— ᠮᠠᠨ᠎ᠤ ᠦ᠊ ᠵᠠᠬᠢᠷᠤᠯ ᠨᠠᠰᠤ ᠵᠠᠯᠠᠭᠤ ᠪᠤᠯᠪᠠᠴᠤ ᠠᠵᠢᠯ᠎ᠳᠦ ᠪᠠᠨ ᠭᠠᠷᠮᠠᠭᠠᠢ᠂ ᠰᠤᠷᠭᠠᠭᠤᠯᠢ᠎ᠶᠢᠨ ᠪᠦᠳᠦᠭᠡᠨ ᠪᠠᠢᠭᠤᠯᠤᠯᠳᠠ᠂ ᠰᠤᠷᠤᠭᠴᠢᠳ᠎ᠤᠨ ᠠᠮᠢᠳᠤᠷᠠᠯ ᠰᠤᠷᠤᠯᠭ᠎ᠠ᠂ ᠵᠠᠰᠠᠭ ᠵᠠᠬᠢᠷᠭᠠᠨ᠎ᠤ ᠠᠵᠢᠯ ᠭᠡᠳ ᠠᠯᠢ ᠪᠦᠬᠦᠨ᠎ᠢ ᠠᠮᠵᠢᠭᠤᠯᠵᠤ ᠶᠠᠪᠤᠳᠠᠭ ᠬᠠᠰᠢᠷ ᠨᠢᠭᠡᠨ ᠰᠢᠤ ！

— ᠳᠡᠢᠮᠦ ᠡ᠂ ᠪᠠᠭᠰᠢ ᠨᠠᠷ᠎ᠤᠨ ᠬᠦᠯᠦᠰᠦ ᠤᠯᠭᠤᠮᠵᠢ᠎ᠳᠦ ᠰᠠᠨᠠᠭ᠎ᠠ ᠳᠠᠯᠪᠢᠬᠤ ᠡᠴᠡ ᠭᠠᠳᠠᠨ᠎ᠠ᠂ ᠰᠤᠷᠤᠭᠴᠢᠳ᠎ᠤᠨ ᠠᠯᠢ ᠨᠢᠭᠡ ᠨᠢ ᠬᠦᠴᠢᠷᠳᠡᠯ ᠲᠠᠢ ᠪᠤᠯ ᠬᠠᠯᠠᠭᠤᠨ ᠭᠠᠷ᠎ᠢᠶᠡᠨ ᠰᠤᠩᠭᠠᠨ ᠳᠡᠮᠵᠢᠭᠰᠡᠨ ᠤᠳᠠᠭ᠎ᠠ᠎ᠴᠤ ᠪᠠᠭ᠎ᠠ ᠪᠤᠰᠤ ᠪᠠᠢᠳᠠᠭ ᠭᠡᠮᠡᠨ ᠰᠤᠷᠭᠠᠭᠤᠯᠢ᠎ᠶᠢᠨ ᠪᠠᠭᠰᠢ ᠨᠠᠷ ᠱᠠᠭᠰᠢᠵᠠᠭᠠᠨ᠎ᠠ᠃

ᠶᠠᠷᠢᠶᠠᠨ᠎ᠳᠡᠬᠢ ᠡᠨᠡ ᠬᠦᠮᠦᠨ᠎ᠢ ᠦᠯᠵᠡᠢᠮᠦᠢ᠍ᠷᠡᠨ ᠭᠡᠳᠡᠭ᠂ ᠠᠷᠤ ᠬᠤᠷᠴᠢᠨ ᠬᠤᠰᠢᠭᠤᠨ᠎ᠤ ᠤᠤᠭᠠᠯ᠂ ᠤᠳᠤ ᠠᠷᠤ ᠬᠤᠷᠴᠢᠨ ᠬᠤᠰᠢᠭᠤᠨ᠎ᠤ ᠬᠠᠨ ᠠᠭᠤᠯᠠ ᠪᠠᠭ᠎ᠠ ᠰᠤᠷᠭᠠᠭᠠᠤᠯᠢ᠎ᠶᠢᠨ ᠵᠠᠬᠢᠷᠤᠯ᠎ᠢᠶᠡᠷ ᠠᠵᠢᠯᠯᠠᠵᠤ ᠪᠤᠢ᠃ ᠳᠡᠷᠡ ᠪᠡᠷ 1998 ᠤᠨ᠎ᠳᠦ ᠲᠤᠰ ᠬᠤᠰᠢᠭᠤᠨ᠎ᠤ ᠪᠠᠶᠠᠨᠨ᠌ᠦ᠋ᠨᠳᠦᠷ ᠲᠤᠰᠠᠭᠠᠷ ᠳᠤᠮᠳᠠᠳᠤ ᠰᠤᠷᠭᠠᠭᠤᠯᠢ᠎ᠳᠦ ᠠᠵᠢᠯ᠎ᠤᠨ ᠭᠠᠷᠤᠭ᠎ᠠ ᠡᠯᠭᠦᠭᠰᠡᠨ ᠡᠴᠡ ᠡᠬᠢᠯᠡᠨ ᠬᠤᠷᠢ ᠭᠠᠷᠤᠢ ᠵᠢᠯ ᠦᠨᠳᠦᠰᠦᠨ ᠱᠠᠳᠤᠨ᠎ᠤ ᠰᠤᠷᠭᠠᠨ ᠬᠦᠮᠦᠵᠢᠯ᠎ᠤᠨ ᠦᠢᠯᠡᠰ ᠲᠸ᠋ ᠪᠡᠶ᠎ᠡ ᠰᠡᠳᠬᠢᠯ᠎ᠢᠶᠡᠨ ᠴᠢᠯᠡᠭᠡᠵᠦ ᠢᠷᠡᠭᠰᠡᠨ ᠴᠸ᠋ ᠡᠷᠬᠢᠴᠡᠬᠦᠯᠦᠯ᠎ᠤᠨ ᠬᠤᠷᠤᠮ ᠪᠦᠷᠢ ᠳ᠋ᠤ ᠨᠢ ᠢᠳᠡᠭᠡᠯ ᠵᠢᠳᠭᠦᠯ᠂ ᠢᠨᠢᠶᠡᠳᠦ ᠬᠦᠷ᠂ ᠠᠮᠵᠢᠯᠳᠠ ᠪᠦᠳᠦᠭᠡᠯ ᠵᠢᠭᠢᠷᠢᠭᠯᠡᠨ ᠦᠯᠡᠳᠡᠯ᠎ᠡ᠃

ᠤᠷᠭᠤᠭ᠎ᠠ ᠮᠤᠳᠤ ᠵᠠᠢᠯᠠᠵᠤ ᠡᠬᠡ ᠰᠤᠷᠭᠠᠭᠤᠯᠢ ᠪᠠᠨ ᠴᠢᠮᠡᠯ᠎ᠡ

ᠪᠠᠶᠠᠨᠨ᠌ᠦ᠋ᠨᠳᠦᠷ ᠲᠤᠰᠬᠠᠷ ᠳᠤᠮᠳᠠᠳᠤ ᠰᠤᠷᠭᠠᠭᠤᠯᠢ᠎ᠳᠦ ᠪᠠᠭᠰᠢᠯᠠᠭᠰᠠᠨ᠎ᠤ ᠬᠢᠨᠢ ᠬᠤᠶᠠᠳᠡᠭᠢ ᠵᠢᠯ᠎ᠤᠨ ᠶᠠᠪᠤᠳᠠᠯ ᠪᠢᠯᠡ᠃

ᠰᠤᠷᠭᠠᠭᠤᠯᠢ᠎ᠶᠢᠨ ᠬᠦᠷᠢᠶ᠎ᠡ ᠵᠢ ᠳᠤᠭᠤᠷᠢᠭᠠᠳ ᠶᠡᠷᠦ ᠨᠢ ᠶᠠᠭᠤ ᠨᠢᠭᠡ ᠳᠤᠳᠠᠭᠰᠠᠨ ᠰᠢᠭ᠋ ᠡᠯᠤᠢ ᠬᠤᠯᠤᠢ ᠰᠠᠨᠠᠬᠳᠠᠭᠠᠳ ᠪᠠᠢᠯ᠎ᠠ᠃《ᠡᠨᠳᠡ ᠡᠰᠡᠭᠦᠯ᠎ᠡ ᠬᠡᠳᠦᠨ ᠰᠠᠭᠤᠷᠢ ᠮᠤᠳᠤ ᠵᠠᠢᠯᠠᠴᠢᠬᠠᠪᠠᠯ ᠳᠡᠭᠡᠷ᠎ᠡ ᠪᠤᠯᠪᠠᠤ ？》ᠭᠡᠵᠦ ᠪᠤᠳᠤᠭᠰᠠᠨ ᠦ᠊ ᠪᠠᠭᠰᠢ ᠳᠤᠤᠷᠠᠬᠠᠨ᠎ᠢᠶᠡᠨ ᠭᠠᠷ ᠬᠦᠳᠡᠯᠦᠨ ᠬᠢᠪᠡ᠃ ᠳᠤᠬᠠᠢ᠎ᠶᠢᠨ ᠦᠶ᠎ᠡ᠎ᠳᠦ ᠦ᠊ ᠪᠠᠭᠰᠢ᠎ᠶᠢᠨ ᠬᠠᠷᠢᠭᠤᠴᠠᠭᠰᠠᠨ ᠠᠩᠬᠢ᠎ᠳᠦ 33 ᠰᠤᠷᠤᠭᠴᠢ ᠲᠠᠢ ᠪᠠᠢᠵᠠᠢ᠃ ᠡᠳᠡᠭᠡᠷ ᠬᠦᠭᠡᠷᠦᠬᠦᠨ ᠬᠡᠤᠬᠡᠳ᠎ᠤᠳ ᠬᠡᠨ ᠨᠢ ᠬᠡᠨ᠎ᠢᠶᠡᠨ ᠳᠠᠭᠤᠳᠠᠵᠤ ᠤᠷᠢᠶᠠᠯᠠᠭᠰᠠᠨ᠎ᠴᠤ ᠦᠭᠡᠢ ᠨᠢᠭᠡ ᠮᠡᠳᠡᠬᠦ᠎ᠳᠦ ᠪᠦᠬᠦᠨ᠎ᠢᠶᠡᠷ᠎ᠢᠶᠡᠨ ᠬᠦᠷᠦᠯᠴᠡᠨ ᠢᠷᠡᠵᠡᠭᠡᠪᠡ᠃

— ᠬᠡᠨ ᠬᠦᠮᠦᠨ᠎ᠴᠤ ᠵᠢᠭᠠᠵᠤ ᠳᠤᠬᠢᠵᠤ ᠱᠠᠭᠠᠷᠳᠠᠭᠰᠠᠨ ᠦᠭᠡᠢ᠂ ᠬᠦᠮᠦᠨ ᠪᠤᠯᠭᠠᠨ 3 ᠰᠠᠭᠤᠷᠢ ᠮᠤᠳᠤ ᠵᠢ ᠰᠠᠢᠨ ᠳᠤᠷ᠎ᠠ ᠡᠴᠡ ᠪᠠᠨ ᠵᠠᠢᠯᠠᠯ᠎ᠠ᠂ ᠳᠡᠭᠡᠵᠦ  ᠠᠩᠬᠠᠨ᠎ᠤ  99 ᠰᠠᠭᠤᠷᠢ ᠮᠤᠳᠤ ᠲᠠᠢ ᠪᠤᠯᠤᠭᠰᠠᠨ ᠭᠡᠵᠦ ᠦ᠊ ᠪᠠᠭᠰᠢ ᠡᠷᠭᠢᠴᠡᠭᠦᠯᠦᠯ᠎ᠤᠨ ᠬᠠᠭᠤᠳᠠᠰᠤ ᠪᠠᠨ ᠰᠡᠬᠦᠯ᠎ᠡ᠃

ᠵᠢᠷᠪᠢᠯᠵᠡᠨ ᠬᠠᠷᠠᠭᠳᠠᠬᠤ ᠳᠤᠷᠠᠳᠬᠠᠯ᠎ᠤᠨ ᠵᠢᠷᠤᠭ ᠡᠢᠨ᠎ᠬᠦ ᠳᠡᠯᠭᠡᠭᠳᠡᠵᠦ᠂ ᠳᠡᠭᠦᠨ᠎ᠳᠦ ᠨᠢ ᠬᠡᠤᠬᠡᠳ᠎ᠤᠨ ᠴᠠᠢᠯᠭᠠᠨ ᠴᠠᠭᠠᠪᠤᠷ᠂ ᠪᠠᠭᠰᠢ ᠨᠠᠷ᠎ᠤᠨ ᠦᠨᠡᠨᠴᠢᠬᠡᠨ ᠵᠢᠳᠭᠦᠯ ᠲᠤᠷᠠᠢᠵᠤ ᠪᠠᠢᠯ᠎ᠠ᠃

ᠦᠨᠳᠦᠷ ᠠᠭᠤᠯᠠ᠎ᠶᠢᠨ ᠬᠦᠳᠦᠯ ᠵᠤᠷᠢᠯ᠎ᠠ

ᠳᠡᠭᠷᠢ᠎ᠳᠦ ᠨᠤᠬᠠᠢ ᠳᠤᠯᠢᠶᠠᠮᠠᠷ ᠡᠭᠦᠯᠡ ᠦᠭᠡᠢ ᠴᠡᠯᠮᠡᠭᠦᠨ ᠳᠤᠩᠭᠠᠯᠠᠭ ᠨᠢᠭᠡ ᠡᠳᠦᠷ ᠪᠠᠢᠯ᠎ᠠ᠃ ᠴᠤᠩᠬᠤᠨ ᠵᠠᠪᠰᠠᠷ᠎ᠢᠶᠡᠷ ᠰᠡᠷᠢᠭᠦᠨ ᠰᠠᠯᠬᠢ ᠰᠡᠷ ᠰᠡᠷ ᠦᠯᠢᠶᠡᠵᠦ ᠰᠡᠳᠬᠢᠯ ᠰᠡᠷᠭᠦᠭᠡᠨ᠎ᠡ᠃ ᠦ᠊ ᠪᠠᠭᠰᠢ ᠬᠢᠴᠢᠶᠡᠯ ᠤᠷᠤᠵᠤ ᠪᠠᠢᠬᠤ᠎ᠳᠦ ᠨᠢᠭᠡ ᠬᠡᠦᠬᠡᠨ ᠰᠤᠷᠤᠭᠴᠢ ᠴᠤᠩᠬᠤ ᠪᠡᠷ ᠬᠤᠯᠠ᠎ᠶᠢᠨ ᠠᠭᠤᠯᠠ ᠵᠢ ᠬᠠᠷᠠᠭᠠᠳ ᠮᠡᠯᠡᠷᠡᠨ᠎ᠡ᠃

— ᠳᠡᠷᠡ ᠦᠨᠳᠦᠷ ᠠᠭᠤᠯᠠᠨ᠎ᠳᠦ ᠭᠠᠷᠴᠤ ᠮᠤᠳᠤ ᠠᠪᠠᠷᠢᠬᠤ ᠵᠢ ᠶᠡᠬᠡ ᠬᠦᠰᠡᠳᠡᠭ ᠪᠠᠢᠬᠤ ᠡ᠂ ᠳᠠᠩᠳᠠ ᠳᠡᠭᠡᠭᠡᠳ ᠮᠡᠯᠡᠷᠡᠳᠡᠭ ᠬᠡᠦᠬᠡᠳ ᠪᠠᠢᠯ᠎ᠠ ᠭᠡᠵᠦ ᠦ᠊ ᠪᠠᠭᠰᠢ ᠢᠨᠢᠶᠡᠭᠰᠡᠨ᠎ᠢᠶᠡᠨ ᠵᠤᠭᠤᠭ᠎ᠢᠶᠡᠨ ᠳᠡᠯᠭᠡᠨ᠎ᠡ᠃

ᠬᠢᠴᠢᠶᠡᠯ ᠲᠠᠭᠤᠰᠴᠤ ᠬᠤᠭᠤᠴᠠᠭ᠎ᠠ ᠳᠠᠷᠬᠠᠬᠤ᠎ᠶᠢᠨ ᠦᠶ᠎ᠡ ᠪᠡᠷ ᠦ᠊ ᠪᠠᠭᠰᠢ ᠦᠪᠡᠷ᠎ᠤᠨ ᠤᠨᠤᠳᠠᠭ ᠬᠠᠭᠤᠴᠢᠨ ᠮᠤᠲ᠋ᠤᠷ᠎ᠢᠶᠡᠨ ᠭᠦᠶᠦᠯᠭᠡᠵᠦ ᠠᠩᠬᠢ᠎ᠶᠢᠨ ᠬᠡᠤᠬᠡᠳ᠎ᠢᠶᠡᠨ ᠬᠤᠶᠠᠷ ᠬᠤᠶᠠᠷ᠎ᠢᠶᠡᠷ ᠨᠢᠭᠡ ᠳᠤᠭᠤᠢᠯᠠᠩ ᠪᠤᠯᠭᠠᠵᠤ ᠮᠤᠲ᠋ᠤᠷ᠎ᠲᠦ ᠪᠠᠨ ᠰᠤᠨᠳᠠᠯᠠᠭᠠᠳ ᠦᠨᠦ ᠠᠭᠤᠯᠠᠨ ᠤᠷᠤᠢ᠎ᠳᠦ ᠭᠠᠷᠭᠠᠭᠰᠠᠨ ᠭᠡᠨ᠎ᠡ᠃ 《ᠠᠯᠳᠠᠨ ᠡᠮᠡᠭᠡᠯ》 ᠭᠡᠳᠡᠭ ᠦᠨᠳᠦᠷ ᠠᠭᠤᠯᠠ᠎ᠶᠢᠨ ᠤᠷᠤᠢ᠎ᠳᠦ ᠬᠡᠦᠬᠡᠳ᠎ᠤᠳ ᠵᠤᠭᠰᠤᠭᠠᠳ ᠠᠯᠤᠰ᠎ᠢ ᠪᠠᠷᠠᠯᠠᠨ᠎ᠠ᠂ ᠦᠰᠦᠷᠬᠢᠯᠡᠨ᠎ᠡ᠂ ᠲᠠᠭᠤᠯᠠᠨ᠎ᠠ᠂ ᠠᠭᠯᠠᠭ ᠲᠠᠯ᠎ᠠ ᠵᠢ ᠲᠦᠭᠦᠷᠳᠡᠯ᠎ᠡ ᠬᠦᠬᠡᠷᠦᠯᠳᠦᠵᠡᠢ ᠁

— ᠳᠡᠷᠡ ᠡᠳᠦᠷ᠎ᠤᠨ ᠳᠤᠩᠭᠠᠯᠠᠭ᠂ ᠳᠡᠳᠡᠭᠡᠷ ᠬᠡᠦᠬᠡᠳ᠎ᠤᠨ ᠴᠠᠯᠬᠢᠮ᠎ᠠ ᠢᠨᠢᠶᠡᠳᠦ᠂ ᠲᠡᠷᠡ ᠬᠤᠯᠠ᠎ᠶᠢᠨ  ᠬᠦᠭᠡᠷᠦᠬᠦᠨ ᠮᠦᠷᠦᠭᠡᠳᠦᠯ᠎ᠤᠳ ᠴᠤᠬᠤᠮ ᠪᠠᠶᠠᠷ ᠪᠠᠬᠠᠳᠤᠯ᠂ ᠬᠦᠰᠡᠯ ᠲᠡᠮᠡᠤᠯᠤᠯ ᠭᠡᠭᠴᠢ ᠶᠠᠭᠤ ᠪᠤᠯᠬᠤ ᠵᠢ ᠨᠠᠳᠠ ᠶᠠᠷᠢᠭᠰᠠᠨ᠃ ᠢᠩᠬᠢᠵᠦ ᠪᠠᠬᠰᠢ ᠰᠤᠷᠤᠬᠴᠢ ᠪᠢᠳᠡ ᠬᠠᠮᠳᠤ ᠪᠠᠷ ᠪᠠᠢᠩᠭᠤ ᠨᠠᠭᠠᠳᠴᠤ ᠲᠤᠭᠯᠠᠵᠤ᠂ ᠬᠦᠭᠰᠡᠵᠦ ᠲᠤᠬᠳᠤᠯᠵᠤ ᠶᠠᠪᠤᠯ᠎ᠠ ᠭᠡᠮᠡᠨ ᠦ᠊ ᠪᠠᠭᠰᠢ ᠤᠶᠠᠷᠠᠩᠬᠠᠨ ᠶᠠᠷᠢᠨ᠎ᠠ᠃

ᠨᠤᠮ᠎ᠢᠶᠡᠷ ᠭᠡᠭᠡᠷᠡᠭᠦᠯᠦᠨ᠎ᠡ

2017 ᠤᠨ᠎ᠳᠦ᠂ ᠦ᠊ ᠪᠠᠬᠰᠢ ᠪᠠᠯᠴᠢᠷᠤᠳ ᠰᠤᠷᠭᠠᠭᠤᠯᠢ᠎ᠳᠦ ᠠᠵᠢᠯᠯᠠᠵᠤ ᠪᠠᠢᠭ᠎ᠠ ᠬᠤᠭᠤᠴᠠᠭᠠᠨ᠎ᠳᠦ ᠪᠠᠨ ᠬᠤᠰᠢᠭᠤᠨ᠎ᠤ《ᠬᠦᠳᠡᠭᠡ ᠳᠤᠰᠬᠤᠨ᠎ᠤ ᠪᠠᠭᠠᠴᠤᠳ᠎ᠤᠨ ᠤᠷᠳᠤᠨ᠎ᠢ ᠪᠦᠳᠦᠭᠡᠨ ᠪᠠᠢᠭᠤᠯᠬᠤ ᠳᠦᠯᠦᠪᠯᠡᠭᠡ》 ᠶ᠋ᠢᠨ ᠳᠡᠮᠵᠢᠯᠭᠡ ᠪᠡᠷ ᠰᠤᠷᠭᠠᠭᠤᠯᠢ᠎ᠳᠦ ᠪᠠᠨ ᠨᠤᠮ᠎ᠤᠨ ᠰᠠᠩ ᠪᠠᠢᠭᠤᠯᠵᠠᠢ᠃

— ᠨᠢᠭᠡ ᠰᠤᠷᠭᠠᠭᠤᠯᠢ᠎ᠶᠢᠨ ᠴᠢᠨᠠᠷ ᠴᠢᠨᠰᠠᠭ᠎ᠠ ᠵᠢ ᠠᠰᠠᠷ ᠪᠠᠷᠢᠯᠭ᠎ᠠ᠎ᠶᠢᠨ ᠭᠤᠤ᠎ᠠ ᠰᠠᠢᠬᠠᠨ᠎ᠢᠶᠡᠷ ᠪᠢᠰᠢ᠂ ᠬᠠᠷᠢᠨ ᠪᠠᠭᠰᠢ᠎ᠶᠢᠨ ᠡᠩᠨᠡᠭᠡ ᠪᠤᠯᠤᠨ ᠨᠤᠮ᠎ᠤᠨ ᠰᠠᠩ᠎ᠢᠶᠡᠷ ᠪᠠᠷᠢᠮᠵᠢᠶᠠᠯᠠᠬᠤ ᠶᠤᠰᠤᠳᠠᠢ ᠭᠡᠵᠦ ᠦ᠊ ᠪᠠᠭᠰᠢ ᠦᠪᠡᠷ᠎ᠤᠨ ᠪᠠᠷᠢᠮᠳᠠᠯᠠᠯ᠎ᠢᠶᠡᠨ ᠶᠠᠷᠢᠨ᠎ᠠ᠃

ᠬᠡᠳᠦᠨ ᠳᠠᠯ᠎ᠠ᠎ᠶᠢᠨ ᠳᠤᠬᠢᠷᠠᠭᠤᠯᠤᠯᠳᠠ ᠳᠤᠤᠷ᠎ᠠ᠂ ᠪᠠᠯᠴᠢᠷᠤᠳ ᠰᠤᠷᠭᠠᠭᠤᠯᠢ᠎ᠳᠦ ᠰᠤᠷᠭᠠᠭᠤᠯᠢ᠎ᠶᠢᠨ ᠪᠦᠬᠦ ᠰᠤᠷᠤᠭᠴᠢᠳ᠎ᠢ ᠪᠠᠭᠳᠠᠭᠠᠵᠤ ᠳᠡᠢᠯᠬᠦ ᠳᠤᠰᠬᠠᠢ ᠨᠤᠮ᠎ᠤᠨ ᠰᠠᠩ ᠲᠠᠢ ᠪᠤᠯᠤᠭᠰᠠᠨ ᠪᠦᠭᠡᠳ ᠠᠩᠬᠢ ᠪᠤᠯᠭᠠᠨ ᠨᠤᠮ ᠲᠠᠢ᠂ ᠵᠢᠭᠠᠨ ᠰᠤᠷᠭᠠᠯᠳᠠ᠎ᠶᠢᠨ ᠠᠰᠠᠷ᠎ᠤᠨ ᠦᠨᠴᠦᠭ ᠪᠤᠯᠤᠩ ᠪᠦᠬᠦᠨ᠎ᠳᠦ ᠨᠤᠮ ᠲᠠᠢ ᠪᠤᠯᠤᠭᠰᠠᠨ ᠶᠤᠮ᠃

— ᠦᠨᠦ ᠵᠢᠯ ᠬᠠᠨ ᠠᠭᠤᠯᠠ ᠪᠠᠭ᠎ᠠ ᠰᠤᠷᠭᠠᠭᠤᠯᠢ᠎ᠳᠦ ᠠᠵᠢᠯ ᠰᠢᠯᠵᠢᠨ ᠢᠷᠡᠭᠰᠡᠨ᠎ᠤ ᠳᠠᠷᠠᠭ᠎ᠠ ᠪᠢ  ᠨᠤᠮ᠎ᠤᠨ ᠰᠠᠩ᠎ᠤᠨ ᠪᠦᠳᠦᠭᠡᠨ ᠪᠠᠢᠭᠤᠯᠤᠯᠳᠠ ᠵᠢ ᠳᠡᠷᠢᠭᠦᠨ ᠪᠠᠢᠷᠢᠨ᠎ᠳᠦ ᠳᠠᠯᠪᠢᠵᠤ ᠪᠠᠢᠨ᠎ᠠ᠃ ᠰᠤᠷᠤᠭᠴᠢᠳ᠎ᠢᠶᠡᠨ ᠭᠠᠷ ᠬᠦᠷᠦᠭᠰᠡᠨ ᠭᠠᠵᠠᠷ ᠪᠤᠯᠭᠠᠨ᠎ᠳᠦ ᠨᠤᠮ ᠲᠠᠢ᠂ ᠰᠡᠯᠡᠭᠦᠦ ᠴᠠᠭ ᠪᠤᠯᠭᠠᠨ ᠨᠤᠮ ᠲᠠᠢ ᠬᠠᠮᠳᠤ ᠪᠠᠢᠯᠴᠠᠬᠤ ᠰᠠᠢᠬᠠᠨ ᠳᠠᠳᠬᠠᠯ ᠲᠠᠢ ᠬᠦᠮᠦᠵᠢᠭᠦᠯᠬᠦ ᠪᠤᠯ ᠮᠢᠨᠤ ᠬᠦᠭᠡᠭᠡᠴᠡᠯᠳᠦᠯ ᠭᠡᠵᠦ ᠦ᠊ ᠪᠠᠭᠰᠢ ᠶᠠᠷᠢᠶ᠎ᠠ ᠪᠠᠨ ᠦᠷᠬᠦᠯᠵᠢᠯᠡᠭᠦᠯᠦᠨ᠎ᠡ᠃

ᠬᠢᠴᠢᠶᠡᠯ ᠡᠴᠡ ᠪᠠᠨ ᠡᠷᠳᠡ ᠢᠷᠡᠭᠰᠡᠨ ᠬᠡᠦᠬᠡᠳ᠎ᠤᠳ ᠰᠤᠷᠭᠠᠭᠤᠯᠢ᠎ᠶᠢᠨ ᠡᠭᠦᠳᠡᠨ ᠳᠡᠭᠡᠷ᠎ᠡ ᠳᠡᠮᠡᠢᠷᠡᠵᠦ ᠵᠤᠭᠰᠤᠬᠤ ᠨᠢ ᠴᠦᠬᠡᠷᠡᠵᠦ ᠬᠤᠶᠠᠷ ᠭᠤᠷᠪᠠ ᠪᠡᠷ ᠨᠤᠮ᠎ᠤᠨ ᠰᠠᠩ ᠵᠦᠭ ᠴᠤᠪᠤᠷᠠᠯᠳᠤᠬᠤ ᠪᠤᠯᠤᠭᠰᠠᠨ ᠨᠢ ᠦ᠊ ᠪᠠᠭᠰᠢ᠎ᠶᠢᠨ ᠪᠠᠰᠠ ᠨᠢᠭᠡᠨ ᠪᠠᠬᠠᠳᠤᠯ ᠪᠤᠯᠵᠠᠢ᠃

ᠬᠤᠯᠠ ᠶᠠᠪᠤᠵᠤ ᠬᠤᠷᠸ᠎ᠠ ᠵᠢ ᠲᠠᠨᠢᠭᠤᠯᠤᠨ᠎ᠠ

ᠰᠤᠷᠤᠭᠴᠢᠳ᠎ᠤᠨ᠎ᠢᠶᠡᠨ ᠬᠤᠯᠠ ᠶᠠᠪᠤᠵᠤ ᠬᠤᠷᠸ᠎ᠠ ᠵᠢ ᠲᠠᠨᠢᠬᠤ᠂ ᠤᠯᠠᠨ᠎ᠢ ᠦᠵᠡᠵᠦ ᠨᠢᠳᠦ ᠨᠡᠭᠡᠬᠡᠬᠦ ᠵᠢ ᠦ᠊ ᠪᠠᠬᠰᠢ ᠮᠠᠰᠢ ᠴᠢᠬᠤᠯᠠᠴᠢᠯᠠᠳᠠᠭ᠃

2019 ᠤᠨ᠎ᠳᠦ᠂ ᠲᠡᠷᠡ ᠪᠡᠷ 60 ᠭᠠᠷᠤᠢ ᠬᠡᠦᠬᠡᠳ ᠲᠠᠢ ᠪᠠᠨ ᠬᠠᠮᠳᠤ ᠪᠡᠭᠡᠵᠢᠩ ᠬᠤᠳᠠ ᠵᠢ ᠵᠤᠷᠢᠵᠤ᠂ ᠤᠷᠳᠤ ᠴᠠᠭᠠᠨ ᠬᠡᠷᠡᠮ᠂ ᠲᠢᠶᠠᠨ ᠠᠨ ᠮᠸᠨ ᠠᠭᠤᠳᠠᠮ ᠳᠠᠯᠠᠪᠠᠢ ᠪᠡᠷ ᠳᠤᠭᠤᠷᠢᠵᠤ᠂ ᠦᠰᠪᠦᠷᠢ᠎ᠶᠢᠨ ᠪᠠᠭᠠᠴᠤᠳ ᠲᠸ᠋ ᠡᠬᠡ ᠤᠯᠤᠰ᠎ᠤᠨ᠎ᠢᠶᠡᠨ ᠪᠠᠶᠠᠨ ᠬᠦᠴᠦᠷᠭᠡᠭ᠂ ᠦᠩ ᠲᠠᠩᠰᠤᠭ᠎ᠢ ᠮᠡᠳᠡᠷᠡᠭᠦᠯᠪᠡ᠃ ᠦᠩᠭᠡᠷᠡᠭᠰᠡᠨ᠎ᠳᠦ ᠦ᠊ ᠪᠠᠭᠰᠢ ᠪᠠᠰᠠ ᠭᠤᠷᠪᠠᠨ ᠭᠠᠴᠠᠭᠠᠨ᠎ᠤ ᠶᠠᠳᠠᠭᠤ ᠡᠴᠡ ᠠᠩᠬᠢᠵᠢᠷᠠᠭᠤᠯᠬᠤ ᠠᠵᠢᠯ᠎ᠳ᠋ᠤ ᠤᠷᠤᠯᠴᠠᠵᠤ ᠪᠠᠢᠵᠠᠢ᠃ ᠭᠠᠴᠠᠭᠠᠨ᠎ᠤ ᠨᠠᠮ᠎ᠤᠨ ᠡᠭᠦᠷ ᠲᠠᠢ ᠬᠠᠮᠵᠢᠨ ᠶᠠᠳᠠᠭᠤ ᠬᠦᠴᠢᠷᠳᠡᠯᠳᠡᠢ ᠠᠢᠯ᠎ᠢ ᠳᠤᠰᠠᠯᠠᠵᠤ ᠳᠡᠮᠵᠢᠬᠦ ᠡᠴᠡ ᠭᠠᠳᠠᠨ᠎ᠠ᠂ ᠰᠤᠷᠤᠭᠴᠢᠳ᠎ᠢᠶᠡᠨ ᠳᠠᠭᠠᠭᠤᠯᠤᠨ ᠳᠤᠬᠠᠢ᠎ᠶᠢᠨ ᠭᠠᠵᠠᠷ᠎ᠲᠦ ᠤᠷᠠᠨ ᠰᠠᠢᠬᠠᠨ᠎ᠤ ᠲᠤᠭᠯᠠᠯᠳᠠ ᠭᠠᠷᠭᠠᠵᠤ ᠬᠢᠴᠢᠶᠡᠯ᠎ᠤᠨ ᠭᠠᠳᠠᠨᠠᠬᠢ ᠠᠮᠢᠳᠤᠷᠠᠯ᠎ᠢ ᠨᠢ ᠪᠠᠶᠠᠯᠢᠭᠵᠢᠭᠤᠯᠵᠤ ᠪᠠᠢᠯ᠎ᠠ᠃ ᠤᠯᠠᠨ᠎ᠢ ᠦᠵᠡᠵᠦ ᠨᠢᠳᠦ ᠨᠡᠭᠡᠭᠡᠭᠰᠡᠨ ᠬᠡᠦᠬᠡᠳ᠎ᠤᠳ ᠵᠤᠬᠢᠶᠠᠨ ᠪᠢᠴᠢᠯᠭᠡ ᠪᠠᠨ᠎ᠴᠤ ᠦᠷᠭᠡᠨ ᠬᠠᠷᠠᠭᠠᠰᠤ ᠲᠠᠢ ᠪᠢᠴᠢᠬᠦ ᠪᠤᠯᠤᠭᠰᠠᠨ ᠨᠢ ᠦ᠊ ᠪᠠᠭᠰᠢ᠎ᠶᠢᠨ ᠪᠠᠰᠠ ᠨᠢᠭᠡᠨ ᠪᠠᠬᠠᠷᠬᠠᠯ ᠪᠤᠯᠤᠭᠰᠠᠨ ᠪᠢᠯᠡ᠃ ᠡᠢᠨ᠎ᠬᠦ ᠠᠵᠢᠯ᠎ᠳᠦ ᠪᠠᠨ ᠬᠠᠷᠢᠭᠤᠴᠠᠯᠭ᠎ᠠ ᠲᠠᠢ ᠦ᠊ ᠪᠠᠭᠰᠢ ᠮᠠᠨᠢ ᠦᠨᠦ ᠵᠢᠯ᠎ᠤᠨ ᠤᠯᠠᠭᠠᠨᠬᠠᠳᠠ ᠬᠤᠳᠠ᠎ᠶᠢᠨ ᠨᠠᠢ᠍ᠮᠠᠳᠤᠭᠠᠷ ᠬᠤᠭᠤᠴᠠᠭᠠᠨ᠎ᠤ ᠠᠷᠠᠳ᠎ᠤᠨ ᠲᠦᠯᠦᠭᠡᠯᠡᠭᠴᠢᠳ᠎ᠤᠨ ᠶᠡᠬᠡ ᠬᠤᠷᠠᠯ ᠎ᠳ᠋ᠸ᠋ ᠬᠤᠰᠢᠭᠤᠨ᠎ᠤ ᠪᠠᠨ ᠴᠤᠷ᠎ᠤᠨ ᠭᠠᠭᠴᠠ ᠰᠤᠷᠭᠠᠨ ᠬᠦᠮᠦᠵᠢᠯ᠎ᠤᠨ ᠰᠢᠰᠲᠸᠮ᠎ᠤᠨ ᠲᠦᠯᠦᠭᠡᠯᠡᠭᠴᠢ᠎ᠶᠢᠨ ᠬᠤᠪᠢ ᠪᠡᠷ ᠤᠷᠤᠯᠴᠠᠭᠰᠠᠨ ᠶᠤᠮ᠃

— ᠪᠠᠭᠰᠢ ᠬᠦᠮᠦᠨ ᠪᠤᠯᠤᠭᠰᠠᠨ᠎ᠤ ᠬᠤᠪᠢ᠎ᠳᠦ ᠬᠠᠮᠢᠶᠠᠷᠤᠯᠳᠠ᠂ ᠵᠢᠭᠠᠨ ᠰᠤᠷᠭᠠᠯᠳᠠ᠎ᠶᠢᠨ ᠤᠷ᠎ᠠ ᠴᠢᠳᠠᠪᠤᠷᠢ ᠪᠠᠨ ᠲᠠᠰᠤᠷᠠᠯᠳᠠ ᠦᠭᠡᠢ ᠳᠡᠭᠡᠭᠰᠢᠯᠡᠭᠦᠯᠵᠦ᠂ ᠨᠡᠢᠭᠡᠮ ᠵᠢᠷᠤᠮ᠎ᠤᠨ ᠰᠢᠯᠢᠳᠡᠭ ᠵᠠᠯᠭᠠᠮᠵᠢᠯᠠᠭᠴᠢ ᠵᠢ ᠬᠦᠮᠦᠵᠢᠭᠦᠯᠬᠦ ᠪᠡᠷ ᠴᠠᠭ ᠢᠮᠠᠭᠳᠠ ᠴᠢᠷᠮᠠᠢᠨ᠎ᠠ ᠭᠡᠵᠦ ᠦ᠊ ᠵᠠᠬᠢᠷᠤᠯ ᠢᠳᠡᠭᠡᠯ ᠳᠡᠭᠦᠯᠳᠡᠷ ᠶᠠᠷᠢᠵᠤ ᠪᠠᠢᠯ᠎ᠠ᠃