2026-10-28 16:13:36
ᠪᠣᠷᠣᠭᠠ ᠳᠤᠰᠤᠩᠨᠠᠭᠰᠠᠨ ᠨᠠᠮᠤᠷ
ᠨᠤᠲᠤᠭ ᠲᠠᠭᠠᠨ ᠬᠠᠷᠢᠯᠠ
ᠪᠣᠲᠠ ᠪᠤᠷᠭᠠᠯᠵᠢ ᠡᠪᠡᠰᠦ ᠴᠡᠴᠡᠭ
ᠨᠠᠮᠤᠷᠤᠨ ᠲᠡᠷᠯᠢᠭ ᠡᠮᠦᠰᠴᠢᠬᠡᠭᠰᠡᠨ ᠪᠠᠢᠯᠠ ᠃
ᠳᠦᠩᠬᠦᠭᠡᠷ ᠬᠥᠬᠡ ᠠᠭᠤᠯᠠᠰ
ᠣᠷᠣᠢᠠᠴᠠᠪᠠᠨ ᠣᠷᠣᠰᠢᠭᠠᠳ
ᠳᠦᠵᠢᠨ ᠨᠠᠮᠤᠭᠤᠬᠠᠨ
ᠠᠩᠭᠢᠷ ᠵᠢᠰᠦᠯᠡᠭᠰᠡᠨ ᠡᠪᠡᠰᠦ ᠨᠣᠭᠤᠭᠠ
ᠠᠭᠤᠵᠢᠮ ᠬᠥᠨᠳᠡᠢ ᠪᠦᠷᠬᠦᠨ ᠨᠠᠮᠢᠶᠠᠲᠤᠭᠠᠳ
ᠠᠳᠤᠭᠤ ᠦᠬᠡᠷ
ᠡᠷᠬᠡ ᠳᠤᠷᠠᠪᠠᠷ ᠢᠳᠡᠰᠢᠯᠡᠨᠡ᠃
ᠳᠤᠷᠠᠪᠠᠷ ᠣᠷᠬᠢᠭ᠍ᠰᠠᠨ ᠱᠠᠭᠠᠢ ᠰᠢᠭ᠋
ᠡᠨᠳᠡ ᠲᠡᠨᠳᠡ ᠰᠠᠭᠤᠷᠢᠨ ᠪᠠᠢᠰᠢᠩ ᠯᠠᠭᠯᠠᠢᠨᠠ
ᠳᠤᠭᠤᠢᠯᠵᠢᠨ ᠪᠤᠭᠤᠵᠢᠯᠠᠭᠰᠠᠨ
ᠬᠠᠳᠤᠯᠠᠩᠤᠨ ᠡᠪᠡᠰᠦ
ᠵᠢᠩᠨᠡᠭᠰᠡᠨ ᠮᠠᠨᠲᠸᠦ ᠮᠡᠲᠦ ᠪᠦᠮᠪᠦᠢᠨᠡ᠃
ᠨᠢᠳᠦ ᠭᠢᠯᠠᠰᠤᠮᠠ ᠨᠠᠷᠠ ᠬᠠᠶᠠ ᠳᠤᠯᠠᠢᠬᠤᠪᠠᠷ
ᠨᠡᠭᠦᠭᠡᠳ ᠬᠣᠯᠠᠳᠠᠭᠰᠠᠨ ᠡᠭᠦᠯᠡᠰᠢ ᠨᠢ ᠪᠠᠷᠠᠯᠠᠬᠤ ᠳ᠋ᠥ
ᠡᠪᠦᠭᠡᠰᠦᠨ ᠳᠤᠷᠠᠰᠤᠮᠵᠢ
ᠦᠬᠡᠷ ᠲᠡᠷᠭᠡᠨᠦ ᠬᠢᠬᠤᠨᠠᠬᠤ ᠴᠢᠮᠡᠭᠡ ᠠᠨᠢᠷᠯᠠᠨᠠ᠃
ᠨᠡᠭᠦᠳᠡᠯ ᠪᠠᠭᠤᠳᠠᠯ ᠮᠣᠩᠭᠣᠯ ᠭᠡᠷ ᠮᠢᠨᠢ
ᠶᠠᠮᠠᠷ ᠳᠣᠲᠤᠨᠤᠬᠠᠨ ᠪᠣᠢ
ᠨᠦᠮᠦᠷᠥᠭᠡᠳ ᠬᠡᠪᠲᠡᠬᠦ ᠳ᠋ᠥ ᠡᠵᠢᠶᠢᠨ ᠮᠢᠨᠢ ᠲᠡᠷᠯᠢᠭ
ᠬᠡᠴᠢᠨᠡᠬᠡᠨ ᠡᠭᠡᠯᠢᠲᠠᠢ ᠪᠣᠢ
ᠣᠷᠤᠢ ᠨᠢᠳᠦᠯᠡᠭᠰᠡᠨ ᠠᠶᠠᠭᠠᠨ ᠴᠡᠴᠡᠭᠦᠨ ᠳᠡᠯᠪᠢᠨ ᠳ᠋ᠥ
ᠣᠳᠤᠨᠤ ᠪᠣᠯᠤᠷ ᠮᠦᠬᠦᠯᠢᠭ ᠭᠢᠯᠠᠯᠵᠠᠨᠠ
ᠤᠶᠠᠩᠭᠠ ᠡᠭᠡᠰᠢᠭᠯᠡᠩᠲᠦ ᠬᠠᠷᠠ ᠲᠠᠭᠣ
ᠪᠦᠷᠬᠦᠨ ᠳᠡᠪᠢᠯᠬᠢᠯᠡᠬᠦᠶᠢ ᠬᠠᠷᠠᠭᠠᠳ
ᠤᠨᠠᠭᠠᠨ ᠨᠠᠰᠤᠨᠳᠠᠭᠠᠨ ᠪᠤᠴᠠᠯᠠ ᠭᠡᠵᠦ ᠡᠨᠳᠡᠭᠦᠷᠡᠨᠡ᠃
ᠮᠠᠨᠠᠨ ᠬᠥᠳᠡᠩᠦᠨ ᠳᠤᠮᠳᠠ ᠮᠢᠨᠦ ᠨᠤᠲᠤᠭ
ᠰᠦᠷᠯᠢᠭ ᠨᠢᠭᠤᠴᠠᠭᠠᠢ
ᠮᠠᠰᠢ ᠪᠠᠶᠠᠰᠬᠤᠯᠠᠩᠲᠦ ᠰᠡᠳᠬᠢᠯ ᠳ᠋ᠥ
ᠰᠦᠵᠢᠭ ᠠᠮᠢᠯᠠᠬᠤᠢ
ᠱᠣᠷᠤᠨ ᠥᠨᠳᠦᠷ ᠠᠭᠤᠯᠠᠰᠤᠨ ᠳᠤᠮᠳᠠᠭᠤᠷ
ᠪᠢᠯᠡᠭᠦᠳᠡᠭᠰᠡᠨ ᠴᠠᠭᠠᠨ ᠵᠠᠮ ᠭᠦᠶᠦᠨᠡ
ᠱᠤᠤᠭᠢᠲᠠᠯᠠ ᠳᠠᠪᠬᠢᠬᠤ ᠲᠡᠷᠭᠡᠨᠦᠭᠦᠳ
ᠮᠦᠷᠭᠦᠵᠦ ᠠᠯᠳᠠᠮᠠ ᠵᠦᠷᠢᠨᠡ᠃
ᠬᠦᠷᠴᠢᠬᠢᠨᠡᠲᠡᠯᠡ ᠦᠶᠡᠷᠯᠡᠳᠡᠭ ᠪᠠᠶᠠᠨ ᠭᠣᠣᠯ ᠮᠢᠨᠢ
ᠬᠥᠨᠳᠡᠢ ᠳ᠋ᠡᠭᠡᠨ ᠮᠡᠯᠲᠡᠭᠡᠨᠡᠭᠰᠡᠨ ᠲᠣᠭᠤᠷᠢᠮ ᠪᠣᠯᠵᠦ ᠮᠡᠯᠮᠡᠷᠡᠨᠡ
ᠠᠷᠢᠭᠤᠨ ᠤᠰᠤᠶᠢ ᠨᠢ ᠪᠢᠲᠡᠭᠦᠯᠡᠵᠦ ᠠᠪᠤᠭᠠᠳ ᠣᠭᠣᠴᠢᠬᠤ ᠳ᠋ᠥ
ᠠᠯᠳᠠ ᠪᠡᠶᠡᠨᠦ ᠮᠢᠨᠢ ᠴᠢᠰᠤ ᠲᠠᠢ
ᠠᠮᠤᠷ ᠮᠡᠨᠳᠦᠪᠡᠷ ᠵᠣᠯᠭᠠᠨᠠ᠃
ᠬᠠᠳᠤᠯᠠᠩ ᠰᠢᠪᠲᠤᠷᠠᠭᠰᠠᠨ ᠨᠠᠮᠤᠷ ᠴᠠᠭ
ᠬᠠᠷᠢᠭᠠᠳ ᠣᠴᠢᠬᠤ ᠳ᠋ᠥ ᠨᠤᠲᠤᠭ ᠮᠢᠨᠢ ᠭᠡᠷᠡᠯᠲᠦᠨᠡ
ᠬᠠᠷᠢᠨ ᠮᠢᠨᠦ ᠪᠠᠭᠠ ᠨᠠᠰᠤ
ᠬᠠᠯᠲᠠᠷ ᠨᠢᠯᠪᠤᠰᠤ ᠲᠠᠢ ᠬᠠᠷᠠᠭᠳᠠᠨᠠ᠃
- ᠨᠠᠢᠷᠠᠭᠤᠯᠤᠭ᠍ᠴᠢ᠄
- ᠨᠡᠪᠲᠡᠷᠡᠭᠦᠯᠦᠭᠴᠢ᠄
- ᠮᠡᠷᠭᠡᠵᠢᠯ᠄
ᠨᠠᠢᠷᠠᠭᠤᠯᠤᠭ᠍ᠴᠢ᠄ ᠣᠷᠬᠢᠯ
ᠣᠷᠴᠢᠭᠤᠯᠤᠭ᠍ᠴᠢ᠄




ᠰᠢᠭᠦᠮᠵᠢ ᠠᠯᠠᠭᠠ ᠂ ᠬᠤᠷᠳᠤᠨ ᠨᠢᠭᠡᠳᠦᠭᠡᠷ ᠵᠤᠷᠪᠤᠰ ᠰᠢᠭᠦᠮᠵᠢ ᠨᠡᠢ᠌ᠲᠡᠯᠡᠭᠡᠷᠡᠢ᠃