— 198᠂ 199᠂ 200 ！ 200 ᠤᠳᠠᠭ᠎ᠠ ᠦᠰᠦᠷᠴᠢᠬᠡᠯ᠎ᠠ᠃

— ᠴᠢ ᠳᠡᠭᠡᠰᠦ ᠦᠰᠦᠷᠬᠦ ᠤᠷᠤᠯᠳᠤᠭᠠᠨ᠎ᠳᠤ ᠪᠠᠰᠠ ᠲᠡᠷᠢᠬᠦᠯᠡᠭᠰᠡᠨ ᠰᠢᠦ ᠁

ᠠᠩᠬᠢ᠎ᠶᠢᠨ ᠨᠦᠬᠦᠳ ᠨᠢ ᠬᠦᠶᠦᠨ ᠢᠷᠡᠭᠡᠳ ᠵᠤᠤ ᠶᠤᠸᠠᠢ ᠲᠢᠩ᠎ᠢ ᠬᠦᠷᠢᠶᠡᠯᠡᠭᠡᠳ ᠠᠪᠤᠯ᠎ᠠ᠃

ᠡᠢᠨ ᠬᠦ᠌ ᠵᠤᠤ ᠶᠤᠸᠠᠢ ᠲᠢᠩ ᠰᠤᠷᠭᠠᠭᠤᠯᠢ ᠪᠠᠨ ᠲᠦᠯᠦᠭᠡᠯᠡᠨ ᠬᠤᠰᠢᠭᠤᠨ᠎ᠤ ᠪᠠᠨ ᠲᠡᠭᠡᠰᠦ ᠦᠰᠦᠷᠬᠦ ᠤᠷᠤᠯᠳᠤᠭᠠᠨ ᠳ᠋ᠤ ᠤᠷᠤᠯᠴᠠᠵᠤ ᠮᠦᠨ ᠬᠦ᠌ ᠲᠡᠷᠢᠬᠦᠯᠡᠵᠡᠢ᠃ ᠲᠡᠷᠡ ᠪᠤᠯ ᠵᠠᠯᠠᠢᠳ ᠬᠤᠰᠢᠭᠤᠨ᠎ᠤ ᠢᠨᠳᠡᠷ ᠬᠤᠶᠠᠳᠤᠭᠠᠷ ᠪᠠᠭ᠎ᠠ ᠰᠤᠷᠭᠠᠭᠤᠯᠢ ᠵᠢᠨ 5.4 ᠠᠩᠬᠢ᠎ᠶᠢᠨ ᠰᠤᠷᠤᠭᠴᠢ ᠪᠤᠯᠤᠨ᠎ᠠ᠃ ᠲᠡᠷᠡ ᠰᠤᠷᠭᠠᠭᠤᠯᠢ ᠵᠢᠨ ᠵᠢᠡᠨ《ᠲᠠᠮᠢᠷ ᠤᠷᠠᠯᠢᠭ᠎ᠤᠨ ᠪᠢᠴᠢᠬᠠᠨ ᠤᠳᠤᠨ》 ᠴᠤᠯᠠ ᠲᠠᠢ᠃ ᠳᠡᠭᠡᠰᠦ ᠦᠰᠦᠷᠬᠦ ᠪᠤᠯ ᠲᠡᠬᠦᠨ᠎ᠤ ᠬᠠᠮᠤᠭ᠎ᠤᠨ ᠳᠤᠷᠠᠳᠠᠢ ᠲᠠᠮᠢᠷ᠎ᠤᠨ ᠬᠦᠳᠡᠯᠭᠡᠭᠡᠨ᠎ᠤ ᠨᠢᠭᠡ ᠪᠤᠯᠤᠨ᠎ᠠ᠃

— ᠳᠡᠭᠡᠰᠦ ᠦᠰᠦᠷᠬᠦ ᠨᠢ ᠪᠡᠶ᠎ᠠ ᠮᠠᠬᠠᠪᠤᠳ᠎ᠢ ᠳᠠᠪᠳᠠᠨ ᠪᠤᠯᠪᠠᠰᠤᠷᠠᠭᠤᠯᠳᠠᠭ᠃ ᠪᠢ ᠬᠤᠰᠢᠭᠤ ᠪᠠ ᠰᠤᠷᠭᠠᠭᠤᠯᠢ᠎ᠶᠢᠨ ᠲᠡᠭᠡᠰᠤ ᠦᠰᠦᠷᠬᠦ ᠤᠷᠤᠯᠳᠤᠭᠠᠨ᠎ᠳᠤ ᠤᠯᠠᠨ ᠤᠳᠠᠭ᠎ᠠ ᠲᠡᠷᠢᠬᠦᠯᠡᠵᠦ ᠪᠠᠢᠭᠰᠠᠨ᠂ ᠰᠤᠷᠭᠠᠭᠤᠯᠢ᠎ᠳᠤ ᠪᠠᠨ ᠢᠷᠠᠭᠤ ᠠᠯᠳᠠᠷ ᠠᠪᠴᠢᠷᠠᠭᠰᠠᠨ ᠳ᠋ᠤ ᠪᠠᠨ ᠪᠠᠶᠠᠷᠯᠠᠳᠠᠭ ᠭᠡᠵᠦ ᠲᠡᠷᠡ ᠬᠡᠯᠡᠨ᠎ᠡ᠃

ᠵᠤᠤ ᠶᠤᠸᠠᠢ ᠲᠢᠩ ᠪᠦᠵᠢᠭ ᠲᠸ᠋ ᠴᠸ᠋ ᠠᠪᠢᠶᠠᠰ ᠲᠠᠢ᠃ ᠨᠢᠳᠤᠨᠤᠨ ᠵᠢᠯ 《ᠪᠦᠬᠦ ᠤᠯᠤᠰ᠎ᠤᠨ ᠲᠸᠯᠸᠢᠰ ᠦᠵᠡᠬᠦᠯᠭᠡ ᠵᠢᠨ ᠰᠢᠷᠢᠰ ᠠᠵᠢᠯᠯᠠᠭ᠎ᠠ》 ᠳ᠋ᠤ 《ᠰᠤᠳᠤᠨ ᠪᠦᠵᠢᠭᠴᠢᠨ》 ᠵᠢᠡᠷ ᠦᠨᠡᠯᠡᠭᠳᠡᠵᠦ᠂《ᠤᠷᠢ ᠵᠠᠯᠠᠭᠤ ᠲᠤᠮᠳᠠᠳᠤ ᠤᠯᠤᠰ·ᠤᠯᠠᠨ ᠤᠯᠤᠰ᠎ᠤᠨ ᠰᠢᠷᠢᠰ ᠠᠵᠢᠯᠯᠠᠭ᠎ᠠ》 ᠳ᠋ᠤ ᠰᠢᠯᠢᠳᠡᠭ ᠤᠷᠤᠯᠴᠠᠭᠴᠢ ᠪᠡᠷ ᠲᠤᠳᠤᠷᠠᠬᠰᠠᠨ ᠪᠠᠢᠯ᠎ᠠ᠃

ᠵᠤᠤ ᠶᠤᠸᠠᠢ ᠲᠢᠩ ᠪᠤᠯ ᠠᠩᠬᠢ᠎ᠶᠢᠨ᠎ᠢᠶᠡᠨ ᠠᠩᠭᠢ᠎ᠶᠢᠨ ᠲᠠᠷᠤᠭ᠎ᠠ ᠪᠤᠯᠤᠨ᠎ᠠ᠃ ᠲᠡᠷᠡ ᠲᠠᠮᠢᠷ ᠤᠷᠠᠯᠢᠭ ᠲᠸ᠋ ᠪᠠᠨ ᠠᠪᠢᠶᠠᠰ ᠲᠠᠢ ᠲᠡᠳᠦᠢ ᠦᠭᠡᠢ᠂ ᠭᠡᠷ ᠵᠠᠭᠤᠷ᠎ᠠ᠎ᠶᠢᠨ᠎ᠢᠶᠡᠨ ᠪᠤᠶᠤ ᠠᠩᠬᠢ ᠨᠡᠢᠳᠡ᠎ᠶᠢᠨ ᠠᠵᠢᠯ ᠬᠦᠳᠡᠯᠮᠦᠷᠢ᠎ᠳᠤ ᠢᠳᠡᠪᠬᠢᠳᠡᠢ ᠤᠷᠤᠯᠴᠠᠳᠠᠭ᠃ ᠡᠩ᠎ᠤᠨ ᠦᠶ᠎ᠡ ᠳ᠋ᠤ ᠠᠪᠤ ᠡᠵᠢ ᠪᠠᠨ ᠬᠠᠮᠵᠢᠨ ᠬᠤᠭᠤᠯᠠ ᠤᠮᠳᠠ ᠪᠠᠵᠠᠭᠠᠵᠤ᠂ ᠬᠦᠷᠢᠶ᠎ᠠ ᠬᠠᠰᠢᠶ᠎ᠠ ᠴᠡᠪᠡᠷᠯᠡᠳᠡᠭ᠃ ᠰᠤᠷᠭᠠᠭᠤᠯᠢ ᠳ᠋ᠤ ᠪᠠᠨ ᠨᠠᠢᠵᠠ ᠨᠦᠬᠦᠳ᠎ᠢᠶᠡᠨ ᠬᠠᠮᠵᠢᠨ ᠠᠩᠬᠢ ᠵᠢᠨ ᠬᠡᠷ ᠵᠢᠡᠨ ᠴᠡᠪᠡᠷᠯᠡᠬᠦ᠂ ᠪᠠᠬᠰᠢ ᠪᠠᠨ ᠬᠠᠮᠵᠢᠨ ᠬᠠᠮᠳᠤ ᠰᠤᠷᠤᠯᠭᠠᠳᠠᠳ᠎ᠢᠶᠡᠨ ᠲᠠᠭᠠᠭᠤᠯᠤᠨ ᠪᠦᠯᠬᠦᠮᠳᠡᠭᠦᠯᠵᠦ᠂ ᠠᠩᠬᠢ ᠨᠡᠢᠳᠡ᠎ᠶᠢᠨ ᠰᠠᠬᠢᠯᠭ᠎ᠠ ᠪᠠᠳᠤ ᠵᠢ ᠬᠢᠴᠢᠶᠡᠨ ᠵᠢᠷᠤᠮᠯᠠᠳᠠᠭ᠃ （ᠬᠡᠷᠡᠯ ᠵᠢᠷᠤᠭ᠎ᠢ ᠵᠤᠤ ᠶᠤᠸᠠᠢ ᠲᠢᠩ᠎ᠤᠨ ᠡᠵᠢ ᠬᠠᠩᠭᠠᠪᠠ）