2024-09-23 14:57:32
ᠢᠳᠡᠭᠡᠨ ᠤ᠋ ᠰᠤᠩᠭᠤᠯᠳᠠ ᠤᠯᠠᠨ ᠪᠤᠯᠤᠬᠰᠠᠨ ᠴᠦ᠍ ᠪᠤᠯᠪᠠ ᠦᠦ ? ᠳᠤᠳᠠᠵᠤ ᠳᠤᠨᠳᠠᠷᠠᠵᠤ ᠪᠠᠢᠬᠰᠠᠨ ᠦᠭᠡᠢ ᠡᠴᠡ ᠴᠦ᠍ ᠪᠤᠯᠪᠠ ᠦᠦ ? ᠤᠳᠤ ᠵᠢᠨ ᠤᠯᠠᠨ ᠬᠡᠦᠬᠡᠳ ᠪᠠᠭᠠᠴᠤᠳ ᠢᠳᠡᠭᠡᠨ ᠤᠮᠳᠠᠭᠠᠨ ᠵᠢᠠᠨ ᠠᠰᠬᠠᠵᠤ ᠴᠢᠳᠬᠤᠬᠤ᠂ ᠨᠡᠩ ᠴᠢᠨᠠᠬᠰᠢᠯᠠᠨ ᠵᠤᠷᠢᠭᠤᠳᠠ ᠨᠠᠭᠠᠳᠴᠤ ᠪᠦᠷᠢᠯᠭᠡᠬᠦ ᠦᠵᠡᠭᠳᠡᠯ ᠢ᠋ ᠬᠤᠳᠠ ᠬᠦᠳᠡᠭᠡ ᠦᠭᠡᠢ ᠤᠯᠠᠨ ᠬᠠᠷᠠᠯᠠ᠃ ᠬᠠᠵᠠᠭᠤ ᠳ᠋ᠤᠨᠢ ᠰᠠᠭᠤᠬᠰᠠᠨ ᠠᠪᠤ ᠡᠵᠢ᠂ ᠬᠠᠳᠠᠭᠤᠬᠠᠨ ᠦᠶᠡ ᠵᠢ ᠲᠤᠭᠤᠯᠵᠤ ᠢᠷᠡᠭᠰᠡᠨ ᠡᠪᠦᠭᠡ ᠡᠮᠡᠭᠡ ᠨᠢ ᠴᠦ᠍ ᠭᠡᠰᠡᠨ ᠡᠩᠬᠦᠷᠡᠢᠯᠡᠵᠤ ᠬᠠᠢᠷᠠᠯᠠᠬᠤ ᠵᠢᠨ ᠡᠷᠬᠡᠨ ᠳ᠋ᠦ ᠦᠩᠭᠡ ᠵᠢᠨ ᠳᠡᠳᠦᠢ ᠬᠠᠰᠢᠬᠰᠠᠨ ᠦᠭᠡ ᠶᠠᠷᠢᠭᠠᠳ ᠯᠠ ᠦᠩᠭᠡᠷᠡᠬᠦ ᠨᠢ ᠬᠠᠴᠢᠨ ᠪᠢᠯᠡ᠃
ᠠᠮᠢᠳᠤᠷᠠᠯ ᠰᠠᠢᠵᠢᠷᠠᠵᠤ᠂ ᠨᠡᠢᠭᠡᠮ ᠬᠦᠭᠵᠢᠬᠦ ᠵᠢ ᠳᠠᠭᠠᠯᠳᠤᠨ ᠡᠳ᠋ ᠪᠤᠳᠠᠰ ᠬᠤᠮᠰᠠᠳᠠᠬᠤ ᠵᠢ ᠮᠡᠳᠡᠬᠦ ᠦᠭᠡᠢ ᠪᠤᠯᠤᠬᠰᠠᠨ ᠡᠴᠡ ᠤᠳᠤ ᠵᠢᠨ ᠬᠡᠦᠬᠡᠳ ᠪᠠᠭᠠᠴᠤᠳ ᠠᠷᠪᠢᠯᠠᠨ ᠭᠠᠮᠨᠠᠬᠤ ᠵᠢᠨ ᠲᠤᠬᠠᠢ ᠤᠬᠠᠮᠰᠠᠷ ᠳᠤᠳᠠᠮᠠᠭ ᠪᠠᠢᠨᠠ᠃ ᠠᠶᠠᠭᠠᠨ ᠳ᠋ᠠᠭᠠᠨ ᠪᠤᠳᠠᠭᠠ ᠦᠯᠡᠳᠡᠭᠡᠬᠦ ᠨᠢ ᠪᠤᠶᠠᠨ ᠵᠢᠠᠨ ᠦᠯᠡᠳᠡᠭᠡᠵᠤ ᠪᠠᠢᠬᠤ ᠶᠠᠪᠤᠳᠠᠯ᠂ ᠰᠦ ᠰᠠᠭᠠᠯᠢ ᠵᠢ ᠠᠰᠬᠠᠵᠤ ᠴᠢᠳᠬᠤᠬᠤ ᠨᠢ ᠮᠠᠭᠤ ᠢᠷᠸᠠ ᠭᠡᠳᠡᠭᠴᠢᠯᠡᠨ ᠮᠠᠨᠠᠢᠬᠢᠨ ᠡᠷᠳᠡ ᠳᠡᠭᠡᠳᠦ ᠡᠴᠡ ᠡᠬᠢᠯᠡᠨ ᠠᠷᠪᠢᠯᠠᠨ ᠭᠠᠮᠨᠠᠬᠤ ᠵᠢᠨ ᠴᠢᠬᠤᠯᠠ ᠴᠢᠨᠠᠷ ᠢ᠋ ᠴᠡᠭᠡᠷ ᠶᠤᠰᠤ᠂ ᠭᠡᠷ ᠤ᠋ᠨ ᠰᠤᠷᠭᠠᠯ ᠵᠢᠡᠷ ᠦᠶᠡ ᠳᠠᠮᠵᠢᠨ ᠤᠯᠠᠮᠵᠢᠯᠠᠵᠤ ᠢᠷᠡᠭᠰᠡᠨ ᠶᠤᠮ ᠃
ᠠᠷᠪᠢᠯᠠᠨ ᠭᠠᠮᠨᠠᠬᠤ ᠭᠡᠭᠴᠢ ᠪᠠᠶᠠᠨ ᠶᠠᠳᠠᠭᠤ ᠵᠢᠨ ᠢᠯᠭᠠᠭᠠ ᠦᠭᠡᠢ᠂ ᠪᠠᠢᠬᠤ ᠪᠠ ᠦᠭᠡᠢ ᠵᠢᠨ ᠪᠠᠢᠳᠠᠯ ᠬᠤᠪᠢᠶᠠᠬᠤ ᠦᠭᠡᠢ ᠪᠦᠬᠦᠳᠡᠭᠡᠷᠢᠶᠡᠨ ᠡᠷᠬᠢᠮᠨᠡᠨ ᠳᠡᠭᠡᠳᠦᠯᠡᠪᠡᠯ ᠵᠤᠬᠢᠬᠤ ᠵᠠᠩ ᠳᠠᠳᠬᠠᠯ ᠶᠤᠮ᠃ ᠭᠠᠬᠴᠠ ᠨᠦᠬᠦᠴᠡᠯ ᠲᠠᠢ ᠨᠦᠬᠦᠴᠡᠯ ᠦᠭᠡᠢ ᠵᠢᠨ ᠢᠪᠴᠤᠤ ᠬᠠᠷᠠᠭᠠᠰᠤ ᠡᠴᠡ ᠠᠷᠪᠢᠯᠠᠬᠤ ᠵᠢᠨ ᠴᠢᠬᠤᠯᠠ ᠵᠢ ᠬᠠᠷᠠᠵᠤ ᠪᠤᠯᠬᠤ ᠦᠭᠡᠢ᠂ ᠬᠠᠷᠢᠨ ᠡᠬᠢ ᠪᠠᠶᠠᠯᠢᠭ᠂ ᠡᠷᠬᠢᠮ ᠤᠬᠠᠮᠰᠠᠷ᠂ ᠤᠷᠴᠢᠨ ᠲᠤᠭᠤᠷᠢᠨ᠂ ᠤᠷᠴᠢᠯ ᠠᠰᠢᠬᠯᠠᠯᠳᠠ᠂ ᠦᠷᠭᠦᠯᠵᠢᠯᠡᠬᠦ ᠬᠦᠭᠵᠢᠯᠳᠡ᠂ ᠦᠷᠳᠡᠭ ᠤ᠋ᠨ ᠦᠵᠡᠯᠳᠡ ᠵᠡᠷᠭᠡ ᠡᠴᠡ ᠠᠷᠪᠢᠯᠠᠨ ᠭᠠᠮᠨᠠᠬᠤ ᠵᠢ ᠵᠦᠪ ᠵᠢᠡᠷ ᠳᠠᠨᠢᠵᠤ᠂ ᠴᠢᠬᠤᠯᠠᠴᠢᠯᠠᠨ ᠦᠵᠡᠬᠦ ᠶᠤᠰᠤᠳᠠᠢ ᠃
ᠬᠡᠦᠬᠡᠳ ᠪᠠᠭᠠᠴᠤᠳ ᠤ᠋ᠨ ᠠᠷᠪᠢᠯᠠᠨ ᠭᠠᠮᠨᠠᠬᠤ ᠵᠠᠩ ᠳᠠᠳᠬᠠᠯ ᠢ᠋ ᠬᠦᠮᠦᠵᠢᠬᠦᠯᠬᠦ ᠳ᠋ᠦ᠂ ᠶᠠᠭᠤᠨ ᠤ᠋ ᠡᠮᠦᠨᠡ ᠭᠡᠷ ᠤ᠋ᠨ ᠠᠬᠠᠮᠠᠳ ᠪᠤᠯᠤᠬᠰᠠᠳ ᠦᠪᠡᠷ ᠤ᠋ᠨ ᠪᠡᠶᠡ ᠪᠡᠷ ᠵᠢᠠᠨ ᠳᠠᠭᠤᠷᠢᠶᠠᠯ ᠪᠤᠯᠬᠤ ᠨᠢ ᠴᠢᠬᠤᠯᠠ᠃ ᠬᠡᠯᠡᠬᠦ ᠡᠴᠡ ᠬᠢᠬᠦ ᠨᠢ ᠦᠨᠡ ᠲᠠᠢ ᠭᠡᠵᠤ ᠬᠡᠯᠡᠳᠡᠭ ᠰᠢᠭ ᠵᠢᠡᠷ ᠬᠡᠯᠡᠵᠤ ᠰᠤᠷᠭᠠᠬᠤ ᠵᠢᠨ ᠤᠷᠤᠨ ᠳ᠋ᠦ ᠪᠡᠶᠡ ᠪᠡᠷ ᠵᠢᠠᠨ ᠬᠢᠵᠤ ᠦᠵᠡᠭᠦᠯᠬᠦ ᠨᠢ ᠨᠡᠩ ᠢᠯᠡᠭᠦᠦ ᠨᠦᠯᠦᠭᠡᠯᠡᠬᠦ ᠬᠦᠴᠦᠨ ᠲᠠᠢ᠃ ᠭᠡᠷ ᠤ᠋ᠨ ᠠᠬᠠᠮᠠᠳ ᠡᠳᠦᠷ ᠳᠤᠳᠤᠮ ᠤ᠋ᠨ ᠠᠮᠢᠳᠤᠷᠠᠯ ᠳᠤᠮᠳᠠ ᠪᠠᠨ ᠠᠷᠪᠢᠯᠠᠨ ᠭᠠᠮᠨᠠᠬᠤ ᠵᠢ ᠡᠷᠬᠢᠮᠨᠡᠨ ᠳᠡᠭᠡᠳᠦᠯᠡᠵᠤ᠂ ᠢᠳᠡᠵᠤ ᠤᠤᠭᠤᠬᠤ ᠶᠠᠪᠤᠵᠤ ᠰᠠᠭᠤᠬᠤ ᠡᠴᠡ ᠡᠬᠢᠯᠡᠨ ᠪᠦᠷᠢᠯᠭᠡᠵᠤ ᠰᠦᠢᠳᠭᠡᠬᠦ ᠵᠢ ᠴᠡᠭᠡᠷᠯᠡᠨ᠂ ᠡᠭᠦᠨ ᠤ᠋ ᠤᠯᠠᠮ ᠵᠢᠡᠷ ᠪᠠᠰᠠ ᠭᠡᠷ ᠪᠦᠯᠢ ᠵᠢᠨ ᠤᠷᠤᠯᠭᠠ ᠵᠠᠷᠤᠯᠭᠠ ᠪᠠᠨ ᠲᠦᠯᠦᠪᠯᠡᠨ ᠬᠡᠦᠬᠡᠳ ᠪᠠᠭᠠᠴᠤᠳ ᠲᠦ᠍ ᠤᠷᠤᠯᠭᠠ ᠵᠠᠷᠤᠯᠭᠠ ᠵᠢᠨ ᠲᠦᠯᠦᠪᠯᠡᠭᠡ ᠵᠢᠨ ᠴᠢᠬᠤᠯᠠ ᠴᠢᠨᠠᠷ ᠢ᠋ ᠳᠠᠨᠢᠭᠤᠯᠤᠨ ᠮᠡᠳᠡᠭᠦᠯᠵᠤ᠂ ᠠᠷᠪᠢᠯᠠᠨ ᠭᠠᠮᠨᠠᠬᠤ ᠡᠷᠬᠢᠮ ᠰᠤᠷᠳᠠᠯ ᠪᠠ ᠵᠦᠪ ᠬᠡᠷᠡᠭᠯᠡᠭᠡᠨ ᠤ᠋ ᠦᠵᠡᠯᠲᠡ ᠵᠢ ᠪᠦᠷᠢᠯᠳᠦᠬᠦᠯᠬᠦ ᠵᠢ ᠠᠭᠢᠭᠤᠯᠵᠤ ᠪᠤᠯᠤᠨᠠ ᠃
ᠳᠠᠷᠠᠭᠠ ᠨᠢ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤ᠋ ᠤᠷᠳᠤᠨ᠂ ᠮᠦᠽᠸᠢ᠂ ᠴᠢᠨᠠᠭᠰᠢᠯᠠᠨ ᠲᠠᠷᠢᠶᠠᠨ ᠭᠠᠵᠠᠷ᠂ ᠮᠠᠯᠤᠨ ᠪᠡᠯᠴᠢᠭᠡᠷ ᠵᠡᠷᠭᠡ ᠪᠡᠷ ᠳᠠᠭᠠᠭᠠᠤᠯᠤᠨ ᠲᠤᠭᠤᠷᠢᠬᠤ ᠪᠤᠶᠤ ᠨᠤᠮ ᠰᠡᠳᠬᠦᠯ᠂ ᠲᠸᠯᠸᠢᠰ ᠰᠦᠯᠵᠢᠶᠡ ᠪᠡᠷ ᠳᠠᠮᠵᠢᠨ ᠡᠬᠢ ᠪᠠᠶᠠᠯᠢᠭ ᠢ᠋ ᠠᠷᠪᠢᠯᠠᠬᠤ ᠵᠢᠨ ᠴᠢᠬᠤᠯᠠ ᠴᠢᠨᠠᠷ ᠤ᠋ᠨ ᠲᠤᠬᠠᠢ ᠨᠡᠩ ᠠᠮᠢᠳᠤᠯᠢᠭ ᠤᠢᠯᠠᠭᠠᠭᠤᠯᠵᠤ᠂ ᠡᠬᠢ ᠪᠠᠶᠠᠯᠢᠭ ᠢ᠋ ᠠᠷᠪᠢᠯᠠᠨ ᠭᠠᠮᠨᠠᠵᠤ᠂ ᠤᠷᠴᠢᠨ ᠲᠤᠭᠤᠷᠢᠨ ᠵᠢᠠᠨ ᠬᠠᠮᠠᠭᠠᠯᠠᠬᠤ ᠳ᠋ᠦ ᠦᠪᠡᠷ ᠤ᠋ᠨ ᠪᠡᠶᠡ ᠡᠴᠡ ᠭᠠᠷᠳᠠᠨ ᠬᠢᠬᠦ ᠵᠢ ᠳᠠᠨᠢᠭᠤᠯᠵᠤ ᠪᠤᠯᠤᠨᠠ᠃ ᠡᠢᠨ ᠬᠦ᠌ ᠦᠨᠳᠦᠰᠦᠨ ᠤᠢᠯᠠᠭᠠᠯᠳᠠ ᠲᠠᠢ ᠪᠤᠯᠤᠬᠰᠠᠨ ᠰᠠᠭᠤᠷᠢᠨ ᠳᠡᠭᠡᠷᠡ᠂ ᠭᠡᠷ ᠪᠦᠯᠢ ᠪᠡᠷ ᠵᠢᠠᠨ ᠬᠠᠷᠢᠯᠴᠠᠨ ᠬᠢᠨᠠᠯᠳᠠ ᠳᠠᠯᠪᠢᠵᠤ᠂ ᠬᠦᠬᠢᠬᠦᠯᠦᠨ ᠤᠷᠮᠠᠰᠢᠭᠤᠯᠵᠤ᠂ ᠰᠢᠭᠦᠮᠵᠢᠯᠡᠨ ᠪᠤᠷᠤᠭᠤᠰᠢᠶᠠᠬᠤ ᠵᠢ ᠬᠠᠪᠰᠤᠷᠭᠠᠨ ᠠᠷᠪᠢᠯᠠᠬᠤ ᠠᠵᠢᠯᠯᠠᠭᠠ ᠵᠢ ᠡᠳᠦᠷ ᠳᠤᠳᠤᠮ ᠤ᠋ᠨ ᠠᠮᠢᠳᠤᠷᠠᠯ ᠳ᠋ᠠᠭᠠᠨ ᠦᠷᠭᠦᠯᠵᠢᠯᠡᠨ ᠪᠠᠷᠢᠮᠳᠠᠯᠠᠨ ᠬᠢᠵᠤ᠂ ᠭᠡᠷ ᠪᠦᠯᠢ ᠵᠢᠨ ᠬᠦᠮᠦᠵᠢᠯ ᠤ᠋ᠨ ᠴᠢᠬᠤᠯᠠ ᠠᠭᠤᠯᠭᠠ ᠪᠤᠯᠭᠠᠨ ᠪᠦᠬᠦᠳᠡᠭᠡᠷ ᠵᠢᠠᠨ ᠤᠷᠤᠯᠴᠠᠵᠤ ᠲᠤᠭᠤᠰᠢᠯᠠᠭᠤᠯᠵᠤ ᠪᠤᠯᠤᠨᠠ᠃ ᠢᠩᠬᠢᠪᠡᠯ ᠬᠡᠦᠬᠡᠳ ᠤ᠋ᠨ ᠠᠷᠪᠢᠯᠠᠨ ᠭᠠᠮᠨᠠᠬᠤ ᠵᠠᠩ ᠴᠢᠨᠠᠷ ᠢ᠋ ᠨᠡᠩ ᠬᠢᠯᠪᠡᠷ ᠵᠢᠡᠷ ᠬᠦᠮᠦᠵᠢᠬᠦᠯᠵᠤ ᠴᠢᠳᠠᠨᠠ᠃
《ᠬᠦᠮᠦᠨ ᠪᠤᠯᠬᠤ ᠪᠠᠭᠠ ᠡᠴᠡ ᠪᠠᠨ᠂ ᠬᠦᠯᠦᠭ ᠪᠤᠯᠬᠤ ᠤᠨᠠᠭᠠᠨ ᠡᠴᠡ ᠪᠠᠨ 》 ᠭᠡᠳᠡᠭ ᠵᠢᠡᠷ ᠬᠡᠦᠬᠡᠳ ᠪᠠᠭᠠ ᠤᠬᠠᠭᠠᠨ ᠰᠠᠭᠤᠬᠤ ᠪᠤᠯᠤᠭᠠ ᠦᠭᠡᠢ ᠭᠡᠵᠤ ᠤᠬᠤᠷᠢᠵᠤ ᠤᠷᠬᠢᠵᠤ ᠠᠷᠪᠢᠯᠠᠨ ᠭᠠᠮᠨᠠᠬᠤ ᠵᠢᠨ ᠲᠤᠬᠠᠢ ᠭᠡᠷ ᠪᠦᠯᠢ ᠵᠢᠨ ᠬᠦᠮᠦᠵᠢᠯ ᠢ᠋ ᠤᠮᠳᠤᠭᠠᠢᠯᠠᠵᠤ ᠬᠦᠩᠭᠡᠪᠴᠢᠯᠡᠵᠤ ᠶᠠᠭᠠᠬᠢᠬᠰᠠᠨ ᠴᠦ᠍ ᠪᠤᠯᠬᠤ ᠦᠭᠡᠢ᠃ 《ᠰᠤᠷᠤᠬᠰᠠᠨ ᠵᠠᠩ ᠢ᠋ ᠰᠤᠷ ᠵᠢᠡᠷ ᠪᠤᠭᠤᠵᠤ ᠴᠢᠳᠠᠬᠤ ᠦᠭᠡᠢ》 ᠭᠡᠵᠤ ᠭᠡᠷ ᠤ᠋ᠨ ᠠᠬᠠᠮᠠᠳ ᠦᠪᠡᠷ ᠢ᠋ ᠪᠠᠨ ᠠᠩᠬᠠᠷᠬᠤ ᠦᠭᠡᠢ ᠪᠠᠢᠵᠤ ᠨᠡᠩ ᠴᠦ᠍ ᠪᠤᠯᠬᠤ ᠦᠭᠡᠢ ᠶᠤᠮ᠃ ᠠᠷᠪᠢᠯᠠᠬᠤ ᠵᠢ ᠠᠮᠠᠰᠠᠷ ᠡᠴᠡ ᠨᠢ᠂ ᠠᠷᠪᠢᠯᠠᠬᠤ ᠵᠢ ᠤᠳᠤ ᠡᠴᠡ᠂ ᠠᠷᠪᠢᠯᠠᠬᠤ ᠵᠢ ᠪᠡᠶᠡ ᠡᠴᠡ ᠪᠠᠨ ᠡᠬᠢᠯᠡᠨ ᠡᠷᠬᠢᠮᠨᠡᠵᠤ᠂ ᠬᠡᠦᠬᠡᠳ ᠪᠠᠭᠠᠴᠤᠳ ᠲᠠᠭᠠᠨ ᠤᠯᠠᠮᠵᠢᠯᠠᠨ ᠵᠢᠭᠠᠵᠤ ᠪᠠᠢᠶᠠ !
- ᠨᠠᠢᠷᠠᠭᠤᠯᠤᠭ᠍ᠴᠢ᠄
- ᠨᠡᠪᠲᠡᠷᠡᠭᠦᠯᠦᠭᠴᠢ᠄
- ᠮᠡᠷᠭᠡᠵᠢᠯ᠄
ᠨᠠᠢᠷᠠᠭᠤᠯᠤᠭ᠍ᠴᠢ᠄ ᠮᠦᠩᠭᠦᠨᠬᠤᠸᠠᠷ
ᠣᠷᠴᠢᠭᠤᠯᠤᠭ᠍ᠴᠢ᠄




ᠰᠢᠭᠦᠮᠵᠢ ᠠᠯᠠᠭᠠ ᠂ ᠬᠤᠷᠳᠤᠨ ᠨᠢᠭᠡᠳᠦᠭᠡᠷ ᠵᠤᠷᠪᠤᠰ ᠰᠢᠭᠦᠮᠵᠢ ᠨᠡᠢ᠌ᠲᠡᠯᠡᠭᠡᠷᠡᠢ᠃