2026-10-28 16:14:52
— ᠤᠷᠳᠤᠰ ᠬᠤᠳᠠᠶᠢᠨ 《ᠨᠤᠮᠤᠨ ᠵᠤᠭᠤᠭ》 ᠴᠤᠭᠯᠠᠷᠠᠯᠤᠨ ᠬᠠᠮᠳᠤᠶᠢᠨ ᠠᠵᠢᠯᠯᠠᠭᠠᠳᠤ ᠤᠷᠤᠯᠴᠠᠭᠠᠳ
2026 ᠤᠨᠤ 5 ᠰᠠᠷᠠᠶᠢᠨ 17ᠤ᠋ ᠡᠳᠦᠷᠢ ᠪᠢ ᠮᠠᠷᠳᠠᠵᠤ ᠴᠢᠳᠠᠬᠤ ᠦᠭᠡᠢ᠃ ᠡᠨᠡ ᠡᠳᠦᠷ ᠨᠠᠳᠠᠳᠤ ᠪᠠᠶᠠᠷ ᠵᠢᠷᠭᠠᠯ᠂ ᠤᠮᠤᠭ᠍ᠰᠢᠯ ᠵᠤᠷᠢᠭ᠍ᠵᠢᠯ᠂ ᠪᠤᠳᠤᠯ ᠲᠦᠷᠦᠭᠳᠡᠯᠢ ᠬᠡᠯᠡᠬᠦᠶᠡ ᠶᠡᠬᠡ ᠤᠯᠭᠤᠭᠰᠠᠨ ᠡᠳᠦᠷ ᠶᠤᠮᠰᠠᠨ᠃
ᠪᠠᠶᠠᠷ ᠵᠢᠷᠭᠠᠯᠢᠶᠠᠨ ᠬᠡᠯᠡᠪᠡᠯ ᠬᠡᠳᠦᠨ ᠲᠠᠯᠠᠶᠢᠨ ᠢᠷᠡᠯᠳᠡ ᠲᠠᠢ᠃ ᠨᠢᠭᠡᠳᠦ᠂ ᠤᠷᠳᠤᠰᠤᠨ 《ᠨᠤᠮᠤᠨ ᠵᠤᠭᠤᠭ》 ᠴᠤᠭᠯᠠᠷᠠᠯᠤᠨ ᠬᠠᠮᠳᠤᠪᠠᠷ ᠤᠩᠰᠢᠬᠤ ᠨᠤᠮᠤᠨ ᠰᠢᠯᠢᠯᠳᠡᠳᠦ ᠮᠢᠨᠤ ᠨᠤᠮ ᠰᠤᠩᠭᠤᠭᠳᠠᠵᠤ᠂ ᠨᠠᠢ᠍ᠮᠠᠳᠠᠬᠢ ᠤᠳᠠᠭᠠᠨᠤ ᠶᠠᠷᠢᠯᠴᠠᠬᠤ ᠬᠤᠷᠠᠯᠤᠨ ᠬᠢᠨᠢ ᠭᠤᠤᠯ ᠰᠡᠳᠦᠪ ᠪᠤᠯᠤᠭᠰᠠᠨ ᠶᠠᠪᠤᠳᠠᠯ᠃ ᠮᠢᠩᠭᠠ ᠲᠦᠮᠡᠨ ᠨᠤᠮᠤᠨ ᠲᠤᠮᠳᠠᠠᠴᠠ 《ᠮᠤᠩᠭᠤᠯ ᠬᠦᠮᠦᠨ ᠪᠤᠶᠤ ᠮᠤᠩᠭᠤᠯ ᠮᠤᠷᠢ》 ᠭᠡᠬᠦ ᠨᠤᠮᠢ ᠰᠤᠩᠭᠤᠵᠤ ᠤᠩᠰᠢᠵᠠᠭᠠᠨ᠂ ᠮᠢᠨᠤ ᠦᠭᠡᠷᠡ ᠪᠤᠰᠤᠳ ᠨᠤᠮᠤᠨ ᠠᠭᠤᠯᠭᠠ ᠯᠤᠭᠠ ᠤᠶᠠᠯᠳᠤᠭᠤᠯᠵᠤ ᠶᠠᠷᠢᠯᠴᠠᠨ ᠰᠤᠳᠤᠯᠵᠤ᠂ ᠠᠰᠠᠭᠤᠯᠳᠠ ᠲᠤᠷᠠᠳᠤᠵᠠᠭᠠᠨ ᠬᠠᠮᠳᠤᠪᠠᠷ ᠰᠤᠷᠤᠯᠴᠠᠭᠰᠠᠨ ᠨᠢ ᠰᠠᠢᠬᠠᠨ ᠪᠠᠢᠭᠰᠠᠨ᠃ ᠬᠤᠶᠠᠷᠲᠤ᠂ ᠡᠨᠡ ᠨᠢ ᠶᠠᠭ ᠯᠡ ᠬᠡᠪᠯᠡᠭᠦᠯᠦᠭᠰᠡᠨ ᠨᠤᠮᠤᠳᠲᠤ ᠲᠠᠷᠬᠠᠭᠠᠯᠳᠠᠶᠢᠨ ᠬᠤᠷᠠᠯ ᠬᠢᠵᠦ ᠦᠭᠴᠦ ᠪᠠᠢᠭᠠ ᠶᠤᠮ ᠰᠢᠭ᠋ ᠪᠤᠯᠵᠤ᠂ ᠡᠴᠢᠨᠡᠬᠡᠨ ᠵᠢᠯᠦᠨ ᠲᠤᠷᠰᠢᠳᠡᠬᠢ ᠬᠤᠭᠤᠰᠤᠨᠢ ᠨᠦᠬᠦᠵᠦ ᠦᠭᠭᠦᠭᠰᠡᠨᠢᠶᠡᠷ ᠰᠡᠳᠭᠢᠯᠳᠦ ᠮᠢᠨᠢ ᠬᠢᠵᠠᠭᠠᠯᠠᠰᠢ ᠦᠭᠡᠢ ᠪᠠᠶᠠᠷ ᠵᠢᠷᠭᠠᠯᠤᠨ ᠲᠦᠷᠦᠭᠳᠡᠯ ᠡᠭᠦᠰᠴᠦ᠂ ᠬᠠᠩᠭᠢᠨ ᠬᠤᠰᠢᠭᠤᠨᠤ ᠷᠢᠸᠠᠳᠢ᠂ ᠵᠢᠷᠠᠨᠲᠤᠯᠤᠭᠠ᠂ ᠢᠷᠪᠢᠰᠴᠢᠯᠠᠭᠤ᠂ ᠪᠦᠳᠦᠭᠡᠯ᠂ ᠴᠠᠢᠯᠭᠠᠨ ᠵᠡᠷᠭᠡ ᠵᠠᠯᠠᠭᠤ ᠪᠠᠭ᠍ᠰᠢ ᠨᠠᠷᠲᠤ᠂ ᠪᠠᠰᠠ《ᠰᠢᠭᠦᠮᠵᠢᠯᠡᠬᠦᠢ》᠂ 《ᠮᠤᠩᠭᠤᠯ ᠬᠦᠮᠦᠨ ᠪᠤᠶᠤ ᠮᠤᠩᠭᠤᠯ ᠮᠤᠷᠢ》 ᠭᠡᠬᠦ ᠨᠤᠮᠠᠴᠠ ᠤᠶᠠᠩᠭᠠᠯᠠᠨ ᠤᠩᠰᠢᠭᠠᠳ ᠰᠤᠨᠤᠰᠬᠤ ᠨᠤᠮᠤᠨ ᠬᠡᠯᠪᠡᠷᠢ ᠪᠤᠯᠭᠠᠵᠤ ᠤᠯᠠᠨᠤ ᠰᠤᠨᠤᠷᠲᠤ ᠬᠦᠷᠭᠡᠭᠰᠡᠨ ᠠᠷᠢᠭᠤᠨᠴᠡᠴᠡᠭᠲᠤ ᠰᠡᠳᠭᠢᠯᠦᠨ ᠤᠭᠠᠴᠠᠪᠠᠨ ᠪᠠᠶᠠᠷᠯᠠᠨ ᠲᠠᠯᠠᠷᠬᠠᠭᠰᠠᠨ ᠶᠤᠮ᠃ ᠭᠤᠷᠪᠠᠳᠤ᠂ ᠲᠡᠳᠡᠭᠡᠷ ᠲᠡᠭᠦᠦ ᠨᠡᠷ ᠮᠢᠨᠢ ᠬᠦᠴᠦ ᠬᠦᠯᠦᠰᠦ᠂ ᠴᠠᠭ ᠵᠠᠢ᠂ ᠮᠦᠩᠭᠦ ᠵᠤᠭᠤᠰᠢᠶᠠᠨ ᠬᠠᠷᠠᠮ ᠦᠭᠡᠢ ᠭᠠᠷᠭᠠᠵᠤ᠂ ᠨᠤᠮ ᠤᠩᠰᠢᠯᠭᠠᠶᠢᠨ ᠠᠵᠢᠯᠯᠠᠭᠠ ᠦᠷᠨᠢᠭᠦᠯᠦᠨ᠂ ᠡᠷᠬᠢᠨ ᠲᠤᠭᠤᠷᠢᠨᠤᠪᠠᠨ ᠬᠦᠮᠦᠰᠢ ᠲᠠᠢᠴᠢᠯᠠᠨ ᠲᠠᠭᠠᠭᠤᠯᠵᠤ ᠨᠤᠮᠤᠨ ᠴᠡᠪᠡᠷ ᠠᠭᠠᠷ ᠦᠭᠡᠳᠡ᠂ ᠰᠤᠶᠤᠯᠤᠨ ᠭᠦᠨ ᠲᠠᠪᠬᠤᠷᠭᠠ ᠤᠷᠤᠭᠤ ᠴᠢᠭᠯᠡᠨ ᠠᠮᠢᠳᠤᠷᠠᠯᠤᠨ ᠤᠳᠬᠠ ᠠᠭᠤᠯᠭᠠᠶᠢ ᠬᠦᠮᠦᠰᠲᠦ ᠤᠯᠭᠤᠵᠤ ᠴᠢᠳᠠᠭᠠ ᠨᠢ ᠨᠠᠳᠠᠳᠤ ᠪᠠᠶᠠᠷ ᠵᠢᠷᠭᠠᠯᠢ ᠠᠪᠴᠢᠷᠠᠵᠤ ᠦᠭᠭᠦᠭᠰᠡᠨ ᠶᠤᠮ᠃ ᠪᠠᠶᠠᠷ ᠵᠢᠷᠭᠠᠯ ᠭᠡᠭᠴᠢ ᠨᠤᠮ ᠪᠢᠴᠢᠭᠦᠨ ᠨᠢᠮᠭᠡᠨ ᠬᠠᠭᠤᠳᠠᠰᠤᠨᠠᠴᠠ ᠦᠪᠡᠷᠢ ᠴᠢᠨᠢ ᠴᠢᠭᠯᠡᠨ ᠢᠷᠡᠳᠡᠭ ᠭᠡᠳᠡᠭᠢ ᠨᠠᠳᠠᠳᠤ ᠬᠡᠯᠡᠵᠦ ᠦᠭᠬᠦᠯᠡ᠃
ᠡᠨᠡ ᠤᠳᠠᠭᠠᠨᠤ ᠬᠤᠷᠠᠯᠳᠤ ᠨᠠᠢ᠍ᠮᠠᠨ ᠨᠠᠰᠤᠳᠠᠢ ᠬᠡᠦᠬᠡᠳᠡᠴᠡ ᠨᠠᠶᠨ ᠰᠢᠬᠠᠭᠰᠠᠨ ᠨᠠᠰᠤᠳᠠᠨ ᠬᠦᠷᠳᠡᠯᠡ ᠤᠷᠤᠯᠴᠠᠵᠤ᠂ ᠬᠠᠩᠭᠢᠨ ᠬᠤᠰᠢᠭᠤ᠂ ᠦᠦᠰᠢᠨ ᠬᠤᠰᠢᠭᠤ᠂ ᠤᠳᠤᠭᠤᠨ ᠡᠮᠦᠨᠡᠳᠦ ᠬᠤᠰᠢᠭᠤ᠂ ᠡᠵᠡᠨ ᠬᠤᠷᠤᠭᠠ ᠬᠤᠰᠢᠭᠤ᠂ ᠤᠳᠤᠭ ᠬᠤᠰᠢᠭᠤ ᠵᠡᠷᠭᠡᠠᠴᠠ ᠤᠯᠠᠨ ᠬᠦᠮᠦᠨ ᠬᠦᠷᠦᠯᠴᠡᠨ ᠢᠷᠡᠭᠰᠡᠨ ᠨᠢ ᠰᠡᠳᠭᠢᠯᠢ ᠦᠨᠡᠬᠡᠷ ᠲᠤᠭᠳᠤᠯᠤᠭᠤᠯᠵᠤ ᠪᠢᠯᠡ᠃ ᠲᠡᠳᠡ ᠬᠠᠷᠢᠯᠴᠠᠨ ᠨᠤᠮᠤᠨ ᠪᠡᠯᠡᠭ ᠬᠦᠷᠭᠡᠯᠴᠡᠵᠤ᠂ ᠤᠩᠰᠢᠬᠤ ᠲᠤᠷᠠ ᠲᠠᠢ ᠨᠤᠮ ᠰᠤᠳᠤᠷᠢᠶᠠᠨ ᠰᠤᠯᠢᠯᠴᠠᠨ ᠬᠦᠭᠵᠢᠶᠡᠨᠳᠡᠢ ᠶᠠᠷᠢᠯᠴᠠᠬᠤᠶᠢ ᠨᠢ ᠬᠠᠷᠠᠬᠤᠳᠤ ᠪᠡᠶᠡ ᠰᠡᠳᠭᠢᠯᠢᠶᠡᠷ ᠦᠶᠡ ᠦᠶᠡ ᠬᠠᠯᠠᠭᠤᠨ ᠤᠷᠤᠰᠬᠠᠯ ᠭᠦᠶᠦᠵᠦ ᠪᠠᠢᠪᠠ᠃
ᠰᠡᠳᠬᠢᠭᠳᠡᠯ ᠮᠠᠨᠢ ᠤᠯᠠᠨ ᠲᠠᠯᠠ ᠲᠠᠢ ᠪᠠᠢᠭᠰᠠᠨ᠃ ᠨᠢᠭᠡᠳᠦ᠂ ᠨᠤᠮ᠂ ᠠᠷᠢᠬᠢ ᠲᠠᠢ ᠬᠠᠮᠢᠶᠠ ᠦᠭᠡᠢ᠃ ᠬᠤᠶᠠᠷᠲᠤ᠂ ᠶᠠᠷᠢᠯᠴᠠᠬᠤ ᠬᠤᠷᠠᠯ ᠡᠬᠢᠯᠡᠬᠦᠡᠴᠡ ᠤᠷᠢᠳ ᠪᠢᠷᠦᠨ ᠰᠢᠯᠭᠠᠯᠳᠠ ᠲᠠᠢ᠂ ᠬᠤᠷᠠᠯᠤᠨ ᠲᠠᠷᠠᠭᠠ ᠱᠠᠩᠨᠠᠯ ᠬᠦᠬᠢᠭᠦᠯᠦᠯ ᠲᠠᠢ᠃ ᠭᠤᠷᠪᠠᠳᠤ᠂ ᠶᠠᠷᠢᠯᠴᠠᠭᠠᠨ ᠲᠤᠮᠳᠠ ᠭᠠᠷᠤᠭᠰᠠᠨ ᠰᠠᠢᠬᠠᠨ ᠮᠡᠳᠡᠭᠡᠨᠦᠭᠦᠳ᠃ ᠰᠠᠢᠬᠠᠨ ᠮᠡᠳᠡᠭᠡ ᠭᠡᠳᠡᠭ ᠨᠢ ᠦᠨᠡᠨᠳᠡᠭᠡᠨ ᠬᠤᠶᠠᠷ ᠪᠦᠰᠡᠭᠦᠢᠶᠢᠨ ᠰᠠᠢᠬᠠᠨ ᠰᠠᠨᠠᠭᠠᠨᠤ ᠢᠳᠡᠪᠬᠢ ᠤᠳᠬᠠ ᠲᠠᠢ ᠦᠢᠯᠡ ᠠᠵᠢᠯᠯᠠᠭᠠ ᠪᠤᠯᠬᠤ ᠶᠤᠮ᠃ ᠨᠢᠭᠡ ᠨᠢ ᠤᠳᠤᠭᠤᠨ ᠡᠮᠦᠨᠡᠳᠦ ᠬᠤᠰᠢᠭᠤᠨᠤ ᠠᠷᠢᠭᠤᠨᠴᠠᠭᠠᠨ ᠭᠡᠳᠡᠭ ᠪᠦᠰᠡᠭᠦᠢᠶᠢᠨ ᠪᠤᠳᠤᠯ ᠰᠠᠨᠠᠭᠠ ᠦᠢᠯᠡ ᠠᠵᠢᠯᠯᠠᠭᠠ ᠨᠢ ᠨᠠᠳᠠᠳᠤ ᠭᠦᠨ ᠰᠠᠭᠤᠭᠳᠠᠯ ᠦᠭᠴᠡᠢ᠃ ᠶᠠᠷᠢᠯᠴᠠᠯᠭᠠ ᠲᠤᠮᠳᠠ ᠠᠷᠢᠭᠤᠨᠴᠠᠭᠠᠨᠠᠴᠠ ᠭᠦᠩᠰᠡᠩᠨᠤᠷᠪᠤᠶᠢᠨ ᠦᠬᠢᠳᠦᠨ ᠰᠤᠷᠭᠠᠨ ᠬᠦᠮᠦᠵᠢᠯᠳᠦ ᠦᠵᠡᠭᠦᠯᠦᠭᠰᠡᠨ ᠭᠠᠪᠢᠶᠠ ᠵᠢᠳᠭᠦᠯᠢ ᠪᠢᠰᠢᠷᠡᠨ ᠲᠤᠷᠠᠰᠴᠤ᠂ ᠦᠪᠡᠷᠢᠶᠡᠨ ᠴᠤ᠌ ᠵᠠᠯᠠᠭᠤ ᠪᠦᠰᠡᠬᠦᠢᠴᠦᠳᠦᠨ ᠨᠤᠮ ᠪᠢᠴᠢᠭ ᠤᠩᠰᠢᠵᠤ ᠦᠪᠡᠷᠰᠡᠳᠦᠨ ᠬᠢᠷᠢ ᠬᠡᠮᠢ ᠲᠡᠭᠡᠭᠰᠢᠯᠡᠭᠦᠯᠵᠦ ᠶᠠᠪᠤᠬᠤᠶᠢᠨ ᠴᠢᠬᠤᠯᠠ ᠴᠢᠨᠠᠷᠢ ᠭᠦᠨᠵᠡᠭᠡᠢ ᠲᠠᠨᠢᠵᠤ ᠤᠯᠤᠭᠰᠠᠨ ᠭᠡᠵᠦ ᠶᠠᠷᠢᠵᠤ ᠪᠠᠢᠭᠰᠠᠨ ᠶᠤᠮ᠃ ᠲᠡᠭᠡᠭᠡᠳ ᠨᠤᠳᠤᠭᠲᠠᠭᠠᠨ ᠪᠦᠰᠡᠬᠦᠢᠴᠦᠳᠦᠨ ᠨᠤᠮ ᠤᠩᠰᠢᠬᠤ ᠲᠤᠭᠤᠢᠯᠠᠩᠢ ᠵᠤᠬᠢᠶᠠᠨ ᠪᠠᠢᠭᠤᠯᠵᠤ᠂ ᠭᠡᠰᠢᠭᠦᠳᠢᠶᠡᠨ ᠴᠦᠬᠡᠨᠡᠴᠡ ᠤᠯᠠᠨ ᠪᠤᠯᠭᠠᠵᠤ ᠦᠷᠭᠡᠵᠢᠭᠦᠯᠦᠨ ᠪᠠᠢᠭᠠ ᠠᠵᠢ᠃ ᠲᠡᠷᠡ ᠬᠡᠯᠡᠬᠦᠳᠡᠭᠡᠨ᠄ ᠪᠦᠰᠡᠬᠦᠢ ᠬᠦᠮᠦᠨᠦ ᠤᠬᠠᠭᠠᠨ ᠮᠡᠳᠡᠯᠭᠡ ᠭᠤᠷᠪᠠᠨ ᠦᠶᠡᠶᠢᠨ ᠬᠦᠮᠦᠰᠢ ᠨᠦᠯᠦᠭᠡᠯᠡᠵᠦ ᠴᠢᠳᠠᠨᠠ᠃ ᠶᠠᠭᠤ ᠭᠡᠬᠦᠳᠦ᠂ ᠨᠢᠭᠡ ᠦᠬᠢᠨ ᠬᠦᠮᠦᠨ ᠬᠠᠳᠠᠮᠤᠨ ᠭᠠᠵᠠᠷ ᠮᠤᠷᠳᠠᠬᠤᠳᠤ ᠪᠢᠴᠢᠭ ᠰᠤᠶᠤᠯ᠂ ᠮᠡᠷᠭᠡᠨ ᠤᠬᠠᠭᠠᠨ ᠲᠠᠢ ᠯᠡ ᠪᠤᠯ ᠡᠩ ᠲᠡᠷᠢᠭᠦᠨᠳᠦ ᠡᠷᠡ ᠨᠦᠬᠦᠷᠢᠶᠡᠨ ᠨᠦᠯᠦᠭᠡᠯᠡᠵᠦ᠂ ᠲᠠᠷᠠᠭᠠ ᠨᠢ ᠡᠷᠪᠡᠢ ᠬᠡᠦᠬᠡᠳᠢᠶᠡᠨ ᠨᠦᠯᠦᠭᠡᠯᠡᠵᠦ᠂ ᠰᠡᠭᠦᠯᠳᠦᠨᠢ ᠬᠠᠳᠠᠮ ᠠᠪᠤ ᠡᠵᠢ᠂ ᠠᠬᠠ ᠲᠡᠭᠦᠦᠰᠢᠶᠡᠨ ᠨᠦᠯᠦᠭᠡᠯᠡᠵᠦ ᠪᠤᠯᠬᠤ ᠶᠤᠮ᠃ ᠲᠡᠭᠡᠬᠦᠪᠡᠷ᠂ ᠡᠮᠡᠭᠳᠡᠢ ᠬᠦᠮᠦᠨᠦ ᠭᠡᠷ ᠪᠦᠯᠢᠶᠢᠨ ᠰᠠᠭᠤᠷᠢ ᠰᠤᠷᠭᠠᠨ ᠬᠦᠮᠦᠵᠢᠯᠳᠦ ᠡᠵᠡᠯᠡᠬᠦ ᠪᠠᠢᠷᠢ ᠰᠠᠭᠤᠷᠢ ᠮᠠᠰᠢ ᠴᠢᠬᠤᠯᠠ ᠪᠠᠢᠭᠠᠶᠢ ᠮᠡᠳᠡᠬᠦ ᠬᠡᠷᠡᠭᠳᠡᠢ ᠶᠤᠮ ᠪᠠᠢᠨᠠ ᠭᠡᠵᠦ ᠪᠢᠯᠡ᠃ ᠮᠡᠳᠡᠯᠭᠡ ᠪᠤᠯᠪᠠᠰᠤᠷᠠᠯ ᠲᠠᠢ᠂ ᠮᠡᠷᠭᠡᠨ ᠤᠬᠠᠭᠠᠨ ᠲᠠᠢ ᠪᠦᠰᠡᠭᠦᠢ ᠬᠦᠮᠦᠨᠦ ᠬᠤᠢᠴᠢ ᠦᠶᠡᠶᠢᠨ ᠬᠦᠮᠦᠵᠢᠭᠳᠡᠯ — ᠦᠭᠡᠷᠡ ᠪᠡᠷ ᠬᠡᠯᠡᠪᠡᠯ᠂ ᠭᠡᠷ ᠪᠦᠯᠢᠶᠢᠨ ᠰᠤᠷᠭᠠᠨ ᠬᠦᠮᠦᠵᠢᠯᠳᠦ ᠦᠵᠡᠭᠦᠯᠬᠦ ᠨᠦᠯᠦᠭᠡ ᠨᠢ ᠬᠡᠨᠡᠴᠡ ᠴᠤ᠌ ᠢᠯᠡᠭᠦᠦ ᠪᠠᠢᠳᠠᠭᠢ ᠪᠤᠳᠤᠬᠤ ᠴᠢᠬᠤᠯᠠᠳᠠᠢ ᠭᠡᠬᠦ ᠲᠤᠬᠠᠢ ᠲᠡᠭᠡᠷᠡ ᠦᠶᠡᠶᠢᠨ ᠡᠷᠳᠡᠮᠳᠡᠳ ᠬᠡᠯᠡᠭᠰᠡᠭᠡᠷ ᠢᠷᠡᠭᠰᠡᠨ ᠴᠤ᠌ ᠠᠷᠢᠭᠤᠨᠴᠠᠭᠠᠨ ᠰᠢᠭ᠋ ᠤᠢᠯᠠᠭᠠᠵᠤ ᠴᠢᠳᠠᠭᠰᠠᠨ ᠨᠢ᠂ ᠲᠡᠭᠡᠵᠦ ᠦᠢᠯᠡᠳᠦᠯᠭᠡᠵᠢᠭᠦᠯᠬᠦ ᠪᠡᠷ ᠴᠢᠷᠮᠠᠢᠭᠰᠠᠨ ᠨᠢ ᠬᠠᠰᠢᠯᠠ ᠴᠦᠬᠡᠨ ᠪᠠᠢᠳᠠᠭᠢ ᠴᠤ᠌ ᠪᠤᠳᠤᠯᠳᠠᠢ ᠪᠢᠯᠡ᠃ ᠠᠷᠢᠭᠤᠨᠴᠠᠭᠠᠨᠤ ᠬᠡᠯᠡᠬᠦᠪᠡᠷ᠂ ᠤᠳᠤ ᠲᠡᠳᠡᠨᠦ ᠨᠤᠮ ᠤᠩᠰᠢᠬᠤ ᠲᠤᠭᠤᠢᠯᠠᠩ ᠳ᠋ᠦ ᠨᠢᠭᠡᠨᠳᠡ ᠭᠤᠴᠢ ᠰᠢᠬᠠᠮ ᠭᠡᠰᠢᠭᠦᠳ ᠲᠠᠢ ᠪᠤᠯᠵᠤ ᠵᠤᠷᠢᠯᠭᠠ ᠲᠠᠢ᠂ ᠲᠦᠯᠦᠪᠯᠡᠭᠡ ᠲᠠᠢ ᠠᠵᠢᠯᠯᠠᠭᠠ ᠦᠷᠨᠢᠭᠦᠯᠵᠦ ᠪᠠᠢᠭᠠ ᠨᠢ ᠮᠢᠨᠤ ᠪᠤᠳᠤᠯ ᠰᠡᠳᠬᠢᠭᠳᠡᠯᠳᠦ ᠤᠯᠠᠨ ᠵᠦᠢᠯᠦᠨ ᠠᠭᠤᠯᠭᠠ ᠨᠡᠮᠡᠭᠰᠡᠨᠳᠤᠨᠢ ᠤᠯᠵᠠᠭᠤᠷᠬᠠᠭᠰᠠᠨ ᠶᠤᠮ᠃
ᠪᠢᠷᠦᠨ ᠰᠢᠯᠭᠠᠯᠳᠠ᠂ ᠱᠠᠩᠨᠠᠯ ᠬᠦᠬᠢᠭᠦᠯᠦᠯ ᠭᠡᠳᠡᠭᠢ ᠠᠮᠠᠷᠬᠠᠨ ᠤᠢᠯᠠᠭᠠᠵᠤ ᠪᠤᠯᠤᠨᠠ᠃ ᠭᠡᠪᠡᠴᠦ᠂ ᠠᠷᠠᠳ ᠤᠯᠠᠨᠤ ᠲᠤᠮᠳᠠ ᠰᠠᠢᠨ ᠲᠤᠷᠠᠪᠠᠷ ᠡᠷᠬᠢᠯᠡᠭᠳᠡᠨ ᠭᠤᠷᠪᠠᠨ ᠵᠢᠯᠦᠨ ᠨᠢᠭᠤᠷ ᠦᠵᠡᠵᠦ ᠪᠠᠢᠭᠠ ᠦᠢᠯᠡ ᠠᠵᠢᠯᠯᠠᠭᠠᠨᠤ ᠬᠤᠪᠢᠳᠤ ᠮᠦᠩᠭᠦ ᠵᠤᠭᠤᠰ᠂ ᠲᠠᠯᠠᠪᠤᠷ ᠲᠦᠬᠦᠭᠡᠷᠦᠮᠵᠢ ᠭᠡᠬᠦ ᠵᠦᠢᠯᠢ ᠲᠤᠬᠢᠷᠠᠭᠤᠯᠤᠨ ᠡᠮᠭᠢ ᠲᠢᠭ᠌ᠯᠢᠮ ᠲᠠᠢ ᠶᠠᠪᠤᠭᠳᠠᠭᠤᠯᠬᠤ ᠭᠡᠳᠡᠭ ᠨᠢ ᠮᠦᠨ ᠴᠤ᠌ ᠵᠤᠬᠢᠬᠤ ᠬᠡᠮᠵᠢᠶᠡᠨᠦ ᠤᠷᠠ ᠴᠢᠳᠠᠪᠤᠷᠢ ᠬᠡᠷᠡᠭᠰᠡᠨᠡ᠃ ᠨᠠᠳᠠᠳᠤ ᠬᠠᠮᠤᠭᠤ᠋ᠨ ᠭᠦᠨ ᠰᠠᠭᠤᠳᠠᠯ ᠦᠭᠴᠦ᠂ ᠮᠢᠨᠤ ᠴᠢᠬᠢᠨᠡ ᠮᠠᠰᠢ ᠬᠦᠴᠦᠳᠡᠢ ᠰᠤᠨᠤᠰᠤᠭᠳᠠᠭᠰᠠᠨ ᠦᠭᠡ ᠪᠤᠯ 《ᠨᠤᠮ᠂ ᠠᠷᠢᠬᠢ ᠲᠠᠢ ᠬᠠᠮᠢᠶᠠ ᠦᠭᠡᠢ》 ᠭᠡᠬᠦ ᠰᠠᠨᠠᠭᠠᠶᠢ ᠠᠭᠤᠯᠣᠭᠰᠠᠨ ᠵᠤᠬᠢᠶᠠᠨ ᠪᠠᠢᠭᠤᠯᠤᠭ᠍ᠴᠢ ᠷᠢᠸᠠᠳᠢᠶᠢᠨ ᠦᠭᠡ ᠶᠤᠮ᠃ ᠦᠨᠡᠬᠡᠷ ᠭᠡᠨᠡᠮ᠂ ᠨᠤᠮ ᠤᠩᠰᠢᠬᠤ ᠠᠵᠢᠯᠯᠠᠭᠠᠨᠤ ᠬᠤᠶᠠᠷ ᠡᠳᠦᠷᠦᠨ ᠲᠤᠷᠰᠢᠳᠤ ᠠᠷᠢᠬᠢᠨᠤ ᠪᠠᠷᠠ ᠬᠠᠷᠠᠭᠳᠠᠭᠰᠠᠨ ᠦᠭᠡᠢ᠃ ᠠᠷᠢᠬᠢ ᠵᠤᠭᠤᠭᠯᠠᠴᠢᠬᠠᠭᠠᠳ ᠤᠯᠠᠢᠵᠤ ᠨᠡᠯᠡᠢᠵᠦ ᠶᠠᠪᠤᠭ᠍ᠴᠢ ᠴᠤ᠌ ᠦᠵᠡᠭᠳᠡᠭᠰᠡᠨ ᠦᠭᠡᠢ᠃ ᠶᠠᠭᠠᠬᠢᠭᠠᠳ ᠪᠤᠢ? ᠭᠡᠬᠦᠳᠦ ᠲᠡᠷᠡ ᠵᠠᠯᠠᠭᠤ ᠪᠠᠭ᠍ᠰᠢᠠᠴᠠ 《ᠮᠠᠨᠤ ᠴᠤᠭᠯᠠᠭᠠᠨᠳᠤ ᠠᠷᠢᠬᠢ ᠦᠭᠡᠢ᠂ ᠠᠷᠢᠬᠢ ᠤᠤᠭᠤᠵᠤ ᠨᠤᠮ ᠶᠠᠷᠢᠭ᠍ᠰᠠᠭᠠᠷ ᠬᠡᠷᠡᠭ ᠦᠭᠡᠢ ᠪᠤᠯᠴᠢᠬᠠᠨᠠ》 ᠭᠡᠵᠦ ᠬᠡᠯᠡᠵᠦ ᠪᠢᠯᠡ᠃ ᠶᠠᠮᠠᠷ ᠰᠠᠢᠬᠠᠨ ᠰᠠᠨᠠᠭᠠ ᠶᠤᠮ ᠪᠤᠢ? ᠡᠬᠢᠯᠡᠭᠡᠳ ᠶᠠᠭ ᠯᠡ ᠡᠢᠮᠦᠷᠬᠦᠦ ᠠᠵᠢᠯᠯᠠᠭᠠᠨᠤ ᠶᠡᠷᠦᠳᠡᠶᠢᠨ ᠬᠡᠪ ᠶᠤᠰᠤᠨᠡᠴᠡ ᠭᠠᠵᠢᠭ᠍ᠰᠠᠨ ᠰᠢᠤᠬᠠᠨ ᠪᠤᠳᠤᠯ ᠮᠠᠨᠢ ᠰᠡᠭᠦᠯᠳᠦᠨᠢ ᠤᠷᠤ ᠲᠠᠰᠤ ᠰᠠᠷᠨᠢᠭ᠍ᠰᠠᠨ ᠶᠤᠮ᠃ ᠲᠡᠭᠡᠯᠭᠦᠢ ᠶᠠᠭᠠᠬᠢᠬᠤᠪ᠂ ᠰᠠᠢᠬᠠᠨ ᠪᠤᠳᠤᠵᠤ ᠦᠵᠡᠪᠡᠯ᠂ ᠨᠤᠮ ᠴᠢᠨᠢ ᠦᠨᠡᠬᠡᠷ ᠠᠷᠢᠬᠢ ᠲᠠᠢ ᠬᠠᠮᠢᠶᠠ ᠦᠭᠡᠢ ᠶᠤᠮ ᠪᠠᠢᠨᠠ ᠰᠢᠦ᠃ ᠠᠷᠢᠬᠢᠨ ᠰᠢᠷᠡᠭᠡ ᠪᠠᠵᠠᠭᠠᠬᠤ ᠦᠭᠡᠢᠳᠦ ᠬᠦᠮᠦᠰ ᠢᠳᠡᠬᠦᠪᠡᠨ ᠢᠳᠡᠵᠦ᠂ ᠬᠡᠯᠡᠯᠴᠡᠬᠦᠪᠡᠨ ᠬᠡᠯᠡᠯᠴᠡᠨᠡ᠂ ᠠᠷᠢᠬᠢᠨ ᠰᠢᠷᠡᠭᠡ ᠪᠠᠵᠠᠭᠠᠬᠤ ᠦᠭᠡᠢᠳᠦ ᠬᠤᠷᠠᠯ ᠴᠢᠨᠢ ᠬᠤᠷᠠᠯ ᠶᠤᠰᠤᠳᠠᠢ ᠶᠠᠪᠤᠭᠳᠠᠨᠠ᠃ ᠭᠡᠬᠦᠳᠡᠭᠡᠨ᠂ ᠮᠠᠰᠢ ᠬᠠᠯᠠᠭᠤᠨ ᠲᠤᠳᠤᠨᠤᠬᠠᠨ ᠡᠬᠢᠯᠡᠵᠦ᠂ ᠬᠦᠷ ᠬᠦᠭᠵᠢᠶᠡᠨ ᠲᠠᠢ ᠦᠨᠳᠦᠷᠯᠡᠵᠦ᠂ ᠮᠠᠰᠢ ᠲᠦᠪᠯᠡᠭᠦᠨ ᠶᠤᠰᠤᠷᠬᠠᠭ ᠵᠢᠷᠭᠠᠳᠠᠭ ᠪᠠᠢᠨᠠ᠃ ᠦᠨᠡᠬᠡᠷ ᠭᠡᠨᠡᠮ᠂ ᠨᠤᠮ ᠴᠢᠨᠢ ᠠᠷᠢᠬᠢ ᠲᠠᠢ ᠶᠠᠮᠠᠷ ᠬᠠᠮᠢᠶᠠ ᠲᠠᠢ ᠶᠤᠮ ᠪᠤᠢ ?
ᠬᠡᠯᠡᠵᠦ ᠪᠤᠢ 《ᠨᠤᠮᠤᠨ ᠵᠤᠭᠤᠭ》 ᠴᠤᠭᠯᠠᠷᠠᠯᠤᠨ 《ᠬᠠᠮᠳᠤᠪᠠᠷ ᠨᠤᠮ ᠤᠩᠰᠢᠶᠠ》 ᠭᠡᠳᠡᠭ ᠪᠤᠯ ᠤᠷᠳᠤᠰ ᠬᠤᠳᠠᠶᠢᠨ ᠬᠡᠳᠦᠨ ᠬᠤᠰᠢᠭᠤᠶᠢᠨ ᠨᠤᠮᠤᠨ ᠪᠠᠬᠠᠳᠠᠳᠤᠨ ᠬᠠᠮᠳᠤᠶᠢᠨ ᠠᠵᠢᠯᠯᠠᠭᠠᠨᠤ ᠨᠡᠷᠡᠢᠳᠦᠯᠭᠡ ᠪᠠᠢᠭᠠ ᠶᠤᠮ᠃ ᠡᠨᠡ ᠴᠤᠭᠯᠠᠷᠠᠯ ᠪᠠᠢᠭᠤᠯᠤᠭᠳᠠᠭᠠᠳ ᠬᠡᠳᠦᠨ ᠵᠢᠯ ᠪᠤᠯᠵᠤ ᠪᠠᠢᠭᠠ ᠪᠦᠭᠡᠳ ᠬᠠᠮᠳᠤᠶᠢᠨ ᠠᠵᠢᠯᠯᠠᠭᠠᠨᠢᠶᠠᠨ ᠦᠷᠨᠢᠭᠦᠯᠦᠭᠡᠳ ᠴᠤ᠌ ᠭᠤᠷᠪᠠ ᠲᠦᠷᠪᠡᠨ ᠵᠢᠯᠦᠨ ᠨᠢᠭᠤᠷ ᠦᠵᠡᠵᠦ ᠪᠠᠢᠭᠠ ᠠᠵᠢ᠃ ᠵᠢᠯ ᠪᠤᠯᠭᠠᠨᠤ ᠵᠤᠬᠢᠬᠤ ᠴᠠᠭᠲᠤ ᠨᠢᠭᠡ ᠤᠳᠠᠭᠠᠨᠤ ᠬᠠᠮᠳᠤᠶᠢᠨ ᠠᠵᠢᠯᠯᠠᠭᠠ ᠶᠠᠪᠤᠭᠳᠠᠭᠤᠯᠳᠠᠭ ᠡᠨᠡᠬᠦ ᠠᠵᠢᠯᠯᠠᠭᠠᠪᠠᠨ ᠬᠤᠯᠪᠤᠭᠳᠠᠭᠰᠠᠨ ᠬᠤᠰᠢᠭᠤ ᠨᠤᠳᠤᠭᠤᠨ ᠬᠠᠮᠢᠶᠠ ᠲᠠᠢ ᠬᠦᠮᠦᠰ ᠡᠭᠡᠯᠵᠢᠪᠡᠷ ᠲᠠᠭᠠᠭᠠᠴᠢᠯᠠᠨ ᠡᠷᠬᠢᠯᠡᠵᠦ ᠬᠢᠳᠡᠭ᠃ ᠡᠭᠦᠨᠡᠴᠡ ᠪᠤᠰᠤᠳ ᠴᠠᠭᠲᠤ ᠨᠤᠳᠤᠭ ᠤᠰᠤᠨ ᠳ᠋ᠠᠭᠠᠨ ᠪᠠᠭᠠ ᠬᠡᠯᠪᠡᠷᠢᠶᠢᠨ ᠴᠤᠭᠯᠠᠭᠠ ᠪᠤᠶᠤ ᠸᠢᠴᠠᠲ ᠶᠠᠷᠢᠯᠴᠠᠯᠭᠠ ᠦᠷᠨᠢᠭᠦᠯᠵᠦ᠂ ᠬᠠᠮᠳᠤᠶᠢᠨ ᠠᠵᠢᠯᠯᠠᠭᠠᠳᠠᠭᠠᠨ ᠤᠷᠢᠵᠤ ᠤᠷᠤᠯᠴᠠᠭᠤᠯᠬᠤ ᠵᠤᠬᠢᠶᠠᠯᠴᠢᠶᠢᠨ ᠨᠤᠮᠠᠴᠠ ᠵᠤᠬᠢᠶᠠᠯ ᠰᠤᠩᠭᠤᠵᠤ ᠤᠩᠰᠢᠭᠠᠳ ᠰᠤᠨᠤᠰᠬᠤ ᠨᠤᠮᠤᠨ ᠬᠡᠯᠪᠡᠷᠢ ᠪᠤᠯᠭᠠᠵᠤ ᠴᠤᠭᠯᠠᠷᠠᠯᠢᠶᠠᠷ ᠲᠠᠷᠬᠠᠭᠠᠳᠠᠭ᠃
ᠡᠨᠡ ᠨᠢ ᠮᠠᠰᠢ ᠤᠬᠠᠮᠰᠠᠷᠳᠠᠢ᠂ ᠢᠳᠡᠪᠬᠢᠳᠡᠢ᠂ ᠠᠶᠠᠨᠳᠠᠭᠠᠨᠤ ᠭᠡᠳᠡᠭ ᠰᠡᠳᠬᠢᠭᠳᠡᠯᠢ ᠬᠦᠮᠦᠰᠲᠦ ᠦᠭᠳᠡᠭ ᠪᠠᠢᠨᠠ᠃ ᠤᠬᠠᠮᠰᠠᠷᠳᠠᠢ ᠭᠡᠵᠦ ᠬᠡᠯᠡᠵᠦ ᠪᠠᠢᠭᠠ ᠨᠢ᠂ ᠶᠠᠷᠢᠯᠴᠠᠭᠠᠨ ᠳ᠋ᠤ᠌ ᠤᠷᠤᠭᠤᠯᠬᠤ ᠪᠤᠶᠤ ᠬᠠᠮᠳᠤᠪᠠᠷ ᠤᠩᠰᠢᠬᠤ ᠨᠤᠮᠢ ᠭᠠᠷᠲᠤ ᠪᠠᠷᠢᠭ᠍ᠳᠠᠬᠤᠶᠢᠨ ᠲᠡᠳᠦᠢᠪᠡᠷ ᠰᠤᠩᠭᠤᠵᠤ ᠪᠠᠢᠭᠠ ᠪᠢᠰᠢ᠂ ᠬᠠᠷᠢᠨ ᠤᠯᠠᠭᠤᠯᠠ ᠪᠠᠨ ᠶᠠᠷᠢᠯᠴᠠᠨ ᠲᠤᠭᠳᠠᠭᠠᠵᠤ ᠪᠠᠢᠭᠠ ᠶᠤᠮ᠃ ᠡᠨᠡ ᠪᠤᠯ ᠤᠬᠠᠮᠰᠠᠷᠳᠠᠢ ᠨᠤᠮ ᠤᠩᠰᠢᠯᠭᠠ ᠭᠡᠵᠦ ᠬᠡᠯᠡᠵᠦ ᠪᠠᠢᠭᠠᠶᠢᠨ ᠤᠴᠢᠷ᠃ ᠢᠳᠡᠪᠬᠢᠳᠡᠢ ᠭᠡᠳᠡᠭ ᠨᠢ ᠰᠤᠩᠭᠤᠭᠰᠠᠨ ᠨᠤᠮᠢᠶᠠᠨ ᠤᠩᠰᠢᠵᠤ ᠪᠠᠷᠠᠭᠠᠳ ᠬᠠᠮᠳᠤᠶᠢᠨ ᠶᠠᠷᠢᠯᠴᠠᠯᠭᠠ ᠦᠷᠨᠢᠭᠦᠯᠵᠦ᠂ ᠤᠢᠯᠠᠭᠠᠯᠳᠠ ᠲᠦᠷᠦᠭᠳᠡᠯᠢᠶᠡᠨ ᠲᠡᠯᠭᠡᠬᠦ ᠨᠢ ᠠᠷᠪᠠᠨ ᠬᠦᠮᠦᠨᠦ ᠤᠩᠰᠢᠭ᠍ᠰᠠᠨ ᠨᠤᠮᠢ ᠵᠠᠭᠤᠨ ᠬᠦᠮᠦᠨᠦ ᠴᠡᠭᠡᠵᠢᠨᠳᠦ ᠬᠦᠷᠭᠡᠬᠦ ᠢᠳᠡᠪᠬᠢᠳᠡᠢ ᠦᠢᠯᠡᠳᠦᠯ ᠪᠠᠢᠳᠠᠭᠢ ᠬᠡᠯᠡᠵᠦ ᠪᠤᠢ᠃ ᠠᠶᠠᠨᠳᠠᠭᠠᠨ ᠭᠡᠳᠡᠭ ᠨᠢ ᠨᠤᠮ ᠤᠩᠰᠢᠭ᠍ᠰᠠᠨ ᠪᠤᠶᠤ ᠤᠩᠰᠢᠭ᠍ᠰᠠᠨ ᠨᠤᠮᠤᠨᠢᠶᠠᠨ ᠲᠤᠬᠠᠢ ᠲᠦᠷᠦᠭᠳᠡᠯᠢᠶᠡᠨ ᠶᠠᠷᠢᠯᠴᠠᠬᠤ ᠨᠢ ᠠᠯᠪᠠᠳᠠᠯᠭᠠᠶᠢᠨ ᠪᠢᠰᠢ᠂ ᠬᠠᠷᠢᠨ ᠮᠠᠰᠢ ᠠᠶᠠᠨᠳᠠᠭᠠᠨᠤ ᠪᠠᠢᠳᠠᠯᠢᠶᠠᠷ ᠤᠯᠠᠨᠤ ᠲᠤᠮᠳᠠ ᠢᠯᠡᠷᠡᠯᠢᠶᠡᠨ ᠤᠯᠵᠤ ᠴᠢᠳᠠᠳᠠᠭ ᠪᠠᠢᠨᠠ᠃ ᠡᠨᠡ ᠨᠢ ᠠᠯᠢ ᠨᠢᠭᠡ ᠵᠤᠬᠢᠶᠠᠯᠴᠢ᠂ ᠰᠢᠭᠦᠮᠵᠢᠯᠡᠭᠴᠢᠶᠢᠨ ᠵᠤᠬᠢᠶᠠᠯ ᠰᠢᠭᠦᠮᠵᠢᠶᠢ ᠤᠩᠰᠢᠬᠤ ᠪᠤᠶᠤ ᠠᠯᠪᠠᠨᠤ ᠲᠠᠯᠠᠠᠴᠠ᠂ ᠡᠰᠡᠭᠦᠯᠡ ᠵᠤᠬᠢᠶᠠᠭ᠍ᠴᠢᠶᠢᠨ ᠬᠢᠨᠢ ᠦᠪᠡᠷᠢᠶᠡᠨ ᠡᠷᠬᠢᠯᠡᠭᠰᠡᠨ ᠶᠠᠷᠢᠯᠴᠠᠨ ᠰᠤᠳᠤᠯᠬᠤ ᠬᠤᠷᠠᠯᠳᠤ ᠤᠷᠤᠯᠴᠠᠬᠤᠠᠴᠠ ᠬᠤᠯᠠ ᠤᠨᠳᠤᠤ ᠰᠠᠭᠤᠭᠳᠠᠯ ᠲᠠᠢ ᠪᠠᠢᠭᠠᠶᠢ ᠬᠡᠯᠡᠭᠦᠰᠢᠳᠡᠢ᠃
ᠪᠤᠳᠤᠪᠠᠯ᠂ ᠡᠢᠮᠦᠷᠬᠦᠦ ᠬᠠᠮᠳᠤᠪᠠᠷ ᠨᠤᠮ ᠵᠤᠬᠢᠶᠠᠯ ᠤᠩᠰᠢᠬᠤ ᠠᠵᠢᠯᠯᠠᠭᠠ ᠡᠯᠡ ᠨᠤᠳᠤᠭᠢᠶᠠᠷ ᠪᠠᠢᠳᠠᠭ ᠯᠡ ᠪᠠᠢᠬᠤ᠃ ᠠᠪᠠᠭᠠ ᠬᠤᠰᠢᠭᠤᠨᠳᠤ ᠪᠠᠰᠠ ᠲᠡᠢᠮᠦ ᠴᠤᠭᠯᠠᠷᠠᠯ ᠪᠤᠢ ᠭᠡᠵᠦ ᠠᠯᠢ ᠨᠢᠭᠡ ᠲᠠᠪᠴᠠᠩᠠᠴᠠ ᠮᠡᠳᠡᠭᠡᠯᠡᠯ ᠦᠵᠡᠭᠰᠡᠨ ᠶᠤᠮ᠃ ᠶᠠᠭᠤ ᠴᠤ᠌ ᠪᠤᠯᠤᠭᠰᠠᠨ ᠤᠷᠳᠤᠰᠤᠨ 《ᠨᠤᠮᠤᠨ ᠵᠤᠭᠤᠭ》 ᠴᠤᠭᠯᠠᠷᠠᠯᠤᠨ ᠬᠢᠨ ᠡᠨᠡ ᠠᠵᠢᠯᠯᠠᠭᠠᠨᠢ ᠰᠠᠢᠬᠠᠨ ᠶᠠᠪᠤᠭᠳᠠᠭᠤᠯᠵᠤ ᠪᠠᠢᠭᠠ ᠨᠢ ᠪᠢᠰᠢᠷᠠᠭᠦᠰᠢᠳᠡᠢ᠃ ᠬᠤᠢᠰᠢᠳᠠ 《ᠨᠤᠮ᠂ ᠠᠷᠢᠬᠢ ᠲᠠᠢ ᠬᠠᠮᠢᠶᠠ ᠦᠭᠡᠢ》 ᠭᠡᠳᠡᠭᠢᠶᠠᠨ ᠵᠠᠷᠴᠢᠮ ᠪᠤᠯᠭᠠᠵᠤ᠂ ᠨᠤᠮ ᠤᠩᠰᠢᠬᠤᠳᠤ ᠤᠷᠤᠯᠴᠠᠭᠰᠠᠳᠢᠶᠠᠷ ᠲᠦᠷᠦᠭᠳᠡᠯ ᠵᠤᠬᠢᠶᠠᠯ᠂ ᠰᠢᠭᠦᠮᠵᠢ ᠪᠢᠴᠢᠭᠦᠯᠵᠦ᠂ ᠤᠬᠢ ᠰᠢᠯᠢᠳᠡᠭᠢ ᠰᠤᠩᠭᠤᠵᠤ ᠨᠤᠮ ᠪᠤᠯᠭᠠᠨ ᠲᠡᠪᠳᠡᠷᠯᠡᠵᠦ ᠪᠤᠯᠤᠨᠠ᠃ ᠡᠨᠡ ᠪᠤᠯ ᠨᠢᠭᠡ᠃ ᠬᠤᠶᠠᠷᠲᠤ᠂ ᠬᠠᠮᠢᠶᠠ ᠲᠠᠢ ᠰᠤᠨᠢᠨ ᠰᠡᠳᠭᠦᠯᠦᠨ ᠬᠢᠨ ᠲᠠᠢ ᠬᠤᠯᠪᠤᠭᠠ ᠪᠠᠷᠢᠵᠤ᠂ ᠨᠠᠢᠷᠠᠭᠤᠯᠤᠭ᠍ᠴᠢ ᠪᠠᠭ᠍ᠰᠢ ᠨᠠᠷᠢ ᠵᠠᠯᠠᠵᠤ ᠬᠤᠷᠠᠯᠳᠠᠭᠠᠨ ᠤᠷᠤᠯᠴᠠᠭᠤᠯᠤᠨ ᠬᠢᠴᠢᠶᠡᠯ᠂ ᠢᠯᠡᠳᠭᠡᠯ ᠬᠢᠯᠭᠡᠵᠦ ᠪᠤᠯᠤᠨᠠ᠃ ᠭᠤᠷᠪᠠᠳᠤ᠂ ᠵᠦᠪᠬᠡᠨ ᠨᠤᠮᠳᠤ ᠯᠡ ᠬᠢᠵᠠᠭᠠᠷᠯᠠᠭᠳᠠᠬᠤ ᠦᠭᠡᠢᠪᠡᠷ᠂ ᠰᠤᠨᠢᠨ ᠰᠡᠳᠭᠦᠯᠦᠳᠢᠶᠡᠷ ᠨᠡᠢᠳᠡᠯᠡᠭᠳᠡᠭᠰᠡᠨ ᠰᠢᠨᠡ ᠬᠠᠭᠤᠴᠢᠨ ᠵᠤᠬᠢᠶᠠᠯᠠᠴᠠ ᠰᠤᠩᠭᠤᠵᠤ ᠶᠠᠷᠢᠯᠴᠠᠭᠠᠦᠷᠨᠢᠭᠦᠯᠵᠦ ᠪᠤᠯᠤᠨᠠ᠃ ᠢᠩᠭᠢᠬᠦ ᠨᠢ᠂ ᠬᠠᠷᠠᠭᠠᠪᠠᠨ ᠬᠤᠯᠠᠳᠬᠠᠵᠤ᠂ ᠬᠠᠮᠳᠤᠶᠢᠨ ᠠᠵᠢᠯᠯᠠᠭᠠᠨᠤᠪᠠᠨ ᠬᠦᠷᠢᠶᠡ ᠴᠠᠷᠠᠭᠠ ᠪᠠ ᠤᠶᠠᠨ ᠬᠠᠳᠠᠨ ᠴᠢᠨᠠᠷᠢ ᠨᠡᠮᠡᠭᠳᠡᠭᠦᠯᠵᠦ ᠪᠤᠯᠬᠤ ᠶᠤᠮ᠃ ᠶᠠᠷᠢᠯᠴᠠᠭᠠᠨᠤ ᠵᠤᠬᠢᠶᠠᠯ ᠰᠤᠩᠭᠤᠬᠤᠳᠤ ᠴᠤᠭᠯᠠᠷᠠᠯᠤᠨ ᠭᠡᠰᠢᠭᠦᠳ ᠪᠦᠷ ᠰᠢᠯᠢᠵᠦ ᠲᠠᠨᠢᠯᠴᠠᠭᠤᠯᠬᠤ ᠡᠷᠬᠡ ᠲᠠᠢ ᠮᠦᠷᠳᠡᠭᠡᠨ ᠴᠤᠭᠯᠠᠵᠤ ᠢᠷᠡᠭᠰᠡᠨ ᠤᠯᠠᠨ ᠵᠤᠬᠢᠶᠠᠯᠤᠳᠢ ᠠᠵᠢᠯᠯᠠᠭᠠᠨᠤ ᠵᠤᠬᠢᠶᠠᠨ ᠪᠠᠢᠭᠤᠯᠬᠤ ᠲᠤᠭᠤᠢᠯᠠᠩ ᠬᠢᠭᠡᠳ ᠵᠦᠪᠯᠡᠭᠴᠢᠳᠦᠨ ᠲᠤᠭᠤᠢᠯᠠᠩ ᠤ᠋ᠨ ᠬᠢᠨ ᠲᠠᠬᠢᠨ ᠰᠢᠭᠰᠢᠵᠦ᠂ ᠡᠴᠦᠰᠦᠨ ᠳ᠋ᠦᠩᠢ ᠪᠢᠯᠸᠲ ᠦᠭᠬᠦ ᠠᠷᠭᠠᠪᠠᠷ ᠰᠢᠢᠳᠪᠦᠷᠢ ᠭᠠᠷᠭᠠᠵᠤ ᠪᠤᠯᠬᠤ ᠶᠤᠮ᠃
- ᠨᠠᠢᠷᠠᠭᠤᠯᠤᠭ᠍ᠴᠢ᠄
- ᠨᠡᠪᠲᠡᠷᠡᠭᠦᠯᠦᠭᠴᠢ᠄
- ᠮᠡᠷᠭᠡᠵᠢᠯ᠄
ᠨᠠᠢᠷᠠᠭᠤᠯᠤᠭ᠍ᠴᠢ᠄ ᠬᠦᠰᠡᠯᠡᠩ
ᠣᠷᠴᠢᠭᠤᠯᠤᠭ᠍ᠴᠢ᠄




ᠰᠢᠭᠦᠮᠵᠢ ᠠᠯᠠᠭᠠ ᠂ ᠬᠤᠷᠳᠤᠨ ᠨᠢᠭᠡᠳᠦᠭᠡᠷ ᠵᠤᠷᠪᠤᠰ ᠰᠢᠭᠦᠮᠵᠢ ᠨᠡᠢ᠌ᠲᠡᠯᠡᠭᠡᠷᠡᠢ᠃