《ᠵᠢᠯᠣᠭᠣᠳᠬᠤ ᠲᠥᠪ᠂ ᠪᠢ ᠬᠢᠯᠢᠳ᠋ᠦ᠍ ᠣᠷᠣᠬᠤ 2 ᠨᠣᠮᠧᠷᠲᠦ ᠨᠡᠪᠲᠡᠷᠡᠬᠦ ᠵᠠᠮᠳᠤ ᠪᠤᠢ᠂ ᠣᠶᠤᠨᠲᠤ ᠪᠤᠭᠤᠮᠲᠠᠶᠢᠨ ᠰᠢᠰᠲ᠋ᠧᠮᠦ᠋ᠨ ᠠᠵᠢᠯᠯᠠᠭᠠ ᠬᠡᠪᠦ᠋ᠨ ᠡᠰᠡᠬᠦᠶ᠋ᠢ ᠪᠠᠢᠴᠠᠭᠠᠭᠠᠷᠠᠢ︕》 ᠯᠢ ᠵᠧᠨ ᠮᠢᠨ ᠨᠢᠭᠡ ᠭᠠᠷᠢ᠋ᠶ᠋ᠠᠷᠢ᠋ᠶ᠋ᠠᠨ ᠡᠯᠧᠺᠲ᠋ᠷᠣᠨ ᠲᠡᠷᠭᠡᠨ ᠺᠠᠷᠲᠢ᠋ ᠡᠭᠦᠳᠡ ᠮᠠᠶᠢᠭᠤ᠋ᠨ ᠪᠣᠰᠤᠭᠠ ᠲᠤᠯᠭᠠᠭᠤᠷᠢ ᠲᠡᠭᠡᠷᠡᠬᠢ ᠺᠠᠷᠲ ᠤᠩᠰᠢᠬᠤ ᠮᠠᠰᠢᠨᠳᠤ ᠤᠢᠷᠠᠳᠤᠭᠤᠯᠤᠨ ᠤᠩᠰᠢᠭᠤᠯᠵᠤ᠂ ᠨᠥᠭᠥᠭᠡ ᠭᠠᠷᠢ᠋ᠶ᠋ᠠᠷᠢ᠋ᠶ᠋ᠠᠨ ᠶᠠᠷᠢᠯᠴᠠᠭᠤᠷ ᠮᠠᠰᠢᠨᠢᠶᠡᠨ ᠪᠠᠷᠢᠵᠤ ᠵᠢᠯᠤᠭᠤᠳᠬᠤ ᠲᠦᠪ ᠲᠠᠢ ᠬᠠᠷᠢᠯᠴᠠᠨᠠ᠃
《ᠰᠢᠰᠲ᠋ᠧᠮᠦ᠋ᠨ ᠠᠵᠢᠯᠯᠠᠭᠠ ᠬᠡᠪᠦ᠋ᠨ ᠪᠠᠢᠨᠠ᠂ ᠳᠠᠷᠠᠭᠠ ᠨᠢᠭᠡ ᠭᠠᠵᠠᠷᠲᠤ᠌ ᠣᠴᠢᠭᠠᠷᠠᠢ ᠁》 ᠴᠠᠭᠠᠨ ᠰᠠᠷᠠᠶ᠋ᠢᠨ ᠰᠢᠨᠡᠶ᠋ᠢᠨ ᠶᠢᠰᠦᠨᠤ ᠦᠷᠯᠦᠭᠡ ᠡᠷᠲᠡ᠂ ᠲᠡᠭᠷᠢ ᠪᠠᠰᠠ ᠭᠦᠢᠴᠡᠳ ᠬᠡᠭᠡᠷᠡᠭᠡᠳᠦᠢ ᠪᠠᠢᠬᠤᠳᠤ᠂ ᠤᠷᠠᠳ ᠪᠣᠭᠣᠮᠲᠠᠶ᠋ᠢᠨ ᠨᠢᠭᠡᠳᠦᠭᠡᠷ ᠹᠷᠣᠨᠲᠤ᠋ᠨ ᠵᠢᠵᠢᠭᠦᠷᠯᠡᠭᠴᠢ ᠯᠢ ᠵᠧᠨ ᠮᠢᠨ ᠪᠣᠯᠤᠨ ᠳ᠋ᠤᠸᠠᠨ ᠰᠢᠨ ᠢᠦᠢ ᠭᠠᠭᠴᠠᠮᠤᠳᠤ ᠬᠢᠯᠢᠶᠢᠨ ᠪᠤᠭᠤᠮᠲᠠᠶᠢᠨ ᠪᠠᠷᠠᠭᠠᠨᠤ᠋ ᠲᠡᠭᠡᠭᠡᠪᠦᠷᠢᠶ᠋ᠢᠨ ᠵᠠᠮᠳ᠋ᠤ᠌ ᠣᠷᠣᠵᠤ᠂ ᠬᠢᠨᠠᠨ ᠬᠠᠮᠢᠶᠠᠷᠤᠯᠲᠠᠶ᠋ᠢᠨ ᠡᠯᠡ ᠲᠥᠷᠥᠯᠦ᠋ᠨ ᠲᠥᠬᠥᠭᠡᠷᠦᠮᠵᠢᠶ᠋ᠢᠨ ᠠᠵᠢᠯᠯᠠᠭᠠᠨᠤ᠋ ᠪᠠᠢᠳᠠᠯᠢ᠋ ᠪᠠᠢᠴᠠᠭᠠᠨ᠂ ᠤᠳᠠᠯ ᠥᠬᠡᠢ ᠬᠢᠯᠢᠪᠡᠷ ᠣᠷᠣᠵᠤ ᠢᠷᠡᠬᠦ ᠭᠡᠵᠦ ᠪᠠᠢᠭᠠ ᠪᠠᠷᠠᠭᠠᠨᠤ᠋ ᠲᠡᠭᠡᠭᠡᠪᠦᠷᠢᠶ᠋ᠢᠨ ᠲᠡᠷᠭᠡ ᠬᠥᠰᠬᠡᠳ᠋ᠦ᠍ 《ᠵᠠᠮ ᠨᠡᠭᠡᠭᠡᠵᠦ》 ᠥᠭᠭᠦᠨᠡ᠃
ᠡᠯᠧᠺᠲ᠋ᠷᠣᠨ ᠲᠡᠷᠭᠡᠨ ᠺᠠᠷᠲ ᠨᠢ ᠳᠠᠷᠤᠢ ᠠᠴᠢᠶᠠ ᠲᠡᠭᠡᠭᠡᠪᠦᠷᠢᠶ᠋ᠢᠨ ᠮᠠᠰᠢᠨ ᠲᠡᠷᠭᠡᠨᠦ᠌ ︽ᠪᠡᠶᠡᠶ᠋ᠢᠨ ᠦᠨᠡᠮᠯᠡᠯ︾ ᠪᠣᠯᠤᠨᠠ᠂ ᠨᠢᠭᠡ ᠲᠡᠷᠭᠡ ᠨᠢᠭᠡ ᠺᠠᠷᠲ ᠲᠠᠢ ᠪᠠᠢᠵᠤ᠂ ᠵᠢᠯᠤᠭᠤᠴᠢᠳ ᠲᠤᠰ ᠺᠠᠷᠲᠢᠶᠡᠷᠢᠶᠡᠨ ᠬᠢᠯᠢᠶᠢᠨ ᠪᠤᠭᠤᠮᠳᠠ ᠪᠡᠷ ᠲᠦᠷᠭᠡᠨ ᠨᠡᠪᠲᠡᠷᠡᠬᠦᠶ᠋ᠢ ᠪᠡᠶᠡᠯᠡᠭᠦᠯᠵᠦ ᠴᠢᠳᠠᠨᠠ᠃ 《ᠪᠢᠲᠡ ᠰᠢᠨᠡᠶᠢᠨ ᠲᠦᠷᠪᠡᠨᠡᠴᠡ ᠲᠠᠷᠤᠢ ᠡᠬᠢᠯᠡᠨ ᠠᠵᠢᠯᠯᠠᠵᠤ᠂ ᠦᠷᠯᠦᠭᠡ ᠪᠦᠷᠢ ᠨᠢᠭᠡ ᠤᠳᠠᠭᠠ ᠲᠤᠨᠤᠭ ᠲᠦᠬᠦᠭᠡᠷᠦᠮᠵᠢ ᠪᠠᠨ ᠪᠠᠢᠴᠠᠭᠠᠳᠠᠭ᠂ ᠡᠷᠬᠡᠪᠰᠢ ᠲᠡᠭᠡᠭᠡᠪᠦᠷᠢᠶᠢᠨ ᠮᠠᠰᠢᠨᠤ ᠰᠠᠭᠠᠳ ᠦᠭᠡᠢ ᠪᠤᠭᠤᠮᠳᠠ ᠪᠡᠷ ᠦᠩᠭᠡᠷᠡᠬᠦᠵᠢ ᠪᠠᠳᠤᠯᠠᠬᠤ ᠬᠡᠷᠡᠭᠲᠡᠢ》 ᠬᠡᠮᠡᠨ ᠯᠢ ᠵᠧᠨ ᠮᠢᠨ ᠢᠨᠢᠶᠡᠮᠰᠦᠭᠯᠡᠨ ᠬᠡᠯᠡᠨᠡ᠃ 8 ᠴᠠᠭᠲᠤ᠌ ᠲᠡᠷᠭᠡ ᠨᠡᠪᠲᠡᠷᠡᠵᠦ ᠡᠬᠢᠯᠡᠪᠡ᠃ ᠯᠢ ᠵᠧᠨ ᠮᠢᠨ ᠪᠣᠯᠤᠨ ᠳ᠋ᠤᠸᠠᠨ ᠰᠢᠨ ᠢᠦᠢ ᠬᠢᠨᠠᠨ ᠡᠵᠡᠮᠳᠡᠵᠦ ᠵᠢᠯᠣᠭᠣᠳᠬᠤ ᠲᠥᠪᠲᠦ᠍ ᠪᠤᠴᠠᠨ ᠺᠣᠮᠫᠢᠦ᠋ᠲ᠋ᠧᠷᠦ᠋ᠨ ᠬᠥᠰᠢᠭᠡᠶ᠋ᠢ ᠠᠯᠳᠠᠯ ᠦᠭᠡᠢ ᠰᠢᠷᠲᠡᠵᠦ᠂ ᠣᠶᠤᠨᠴᠢ ᠪᠤᠭᠤᠮᠳᠠᠶᠢᠨ ᠰᠢᠰᠲ᠋ᠧᠮᠢ᠋ ᠠᠰᠢᠭᠯᠠᠨ ᠠᠯᠤᠰ ᠡᠴᠡ ᠰᠢᠯᠭᠠᠨ ᠪᠠᠢᠴᠠᠭᠠᠯᠲᠠ ᠬᠢᠵᠦ ᠡᠬᠢᠯᠡᠯᠡ᠃
《ᠲᠤᠬᠠᠢᠶ᠋ᠢᠨ ᠲᠠᠯᠠᠪᠠᠢᠳ᠋ᠤ᠌ ᠬᠥᠮᠦᠰ ᠬᠠᠷᠠᠵᠤ ᠰᠠᠬᠢᠬᠤ ᠴᠢᠬᠤᠯᠠ ᠦᠭᠡᠢ᠂ ᠣᠶᠤᠨᠲᠤ ᠪᠣᠭᠣᠮᠲᠠ ᠠᠦ᠋ᠲ᠋ᠤ᠋ ᠪᠡᠷ ᠪᠠᠷᠠᠭᠠᠵᠢ ᠵᠢᠩᠯᠡᠵᠦ᠂ ᠲᠡᠷᠡᠴᠢᠯᠡᠨ ᠡᠯᠧᠺᠲ᠋ᠷᠣᠨ ᠲᠡᠷᠭᠡᠨ ᠺᠠᠷᠲᠢ᠋ ᠰᠢᠷᠪᠢᠵᠦ ᠲᠡᠷᠭᠡ ᠬᠥᠰᠬᠡᠶ᠋ᠢᠨ ᠮᠡᠳᠡᠭᠡ ᠵᠠᠩᠭᠢᠶ᠋ᠢ ᠲᠠᠨᠢᠵᠤ ᠣᠯᠤᠨᠠ᠃ ᠠᠷᠤ ᠲᠠᠯᠠᠶ᠋ᠢᠨ ᠬᠢᠨ ᠪᠣᠳᠠᠲᠤ ᠲᠡᠷᠭᠡ ᠪᠣᠯᠤᠨ ᠪᠠᠷᠠᠭᠠᠨᠤ᠋ ᠲᠣᠭᠠ ᠪᠠᠷᠢᠮᠲᠠ᠂ ᠠᠵᠤ ᠠᠬᠤᠢᠯᠠᠯᠤ᠋ᠨ ᠤᠷᠢᠳᠴᠢᠯᠠᠨ ᠮᠡᠳᠡᠭᠦᠯᠦᠭᠰᠡᠨ ᠲᠣᠭᠠ ᠪᠠᠷᠢᠮᠲᠠᠶ᠋ᠢ ᠬᠠᠷᠢᠴᠠᠭᠤᠯᠵᠤ᠂ ᠪᠤᠷᠤᠭᠤ ᠥᠬᠡᠢ ᠪᠣᠯ ᠠᠶᠠᠨᠳᠠᠭᠠᠨ ᠬᠠᠰᠢᠯᠭᠠ ᠪᠠᠨ ᠡᠷᠭᠦᠨ ᠲᠡᠷᠭᠡ ᠵᠢ ᠦᠩᠭᠡᠷᠡᠭᠦᠯᠵᠦ᠂ ᠲᠡᠷᠭᠡ ᠪᠣᠯᠭᠠᠨᠤ᠋ ᠪᠤᠭᠤᠮᠲᠠ ᠪᠡᠷ ᠦᠩᠭᠡᠷᠡᠬᠦ ᠴᠠᠭ ᠨᠢ ᠵᠥᠪᠬᠡᠨ ᠠᠷᠪᠠᠨ ᠬᠡᠳᠦᠨ ᠰᠧᠺᠦ᠋ᠨ᠋ᠳ᠋ ᠬᠡᠷᠡᠭᠰᠡᠨᠡ》 ᠭᠡᠵᠦ ᠳ᠋ᠤᠸᠠᠨ ᠰᠢᠨ ᠢᠦᠢ ᠲᠠᠨᠢᠯᠴᠠᠭᠤᠯᠤᠨᠠ᠃
《ᠴᠠᠭᠠᠨ ᠰᠠᠷᠠᠶ᠋ᠢᠨ ᠬᠢᠯᠢᠶᠢᠨ ᠪᠤᠭᠤᠮᠳᠠ ᠨᠡᠪᠲᠡᠷᠡᠭᠦᠯᠦᠭᠰᠡᠨ ᠡᠬᠢᠨᠤ ᠬᠡᠳᠦᠨ ᠡᠳᠦᠷ ᠲᠡᠷᠭᠡ ᠣᠯᠠᠨ᠂ ᠬᠥᠮᠦᠨᠴᠤ ᠣᠯᠠᠨ᠂ ᠮᠠᠰᠢ ᠶᠠᠭᠠᠷᠠᠯᠲᠠᠢ᠃ ᠥᠨᠥᠳᠥᠷ ᠪᠢᠳᠡ ᠠᠳᠠᠭ ᠪᠠᠭᠠᠳ᠋ᠠᠭᠠᠨ 9 ᠴᠠᠭ ᠵᠢᠵᠢᠭᠦᠷᠯᠡᠨᠡ》 ᠭᠡᠵᠦ ᠯᠢ ᠵᠧᠨ ᠮᠢᠨ ᠬᠡᠯᠡᠨᠡ᠃
ᠯᠢ ᠵᠧᠨ ᠮᠢᠨᠦ᠌ ᠭᠡᠷ ᠱᠠᠨᠳᠦ᠋ᠩ ᠮᠤᠵᠢᠶᠢᠨ ᠵᠢᠨᠠᠨ ᠬᠤᠲᠠᠳ᠋ᠤ᠌ ᠪᠠᠢᠵᠤ᠂ ᠰᠢᠨᠡᠶ᠋ᠢᠨ ᠬᠣᠶᠠᠷᠤ᠋ᠨ ᠦᠳᠡᠳ᠋ᠦ᠍ ᠲᠡᠷᠡ ᠭᠡᠷᠡᠴᠡ ᠪᠠᠨ ᠠᠶᠠᠷᠯᠠᠨ ᠭᠠᠯᠲᠤ ᠲᠡᠷᠭᠡᠨᠳ᠋ᠦ᠍ ᠰᠠᠭᠤᠵᠤ᠂ ᠰᠢᠨᠡᠶ᠋ᠢᠨ ᠭᠤᠷᠪᠠᠨᠤ᠋ ᠣᠷᠣᠢ ᠭᠠᠭᠴᠠᠮᠤᠳᠤ ᠬᠢᠯᠢᠶᠢᠨ ᠪᠣᠭᠣᠮᠲᠠᠳ᠋ᠤ᠌ ᠬᠠᠷᠢᠵᠤ ᠢᠷᠡᠵᠡᠢ᠃ ᠳ᠋ᠤᠸᠠᠨ ᠰᠢᠨ ᠢᠦᠢ ᠵᠢᠨ ᠭᠡᠷ ᠨᠢ ᠭᠠᠭᠴᠠᠮᠤᠳᠤᠠ᠋ᠴᠠ 680 ᠺᠢᠯᠣᠮᠧᠲ᠋ᠷ ᠵᠠᠢᠲᠠᠢ᠃ ᠲᠡᠳᠡ ᠮᠢᠩᠭᠠᠨ ᠭᠠᠵᠠᠷᠤ᠋ᠨ ᠭᠠᠳᠠᠨᠠ ᠡᠴᠡ ᠬᠦᠷᠴᠦ ᠢᠷᠡᠨ ᠬᠢᠯᠢ ᠬᠢᠵᠠᠭᠠᠷᠢ᠋ ᠰᠠᠬᠢᠬᠤ ᠨᠢ ᠵᠥᠪᠬᠡᠨ ᠪᠤᠭᠤᠮᠳᠠᠶᠢᠨ ᠰᠠᠭᠠᠳ ᠦᠭᠡᠢ ᠨᠡᠪᠲᠡᠷᠡᠬᠦᠶ᠋ᠢ ᠪᠠᠲᠤᠯᠠᠨ᠂ ᠭᠠᠳᠠᠭᠠᠳᠤ ᠠᠷᠠᠯᠵᠢᠶᠠᠶ᠋ᠢ ᠠᠬᠢᠭᠤᠯᠵᠤ᠂ ᠰᠢᠨᠡ ᠨᠢᠭᠡᠨ ᠵᠢᠯᠤᠨ ᠦᠯᠵᠡᠢ ᠲᠠᠢ ᠭᠠᠷᠤᠭᠠᠵᠢ ᠤᠭᠳᠤᠬᠤᠶᠢᠨ ᠲᠦᠯᠦᠭᠡ ᠶᠤᠮ᠃
ᠡᠪᠦᠯᠦ᠋ᠨ ᠴᠠᠰᠤ ᠬᠠᠢᠯᠵᠤ ᠵᠠᠪᠳᠤᠭᠠ ᠦᠭᠡᠢ᠂ ᠬᠠᠪᠤᠷᠤ᠋ᠨ ᠡᠬᠢᠨᠤ ᠬᠦᠢᠳᠡᠨ ᠰᠠᠯᠬᠢ ᠦᠶᠡ ᠦᠶᠡ ᠰᠡᠨᠭᠭᠢᠨᠡᠵᠦ ᠪᠠᠢᠭᠰᠠᠨ ᠴᠸ᠋ ᠬᠢᠯᠢᠶᠢᠨ ᠪᠣᠭᠣᠮᠲᠠᠶ᠋ᠢᠨ ᠭᠠᠳᠠᠭᠠᠳᠤ ᠠᠷᠠᠯᠵᠢᠶᠠᠨᠤ᠋ ᠬᠦᠷ ᠬᠦᠭᠵᠢᠶᠡᠨᠢ ᠬᠤᠷᠢᠭᠯᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠯᠠ᠃ ᠠᠴᠢᠶᠠ ᠲᠡᠭᠡᠭᠡᠪᠦᠷᠢᠶ᠋ᠢᠨ ᠵᠠᠮ ᠬᠥᠷ ᠬᠥᠭᠵᠢᠶᠡᠨᠲᠡᠢ ᠪᠣᠯᠵᠤ᠂ ᠠᠭᠤᠷᠬᠠᠢᠶ᠋ᠢᠨ ᠭᠠᠷᠤᠯᠲᠠ ᠵᠢ ᠲᠥᠬᠥᠷᠡᠨᠭ ᠠᠴᠢᠭᠰᠡᠨ 《ᠵᠠᠭᠤᠨ ᠲᠤᠨᠤ᠋ ᠸᠠᠩ》 ᠬᠣᠣᠰ ᠴᠢᠷᠦᠭᠦᠯ ᠲᠡᠷᠭᠡ᠂ AGV ᠠᠦ᠋ᠲ᠋ᠣ᠋ ᠵᠢᠳᠬᠦᠭᠦᠷ ᠲᠡᠷᠭᠡᠨᠦᠭᠦᠳ ᠮᠣᠩᠭᠣᠯ ᠤᠯᠤᠰᠠ᠋ᠴᠠ ᠪᠤᠯᠢᠶᠠᠯᠳᠤᠨ ᠮᠣᠷᠳᠠᠵᠤ᠂ ᠳᠤᠮᠳᠠᠳᠤ ᠤᠯᠤᠰᠤ᠋ᠨ ᠬᠢᠯᠢᠳ᠋ᠦ᠍ ᠴᠤᠪᠤᠷᠠᠨ ᠣᠷᠣᠵᠤ ᠢᠷᠡᠨᠡ᠃
ᠭᠠᠭᠴᠠᠮᠤᠳᠤ ᠬᠢᠯᠢᠶᠢᠨ ᠪᠣᠭᠣᠮᠲᠠ ᠪᠣᠯ ᠳᠤᠮᠳᠠᠳᠤ ᠮᠣᠩᠭᠣᠯ ᠬᠣᠶᠠᠷ ᠤᠯᠤᠰᠤ᠋ᠨ ᠬᠣᠭᠣᠷᠣᠨᠳᠣ ᠪᠠᠷᠠᠭᠠ ᠣᠷᠣᠭᠤᠯᠬᠤ ᠬᠡᠮᠵᠢᠶᠡ ᠪᠡᠷ ᠬᠠᠮᠤᠭᠤ᠋ᠨ ᠲᠣᠮᠣ ᠵᠠᠰᠠᠮᠠᠯ ᠵᠠᠮᠤ᠋ᠨ ᠬᠢᠯᠢᠶᠢᠨ ᠪᠣᠭᠣᠮᠲᠠ ᠪᠣᠯᠤᠨᠠ᠂ 2024 ᠣᠨᠤ᠋ ᠪᠠᠷᠠᠭᠠ ᠣᠷᠣᠭᠤᠯᠤᠭᠰᠠᠨ ᠬᠡᠮᠵᠢᠶᠡ ᠨᠢ 4000 ᠲᠦᠮᠡᠨ ᠲᠤᠨᠢ᠋ ᠳᠠᠪᠠᠵᠤ᠂ ᠥᠪᠥᠷ ᠮᠣᠩᠭᠣᠯᠤ᠋ᠨ ᠥᠪᠡᠷᠲᠡᠭᠡᠨ ᠵᠠᠰᠠᠬᠤ ᠣᠷᠣᠨᠤ᠋ 14 ᠬᠢᠯᠢᠶᠢᠨ ᠪᠣᠭᠣᠮᠲᠠᠶ᠋ᠢᠨ ᠪᠠᠷᠠᠭᠠ ᠣᠷᠣᠭᠤᠯᠤᠭᠰᠠᠨ ᠶᠡᠷᠦᠩᠬᠡᠢ ᠬᠡᠮᠵᠢᠶᠡᠶ᠋ᠢᠨ ᠭᠤᠷᠪᠠᠨᠤ᠋ ᠨᠢᠭᠡ ᠬᠤᠪᠢᠶ᠋ᠢ ᠡᠵᠡᠯᠡᠪᠡ᠃
《ᠬᠢᠯᠢ ᠵᠢᠨ ᠪᠣᠭᠣᠮᠲᠠ ᠰᠠᠭᠠᠳ ᠦᠭᠡᠢ ᠨᠡᠪᠲᠡᠷᠡᠵᠦ᠂ ᠭᠠᠳᠠᠭᠠᠳᠤ ᠠᠷᠠᠯᠵᠢᠶᠠ ᠥᠷᠨᠢᠨ ᠬᠥᠭᠵᠢᠳᠡᠭ ᠯᠡ ᠶᠤᠮ ᠪᠤᠯ᠂ ᠪᠢᠳᠡᠨᠦ᠌ ᠭᠠᠷᠭᠠᠭᠰᠠᠨ ᠦᠷᠡᠭᠳᠡᠯ ᠥᠷᠲᠡᠭ ᠲᠠᠢ᠃ 2025 ᠣᠨᠳ᠋ᠤ᠌ ᠪᠢᠳᠡ ᠦᠷᠭᠦᠯᠵᠢᠯᠡᠨ ᠤᠯᠤᠰᠤ᠋ᠨ ᠡᠭᠦᠳᠡᠪᠡᠨ ᠪᠠᠲᠤ ᠰᠠᠬᠢᠵᠤ᠂ ᠬᠥᠭᠵᠢᠯᠲᠡᠶ᠋ᠢ ᠠᠬᠢᠭᠤᠯᠤᠨ᠂ ᠣᠶᠤᠨᠴᠢ ᠬᠢᠨᠠᠨ ᠬᠠᠮᠢᠶᠠᠷᠤᠯᠲᠠᠶ᠋ᠢᠨ ᠪᠠᠢᠳᠠᠯᠢ᠋ ᠲᠠᠰᠤᠷᠠᠯᠲᠠ ᠦᠭᠡᠢ ᠰᠢᠯᠢᠳᠡᠭᠵᠢᠭᠦᠯᠵᠦ ᠂ ᠪᠣᠭᠣᠮᠲᠠᠪᠠᠷ ᠪᠠᠷᠠᠭᠠᠥᠨᠭᠭᠡᠷᠡᠬᠥᠯᠬᠥ ᠴᠢᠳᠠᠪᠤᠷᠢᠪᠡᠨ ᠳᠡᠭᠡᠭᠰᠢᠯᠡᠭᠦᠯᠦᠨ᠂ ᠤᠮᠠᠷᠠᠰᠢ ᠨᠡᠭᠡᠭᠡᠬᠦ ᠡᠭᠦᠳᠡᠶ᠋ᠢ ᠨᠡᠩ ᠰᠠᠷᠠᠭᠤᠯ ᠠᠭᠤᠳᠠᠮ ᠪᠣᠯᠭᠠᠨᠠ》 ᠭᠡᠵᠦ ᠯᠢ ᠵᠧᠨ ᠮᠢᠨ ᠡᠷᠡᠰ ᠰᠢᠭᠤᠷᠬᠠᠢᠪᠠᠷ ᠬᠡᠯᠡᠨᠡ᠃