ᠲᠡᠷᠢᠭᠦᠨ ᠨᠢᠭᠤᠷ>ᠣᠳᠤ ᠲᠠᠢ ᠪᠣᠯᠵᠣᠭ᠎ᠠ

2026-08-24 18:31:27

ᠵᠣᠬᠢᠶᠠᠭ᠍ᠴᠢ᠄ ᠣᠩᠱᠢᠭ᠍ᠰᠠᠨ ᠣᠳᠠᠭ᠎ᠠ᠄

ᠭᠱᠠᠨ ᠵᠠᠭᠤᠷ᠎ᠠ

·ᠭᠦᠢᠯᠡᠰᠦ ( ᠲᠦᠩ ᠺᠠᠢ ᠬᠤᠸᠠ )

ᠪᠦᠬᠦ ᠪᠡᠶ᠎ᠡ ᠬᠥᠨᠳᠡᠭᠦᠷᠯᠡᠨ ᠡᠮᠵᠡᠭᠯᠡᠵᠦ᠂ ᠲᠣᠯᠣᠭᠠᠢ ᠲᠦᠨᠡᠷᠡᠭᠡᠳ ᠶᠠᠭ ᠯᠠ ᠡᠭᠦᠯᠡ ᠬᠥᠯᠭᠡᠯᠡᠵᠦ᠂ ᠣᠭᠲᠠᠷᠭᠤᠢ ᠳᠡᠭᠡᠭᠦᠷ ᠬᠥᠪᠥᠨ ᠳᠡᠭᠳᠡᠵᠦ ᠪᠠᠢᠭ᠎ᠠ ᠮᠡᠲᠦ ᠠᠲᠠᠯ᠎ᠠ ᠬᠥᠯ ᠮᠢᠨᠢ ᠭᠠᠵᠠᠷ᠎ᠠᠴᠠ ᠰᠠᠯᠵᠤ ᠥᠭᠬᠦ ᠦᠭᠡᠢ ᠲᠠᠲᠠᠯᠳᠤᠨ ᠬᠦᠨᠳᠦᠷᠡᠵᠦ᠂ ᠳᠡᠭᠡᠭᠰᠢ ᠬᠦᠴᠦᠯᠡᠬᠦ ᠲᠣᠲᠤᠮ ᠬᠥᠯ᠎ᠠᠴᠠ ᠮᠢᠨᠢ ᠬᠦᠨᠳᠦ ᠴᠢᠯᠠᠭᠤ ᠳᠡᠭᠦᠵᠢᠯᠡᠴᠢᠬᠡᠭᠰᠡᠨ ᠮᠡᠲᠦ ᠳᠣᠷᠣᠭ᠍ᠰᠢ ᠲᠠᠲᠠᠭᠠᠳ ᠪᠠᠢᠬᠤ᠎ᠪᠠᠷ ᠨᠠᠷᠢᠨ ᠨᠢᠷᠤᠭᠤ ᠨᠢᠴᠠᠷᠠᠨ ᠪᠡᠶ᠎ᠡ᠎ᠶᠢᠨ ᠳᠤᠮᠳᠠᠭᠤᠷ ᠲᠠᠰᠤᠷᠠᠵᠤ ᠣᠴᠢᠮᠠᠷ ᠡᠪᠡᠳᠬᠦ ᠭᠡᠵᠦ ᠬᠡᠴᠡᠭᠦᠦ᠂ ᠮᠢᠨᠤ ᠬᠠᠵᠠᠭᠤ ᠬᠠᠪᠢ᠎ᠪᠡᠷ ᠳᠠᠯᠠᠢ ᠪᠤᠴᠠᠯᠬᠤ ᠮᠡᠲᠦ ᠱᠤᠤᠭᠢᠵᠤ ᠪᠠᠢᠪᠠ᠃

— ᠴᠢᠰᠤᠨ ᠳᠠᠷᠤᠯᠲᠠ ᠨᠢ ᠪᠠᠰᠠ ᠬᠡᠲᠦᠷᠬᠡᠢ ᠳᠣᠣᠷ᠎ᠠ ᠪᠠᠢᠭᠰᠠᠭᠠᠷ᠂ ᠳᠥᠴᠢᠨ ᠨᠠᠢ᠍ᠮᠠ᠃

— ᠵᠢᠷᠦᠬᠡᠨ ᠴᠣᠬᠢᠯᠭ᠎ᠠ ᠨᠢ ᠬᠡᠪ ᠎ᠲᠦ ᠎ᠪᠡᠨ ᠪᠠᠢᠨ᠎ᠠ᠃

— ᠣᠳᠣᠬᠠᠨ ᠠᠮᠢ ᠨᠠᠰᠤᠨ ᠎ᠤ ᠠᠶᠤᠯ ᠎ᠠᠴᠠ ᠬᠡᠯᠲᠦᠷᠢᠵᠦ ᠳᠡᠢᠯᠦᠭᠡ ᠦᠭᠡᠢ ᠪᠠᠢᠨ᠎ᠠ᠃


cape-marguerite-flower-plant-orange-flower-beautiful-flowers-petals-bloom-flora-spring-flower-background.jpg


ᠶᠠᠭᠤ ᠪᠣᠯᠵᠤ ᠪᠠᠢᠭ᠎ᠠ ᠨᠢ ᠡᠨᠡ ᠪᠣᠢ ᠭᠡᠵᠦ ᠭᠠᠢᠬᠠᠵᠤ ᠪᠢ ᠨᠢᠳᠦ᠎ᠪᠡᠨ ᠨᠡᠭᠡᠭᠡᠬᠦ᠎ᠶᠢ ᠰᠠᠨᠠᠭᠰᠠᠨ ᠪᠣᠯᠪᠠᠴᠤ ᠬᠦᠴᠦᠨ ᠮᠡᠬᠦᠰᠳᠡᠭᠡᠳ ᠪᠠᠢᠪᠠ᠃ ᠪᠢ ᠦᠬᠦᠭᠡ ᠦᠭᠡᠢ ᠪᠠᠢᠭ᠎ᠠ ᠶᠤᠮ ᠪᠠᠢᠨ᠎ᠠ ᠭᠡᠵᠦ ᠪᠣᠳᠣᠬᠤ ᠭᠱᠠᠨ᠎ᠠ ᠲᠠᠬᠢᠭᠠᠳ ᠮᠡᠳᠡᠭᠡ ᠠᠯᠳᠠᠵᠠᠢ᠃

ᠨᠢᠭᠡ ᠮᠡᠳᠡᠬᠦ᠎ᠳᠦ ᠪᠢ ᠳᠤᠩ ᠴᠠᠭᠠᠨ ᠭᠡᠷ᠎ᠲᠦ ᠳᠤᠩ ᠴᠠᠭᠠᠨ ᠤᠷᠤ ᠳᠡᠭᠡᠷ᠎ᠡ ᠡᠮ ᠶᠡᠭᠦᠯᠡᠴᠢᠬᠡᠭᠰᠡᠨ ᠭᠡᠪᠳᠡᠵᠦ ᠪᠠᠢᠪᠠ᠃ ᠡᠵᠢ ᠮᠢᠨᠢ ᠨᠢᠯᠪᠤᠰᠤᠨ ᠬᠦᠮᠦᠨ ᠪᠤᠯᠴᠢᠬᠠᠭᠰᠠᠨ ᠭᠠᠷ᠎ᠢ ᠮᠢᠨᠢ ᠪᠠᠷᠢᠵᠤ ᠵᠤᠭᠰᠤᠨ᠎ᠠ᠃ ᠪᠢ ᠲᠣᠯᠣᠭᠠᠢ᠎ᠪᠡᠨ ᠡᠷᠭᠦᠬᠦ᠎ᠶᠢ ᠰᠠᠨᠠᠵᠤ ᠥᠨᠳᠡᠢᠲᠡᠯ᠎ᠡ ᠡᠵᠢ ᠡᠵᠢᠭᠡᠶ ᠪᠢᠵᠢᠭᠡᠢ ᠠᠯᠳᠠᠵᠤ᠄

— ᠡᠮᠴᠢ ᠠ᠋! ᠮᠠᠭᠤ ᠬᠦᠦ ᠮᠢᠨᠢ ᠰᠡᠷᠭᠦᠴᠢᠬᠡᠵᠡᠶ ᠭᠡᠵᠦ ᠬᠠᠰᠬᠢᠷᠤᠭᠰᠠᠨ᠎ᠢᠶᠠᠨ ᠮᠠᠩᠨᠠᠢ ᠳᠡᠭᠡᠷ᠎ᠡ ᠮᠢᠨᠢ ᠱᠣᠪ ᠬᠢᠲᠡᠯ᠎ᠡ ᠦᠨᠦᠰᠪᠡ᠃ ᠡᠵᠢ ᠳᠡᠷ᠎ᠡ᠎ᠶᠢ ᠪᠠᠭ᠎ᠠ ᠲᠡᠭᠰᠢᠯᠡᠭᠡᠳ᠄

— ᠮᠢᠨᠤ ᠬᠦᠦ ᠪᠢᠲᠡᠭᠡᠢ ᠬᠥᠳᠡᠯ ᠡ᠂ ᠡᠮᠴᠢ᠎ᠶᠢᠨ ᠬᠡᠯᠡᠬᠦ᠎ᠪᠡᠷ ᠲᠣᠯᠣᠭᠠᠢ ᠴᠢᠨᠢ ᠳᠣᠷᠭᠢᠯᠲᠠ᠎ᠡᠴᠡ ᠪᠣᠯᠵᠤ ᠪᠠᠭ᠎ᠠ ᠬᠡᠮᠵᠢᠶ᠎ᠡ᠎ᠪᠡᠷ ᠭᠡᠮᠲᠦᠭᠰᠡᠨ ᠭᠡᠨ᠎ᠡ᠃ ᠬᠠᠷᠢᠨ ᠬᠣᠶᠠᠷ ᠬᠥᠯ᠂ ᠬᠠᠪᠢᠷᠭ᠎ᠠ ᠰᠦᠪᠡᠭᠡ ᠴᠢᠨᠢ ᠬᠡᠴᠡᠭᠦᠦ ᠪᠠᠷᠲᠠᠵᠠᠶ᠃ ᠭᠡᠰᠡᠨ ᠴᠦ᠍ ᠶᠠᠭᠠᠬᠢᠬᠤ ᠪᠣᠢ᠂ ᠶᠠᠰᠤ ᠭᠡᠳᠡᠭ ᠴᠢᠨᠢ ᠡᠳᠦᠷ ᠬᠣᠨᠣᠭ᠎ᠢᠶᠠᠨ ᠲᠣᠭᠠᠯᠠᠵᠤ ᠭᠦᠢᠴᠡᠪᠡᠯ ᠡᠳᠡᠭᠡᠷᠡᠬᠦ ᠯᠡ ᠳᠡ᠃ ᠬᠠᠷᠢᠨ ᠬᠦᠦ ᠮᠢᠨᠢ ᠭᠠᠯ ᠵᠠᠯᠠᠭᠤ᠎ᠪᠠᠷ᠎ᠢᠶᠠᠨ ᠡᠢᠮᠦ ᠲᠡᠢᠮᠦ ᠪᠣᠯᠤᠭᠰᠠᠨ ᠪᠣᠯ ᠶᠠᠭᠠᠬᠢᠨ᠎ᠠ ᠪᠣᠢ᠁ ᠭᠡᠵᠦ ᠨᠢᠭᠡ ᠯᠠ ᠠᠮᠢᠰᠬᠤᠭ᠎ᠠ ᠎ᠪᠠᠷ ᠤᠷᠤᠰᠤᠭᠤᠯᠵᠤ ᠭᠠᠷᠤᠭᠰᠠᠨ᠎ᠢᠶᠠᠨ ᠨᠢᠰᠤ ᠨᠢᠯᠪᠤᠰᠤ᠎ᠪᠠᠨ ᠠᠬᠢᠭᠠᠳ ᠯᠠ ᠤᠷᠤᠰᠬᠠᠵᠤ᠄

— ᠬᠥᠭᠡᠷᠦᠬᠦᠢ᠂ ᠴᠠᠭᠠᠲᠤ ᠬᠡᠦᠬᠡᠳ ᠴᠢᠨᠢ ᠰᠢᠷᠬᠠᠲᠤᠵᠤ ᠭᠡᠮᠲᠦᠭᠰᠡᠨ ᠦᠭᠡᠢ ᠰᠤᠷᠭᠠᠭᠤᠯᠢ᠎ᠳᠤ᠎ᠪᠠᠨ ᠶᠠᠪᠤᠵᠤ ᠪᠠᠢᠨ᠎ᠠ ᠰᠢᠤ᠃ ᠲᠡᠭᠡᠬᠦᠯᠡᠷ ᠮᠢᠨᠤ ᠬᠦᠦ ᠰᠠᠨᠠᠭ᠎ᠠ ᠠᠮᠤᠷ ᠪᠡᠶ᠎ᠡ᠎ᠪᠡᠨ ᠰᠤᠪᠢᠯᠠᠵᠤ ᠡᠷᠲᠡ ᠨᠢᠭᠡᠨ ᠡᠳᠦᠷ ᠡᠮᠨᠡᠯᠭᠡ᠎ᠡᠴᠡ ᠭᠠᠷᠬᠤ᠎ᠶᠢ ᠪᠣᠳᠤᠬᠤ ᠶᠤᠮ ᠰᠢᠤ ᠭᠡᠪᠡ᠃





ᠮᠢᠨᠤ ᠲᠤᠳᠤᠷ᠎ᠠ ᠲᠠᠯ᠎ᠠ ᠮᠡᠳᠦ ᠤᠩᠭᠤᠢᠪᠠ᠃ ᠪᠢ ᠨᠢᠳᠦ᠎ᠪᠡᠨ ᠠᠨᠢᠨ᠂ ᠠᠰᠢᠭᠦᠢ ᠲᠡᠷᠡ ᠵᠢᠭᠠᠯ ᠦᠬᠢᠨ ᠬᠠᠮᠢᠶ᠎ᠠ ᠦᠭᠡᠢ ᠪᠠᠢᠬᠤ ᠴᠢᠨᠢ ᠪᠤᠯᠵᠠᠢ᠃ ᠪᠢ᠎ᠴᠤ ᠶᠠᠭᠠᠬᠢᠮᠠᠢ᠂ ᠣᠷᠭᠣᠭ᠎ᠠ ᠪᠣᠰᠣᠭ᠎ᠠ ᠡᠷ᠎ᠡ ᠬᠥᠮᠥᠨ᠁ ᠶᠡᠷᠦ ᠨᠢ ᠬᠣᠶᠠᠷ ᠬᠥᠯ ᠦᠭᠡᠢ᠎ᠳᠦ ᠶᠠᠭᠠᠬᠢᠬᠤ ᠪᠣᠢ᠂ ᠣᠶᠤᠨ ᠲᠠᠷᠢᠬᠢ ᠮᠢᠨᠢ ᠡᠷᠡᠭᠦᠯ ᠪᠠᠢᠪᠠᠯ ᠬᠥᠮᠥᠨ ᠡᠴᠡ ᠲᠣᠯᠢᠳᠠᠬᠤ ᠦᠭᠡᠢ ᠠᠮᠢᠳᠤᠷᠠᠬᠤ ᠯᠠ ᠳᠡ᠃ ᠬᠠᠷᠢᠨ ᠪᠣᠯᠣᠷᠴᠡᠴᠡᠭ ᠮᠢᠨᠢ᠁ ᠬᠡᠮᠡᠨ ᠪᠣᠳᠣᠵᠤ ᠬᠡᠪᠲᠡᠬᠦ᠎ᠳᠦ ᠪᠤᠷᠭᠠᠰᠤ ᠰᠢᠤᠬᠠᠨ ᠨᠠᠬᠢᠯᠵᠠᠭᠤᠷ ᠪᠡᠶ᠎ᠡ᠎ᠳᠦ ᠪᠠᠨ ᠶᠠᠪ ᠴᠠᠪ ᠵᠣᠬᠢᠴᠠᠭᠰᠠᠨ ᠴᠡᠩᠬᠡᠷ ᠥᠩᠭᠡ᠎ᠶᠢᠨ ᠪᠠᠩᠵᠠᠯ ᠳᠡᠷᠪᠡᠯᠵᠡᠭᠦᠯᠦᠭᠰᠡᠨ ᠪᠣᠯᠣᠷᠴᠡᠴᠡᠭ ᠮᠢᠨᠢ ᠬᠣᠣᠰ ᠬᠤᠨᠳᠠᠭ᠎ᠠ᠎ᠪᠠᠨ ᠬᠣᠲᠣᠯᠵᠠᠭᠤᠯᠤᠨ ᠬᠠᠵᠠᠭᠤ᠎ᠳᠤ ᠮᠢᠨᠢ ᠴᠡᠴᠡᠭ᠎ᠢ ᠢᠴᠢᠭᠡᠲᠡᠯ᠎ᠡ ᠢᠨᠢᠶᠡᠮᠰᠦᠭᠯᠡᠨ ᠵᠣᠭᠰᠣᠵᠤ ᠪᠠᠢᠬᠤ ᠰᠢᠭ᠋ ᠰᠠᠨᠠᠭᠳᠠᠪᠠ᠃ ᠵᠡᠭᠦᠳᠦ ᠦᠨᠡᠨ᠎ᠦ ᠬᠣᠭᠣᠷᠣᠨᠳᠤ ᠬᠡᠰᠡᠭ ᠠᠯᠮᠠᠢᠷᠠᠨ ᠠᠲᠠᠯ᠎ᠠ ᠴᠢᠬᠢᠨ᠎ᠳᠦ ᠮᠢᠨᠢ ᠪᠣᠯᠣᠷᠴᠡᠴᠡᠭ᠎ᠦᠨ᠄

— ᠡᠩᠬᠡ ᠠ᠋᠂ ᠡᠮᠨᠡᠯᠭᠡ᠎ᠡᠴᠡ ᠭᠠᠷᠤᠮᠠᠭᠴᠠ ᠬᠣᠶᠠᠭᠤᠯᠠ᠎ᠪᠠᠨ ᠤᠷᠤᠭ᠎ᠤᠨ ᠪᠠᠲᠤᠯᠠᠪᠤᠷᠢ᠎ᠪᠠᠨ ᠠᠪᠤᠨ᠎ᠠ ᠰᠢᠤ ᠭᠡᠵᠦ ᠰᠢᠪᠡᠨᠡᠬᠦ ᠲᠤᠩᠭᠠᠯᠠᠭ ᠢᠷᠠᠭᠤ ᠳᠠᠭᠤᠨ ᠲᠤᠭᠤᠯᠳᠠᠪᠠ᠃ ᠮᠢᠨᠤ ᠬᠠᠮᠠᠷ ᠱᠠᠷᠬᠢᠷᠠᠭᠠᠳ ᠶᠠᠪᠤᠴᠢᠬᠠᠪᠠ᠃ ᠪᠢ ᠨᠢᠯᠪᠤᠰᠤ᠎ᠪᠠᠨ ᠴᠢᠳᠠᠨ ᠶᠠᠳᠠᠨ ᠬᠣᠷᠢᠵᠤ᠄

— ᠮᠢᠨᠤ ᠡᠨᠡ ᠬᠣᠶᠠᠷ ᠬᠥᠯ ᠁ ᠭᠡᠵᠦ ᠬᠡᠯᠡᠲᠡᠯ᠎ᠡ᠄

— ᠶᠠᠮᠠᠷ ᠪᠣᠯᠤᠭᠰᠠᠨ ᠴᠤ᠌ ᠬᠠᠮᠢᠶ᠎ᠠ ᠦᠭᠡᠢ᠂ ᠪᠢ ᠴᠢᠮ᠎ᠠ᠎ᠳᠤ ᠮᠣᠷᠳᠠᠬᠤ᠎ᠪᠠᠷ ᠰᠢᠭᠤᠳᠴᠢᠬᠠᠭᠰᠠᠨ᠃ ᠰᠡᠳᠬᠢᠯ ᠨᠢ ᠪᠡᠷᠲᠡᠭᠰᠡᠨ ᠬᠥᠮᠥᠨ ᠪᠣᠯ ᠲᠡᠢᠮᠦ ᠪᠠᠢᠳᠠᠯ᠎ᠳᠤ ᠶᠠᠰᠤ᠎ᠪᠠᠨ ᠪᠡᠷᠲᠡᠭᠡᠬᠦ ᠦᠭᠡᠢ ᠭᠠᠷᠴᠢᠬᠠᠬᠤ ᠪᠠᠢᠭᠰᠠᠨ ᠪᠠᠢᠬ᠎ᠠ᠃ ᠭᠡᠲᠡᠯ᠎ᠡ ᠴᠢ ᠮᠢᠨᠢ ᠲᠡᠭᠡᠭᠡ ᠦᠭᠡᠢ ᠭᠡᠰᠡᠨ᠎ᠢᠶᠡᠨ ᠪᠣᠯᠣᠷᠴᠡᠴᠡᠭ ᠬᠣᠭᠣᠯᠠᠢ ᠨᠢ ᠴᠡᠴᠡᠷᠬᠢᠯᠡᠵᠦ᠂ ᠳᠠᠭᠤ᠎ᠪᠠᠨ ᠬᠤᠷᠢᠶᠠᠪᠠ᠃


colorful-flowers-vibrant-pansies-raindrops-colorful-petals-leaves-close-up-purple-pansies-yellow-pansies-white-pansies-garden-flowers.jpg


《ᠬᠡᠷᠡᠭ ᠭᠡᠵᠦ ᠬᠡᠩᠭᠡᠷᠭᠡ ᠴᠠᠩ᠎ᠲᠠᠢ ᠢᠷᠡᠳᠡᠭ ᠦᠭᠡᠢ》ᠭᠡᠳᠡᠭ᠎ᠢᠶᠡᠷ ᠨᠠᠳᠠ᠎ᠳᠤ ᠡᠢᠮᠦ ᠤᠴᠢᠷ ᠲᠣᠬᠢᠶᠠᠯᠳᠤᠨ᠎ᠠ ᠭᠡᠵᠦ ᠵᠡᠭᠦᠳᠦᠨ᠎ᠳᠤ ᠴᠦ᠍ ᠣᠷᠣᠭᠰᠠᠨ ᠦᠭᠡᠢ᠃ ᠥᠷᠯᠥᠭᠡ ᠠᠵᠢᠯᠯᠠᠬᠤ᠎ᠪᠠᠷ ᠮᠠᠰᠢᠨ᠎ᠢᠶᠠᠨ ᠪᠠᠷᠢᠭᠠᠳ ᠶᠠᠪᠤᠵᠤ ᠪᠠᠢᠭᠰᠠᠨ ᠯᠠ ᠳᠠ᠃ ᠵᠠᠮ᠎ᠤᠨ ᠬᠠᠵᠠᠭᠤ᠎ᠠᠴᠠ ᠭᠡᠨᠡᠳᠲᠡ ᠨᠢᠭᠡ ᠬᠡᠦᠬᠡᠳ ᠭᠦᠶᠦᠨ ᠭᠠᠷᠴᠤ ᠢᠷᠡᠬᠦ ᠬᠠᠷᠠᠭᠳᠠᠬᠤ᠎ᠶᠢᠨ ᠲᠡᠷᠡᠬᠡᠨ ᠭᠱᠠᠨ᠎ᠳᠦ 《ᠬᠡᠦᠬᠡᠳ》ᠭᠡᠵᠦ ᠳᠠᠭᠤ ᠠᠯᠳᠠᠭᠠᠳ ᠵᠠᠯᠠᠭᠤᠷ᠎ᠢᠶᠠᠨ ᠵᠡᠭᠦᠨᠰᠢ᠎ᠪᠡᠨ ᠴᠢᠨᠡᠭᠡ ᠮᠡᠳᠡᠨ ᠵᠠᠯᠠᠵᠤ ᠵᠠᠮ᠎ᠤᠨ ᠬᠠᠵᠠᠭᠤᠳᠠᠭᠢ ᠪᠦᠳᠦᠭᠦᠨ ᠮᠣᠳᠣ᠌᠎ᠲᠠᠢ ᠮᠥᠷᠭᠥᠭᠰᠡᠨ᠎ᠢᠶᠡᠨ ᠰᠠᠨᠠᠵᠤ ᠪᠠᠢᠨ᠎ᠠ᠃ ᠪᠢ ᠪᠣᠯᠣᠷᠴᠡᠴᠡᠭ᠎ᠲᠦ ᠬᠠᠨᠳᠤᠨ᠄

— ᠪᠠᠶᠠᠷᠯᠠᠯ᠎ᠠ ᠭᠡᠵᠦ ᠬᠡᠯᠡᠬᠦ᠎ᠶᠢ ᠵᠠᠪᠳᠤᠲᠠᠯ᠎ᠠ ᠡᠭᠦᠳᠡ ᠣᠩᠭᠣᠢᠵᠤ᠂ ᠲᠡᠪᠡᠷᠢ ᠳᠦᠭᠦᠷᠡᠩ ᠴᠡᠴᠡᠭ ᠲᠡᠪᠡᠷᠢᠭᠰᠡᠨ ᠡᠪᠡᠷ ᠭᠡᠵᠢᠭᠡ᠎ᠲᠠᠢ ᠵᠢᠭᠠᠯ ᠥᠬᠢᠨ 《ᠠᠪᠠᠭ᠎ᠠ ᠠ》 ᠭᠡᠭᠰᠡᠭᠡᠷ ᠡᠷᠪᠡᠬᠡᠢ ᠰᠢᠭ ᠳᠡᠷᠪᠡᠯᠵᠠᠨ ᠨᠠᠭᠠᠰᠢᠯᠠᠬᠤ ᠨᠢ ᠬᠠᠷᠠᠭᠳᠠᠪᠠ ᠁

(《2024·ᠪᠤᠭᠤᠨᠢ ᠦᠭᠦᠯᠡᠯᠭᠡ》 ᠨᠤᠮ᠎ᠠᠴᠠ ᠰᠣᠩᠭᠣᠪᠠ)

  • ᠨᠠᠢᠷᠠᠭᠤᠯᠤᠭ᠍ᠴᠢ᠄

  • ᠨᠡᠪᠲᠡᠷᠡᠭᠦᠯᠦᠭᠴᠢ᠄

  • ᠮᠡᠷᠭᠡᠵᠢᠯ᠄

ᠨᠠᠢᠷᠠᠭᠤᠯᠤᠭ᠍ᠴᠢ᠄

ᠣᠷᠴᠢᠭᠤᠯᠤᠭ᠍ᠴᠢ᠄

ᠢᠷᠡᠯᠲᠡ᠄
兼容浏览器的HTML页面