ᠲᠡᠷᠢᠭᠦᠨ ᠨᠢᠭᠤᠷ>ᠣᠳᠤ ᠲᠠᠢ ᠪᠣᠯᠵᠣᠭ᠎ᠠ

2026-05-25 11:13:20

ᠵᠣᠬᠢᠶᠠᠭ᠍ᠴᠢ᠄ ᠣᠩᠱᠢᠭ᠍ᠰᠠᠨ ᠣᠳᠠᠭ᠎ᠠ᠄

ᠳᠠᠯᠠᠨ ᠪᠡᠷᠬᠡᠲᠦ

·ᠪ·ᠥᠷᠭᠡᠨᠳᠠᠯᠠᠢ

ᠲᠡᠮᠡᠭᠡᠨ᠎ᠦ ᠪᠦᠬᠦ ᠰᠢᠭ ᠢᠵᠢᠯᠢᠬᠡᠨ ᠱᠣᠪᠣᠭᠤᠷ ᠮᠠᠩᠬ᠎ᠠ᠎ᠶᠢ ᠰᠦᠯᠵᠢᠭᠰᠡᠨ ᠨᠠᠷᠢᠬᠠᠨ ᠴᠠᠭᠠᠨ ᠴᠤᠪᠤᠭ᠎ᠠ᠎ᠪᠠᠷ ᠬᠡᠳᠦᠨ ᠵᠢᠯ ᠥᠭᠡᠳᠡ ᠤᠷᠤᠭᠤ᠎ᠪᠠᠨ ᠳᠠᠪᠬᠢᠯ᠎ᠠ᠃ ᠳᠠᠯᠠᠨ ᠪᠡᠷᠬᠡᠲᠦ ᠭᠡᠵᠦ ᠳᠤᠮᠤᠭᠯᠢᠭ ᠰᠠᠢᠬᠠᠨ ᠨᠤᠲᠤᠭ᠂ ᠤᠳᠤ᠎ᠡᠴᠡ ᠵᠠᠭᠤᠭᠠᠳ ᠵᠢᠯ᠎ᠤᠨ ᠡᠮᠦᠨ᠎ᠡ ᠪᠢᠲᠡᠭᠦᠦ ᠪᠤᠷᠭᠠᠰᠤᠨ᠎ᠳᠦ ᠬᠤᠴᠢᠭᠳᠠᠭᠰᠠᠨ ᠮᠠᠩᠬᠠᠨ ᠬᠥᠨᠳᠡᠢ᠎ᠳᠡᠬᠢ ᠲᠤᠩᠭᠠᠯᠠᠭ ᠪᠦᠷᠢᠳᠦᠨ᠎ᠳᠤ ᠨᠢ ᠬᠦᠷᠴᠦ ᠦᠵᠡᠭᠰᠡᠨ ᠪᠤᠭᠤᠷᠤᠯ ᠬᠡᠳᠦᠬᠡᠨ ᠪᠠᠢᠯ᠎ᠠ ᠭᠡᠯᠴᠡᠳᠡᠭ᠃ ᠶᠠᠭᠤ ᠬᠡᠪᠡᠯ ᠲᠡᠷᠡ ᠪᠦᠷᠢᠳᠦᠨ᠎ᠳᠦ ᠳᠠᠯᠠᠨ ᠲᠠᠬᠢᠭᠤ ᠨᠠᠶᠠᠨ ᠨᠤᠭᠤᠯᠤᠭ᠎ᠠ᠎ᠶᠢ ᠰᠦᠯᠵᠢᠮᠡᠨᠵᠢᠨ ᠰᠠᠶᠢ ᠬᠦᠷᠳᠡᠭ ᠪᠣᠯᠬᠣᠷ ᠳᠠᠯᠠ ᠨᠠᠶᠠ᠎ᠶᠢ ᠪᠦᠦ ᠬᠡᠯᠡ᠂ ᠬᠣᠶᠠᠷ ᠭᠤᠷᠪᠠᠬᠠᠨ ᠮᠠᠩᠬ᠎ᠠ ᠰᠦᠯᠵᠢᠪᠡᠯ ᠲᠣᠯᠣᠭᠠᠢ ᠡᠷᠭᠢᠨ ᠲᠥᠭᠡᠷᠢᠴᠢᠬᠡᠳᠡᠭ ᠠᠵᠢ᠃ ᠲᠡᠭᠡᠬᠦᠯᠡᠷ ᠬᠢᠷᠢ ᠪᠠᠷᠤᠭ᠎ᠤᠨ ᠡᠷ᠎ᠡ ᠵᠢᠷᠦᠬᠡᠯᠡᠨ ᠲᠡᠢᠰᠢ᠎ᠪᠡᠨ ᠵᠦᠭᠯᠡᠳᠡᠭ ᠦᠭᠡᠢ ᠭᠡᠨ᠎ᠡ᠃ ᠬᠠᠷ᠎ᠠ ᠲᠡᠷᠢᠭᠦᠲᠡᠨ᠎ᠦ ᠬᠠᠢᠷ᠎ᠠ ᠭᠠᠮ ᠦᠭᠡᠢ ᠡᠪᠳᠡᠯᠡᠭᠡ᠎ᠳᠦ ᠳᠠᠯᠠᠨ ᠪᠡᠷᠬᠡᠲᠦ᠎ᠶᠢᠨ ᠪᠠᠯᠠᠷ ᠲᠦᠩ ᠥᠮᠥ ᠬᠤᠰᠤᠭᠳᠠᠭᠰᠠᠨ ᠭᠠᠰᠢᠭᠤᠨ ᠲᠡᠦᠬᠡ᠎ᠲᠠᠢ ᠴᠦ᠍ ᠠᠭᠤᠳᠠᠮᠬᠠᠨ ᠬᠥᠨᠳᠡᠢ᠎ᠳᠦ ᠨᠢ ᠮᠡᠯᠮᠡᠯᠵᠡᠭᠰᠡᠨ ᠲᠤᠩᠭᠠᠯᠠᠭ ᠪᠦᠷᠢᠳᠦᠨ᠎ᠡ ᠣᠴᠢᠬᠤ ᠭᠡᠰᠡᠨ ᠬᠡᠨ ᠨᠢᠭᠡᠨ᠎ᠢ ᠴᠦ᠍ ᠶᠠᠭ ᠦᠭᠡᠢ ᠲᠥᠭᠡᠷᠢᠭᠦᠯᠵᠦ ᠣᠷᠬᠢᠳᠠᠭ ᠨᠢᠭᠤᠴᠠ ᠨᠢ ᠣᠨᠢᠰᠤᠭ᠎ᠠ ᠬᠡᠪ᠎ᠢᠶᠡᠷ᠎ᠢᠶᠡᠨ ᠦᠯᠡᠳᠡᠵᠡᠢ᠃


640 (1).png


ᠡᠪᠦᠯ᠎ᠦᠨ ᠵᠤᠳ᠎ᠢ ᠠᠷᠠᠢᠬᠠᠨ ᠲᠤᠭᠤᠯᠳᠠᠯ᠎ᠠ ᠬᠠᠪᠤᠷ᠎ᠤᠨ ᠬᠠᠰᠢᠶᠠᠯᠠᠬᠤ ᠨᠢ ᠪᠣᠯᠴᠢᠬᠠᠨ᠎ᠠ᠃ ᠣᠯᠠᠨ ᠬᠣᠨᠣᠭ ᠪᠢᠰᠢᠯᠭᠠᠭᠰᠠᠨ᠎ᠢᠶᠠᠨ ᠨᠢᠭᠡᠨ ᠡᠳᠦᠷ ᠬᠦᠨᠡᠰᠦ ᠤᠮᠳᠠ ᠪᠠᠵᠠᠭᠠᠵᠤ ᠠᠪᠤᠭᠠᠳ ᠳᠠᠯᠠᠨ ᠪᠡᠷᠬᠡᠲᠦ᠎ᠶᠢ ᠵᠣᠷᠢᠭ᠍ᠰᠠᠨ ᠴᠤ᠌ ᠤᠯᠠᠮᠵᠢᠯᠠᠯ ᠶᠠᠷᠢᠶ᠎ᠠ ᠣᠷᠣ᠌ ᠦᠭᠡᠢ ᠪᠢᠰᠢ ᠪᠠᠢᠵᠤ᠂ ᠬᠣᠶᠠᠷᠬᠠᠨ ᠮᠠᠩᠬ᠎ᠠ ᠣᠷᠢᠶᠠᠮᠠᠭᠴᠠ ᠵᠦᠭ᠎ᠢᠶᠡᠨ ᠠᠯᠲᠠᠨ ᠲᠥᠭᠡᠷᠢᠭᠡᠳ ᠰᠦᠢᠳ ᠪᠣᠯᠪᠠ᠃ ᠭᠡᠲᠡᠯ᠎ᠡ ᠰᠥᠨᠢ ᠨᠢ ᠬᠠᠷᠢᠨ ᠵᠡᠭᠦᠳᠦ᠎ᠪᠡᠷ᠎ᠢᠶᠡᠨ ᠬᠦᠷᠦᠭᠡᠳ ᠣᠴᠢᠴᠢᠬᠠᠭᠰᠠᠨ᠂ ᠪᠥᠮᠪᠥᠭᠡᠷ ᠴᠠᠭᠠᠨ ᠭᠡᠷ ᠬᠠᠷᠠᠭᠠᠨ᠎ᠳᠦ ᠲᠣᠳᠣᠷᠠᠬᠤ᠎ᠪᠠᠷ ᠨᠢ ᠣᠷᠣᠭᠠᠳ ᠣᠴᠢᠪᠠᠯ ᠨᠢᠳᠦᠨ᠎ᠳᠦ ᠳᠤᠯᠠᠭᠠᠬᠠᠨ ᠪᠤᠭᠤᠷᠤᠯ ᠥᠲᠡᠭᠦᠰ ᠠᠭᠠᠭ ᠲᠠᠢ ᠰᠢᠷᠭᠠᠯ ᠴᠠᠢ ᠤᠤᠭᠤᠴᠢᠬᠠᠭᠰᠠᠨ ᠲᠤᠬᠠᠯᠠᠨ ᠰᠠᠭᠤᠵᠤ ᠪᠠᠢᠪᠠ᠃ ᠡᠪᠦᠳᠦᠭ ᠰᠥᠬᠥᠷᠡᠨ ᠠᠮᠤᠷ᠎ᠢ ᠨᠢ ᠠᠰᠠᠭᠤᠭᠰᠠᠨ ᠨᠠᠳᠠ᠎ᠳᠤ ᠴᠠᠢ ᠠᠶᠠᠭᠠᠯᠠᠵᠤ ᠥᠭᠭᠦᠯ᠎ᠡ᠃ ᠵᠣᠭᠣᠭ ᠳᠡᠯᠭᠡᠬᠦ᠎ᠶᠢᠨ ᠲᠠᠰᠢᠷᠠᠮ ᠲᠠᠴᠢᠷᠰᠢᠵᠤ ᠴᠥᠯᠵᠢᠭᠰᠡᠨ ᠨᠤᠲᠤᠭ ᠤᠰᠤᠨ᠎ᠤ᠎ᠪᠠᠨ ᠲᠥᠯᠥᠭᠡ ᠰᠡᠳᠬᠢᠯ ᠬᠦᠨᠳᠦᠬᠡᠨ ᠶᠠᠪᠤᠳᠠᠭ ᠪᠢ᠂ ᠪᠤᠭᠤᠷᠤᠯ᠎ᠠᠴᠠ ᠰᠤᠷᠭᠠᠯ ᠬᠦᠰᠡᠪᠡᠯ᠄

— ᠵᠠ᠂ ᠬᠦᠦ ᠮᠢᠨᠢ᠂《ᠵᠠᠭᠤᠨ ᠵᠢᠯ᠎ᠦᠨ ᠦᠨᠳᠦᠰᠦ᠂ ᠮᠢᠩᠭᠠᠨ ᠣᠨ᠎ᠤ ᠦᠷ᠎ᠡ》ᠭᠡᠳᠡᠭ ᠶᠤᠮ! ᠳᠠᠷᠠᠭ᠎ᠠ᠎ᠪᠠᠷ ᠲᠠᠬᠢᠭᠠᠳ ᠢᠷ᠎ᠡ᠂ ᠳᠠᠭᠠᠭᠤᠯᠤᠭᠠᠳ ᠢᠷᠡᠬᠦ ᠵᠠᠮᠴᠢ ᠠᠶᠠᠨᠳᠠᠭᠠᠨ ᠳᠠᠭᠠᠷᠠᠯᠳᠤᠨ᠎ᠠ ᠭᠡᠯ᠎ᠡ᠃ ᠠᠮᠲᠠᠲᠤ ᠨᠤᠢᠷ᠎ᠠᠴᠠ᠎ᠪᠠᠨ ᠰᠡᠷᠡᠬᠦ᠎ᠳᠦ ᠠᠭᠠᠭ᠍ᠯᠢᠭ᠋ ᠴᠠᠢ ᠮᠥᠨ ᠬᠦ᠌ ᠠᠮᠲᠠᠭᠳᠠᠵᠤ ᠪᠠᠢᠪᠠ᠃

ᠮᠠᠷᠭᠠᠰᠢ ᠨᠢ ᠡᠷᠲᠡᠯᠡᠨ ᠳᠠᠯᠠᠨ ᠪᠡᠷᠬᠡᠲᠦ᠎ᠶᠢ ᠵᠣᠷᠢᠯ᠎ᠠ᠃ ᠥᠴᠥᠭᠡᠳᠦᠷ ᠰᠥᠨᠢ᠎ᠶᠢᠨ ᠵᠡᠭᠦᠳᠦᠨ᠎ᠳᠡᠬᠢ ᠡᠪᠦᠭᠡ᠎ᠶᠢᠨ ᠵᠠᠬᠢᠭ᠍ᠰᠠᠨ᠎ᠢ ᠪᠡᠯᠭᠡᠰᠢᠶᠡᠵᠦ ᠵᠠᠮᠴᠢ᠎ᠪᠠᠨ ᠬᠠᠢᠨ ᠡᠢᠰᠢ ᠲᠡᠢᠰᠢ ᠬᠠᠷᠠᠬᠤ᠎ᠳᠤ ᠬᠥᠮᠥᠨ᠎ᠦ ᠪᠠᠷ᠎ᠠ ᠠᠯᠠᠭ᠎ᠠ᠃ ᠵᠣᠷᠢᠭ᠋ ᠰᠢᠨᠲᠠᠷᠠᠨ ᠪᠤᠴᠠᠮᠠᠷ ᠪᠣᠯᠲᠠᠯ᠎ᠠ ᠡᠭᠦᠯᠡᠨ ᠴᠡᠩᠬᠡᠷ ᠮᠣᠷᠢ ᠮᠠᠩᠬᠠᠨ ᠴᠠᠭᠠᠨ᠎ᠠ᠎ᠠᠴᠠ ᠢᠨᠴᠠᠭᠠᠭᠰᠠᠭᠠᠷ ᠭᠠᠷᠤᠭᠠᠳ ᠢᠷᠡᠯ᠎ᠡ᠃ ᠡᠨᠡ ᠯᠠᠪᠲᠠᠢ ᠵᠡᠭᠦᠳᠦᠨ᠎ᠳᠦ ᠤᠴᠠᠷᠠᠭᠰᠠᠨ ᠡᠪᠦᠭᠡ᠎ᠶᠢᠨ ᠬᠥᠯᠥᠭ ᠮᠥᠨ ᠬᠡᠮᠡᠨ ᠪᠤᠳᠤᠭᠠᠳ ᠠᠷᠤ᠎ᠠᠴᠠ ᠨᠢ ᠳᠠᠭᠠᠭᠰᠠᠭᠠᠷ ᠬᠡᠳᠦᠨ ᠬᠣᠨᠣᠭ ᠶᠠᠪᠤᠭᠰᠠᠨ᠎ᠢᠶᠠᠨ ᠮᠠᠩᠬᠠᠨ ᠭᠦᠨ᠎ᠳᠦ ᠲᠤᠨᠤᠯᠵᠠᠬᠤ ᠲᠤᠩᠭᠠᠯᠠᠭ ᠪᠦᠷᠢᠳᠦᠨ᠎ᠳᠦ ᠬᠦᠷᠦᠭᠡᠳ ᠣᠴᠢᠯ᠎ᠠ᠃ ᠳᠤᠷᠳᠤᠩ ᠬᠥᠬᠡ ᠲᠡᠭᠷᠢ ᠨᠢᠭᠡ ᠯᠠ ᠠᠮᠤᠭᠤᠯᠠᠩ ᠨᠡᠮᠦᠢᠵᠦ ᠪᠣᠯᠣᠷ ᠲᠤᠩᠭᠠᠯᠠᠭ ᠳᠣᠯᠭᠢᠶ᠎ᠠ ᠠᠷ ᠲᠡᠳᠡᠨ ᠮᠡᠯᠲᠡᠯᠵᠡᠨ᠎ᠡ᠃ ᠡᠭᠦᠯᠡᠨ ᠴᠡᠩᠬᠡᠷ ᠴᠦ᠍ ᠡᠬᠡ ᠪᠠᠢᠭᠠᠯᠢ᠎ᠶᠢᠨ᠎ᠢᠶᠠᠨ ᠥᠩᠭᠡᠨ᠎ᠳᠦ ᠠᠭᠤᠰᠤᠭᠰᠠᠨ ᠦᠦ ᠭᠡᠯᠲᠡᠢ ᠰᠤᠭᠤᠨᠠᠭ ᠲᠠᠲᠠᠭᠤᠯᠤᠨ ᠣᠳᠪᠠ᠃ ᠨᠠᠭᠤᠷ᠎ᠢ ᠲᠣᠭᠣᠷᠢᠪᠠᠯ ᠨᠡᠷᠡᠨ ᠰᠠᠷᠡᠨ᠎ᠢ ᠪᠡᠯᠭᠡᠳᠡᠭᠰᠡᠨ ᠣᠩᠭᠢᠨ ᠲᠠᠮᠠᠭ᠎ᠠ ᠰᠢᠭ᠋ ᠭᠡᠷ᠎ᠦᠨ ᠪᠠᠭᠤᠷᠢ ᠲᠠᠭᠠᠷᠠᠯᠳᠤᠵᠤ᠂ ᠵᠡᠭᠦᠳᠦᠨ᠎ᠦ ᠪᠤᠭᠤᠷᠤᠯ ᠡᠪᠦᠭᠡ᠎ᠲᠠᠢ᠎ᠪᠠᠨ ᠠᠭᠤᠯᠵᠠᠭᠰᠠᠨ ᠶᠤᠮ ᠰᠢᠭ᠋ ᠬᠠᠯᠠᠭᠤᠬᠠᠨ ᠰᠠᠨᠠᠭᠳᠠᠪᠠ᠃


640.png


ᠨᠤᠲᠤᠭ ᠪᠡᠯᠴᠢᠭᠡᠷ᠎ᠢ ᠡᠷᠦᠬᠡ᠎ᠳᠦ ᠳᠠᠭᠠᠭᠠᠴᠢᠯᠠᠭᠤᠯᠬᠤ ᠎ᠳᠤ ᠡᠯᠡᠰᠦᠨ ᠴᠦᠯ ᠨᠡᠷ᠎ᠡ᠎ᠲᠠᠢ ᠪᠣᠯᠤᠭᠰᠠᠨ ᠳᠠᠯᠠᠨ ᠪᠡᠷᠬᠡᠲᠦ᠎ᠶᠢ ᠥᠯᠢᠢᠭᠰᠡᠨ ᠬᠥᠮᠥᠨ ᠦᠭᠡᠢ ᠪᠣᠯᠬᠣᠷ ᠬᠠᠮᠲᠤ᠎ᠶᠢᠨ ᠨᠡᠷ᠎ᠡ ᠳᠡᠭᠡᠷ᠎ᠡ ᠦᠯᠡᠳᠡᠭᠰᠡᠨ ᠭᠡᠳᠡᠭ᠃ ᠪᠦᠷᠢᠳᠦᠨ᠎ᠳᠦ ᠨᠢ ᠨᠡᠪᠲᠡᠷᠡᠬᠦ ᠵᠠᠮ᠎ᠢ ᠣᠯᠣᠭᠰᠠᠨ ᠲᠤᠯᠠ ᠭᠠᠴᠠᠭᠠᠨ ᠳᠠᠷᠤᠭ᠎ᠠ᠎ᠶᠢ ᠡᠷᠢᠵᠦ ᠣᠴᠢᠭᠠᠳ ᠳᠠᠯᠠᠨ ᠪᠡᠷᠬᠡᠲᠦ ᠎ᠶᠢ ᠲᠦᠷᠢᠶᠡᠰᠦᠯᠡᠨ ᠠᠪᠬᠤ᠎ᠪᠠᠷ ᠭᠤᠶᠤᠴᠢᠯᠠᠯ᠎ᠠ᠃ ᠳᠡᠷᠪᠠᠶ᠋ᠢᠲᠠᠯ᠎ᠠ ᠪᠠᠶᠠᠷᠯᠠᠭᠰᠠᠨ ᠭᠠᠴᠠᠭᠠᠨ ᠳᠠᠷᠤᠭ᠎ᠠ ᠄

— ᠢᠱ᠌ᠢ᠂ ᠠᠬ᠎ᠠ᠎ᠶᠢᠨ ᠤᠬᠠᠭᠠᠨ ᠳᠠᠯᠠᠢ ᠯᠡ ᠶᠤᠮ ᠡ! ᠭᠡᠵᠦ ᠨᠠᠮ᠎ᠠ᠎ᠶᠢ ᠮᠠᠯᠠᠭᠠᠢᠳᠠᠭᠰᠠᠨ᠎ᠢᠶᠠᠨ ᠴᠡᠭᠡᠵᠢ ᠳᠦᠭᠦᠷᠡᠩ ᠪᠠᠶᠠᠷ᠎ᠢᠶᠠᠨ ᠳᠠᠷᠤᠵᠤ ᠶᠠᠳᠠᠨ ᠬᠠᠬᠠᠯᠠᠭᠰᠠᠭᠠᠷ ᠺᠣᠮᠫᠢᠦ᠋ᠲᠧᠷ᠎ᠦᠨ ᠳᠠᠷᠤᠪᠴᠢ᠎ᠶᠢ ᠬᠡᠳᠦᠬᠡᠨ ᠲᠠᠴᠢᠭᠢᠨᠠᠭᠤᠯᠤᠨ ᠭᠡᠷ᠎ᠡ ᠪᠢᠴᠢᠵᠦ ᠭᠠᠷᠭᠠᠭᠠᠳ ᠲᠠᠮᠠᠭ᠎ᠠ᠎ᠪᠠᠨ ᠲᠠᠱ ᠬᠢᠲᠡᠯ᠎ᠡ ᠣᠮᠣᠭᠲᠠᠢᠬᠠᠨ ᠳᠠᠷᠤᠪᠠᠯ ᠲᠤᠷᠭᠢᠶᠠᠨ᠎ᠳᠤ ᠨᠢ ᠭᠡᠷ᠎ᠦᠨ ᠠᠳᠠᠷ᠎ᠠᠴᠠ ᠪᠥᠭᠡᠮ ᠰᠢᠷᠣᠢ ᠱᠠᠷ ᠬᠢᠨ ᠤᠨᠠᠵᠤ ᠪᠠᠢᠪᠠ᠃

ᠬᠠᠰᠢᠶᠠᠯᠠᠨ ᠮᠠᠯᠵᠢᠬᠤ ᠵᠤᠭᠠᠩ᠎ᠳᠤ ᠬᠠᠲᠠᠭᠤᠬᠠᠨ ᠡᠷᠡᠭᠳᠡᠭᠡᠳ ᠳᠠᠯᠠᠨ ᠪᠡᠷᠬᠡᠲᠦ᠎ᠶᠢ ᠠᠪᠤᠭᠰᠠᠨ ᠨᠢ ᠰᠠᠨᠠᠮᠰᠠᠷ ᠦᠭᠡᠢ ᠨᠡᠭᠦᠳᠡᠯ ᠮᠠᠯᠵᠢᠯ᠎ᠢᠶᠠᠨ ᠰᠡᠷᠭᠦᠭᠡᠭᠰᠡᠨ ᠪᠠᠢᠪᠠ᠃ ᠣᠲᠣᠷ ᠬᠠᠢᠳᠠᠭ ᠭᠡᠵᠦ ᠶᠠᠪᠤᠭᠠᠳ ᠬᠡᠳᠦᠬᠡᠨ ᠵᠢᠯ ᠪᠣᠯᠣᠮᠠᠭᠴᠠ ᠳᠠᠯᠠᠨ ᠪᠡᠷᠬᠡᠲᠦ᠎ᠶᠢᠨ ᠮᠣᠳᠣ᠌ ᠪᠤᠷᠭᠠᠰᠤ ᠢᠭ᠍ᠴᠤᠷᠠᠨ ᠰᠦᠷᠦᠭ ᠵᠤᠵᠠᠭᠠᠷᠠᠵᠤ ᠭᠠᠴᠠᠭᠠᠨ ᠳᠠᠷᠤᠭ᠎ᠠ ᠎ᠶᠢᠨ ᠨᠢᠳᠦ᠎ᠶᠢ ᠤᠨᠠᠭᠠᠵᠠᠢ᠃ ᠡᠬᠢᠨ᠎ᠳᠦ᠎ᠪᠡᠨ ᠭᠠᠴᠠᠭᠠᠨ ᠳᠠᠷᠤᠭ᠎ᠠ 《ᠬᠠᠰᠢᠶᠠᠯᠠᠨ ᠮᠠᠯᠵᠢᠵᠤ ᠠᠮᠢ ᠠᠬᠤᠢ᠎ᠶᠢ ᠰᠡᠷᠭᠦᠭᠡᠭᠰᠡᠨ ᠬᠣᠰᠢᠭᠤᠴᠢ》ᠭᠡᠰᠡᠨ ᠬᠥᠬᠢᠭᠦᠯᠦᠯ᠎ᠦᠨ ᠪᠢᠴᠢᠭ ᠪᠠᠢᠨ ᠳᠠᠬᠢᠨ ᠬᠦᠷᠭᠡᠨ ᠢᠷᠡᠵᠦ ᠮᠠᠨ᠎ᠤ ᠬᠢ᠎ᠶᠢ ᠪᠠᠶᠠᠷᠯᠠᠭᠤᠯᠳᠠᠭ᠃ ᠭᠡᠪᠡᠴᠦ 《ᠬᠥᠬᠢᠭᠦᠯᠦᠯ ᠨᠢ ᠲᠠᠨ᠎ᠤ᠎ᠳᠤ ᠢᠷᠡᠵᠦ ᠱᠠᠩᠨᠠᠯ᠎ᠦᠨ ᠮᠥᠩᠭᠥ ᠨᠢ ᠳᠠᠷᠤᠭ᠎ᠠ᠎ᠶᠢᠨ ᠬᠠᠯᠠᠭᠠᠰᠤᠨ᠎ᠳᠤ ᠣᠷᠣᠳᠠᠭ ᠭᠡᠨ᠎ᠡ》 ᠭᠡᠰᠡᠨ ᠳᠠᠮ ᠶᠠᠷᠢᠶ᠎ᠠ ᠴᠦ᠍ ᠰᠠᠯᠬᠢ ᠬᠥᠯᠭᠡᠯᠡᠨ᠎ᠡ᠃ ᠣᠷᠴᠢᠮ᠎ᠠᠴᠠ ᠭᠠᠴᠠᠭᠠᠨ ᠳᠠᠷᠤᠭ᠎ᠠ ᠳᠠᠯᠠᠨ ᠪᠡᠷᠬᠡᠲᠦ᠎ᠶᠢ ᠪᠤᠴᠠᠭᠠᠵᠤ ᠠᠪᠬᠤ ᠰᠠᠨᠠᠭ᠎ᠠ ᠪᠤᠯᠲᠠᠢᠯᠭᠠᠨ ᠨᠠᠮ᠎ᠠ᠎ᠶᠢ ᠲᠡᠩᠨᠡᠵᠦ ᠭᠡᠲᠡᠳᠡᠭ ᠪᠣᠯᠣᠯ᠎ᠠ᠃ ᠪᠢ ᠤᠳᠠᠭ᠎ᠠ ᠪᠣᠯᠭᠠᠨ ᠵᠠᠮ᠎ᠤᠨ ᠪᠠᠷᠲᠠᠭ᠎ᠠ᠂ ᠮᠣᠲ᠋ᠣᠷ᠎ᠤᠨ ᠮᠡᠷᠭᠡᠵᠢᠯ᠎ᠳᠦ᠎ᠪᠡᠨ ᠳᠤᠯᠳᠤᠢᠳᠤᠨ ᠵᠠᠭᠤᠳᠠᠯ ᠴᠢᠩᠭ᠎ᠠ ᠨᠡᠬᠡᠯ᠎ᠡᠴᠡ ᠠᠷᠠᠢ ᠴᠢᠮᠠᠢ ᠮᠤᠯᠲᠤᠷᠠᠨ᠎ᠠ᠃ ᠥᠨᠥ ᠥᠷᠯᠥᠭᠡ ᠭᠠᠴᠠᠭᠠᠨ ᠳᠠᠷᠤᠭ᠎ᠠ ᠨᠠᠮ᠎ᠠ᠎ᠶᠢ ᠪᠦᠷ ᠴᠦ᠍ ᠪᠣᠷᠪᠢ ᠭᠢᠰᠬᠢᠮ᠎ᠡ ᠣᠢᠷᠠᠬᠠᠨ᠎ᠠᠴᠠ ᠬᠥᠭᠡᠭᠡᠯ᠎ᠡ᠃ ᠬᠡᠲᠦ ᠤᠳᠠᠭᠠᠨ᠎ᠤ ᠰᠣᠴᠢᠮᠠᠭ ᠨᠤᠭᠤᠯᠤᠭᠠᠨ ᠳᠡᠭᠡᠷ᠎ᠡ ᠪᠢ ᠲᠣᠭᠣᠰᠣ᠌ ᠮᠠᠨᠠᠷᠠᠲᠠᠯ᠎ᠠ ᠡᠷᠭᠢᠵᠦ ᠲᠡᠭᠦᠨ᠎ᠢ ᠬᠠᠶᠠᠬᠤ᠎ᠶᠢ ᠭᠣᠷᠢᠳᠠᠭᠰᠠᠨ ᠴᠤ᠌ ᠴᠥᠮ ᠪᠦᠲᠦᠯ ᠦᠭᠡᠢᠳᠡᠪᠡ᠃ ᠠᠷᠭ᠎ᠠ ᠶᠠᠳᠠᠬᠤ᠎ᠳᠤ᠎ᠪᠠᠨ ᠪᠣᠷᠣ᠌ ᠭᠥᠷᠥᠭᠡᠰᠦᠨ᠎ᠦ ᠴᠤᠪᠤᠭ᠎ᠠ ᠳᠠᠭᠠᠵᠤ ᠠᠩᠴᠢ ᠲᠠᠢᠭᠠᠨ᠎ᠳᠤ ᠬᠥᠭᠡᠭᠡᠭᠳᠡᠭᠰᠡᠨ ᠲᠠᠤᠯᠠᠢ ᠰᠢᠭ᠋ ᠵᠢᠷᠢᠢᠯᠭᠡᠭᠰᠡᠨ᠎ᠢᠶᠡᠨ ᠪᠥᠭᠡᠮ ᠪᠤᠷᠭᠠᠰᠤᠨ᠎ᠤ ᠳᠤᠮᠳᠠ ᠣᠷᠣᠵᠤ ᠨᠢᠭᠤᠭᠳᠠᠪᠠ᠃ ᠡᠨᠡ ᠤᠳᠠᠭ᠎ᠠ ᠭᠠᠴᠠᠭᠠᠨ ᠳᠠᠷᠤᠭ᠎ᠠ᠎ᠶᠢ ᠵᠡᠭᠡᠭᠡᠭᠰᠡᠨ ᠭᠤᠶᠠᠳᠠᠵᠤ ᠣᠷᠭᠢᠯ᠎ᠠ᠃ ᠪᠤᠷᠭᠠᠰᠤᠨ᠎ᠤ ᠰᠡᠭᠦᠳᠡᠷ᠎ᠲᠦ ᠬᠡᠪᠲᠡᠵᠦ ᠠᠶᠠᠲᠠᠢᠬᠠᠨ ᠠᠮᠠᠷᠠᠭᠰᠠᠨ᠎ᠢᠶᠠᠨ ᠲᠤᠩᠭᠠᠯᠠᠭ ᠪᠦᠷᠢᠳᠦᠨ᠎ᠳᠦ ᠬᠦᠷᠬᠦ ᠵᠠᠮ᠎ᠢᠶᠠᠨ ᠬᠠᠢᠪᠠ᠃

ᠥᠷᠯᠥᠭᠡ᠎ᠡᠴᠡ ᠣᠷᠣᠢ ᠪᠣᠯᠲᠠᠯ᠎ᠠ ᠬᠡᠳᠦᠨ ᠮᠠᠩᠬ᠎ᠠ ᠰᠦᠯᠵᠢᠨ ᠣᠷᠣᠨ᠎ᠳᠤ᠎ᠪᠠᠨ ᠡᠷᠭᠢᠴᠡᠭᠰᠡᠨ ᠴᠦ᠍ ᠵᠠᠮ᠎ᠢᠶᠠᠨ ᠣᠯᠵᠤ ᠳᠡᠢᠯᠦᠭᠰᠡᠨ ᠦᠭᠡᠢ᠂ ᠪᠠᠯᠠᠭᠳᠠᠨ ᠰᠠᠨᠳᠤᠷᠴᠤ ᠪᠠᠢᠲᠠᠯ᠎ᠠ ᠡᠭᠦᠯᠡᠨ ᠴᠡᠩᠬᠡᠷ ᠬᠠᠩᠭᠢᠨᠠᠲᠠᠯ᠎ᠠ ᠦᠦᠷᠰᠡᠭᠰᠡᠭᠡᠷ ᠬᠦᠷᠦᠭᠡᠳ ᠢᠷᠡᠯ᠎ᠡ᠃ ᠬᠠᠮᠠᠷ ᠪᠦᠷᠢᠶᠡᠳᠡᠭᠦᠯᠦᠨ ᠬᠦᠬᠦᠳᠦᠨᠡᠬᠦ ᠨᠢ ᠬᠠᠭᠤᠴᠢᠨ ᠲᠠᠨᠢᠯ ᠮᠡᠲᠦ᠂ ᠤᠷᠢᠲᠠᠢ ᠮᠠᠨᠢ ᠣᠷᠣᠵᠤ ᠳᠡᠷᠭᠡᠳᠡᠯ᠎ᠡ ᠬᠠᠲᠠᠷᠢᠬᠤ᠎ᠳᠤ ᠨᠢ ᠰᠢᠭᠤᠳ ᠳᠠᠭᠠᠭᠰᠠᠭᠠᠷ ᠪᠦᠷᠢᠳᠦᠨ᠎ᠳᠦ ᠬᠦᠷᠬᠦ ᠲᠠᠰᠤᠯ ᠵᠠᠮ᠎ᠢᠶᠠᠨ ᠡᠯᠭᠦᠪᠡ᠃ ᠰᠠᠨᠠᠭ᠎ᠠ ᠰᠡᠳᠬᠢᠯ ᠲᠠᠯ᠎ᠠ ᠰᠢᠭ᠋ ᠲᠠᠯᠪᠢᠭᠤᠷᠠᠨ ᠥᠷᠯᠥᠭᠡ ᠭᠠᠴᠠᠭᠠᠨ ᠳᠠᠷᠤᠭ᠎ᠠ᠎ᠳᠤ ᠲᠠᠭᠤᠭᠳᠠᠨ ᠲᠠᠤᠯᠠᠢ ᠰᠢᠭ᠋ ᠵᠢᠭᠤᠲᠠᠵᠤ ᠶᠠᠪᠤᠭᠰᠠᠨ᠎ᠢᠶᠠᠨ ᠰᠠᠨᠠᠵᠤ ᠡᠷᠬᠡ ᠦᠭᠡᠢ ᠢᠨᠢᠶᠡᠳᠦ ᠬᠥᠷᠪᠡ᠃ ᠲᠡᠭᠡᠲᠡᠯ᠎ᠡ ᠠᠷᠤ᠎ᠳᠤ ᠨᠢᠭᠡ ᠶᠠᠭᠤᠮ᠎ᠠ ᠰᠦᠷ ᠰᠠᠷ ᠬᠢᠨ ᠣᠢᠷᠠᠳᠴᠤ ᠢᠷᠡᠬᠦ ᠰᠢᠭ ᠪᠣᠯᠬᠤ᠎ᠳᠤ ᠰᠣᠴᠢᠭᠠᠨ᠎ᠳᠤ᠎ᠪᠠᠨ ᠤᠤᠯᠭ᠎ᠠ ᠠᠯᠲᠠᠨ ᠡᠷᠭᠢᠵᠦ ᠬᠠᠷᠠᠪᠠᠯ ᠤᠯᠠᠭᠠᠨ ᠬᠦᠵᠦᠭᠦᠪᠴᠢ᠎ᠲᠠᠢ ᠬᠠᠷ᠎ᠠ ᠬᠠᠯᠲᠠᠷ ᠲᠥᠭᠡ ᠬᠢᠷᠢᠲᠡᠢ ᠬᠡᠯᠡ᠎ᠪᠡᠨ ᠤᠨᠵᠢᠭᠤᠯᠤᠨ ᠰᠤᠨᠲᠠᠯ᠎ᠠ ᠬᠠᠷᠠᠢᠯᠭᠠᠵᠤ ᠪᠠᠢᠪᠠ᠃

(《2024·ᠪᠤᠭᠤᠨᠢ ᠦᠭᠦᠯᠡᠯᠭᠡ》 ᠨᠤᠮ᠎ᠠᠴᠠ ᠰᠣᠩᠭᠣᠪᠠ)

  • ᠨᠠᠢᠷᠠᠭᠤᠯᠤᠭ᠍ᠴᠢ᠄

  • ᠨᠡᠪᠲᠡᠷᠡᠭᠦᠯᠦᠭᠴᠢ᠄

  • ᠮᠡᠷᠭᠡᠵᠢᠯ᠄

ᠨᠠᠢᠷᠠᠭᠤᠯᠤᠭ᠍ᠴᠢ᠄

ᠣᠷᠴᠢᠭᠤᠯᠤᠭ᠍ᠴᠢ᠄

ᠢᠷᠡᠯᠲᠡ᠄
兼容浏览器的HTML页面