ᠲᠡᠷᠢᠭᠦᠨ ᠨᠢᠭᠤᠷ>ᠵᠢᠷᠭᠢᠶ᠎ᠡ> ᠤᠶᠠᠩᠭᠠᠲᠤ ᠨᠤᠮ

2020-06-11 10:14:59

ᠵᠣᠬᠢᠶᠠᠭ᠍ᠴᠢ᠄ ᠣᠩᠱᠢᠭ᠍ᠰᠠᠨ ᠣᠳᠠᠭ᠎ᠠ᠄

ᠭᠠᠷᠪᠤ᠋ ᠨᠠᠰᠤᠳᠠᠨ ᠭᠠᠷ ᠤᠳᠠᠰᠤ᠎ᠪᠠᠨ ᠪᠠᠷᠢᠵᠤ ᠡᠢᠰᠢ ᠲᠡᠢᠰᠢ ᠠᠯᠬᠤᠨ ᠂ ᠪᠠᠢᠨ ᠲᠠᠬᠢᠨ ᠵᠢᠷᠬᠢᠶ᠎ᠡ ᠲᠡᠭᠡᠷ᠎ᠡ᠎ᠪᠠᠨ ᠬᠡᠨ ᠬᠦᠮᠦᠨ᠎ᠲᠠᠢ ᠨᠢᠭᠡ ᠶᠠᠭᠤᠮ᠎ᠠ ᠶᠠᠷᠢᠵᠤ ᠂ ᠤᠷᠤᠨ ᠭᠠᠷᠤᠨ ᠰᠠᠭᠤᠳᠠᠯ ᠠᠯᠳᠠᠨ᠎ᠠ ᠃ ᠶᠠᠪᠤᠭᠤᠯᠤᠭᠰᠠᠨ ᠴᠢᠮᠡᠭᠡ᠎ᠪᠠᠨ ᠬᠠᠭᠠᠰ ᠡᠳᠦᠷ ᠬᠦᠯᠢᠶᠡᠭᠡᠳ ᠬᠠᠷᠢᠭᠤ ᠦᠬᠡᠢ ᠪᠤᠯᠬᠤ᠎ᠶᠢᠨ ᠵᠠᠪᠰᠠᠷ ᠪᠠᠰᠠ ᠬᠠᠮᠢᠭ᠎ᠠ ᠬᠤᠯᠠ᠎ᠶᠢᠨ ᠬᠡᠥᠬᠡᠳ ᠵᠠᠯᠠᠭᠤ ᠨᠠᠰᠤᠨ᠎ᠤ ᠦᠯᠢᠬᠡᠷ ᠤᠴᠠᠷᠠᠯ᠎ᠳᠠᠭᠠᠨ ᠪᠤᠳᠤᠯ ᠠᠯᠳᠠᠭᠤᠷᠠᠨ᠎ᠠ ᠃ ︽ ᠬᠦᠬᠡᠷᠦᠬᠦᠢ ᠶᠤᠮ ᠰᠢᠦ ᠂ ᠶᠤᠰᠤᠳᠠᠢ ᠴᠠᠢᠯᠭᠠᠨ ᠴᠠᠭᠠᠪᠤᠷ ᠤᠯᠤᠰ ᠪᠠᠢᠯ᠎ᠠ ᠂ ᠤᠳᠤ ᠴᠦ ᠪᠦᠷ ᠦᠰᠦ ᠬᠡᠵᠢᠬᠡ᠎ᠨᠢ ᠪᠤᠭᠤᠷᠤᠯᠳᠠᠵᠤ ᠂ ᠦᠷ᠎ᠡ᠎ᠶᠢᠨ᠎ᠢᠶᠡᠨ ᠦᠷ᠎ᠡ᠎ᠶᠢ ᠦᠨᠦᠰᠤᠨ ᠲᠠᠭᠠᠯᠠᠭᠰᠠᠨ ᠦᠨᠳᠦᠷ ᠨᠠᠰᠤᠳᠠᠢ ᠬᠦᠭᠰᠢᠨ ᠬᠦᠮᠦᠰ ᠪᠤᠯᠵᠤ ᠳ᠋ᠠ ︕ ︾ ᠭᠡᠵᠤ ᠬᠡᠨ᠎ᠳ᠋ᠤ ᠶᠠᠷᠢᠵᠤ ᠪᠠᠢᠬᠤ᠎ᠨᠢ ᠦᠯᠦ ᠮᠡᠳᠡᠭᠬᠡᠨ ᠦᠬᠦᠯᠡᠵᠤ ᠂ ᠭᠠᠷ ᠤᠳᠠᠰᠤᠨ᠎ᠤ ᠬᠢᠨᠢ ᠬᠠᠷᠢᠭᠤ ᠲᠤᠤᠭᠠᠷᠬᠤ᠎ᠳ᠋ᠤ ᠶᠠᠭᠠᠷᠠᠩᠬᠠᠨ ᠲᠡᠬᠦᠨ᠎ᠢᠶᠡᠨ ᠢᠯᠢᠵᠤ ᠲᠤᠪᠰᠢᠨ ᠂ ᠴᠢᠬᠢᠨ᠎ᠳ᠋ᠡᠭᠡᠨ ᠨᠠᠭᠠᠵᠤ ᠴᠢᠩᠨᠠᠵᠤ ᠪᠠᠢᠯ᠎ᠠ ᠃


 ᠫᠦᠬᠦ ︕ ᠲᠡᠷᠡ ᠬᠤᠶᠠᠷ ᠮᠠᠨᠢ ᠬᠦᠷᠦᠬᠡᠳ ᠢᠷᠡᠬᠦ ᠭᠡᠵᠤ ᠪᠠᠢᠭ᠎ᠠ ᠶᠤᠮ ‍ᠤᠤ ︖ ᠠᠭᠤᠯᠵᠠᠭ᠎ᠠ ᠦᠬᠡᠢ ᠶᠡᠷᠦ᠎ᠨᠢ ᠬᠡᠳᠦᠢ ᠵᠢᠯ ᠪᠤᠯᠴᠢᠬᠠᠪᠠ ︖
 ᠵᠠ ᠵᠠ ᠂ ᠪᠢ ᠶᠠᠭᠠᠬᠢᠵᠤ ᠡᠢᠵᠤ ᠪᠠᠢᠭᠠᠳ ᠴᠦ ᠭᠡᠰᠡᠨ ᠬᠦᠷᠦᠬᠡᠳ ᠤᠴᠢᠨ᠎ᠠ ︕
 ᠬᠠᠷᠢᠨ ᠬᠤᠭᠤᠯᠠ ᠤᠮᠳᠠ ᠂ ᠬᠤᠨᠤᠭ ᠪᠠᠭᠤᠳᠠᠯ᠎ᠢ᠎ᠨᠢ ᠭᠠᠷᠪᠤ᠋ ᠴᠢ ᠡᠪᠯᠡᠬᠦᠯᠵᠤ ᠠᠮᠵᠢᠭᠤᠯᠵᠤ ᠪᠠᠢᠭᠠᠷᠠᠢ ︕
ᠶᠡᠷᠦ᠎ᠶᠢᠨ ᠴᠠᠭ᠎ᠲᠠᠭᠠᠨ ᠲᠤᠭᠠᠳᠠᠢ ᠬᠤᠶᠠᠷ ᠦᠰᠦᠭ ᠵᠢᠷᠤᠭ ᠮᠡᠳᠦ᠎ᠶᠢᠨ ᠬᠡᠳᠦᠨ ᠶᠠᠭᠤᠮ᠎ᠠ᠎ᠡᠴᠠ ᠦᠬᠡᠷ᠎ᠡ ᠴᠢᠮᠡᠭᠡ ᠪᠠᠢᠳᠠᠭ ᠦᠬᠡᠢ ᠢᠯᠤᠮ ᠵᠢᠯᠤᠮ ︽ ᠰᠡᠬᠡᠭᠡᠳᠡᠳ᠎ᠤᠨ ᠬᠤᠯᠪᠤᠭ᠎ᠠ ︾᠎ᠨᠢ ᠦᠨᠦᠳᠦᠷ ᠢᠩᠬᠢᠵᠤ ᠤᠰᠤ ᠪᠤᠴᠠᠯᠬᠤ ᠰᠢᠤᠬᠠᠨ ᠱᠤᠤᠬᠢᠵᠤ ᠪᠠᠢᠭ᠎ᠠ᠎ᠨᠢ ᠪᠠᠰᠠ ᠰᠤᠨᠢᠨ ᠃ ᠲᠠᠪᠢ ᠭᠠᠷᠤᠢ ᠬᠡᠰᠢᠬᠦᠨ᠎ᠲᠠᠢ ᠡᠨᠡᠬᠦ ᠬᠤᠯᠪᠤᠭ᠎ᠠ᠎ᠨᠢ ᠲᠤᠬᠠᠢ᠎ᠶᠢᠨ ᠵᠢᠯ ᠪᠠᠷᠠᠭᠤᠨ ᠦᠵᠦᠮᠦᠴᠢᠨ ᠬᠤᠰᠢᠭᠤᠨ᠎ᠳ᠋ᠤ ᠰᠡᠬᠡᠭᠡᠳᠡᠨ᠎ᠢᠶᠠᠷ ᠪᠠᠭᠤᠵᠤ ᠪᠠᠢᠭᠰᠠᠨ ᠬᠦᠮᠦᠰ᠎ᠢᠶᠠᠷ ᠪᠦᠷᠢᠯᠳᠦᠭᠰᠡᠨ ᠬᠤᠯᠪᠤᠭ᠎ᠠ ᠪᠠᠢᠵᠤ ᠂ ᠬᠡᠨ ᠨᠢᠭᠡᠨ᠎ᠢᠶᠡᠨ ᠦᠬᠡᠢᠯᠡᠨ ᠲᠤᠷᠠᠰᠬᠤ ᠂ ᠬᠠᠭᠤᠴᠢ ᠲᠡᠥᠬᠡ᠎ᠪᠠᠨ ᠲᠡᠯᠬᠡᠬᠦ᠎ᠶᠢᠨ ᠬᠦᠬᠦᠷᠭᠡ ᠬᠤᠯᠪᠤᠭᠠᠰᠦ ᠪᠤᠯᠤᠭᠰᠠᠭᠠᠷ ᠬᠡᠳᠦᠨ ᠤᠨ ᠪᠤᠯᠵᠠᠢ ᠃ ᠲᠡᠷᠡ ᠦᠶᠡᠰ ᠬᠤᠷᠢᠨ ᠨᠠᠰᠤ᠎ᠶᠢ ᠴᠦ ᠠᠷᠠᠢ ᠠᠮᠳᠠᠯᠠᠭ᠎ᠠ ᠦᠬᠡᠢ ᠲᠠᠪᠢ ᠭᠠᠷᠤᠢ ᠬᠡᠥᠬᠡᠳ ᠰᠤᠷᠤᠭᠴᠢᠳ ᠤᠯᠤᠰ ᠤᠷᠤᠨ᠎ᠤ ᠲᠤᠮᠢᠯᠠᠯᠳᠠ ᠵᠢᠭᠠᠪᠤᠷᠢ᠎ᠶᠢᠨ ᠲᠠᠭᠠᠤ ᠪᠠᠷᠠᠭᠤᠨ ᠦᠵᠦᠮᠦᠴᠢᠨ ᠬᠤᠰᠢᠭᠤᠨ᠎ᠤ ᠡᠷᠢᠶᠡᠩᠤᠪᠢ ᠮᠠᠯᠵᠢᠯ᠎ᠤᠨ ᠲᠠᠯᠠᠪᠠᠢ᠎ᠳ᠋ᠤ ᠰᠡᠬᠡᠬᠡᠳᠡᠨ᠎ᠢᠶᠠᠷ ᠪᠠᠭᠤᠵᠤ ᠂ ᠮᠠᠯᠴᠢᠳ᠎ᠲᠠᠢ ᠬᠠᠮᠳᠦ ᠬᠡᠳᠦᠨ ᠵᠢᠯ᠎ᠤᠨ ᠪᠠᠢᠬᠤ᠎ᠳᠠᠭᠠᠨ ᠮᠠᠷᠳᠠᠭᠳᠠᠰᠢ ᠦᠬᠡᠢ ᠦᠨᠡᠳᠦ ᠲᠤᠷᠠᠰᠤᠮᠵᠢ ᠂ ᠬᠦᠨ ᠵᠤᠵᠠᠭᠠᠨ ᠨᠦᠬᠦᠷᠯᠡᠯ ᠂ ᠬᠠᠯᠠᠭᠤᠨ ᠲᠤᠳᠤᠨᠤ ᠬᠠᠢᠷ᠎ᠠ ᠰᠡᠳᠬᠢᠯᠬᠡ᠎ᠶᠢ ᠤᠴᠢᠯᠠᠭᠤᠯᠤᠭᠰᠠᠨ᠎ᠨᠢ ᠲᠡᠭᠡᠷ᠎ᠡ ᠵᠠᠭᠤᠨ᠎ᠤ ᠵᠢᠷᠠ ᠲᠠᠯᠠᠭᠠᠳ ᠤᠨ᠎ᠤ ᠤᠴᠢᠷ ᠪᠠᠢᠭᠰᠠᠨ ᠶᠤᠮ ᠃


1967 ᠤᠨ᠎ᠳ᠋ᠤ ᠦᠪᠦᠷ ᠮᠤᠩᠭᠤᠯ᠎ᠤᠨ ᠪᠠᠭᠰᠢ᠎ᠶᠢᠨ ᠶᠡᠬᠡ ᠰᠤᠷᠭᠠᠭᠤᠯᠢ᠎ᠶᠢᠨ ᠬᠠᠷᠢᠶᠠᠳᠦ ᠲᠤᠮᠳᠠᠳᠦ ᠰᠤᠷᠭᠠᠭᠤᠯᠢ᠎ᠡᠴᠠ ᠦᠨᠳᠦᠷ ᠲᠤᠮᠳᠠᠳᠤ᠎ᠪᠠᠨ ᠲᠡᠬᠦᠰᠬᠡᠵᠤ ᠂ ᠪᠠᠷᠠᠭᠤᠨ ᠦᠵᠦᠮᠦᠴᠢᠨ ᠬᠤᠰᠢᠭᠤᠨ᠎ᠤ ᠡᠷᠢᠶᠡᠩᠤᠪᠢ ᠮᠠᠯᠵᠢᠯ᠎ᠳ᠋ᠤ ᠲᠤᠮᠢᠯᠠᠭᠳᠠᠭᠰᠠᠨ ᠭᠠᠷᠪᠤ᠋ ᠪᠤᠯ ᠲᠡᠳᠡᠭᠡᠷ ᠰᠡᠬᠡᠭᠡᠳᠡᠳ᠎ᠤᠨ ᠨᠢᠭᠡ᠎ᠨᠢ ᠪᠤᠯᠤᠨ᠎ᠠ ᠃ ᠰᠠᠶᠢ ᠦᠨᠳᠦᠷ ᠲᠤᠮᠳᠠᠳᠦ᠎ᠪᠠᠨ ᠲᠡᠬᠦᠰᠭᠡᠵᠤ ᠪᠠᠢᠭᠰᠠᠨ ᠨᠢᠭᠡᠨ ᠬᠤᠳᠠ᠎ᠶᠢᠨ ᠦᠬᠢᠨ᠎ᠳ᠋ᠤ ᠠᠪᠴᠦ ᠬᠡᠯᠡᠪᠡᠯ ᠂ ᠠᠩᠬ᠎ᠠ ᠤᠳᠠᠭ᠎ᠠ ᠬᠡᠷ᠎ᠡᠴᠠ᠎ᠪᠠᠨ ᠬᠤᠯᠠ ᠭᠠᠷᠴᠦ ᠂ ᠬᠦᠳᠡᠬᠡ᠎ᠶᠢᠨ ᠪᠡᠷᠬᠡᠰᠢᠶᠡᠯᠳᠦ ᠤᠷᠴᠢᠨ᠎ᠳ᠋ᠤ ᠬᠡᠳᠦᠨ ᠵᠢᠯ ᠠᠮᠢᠳᠤᠷᠠᠵᠤ ᠰᠤᠷᠤᠯᠴᠠᠨ᠎ᠠ ᠭᠡᠳᠡᠭ ᠦᠨᠡᠭᠡᠷ ᠶᠡᠬᠡ ᠰᠦᠰᠦ ᠵᠤᠷᠢᠭ ᠂ ᠲᠡᠰᠪᠦᠷᠢ ᠲᠡᠪᠴᠢᠶᠡᠷᠢ᠎ᠶᠢ ᠰᠢᠯᠭᠠᠭᠰᠠᠨ ᠬᠠᠳᠠᠭᠤ ᠲᠠᠪᠠᠭ᠎ᠠ ᠪᠠᠢᠯ᠎ᠠ ᠃ ᠮᠠᠯᠴᠢᠳ᠎ᠲᠠᠢ ᠬᠠᠮᠳᠦ ᠬᠤᠨᠤᠨ᠎ᠡ ᠂ ᠮᠠᠯ ᠰᠦᠷᠦᠭ ᠬᠠᠷᠢᠭᠤᠯᠤᠨ᠎ᠠ ᠂ ᠤᠳᠤᠷ ᠶᠠᠪᠤᠨ᠎ᠠ ᠂ ᠲᠠᠭᠠᠤ᠎ᠳ᠋ᠤᠨᠢ ᠨᠤᠮ ᠪᠢᠴᠢᠭ᠎ᠢᠶᠡᠨ ᠰᠤᠷᠤᠯᠴᠠᠵᠤ ᠮᠠᠯᠴᠢᠳ᠎ᠲᠤ ᠲᠦᠷᠦ᠎ᠶᠢᠨ ᠪᠤᠳᠤᠯᠭ᠎ᠠ ᠂ ᠦᠵᠡᠯ ᠰᠠᠨᠠᠭ᠎ᠠ ᠂ ᠮᠡᠳᠡᠯᠭᠡ ᠬᠢᠴᠢᠶᠡᠯ ᠤᠩᠰᠢᠵᠤ ᠤᠯᠠᠮᠵᠢᠯᠠᠨ᠎ᠠ ᠁ ᠭᠠᠷᠪᠤ᠋ ᠬᠠᠷᠢᠨ ᠲᠤᠬᠠᠢ᠎ᠶᠢᠨ ᠵᠢᠯ ᠡᠷᠢᠶᠡᠩᠤᠪᠢ ᠮᠠᠯᠵᠢᠯ᠎ᠤᠨ ᠲᠠᠯᠠᠪᠠᠢ᠎ᠶᠢᠨ ᠡᠷᠢᠶᠡᠨᠨᠠᠭᠤᠷ ᠪᠠᠷᠢᠭᠠᠳᠠ᠎ᠶᠢᠨ ᠰᠢᠨᠡᠭᠡᠨ ᠭᠡᠷᠯᠡᠭᠰᠡᠨ ᠵᠠᠯᠠᠭᠤ ᠬᠤᠤᠰ ᠰᠠᠢᠨᠪᠠᠶᠠᠷ ᠦᠯᠵᠡᠢ ᠬᠤᠶᠠᠷ᠎ᠤᠨ᠎ᠳ᠋ᠤ ᠬᠤᠪᠢᠶᠠᠭᠳᠠᠵᠤ ᠂ ᠬᠡᠳᠦᠨ ᠵᠢᠯ᠎ᠤᠨ ᠲᠤᠷᠰᠢ ᠬᠠᠮᠳᠦ ᠠᠮᠢᠳᠤᠷᠠᠵᠤ ᠰᠤᠷᠤᠯᠴᠠᠨ ᠂ ᠮᠠᠯᠵᠢᠬᠤ ᠠᠮᠢᠳᠤᠷᠠᠯ᠎ᠢ ᠪᠡᠶᠡᠴᠢᠯᠡᠨ ᠤᠢᠯᠠᠭᠠᠭᠰᠠᠨ᠎ᠤ ᠳ᠋ᠦ᠋ᠢᠩ᠎ᠳ᠋ᠤ ᠂ ᠲᠡᠳᠡ ᠬᠤᠶᠠᠷ᠎ᠲᠠᠢ ᠬᠠᠯᠠᠭᠤᠨ ᠲᠤᠳᠤᠨᠤ ᠬᠠᠢᠷ᠎ᠠ ᠰᠡᠳᠬᠢᠯᠬᠡ ᠂ ᠬᠦᠨ ᠵᠤᠵᠠᠭᠠᠨ ᠨᠦᠬᠦᠷᠯᠡᠯ᠎ᠲᠠᠢ ᠪᠤᠯᠵᠤ ᠂ ᠨᠠᠰᠤᠨ ᠲᠤᠷᠰᠢᠳᠠ ᠦᠬᠡᠢᠯᠡᠨ ᠰᠠᠨᠠᠳᠠᠭ ᠲᠤᠳᠤᠨᠤ᠎ᠶᠢᠨ ᠬᠦᠮᠦᠰ ᠪᠤᠯᠤᠭᠰᠠᠨ ᠪᠠᠢᠯ᠎ᠠ ᠃
ᠬᠠᠷᠢᠨ ᠤᠳᠤ ᠰᠠᠢᠨᠪᠠᠶᠠᠷ ᠦᠯᠵᠡᠢ ᠬᠤᠶᠠᠷ ᠨᠠᠰᠤᠳᠠᠨ᠎ᠤ ᠪᠠᠭ᠎ᠠ ᠬᠦᠦ ᠲᠡᠬᠦᠰᠮᠡᠨᠳᠦ᠎ᠨᠢ ᠨᠠᠰᠤ᠎ᠪᠠᠷ᠎ᠢᠶᠡᠨ ᠶᠡᠬᠡ ᠬᠤᠳᠠ᠎ᠶᠢᠨ ᠪᠠᠷ᠎ᠡ ᠬᠠᠷᠠᠭ᠎ᠠ ᠦᠬᠡᠢ ᠂ ᠨᠤᠳᠤᠭ᠎ᠢᠶᠡᠨ ᠬᠤᠳᠤᠢᠳᠠᠯ᠎ᠠ ᠰᠠᠭᠤᠭᠰᠠᠨ ᠠᠪᠤ᠋ ᠡᠵᠢ᠎ᠪᠠᠨ ᠦᠳᠡᠯᠬᠦ᠎ᠶᠢᠨ ᠦᠵᠦᠬᠦᠷ ᠤᠷᠤᠨ᠎ᠤ ᠲᠦᠪ ᠬᠦᠬᠡᠬᠤᠳᠠ ᠂ ᠤᠯᠤᠰ᠎ᠤᠨ ᠨᠡᠢᠰᠯᠡᠯ ᠪᠡᠭᠡᠵᠢᠩ᠎ᠢᠶᠠᠷ ᠴᠦ ᠬᠡᠰᠡᠨ ᠨᠢᠭᠡ ᠲᠤᠭᠤᠷᠢᠭᠤᠯᠤᠶ᠎ᠠ ᠬᠡᠮᠡᠨ ᠢᠷᠡᠵᠤ ᠶᠠᠪᠤᠭ᠎ᠠ ᠴᠢᠮᠡᠭᠡ᠎ᠶᠢ ᠭᠠᠷᠪᠤ᠋ ᠤᠯᠵᠤ ᠰᠤᠨᠤᠰᠤᠭᠠᠳ ᠬᠦᠯ ᠬᠦᠭᠡᠷᠴᠡᠭ ᠪᠤᠯᠵᠤ ᠂ ᠪᠠᠷᠢᠭᠰᠠᠨ ᠲᠠᠯᠪᠢᠭᠰᠠᠨ᠎ᠢᠶᠡᠨ ᠠᠯᠳᠠᠵᠤ ᠪᠠᠢᠭ᠎ᠠ᠎ᠨᠢ ᠡᠨᠡ ᠠᠵᠢ ᠃ ᠬᠦᠬᠡᠬᠤᠳᠠ᠎ᠳ᠋ᠤ ᠢᠷᠡᠬᠦ᠎ᠪᠠᠷ᠎ᠨᠢ ᠲᠤᠬᠠᠢ᠎ᠶᠢᠨ ᠵᠢᠯ ᠬᠠᠮᠳᠦ ᠬᠦᠳᠡᠬᠡ ᠪᠠᠭᠤᠵᠤ ᠪᠠᠢᠭᠰᠠᠨ ᠰᠡᠬᠡᠬᠡᠳᠡᠳ ᠂ ᠨᠠᠢᠵᠠ ᠨᠦᠬᠦᠳ᠎ᠢᠶᠡᠨ ᠴᠤᠭᠯᠠᠭᠤᠯᠵᠤ ᠂ ᠰᠠᠢᠨᠪᠠᠶᠠᠷ ᠦᠯᠵᠡᠢ ᠬᠤᠶᠠᠷ᠎ᠲᠠᠢ᠎ᠪᠠᠨ ᠬᠠᠭᠤᠴᠢ ᠲᠡᠯᠭᠡᠨ ᠂ ᠰᠠᠢᠬᠠᠨ ᠨᠢᠭᠡ ᠨᠠᠷᠬᠢᠶ᠎ᠡ ᠬᠡᠰᠡᠨ ᠨᠠᠰᠤᠳᠠᠢ ᠬᠦᠮᠦᠨ᠎ᠤ ᠴᠠᠭᠠᠪᠤᠷ ᠪᠤᠷᠤᠭᠵᠢᠭᠤᠨ ᠰᠠᠨᠠᠭ᠎ᠠ ᠯᠡ ᠪᠠᠢᠵᠤ ᠲᠠᠭᠠᠷᠠᠨ᠎ᠠ ᠃ ᠵᠠᠷᠢᠮ ᠦᠶ᠎ᠡ᠎ᠳ᠋ᠡᠭᠡᠨ ᠨᠠᠰᠤᠳᠠᠢ ᠬᠦᠮᠦᠨ᠎ᠤ ᠪᠤᠳᠤᠯ ᠰᠠᠨᠠᠭ᠎ᠠ ᠂ ᠬᠡᠥᠬᠡᠳ ᠰᠢᠭ ᠬᠦᠬᠡᠷᠦᠬᠦᠨ ᠪᠠᠢᠳᠠᠭ᠎ᠨᠢ ᠦᠨᠡᠨ ᠃
ᠠᠭᠤᠯᠵᠠᠯᠳᠠ᠎ᠶᠢᠨ ᠪᠠᠶᠠᠷ
︽ ᠰᠠᠢᠨ ᠶᠠᠪᠤᠵᠤ ᠢᠷᠡᠪᠡᠦ ︖ ᠵᠠᠮ᠎ᠳᠠᠭᠠᠨ ᠵᠦᠳᠡᠷᠡᠯ᠎ᠡ ᠪᠢᠵᠡ ︖ ︾ ᠂ ︽ ᠲᠡᠩᠬᠡᠭᠡ ᠭᠠᠢᠭᠤᠢ ᠂ ᠴᠢᠷᠠᠢ ᠵᠢᠰᠦ ᠰᠠᠢᠨ ᠬᠡᠪ᠎ᠢᠶᠠᠷ᠎ᠢᠶᠡᠨ ᠪᠠᠢᠨ᠎ᠠ ᠳ᠋ᠠ ᠲᠠ ᠬᠤᠶᠠᠷ ︾ ᠂ ︽ ᠬᠦᠥᠱᠢ ᠂ ᠭᠠᠷᠪᠤ᠋ ᠮᠢᠨᠢ ᠪᠠᠢᠭᠰᠠᠨ ᠶᠤᠮ ‍ᠤᠤ ︖ ᠠᠭᠤᠯᠵᠠᠭ᠎ᠠ ᠦᠬᠡᠢ ᠶᠡᠬᠡ ᠤᠳᠠᠯ᠎ᠠ ᠰᠢᠦ ᠪᠢᠳᠡ ︾ ᠬᠡᠵᠤ ᠬᠡᠳᠦᠨ ᠨᠠᠰᠤᠳᠠᠳ ᠮᠡᠨᠳᠦ ᠠᠮᠤᠷ᠎ᠢᠶᠡᠨ ᠮᠡᠳᠡᠯᠴᠡᠵᠤ ᠂ ᠦᠨᠤᠰᠴᠦ ᠵᠤᠯᠭᠠᠨ ᠤᠬᠢᠯᠠᠨ ᠬᠠᠢᠯᠠᠨ ᠪᠤᠯᠬᠤ᠎ᠨᠢ ᠬᠤᠯᠠ᠎ᠶᠢᠨ ᠲᠦᠷᠦᠯ᠎ᠢᠶᠡᠨ ᠤᠭᠳᠤᠬᠰᠠᠨ ᠠᠭᠤᠯᠵᠠᠯᠳᠠ ᠮᠡᠳᠦ ᠪᠤᠯᠤᠯ᠎ᠠ ᠃ ᠨᠠᠷᠠ ᠰᠠᠯᠬᠢᠨ᠎ᠳ᠋ᠤ ᠴᠢᠷᠠᠢ ᠨᠢᠭᠤᠷ ᠬᠦᠷᠡᠩᠰᠢᠵᠤ ᠪᠤᠷᠤᠯᠠᠨ ᠂ ᠦᠷᠴᠢᠯᠡᠬᠡᠰᠦ ᠪᠦᠬᠦᠨ᠎ᠳ᠋ᠤᠨᠢ ᠤᠨ ᠵᠢᠯ᠎ᠤᠨ ᠮᠦᠷ ᠬᠦᠨ᠎ᠡ ᠲᠤᠷᠠᠢᠬᠰᠠᠨ ᠬᠤᠶᠠᠷ ᠨᠠᠰᠤᠳᠠᠨ ᠦᠵᠦᠮᠦᠴᠢᠨ ᠲᠡᠷᠯᠢᠭ᠎ᠢᠶᠠᠷ᠎ᠢᠶᠡᠨ ᠤᠷᠤᠨ᠎ᠤ ᠲᠦᠪ ᠬᠦᠬᠡᠬᠤᠳᠠᠨ᠎ᠠ ᠠᠢᠯᠴᠢᠯᠠᠨ ᠪᠠᠭᠤᠬᠤ᠎ᠨᠢ ᠤᠨᠴᠠ᠎ᠶᠢᠨ ᠴᠢᠮᠡᠭ ᠦᠵᠡᠰᠬᠦᠯᠡᠡᠭᠳᠡᠢ ᠂ ᠬᠠᠯᠠᠭᠤᠨ ᠲᠤᠳᠤᠨᠤ ᠰᠠᠨᠠᠭᠳᠠᠨ᠎ᠠ ᠃
ᠲᠡᠳᠡ ᠬᠤᠶᠠᠷ᠎ᠢ ᠬᠦᠷᠴᠦ ᠢᠷᠡᠬᠦ᠎ᠡᠴᠠ ᠡᠮᠦᠨ᠎ᠡ ᠭᠠᠷᠪᠤ᠋ ᠠᠯᠢ ᠬᠡᠳᠦᠢᠢᠨᠠᠢ ᠬᠤᠨᠤᠭ ᠪᠠᠭᠤᠳᠠᠯ ᠂ ᠬᠤᠭᠤᠯᠠ ᠤᠮᠳᠠ᠎ᠶᠢ ᠪᠡᠯᠡᠨ ᠪᠤᠯᠭᠠᠭᠠᠳ ᠬᠦᠯᠢᠶᠡᠵᠤ ᠪᠠᠢᠵᠠᠢ ᠃ ᠲᠠᠪᠢᠨ ᠬᠡᠳᠦᠨ ᠵᠢᠯ᠎ᠤᠨ ᠬᠠᠭᠤᠴᠢᠨ ᠲᠠᠨᠢᠯ ᠂ ᠲᠡᠷᠡ ᠮᠦᠷᠳᠡᠭᠡᠨ ᠠᠮᠢ ᠵᠠᠶᠠᠭ᠎ᠠ᠎ᠪᠠᠨ ᠨᠢᠭᠡᠳᠬᠡᠭᠰᠡᠨ ᠬᠦᠨ ᠨᠦᠬᠦᠷᠯᠡᠯ᠎ᠢ ᠪᠠᠢᠭᠤᠯᠤᠭᠰᠠᠨ ᠰᠠᠢᠨ ᠠᠨᠳᠠ ᠨᠠᠢᠵᠠ ᠨᠠᠷ ᠦᠨᠦᠳᠦᠷ ᠪᠤᠯᠬᠤ᠎ᠳ᠋ᠤ ᠪᠦᠬᠦᠳᠡᠭᠡᠷ ᠡᠪᠦᠬᠡᠨ ᠪᠤᠭᠤᠷᠤᠯ ᠪᠤᠯᠵᠤ ᠂ ᠤᠷᠢᠳᠦ᠎ᠶᠢᠨ ᠶᠠᠷᠢᠶ᠎ᠠ ᠭᠡᠵᠤ ᠤᠷᠤᠰᠤᠭᠠᠳ ᠪᠠᠷᠠᠬᠤ ᠦᠬᠡᠢ ᠂ ᠬᠠᠭᠤᠴᠢ ᠬᠦᠬᠡᠷᠦᠭᠡ ᠭᠡᠵᠤ ᠬᠡᠯᠡᠬᠡᠳ ᠲᠠᠭᠤᠰᠤᠰᠢ ᠦᠬᠡᠢ ᠠᠯᠳᠠᠨ ᠬᠤᠷᠤᠮ᠎ᠳ᠋ᠤ ᠠᠭᠤᠰᠤᠨ᠎ᠠ ᠃
 ᠭᠠᠷᠪᠤ᠋ ᠮᠦᠨᠴᠦ ᠤᠷᠢᠳᠦ᠎ᠶᠢᠨ ᠰᠢᠬ ᠰᠠᠢᠬᠠᠨ ᠰᠡᠳᠬᠢᠯ᠎ᠲᠠᠢ ᠂ ᠴᠠᠭᠠᠪᠤᠷ ᠵᠠᠩ᠎ᠲᠠᠢ ᠬᠡᠪ᠎ᠢᠶᠠᠷ᠎ᠢᠶᠡᠨ ᠪᠠᠢᠨ᠎ᠠ ᠂ ᠲᠤᠬᠠᠢ᠎ᠶᠢᠨ ᠵᠢᠯ ᠬᠦᠬᠡᠬᠤᠳᠠ᠎ᠡᠴᠠ ᠠᠷᠪᠡᠨ ᠬᠡᠳᠦᠳᠡᠢ ᠬᠡᠥᠬᠡᠳ ᠮᠠᠨ᠎ᠤ ᠭᠡᠷ᠎ᠲᠤ ᠬᠦᠷᠦᠬᠡᠳ ᠤᠴᠢᠬᠤ᠎ᠳ᠋ᠤ ᠪᠢᠳᠡ ᠴᠦ ᠪᠠᠯᠠᠭ ᠠᠯᠳᠠᠨ ᠂ ᠤᠯᠤᠰ᠎ᠤᠨ ᠰᠡᠬᠡᠬᠡᠳᠡᠳ᠎ᠢ ᠲᠠᠭᠠᠷᠠᠭᠤᠯᠵᠤ ᠦᠯᠦᠰᠦᠬᠦᠯᠳᠡᠭ ᠴᠦ ᠪᠤᠯ ‍ᠤᠤ ᠶᠠᠭᠠᠬᠢᠳᠠᠭ ᠪᠤᠯ ᠭᠡᠵᠤ ᠰᠠᠨᠳᠤᠷᠴᠦ ᠪᠠᠢᠭᠰᠠᠨ ᠂ ᠬᠠᠷᠢᠨ ᠲᠠᠨᠠᠷ ᠴᠢᠨᠢ ᠬᠤᠳᠠ᠎ᠶᠢᠨ ᠬᠡᠥᠬᠡᠳ᠎ᠤᠳ ᠪᠤᠯᠤᠭᠰᠠᠨ ᠴᠦ ᠬᠦᠢᠳᠡᠨ ᠨᠤᠢᠳᠠᠨ᠎ᠢ ᠬᠠᠢᠬᠤᠷᠬᠤ ᠦᠬᠡᠢ ᠂ ᠪᠢᠳᠡᠨ᠎ᠲᠠᠢ ᠬᠠᠮᠳᠦ ᠤᠳᠤᠷ᠎ᠢᠶᠠᠷ ᠶᠠᠪᠤᠵᠤ ᠂ ᠮᠠᠯ ᠰᠦᠷᠦᠭ ᠲᠠᠭᠤᠨ ᠂ ᠡᠪᠤᠯ᠎ᠤᠨ ᠰᠢᠭᠤᠷᠭ᠎ᠠ᠎ᠳ᠋ᠤ ᠮᠤᠩᠭᠤᠯ ᠭᠡᠷ᠎ᠲᠤ ᠴᠢᠬᠢᠯᠳᠤᠨ ᠂ ᠴᠢᠨ᠋ᠸ᠎ᠠ᠎ᠶᠢᠨ ᠤᠯᠢᠯᠳᠠ᠎ᠶᠢ ᠰᠤᠨᠤᠰᠤᠨ ᠲᠠᠭᠵᠢᠨ ᠬᠡᠪᠳᠡᠵᠤ ᠪᠠᠢᠭᠰᠠᠨ᠎ᠢᠶᠡᠨ ᠦᠨᠦᠳᠦᠷ ᠡᠷᠬᠢᠬᠦᠯᠵᠤ ᠪᠤᠳᠤᠬᠤ᠎ᠳ᠋ᠤ ᠦᠴᠦᠬᠡᠳᠦᠷ᠎ᠤᠨ ᠮᠡᠳᠦ ᠤᠢᠷᠠᠬᠠᠨ ᠪᠦᠬᠡᠳ ᠬᠠᠯᠠᠭᠤᠬᠠᠨ ᠰᠡᠳᠬᠢᠯ᠎ᠳ᠋ᠤ ᠪᠠᠭᠤᠬᠤ ᠶᠤᠮ ᠳ᠋ᠠ ᠂ ᠴᠠᠭ ᠬᠤᠭᠤᠴᠠᠭ᠎ᠠ ᠲᠠᠩᠴᠢ ᠲᠦᠷᠭᠡᠨ ᠭᠡᠵᠤ ᠰᠠᠢᠨᠪᠠᠶᠠᠷ ᠭᠤᠸᠠᠢ ᠬᠠᠯᠠᠭᠤᠨ ᠴᠠᠢ ᠤᠭᠤᠴᠢᠬᠤ ᠵᠠᠭᠤᠷ᠎ᠠ ᠤᠷᠢᠳᠦ᠎ᠶᠢᠨ ᠶᠠᠪᠤᠳᠠᠯ᠎ᠢ ᠦᠵᠦᠬᠦᠷ ᠰᠡᠵᠢᠬᠦᠷ᠎ᠡᠴᠠ᠎ᠨᠢ ᠲᠡᠯᠭᠡᠵᠤ ᠡᠬᠢᠯᠡᠨ᠎ᠡ ᠃
 ᠰᠠᠢᠨᠪᠠᠶᠠᠷ ᠨᠦᠬᠦᠭᠡ ᠤᠳᠠᠰᠤᠨ ᠦᠮᠦᠳᠦᠨ᠎ᠤ᠎ᠪᠠᠨ ᠦᠯᠢᠭᠡᠷ᠎ᠢ ᠴᠡᠭᠡᠵᠢᠯᠡᠵᠤ ᠪᠠᠢᠨ᠎ᠠ ‍ᠤᠤ ᠭᠡᠵᠤ ᠰᠡᠬᠡᠬᠡᠳᠡᠳ᠎ᠤᠨ ᠨᠢᠭᠡ ᠪᠤᠯᠬᠤ ᠼᠦᠢ ᠭᠦᠸᠸ ᠴᠢᠩ ᠢᠨᠢᠶᠡᠵᠤ ᠬᠡᠯᠡᠬᠦ᠎ᠳ᠋ᠤ ᠄ ︽ ᠬᠠᠢ ᠂ ᠴᠡᠬᠡᠵᠢᠯᠡᠯ ᠦᠬᠡᠢ ᠶᠠᠭᠠᠬᠢᠬᠤᠪ ᠂ ᠨᠠᠰᠤᠨ᠎ᠳᠠᠭᠠᠨ ᠮᠠᠷᠳᠠᠬᠤ ᠦᠬᠡᠢ ᠰᠢᠦ ︕ ︾ ᠭᠡᠵᠤ ᠰᠠᠢᠨᠪᠠᠶᠠᠷ ᠬᠦᠬᠡᠷᠡᠬᠦ᠎ᠳ᠋ᠤ ᠪᠦᠬᠦᠳᠡᠭᠡᠷ ᠲᠠᠭᠠᠭᠠᠳ ᠢᠨᠢᠶᠡᠯᠳᠤᠯ᠎ᠠ ᠃
ᠲᠡᠷᠡ᠎ᠨᠢ ᠰᠡᠬᠡᠭᠡᠳᠡᠳ ᠰᠠᠢᠨᠪᠠᠶᠠᠷ᠎ᠤᠨ᠎ᠳ᠋ᠤ ᠠᠩᠬ᠎ᠠ ᠬᠦᠷᠦᠭᠰᠡᠨ ᠦᠶ᠎ᠡ᠎ᠶᠢᠨ ᠦᠯᠢᠬᠡᠷ ᠪᠠᠢᠯ᠎ᠠ ᠃ ᠭᠠᠷᠪᠤ᠋᠎ᠲᠠᠢ ᠬᠠᠮᠳᠦ ᠰᠠᠢᠨᠪᠠᠶᠠᠷ᠎ᠤᠨ᠎ᠳ᠋ᠤ ᠬᠤᠪᠢᠶᠠᠭᠳᠠᠭᠰᠠᠨ ᠰᠡᠬᠡᠬᠡᠳᠡᠨ᠎ᠤ ᠨᠢᠭᠡ᠎ᠨᠢ ᠬᠢᠳᠠᠳ ᠰᠡᠬᠡᠬᠡᠳᠡᠨ ᠼᠦᠢ ᠭᠦᠸᠸ ᠴᠢᠩ ᠪᠠᠢᠭᠰᠠᠨ ᠶᠤᠮ ᠃ ᠲᠡᠷᠡ ᠦᠶᠡᠰ ᠮᠠᠯᠴᠢᠳ ᠤᠳᠠᠰᠤᠨ ᠦᠮᠦᠳᠦ ᠡᠮᠦᠰᠬᠦ᠎ᠶᠢ ᠪᠠᠢᠳᠤᠭᠠᠢ ᠦᠵᠡᠵᠤ ᠴᠦ ᠪᠠᠢᠭᠰᠠᠨ ᠦᠬᠡᠢ ᠂ ᠡᠪᠦᠯ᠎ᠤᠨ ᠴᠠᠭ ᠰᠢᠭᠤᠳ ᠯᠡ ᠠᠷᠠᠰᠤᠨ ᠦᠮᠦᠳᠦ᠎ᠪᠠᠨ ᠡᠮᠦᠰᠦᠭᠡᠳ ᠶᠠᠪᠤᠳᠠᠭ ᠪᠠᠢᠪᠠ ᠃ ᠡᠨᠡ ᠪᠠᠢᠳᠠᠯ᠎ᠢ ᠦᠵᠡᠭᠰᠡᠨ ᠼᠦᠢ ᠭᠦᠸᠸ ᠴᠢᠩ ᠬᠦᠬᠡᠬᠤᠳᠠ᠎ᠳ᠋ᠤ ᠢᠷᠡᠬᠦ᠎ᠳ᠋ᠡᠭᠡᠨ ᠬᠤᠶᠠᠷ ᠤᠳᠠᠰᠤᠨ ᠦᠮᠦᠳᠦ ᠬᠤᠳᠠᠯᠳᠤᠵᠤ ᠠᠪᠤᠭᠠᠳ ᠰᠠᠢᠨᠪᠠᠶᠠᠷ᠎ᠲᠤ ᠠᠪᠠᠴᠢᠨ ᠦᠭᠴᠦ ᠡᠮᠦᠰᠦᠬᠦᠯᠬᠦ ᠭᠡᠵᠡᠢ ᠃ ᠲᠡᠭᠡᠭᠡᠳ ᠤᠷᠤᠨ ᠭᠠᠷᠤᠨ ᠰᠠᠢᠨᠪᠠᠶᠠᠷ᠎ᠢ ᠠᠵᠢᠵᠤ ᠰᠢᠨᠵᠢᠨ ᠂ ᠬᠠᠵᠠᠭᠤ᠎ᠪᠠᠷ᠎ᠨᠢ ᠪᠠᠰᠠ ︽ ᠡᠮᠦᠰᠪᠡ ‍ᠤᠤ ᠴᠢ ︖ ︾ ᠭᠡᠵᠤ ᠱᠠᠯᠠᠨ᠎ᠠ ᠃ ᠬᠡᠪᠡᠴᠦ ᠡᠨᠡ ᠰᠠᠢᠬᠠᠨ ᠨᠠᠷᠢᠯᠢᠭ ᠬᠢᠴᠡ᠎ᠲᠠᠢ ᠦᠮᠦᠳᠦ᠎ᠶᠢ ᠠᠩᠬ᠎ᠠ ᠤᠳᠠᠭ᠎ᠠ ᠦᠵᠡᠭᠰᠡᠨ ᠰᠠᠢᠨᠪᠠᠶᠠᠷ ᠡᠮᠦᠰᠬᠦ᠎ᠪᠠᠨ ᠬᠠᠢᠷᠠᠯᠠᠭᠠᠳ ᠠᠪᠳᠠᠷ᠎ᠠ ᠲᠤᠳᠤᠷ᠎ᠡ᠎ᠪᠠᠨ ᠲᠠᠷᠤᠵᠤ ᠲᠠᠯᠪᠢᠵᠠᠢ ᠃ ᠼᠦᠢ ᠭᠦᠸᠸ ᠴᠢᠩ ᠴᠦ ᠬᠡᠰᠡᠭ ᠬᠤᠭᠤᠴᠠᠭ᠎ᠠ ᠡᠮᠦᠰᠦᠬᠦᠯᠬᠦ ᠭᠡᠵᠤ ᠠᠷᠭᠠᠯᠠᠭᠰᠠᠨ ᠪᠤᠯᠪᠠᠴᠦ ᠲᠡᠢᠯᠦᠭᠰᠡᠨ ᠦᠬᠡᠢ ᠬᠤᠵᠢᠮ᠎ᠨᠢ ᠮᠠᠷᠳᠠᠵᠤ ᠤᠷᠬᠢᠵᠠᠢ ᠃ ᠲᠡᠭᠡᠳᠡᠯ᠎ᠡ ᠰᠢᠨ᠎ᠡ ᠵᠢᠯ ᠢᠷᠡᠵᠤ ᠂ ᠴᠠᠭᠠᠨ ᠰᠠᠷ᠎ᠠ ᠪᠤᠯᠬᠤ᠎ᠳ᠋ᠤ ᠰᠡᠬᠡᠭᠡᠳᠡᠳ ᠪᠦᠬᠦᠳᠡᠭᠡᠷ᠎ᠢᠶᠡᠨ ᠰᠠᠢᠨᠪᠠᠶᠠᠷ᠎ᠤᠨ᠎ᠳ᠋ᠤ ᠬᠦᠷᠴᠦ ᠤᠴᠢᠭᠠᠳ ᠶᠤᠰᠤᠳᠠᠢ ᠦᠵᠡᠭᠡᠳᠦᠢ᠎ᠪᠠᠨ ᠦᠵᠡᠵᠤ ᠂ ᠡᠯᠢᠭᠡ᠎ᠪᠠᠨ ᠬᠦᠰᠢᠳᠡᠯ᠎ᠡ ᠢᠨᠢᠶᠡᠯᠳᠦᠵᠡᠢ ᠃ ᠶᠠᠭᠠᠬᠢᠭᠰᠠᠨ ᠭᠡᠵᠤ ᠰᠠᠨᠠᠨ᠎ᠠ ︖ ᠰᠠᠢᠨᠪᠠᠶᠠᠷ ᠭᠤᠸᠠᠢ ᠵᠢᠯ ᠴᠠᠭᠠᠨ ᠰᠠᠷ᠎ᠠ ᠪᠤᠯᠬᠤ᠎ᠪᠠᠷ ᠨᠦᠬᠦᠬᠡᠬᠢ ᠬᠠᠢᠷᠠᠯᠠᠵᠤ ᠪᠠᠢᠭᠰᠠᠨ ᠤᠳᠠᠰᠤᠨ ᠦᠮᠦᠳᠦ᠎ᠪᠠᠨ ᠭᠠᠷᠭᠠᠭᠠᠳ ᠠᠷᠠᠰᠤᠨ ᠦᠮᠦᠳᠦᠨ᠎ᠤ᠎ᠪᠠᠨ ᠭᠠᠳᠠᠭᠤᠷ᠎ᠨᠢ ᠤᠭᠯᠠᠭᠠᠳ ᠶᠠᠪᠤᠵᠤ ᠪᠠᠢᠭᠰᠠᠨ ᠶᠤᠮ ᠪᠠᠢᠵᠠᠢ ᠃
ᠰᠠᠯᠤᠯᠳᠠ᠎ᠶᠢᠨ ᠭᠤᠨᠢᠭ
ᠲᠤᠭᠤᠷᠢᠭ ᠰᠢᠷᠡᠭᠡ ᠲᠦᠭᠦᠷᠡᠩ ᠰᠠᠭᠤᠯᠴᠠᠭᠰᠠᠨ ᠨᠠᠰᠤᠳᠠᠳ ᠦᠯᠢᠬᠡᠷ ᠲᠡᠥᠭᠡ᠎ᠪᠠᠨ ᠬᠠᠭᠤᠴᠢᠯᠠᠭᠠᠳ ᠪᠠᠷᠠᠬᠤ ᠦᠬᠡᠢ ᠃ ᠬᠤᠷᠸ᠎ᠠ᠎ᠶᠢᠨ ᠲᠡᠥᠬᠡ ᠬᠡᠵᠤ ᠦᠨᠡᠨᠳᠡᠬᠡᠨ ᠬᠦᠮᠦᠨ ᠨᠢᠭᠡᠪᠦᠷᠢ᠎ᠶᠢᠨ ᠲᠡᠥᠬᠡ᠎ᠶᠢᠨ ᠬᠡᠯᠬᠢᠶ᠎ᠡ ᠮᠦᠨ ᠃ ᠲᠡᠳᠡᠨᠤᠰ᠎ᠤᠨ ᠲᠡᠥᠬᠡ ᠪᠢᠳᠡᠨ᠎ᠤ ᠦᠶ᠎ᠡ᠎ᠶᠢᠨ ᠲᠡᠥᠬᠡ᠎ᠲᠠᠢ ᠡᠷᠡᠰ ᠤᠨᠳᠤᠤ ᠪᠠᠢᠵᠤ ᠂ ᠲᠡᠳᠡᠨᠤᠰ᠎ᠤᠨ ᠨᠦᠬᠦᠷᠯᠡᠯ ᠪᠢᠳᠡᠨ᠎ᠤ ᠦᠶ᠎ᠡ᠎ᠶᠢᠨ ᠨᠦᠬᠦᠷᠯᠡᠯ᠎ᠡᠴᠠ ᠨᠠᠩ ᠴᠡᠪᠡᠷ ᠠᠷᠢᠭᠤᠨ ᠂ ᠭᠦᠨ ᠵᠤᠵᠠᠭᠠᠨ ᠨᠦᠬᠦᠷᠯᠡᠯ ᠪᠤᠯᠬᠤ ᠶᠤᠮ ᠃ ᠨᠠᠰᠤᠳᠠᠳ᠎ᠤᠨ ᠵᠤᠭᠤᠭ᠎ᠤᠨ ᠤᠭᠤᠰᠤᠷ ᠠᠯᠳᠠᠷᠠᠵᠤ ᠂ ᠤᠯᠠᠨ ᠵᠦᠢᠯ᠎ᠢ ᠶᠠᠷᠢᠬᠤ᠎ᠶᠢ ᠬᠦᠰᠡᠪᠡᠴᠦ ᠂ ᠬᠤᠯᠠ᠎ᠡᠴᠠ ᠢᠷᠡᠭᠰᠡᠨ ᠬᠤᠶᠠᠷ᠎ᠤᠨ ᠮᠠᠷᠭᠠᠰᠢ᠎ᠶᠢᠨ ᠠᠶᠠᠯᠠᠯ᠎ᠢ᠎ᠨᠢ ᠪᠤᠳᠤᠭᠠᠳ ᠡᠷᠳᠡᠭᠡᠨ ᠠᠮᠠᠷᠠᠭᠠᠵᠤ ᠂ ᠬᠤᠷᠠᠭᠰᠠᠨ ᠪᠦᠬᠦᠳᠡ ᠪᠤᠴᠠᠭᠰᠠᠨ ᠶᠤᠮ ᠃ ᠮᠠᠷᠭᠠᠰᠢ᠎ᠡᠴᠠ᠎ᠨᠢ ᠲᠡᠬᠦᠰᠮᠡᠨᠳᠦ ᠠᠪᠤ᠋ ᠡᠵᠢ᠎ᠪᠠᠨ ᠲᠠᠭᠠᠭᠤᠯᠤᠭᠠᠳ ᠪᠡᠭᠡᠵᠢᠩ᠎ᠢᠶᠠᠷ ᠠᠶᠠᠯᠠᠵᠤ ᠬᠦᠷᠴᠡᠢ ᠃ ᠦᠵᠦᠮᠦᠴᠢᠨ ᠲᠡᠷᠯᠢᠭ᠎ᠢᠶᠡᠨ ᠡᠮᠦᠰᠦᠭᠰᠡᠨ ᠬᠤᠶᠠᠷ ᠨᠠᠰᠤᠳᠠᠨ ᠲᠢᠶᠠᠨ ᠠᠨ ᠮᠸᠨ ᠲᠠᠯᠠᠪᠠᠢ᠎ᠳ᠋ᠤ ᠬᠦᠷᠦᠭᠡᠳ ᠤᠴᠢᠬᠤ᠎ᠳ᠋ᠤ ᠦᠪᠡᠷ᠎ᠤᠨ ᠡᠷᠭᠡ ᠦᠬᠡᠢ ᠳᠤᠭᠳᠤᠯᠵᠦ ᠪᠠᠢᠯ᠎ᠠ ᠃
ᠲᠠᠪᠤᠨ ᠡᠳᠦᠷ᠎ᠤᠨ ᠤᠬᠤᠷᠬᠠᠨ ᠪᠤᠯᠪᠠᠴᠦ ᠲᠤᠷᠠᠳᠬᠠᠯ᠎ᠲᠠᠢ ᠠᠶᠠᠯᠠᠯ ᠨᠢᠭᠡ ᠮᠡᠳᠡᠬᠦ᠎ᠳ᠋ᠤ ᠲᠠᠭᠤᠰᠴᠦ ᠰᠠᠢᠨᠪᠠᠶᠠᠷ ᠦᠯᠵᠡᠢ ᠬᠤᠶᠠᠷ ᠪᠠᠷᠠᠭᠤᠨ ᠦᠵᠦᠮᠦᠴᠢᠨ᠎ᠳ᠋ᠡᠭᠡᠨ ᠬᠠᠷᠢᠪᠠ ᠃ ᠬᠠᠷᠢᠬᠤ᠎ᠳᠠᠭᠠᠨ ᠭᠠᠷᠪᠤ᠋᠎ᠪᠠᠷ ᠲᠥ᠋ᠯᠦᠬᠡᠯᠡᠬᠦᠯᠦᠭᠰᠡᠨ ᠰᠡᠬᠡᠭᠡᠳᠡᠳ᠎ᠢᠶᠡᠨ ᠦᠨᠦ ᠵᠤᠨ᠎ᠢᠶᠠᠷ ᠭᠡᠷ᠎ᠲᠤᠨᠢ ᠠᠢᠯᠴᠢᠯᠠᠵᠤ ᠬᠦᠷᠬᠦ ᠤᠷᠢᠯᠭ᠎ᠠ ᠲᠠᠯᠪᠢᠭᠠᠳ ᠶᠠᠪᠤᠵᠠᠢ ᠃
ᠲᠦᠰᠦᠪᠯᠡᠭᠴᠢ ᠄ ᠤᠶᠤᠨᠪᠠᠳᠦ ᠵ᠊ • ᠬᠠᠰᠪᠠᠭᠠᠳᠤᠷ
ᠨᠠᠢᠷᠠᠭᠤᠯᠤᠬᠴᠢ ᠄ ᠦᠨᠡᠨᠵᠢᠷᠭᠠᠯ
ᠦᠢᠯᠡᠳᠦᠭᠴᠢ ᠄ ᠰᠥ ᠴᠢᠡᠭ ᠬᠤ
ᠬᠢᠨᠠᠬᠴᠢ ᠄ ᠤᠶᠤᠨᠪᠠᠳᠦ ᠵ᠊ • ᠬᠠᠰᠪᠠᠭᠠᠳᠤᠷ

  • ᠨᠠᠢᠷᠠᠭᠤᠯᠤᠭ᠍ᠴᠢ᠄

  • ᠨᠡᠪᠲᠡᠷᠡᠭᠦᠯᠦᠭᠴᠢ᠄

  • ᠮᠡᠷᠭᠡᠵᠢᠯ᠄

ᠨᠠᠢᠷᠠᠭᠤᠯᠤᠭ᠍ᠴᠢ᠄

ᠣᠷᠴᠢᠭᠤᠯᠤᠭ᠍ᠴᠢ᠄

ᠢᠷᠡᠯᠲᠡ᠄
兼容浏览器的HTML页面