷᠣᠨᠲᠣ ᠠᠷᠪᠠᠨ ᠲᠠᠪᠣᠨ ᠮᠢᠨᠦᠢ᠍ᠲ ᠠᠮᠵᠢᠵᠦ ᠪᠣᠯᠪᠠᠰᠣᠷᠠᠨ᠎ᠠ᠃ ᠣᠷᠣᠢ᠎ᠶᠢᠨ ᠬᠣᠭᠣᠯᠠᠨ᠎ᠤ ᠲᠠᠷᠠᠭ᠎ᠠ ᠪᠠᠰᠠ ᠨᠠᠳᠬᠣᠬᠰᠠᠨ ᠲᠣᠭᠣᠯ ᠰᠢᠬ ᠬᠦᠷᠢᠶ᠎ᠡ ᠪᠠᠨ ᠬᠡᠳᠦ ᠲᠣᠭᠣᠷᠢᠵᠦ ᠬᠦᠶᠦᠨ᠎ᠡ᠃ ᠨᠠᠲᠠ ᠲᠠᠢ ᠠᠲᠠᠯᠢ ᠨᠡᠯᠢᠶᠡᠳ ᠣᠯᠠᠨ ᠬᠦᠮᠦᠨ ᠪᠠᠰᠠ ᠡᠷᠳᠡ ᠣᠷᠣᠢ᠎ᠶᠢᠨ ᠵᠠᠪ ᠶ᠋ᠢᠡᠷ ᠬᠦᠶᠦᠵᠦ ᠪᠣᠯᠪᠠᠰᠣᠷᠠᠬᠣ ᠨᠢ ᠬᠠᠷᠠᠭᠲᠠᠨ᠎ᠠ᠃ ᠮᠠᠷᠢᠶ᠎ᠠ ᠰᠢᠭᠤᠷᠠᠭᠤᠯᠬᠤ ᠤᠯᠠᠨ ᠲᠦᠮᠡᠨᠴᠢ ᠲᠠᠢᠯᠠᠯᠳᠤᠭᠠᠨ᠎ᠤ ᠪᠦᠷᠢᠶ᠎ᠠ ᠬᠠᠩᠬᠢᠨᠠᠯ᠎ᠠ᠃

ᠬᠦᠯᠦᠰᠦ ᠪᠠᠭᠠᠬᠢᠭᠣᠯᠣᠨ ᠬᠦᠶᠦᠬᠦ ᠵᠠᠭᠣᠷ᠎ᠠ ᠭᠡᠵᠢᠶ᠎ᠡ ᠣᠷᠢᠳ᠎ᠤᠨ ᠰᠣᠨᠣᠰᠴᠣ ᠪᠠᠢᠬᠰᠠᠨ 《ᠣᠢᠳᠬᠠᠷ ᠭᠡᠵᠦ ᠬᠣᠷᠸ᠎ᠠ ᠳ᠋ᠦ ᠶᠠᠷᠦ ᠡᠴᠡ ᠪᠠᠢᠭ᠎ᠠ ᠦᠭᠡᠢ ᠁》 ᠭᠡᠰᠡᠨ ᠨᠢᠭᠡᠨ ᠲᠠᠭᠣᠣ ᠰᠠᠨᠠᠭᠠᠨ ᠳ᠋ᠦ ᠣᠷᠣᠬᠣ ᠶᠣᠮ᠃ ᠰᠠᠨᠠᠭᠰᠠᠨ ᠶ᠋ᠢᠡᠷ ᠪᠣᠯᠲᠠᠬ ᠦᠭᠡᠢ ᠬᠣᠷᠸ᠎ᠠ᠎ᠶᠢ ᠬᠦᠮᠦᠰ ᠲᠠᠭᠣᠣ ᠪᠡᠷ ᠠᠷᠭᠠᠲᠠᠬᠣ ᠭᠡᠮᠡᠨ ᠬᠦᠰᠡᠵᠦ ᠭᠣᠷᠢᠯᠠᠬᠣ ᠶᠣᠮ ᠡ᠃ ᠬᠦᠮᠦᠨ ᠣᠯᠠᠨ ᠲᠠᠭᠣᠯᠠᠬᠰᠠᠨ ᠶᠣᠮ ᠭᠡᠳ ᠬᠣᠷᠸ᠎ᠠ ᠡᠴᠡ ᠣᠢᠳᠬᠠᠷ ᠪᠣᠬᠢᠨᠢᠲᠣᠯ ᠠᠷᠢᠯᠣᠬᠰᠠᠨ ᠦᠭᠡᠢ᠂ ᠰᠡᠬᠦᠲᠡᠷ ᠮᠡᠲᠦ ᠲᠠᠭᠠᠵᠦ ᠰᠡᠬᠦᠯ ᠮᠡᠲᠦ ᠰᠢᠷᠪᠡᠯᠵᠠᠵᠦ ᠰᠢᠨᠠᠯᠭᠠᠬᠰᠠᠭᠠᠷ᠃ ᠬᠡᠦᠬᠡᠳ ᠠᠬᠣᠢ ᠨᠠᠰᠣᠨ ᠳ᠋ᠦ᠍ ᠬᠢᠴᠢᠶᠡᠯ ᠰᠣᠷᠣᠯᠭ᠎ᠠ ᠭᠡᠮᠡᠨ ᠬᠠᠰᠢᠷᠠᠭᠠᠵᠦ ᠴᠦᠬᠦᠷᠡᠬᠦᠯᠵᠦ ᠪᠠᠢᠬᠰᠠᠨ ᠪᠣᠯ ᠭᠠᠯ ᠵᠠᠯᠠᠭᠣ ᠨᠠᠰᠣᠨ ᠳ᠋ᠦ᠍ ᠲᠣᠷᠠᠯᠠᠯ ᠬᠡᠮᠡᠬᠦ ᠲᠠᠢᠰᠣᠨ ᠬᠠᠯᠲᠠᠨ ᠲᠣᠪᠲᠣᠯᠵᠦ᠂ ᠡᠰᠡᠷᠬᠦᠴᠡᠨ ᠪᠠᠢᠯᠲᠣᠬᠣ᠎ᠶᠢᠨ ᠵᠣᠷᠢᠬ ᠦᠭᠡᠢ ᠣᠯᠵᠠᠯᠠᠬᠲᠠᠵᠦ᠂ ᠬᠠᠢᠷᠠᠯᠠᠵᠦ ᠰᠠᠨᠠᠬᠣ᠎ᠶᠢᠨ ᠬᠠᠯᠠ ᠪᠡᠷ ᠬᠦᠷᠡᠩ ᠣᠯᠠᠭᠠᠨ ᠵᠢᠷᠦᠬᠡ ᠪᠠᠨ ᠵᠢᠮᠵᠢᠬᠢᠨᠡᠬᠦᠯᠦᠨ ᠣᠢᠮᠣᠷᠠᠭᠣᠯᠣᠨ᠎ᠠ᠃ ᠡᠳᠡ ᠪᠦᠬᠦᠨ᠎ᠢ ᠢᠯᠭᠣᠮ ᠲᠠᠪᠠᠵᠦ ᠢᠲᠡᠷ ᠨᠠᠰᠣᠨ᠎ᠤ ᠲᠦᠷᠦᠭᠡᠨ ᠳ᠋ᠦ ᠮᠣᠷᠲᠠᠵᠦ ᠣᠷᠲᠣ ᠠᠮᠢᠰᠬᠣᠬᠣ᠎ᠶᠢ ᠵᠠᠪᠲᠣᠲᠠᠯ᠎ᠠ ᠬᠠᠷᠢᠨ ᠦᠭᠡᠬᠦᠯᠡᠵᠦ ᠲᠠᠷᠭᠣᠯᠠᠭᠠᠳ ᠣᠴᠠᠭᠠᠷ ᠪᠣᠬᠢᠨᠢᠲᠣᠯ ᠬᠦᠷᠭᠡᠬᠦ ᠶᠣᠮ ᠡ᠃

ᠠᠢ ᠳ᠋ᠠ᠂ ᠮᠠᠷᠢᠶ᠎ᠠ ᠰᠢᠭᠣᠷᠠᠭᠣᠯᠬᠣ ᠭᠡᠵᠦ ᠮᠠᠨᠠᠢᠬᠢᠨ᠎ᠤ ᠬᠡᠯᠡᠲᠡᠭ 《ᠠᠯᠠᠭ᠎ᠠ ᠬᠦᠷᠪᠡᠬᠦᠯᠬᠦ》 ᠮᠡᠲᠦ ᠠᠮᠠᠷᠬᠠᠨ ᠪᠣᠯᠣᠬᠰᠠᠨ ᠴᠦ᠍ ᠪᠣᠯ ᠳ᠋ᠠ⁈