2026-10-28 16:16:58


ᠪᠤᠶᠠᠨᠪᠠᠲᠤ᠂ ᠠᠯᠠᠱᠠ ᠠᠢᠮᠠᠭᠤᠨ ᠠᠯᠠᠱᠠ ᠪᠠᠷᠠᠭᠤᠨ ᠬᠣᠰᠢᠭᠤᠨᠤ ᠤᠤᠭᠠᠯ᠃ ᠣᠳᠣ᠌ ᠪᠠᠶᠠᠨᠬᠣᠲᠠᠶᠢᠨ ᠰᠠᠭᠤᠭᠠᠯᠢ ᠃ ᠠᠯᠠᠱᠠ ᠠᠢᠮᠠᠭᠤᠨ ᠤᠤᠯᠤᠨ ᠮᠣᠩᠭᠣᠯ ᠦᠨᠳᠦᠰᠦᠲᠡᠨᠦ ᠪᠦᠷᠢᠨ ᠳᠤᠮᠳᠠᠳᠤ ᠰᠤᠷᠭᠠᠭᠤᠯᠢᠳᠦ ᠪᠠᠭ᠍ᠰᠢᠶᠢᠨ ᠠᠯᠪᠠ ᠬᠠᠰᠢᠵᠤ ᠪᠠᠢᠭᠠᠳ ᠣᠳᠣ᠌ ᠲᠡᠳᠭᠦᠪᠦᠷᠢᠳᠦ ᠭᠠᠷᠤᠭᠠᠳ ᠪᠠᠢᠨᠠ ᠃ 1986 ᠣᠨᠠᠴᠠ ᠤᠷᠠᠨ ᠵᠣᠬᠢᠶᠠᠯᠤᠨ ᠶᠢᠷᠲᠢᠨᠴᠦᠳᠦ ᠠᠩᠬᠠ ᠬᠥᠯ ᠲᠠᠯᠪᠢᠭ᠍ᠰᠠᠨᠠᠴᠠ ᠣᠳᠣ᠌ ᠪᠣᠯᠳᠠᠯᠠ ᠠᠢᠮᠠᠭ᠂ ᠣᠷᠣᠨ᠂ ᠤᠯᠤᠰᠤᠨ ᠳᠡᠰᠦᠨ ᠰᠣᠨᠢᠨ ᠰᠡᠳᠬᠦᠯᠳᠦ ᠮᠢᠩᠭᠠᠭᠠᠳ ᠰᠢᠯᠦᠭ᠂ ᠭᠤᠷᠪᠠᠨ ᠵᠠᠭᠤ ᠣᠷᠴᠢᠮ ᠨᠠᠢᠷᠠᠭᠤᠯᠤᠯ᠂ ᠪᠠᠰᠠ ᠴᠥᠭᠡᠨ ᠬᠡᠮᠵᠢᠶᠡᠨᠦ ᠰᠢᠭᠦᠮᠵᠢ᠂ ᠥᠭᠥᠯᠡᠯᠭᠡ ᠨᠡᠢᠲᠡᠯᠡᠪᠡ᠃
《ᠭᠠᠵᠠᠷ ᠤ᠋ᠨ ᠲᠠᠮᠠᠭᠠ》᠂《ᠲᠡᠭᠷᠢ ᠶ᠋ᠢᠨ ᠲᠠᠮᠠᠭᠠ》᠂ 《 ᠬᠦᠮᠦᠨᠤ ᠲᠠᠮᠠᠭᠠ 》 ᠂《 ᠨᠡᠭᠦᠳᠡᠯ ᠡᠷᠴᠢᠰ》 ᠂ 《 ᠲᠣᠲᠣᠭᠠᠳᠤ ᠶᠢᠷᠲᠢᠨᠴᠦᠶᠢᠨ ᠰᠠᠴᠤᠷᠠᠭ 》᠂《ᠬᠣᠶᠠᠷ ᠮᠣᠳᠣᠨᠤ ᠳᠤᠷᠠᠯᠠᠯ》 ᠭᠡᠬᠦ ᠨᠠᠢᠷᠠᠭᠤᠯᠤᠯ ᠤ᠋ᠨ ᠲᠡᠭᠦᠪᠦᠷᠢ ᠪᠠ 《ᠲᠤᠯᠤᠭᠠᠠ ᠪᠤᠷᠬᠠᠠᠤ ᠠᠶᠠᠯᠭᠤ》᠂ 《 ᠶᠢᠰᠦᠨ ᠡᠷᠳᠡᠨᠢ ᠶ᠋ᠢᠨ ᠠᠶᠠᠯᠭᠤ》《ᠳ᠋ᠸᠪᠠᠵᠠᠨᠦ ᠰᠢᠪᠠᠭᠤ》᠂《 ᠨᠠᠮ ᠭᠦᠮ ᠤ᠋ᠨ ᠴᠠᠭᠠᠨᠠ》 ᠭᠡᠬᠦ ᠰᠢᠯᠦᠭ ᠤ᠋ᠨ ᠨᠤᠮ ᠲᠠᠢ᠃ ᠵᠠᠷᠢᠮ ᠪᠦᠳᠦᠭᠡᠯ ᠨᠢ ᠬᠢᠳᠡᠳ᠂ ᠠᠩᠭ᠌ᠯᠢ᠂ ᠤᠷᠤᠰ᠂ ᠭᠸᠷᠮᠠᠨ ᠬᠡᠯᠡᠡ ᠳ᠋ᠥ ᠤᠷᠴᠢᠭᠤᠯᠤᠭᠳᠠᠵᠦ᠂《 ᠶᠢᠰᠦᠨ ᠡᠷᠳᠡᠨᠢ ᠶ᠋ᠢᠨ ᠠᠶᠠᠯᠭᠤ》《ᠢᠷᠠᠭᠤ ᠨᠠᠢᠷᠠᠭ ᠢ᠋ᠶ᠋ᠡᠷ ᠲᠠᠢᠳᠬᠤᠷᠠᠬᠤᠢ》《 ᠣᠶᠣᠨᠯᠢᠭ᠋ ᠮᠣᠳᠣᠨᠤ ᠵᠢᠮᠢᠰ》᠂《ᠬᠦᠷᠦᠭ ᠰᠢᠯᠦᠭ》᠂《 ᠵᠡᠯᠢᠭᠦᠳ ᠵᠡᠭᠦᠳᠦᠨᠦ ᠵᠡᠷᠭᠡᠯᠭᠡᠨ》 ᠵᠡᠷᠬᠡ ᠰᠢᠯᠦᠭ ᠤ᠋ᠨ ᠨᠣᠮ ᠪᠠ《ᠮᠤᠩᠭᠤᠯ ᠬᠠᠶᠢᠭ᠋ ᠲᠠᠢ ᠰᠠᠯᠬᠢ》 ᠨᠠᠢᠷᠠᠭᠤᠯᠤᠯ ᠤ᠋ᠨ ᠲᠡᠭᠦᠪᠦᠷᠢ ᠂《 ᠭᠦᠨ ᠪᠣᠳᠣᠯᠤᠨ ᠳᠣᠯᠭᠢᠰ》 ᠥᠭᠦᠯᠡᠯᠭᠡ ᠨᠠᠢᠷᠠᠭᠤᠯᠤᠯᠤᠨ ᠲᠡᠭᠦᠪᠦᠷᠢᠪᠠᠨ ᠮᠤᠩᠭᠤᠯ ᠤᠯᠤᠰ ᠲᠣ᠌ ᠬᠡᠪᠯᠡᠭᠦᠯᠪᠡ᠃ 《 THE land where my dream revived 》 ᠪᠤᠶᠤ 《 ᠮᠥᠷᠥᠭᠡᠳᠦᠯ ᠠᠮᠢᠯᠠᠭᠰᠠᠨ ᠭᠠᠵᠠᠷ》᠂《Circle of Thought 》 ᠪᠤᠶᠤ 《 ᠰᠡᠳᠬᠢᠯᠦᠨ ᠲᠣᠭᠣᠷᠢᠭ᠋ 》 ᠵᠡᠷᠭᠡ ᠠᠩᠭ᠌ᠯᠢ ᠬᠡᠯᠡᠨᠤ ᠪᠠ《В ПОИСКАХ ᠁》 ᠪᠤᠶᠤ 《 ᠡᠷᠢᠯᠦᠨ ᠦᠵᠦᠭᠦᠷᠲᠦ ᠁ 》 ᠭᠡᠬᠦ ᠣᠷᠣᠰ ᠬᠡᠯᠡᠨᠦ ᠡᠰᠰᠸ ᠪᠠ ᠥᠭᠦᠯᠡᠯᠭᠡᠶᠢᠨ ᠨᠣᠮ ᠢ᠋ᠶ᠋ᠡᠨ ᠤᠷᠢᠳ ᠬᠣᠵᠢᠳ ᠮᠣᠩᠭᠤᠯ ᠤᠯᠤᠰ ᠤ᠋ᠨ ᠤᠯᠠᠭᠠᠨᠪᠠᠭᠠᠲᠤᠷ ᠲᠣ᠌ ᠬᠡᠪᠯᠡᠬᠦᠯᠦᠨ ᠲᠠᠷᠠᠬᠭᠠᠪᠠ᠃



ᠪᠦᠬᠦ ᠤᠯᠤᠰ ᠤ᠋ᠨ《ᠳᠣᠷᠣᠨᠠ》 ᠱᠠᠩᠨᠠᠯᠲᠤ ᠢᠷᠠᠭᠤ ᠨᠠᠢᠷᠠᠭ᠍ᠴᠢ᠂ ᠦᠪᠦᠷ ᠮᠣᠩᠭᠣᠯ ᠤ᠋ᠨ 《ᠰᠣᠯᠣᠩᠭᠠ》ᠱᠠᠩᠨᠠᠯᠲᠤ ᠵᠣᠬᠢᠶᠠᠯᠴᠢ᠃ ᠪᠦᠬᠦ ᠤᠯᠤᠰ ᠤ᠋ᠨ ᠲᠦᠷᠪᠡᠳᠦᠭᠡᠷ ᠤᠳᠠᠭᠠᠠᠤ 《ᠲᠡᠭᠷᠢ ᠶ᠋ᠢᠨ ᠪᠤᠳᠤᠭᠤ》 ᠰᠢᠯᠦᠭ ᠤ᠋ᠨ ᠨᠠᠭᠠᠳᠣᠮᠳᠦ ᠲᠡᠷᠢᠬᠦᠨ ᠪᠠᠢᠷᠢ ᠡᠵᠡᠯᠡᠪᠡ᠃ 2012 ᠣᠨ ᠳ᠋ᠥ ᠮᠣᠩᠭᠣᠯ ᠤᠯᠤᠰᠤᠨ ᠴᠢᠯᠦᠭᠡᠲᠦ ᠵᠣᠬᠢᠶᠠᠯᠴᠢᠳᠤᠨ ᠬᠣᠯᠪᠣᠭᠠᠨᠤ ᠤᠷᠢᠯᠭᠠ ᠪᠠᠷ ᠮᠣᠩᠭᠣᠯ ᠤᠯᠤᠰ ᠲᠦ᠍ ᠪᠣᠯᠣᠭᠰᠠᠨ《 ᠠᠯᠲᠠᠨ ᠭᠥᠷᠥᠭᠡᠰᠦ》ᠣᠯᠠᠨ ᠤᠯᠤᠰᠤᠨ ᠵᠠᠯᠠᠭᠤ ᠵᠣᠬᠢᠶᠠᠯᠴᠢᠳᠤᠨ ᠴᠢᠭᠤᠯᠭᠠᠨ ᠳ᠋ᠥ ᠣᠷᠣᠯᠴᠠᠭᠰᠠᠨ ᠪᠥᠭᠡᠳ 2016 ᠣᠨᠤ 9 ᠰᠠᠷᠠ ᠳ᠋ᠥ ᠮᠣᠩᠭᠣᠯ ᠤᠯᠤᠰᠤᠨ ᠵᠣᠬᠢᠶᠠᠯᠴᠢᠳᠤᠨ ᠡᠪᠯᠡᠯᠡᠴᠡ ᠰᠣᠶᠣᠷᠬᠠᠭᠰᠠᠨ《ᠤᠳᠬᠠ ᠵᠣᠬᠢᠶᠠᠯᠤᠨ ᠲᠥᠯᠥᠭᠡ》 ᠬᠦᠨᠳᠦᠲᠦ ᠱᠠᠩᠨᠠᠯᠢ ᠬᠦᠷᠲᠡᠭᠰᠡᠨ ᠶᠤᠮ᠃ 2017 ᠣᠨᠤ 8 ᠰᠠᠷᠠ ᠳ᠋ᠥ ᠮᠣᠩᠭᠤᠯ ᠤᠯᠤᠰ ᠤ᠋ᠨ ᠤᠯᠠᠭᠠᠨᠪᠠᠭᠠᠲᠤᠷ ᠬᠣᠲᠠᠨᠠ ᠪᠣᠯᠣᠭᠰᠠᠨ ᠳᠡᠯᠡᠬᠡᠢ ᠶ᠋ᠢᠨ ᠢᠷᠠᠭᠤ ᠨᠠᠢᠷᠠᠭ ᠤ᠋ᠨ 37 ᠳ᠋ᠤᠭᠠᠷ ᠶᠡᠬᠡ ᠬᠤᠷᠠᠯ ᠳ᠋ᠥ ᠤᠷᠢᠯᠭᠠ ᠪᠠᠷ ᠣᠷᠣᠯᠴᠠᠪᠠ᠃ 2019 ᠣᠨᠤ 6 ᠰᠠᠷᠠ ᠳ᠋ᠥ ᠪᠣᠯᠣᠭᠰᠠᠨ ᠪᠦᠬᠦ ᠤᠯᠤᠰ ᠤ᠋ᠨ ᠬᠡᠪᠴᠢᠶᠠᠨᠤ《ᠦᠨᠢᠷ ᠴᠡᠴᠡᠭ》 ᠤᠷᠠᠨ ᠵᠣᠬᠢᠶᠠᠯ ᠤ᠋ᠨ ᠤᠷᠤᠯᠳᠤᠭᠠᠨ ᠳ᠋ᠥ 《ᠲᠥᠭᠡᠷᠢᠭᠰᠡᠨ ᠰᠦᠨᠡᠰᠦᠨᠤ ᠦᠴᠢᠯ》(ᠨᠠᠢᠷᠠᠭᠤᠯᠤᠯ) ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠲᠡᠷᠢᠭᠦᠨ ᠪᠠᠢᠷᠢ ᠡᠵᠡᠯᠡᠪᠡ᠃ 2026 ᠣᠨᠤ 8 ᠰᠠᠷᠠᠳᠤ᠂ ᠮᠣᠩᠭᠣᠯ ᠤᠯᠤᠰᠲᠤ ᠪᠣᠯᠣᠭᠰᠠᠨ ᠳ·ᠨᠠᠴᠤᠭᠳᠣᠷᠵᠢᠶᠢᠨ ᠮᠡᠨᠳᠦᠯᠡᠭᠰᠡᠨᠦ 120 ᠵᠢᠯᠦᠨ ᠣᠢᠳᠤ ᠵᠣᠷᠢᠭᠤᠯᠤᠭᠰᠠᠨ 《ᠡᠬᠡ ᠨᠤᠲᠤᠭ》 ᠮᠣᠩᠭᠣᠯ ᠲᠤᠭᠤᠷᠭᠠᠲᠠᠨᠤ ᠣᠯᠠᠨ ᠤᠯᠤᠰᠤᠨ ᠢᠷᠠᠭᠤ ᠨᠠᠢᠷᠠᠭᠤᠨ ᠨᠠᠭᠠᠳᠤᠮᠳᠤ ᠣᠷᠣᠯᠴᠠᠨ ᠳᠡᠳ᠋ ᠪᠠᠢᠷᠢ ᠡᠵᠡᠯᠡᠭᠰᠡᠨ ᠪᠥᠭᠡᠳ ᠮᠣᠩᠭᠣᠯ ᠤᠯᠤᠰᠤᠨ ᠰᠣᠶᠣᠯ᠂ ᠰᠫᠣᠷᠲ᠂ ᠠᠶᠠᠯᠠᠯ ᠵᠢᠭᠤᠯᠴᠢᠯᠠᠯᠤᠨ ᠶᠠᠮᠤᠨᠠᠴᠠ ᠣᠯᠭᠣᠭᠰᠠᠨ 《ᠰᠣᠶᠣᠯᠤᠨ ᠲᠡᠷᠢᠭᠦᠨᠦ ᠠᠵᠢᠯᠲᠠᠨ 》 ᠤ᠋ ᠬᠦᠨᠳᠦᠲᠦ ᠲᠡᠮᠳᠡᠭᠢᠶᠡᠷ ᠱᠠᠩᠨᠠᠭᠤᠯᠵᠤ᠂ ᠦᠨᠡᠯᠡᠮᠵᠢ ᠭᠠᠷᠳᠠᠪᠠ᠃
ᠤᠳᠣ᠌᠂ ᠳᠤᠮᠳᠠᠳᠤ ᠤᠯᠤᠰ ᠤ᠋ᠨ ᠵᠣᠬᠢᠶᠠᠯᠴᠢᠳ ᠤ᠋ᠨ ᠡᠪᠯᠡᠯ ᠤ᠋ᠨ ᠭᠡᠰᠢᠭᠦᠨ᠂ ᠲᠤᠮᠳᠠᠳᠤ ᠤᠯᠤᠰ ᠤ᠋ᠨ ᠴᠦᠭᠡᠡ ᠲᠤᠭᠠᠳᠤ ᠦᠨᠳᠦᠰᠦᠳᠡᠡᠤ ᠵᠤᠬᠢᠶᠠᠯᠴᠢᠳ ᠤ᠋ᠨ ᠡᠪᠯᠡᠯ ᠤ᠋ᠨ ᠭᠡᠰᠢᠬᠦᠨ᠂ ᠲᠤᠮᠳᠠᠳᠣ᠌ ᠤᠯᠤᠰ ᠤ᠋ᠨ ᠨᠠᠢᠷᠠᠭᠤᠯᠤᠯ ᠤ᠋ᠨ ᠵᠤᠬᠢᠶᠠᠯᠴᠢᠳ ᠤ᠋ᠨ ᠡᠪᠯᠡᠯ ᠤ᠋ᠨ ᠭᠡᠰᠢᠬᠦᠨ᠂ ᠦᠪᠦᠷ ᠮᠤᠩᠭᠤᠯ ᠤ᠋ᠨ ᠵᠤᠬᠢᠶᠠᠯᠴᠢᠳ ᠤ᠋ᠨ ᠡᠪᠯᠡᠯ ᠤ᠋ᠨ ᠭᠡᠰᠢᠬᠦᠨ᠃ ᠥᠪᠥᠷ ᠮᠣᠩᠭᠣᠯᠤᠨ ᠰᠢᠭᠦᠮᠵᠢᠯᠡᠭᠴᠢᠳᠦᠨ ᠨᠡᠢᠭᠡᠮᠯᠢᠭᠦᠨ ᠪᠠᠢᠩᠭᠤᠶᠢᠨ ᠬᠡᠷᠡᠭ ᠡᠷᠬᠢᠯᠡᠭᠴᠢ ᠂ ᠠᠯᠠᠱᠠ ᠠᠢᠮᠠᠭᠤᠨ ᠤᠳᠬᠠ ᠤᠷᠠᠯᠢᠭ᠋ᠤᠨ ᠰᠢᠭᠦᠮᠵᠢᠯᠡᠭᠴᠢᠳᠤᠨ ᠨᠡᠢᠭᠡᠮᠯᠢᠭᠦᠨ ᠳᠡᠳ᠋ ᠲᠡᠷᠢᠭᠦᠯᠡᠭᠴᠢ᠂ ᠳᠡᠯᠡᠬᠡᠢᠶᠢᠨ ᠵᠣᠬᠢᠶᠠᠯᠴᠢᠳᠤᠨ ᠪᠠᠢᠭᠤᠯᠭᠠᠶᠢᠨ ᠭᠡᠰᠢᠭᠦᠨ ᠵᠡᠷᠭᠡ ᠴᠣᠯᠠ ᠮᠢᠨᠲᠠᠬ ᠲᠠᠢ ᠶᠠᠪᠣᠭᠠ ᠃
ᠮᠥᠩᠭᠥᠨ ᠪᠤᠭᠤᠷᠤᠯ ᠡᠪᠦᠯ ᠬᠠᠮᠤᠭᠤᠨ ᠲᠦᠷᠦᠭᠦᠨᠳᠤ ᠠᠯᠠᠱᠠ ᠠᠭᠤᠯᠠᠶᠢᠨ ᠵᠤᠯᠠᠢᠳᠤ ᠮᠣᠷᠢᠯᠠᠨ ᠢᠷᠡᠬᠦ ᠪᠥᠭᠡᠳ ᠶᠡᠬᠡ ᠣᠷᠣᠢᠲᠠᠵᠤ ᠪᠤᠴᠠᠨᠠ᠃ ᠪᠦᠷ ᠵᠣᠨᠤ ᠵᠢᠷᠭᠤᠭᠠᠨ ᠰᠠᠷᠠ ᠪᠣᠯᠴᠢᠬᠠᠭᠰᠠᠨ ᠪᠠᠢᠬᠤᠳᠤ ᠠᠭᠤᠯᠠᠶᠢᠨ ᠲᠣᠯᠣᠭᠠᠢᠳᠤ ᠴᠠᠰᠤ ᠴᠠᠢᠯᠵᠠᠨ ᠬᠠᠷᠠᠭᠳᠠᠭᠰᠠᠭᠠᠷ ᠪᠠᠢᠳᠠᠭ ᠪᠢᠯᠡ᠃ ᠡᠪᠦᠯ ᠬᠡᠮᠡᠬᠦ ᠴᠠᠭᠠᠨ ᠡᠪᠦᠭᠡᠨ ᠠᠯᠠᠱᠠ ᠠᠭᠤᠯᠠᠶᠢᠨ ᠮᠢᠨᠢ ᠣᠩᠭᠣᠨ ᠨᠢᠷᠤᠭᠤᠨ ᠳᠡᠭᠡᠷᠡ ᠤᠳᠠᠭᠠᠨ ᠲᠤᠬᠠᠯᠠᠨ ᠰᠠᠭᠠᠲᠠᠬᠤ ᠳᠤᠷᠠᠲᠠᠢ ᠶᠤᠮ ᠰᠠᠨᠵᠠᠢ᠃
ᠮᠠᠨᠤ ᠬᠢᠨ ᠠᠯᠢ ᠡᠷᠲᠡᠨᠡᠴᠡ ᠡᠪᠦᠭᠡᠨ ᠪᠤᠭᠤᠷᠤᠯᠤᠳᠢᠶᠠᠨ ᠠᠭᠤᠯᠠᠪᠠᠷ ᠵᠦᠢᠷᠯᠡᠳᠡᠭ ᠨᠢ ᠤᠴᠢᠷᠲᠠᠢ᠃ ᠲᠡᠷᠡ ᠰᠦᠷ ᠪᠠᠷᠠ᠂ ᠲᠡᠷᠡ ᠨᠥᠮᠥᠷᠢ ᠨᠥᠭᠡᠯᠭᠡ᠂ ᠲᠡᠷᠡ ᠪᠠᠭᠤᠷᠢ ᠰᠠᠭᠤᠷᠢ᠂ ᠲᠡᠷᠡ ᠦᠵᠡᠭᠰᠡᠨ ᠲᠤᠭᠤᠯᠤᠭᠰᠠᠨ ᠪᠥᠬᠥᠨ ᠁ ᠭᠡᠳ ᠠᠯᠢ ᠴᠤ᠌ ᠲᠠᠯᠠᠪᠠᠷᠢᠶᠠᠨ ᠠᠳᠠᠯᠢ ᠲᠥᠰᠥᠭᠡᠲᠡᠢᠶᠢ ᠬᠡᠯᠡᠭᠡᠳ ᠶᠠᠭᠠᠭᠢᠬᠤᠪ᠃
ᠠᠯᠠᠱᠠ ᠠᠭᠤᠯᠠ ᠪᠣᠯ ᠥᠪᠥᠷ ᠮᠣᠩᠭᠣᠯᠤᠨ ᠥᠪᠡᠷᠲᠡᠭᠡᠨ ᠵᠠᠰᠠᠬᠤ ᠣᠷᠣᠨᠤ ᠠᠯᠠᠱᠠ ᠠᠢᠮᠠᠭ ᠪᠣᠯᠣᠨ ᠨᠢᠩᠰᠢᠶᠠᠶᠢᠨ ᠬᠣᠲᠣᠩ ᠦᠨᠳᠦᠰᠦᠲᠡᠨᠦ ᠥᠪᠡᠷᠲᠡᠭᠡᠨ ᠵᠠᠰᠠᠬᠤ ᠣᠷᠣᠨᠤ ᠨᠤᠲᠤᠭ ᠳᠡᠪᠢᠰᠭᠡᠷᠦᠨ ᠵᠠᠭᠠᠭ ᠪᠣᠯᠣᠨ ᠰᠦᠨᠳᠡᠷᠯᠡᠵᠦ᠂ ᠤᠷᠲᠤᠪᠠᠷᠢᠶᠠᠨ 250 ᠭᠠᠷᠤᠢ ᠺᠢᠯᠣᠮᠧᠲᠷ᠂ ᠬᠠᠮᠤᠭᠤᠨ ᠥᠨᠳᠥᠷ ᠣᠷᠭᠢᠯ ᠪᠣᠯᠬᠤ ᠳᠠᠯᠠᠩ ᠬᠣᠷᠣᠭᠠ ᠨᠢ ᠳᠠᠯᠠᠢᠶᠢᠨ ᠲᠦᠪᠰᠢᠨᠡᠴᠡ 3556.1 ᠮᠸᠲᠷ ᠪᠠᠢᠳᠠᠭ᠃ ᠳᠤᠮᠳᠠᠳᠤ ᠤᠯᠤᠰᠤᠨ ᠤᠯᠠᠷᠢᠯᠤᠨ ᠰᠠᠯᠬᠢᠨᠤ ᠣᠷᠣᠨ ᠪᠣᠯᠣᠨ ᠤᠯᠠᠷᠢᠯᠤᠨ ᠪᠤᠰᠤ ᠰᠠᠯᠬᠢᠨᠤ ᠣᠷᠣᠨ᠂ ᠡᠯᠡᠰᠦᠨ ᠴᠥᠯ ᠪᠣᠯᠣᠨ ᠲᠠᠯᠠ ᠬᠡᠭᠡᠷᠡ ᠨᠤᠲᠤᠭᠤᠨ ᠴᠢᠬᠤᠯᠠ ᠵᠠᠭᠠᠭ ᠪᠣᠯᠣᠭᠠᠳ ᠲᠡᠭᠷᠢ ᠡᠯᠡᠰᠦᠨᠦ ᠡᠮᠦᠨᠡᠰᠢ ᠠᠮᠠᠭᠠᠢ ᠵᠢᠯᠣᠭᠣ᠌ ᠦᠭᠡᠢ ᠳᠣᠪᠲᠣᠯᠬᠤᠶᠢ ᠬᠥᠨᠳᠡᠯᠢᠰᠦᠨ ᠬᠣᠷᠢᠭ᠍ᠯᠠᠵᠤ᠂ ᠨᠢᠩᠰᠢᠶᠠᠶᠢᠨ ᠲᠠᠷᠢᠶᠠᠯᠠᠩᠤᠨ ᠣᠷᠣᠨᠢ ᠦᠯᠡᠮᠵᠢ ᠲᠣᠮᠣ᠌ ᠯᠠᠭ᠍ᠱᠠᠨ ᠪᠡᠶᠡᠪᠡᠷᠢᠶᠡᠨ ᠬᠠᠯᠬᠠᠯᠠᠵᠤ ᠬᠠᠮᠠᠭᠠᠯᠠᠵᠤ ᠢᠷᠡᠭᠰᠡᠨ 《 ᠭᠠᠪᠢᠶᠠᠲᠤ ᠵᠠᠩᠵᠦᠨ》 ᠠᠷᠭᠠ ᠦᠭᠡᠢ ᠮᠥᠨ᠃
ᠪᠢ ᠪᠣᠯ ᠪᠠᠳᠠᠢᠶᠢᠨ ᠵᠢᠷᠠᠨᠤ 《ᠠᠯᠲᠠᠨ ᠵᠠᠯᠭᠠᠭᠠᠰᠤ ᠠᠷᠢᠭᠤᠨ ᠬᠡᠯᠬᠢᠶᠡᠰᠦ》 ᠪᠠᠯᠠᠷ ᠮᠠᠩᠬᠠᠨ ᠨᠤᠲᠤᠭᠲᠤ ᠲᠥᠷᠥᠵᠦ ᠥᠰᠦᠭᠰᠡᠨ ᠬᠡᠦᠬᠡᠳ ᠪᠣᠯᠬᠣᠷ ᠳᠤᠮᠳᠠᠳᠤ ᠰᠤᠷᠭᠠᠭᠤᠯᠢᠶᠢᠨ ᠡᠭᠦᠳᠡ ᠲᠠᠲᠠᠲᠠᠯᠠ ᠵᠢᠩᠬᠢᠨᠢ ᠤᠳᠬᠠᠪᠠᠷᠢᠶᠠᠨ ᠠᠭᠤᠯᠠ ᠭᠡᠳᠡᠭᠢ ᠪᠡᠶᠡᠴᠢᠯᠡᠨ ᠦᠵᠡᠭᠡ ᠦᠭᠡᠢ ᠵᠦᠭᠡᠷ ᠯᠠ ᠲᠣᠮᠣᠴᠤᠤᠯᠤᠨ ᠶᠠᠷᠢᠶᠠᠨᠠᠴᠠ ᠶᠤᠮ ᠦᠦ᠂ ᠦᠯᠢᠭᠡᠷ ᠳᠣᠮᠣᠭ ᠪᠢᠰᠢ ᠪᠣᠯ ᠳᠠᠭᠤᠤ ᠰᠢᠯᠦᠭᠦᠨ ᠮᠥᠷ ᠪᠠᠳᠠᠭᠠᠴᠠ ᠬᠠᠶᠠ ᠠᠭᠤᠯᠠᠶᠢᠨ ᠲᠤᠬᠠᠢ ᠠᠯᠳᠠᠭ ᠣᠨᠣᠭ ᠰᠣᠨᠣᠰᠴᠤ᠂ ᠵᠥᠪᠬᠡᠨ ᠦᠯᠢᠭᠡᠷ ᠲᠤᠤᠯᠢᠳᠤ ᠭᠠᠷᠳᠠᠭ ᠨᠠᠷᠠ ᠰᠠᠷᠠ ᠬᠠᠯᠬᠠᠯᠠᠵᠤ ᠰᠡᠬᠦᠢᠭᠰᠡᠨ᠂ ᠨᠣᠶᠠᠨ ᠣᠷᠭᠢᠯ ᠨᠢ ᠭᠡᠷᠦᠨ ᠡᠷᠦᠬᠡᠪᠡᠷ ᠥᠩᠭᠡᠢᠵᠦ ᠬᠠᠷᠠᠭᠳᠠᠳᠠᠭ 《ᠰᠥᠮᠪᠥᠷ ᠠᠭᠤᠯᠠ》 ᠪᠠᠷ ᠯᠠ ᠤᠷᠭᠤᠭᠤᠯᠤᠨ ᠰᠠᠨᠠᠬᠤᠶᠢᠨ ᠲᠡᠳᠦᠢ ᠪᠠᠢᠵᠤ᠂ ᠠᠭᠤᠯᠠᠶᠢᠨ ᠲᠤᠬᠠᠢ ᠨᠢᠭᠡ ᠲᠠᠯᠠᠪᠠᠷ ᠰᠦᠷᠳᠡᠬᠦ ᠰᠢᠭ᠂ ᠨᠥᠭᠥᠭᠡ ᠲᠠᠯᠠᠪᠠᠷ ᠮᠥᠷᠥᠭᠡᠳᠬᠦ ᠰᠢᠭ ᠡᠷᠡᠭᠡᠯᠵᠡᠩᠭᠦᠢ ᠰᠣᠨᠢᠨ ᠲᠥᠰᠥᠭᠡᠯᠡᠯ ᠲᠠᠢ ᠥᠰᠴᠦ ᠲᠣᠷᠨᠢᠵᠤ ᠪᠢᠯᠡ᠃
ᠳᠤᠮᠳᠠᠳᠤ ᠰᠤᠷᠭᠠᠭᠤᠯᠢᠶᠢᠨ ᠬᠠᠭᠠᠯᠭᠠ ᠲᠣᠭᠰᠢᠬᠤᠪᠡᠷ ᠠᠯᠤᠰᠤᠨ ᠠᠶᠠᠨᠤ ᠠᠩᠬᠠᠨᠤ ᠳᠥᠷᠥᠭᠡ ᠠᠪᠬᠤᠶᠢᠨ ᠭᠱᠡᠨᠳᠦ᠄ 《 ᠴᠢ ᠣᠳᠣ᠌ ᠠᠭᠤᠯᠠ ᠲᠠᠢ ᠭᠠᠵᠠᠷᠢᠶᠡᠷ ᠶᠠᠪᠤᠵᠤ᠂ ᠡᠷᠳᠡᠮ ᠰᠡᠯᠭᠦᠨ ᠰᠤᠷᠬᠤ ᠬᠣᠯᠠᠶᠢᠨ ᠵᠠᠮᠢ ᠡᠬᠢᠯᠡᠭᠦᠯᠵᠦ ᠪᠠᠢᠬᠤ ᠰᠢᠭ᠋ ᠪᠠᠢᠨᠠ᠃ ᠢᠩᠭᠢᠭᠡᠳ ᠯᠠ ᠴᠠᠭᠠᠰᠢ ᠨᠢ ᠴᠢ ᠬᠡᠴᠢᠨᠡᠭᠡᠨ ᠠᠭᠤᠯᠠᠶᠢᠨ ᠥᠨᠳᠥᠷᠢ ᠦᠵᠡᠵᠦ᠂ ᠶᠠᠮᠠᠷᠬᠠᠨ ᠤᠰᠤᠨᠤ ᠭᠦᠨᠢ ᠬᠡᠮᠵᠢᠵᠦ ᠶᠠᠪᠤᠬᠤᠶᠢ ᠮᠡᠳᠡᠬᠦ ᠦᠭᠡᠢ ᠃ ᠭᠡᠪᠡᠴᠦ ᠭᠠᠭᠴᠠᠬᠠᠨ ᠡᠩᠦᠨ ᠶᠠᠭᠤᠮᠠ ᠰᠠᠨᠠᠭᠤᠯᠤᠶᠠ᠄ ᠠᠭᠤᠯᠠᠶᠢᠨ ᠵᠢᠪᠠᠷ ᠵᠢᠩ ᠲᠠᠢ ᠰᠢᠦ ᠳᠡ᠃ ᠬᠤᠪᠴᠠᠰᠤ ᠬᠤᠨᠠᠷᠢᠶᠠᠨ ᠵᠣᠬᠢᠴᠠᠭᠤᠯᠤᠨ ᠡᠮᠦᠰᠴᠦ᠂ ᠡᠷᠡᠭᠦᠯ ᠪᠡᠶᠡ ᠰᠠᠷᠠᠭᠤᠯ ᠤᠬᠠᠭᠠᠨ ᠲᠠᠢ ᠶᠠᠪᠤᠬᠤᠪᠠᠨ ᠶᠠᠭᠤᠨᠤ ᠲᠦᠷᠦᠭᠦᠨᠳᠦ ᠪᠣᠳᠣᠭᠠᠷᠠᠢ ! ᠬᠦᠦ ᠮᠢᠨᠢ᠃ ᠲᠠᠨᠢᠬᠤ ᠦᠭᠡᠢ ᠭᠠᠵᠠᠷᠤᠨ ᠬᠥᠮᠥᠨᠢ ᠪᠢᠲᠡᠭᠡᠢ ᠬᠡᠯᠡ᠂ ᠠᠭᠤᠯᠠ ᠤᠰᠤ ᠨᠢ ᠴᠤ᠌ ᠣᠨᠳᠣᠣ ᠪᠠᠢᠳᠠᠭ ᠶᠤᠮ ᠡ》 ᠭᠡᠵᠦ ᠦᠵᠡᠬᠦᠶᠢᠨ ᠶᠡᠬᠡᠶᠢ ᠦᠵᠡᠵᠦ᠂ ᠳᠤᠭᠤᠯᠬᠤᠶᠢᠨ ᠶᠡᠬᠡᠶᠢ ᠳᠣᠭᠣᠯᠤᠭᠰᠠᠨ ᠡᠮᠡᠭᠡ ᠡᠵᠢ ᠮᠠᠨᠢ ᠬᠠᠴᠠᠷᠢ ᠢᠯᠪᠢᠵᠦ᠂ ᠵᠤᠯᠠᠢᠶᠢ ᠵᠥᠭᠡᠯᠡᠬᠡᠨ ᠦᠨᠦᠷᠯᠡᠨ᠂ ᠬᠠᠯᠲᠤ ᠰᠣᠨᠣᠰᠬᠤᠳᠤ ᠶᠡᠷᠦᠶᠢᠨ ᠶᠤᠮ ᠰᠢᠭ᠋ ᠠᠲᠠᠯᠠᠪᠠᠨ ᠬᠠᠮᠤᠭᠢ ᠤᠬᠠᠭᠠᠷᠠᠬᠤᠳᠤ ᠬᠣᠯᠠᠶᠢᠨ ᠲᠤᠰᠤᠯᠲᠠ ᠲᠠᠢ ᠰᠤᠷᠭᠠᠯ ᠬᠠᠢᠷᠠᠯᠠᠭᠰᠠᠨ ᠢ᠋ ᠮᠠᠷᠲᠠᠵᠤ ᠶᠡᠷᠦᠨᠢ ᠴᠢᠳᠠᠳᠠᠭ ᠦᠭᠡᠢ ᠶᠤᠮ᠃
ᠠᠩᠬᠠ ᠪᠢ ᠠᠭᠤᠯᠠᠶᠢ ᠬᠠᠷᠠᠬᠤᠳᠤ ᠶᠡᠬᠡ ᠯᠠ ᠬᠣᠯᠠᠠᠴᠠ ᠬᠠᠷᠠᠭᠰᠠᠨ᠃ ᠲᠡᠷᠲᠡᠭᠡ ᠬᠣᠯᠠ ᠲᠡᠭᠷᠢᠶᠢᠨ ᠬᠠᠶᠠᠭᠠᠨᠠ ᠤᠨᠢᠶᠠᠷ ᠬᠦᠳᠡᠩ ᠳᠤᠮᠳᠠ ᠭᠦᠨ ᠬᠥᠬᠡ ᠠᠭᠤᠯᠠ ᠰᠦᠮᠡᠯᠵᠡᠨ ᠳᠦᠩᠬᠦᠢᠭᠡᠳ ᠬᠤᠷᠠᠶᠢᠨ ᠵᠤᠵᠠᠭᠠᠨ ᠡᠯᠳᠡᠪ ᠳᠦᠷᠰᠦᠲᠦ ᠡᠭᠦᠯᠡ ᠶᠤᠮ ᠰᠢᠭ᠋ ᠡᠰᠡᠪᠡᠯ ᠮᠢᠨᠦ ᠨᠤᠲᠤᠭᠲᠤ ᠳᠠᠩᠳᠠ ᠮᠠᠨᠠᠨ ᠨᠥᠮᠥᠷᠴᠦ ᠵᠡᠷᠭᠡᠯᠭᠡᠨ ᠨᠠᠭᠠᠳᠤᠭᠤᠯᠵᠤ ᠰᠦᠮᠡᠯᠵᠡᠳᠡᠭ ᠥᠨᠳᠥᠷ ᠥᠨᠳᠥᠷ ᠰᠢᠯᠢ ᠭᠠᠵᠠᠷᠦᠨ ᠳᠠᠢᠲᠠᠢ ᠬᠠᠷᠠᠭᠳᠠᠭᠰᠠᠨ᠃ ᠲᠡᠭᠡᠭᠡᠳ ᠶᠠᠪᠤᠭᠠᠳ ᠶᠠᠪᠤᠭᠠᠳ ᠳᠡᠷᠭᠡᠳᠡ ᠨᠢ ᠬᠦᠷᠳᠡᠭ ᠦᠭᠡᠢ᠃ ᠬᠠᠷᠢᠨ ᠲᠡᠳᠡᠭᠡᠷ ᠠᠭᠤᠯᠠᠰ ᠤᠯᠠᠮ ᠪᠦᠷ ᠴᠠᠭᠠᠰᠢ ᠨᠢ ᠣᠷᠣᠭᠠ ᠲᠡᠮᠡᠭᠡ ᠰᠢᠭ ᠵᠢᠭᠤᠲᠠᠭᠠᠳ ᠪᠠᠢᠬᠤ ᠰᠢᠭ᠋ ᠰᠠᠨᠠᠭᠳᠠᠭᠰᠠᠨ ᠃ ᠡᠨᠡ ᠦᠶᠡᠳᠦ ᠡᠮᠡᠭᠡ ᠡᠵᠢᠶᠢᠨ ᠮᠢᠨᠢ ᠬᠠᠶᠠ ᠳᠠᠭᠤᠯᠠᠳᠠᠭ《 ᠬᠥᠬᠡᠷᠡᠭᠡᠳ ᠪᠠᠢᠭᠠ ᠰᠢᠯᠢᠶᠢ / ᠬᠥᠨᠳᠡᠯᠡᠨ ᠶᠠᠭᠠᠭᠢᠵᠤ ᠲᠤᠭᠤᠯᠤᠨᠠ ᠳᠡ / ᠬᠥᠭᠰᠢᠨ ᠪᠤᠭᠤᠷᠤᠯ ᠡᠵᠢ ᠲᠠᠢᠪᠠᠨ/ ᠬᠡᠵᠢᠶᠡ ᠣᠴᠢᠵᠤ ᠵᠣᠯᠭᠠᠨᠠ ᠳᠠ ᠁ 》 ᠭᠡᠰᠡᠨ ᠳᠠᠭᠤᠤ ᠰᠠᠨᠠᠭᠠᠨᠳᠤ ᠪᠠᠭᠤᠵᠤ᠂ ᠭᠡᠷ ᠨᠤᠲᠤᠭ ᠬᠣᠶᠠᠷᠢᠶᠠᠨ ᠰᠠᠨᠠᠰᠬᠢᠨ ᠤᠢᠳᠬᠠᠷᠯᠠᠨ ᠶᠠᠪᠤᠵᠤ ᠪᠠᠢᠵᠤ ᠪᠢᠯᠡ᠃ ᠪᠢ ᠶᠠᠪᠤᠵᠤ ᠠᠭᠤᠯᠠ ᠰᠠᠭᠤᠵᠤ ᠪᠠᠢᠭᠠ ᠪᠣᠯᠬᠣᠷ ᠡᠴᠦᠰ ᠲᠡᠭᠡᠨ ᠠᠭᠤᠯᠠᠶᠢᠨ ᠪᠠᠷᠠᠭᠤᠨ ᠬᠣᠢᠲᠦ ᠬᠣᠷᠮᠣᠢᠳᠤ ᠭᠠᠯ ᠭᠣᠯᠣᠮᠲᠠᠪᠠᠨ ᠪᠠᠳᠠᠷᠠᠭᠠᠭᠠᠳ ᠣᠯᠠᠨ ᠵᠠᠭᠤᠨ ᠵᠢᠯ ᠪᠣᠯᠵᠤ ᠪᠠᠢᠭᠠ ᠪᠠᠶᠠᠨᠬᠣᠲᠠ ᠪᠠᠯᠭᠠᠰᠤᠨᠳᠤ ᠠᠩᠬᠠ ᠬᠥᠯ ᠲᠠᠯᠪᠢᠭ᠍ᠰᠠᠨ ᠶᠤᠮ᠃
ᠪᠢ ᠰᠤᠷᠭᠠᠭᠤᠯᠢᠶᠢᠨ ᠪᠠᠢᠷᠢᠶᠢᠨ ᠡᠭᠦᠳᠡᠶᠢ ᠲᠠᠲᠠᠨ ᠲᠠᠲᠠᠲᠠᠯᠠ ᠠᠯᠠᠱᠠ ᠠᠭᠤᠯᠠᠪᠠᠨ ᠪᠠᠢᠨ ᠪᠠᠢᠨ ᠬᠠᠷᠠᠭᠰᠠᠭᠠᠷ ᠯᠠ ᠪᠠᠢᠯᠠ᠃ ᠶᠠᠮᠠᠷ ᠭᠠᠢᠬᠠᠯᠲᠠᠢ ᠰᠦᠷᠯᠢᠭ ᠬᠠᠢᠷᠬᠠᠨ ᠪᠣᠢ ᠬᠡᠮᠡᠨ ᠳᠣᠲᠣᠷᠠᠪᠠᠨ ᠳᠠᠭᠤ ᠠᠯᠳᠠᠨ ᠪᠢᠰᠢᠷᠡᠭᠰᠡᠭᠡᠷ ᠯᠠ ᠪᠠᠢᠯᠠ᠃ ᠮᠢᠨᠤ ᠠᠩᠬᠠ ᠬᠠᠮᠤᠭᠤᠨ ᠣᠢᠷᠠᠬᠠᠨᠠᠴᠠ ᠬᠠᠷᠠᠭᠰᠠᠨ ᠥᠨᠳᠥᠷ ᠠᠭᠤᠯᠠ ᠡᠨᠡ ᠪᠠᠢᠪᠠ᠃ ᠲᠡᠷᠡ ᠯᠡ ᠦᠶᠡᠡᠴᠡ ᠬᠣᠢᠰᠢ ᠣᠳᠣ᠌ ᠪᠣᠯᠲᠠᠯᠠ ᠡᠨᠡ ᠬᠦ᠌ ᠥᠪᠥᠷ ᠮᠣᠩᠭᠣᠯᠳᠠᠭᠠᠨ ᠬᠠᠮᠤᠭᠤᠨ ᠥᠨᠳᠥᠷᠲᠦ ᠲᠣᠭᠠᠴᠠᠭ᠍ᠳᠠᠳᠠᠭ ᠠᠭᠤᠯᠠᠪᠠᠨ ᠡᠳᠦᠷ ᠪᠦᠷᠢ ᠨᠢᠳᠦ ᠳᠦᠭᠦᠷᠡᠩ᠂ ᠪᠠᠬᠠᠷᠬᠠᠯ ᠳᠦᠭᠦᠷᠡᠩ᠂ ᠰᠡᠳᠬᠢᠯ ᠳᠦᠭᠦᠷᠡᠩ᠂ ᠰᠦᠵᠢᠭ ᠳᠦᠭᠦᠷᠡᠩ ᠬᠠᠷᠠᠭᠰᠠᠭᠠᠷ ᠯᠠ ᠶᠠᠪᠤᠨᠠᠮ ᠪᠦᠯᠦᠭᠡ᠃ ᠠᠯᠤᠰᠤᠨ ᠠᠯᠤᠰ ᠭᠠᠵᠠᠷ ᠶᠠᠪᠤᠭᠰᠠᠨ ᠴᠤ᠌ ᠰᠡᠳᠬᠢᠯ ᠳ᠋ᠡᠭᠡᠨ᠂ ᠵᠡᠭᠦᠳᠦᠨᠳᠡᠭᠡᠨ ᠦᠷᠭᠦᠯᠵᠢ ᠲᠣᠳᠣᠬᠠᠨ ᠬᠠᠷᠠᠵᠤ ᠶᠠᠪᠤᠳᠠᠭ ᠰᠠᠨ᠃
ᠠᠯᠠᠱᠠ ᠠᠭᠤᠯᠠ ᠮᠢᠨᠢ᠃ ᠲᠡᠭᠦᠨᠢ ᠡᠷᠲᠡᠨᠦ ᠲᠡᠦᠬᠡ ᠰᠤᠳᠤᠷᠲᠤ《ᠾᠸ ᠯᠠᠨ ᠱᠠᠨ》 ᠭᠡᠵᠦ ᠠᠪᠢᠶᠠᠯᠠᠨ ᠲᠡᠮᠳᠡᠭᠯᠡᠵᠦ ᠢᠷᠡᠵᠡᠢ᠃ 《ᠾᠸ ᠯᠠᠨ》 ᠭᠡᠳᠡᠭ ᠦᠭᠡ ᠨᠢ ᠾᠦᠩᠨᠤ ᠪᠤᠶᠤ ᠲᠥᠷᠥᠭ ᠭᠠᠷᠤᠯᠲᠠᠢ ᠦᠭᠡ ᠭᠡᠵᠦ ᠶᠠᠩᠵᠤ ᠪᠦᠷᠢᠪᠡᠷ ᠰᠤᠳᠤᠯᠤᠨ ᠲᠠᠢᠯᠪᠤᠷᠢᠯᠠᠬᠤ ᠨᠢ ᠪᠣᠢ᠃ ᠡᠨᠡ ᠦᠭᠡ ᠨᠢ ᠪᠠᠰᠠ ᠬᠤᠯᠠᠨ ᠭᠡᠰᠡᠨ ᠤᠳᠬᠠ ᠲᠠᠢ ᠪᠠᠢᠵᠤ ᠮᠠᠭᠠᠳ ᠦᠭᠡᠢ ᠬᠡᠮᠡᠨ ᠵᠠᠷᠢᠮ ᠬᠥᠮᠥᠰ ᠳᠠᠭᠤᠤ ᠰᠢᠯᠦᠭ ᠲᠡᠭᠡᠨ 《 ᠬᠤᠯᠠᠨ ᠠᠭᠤᠯᠠ ᠁ ᠶᠠᠭᠠᠭᠢᠭ᠍ᠰᠠᠨ ᠶᠠᠭᠠᠭᠢᠭ᠍ᠰᠠᠨ》 ᠭᠡᠳ ᠳᠠᠭᠤᠯᠠᠵᠤ ᠪᠢᠴᠢᠭᠰᠡᠭᠡᠷ ᠯᠡ ᠪᠠᠢᠨᠠ᠃ ᠡᠨᠡ ᠨᠢ ᠡᠷᠳᠡᠮ ᠰᠢᠨᠵᠢᠯᠡᠭᠡᠨᠦ ᠬᠦᠷᠢᠶᠡᠨᠳᠡᠬᠢ ᠭᠠᠵᠠᠷ ᠤᠰᠤᠨᠤ ᠨᠡᠷᠡᠶᠢᠨ ᠪᠦᠷᠬᠦᠭ ᠠᠰᠠᠭᠤᠳᠠᠯ ᠪᠣᠯᠬᠣᠷ ᠮᠡᠬᠦᠰ ᠪᠢᠴᠢᠭᠡᠴᠢ ᠪᠢᠪᠡᠷ ᠠᠶᠤᠮᠰᠢᠭ᠋ ᠦᠭᠡᠢ ᠳᠤᠷᠠᠪᠠᠷ ᠲᠠᠭᠠᠮᠠᠭᠯᠠᠨ ᠪᠢᠴᠢᠵᠦ ᠦᠯᠦ ᠵᠢᠷᠦᠬᠡᠯᠡᠪᠡᠢ᠃ ᠶᠠᠮᠠᠷ ᠴᠤ᠌ ᠪᠠᠢᠭᠰᠠᠨ ᠣᠯᠠᠩᠬᠢ ᠪᠠᠢᠳᠠᠯᠳᠤ ᠬᠥᠮᠥᠰ 《 ᠠᠯᠠᠱᠠ ᠬᠠᠢᠷᠬᠠᠨ》 ᠭᠡᠵᠦ ᠬᠦᠨᠳᠦᠯᠡᠨ ᠳᠠᠭᠤᠳᠠᠬᠤ ᠪᠥᠭᠡᠳ《ᠤᠷᠭᠤᠬᠤᠶᠢᠨ ᠤᠯᠠᠭᠠᠨ ᠨᠠᠷᠠ ᠮᠢᠨᠢ ! ᠠᠭᠤᠯᠠ ᠤᠰᠤᠨᠤ ᠨᠠᠪᠳᠠᠭ ᠰᠠᠪᠳᠠᠭ ᠮᠢᠨᠢ !》 ᠭᠡᠳ ᠤᠯᠠᠮᠵᠢᠯᠠᠯᠢᠶᠠᠨ ᠨᠠᠨᠳᠢᠩᠨᠠᠭᠰᠠᠨ ᠪᠤᠭᠤᠷᠤᠯᠤᠳ ᠰᠠᠢᠨ ᠰᠠᠢᠬᠠᠨᠢᠶᠡᠨ ᠰᠢᠪᠰᠢᠨ ᠥᠷᠯᠥᠭᠡ ᠪᠦᠷᠢ ᠴᠠᠢ ᠰᠦᠨᠦᠪᠡᠨ ᠳᠡᠭᠡᠵᠢᠶᠢ ᠡᠷᠭᠦᠭᠰᠡᠭᠡᠷ ᠢᠷᠡᠭᠰᠡᠨ ᠠᠵᠤᠭᠤ᠃
ᠠᠯᠠᠱᠠ ᠠᠭᠤᠯᠠᠶᠢ ᠡᠷᠳᠡᠮᠲᠡᠳ18.4 ᠳ᠋ᠦᠩᠰᠢᠭᠤᠷ ᠨᠠᠰᠤ ᠲᠠᠢ ᠭᠡᠵᠦ ᠮᠠᠭᠠᠳᠯᠠᠭᠰᠠᠨ ᠪᠠᠢᠨᠠ ᠯᠠᠢ ᠃ ᠪᠠᠷᠲᠠᠭᠠ ᠪᠦᠬᠦᠢ ᠵᠢᠯᠠᠭᠠ ᠭᠠᠵᠠᠷᠤᠨ ᠬᠠᠳᠠᠨ ᠳᠡᠭᠡᠷᠡ ᠪᠠᠷᠤᠭ ᠲᠦᠮᠡ ᠭᠠᠷᠤᠢ ᠵᠢᠯᠦᠨ ᠲᠡᠷᠲᠡᠭᠡ ᠵᠢᠷᠤᠭᠳᠠᠭᠰᠠᠨ ᠬᠠᠳᠠᠨᠤ ᠵᠢᠷᠤᠭ ᠪᠠᠢᠳᠠᠭᠠᠴᠠ ᠦᠵᠡᠪᠡᠯ ᠡᠨᠡ ᠠᠭᠤᠯᠠᠨᠳᠤ ᠶᠡᠬᠡ ᠡᠷᠲᠡᠨᠦ ᠦᠶᠡᠡᠴᠡ ᠬᠥᠮᠥᠨ ᠲᠥᠷᠥᠯᠬᠢᠲᠡᠨ ᠤᠯᠠ ᠮᠥᠷᠢᠶᠡᠨ ᠦᠯᠡᠳᠡᠭᠡᠵᠦ᠂ ᠲᠤᠬᠠᠢᠶᠢᠨ ᠴᠠᠭᠤᠨ ᠰᠣᠶᠣᠯ ᠰᠡᠳᠬᠢᠬᠦᠢᠶᠢᠨ ᠢᠮ ᠲᠠᠮᠠᠭᠠᠪᠠᠨ ᠳᠠᠷᠤᠵᠤ ᠶᠠᠪᠤᠭᠰᠠᠨ ᠪᠠᠢᠬᠤ ᠶᠤᠮ᠃ ᠡᠨᠡ ᠠᠭᠤᠯᠠᠶᠢᠨ ᠠᠷᠤ ᠥᠪᠥᠷᠢᠶᠡᠷ ᠾᠦᠩᠨᠦ᠂ ᠲᠥᠷᠥᠭ ᠵᠡᠷᠭᠡ ᠡᠳᠦᠢ ᠲᠡᠳᠦᠢ ᠨᠡᠭᠦᠳᠡᠯᠴᠢᠨ ᠠᠢᠮᠠᠭᠤᠳ ᠨᠡᠭᠦᠵᠦ ᠰᠠᠭᠤᠵᠤ ᠶᠠᠪᠤᠭᠰᠠᠨ ᠠᠭᠠᠳ ᠬᠣᠵᠢᠮ ᠨᠢ ᠲᠠᠩᠭᠤᠳ ᠪᠤᠶᠤ ᠪᠠᠷᠠᠭᠤᠨ ᠰᠢᠶᠠ ᠤᠯᠤᠰ ᠶᠠᠭ ᠠᠭᠤᠯᠠᠶᠢᠨ ᠥᠪᠥᠷ ᠬᠣᠷᠮᠣᠢᠳᠤᠨᠢ ᠨᠡᠢᠰᠯᠡᠯᠢᠶᠡᠨ ᠪᠠᠢᠭᠤᠯᠤᠨ ᠲᠥᠪᠬᠢᠨᠡᠵᠦ᠂ 1227 ᠣᠨ ᠪᠣᠯᠲᠠᠯᠠ ᠣᠷᠣᠰᠢᠨ ᠲᠣᠭᠲᠠᠨᠢᠭ᠍ᠰᠠᠨ ᠪᠠ ᠨᠢᠭᠡ ᠬᠡᠰᠡᠭ ᠲᠡᠭᠡᠨ ᠣᠪᠣᠭᠠ ᠬᠦᠴᠦᠷᠬᠡᠭ ᠭᠥᠷᠥᠨ ᠪᠠᠢᠵᠤ ᠥᠩᠭᠡᠷᠡᠵᠡᠢ᠃ ᠣᠳᠣ᠌ ᠠᠭᠤᠯᠠᠶᠢᠨ ᠡᠪᠦᠷ ᠲᠠᠯᠠ᠂ ᠢᠷᠭᠠᠢ ᠬᠣᠲᠠᠶᠢᠨ ᠬᠣᠢᠲᠦ ᠳᠡᠭᠦᠷᠭᠡᠳᠦ《ᠪᠠᠷᠠᠭᠤᠨ ᠰᠢᠶᠠᠶᠢᠨ ᠸᠠᠩᠤᠨ ᠣᠩᠭᠣᠨ》 ᠭᠡᠳ ᠤᠯᠠᠭᠠᠨ ᠭᠣᠶᠣᠣᠶᠢᠨ ᠲᠣᠯᠣᠭᠠᠢ ᠰᠢᠭ᠋ ᠱᠣᠪᠣᠯᠵᠠᠨ ᠢᠷᠠᠢᠭᠰᠠᠨ ᠣᠯᠠᠨ ᠰᠢᠪᠠᠷ《ᠫᠢᠷᠠᠮᠢᠳ᠋》 ᠤ᠋ᠳ ᠲᠡᠦᠬᠡᠶᠢᠨ ᠤᠴᠢᠭ᠋ᠢ ᠵᠠᠩᠭᠢᠳᠤᠨ᠂ ᠲᠦᠮᠡᠨ ᠣᠯᠠᠨᠤ ᠰᠣᠨᠢᠭᠤᠴᠢ ᠰᠡᠳᠬᠢᠯᠢ ᠳᠠᠯᠠᠯᠬᠤ ᠮᠡᠲᠦ ᠳᠦᠩᠰᠦᠢᠨ ᠪᠠᠢᠳᠠᠭ ᠰᠠᠨ᠃
ᠡᠨᠡ ᠠᠭᠤᠯᠠ ᠮᠠᠨᠢ ᠭᠠᠵᠠᠷ ᠵᠦᠢᠶᠢᠨ ᠤᠳᠬᠠᠪᠠᠷᠢᠶᠡᠨ ᠶᠠᠮᠠᠷ ᠨᠢᠭᠡᠨ ᠶᠠᠭᠤᠮᠠᠨᠤ ᠵᠠᠭᠠᠭ ᠬᠠᠯᠬᠠᠪᠴᠢ ᠲᠡᠳᠦᠢ ᠦᠭᠡᠢ ᠡᠷᠲᠡᠨᠡᠴᠡ ᠨᠠᠭᠠᠰᠢ ᠰᠠᠭᠤᠷᠢᠰᠢᠮᠠᠯ ᠪᠣᠯᠣᠨ ᠨᠡᠭᠦᠳᠡᠯ ᠰᠣᠶᠣᠯ ᠢᠷᠭᠡᠨᠰᠢᠯᠤᠨ ᠵᠠᠭᠠᠭ᠂ ᠲᠠᠷᠢᠶᠠᠯᠠᠩ ᠪᠣᠯᠣᠨ ᠮᠠᠯ ᠠᠵᠤ ᠠᠬᠤᠢᠶᠢᠨ ᠵᠠᠭᠠᠭ ᠬᠢᠵᠠᠭᠠᠷ ᠪᠣᠯᠣᠭᠰᠠᠭᠠᠷ ᠢᠷᠡᠭᠰᠡᠨ ᠪᠠᠢᠨᠠ ᠃ ᠠᠯᠠᠱᠠ ᠠᠭᠤᠯᠠᠨᠳᠤ ᠠᠷᠴᠠ ᠠᠭᠠᠷᠤ᠂ ᠨᠠᠷᠠᠰᠤ ᠬᠠᠷᠭᠠᠢ ᠮᠡᠲᠦᠶᠢᠨ ᠣᠯᠠᠨ ᠲᠥᠷᠥᠯᠦᠨ ᠣᠢ ᠮᠣᠳᠣ᠌ ᠂ ᠡᠪᠡᠰᠦᠨ ᠡᠮᠦᠨ ᠤᠷᠭᠤᠮᠠᠯ᠂ ᠶᠠᠩᠭᠢᠷ᠂ ᠬᠥᠬᠡ ᠢᠮᠠᠭᠠ᠂ ᠪᠤᠭᠤ᠂ ᠢᠷᠪᠢᠰ ᠮᠡᠲᠦᠶᠢᠨ ᠠᠮᠢᠲᠠᠨ ᠭᠥᠷᠥᠭᠡᠰᠦ ᠲᠠᠢ ᠪᠠ ᠳᠡᠯᠡᠬᠡᠢ ᠳᠡᠭᠡᠷᠡ ᠲᠡᠢᠮᠦ ᠴᠤ᠌ ᠣᠯᠠᠨ ᠭᠠᠵᠠᠷ ᠪᠠᠢᠭᠠᠳ ᠪᠠᠢᠳᠠᠭ ᠦᠭᠡᠢ ᠴᠢᠯᠠᠭᠤᠨ ᠨᠡᠭᠦᠷᠡᠰᠦ ᠬᠡᠬᠦᠴᠢᠯᠡᠨ ᠭᠠᠵᠠᠷ ᠳᠣᠣᠷᠠᠬᠢ ᠪᠠᠶᠠᠯᠢᠭ᠋ᠢᠶᠠᠷᠢᠶᠠᠨ ᠬᠣᠯᠠ ᠣᠢᠷᠠᠳᠠᠭᠠᠨ ᠭᠠᠢᠬᠠᠭᠳᠠᠳᠠᠭᠢᠶᠠᠷ ᠪᠠᠷᠠᠬᠤ ᠦᠭᠡᠢ ᠪᠠᠰᠠ ᠪᠠᠷᠠᠭᠤᠨ ᠵᠡᠭᠦᠨ ᠬᠡᠢᠳ ᠮᠡᠲᠦᠶᠢᠨ ᠠᠷᠢᠭᠤᠨ ᠳᠠᠭ᠍ᠰᠢᠨ ᠰᠣᠶᠣᠯ ᠵᠢᠭᠤᠯᠴᠢᠯᠠᠯᠤᠨ ᠣᠷᠣᠨ ᠪᠠᠢᠳᠠᠭᠢᠶᠠᠷᠢᠶᠠᠨ ᠠᠯᠳᠠᠷᠲᠠᠢ ᠪᠢᠯᠡ᠃ ᠮᠥᠨ ᠡᠨᠡ ᠠᠭᠤᠯᠠᠶᠢᠨ ᠪᠠᠷᠠᠭᠤᠨ ᠦᠵᠦᠭᠦᠷ ᠠᠯᠳᠠᠳᠤ ᠲᠡᠮᠦᠷ ᠡᠭᠦᠳᠡ ᠭᠡᠬᠦ ᠠᠭᠤᠯᠠᠶᠢᠨ ᠠᠮᠠ ᠪᠣᠢ᠃ ᠡᠨᠡ ᠠᠮᠠ ᠪᠣᠯ ᠠᠯᠠᠱᠠ ᠪᠣᠯᠣᠨ ᠨᠢᠩᠰᠢᠶᠠᠶᠢᠨ ᠡᠷᠲᠡᠨᠡᠴᠡ 《ᠪᠢᠴᠢᠭᠳᠡᠭᠡ ᠦᠭᠡᠢ ᠬᠠᠤᠯᠢ》 ᠪᠠᠷ ᠲᠣᠭᠲᠠᠭᠠᠨ ᠵᠢᠷᠤᠭᠯᠠᠭᠰᠠᠨ《ᠬᠢᠯᠢᠶᠢᠨ ᠱᠤᠭᠤᠮ》 ᠶᠤᠮ᠃ ᠬᠡᠵᠢᠶᠡᠨᠦ ᠴᠤ᠌ ᠶᠤᠮ ᠮᠡᠳᠡᠬᠦ ᠦᠭᠡᠢ ᠡᠷᠲᠡᠨᠦ ᠬᠡᠷᠡᠮᠦᠨ ᠲᠠᠰᠤᠷᠬᠠᠢᠶᠢ ᠪᠠᠰᠠ ᠡᠨᠳᠡᠠᠴᠠ ᠬᠠᠷᠠᠵᠤ ᠪᠣᠯᠣᠨᠠ᠃ ᠮᠢᠩ ᠤᠯᠤᠰᠤᠨ ᠦᠶᠡᠶᠢᠨ ᠴᠠᠭᠠᠨ ᠬᠡᠷᠡᠮᠦᠨ ᠦᠯᠡᠳᠡᠭᠳᠡᠯ ᠭᠡᠬᠦ ᠶᠤᠮ ᠪᠢᠯᠡ᠃ ᠡᠭᠦᠨᠡᠴᠡ ᠬᠣᠢᠰᠢ ᠭᠠᠷᠪᠠᠯ ᠡᠵᠡᠨ ᠲᠠᠯᠠ ᠦᠭᠡᠢ ᠶᠡᠬᠡ ᠭᠣᠪᠢ ᠬᠡᠭᠡᠷᠡᠶᠢᠨ ᠨᠤᠲᠤᠭ ᠬᠥᠪᠥᠷᠡᠵᠦ ᠡᠬᠢᠯᠡᠨᠡ᠃ ᠰᠥᠷᠦᠭ ᠰᠥᠷᠦᠭ ᠲᠡᠮᠡᠭᠡᠨᠦ ᠪᠠᠷᠠ ᠨᠡᠯᠦᠭᠡᠷ ᠴᠡᠩᠭᠡᠷ ᠵᠡᠷᠭᠡᠯᠭᠡᠨ ᠳᠤᠮᠳᠠ ᠲᠠᠰᠤᠷᠠᠵᠤ ᠨᠢᠭᠡ ᠨᠡᠢᠯᠡᠵᠦ ᠨᠢᠭᠡ ᠬᠠᠷᠠᠭᠳᠠᠵᠤ ᠭᠠᠷᠤᠨᠠ ᠳᠠ᠃ ᠡᠮᠦᠨᠡ ᠵᠦᠭ (ᠲᠠᠯᠠ) ᠡᠴᠡ ᠨᠢ ᠠᠪᠴᠤ ᠬᠡᠯᠡᠪᠡᠯ ᠠᠯᠠᠱᠠ ᠠᠭᠤᠯᠠ ᠪᠣᠯ ᠭᠣᠪᠢᠶᠢᠨ ᠡᠬᠢᠯᠡᠯ ᠮᠥᠨ ᠴᠤ᠌ ᠲᠡᠭᠦᠰᠭᠡᠯ ᠭᠡᠰᠡᠨ ᠦᠭᠡ᠃ ᠢᠩᠭᠢᠭᠡᠳ ᠯᠡ ᠭᠣᠪᠢᠶᠢᠨ ᠭᠦᠨ ᠤᠷᠤᠭᠤ ᠳᠤᠳᠤᠭᠰᠢᠯᠠᠬᠤ ᠲᠤᠰᠤᠮ ᠢᠩᠭᠡ ᠪᠣᠲᠣᠭᠣᠨᠤ ᠪᠣᠢᠯᠠᠭᠠᠨ᠂ ᠠᠶᠠᠨ ᠵᠢᠩᠦᠨ ᠬᠣᠩᠬᠣᠨᠤ ᠳᠠᠭᠤ᠂ ᠠᠷᠭᠠᠯᠢ ᠵᠡᠭᠡᠷᠡᠶᠢᠨ ᠲᠣᠭᠣᠰᠣ᠌ ᠲᠠᠢ ᠪᠠᠷᠠ᠂ ᠵᠠᠭ ᠰᠤᠬᠠᠢᠶᠢᠨ ᠨᠠᠢᠭᠤᠭᠠᠨ᠂ ᠪᠤᠲᠠ ᠪᠤᠳᠠᠷᠭᠠᠨᠠᠶᠢᠨ ᠰᠡᠷᠴᠢᠭᠢᠨᠡᠭᠡᠨ᠂ ᠭᠠᠢᠬᠠᠭᠠᠳ ᠪᠠᠷᠠᠰᠢ ᠦᠭᠡᠢ ᠬᠠᠴᠢᠨ ᠰᠣᠨᠢᠨ ᠳᠦᠷᠢ ᠳᠦᠷᠰᠦ ᠲᠠᠢ ᠡᠷᠳᠡᠨᠢᠶᠢᠨ ᠴᠢᠯᠠᠭᠤᠳᠤᠨ ᠱᠠᠷᠭᠢᠶᠠᠨ᠂ ᠠᠭᠢ ᠬᠦᠮᠡᠯᠢ ᠶ᠋ᠢᠨ ᠦᠨᠦᠷ᠂ ᠥᠷᠥᠮᠡᠨ ᠰᠢᠷᠭᠠᠯ ᠡᠯᠡᠰᠦᠨ ᠴᠥᠯ᠂ ᠥᠩᠭᠡ ᠲᠤᠨᠤᠮᠠᠯ ᠨᠠᠭᠤᠷ ᠪᠦᠷᠢᠳᠦ ᠁ ᠭᠡᠳ ᠯᠡ ᠥᠭᠡᠷᠡ ᠬᠠᠮᠢᠭᠠ ᠨᠢ ᠴᠤ᠌ ᠪᠠᠢᠬᠤ ᠦᠭᠡᠢ ᠳᠠᠪᠲᠠᠭᠳᠠᠰᠢ ᠦᠭᠡᠢ ᠰᠣᠨᠢᠬᠠᠨ ᠦᠵᠡᠮᠵᠢ ᠲᠥᠰᠥᠭᠡᠯᠡᠯᠤᠨ ᠶᠢᠷᠲᠢᠨᠴᠦᠳᠦ ᠴᠢᠨᠢ ᠭᠢᠯᠠᠯᠵᠠᠨ ᠪᠠᠭᠤᠵᠤ᠂ ᠡᠷᠬᠢᠮ ᠲᠠᠨᠢ ᠲᠣᠰᠣᠨ ᠤᠭᠲᠤᠬᠤ ᠪᠥᠭᠡᠳ 《 ᠥᠩ ᠥᠷᠭᠡᠨ ᠠᠯᠠᠱᠠ ᠣᠯᠳᠠᠬᠤᠶᠠ ᠪᠡᠷᠬᠡ ᠨᠤᠲᠤᠭ》 ᠭᠡᠰᠡᠨ ᠤᠷᠲᠤᠶᠢᠨ ᠳᠠᠭᠤᠤᠶᠢᠨ ᠦᠭᠡᠶᠢ ᠵᠢᠩᠬᠢᠨᠢ ᠤᠳᠬᠠ ᠪᠡᠷ ᠨᠢ ᠣᠢᠯᠠᠭᠠᠵᠤ᠂ ᠶᠠᠰᠤᠨᠠᠴᠠᠪᠠᠨ ᠮᠡᠳᠡᠷᠡᠨ᠂ ᠰᠦᠨᠡᠰᠦᠨᠠᠴᠠᠪᠠᠨ ᠤᠬᠠᠭᠠᠷᠠᠵᠤ᠂ ᠶᠣᠰᠣᠲᠠᠢ ᠯᠠ ᠰᠡᠳᠬᠢᠯᠦᠨ ᠴᠢᠨᠠᠳᠤᠠᠴᠠᠪᠠᠨ ᠳᠠᠭᠤ ᠠᠯᠳᠠᠬᠤ ᠪᠣᠯᠣᠨᠠ᠃
ᠪᠢ ᠡᠢᠮᠦ ᠯᠡ ᠦᠯᠢᠭᠡᠷ ᠴᠤᠤᠷᠢᠶᠠᠯᠠᠵᠤ ᠦᠵᠡᠮᠵᠢ ᠴᠠᠬᠢᠯᠤᠭᠰᠠᠨ ᠭᠠᠢᠬᠠᠮᠰᠢᠭ᠍ᠲᠠᠢ ᠠᠭᠤᠯᠠᠶᠢᠨ ᠭᠠᠯ ᠲᠠᠢ ᠬᠣᠷᠮᠣᠢᠳᠤ ᠪᠠᠭᠲᠠᠵᠤ᠂ ᠡᠷᠳᠡᠮ ᠨᠣᠮᠢᠶᠠᠷ ᠴᠠᠭᠠᠰᠢ ᠠᠶᠠᠯᠠᠬᠤ ᠮᠥᠩᠭᠥᠨ ᠳᠥᠷᠥᠭᠡᠶᠢ ᠡᠨᠳᠡᠡᠴᠡ ᠵᠢᠭᠢᠵᠦ ᠪᠢᠯᠡ᠃ ᠲᠡᠭᠡᠭᠡᠳ ᠯᠠ ᠠᠭᠤᠯᠠ ᠪᠣᠯᠭᠠᠨᠠᠴᠠ ᠠᠳᠢᠰ ᠠᠪᠴᠤ᠂ ᠤᠰᠤ ᠪᠥᠬᠥᠨᠡᠴᠡ ᠷᠠᠰᠢᠶᠠᠨ ᠠᠮᠰᠠᠵᠤ ᠶᠠᠪᠤᠬᠤᠳᠠᠭᠠᠨ ᠨᠠᠰᠤᠲᠠᠨ ᠪᠤᠭᠤᠷᠤᠯ ᠡᠮᠡᠭᠡᠶᠢᠨᠢᠶᠡᠨ ᠨᠠᠨᠳᠢᠨ ᠵᠠᠬᠢᠶᠠᠰᠤᠶᠢ ᠳᠠᠩᠳᠠ ᠰᠠᠨᠠᠵᠤ᠂ ᠵᠢᠩ ᠳ᠋ᠤᠨᠢ ᠵᠢᠩᠳᠡᠭᠡ ᠦᠭᠡᠢ᠂ ᠵᠢᠮ ᠳ᠋ᠤᠨᠢ ᠲᠥᠭᠡᠷᠢᠭᠡ ᠦᠭᠡᠢ ᠯᠠ ᠶᠠᠪᠤᠨᠠᠮ ᠃
ᠣᠳᠣ᠌ ᠮᠢᠨᠤ ᠠᠵᠢᠯ ᠠᠮᠢᠳᠤᠷᠠᠯᠤᠨ ᠠᠶᠠᠭᠠᠨᠤ ᠠᠮᠠᠰᠠᠷ ᠵᠠᠭᠤᠵᠤ᠂ ᠠᠯᠪᠠᠨ ᠰᠢᠷᠡᠭᠡ ᠲᠦᠰᠢᠭᠰᠡᠨ ᠭᠠᠵᠠᠷ ᠮᠢᠨᠢ ᠭᠡᠪᠡᠯ ᠤᠷᠭᠤᠬᠤ ᠨᠠᠷᠠᠨᠤ ᠵᠦᠭᠲᠡᠭᠡᠨ ᠠᠭᠤᠯᠠᠶᠢᠨ ᠲᠦᠰᠢᠭ ᠲᠠᠢ《 ᠭᠣᠪᠢᠶᠢᠨ ᠭᠡᠷᠡᠯᠲᠦ ᠰᠤᠪᠤᠳ 》 — ᠪᠠᠶᠠᠨᠬᠣᠲᠠ— ᠪᠠᠬᠠᠷᠬᠠᠯᠲᠤ ᠬᠣᠲᠠ ᠶᠤᠮ ᠳᠠ᠃ ᠲᠡᠭᠡᠭᠡᠳ ᠠᠭᠤᠯᠠ ᠪᠢᠳᠡ ᠬᠣᠶᠠᠷ ᠰᠠᠯᠤᠰᠢ ᠦᠭᠡᠢ ᠪᠠᠷᠢᠯᠳᠤᠯᠭᠠ ᠲᠠᠢ ᠪᠣᠯᠪᠠ᠃ ᠠᠯᠤᠰ ᠭᠠᠵᠠᠷ ᠶᠠᠪᠤᠭᠠᠳ ᠭᠡᠷᠲᠡᠭᠡᠨ ᠢᠷᠡᠬᠦ ᠪᠦᠷᠢ ᠠᠯᠠᠱᠠ ᠠᠭᠤᠯᠠᠶᠢᠨᠢᠶᠡᠨ ᠪᠠᠷᠠᠶᠢ ᠠᠯᠤᠰᠠᠴᠠ ᠬᠠᠷᠠᠬᠤ ᠲᠠᠢ ᠵᠡᠷᠭᠡ ᠠᠶᠠᠨᠤ ᠶᠠᠳᠠᠷᠠᠭᠠ ᠰᠡᠳᠬᠢᠯᠦᠨ ᠴᠢᠯᠡᠭᠡ ᠵᠠᠮᠤᠨ ᠭᠤᠲᠤᠰ ᠲᠤ᠌ ᠰᠤᠭᠤᠷᠠᠭᠠᠳ ᠤᠨᠠᠬᠤ ᠰᠢᠭ᠋ ᠪᠣᠯᠳᠠᠭ ᠰᠠᠨ᠃ ᠪᠠᠶᠠᠨᠬᠣᠲᠠ ᠵᠣᠨᠳᠠᠭᠠᠨ ᠪᠣᠷᠣᠭᠠ᠂ ᠡᠪᠦᠯᠳᠡᠭᠡᠨ ᠴᠠᠰᠤ ᠲᠠᠰᠤᠷᠠᠳᠠᠭ ᠦᠭᠡᠢ ᠪᠠᠢᠭᠰᠠᠨ ᠨᠢ ᠰᠠᠶᠢᠬᠠᠨ ᠪᠢᠯᠡ᠃ ᠲᠡᠢᠮᠦ ᠪᠣᠯᠬᠣᠷ ᠪᠠᠶᠠᠨᠬᠣᠲᠠᠶᠢᠨ ᠮᠠᠨᠢ ᠠᠭᠤᠷ ᠠᠮᠢᠰᠬᠤᠯ ᠵᠣᠨᠳᠠᠭᠠᠨ ᠬᠠᠷᠢᠴᠠᠩᠭᠤᠢ ᠰᠡᠷᠢᠭᠦᠨ᠂ ᠡᠪᠦᠯᠳᠡᠭᠡᠨ ᠨᠡᠯᠢᠶᠡᠳ ᠳᠤᠯᠠᠭᠠᠨ ᠪᠠᠢᠳᠠᠭᠢᠶᠠᠷᠢᠶᠠᠨ《 ᠬᠥᠮᠥᠰᠦᠨ ᠠᠮᠢᠳᠤᠷᠠᠬᠤ ᠬᠠᠮᠤᠭᠤᠨ ᠲᠠᠭᠠᠲᠠᠢ ᠭᠠᠵᠠᠷᠤᠨ ᠨᠢᠭᠡ》 ᠬᠡᠮᠡᠨ ᠤᠯᠤᠰ ᠨᠡᠢᠲᠡᠳᠦ ᠦᠨᠡᠯᠡᠭᠳᠡᠭᠰᠡᠨ ᠶᠤᠮ᠃ ᠡᠨᠡ ᠪᠣᠯ ᠠᠯᠠᠱᠠ ᠬᠠᠢᠷᠬᠠᠨᠤ ᠯᠠ ᠪᠤᠶᠠᠨ ᠬᠡᠰᠢᠭ ᠰᠢᠦ ᠳᠡ᠃
《 ᠠᠭᠤᠯᠠᠠᠴᠠ ᠰᠠᠢᠬᠠᠨ ᠶᠠᠭᠤᠮᠠ ᠨᠢ ᠠᠭᠤᠯᠠ ᠯᠠ ᠪᠠᠢᠬᠤᠠᠴᠠ ᠠᠷᠭᠠ ᠦᠭᠡᠢ》 ᠃ ᠠᠪᠤ ᠡᠵᠢᠡᠴᠡ ᠥᠭᠡᠷᠡ ᠠᠴᠢᠲᠠᠢ ᠡᠨᠡᠷᠢᠩᠭᠦᠢ ᠬᠥᠮᠥᠨ ᠴᠥᠭᠡᠭᠡᠨ ᠲᠣᠬᠢᠶᠠᠯᠳᠤᠳᠠᠭ ᠰᠢᠭ᠋ ᠠᠯᠠᠱᠠ ᠠᠭᠤᠯᠠᠠᠴᠠ ᠢᠯᠡᠭᠦᠦ ᠰᠦᠷᠯᠢᠭ ᠰᠠᠢᠬᠠᠨ ᠦᠵᠡᠮᠵᠢ ᠲᠡᠭᠦᠰ ᠠᠭᠤᠯᠠ ᠪᠠᠢᠬᠤ ᠦᠭᠡᠢ ᠰᠢᠭ ᠰᠠᠨᠠᠭᠳᠠᠳᠠᠭᠢ ᠮᠢᠨᠢ ᠠᠭᠤᠴᠢᠯᠠᠭᠠᠷᠠᠢ ! ᠤᠴᠢᠷ ᠨᠢ ᠠᠯᠠᠱᠠ ᠠᠭᠤᠯᠠᠨᠳᠠᠭᠠᠨ ᠶᠠᠭᠠᠭᠢᠬᠤᠶᠢᠨ ᠠᠷᠭᠠ ᠦᠭᠡᠢ ᠬᠠᠢᠷᠠᠲᠠᠢ ᠪᠣᠯᠬᠣᠷ ᠁
- ᠨᠠᠢᠷᠠᠭᠤᠯᠤᠭ᠍ᠴᠢ᠄
- ᠨᠡᠪᠲᠡᠷᠡᠭᠦᠯᠦᠭᠴᠢ᠄
- ᠮᠡᠷᠭᠡᠵᠢᠯ᠄
ᠨᠠᠢᠷᠠᠭᠤᠯᠤᠭ᠍ᠴᠢ᠄ ᠣᠷᠬᠢᠯ
ᠣᠷᠴᠢᠭᠤᠯᠤᠭ᠍ᠴᠢ᠄




ᠰᠢᠭᠦᠮᠵᠢ ᠠᠯᠠᠭᠠ ᠂ ᠬᠤᠷᠳᠤᠨ ᠨᠢᠭᠡᠳᠦᠭᠡᠷ ᠵᠤᠷᠪᠤᠰ ᠰᠢᠭᠦᠮᠵᠢ ᠨᠡᠢ᠌ᠲᠡᠯᠡᠭᠡᠷᠡᠢ᠃