ᠨᠠᠢᠷᠠᠭᠤᠯᠤᠭᠴᠢ ᠶ᠋ᠢᠨ ᠦᠭᠡ᠄
ᠬᠤᠳᠠ ᠪᠠᠯᠭᠠᠰᠤᠵᠢᠯᠳᠠ᠂ ᠮᠠᠯᠵᠢᠯ ᠤ᠋ᠨ ᠠᠷᠭᠠ ᠬᠡᠯᠪᠡᠷᠢ ᠵᠢᠨ ᠬᠤᠪᠢᠷᠠᠯᠳᠠ᠂ ᠵᠠᠬᠠ ᠲᠠᠯᠬᠡᠬᠦᠷᠴᠢᠯᠡᠯᠳᠡ᠂ ᠮᠠᠯ ᠠᠵᠤ ᠠᠬᠤᠢ ᠲᠠᠷᠢᠶᠠᠯᠠᠩ ᠤ᠋ᠨ ᠤᠳᠤᠬᠢᠴᠢᠯᠠᠯᠳᠠ ᠪᠠ ᠨᠡᠢᠬᠡᠮᠴᠢᠯᠡᠭᠰᠡᠨ ᠦᠢᠯᠡᠴᠢᠯᠡᠬᠡᠨ ᠤ᠋ ᠬᠦᠭᠵᠢᠯᠳᠡ ᠵᠡᠷᠬᠡ ᠵᠢ ᠲᠠᠭᠠᠯᠳᠤᠨ ᠬᠤᠳᠠ ᠤᠷᠤᠬᠤ ᠮᠠᠯᠴᠢᠨ ᠲᠠᠷᠢᠶᠠᠴᠢᠨ ᠤᠯᠠᠮ ᠡᠴᠡ ᠤᠯᠠᠮ ᠤᠯᠠᠰᠢᠷᠠᠵᠤ ᠪᠠᠢᠬᠤ ᠮᠦᠷᠳᠡᠬᠡᠨ ᠶᠠᠪᠤᠬᠤ ᠲᠤᠳᠤᠮ ᠤᠯᠠᠰᠢᠷᠠᠬᠤ ᠬᠠᠨᠳᠤᠰᠢ ᠲᠠᠢ ᠶᠤᠮ᠃
《ᠬᠤᠳᠠ ᠬᠦᠳᠡᠭᠡ ᠶ᠋ᠢᠨ ᠠᠭᠤᠰᠤᠯᠴᠠᠨ ᠬᠦᠭᠵᠢᠬᠦ ᠶ᠋ᠢ ᠠᠬᠢᠭᠤᠯᠬᠤ 》 ᠪᠤᠯ 《ᠠᠷᠪᠠᠨ ᠳᠠᠪᠤᠳᠤᠭᠠᠷ ᠳᠠᠪᠤᠨ ᠵᠢᠯ 》 ᠤ᠋ᠨ ᠬᠤᠭᠤᠴᠠᠭᠠᠨ ᠳ᠋ᠡᠬᠢ ᠮᠠᠨ ᠤ᠋ ᠤᠯᠤᠰ ᠤ᠋ᠨ ᠬᠦᠳᠡᠭᠡ ᠠᠵᠤ ᠠᠬᠤᠢ ᠬᠦᠳᠡᠭᠡ ᠲᠤᠰᠬᠤᠨ ᠤ᠋ ᠠᠵᠢᠯ ᠤ᠋ᠨ ᠨᠢᠬᠡᠨ ᠴᠢᠬᠤᠯᠠ ᠴᠢᠭᠯᠡᠯ ᠪᠤᠯᠤᠨᠠ᠃ ᠡᠨᠡ ᠬᠦ᠌ ᠶᠡᠬᠡ ᠴᠢᠭᠯᠡᠯ ᠤ᠋ᠨ ᠡᠮᠦᠨᠠ᠂ ᠮᠠᠯᠴᠢᠨ ᠲᠠᠷᠢᠶᠠᠴᠢᠨ ᠬᠡᠷᠬᠢᠨ ᠭᠤᠤᠯ ᠴᠤᠭᠴᠠ ᠶ᠋ᠢᠨ ᠬᠦᠴᠦᠨ ᠶ᠋ᠢᠡᠨ ᠪᠠᠳᠠᠷᠠᠭᠤᠯᠬᠤ ᠪᠤᠢ？
《ᠰᠢᠨᠠ ᠬᠦᠳᠡᠭᠡ》 ᠲᠤᠰᠬᠠᠢ ᠬᠡᠪᠯᠡᠯ ᠡᠨᠡ ᠡᠳᠦᠷ ᠡᠴᠡ 《ᠬᠦᠳᠡᠭᠡ ᠶ᠋ᠢᠨ ᠮᠠᠯᠴᠢᠨ ᠬᠦᠬᠡᠬᠤᠳᠠ ᠳ᠋ᠤ 》 ᠬᠡᠬᠦ ᠰᠢᠷᠢᠰ ᠮᠡᠳᠡᠭᠡᠯᠡᠯ ᠢ᠋ ᠡᠬᠢᠯᠡᠭᠦᠯᠵᠦ᠂ ᠬᠦᠬᠡᠬᠤᠳᠠ ᠳ᠋ᠤ ᠢᠷᠡᠭᠰᠡᠨ ᠮᠠᠯᠴᠢᠳ ᠤ᠋ᠨ ᠠᠮᠵᠢᠯᠳᠠ ᠪᠦᠳᠦᠮᠵᠢ᠂ ᠠᠯᠳᠠᠭ ᠤᠨᠤᠭ᠂ ᠪᠠᠶᠠᠷ ᠵᠢᠷᠭᠠᠯ᠂ ᠠᠷᠭᠠ ᠲᠤᠷᠰᠢᠯᠭᠠ ᠵᠡᠷᠬᠡ ᠵᠢ ᠬᠤᠪᠢᠶᠠᠯᠴᠠᠵᠤ᠂ ᠬᠤᠳᠠ ᠤᠷᠤᠬᠤ ᠮᠠᠯᠴᠢᠨ ᠲᠠᠷᠢᠶᠠᠴᠢᠳ ᠤ᠋ᠨ ᠠᠳᠠᠯ ᠦᠢᠯᠡᠰ ᠤ᠋ᠨ ᠰᠤᠩᠭᠤᠯᠳᠠ ᠳ᠋ᠤ ᠲᠤᠰᠠ ᠲᠡᠮ ᠪᠤᠯᠬᠤ ᠵᠢ ᠵᠤᠷᠢᠪᠠ᠃ ᠠᠩᠬᠠᠷᠤᠨ ᠤᠩᠰᠢᠮᠤ！
ᠶᠢᠰᠤ ᠤᠷᠤᠵᠤ ᠬᠦᠢᠳᠡᠨ ᠤ᠋ ᠡᠷᠴᠢ ᠴᠢᠩᠭᠠᠷᠠᠭᠰᠠᠨ ᠬᠦᠬᠡᠬᠤᠳᠠ ᠵᠢᠨ ᠦᠷᠯᠤᠭᠡ ᠤᠨᠴᠠ ᠵᠢᠨ ᠵᠢᠭᠡᠭᠦᠨ ᠪᠠᠢᠬᠰᠠᠨ ᠴᠸ᠋ ᠰᠠᠢᠬᠠᠨ ᠲᠤᠭᠤᠷᠢᠭ ᠤ᠋ᠨ ᠴᠢᠨᠳᠠᠮᠤᠨᠢ ᠵᠠᠮ ᠤ᠋ᠨ ᠰᠢᠨᠠ ᠬᠤᠸᠠ ᠯᠢᠶᠠᠨ ᠶᠠ ᠶᠤᠸᠠᠨ ᠰᠠᠭᠤᠭᠠᠯᠢ ᠠᠷᠠᠳ ᠤ᠋ᠨ ᠲᠤᠭᠤᠷᠢᠭ ᠤ᠋ᠨ ᠪᠠᠷᠠᠭᠤᠨ ᠡᠬᠦᠳᠡᠨ ᠳ᠋ᠡᠬᠢ ᠰᠦᠨᠢᠳ ᠬᠤᠨᠢ ᠦᠬᠡᠷ ᠤ᠋ᠨ ᠮᠢᠬᠠ ᠪᠤᠷᠤᠯᠠᠭᠤᠯᠬᠤ ᠲᠡᠷᠭᠡᠨ ᠤ᠋ ᠡᠮᠤᠨᠠ ᠬᠠᠷᠢᠨ ᠬᠦᠷ ᠬᠥᠭ᠌ᠵᠢᠶᠡᠨ ᠶ᠋ᠢᠡᠷ ᠪᠢᠯᠬᠠᠨᠠ᠃
ᠰᠠᠢᠨᠠ ᠬᠦᠷᠢᠶᠡᠯᠡᠵᠦ ᠢᠷᠡᠭᠰᠡᠨ ᠬᠤᠳᠠ ᠵᠢᠨ ᠠᠷᠠᠳ ᠲᠸ᠋ ᠰᠢᠨᠠ ᠰᠤᠷᠭᠤᠭ ᠰᠦᠨᠢᠳ ᠬᠤᠨᠢ ᠶ᠋ᠢᠨ ᠮᠢᠬᠠ ᠪᠡᠨ ᠨᠢᠮᠪᠠᠢ ᠪᠤᠷᠤᠯᠠᠭᠤᠯᠬᠤ ᠵᠢᠨ ᠲᠠᠭᠠᠤ ᠭᠠᠷ ᠤᠲᠠᠰᠤᠨ ᠤ᠋ ᠱᠢᠭᠤᠳ ᠨᠡᠪᠲᠡᠷᠡᠭᠦᠯᠭᠡ ᠶ᠋ᠢᠨ ᠲᠠᠰᠤᠭ ᠲᠠᠭᠠᠨ᠄ 《ᠦᠷᠭᠡᠨ ᠤᠯᠠᠨ ᠰᠦᠯᠵᠢᠶᠡᠨ ᠠᠨᠳᠠ ᠨᠡᠷ ᠰᠠᠢᠨ ᠪᠠᠢᠨᠠᠤ ᠂ ᠪᠢ ᠪᠤᠯ ᠮᠠᠯᠴᠢᠨ ᠰᠠᠢᠨᠠ᠃ ᠮᠠᠨ ᠤ᠋ ᠡᠨᠡ ᠬᠤᠨᠢ ᠦᠬᠡᠷ ᠤ᠋ᠨ ᠮᠢᠬᠠ ᠵᠢ ᠰᠠᠨᠠᠭᠠ ᠠᠮᠤᠷ ᠠᠪᠴᠤ ᠪᠤᠯᠤᠨᠠ ᠂ ᠪᠦᠷ ᠮᠠᠨ ᠤ᠋ ᠰᠥᠨᠢᠳ ᠨᠤᠳᠤᠭ ᠤ᠋ᠨ ᠬᠦᠮᠠᠯᠢ ᠲᠠᠭᠠᠨᠠ ᠢᠳᠡᠵᠦ᠍᠂ ᠪᠤᠯᠠᠭ ᠤ᠋ᠨ ᠤᠰᠤ ᠤᠤᠭᠤᠭᠰᠠᠨ᠂ ᠤᠭᠤᠷᠠᠭ ᠶᠡᠬᠡᠳᠠᠢ ᠥᠭᠡᠬᠦ᠌ ᠪᠠᠭᠠᠲᠠᠶ᠂ ᠴᠤᠯ ᠪᠠᠢᠭᠠᠯᠢ ᠵᠢᠨ ᠰᠦᠨᠢᠳ ᠬᠤᠨᠢ ᠶ᠋ᠢᠨ ᠮᠢᠬᠠ ᠶᠤᠮ ᠁ 》 ᠬᠡᠵᠤ ᠲᠠᠨᠢᠯᠴᠠᠭᠤᠯᠵᠤ ᠶᠠᠭᠠᠷᠠᠨᠠ᠃
ᠰᠠᠢᠨᠠ ᠪᠣᠯ ᠰᠥᠨᠢᠳ ᠪᠠᠷᠠᠭᠤᠨ ᠬᠣᠱᠢᠭᠤᠨ ᠤ᠋ ᠠᠴᠢᠳᠤ ᠠᠭᠤᠯᠠ ᠰᠤᠮᠤ ᠵᠢᠨ ᠡᠷᠳᠡᠨᠢ ᠪᠤᠯᠠᠭ ᠭᠠᠴᠠᠭᠠᠨ ᠤ᠋ ᠮᠠᠯᠴᠢᠨ ᠵᠠᠯᠠᠭᠤ ᠪᠢᠯᠡ᠃ ᠲᠡᠳᠡᠨ ᠤ᠋ ᠬᠢᠨ 9000 ᠭᠠᠷᠤᠶ ᠮᠥ᠍ ᠪᠡᠯᠴᠢᠭᠡᠷ ᠲᠡᠬᠡᠨ 300 ᠭᠠᠷᠤᠶ ᠰᠦᠨᠢᠳ ᠬᠣᠨᠢ ᠪᠣᠯᠤᠨ 10 ᠭᠠᠷᠤᠢ ᠦᠬᠡᠷ ᠮᠠᠯᠵᠢᠨ ᠠᠵᠤ ᠲᠦᠷᠤᠵᠤ ᠪᠠᠢᠨᠠ᠃ ᠭᠡᠪᠡᠴᠦ᠍ ᠡᠮᠦᠨᠡ ᠬᠡᠳᠦᠨ ᠵᠢᠯ ᠳ᠋ᠤ ᠵᠠᠬᠠ ᠳᠡᠯᠭᠡᠭᠦᠷ ᠦ᠋ᠨ ᠨᠥᠯᠥᠭᠡ ᠪᠡᠷ ᠬᠣᠨᠢᠨ ᠮᠢᠬᠠ ᠵᠢᠨ ᠦᠨᠡ ᠪᠠᠭᠤᠷᠠᠵᠤ᠂ ᠤᠯᠠᠮᠵᠢᠯᠠᠯᠲᠤ ᠮᠠᠶᠢᠭ ᠵᠢᠡᠷ ᠵᠠᠬᠠ ᠵᠢᠨ ᠮᠠᠢᠮᠠᠢᠴᠢᠨ ᠳ᠋ᠤ ᠠᠮᠢᠳᠤ ᠪᠡᠷ ᠨᠢ ᠬᠤᠳᠠᠯᠳᠤᠵᠤ ᠦᠭᠪᠡᠯ ᠮᠠᠯᠴᠢᠳ ᠤ᠋ᠨ ᠠᠰᠢᠭ ᠤᠷᠤᠯᠭᠠ ᠤᠤᠯ ᠤ᠋ᠨ ᠬᠢ ᠡᠴᠡ ᠪᠠᠨ ᠮᠡᠳᠡᠭᠳᠡᠮᠠ ᠪᠠᠭᠠᠰᠬᠤ ᠪᠠᠢᠳᠠᠯ ᠭᠠᠷᠴᠠᠢ᠃ ᠰᠠᠢᠨᠠ ᠵᠢᠨ ᠬᠢᠨ ᠴᠸ᠋ ᠡᠢᠮᠤᠷᠬᠦᠤ ᠪᠠᠢᠳᠠᠯ ᠤᠷᠤᠰᠢᠵᠤ᠂ ᠲᠡᠷᠡ ᠶᠠᠭ ᠭᠠᠷ ᠨᠤᠬᠤᠯᠠᠨ 《ᠶᠠᠭᠠᠬᠢᠵᠤ ᠨᠤᠳᠤᠭ ᠤ᠋ᠨ ᠬᠤᠨᠢ ᠪᠡᠨ ᠦᠨᠠ ᠳ᠋ᠤ ᠬᠦᠷᠭᠡᠵᠤ᠂ ᠨᠡᠡᠭ ᠤᠯᠠᠨ ᠬᠡᠷᠡᠭᠯᠡᠭᠴᠢᠳ ᠲᠸ᠋ ᠵᠢᠡᠭᠭᠢᠨᠢ ᠰᠦᠨᠢᠳ ᠬᠤᠨᠢ ᠶ᠋ᠢᠨ ᠮᠢᠬᠠ ᠪᠡᠨ ᠠᠮᠳᠠᠯᠠᠭᠤᠯᠳᠠᠭ ᠪᠢᠯᠡ 》 ᠬᠡᠵᠤ ᠠᠷᠭᠠ ᠪᠠᠷᠠᠬᠳᠠᠵᠤ ᠪᠠᠢᠬᠤ ᠦᠶᠡᠰ ᠬᠦᠬᠡᠬᠤᠳᠠ ᠳ᠋ᠡᠬᠢ ᠰᠠᠢᠨ ᠨᠠᠢᠵᠠ ᠨᠢ ᠲᠡᠬᠦᠨ ᠳ᠋ᠤ ᠄ 《 ᠬᠤᠳᠠ ᠵᠢᠨ ᠵᠠᠬᠠ ᠲᠠᠯᠬᠡᠬᠦᠷ ᠲᠦ᠍ ᠦᠪᠡᠰᠦᠪᠡᠨ ᠦᠪᠡᠷ ᠤ᠋ᠨ ᠬᠤᠨᠢ ᠶ᠋ᠢᠨ ᠮᠢᠬᠠ ᠪᠡᠨ ᠪᠤᠷᠤᠯᠠᠭᠤᠯᠪᠡᠯ ᠶᠠᠮᠠᠷ ᠪᠤᠢ⁈》 ᠬᠡᠰᠡᠨ ᠰᠠᠨᠠᠭᠤᠯᠭᠠ ᠦᠭᠴᠠᠢ᠃
《ᠮᠠᠯᠴᠢᠨ ᠪᠢᠳᠡ ᠴᠦ᠍ ᠮᠢᠬᠠᠨ ᠤ᠋ ᠲᠤᠳᠤᠷᠠᠬᠢ ᠤᠷᠬᠤᠳᠠᠢ ᠬᠡᠮᠡᠭᠳᠡᠭᠰᠡᠨ ᠰᠦᠨᠢᠳ ᠬᠤᠨᠢ ᠶ᠋ᠢᠨ ᠮᠢᠬᠠ ᠪᠡᠨ ᠦᠨᠠ ᠳ᠋ᠤ ᠬᠦᠷᠬᠡᠬᠦ ᠪᠡᠷ ᠴᠢᠷᠮᠠᠢᠬᠤ ᠶᠤᠰᠤᠳᠠᠢ ᠶᠤᠮ 》 ᠬᠡᠵᠤ ᠪᠤᠳᠤᠬᠰᠠᠨ ᠰᠠᠢᠨᠠ 2024 ᠣᠨ ᠤ᠋ 12 ᠰᠠᠷᠠ ᠳ᠋ᠤ ᠨᠤᠲᠤᠭ ᠤ᠋ᠨ ᠶ᠋ᠢᠡᠨ ᠪᠡᠯᠴᠢᠭᠡᠷ ᠦ᠋ᠨ ᠬᠤᠨᠢᠨ ᠮᠢᠬᠠ ᠪᠡᠨ ᠭᠠᠨᠵᠤᠭᠠᠯᠠᠨ ᠲᠠᠮᠤᠴᠢ ᠵᠢᠨ ᠲᠠᠯᠠ ᠡᠴᠡ ᠬᠦᠬᠡᠬᠤᠳᠠ ᠳ᠋ᠤ ᠢᠷᠡᠵᠤ᠂ ᠰᠢᠮᠠ ᠰᠢᠬᠦᠰᠤ ᠰᠠᠢᠳᠠᠢ ᠰᠦᠨᠢᠳ ᠬᠤᠨᠢ ᠶ᠋ᠢᠨ ᠮᠢᠬᠠ ᠪᠡᠨ ᠵᠡᠭᠡᠯᠢ ᠳᠡᠭᠡᠷᠠ ᠦᠪᠡᠰᠤᠪᠠᠨ ᠪᠤᠷᠤᠯᠠᠭᠤᠯᠬᠤ ᠠᠡᠭᠬᠠᠨ ᠤ᠋ ᠠᠶᠠᠨ ᠵᠢᠡᠨ ᠡᠬᠢᠯᠡᠬᠦᠯᠤᠯᠠ᠃
ᠬᠤᠳᠠ ᠳ᠋ᠤ ᠠᠩᠬᠠ ᠣᠷᠣᠵᠤ ᠢᠷᠡᠭ᠌ᠰᠡᠨ ᠦᠶᠡᠰ᠂ ᠲᠡᠷᠡ ᠪᠡᠷ ᠲᠠᠨᠢᠯ ᠪᠤᠰᠤ ᠣᠷᠴᠢᠨ ᠲᠣᠭᠣᠷᠢᠨ ᠳ᠋ᠤ ᠤᠬᠠᠭᠠᠨ ᠲᠦᠬᠦᠭᠡ ᠪᠡᠨ ᠤᠯᠵᠤ ᠶᠠᠳᠠᠨ᠂ ᠴᠤᠬᠤᠮ ᠠᠯᠢ ᠬᠡᠰᠡᠭ ᠭᠠᠵᠠᠷ ᠢ᠋ ᠰᠣᠩᠭᠣᠵᠤ ᠮᠢᠬᠠ ᠪᠡᠨ ᠬᠤᠳᠠᠯᠳᠤᠬᠤ᠂ ᠬᠦᠮᠦᠰ ᠲᠦ᠍ ᠮᠠᠯ ᠤ᠋ᠨ ᠠᠰᠢᠭ ᠰᠢᠮᠠ ᠪᠠᠨ ᠬᠡᠷᠬᠢᠨ ᠲᠠᠨᠢᠯᠴᠠᠭᠤᠯᠬᠤ ᠲᠤᠬᠠᠢ ᠪᠦᠷ ᠰᠠᠢᠬᠠᠨ ᠦᠢᠯᠠᠭᠠᠬᠤ ᠦᠬᠡᠢ ᠪᠠᠢᠵᠠᠢ᠃ 《ᠰᠠᠶᠢ ᠡᠬᠢᠯᠡᠬᠦ ᠬᠡᠳᠦᠨ ᠡᠳᠦᠷ᠂ ᠵᠡᠭᠡᠯᠢ ᠪᠡᠷ ᠨᠠᠭᠠᠰᠢ ᠴᠠᠭᠠᠰᠢ ᠶᠠᠪᠤᠵᠤ ᠪᠠᠢᠭᠠ ᠬᠥᠮᠦᠰ ᠢ᠋ ᠦᠵᠡᠭᠡᠳ ᠪᠢ ᠶᠠᠭᠠᠬᠢᠵᠤ ᠠᠮᠠ ᠨᠡᠭᠡᠭᠡᠬᠦ ᠪᠠᠨ ᠤᠯᠬᠤ ᠦᠭᠡᠢ ᠪᠠᠢᠵᠤ᠂ ᠨᠢᠭᠡ ᠡᠳᠦᠷ ᠪᠤᠯᠤᠭᠠᠳ ᠬᠡᠳᠤᠨ ᠬᠡᠰᠡᠭ ᠮᠢᠬᠠ ᠴᠤ᠌ ᠬᠤᠳᠠᠯᠳᠤᠵᠤ ᠭᠠᠷᠬᠤ ᠦᠭᠡᠢ ᠪᠠᠢᠬᠰᠠᠨ ᠶᠤᠮ 》 ᠬᠡᠵᠤ ᠰᠠᠢᠨᠠ ᠬᠦᠬᠡᠬᠤᠳᠠ ᠳ᠋ᠤ ᠠᠩᠬᠠ ᠬᠤᠨᠢᠨ ᠮᠢᠬᠠ ᠪᠤᠷᠤᠯᠠᠭᠤᠯᠬᠤ ᠦᠶᠡ ᠶ᠋ᠢᠨ ᠪᠠᠢᠳᠠᠯ ᠵᠢᠡᠨ ᠡᠷᠭᠢᠴᠡᠭᠦᠯᠬᠦ ᠳ᠋ᠤ ᠮᠥᠨ ᠯᠡ ᠰᠡᠳᠭᠢᠯ ᠡᠪᠬᠡᠷᠡᠵᠤ ᠪᠠᠢᠯᠠ᠃
ᠠᠵᠠ ᠪᠠᠷ ᠨᠠᠢᠵᠠ ᠨᠢ ᠲᠤᠰᠠᠯᠠᠮᠵᠢ ᠦᠵᠡᠭᠦᠯᠵᠦ᠍᠂ ᠲᠡᠭᠦᠨ ᠳ᠋ᠤ ᠬᠥᠮᠦᠨ ᠤ᠋ ᠤᠷᠤᠰᠭᠠᠯ ᠶᠡᠬᠡ ᠭᠠᠵᠠᠷ ᠢ᠋ ᠰᠣᠩᠭᠣᠵᠤ ᠥᠭ᠌ᠭᠦᠭ᠌ᠰᠡᠨ ᠶ᠋ᠢᠡᠷ ᠪᠠᠷᠠᠬᠤ ᠦᠭᠡᠢ ᠪᠠᠰᠠ ᠭᠠᠷ ᠤᠳᠠᠰᠤ ᠪᠡᠷ ᠵᠢᠡᠨ ᠱᠢᠭᠤᠳ ᠨᠡᠪᠲᠡᠷᠡᠭᠦᠯᠭᠡ ᠬᠢᠬᠦ ᠮᠡᠷᠭᠡᠵᠢᠯ ᠢ᠋ ᠵᠢᠭᠠᠬᠤ ᠵᠢᠨ ᠲᠠᠭᠠᠤ ᠲᠡᠬᠦᠨ ᠢ᠋ ᠬᠠᠮᠵᠢᠨ ᠰᠢᠭᠤᠤᠨ ᠨᠡᠪᠳᠡᠷᠡᠬᠦᠯᠭᠡ ᠪᠡᠷ ᠮᠠᠯ ᠤ᠋ᠨ ᠠᠰᠢᠭ ᠰᠢᠮᠠ ᠵᠢ ᠨᠢ ᠲᠠᠨᠢᠯᠴᠠᠭᠤᠯᠵᠤ ᠦᠭᠴᠠᠢ᠃ ᠡᠢᠨ ᠬᠦ᠌ ᠰᠠᠢᠨᠠ ᠰᠠᠢᠨ ᠨᠠᠢᠵᠠ ᠵᠢᠨ ᠵᠢᠡᠨ ᠬᠠᠪᠰᠤᠷᠤᠯᠭᠠ ᠲᠡᠮᠵᠢᠯᠭᠡ ᠲᠤᠤᠷᠠ ᠪᠣᠷᠣᠯᠠᠭᠤᠯᠭᠠᠶ᠋ᠢᠨ ᠠᠷᠭᠠ ᠮᠠᠶᠢᠭ ᠢ᠋ ᠰᠤᠷᠴᠤ᠂ ᠬᠡᠷᠡᠭᠯᠡᠭᠴᠢᠳ ᠤ᠋ᠨ ᠬᠡᠷᠡᠭ᠌ᠴᠡᠭᠡ ᠱᠠᠭᠠᠷᠳᠠᠯᠭᠠ ᠵᠢ ᠦᠢᠯᠠᠭᠠᠵᠤ᠂ ᠡᠳᠤᠷ ᠨᠢ ᠰᠦᠨᠢᠳ ᠬᠤᠨᠢ ᠶ᠋ᠢᠨ ᠮᠢᠬᠠ ᠪᠡᠨ ᠬᠤᠳᠠᠯᠳᠤᠨ ᠤᠷᠤᠢ ᠨᠢ ᠪᠠᠭᠤᠳᠠᠯ ᠳ᠋ᠠᠭᠠᠨ ᠬᠠᠷᠢᠬᠰᠠᠨ ᠤ᠋ ᠰᠡᠬᠦᠯᠡᠷ ᠱᠢᠭᠤᠳ ᠨᠡᠪᠲᠡᠷᠡᠭᠦᠯᠭᠡ ᠬᠢᠬᠦ ᠮᠡᠷᠭᠡᠵᠢᠯ ᠵᠢᠡᠨ ᠳᠠᠬᠢᠨ ᠳᠠᠪᠲᠠᠨ ᠪᠤᠯᠪᠠᠰᠤᠷᠠᠨ ᠲᠡᠭᠡᠭᠰᠢᠯᠡᠬᠦᠯᠵᠠᠢ᠃
《ᠴᠢᠷᠮᠠᠢᠯᠭᠠ ᠬᠥᠮᠦᠨ ᠢ᠋ ᠭᠣᠮᠣᠳᠠᠭᠠᠬᠤ ᠦᠭᠡᠢ 》 ᠬᠡᠳᠡᠭ ᠶ᠋ᠢᠡᠷ᠂ ᠰᠠᠢᠨᠠ ᠰᠥᠨᠢᠳ ᠬᠤᠨᠢ ᠶ᠋ᠢᠨ ᠮᠢᠬᠠᠨ ᠤ᠋ ᠶᠠᠰᠤ ᠴᠢᠨᠠᠷ ᠪᠡ ᠦᠪᠡᠷ ᠤ᠋ᠨ ᠦᠨᠡᠨᠴᠢ ᠢᠲᠡᠭᠡᠮᠵᠢᠲᠡᠶ ᠡᠵᠡᠩᠨᠡᠯᠲᠡ ᠳ᠋ᠡᠭᠡᠨ ᠲᠦᠱᠢᠭ᠌ᠯᠡᠨ ᠮᠠᠢᠮᠠᠢ ᠨᠢ ᠠᠭᠠᠵᠢᠮ ᠶ᠋ᠢᠡᠷ ᠰᠠᠢᠵᠢᠷᠠᠵᠤ᠂ ᠬᠡᠷᠡᠭᠯᠡᠭᠴᠢᠳ ᠴᠸ᠋ ᠤᠯᠠᠰᠢᠷᠠᠨ᠂ ᠠᠡᠭᠬᠠᠨ ᠤ᠋ ᠵᠢᠯ ᠳ᠋ᠡᠭᠡᠨ 70 ᠭᠠᠷᠤᠶ ᠬᠣᠨᠢ ᠵᠠᠷᠤᠭᠠᠳ 12 ᠲᠦᠮᠡ ᠭᠠᠷᠤᠶ ᠲᠥᠭᠥᠷᠢᠭ ᠤ᠋ᠨ ᠴᠡᠪᠡᠷ ᠤᠷᠤᠯᠭᠠ ᠤᠯᠤᠬᠰᠠᠨ ᠪᠦᠭᠡᠳ ᠪᠠᠰᠠ ᠬᠦᠷᠰᠢ ᠠᠢᠯ ᠵᠢᠡᠨ ᠬᠠᠪᠰᠤᠷᠤᠨ 20 ᠭᠠᠷᠤᠢ ᠬᠤᠨᠢ ᠵᠢ ᠨᠢ ᠤᠷᠤᠯᠠᠨ ᠪᠤᠷᠤᠯᠠᠭᠤᠯᠵᠤ ᠦᠭᠴᠠᠢ᠃ 《ᠲᠡᠮ ᠲᠡᠮ ᠳ᠋ᠡᠭᠡᠨ ᠲᠠᠬᠡᠰᠤ ᠡᠷᠴᠢᠮ ᠳ᠋ᠡᠬᠡᠨ ᠬᠡᠳᠡᠭ᠂ ᠠᠢᠯ ᠰᠠᠭᠠᠬᠠᠯᠳᠠ ᠪᠠᠨ ᠬᠠᠪᠰᠤᠷᠬᠤ ᠨᠢ ᠡᠡᠭ ᠤ᠋ᠨ ᠶᠠᠪᠤᠳᠠᠯ ᠶᠤᠮ 》 ᠬᠡᠵᠤ ᠰᠠᠢᠨᠠ ᠬᠡᠯᠡᠨᠠ᠃
2025 ᠣᠨ ᠤ᠋ ᠡᠪᠦᠯ ᠂ ᠨᠢᠬᠡᠨᠳᠡ ᠠᠷᠭᠠ ᠲᠤᠷᠱᠢᠯᠭᠠ ᠲᠠᠢ ᠪᠤᠯᠤᠬᠰᠠᠨ ᠰᠠᠢᠨᠠ ᠳᠠᠬᠢᠨᠲᠠ ᠬᠥᠬᠡᠬᠣᠲᠠ ᠵᠢ ᠵᠤᠷᠢᠵᠤ ᠢᠷᠡᠯᠠ᠃ ᠭᠡᠪᠡᠴᠤ ᠡᠨᠡ ᠤᠳᠠᠭᠠ ᠲᠡᠷᠡ ᠭᠠᠬᠴᠠᠭᠠᠷ ᠵᠢᠡᠨ ᠢᠷᠡᠭᠰᠡᠨ ᠪᠢᠰᠢ᠂ ᠬᠠᠷᠢᠨ ᠨᠤᠳᠤᠭ ᠤ᠋ᠨ ᠳᠡᠭᠦᠦ ᠵᠠᠶᠠᠭᠠ ᠲᠠᠢ ᠬᠠᠮᠳᠤ ᠢᠷᠡᠭᠰᠡᠨ ᠠᠵᠢ᠃ ᠰᠠᠢᠨᠠ ᠦᠷᠭᠦᠯᠵᠢᠯᠡᠨ ᠰᠥᠨᠢᠳ ᠬᠤᠨᠢ ᠶ᠋ᠢᠨ ᠮᠢᠬᠠ ᠪᠡᠨ ᠬᠤᠳᠠᠯᠳᠤᠵᠤ᠂ ᠵᠠᠶᠠᠭᠠ ᠰᠦᠨᠢᠳ ᠨᠤᠳᠤᠭ ᠤ᠋ᠨ ᠰᠢᠮᠠ ᠰᠢᠬᠦᠰᠤ ᠰᠠᠢᠲᠠᠶ ᠦᠬᠡᠷ ᠦ᠋ᠨ ᠮᠢᠬᠠ ᠪᠡᠨ ᠬᠤᠳᠠᠯᠳᠤᠪᠠ᠃ ᠢᠩᠬᠢᠬᠡᠳ ᠲᠡᠳᠡᠨ ᠤ᠋ ᠪᠦᠲᠦᠭᠡᠭ᠌ᠳᠡᠬᠦᠨ ᠨᠠᠩ ᠢᠯᠡᠭᠦᠦ ᠪᠠᠶᠠᠯᠢᠭ ᠪᠤᠯᠵᠤ ᠬᠡᠷᠡᠭᠯᠡᠭᠴᠢᠳ ᠴᠸ᠋ ᠤᠤᠯ ᠤ᠋ᠨ ᠬᠢ ᠡᠴᠡ ᠪᠡᠨ ᠨᠡᠮᠡᠭᠳᠡᠵᠠᠢ᠃ 《ᠮᠠᠨ ᠤ᠋ ᠠᠬᠠ ᠵᠢᠨ ᠲᠠᠭᠠᠭᠤᠯᠭᠠ ᠲᠤᠤᠷᠠ ᠪᠢ ᠴᠢᠨᠢ ᠰᠡᠳᠬᠢᠯ ᠠᠮᠤᠷ ᠦᠭᠡᠷ ᠤ᠋ᠨ ᠮᠢᠬᠠ ᠪᠡᠨ ᠬᠠᠵᠠᠭᠤ ᠳ᠋ᠤᠨᠢ ᠬᠤᠳᠠᠯᠳᠤᠵᠤ ᠪᠠᠢᠨᠠ᠃ ᠡᠨᠡ ᠠᠷᠪᠠᠭᠠᠳ ᠡᠳᠤᠷ ᠲᠸ᠋ 7 ᠦᠭᠡᠷ ᠤ᠋ᠨ ᠮᠢᠬᠠ ᠬᠤᠳᠠᠯᠳᠤᠵᠤ ᠂ 4 ᠲᠦᠮᠡ ᠭᠠᠷᠤᠢ ᠲᠦᠬᠦᠷᠢᠭ ᠤ᠋ᠨ ᠴᠡᠪᠡᠷ ᠤᠷᠤᠯᠭᠠ ᠡᠪᠤᠷᠳᠤᠯᠡᠴᠢᠭᠡᠯᠠ᠃ ᠨᠤᠳᠤᠭ ᠲᠠᠭᠠᠨ ᠪᠤᠯ ᠰᠠᠷᠠ ᠳ᠋ᠠᠭᠠᠨ ᠪᠤᠯᠤᠭᠠᠳ 10 ᠦᠭᠡᠷ ᠵᠠᠷᠤᠵᠤ ᠲᠡᠢᠯᠬᠦ ᠦᠬᠡᠢ ᠰᠢᠤ！》 ᠭᠡᠵᠤ ᠵᠠᠶᠠᠭᠠ ᠶᠡᠭᠡ ᠯᠡ ᠪᠠᠶᠠᠷᠳᠠᠢ ᠶᠠᠷᠢᠨᠠ᠃
2024 ᠤᠨ ᠤ᠋ ᠢᠳᠡᠭᠡᠮᠵᠢ ᠰᠠᠢᠳᠠᠢ ᠪᠤᠷᠤᠯᠠᠭᠤᠯᠭᠠ ᠡᠴᠡ ᠪᠤᠯᠵᠤ ᠬᠠᠭᠤᠴᠢᠨ ᠬᠡᠷᠡᠭᠯᠡᠭᠴᠢᠳ ᠨᠢ ᠴᠢᠮᠡᠭᠡ ᠰᠤᠨᠤᠰᠤᠮᠠᠬᠴᠠ ᠬᠣᠢᠨᠠ ᠬᠣᠢᠨᠠ ᠡᠴᠡ ᠪᠠᠨ ᠬᠦᠷᠦᠯᠴᠡᠨ ᠢᠷᠡᠭᠰᠡᠨ ᠪᠦᠭᠡᠳ ᠱᠢᠨᠡ ᠬᠡᠷᠡᠭᠯᠡᠭᠴᠢᠳ ᠴᠤ᠌ ᠨᠠᠢᠵᠠ ᠨᠦᠭᠦᠳ ᠤ᠋ᠨ ᠶ᠋ᠢᠡᠨ ᠲᠠᠨᠢᠯᠴᠠᠭᠤᠯᠭᠠ ᠪᠤᠶᠤ ᠰᠢᠭᠤᠳ ᠨᠡᠪᠳᠡᠷᠡᠬᠦᠯᠭᠡ ᠪᠡᠷ ᠨᠢ ᠴᠢᠮᠡᠭᠡ ᠤᠯᠵᠤ ᠴᠤᠪᠤᠷᠠᠨ ᠢᠷᠡᠬᠦ ᠪᠤᠯᠵᠠᠢ᠃ 《ᠪᠢᠳᠡ 2024 ᠤᠨ ᠳ᠋ᠤ ᠡᠨᠳᠡ ᠡᠴᠡ ᠬᠣᠨᠢᠨ ᠮᠢᠬᠠ ᠠᠪᠤᠬᠰᠠᠨ ᠶᠤᠮ᠂ ᠡᠳᠡᠨ ᠤ᠋ ᠬᠣᠨᠢᠨ ᠮᠢᠬᠠ ᠬᠡᠲᠦ ᠳᠡᠯᠭᠡᠭᠦᠷ ᠦ᠋ᠨ ᠬᠢᠡᠴᠡ ᠵᠢᠭᠠᠬᠠᠨ ᠦᠨᠡᠲᠡᠶ ᠪᠣᠯᠪᠠᠴᠤ᠌ ᠮᠢᠬᠠᠨ ᠤ᠋ ᠴᠢᠨᠡᠷ ᠨᠢ ᠰᠠᠢᠨ᠂ ᠠᠮᠲᠠᠲᠠᠶ ᠮᠦᠷᠳᠡᠬᠡᠨ ᠱᠢᠨᠡ ᠰᠣᠷᠭᠣᠭ 》 ᠬᠡᠵᠤ ᠬᠣᠲᠠ ᠶ᠋ᠢᠨ ᠠᠷᠠᠳ ᠸᠠᠩ ᠠᠪᠤᠭᠠᠶ ᠬᠣᠨᠢᠨ ᠮᠢᠬᠠ ᠰᠣᠩᠭᠣᠬᠤᠶ᠋ᠢᠨ ᠳᠠᠭᠠᠤ ᠰᠤᠷᠪᠤᠯᠵᠢᠯᠠᠭ᠍ᠴᠢ ᠳ᠋ᠤ ᠬᠡᠯᠠᠵᠤ ᠪᠠᠢᠯᠠ᠃
ᠤᠳᠤ ᠰᠠᠢᠨᠠ ᠵᠢᠨ ᠮᠢᠬᠠ ᠪᠤᠷᠤᠯᠠᠭᠤᠯᠬᠤ ᠲᠡᠷᠭᠡᠨ ᠤ᠋ ᠡᠮᠤᠨᠠ ᠶᠡᠬᠡ ᠯᠡ ᠬᠦᠷ ᠬᠦᠭᠵᠢᠶᠠᠨ ᠲᠠᠢ ᠪᠤᠯᠵᠤ᠂ ᠬᠠᠮᠤᠭ ᠤ᠋ᠨ ᠠᠷᠪᠢᠨ ᠳ᠋ᠠᠭᠠᠨ ᠡᠳᠦᠷ ᠤ᠋ᠨ ᠲᠦᠮᠡ ᠭᠠᠷᠤᠶ ᠲᠥᠭᠥᠷᠢᠭ ᠦ᠋ᠨ ᠬᠣᠨᠢᠨ ᠮᠢᠬᠠ ᠪᠠ ᠳᠣᠯᠣᠭᠠᠨ ᠮᠢᠩᠭᠠ ᠭᠠᠷᠤᠶ ᠲᠥᠭᠥᠷᠢᠭ ᠦ᠋ᠨ ᠦᠬᠡᠷ ᠦ᠋ᠨ ᠮᠢᠬᠠ ᠬᠤᠳᠠᠯᠳᠤᠵᠤ ᠪᠠᠢᠨᠠ᠃ ᠨᠡᠡᠭ ᠪᠠᠶᠠᠷᠯᠠᠭᠤᠰᠢᠳᠠᠢ ᠨᠢ ᠱᠢᠭᠤᠳ ᠨᠡᠪᠲᠡᠷᠡᠭᠦᠯᠭᠡ ᠪᠡᠷ ᠪᠤᠷᠤᠯᠠᠭᠤᠯᠬᠤ ᠪᠤᠯᠤᠬᠰᠠᠨ ᠨᠢ ᠭᠠᠵᠠᠷ ᠣᠷᠣᠨ ᠤ᠋ ᠬᠢᠵᠠᠭᠠᠷᠯᠠᠯ ᠢ᠋ ᠳᠠᠪᠠᠵᠤ᠂ ᠬᠦᠶ᠋ᠲᠡᠨ ᠬᠡᠯᠬᠢᠶᠡᠲᠦ ᠡᠳ᠋ ᠪᠠᠷᠠᠭᠠᠨ ᠤ᠋ ᠭᠦᠶ᠋ᠯᠭᠡᠭᠡ ᠪᠡᠷ ᠳᠡᠮᠵᠢᠨ ᠲᠠᠮᠤᠴᠢ ᠵᠢᠨ ᠲᠠᠯᠠ ᠵᠢᠨ ᠦᠨᠦᠷ ᠠᠮᠲᠠ ᠵᠢ ᠬᠠᠡᠭᠬᠤᠯᠤᠭᠤᠯᠤᠬᠰᠠᠨ ᠦᠬᠡᠷ ᠬᠣᠨᠢᠨ ᠮᠢᠬᠠ ᠨᠢ ᠪᠡᠭᠡᠵᠢᠩ᠂ ᠲᠢᠶᠠᠨᠵᠢᠨ᠂ ᠾᠸᠪᠸᠢ᠂ ᠱᠧᠨᠵᠧᠨ ᠵᠡᠷᠭᠡ ᠭᠠᠵᠠᠷ ᠬᠦᠷᠳᠡᠯᠠ ᠪᠣᠷᠣᠯᠠᠭᠤᠯᠤᠭ᠍ᠳᠠᠵᠤ᠂ ᠡᠮᠦᠨᠡᠲᠦ ᠣᠷᠣᠨ ᠤ᠋ ᠮᠠᠰᠢ ᠣᠯᠠᠨ ᠬᠡᠷᠡᠭ᠌ᠯᠡᠭ᠌ᠴᠢᠳ ᠲᠤ᠌ ᠲᠠᠯᠠ ᠨᠤᠲᠤᠭ ᠤ᠋ᠨ ᠴᠤᠯ ᠪᠠᠢᠭᠠᠯᠢ ᠵᠢᠨ ᠰᠦᠨᠢᠳ ᠬᠤᠨᠢ ᠶ᠋ᠢᠨ ᠮᠢᠬᠠ ᠵᠢ ᠠᠮᠲᠠᠯᠠᠭᠤᠯᠤᠭ᠍ᠰᠠᠨ ᠪᠠᠢᠨᠠ᠃ 《ᠤᠳᠤ ᠴᠢᠨᠢ ᠭᠠᠷ ᠤᠲᠠᠰᠤ ᠪᠠᠢᠪᠠᠯ ᠤᠷᠤᠨ ᠳ᠋ᠠᠭᠠᠨ ᠰᠠᠭᠤᠭᠠᠳ ᠠᠷᠠᠯᠵᠢᠶᠠ ᠪᠠᠨ ᠪᠦᠬᠦ᠌ ᠤᠯᠤᠰ ᠲᠤ᠌ ᠬᠢᠵᠦ᠍ ᠳᠡᠢᠯᠬᠦ᠌ ᠪᠣᠯᠵᠠᠢ》 ᠬᠡᠵᠤ ᠰᠠᠢᠨᠠ ᠭᠠᠷ ᠤᠲᠠᠰᠤ ᠪᠠᠨ ᠪᠠᠷᠢᠵᠤ᠂ ᠪᠦᠬᠦ᠌ ᠤᠯᠤᠰ ᠤ᠋ᠨ ᠡᠯᠡ ᠭᠠᠵᠠᠷ ᠡᠴᠡ ᠢᠷᠡᠭ᠌ᠰᠡᠨ ᠵᠠᠬᠢᠶᠠᠯᠠᠭᠠ ᠶ᠋ᠢ ᠲᠤᠰᠤᠭᠠᠳ ᠨᠢᠭᠤᠷ ᠲᠦᠬᠦᠷᠡᠩ ᠪᠠᠶᠠᠷ ᠪᠠᠶᠠᠰᠤᠯ ᠲᠠᠢ ᠪᠡᠷ ᠶᠠᠭᠠᠷᠠᠯᠳᠤᠨᠠ᠃
ᠮᠠᠯᠴᠢᠨ ᠰᠠᠢᠨᠠ ᠬᠦᠬᠡᠬᠤᠳᠠ ᠳ᠋ᠤ ᠬᠤᠨᠢᠨ ᠮᠢᠬᠠ ᠪᠤᠷᠤᠯᠠᠭᠤᠯᠵᠤ ᠪᠠᠢᠭᠠ ᠨᠢ᠃
2025 ᠣᠨ ᠤ᠋ 7 ᠰᠠᠷᠠ ᠳ᠋ᠤ᠂ ᠰᠠᠢᠨᠠ 《ᠮᠠᠯᠴᠢᠨ ᠰᠠᠢᠨᠠ 》 ᠬᠡᠬᠦ ᠲᠠᠸᠠᠷ ᠤ᠋ᠨ ᠲᠡᠮᠳᠡᠭ ᠢ᠋ ᠭᠤᠶᠤᠴᠢᠯᠠᠨ ᠳᠠᠩᠰᠠᠯᠠᠭᠤᠯᠵᠤ᠂ ᠮᠠᠯ ᠤ᠋ᠨ ᠠᠰᠢᠭ ᠰᠢᠮᠠ ᠳ᠋ᠡᠭᠡᠨ ᠵᠢᠩᠬᠢᠨᠢ 《 ᠪᠡᠶᠡᠶ᠋ᠢᠨ ᠦᠨᠡᠮᠯᠡᠯ 》 ᠤᠯᠭᠤᠪᠠ᠃ ᠲᠠᠸᠠᠷ ᠤ᠋ᠨ ᠲᠡᠮᠳᠡᠭ ᠢ᠋ ᠲᠠᠡᠭᠰᠠᠯᠠᠭᠤᠯᠤᠬᠰᠠᠨ ᠶ᠋ᠢᠡᠷ ᠮᠠᠯ ᠤ᠋ᠨ ᠠᠰᠢᠭ ᠰᠢᠮᠠ ᠨᠢ ᠨᠠᠩ ᠥᠷᠢᠰᠦᠯᠳᠦᠬᠦ᠌ ᠬᠦᠴᠦᠨ ᠲᠡᠶ ᠪᠣᠯᠤᠭᠰᠠᠨ ᠪᠦᠭᠡᠳ ᠬᠡᠷᠡᠭ᠌ᠯᠡᠭ᠌ᠴᠢᠳ ᠴᠦ᠍ ᠨᠠᠩ ᠰᠠᠨᠠᠭᠠ ᠠᠮᠤᠷ ᠬᠤᠳᠠᠯᠳᠤᠨ ᠠᠪᠬᠤ ᠪᠤᠯᠵᠠᠢ᠃ ᠰᠠᠢᠨᠠ ᠡᠨᠡ ᠡᠪᠦᠯ ᠬᠦᠬᠡᠬᠤᠳᠠ ᠳ᠋ᠤ ᠢᠷᠡᠭᠰᠡᠨ 10 ᠡᠳᠦᠷ ᠤ᠋ᠨ ᠲᠤᠳᠤᠷᠠ 40 ᠬᠣᠨᠢ ᠵᠠᠷᠤᠵᠤ᠂ 6 ᠲᠦᠮᠡ ᠭᠠᠷᠤᠢ ᠲᠥᠭᠥᠷᠢᠭ ᠦ᠋ᠨ ᠴᠡᠪᠡᠷ ᠤᠷᠤᠯᠭᠠ ᠣᠯᠵᠤ ᠪᠢᠯᠡ᠃ ᠡᠨᠡ ᠨᠢ ᠤᠯᠠᠮᠵᠢᠯᠠᠯᠳᠤ ᠮᠠᠶᠢᠭ ᠵᠢᠡᠷ ᠵᠠᠬᠠ ᠵᠢᠨ ᠮᠠᠢᠮᠠᠢᠴᠢᠨ ᠳ᠋ᠤ ᠠᠮᠢᠳᠤ ᠪᠡᠷ ᠨᠢ ᠬᠤᠳᠠᠯᠳᠤᠬᠤ ᠵᠢ ᠪᠤᠳᠤᠪᠡᠯ ᠨᠢᠭᠡ ᠬᠤᠨᠢ ᠲᠡᠭᠡᠷᠠ ᠡᠴᠡ ᠢᠯᠡᠬᠦᠤ 300 — 400 ᠲᠦᠬᠦᠷᠢᠭ ᠤ᠋ᠨ ᠤᠷᠤᠯᠭᠠ ᠤᠯᠵᠤ ᠪᠠᠢᠨᠠ᠃ 《ᠲᠠᠸᠠᠷ ᠤ᠋ᠨ ᠲᠡᠮᠳᠡᠭ ᠲᠡᠶ ᠪᠣᠯᠪᠠᠯ ᠦᠪᠡᠷ ᠤ᠋ᠨ ᠵᠢᠡᠨ ᠬᠡᠰᠡᠨ ᠲᠦᠷᠦᠯ ᠲᠡᠮᠳᠡᠭ ᠲᠠᠢ ᠪᠤᠯᠤᠬᠰᠠᠨ ᠶᠠᠪᠤᠳᠠᠯ ᠮᠦᠨ 》 ᠬᠡᠵᠤ ᠰᠠᠢᠨᠠ ᠤᠷᠮᠠᠳᠠᠢ ᠬᠡᠯᠡᠨᠠ᠃
《 ᠳᠠᠷᠠᠭᠠᠴᠢ ᠪᠡᠷ ᠶᠠᠮᠠᠷ ᠲᠦᠯᠤᠪᠯᠡᠭᠡ ᠲᠠᠢ ᠪᠤᠢ？》 ᠬᠡᠵᠤ ᠠᠰᠠᠭᠤᠬᠤ ᠳ᠋ᠤ᠂ 《ᠬᠥᠬᠡᠬᠣᠲᠠ ᠳ᠋ᠤ ᠨᠢᠭᠡ ᠵᠢᠵᠢᠭ ᠳᠡᠯᠭᠡᠭᠦᠷ ᠨᠡᠭᠡᠭᠡᠬᠦ ᠪᠡᠷ ᠲᠦᠯᠤᠪᠯᠡᠵᠤ ᠪᠤᠢ᠂ ᠭᠤᠤᠯᠳᠠᠭᠤ ᠨᠤᠲᠤᠭ ᠤ᠋ᠨ ᠵᠢᠡᠨ ᠦᠬᠡᠷ ᠬᠣᠨᠢᠨ ᠮᠢᠬᠠ᠂ ᠴᠠᠭᠠᠨ ᠢᠳᠡᠭᠡᠨ᠂ ᠪᠤᠤᠪᠤ ᠪᠤᠭᠤᠷᠰᠤᠭ ᠵᠡᠷᠭᠡ ᠵᠢ ᠲᠥᠪᠯᠡᠷᠡᠭᠦᠯᠦᠨ ᠪᠤᠷᠤᠯᠠᠭᠤᠯᠬᠤ ᠰᠠᠨᠠᠭᠠ ᠲᠠᠢ᠃ ᠢᠡᠭᠭᠢᠪᠡᠯ ᠬᠠᠭᠤᠴᠢᠨ ᠬᠡᠷᠡᠭᠯᠡᠭᠴᠢᠳ ᠲᠸ᠋ ᠨᠡᠡᠭ ᠲᠦᠬᠦᠮ ᠪᠤᠯᠵᠤ᠂ ᠪᠢᠳᠡᠨ ᠢ᠋ ᠲᠤᠰᠬᠠᠢᠯᠠᠨ ᠬᠦᠯᠢᠶᠡᠬᠦ᠌ ᠬᠡᠷᠡᠭ ᠦᠭᠡᠢ 》 ᠬᠡᠵᠤ ᠰᠠᠢᠨᠠ ᠢᠳᠡᠬᠡᠯ ᠲᠡᠬᠦᠯᠳᠡᠷ ᠶᠠᠷᠢᠨᠠ᠃ ᠡᠨᠡ ᠵᠢᠯ ᠲᠡᠷᠡ 120 ᠬᠣᠨᠢ ᠵᠠᠷᠤᠬᠤ ᠪᠡᠷ ᠪᠡᠯᠡᠳᠭᠡᠵᠦ᠍ ᠂ ᠰᠢᠨᠡᠯᠡᠬᠦ ᠡᠴᠡ ᠡᠮᠦᠨᠡ ᠪᠦᠬᠦᠨ ᠢ᠋ ᠬᠤᠳᠠᠯᠳᠤᠵᠤ ᠳᠠᠭᠤᠰᠭᠠᠬᠤ ᠪᠠᠷ ᠲᠥᠯᠥᠪᠯᠡᠵᠦ᠍ ᠪᠠᠢᠨᠠ᠃
ᠲᠠᠮᠤᠴᠢ ᠵᠢᠨ ᠲᠠᠯᠠ ᠡᠴᠡ ᠬᠦᠬᠡᠬᠤᠳᠠ ᠵᠢᠨ ᠵᠠᠬᠠ ᠵᠢ ᠵᠤᠷᠢᠬᠰᠠᠨ ᠮᠠᠯᠴᠢᠨ ᠰᠠᠢᠨᠠ ᠵᠢᠨ ᠦᠯᠢᠭᠡᠷ ᠡᠢᠮᠤ ᠪᠠᠢᠨᠠ᠃ ᠬᠥᠬᠡᠬᠣᠲᠠ ᠳ᠋ᠤ ᠰᠠᠢᠨᠠ ᠮᠡᠲᠦ᠍ ᠶ᠋ᠢᠨ ᠬᠦᠮᠦᠨ ᠪᠠᠰᠠ ᠮᠠᠰᠢ ᠤᠯᠠᠨ ᠪᠤᠢ᠂ ᠲᠡᠳᠡ ᠬᠦᠳᠡᠬᠡ ᠨᠤᠲᠤᠭ ᠤ᠋ᠨ ᠬᠦᠮᠦᠰ ᠤ᠋ᠨ ᠡᠭᠡᠯ ᠪᠣᠷᠣᠭ᠍ᠵᠢᠭᠤᠨ ᠪᠦᠬᠡᠳ ᠲᠡᠰᠪᠦᠷᠢ ᠬᠠᠲᠠᠭᠤᠵᠢᠯᠲᠠᠢ ᠵᠠᠩ ᠠᠭᠠᠯᠢ ᠳ᠋ᠠᠭᠠᠨ ᠬᠦᠳᠦᠯᠦᠭᠳᠡᠨ᠂ ᠲᠦᠮᠡ ᠲᠦᠴᠢᠬᠢᠨᠡᠵᠦ ᠪᠤᠮᠠ ᠪᠤᠵᠢᠬᠢᠨᠠᠭᠰᠠᠨ ᠬᠤᠳᠠ ᠵᠢᠨ ᠤᠷᠴᠢᠨ ᠳ᠋ᠤ ᠠᠵᠠ ᠲᠣᠬᠢᠶᠠᠯ ᠤ᠋ᠨ ᠤᠷᠤᠨ ᠵᠠᠢ ᠬᠠᠢᠵᠤ᠂ ᠦᠪᠡᠷ ᠤ᠋ᠨ ᠬᠡᠰᠡᠨ ᠦᠢᠯᠡᠰ ᠤ᠋ᠨ ᠵᠠᠮ ᠵᠢᠡᠨ ᠬᠦᠴᠦᠯᠡᠨ ᠴᠤᠭᠴᠠᠯᠠᠬᠤ ᠳ᠋ᠤ ᠬᠦᠬᠡᠬᠤᠳᠠ ᠴᠸ᠋ ᠨᠡᠭᠡᠭᠡᠯᠲᠡᠲᠤ ᠣᠪᠣᠷ ᠶ᠋ᠢᠡᠷ ᠲᠡᠳᠡᠨ ᠢ᠋ ᠬᠦᠯᠢᠶᠠᠨ ᠠᠪᠴᠤ᠌ ᠪᠠᠢᠨᠠ᠃ ᠬᠦᠬᠡᠬᠤᠳᠠ 《ᠠᠵᠢᠯ ᠣᠯᠭᠣᠯᠲᠠ ᠶ᠋ᠢ ᠠᠬᠢᠭᠤᠯᠬᠤ ᠲᠦᠷᠢᠮ 》 ᠵᠢᠡᠷ ᠬᠥᠳᠡᠭᠡ ᠲᠣᠰᠭᠣᠨ ᠤ᠋ ᠬᠥᠳᠡᠯᠮᠦᠷᠢ ᠬᠦᠴᠦ ᠵᠢᠨ ᠬᠦᠬᠡᠬᠤᠳᠠ ᠳ᠋ᠤ ᠢᠷᠡᠵᠤ ᠠᠵᠢᠯ ᠤᠯᠬᠤ ᠳ᠋ᠤ ᠲᠦᠷᠦ᠍ ᠶ᠋ᠢᠨ ᠪᠤᠳᠤᠯᠭᠠ ᠶ᠋ᠢᠨ ᠳᠡᠮᠵᠢᠯᠭᠡ ᠬᠠᠩᠭᠠᠵᠤ᠂ ᠪᠠᠰᠠ ᠦᠢᠯᠡᠰ ᠪᠤᠰᠬᠠᠬᠤ ᠶ᠋ᠢ ᠲᠡᠳᠬᠦᠨ ᠳᠡᠮᠵᠢᠬᠦ᠌ ᠪᠦᠷᠢᠨ ᠲᠡᠭᠦᠯᠳᠡᠷ ᠱᠢᠰᠲ᠋ᠧᠮ ᠵᠢᠴᠢ ᠠᠵᠢᠯ ᠣᠯᠭᠣᠬᠤ ᠳᠥᠭᠥᠮ ᠳᠥᠲᠡ ᠦᠢᠯᠡᠴᠢᠯᠡᠭᠡ ᠪᠡᠷ ᠲᠠᠮᠵᠢᠨ ᠡᠯᠠ ᠭᠠᠵᠠᠷ ᠡᠴᠡ ᠬᠦᠬᠡᠬᠤᠳᠠ ᠳ᠋ᠤ ᠢᠷᠡᠭᠰᠡᠨ ᠮᠠᠯᠴᠢᠨ ᠲᠠᠷᠢᠶᠠᠴᠢᠨ ᠤ᠋ ᠠᠳᠠᠯ ᠪᠤᠰᠬᠠᠵᠤ ᠦᠢᠯᠡᠰ ᠪᠦᠲᠦᠭᠡᠬᠦ ᠵᠠᠮ ᠢ᠋ ᠤᠯᠠᠮ ᠰᠠᠷᠠᠭᠤᠯ ᠳᠠᠷᠳᠠᠩ ᠪᠣᠯᠭᠠᠪᠠ᠃
ᠮᠠᠯᠴᠢᠨ ᠰᠠᠢᠨᠠ ᠱᠢᠷᠭᠠᠭᠤ ᠬᠠᠢᠯᠳᠠ ᠪᠡᠷ ᠵᠢᠡᠨ ᠮᠠᠯ ᠤ᠋ᠨ ᠠᠰᠢᠭ ᠰᠢᠮᠠ ᠵᠢᠨ ᠪᠤᠷᠤᠯᠠᠭᠤᠯᠭᠠ ᠵᠢᠨ ᠠᠷᠭᠠ ᠵᠠᠮ ᠢ᠋ ᠦᠷᠬᠡᠳᠬᠡᠵᠤ᠂ ᠦᠨᠡᠨᠴᠢ ᠢᠲᠡᠭᠡᠮᠵᠢ ᠪᠡᠷ ᠵᠢᠡᠨ ᠵᠠᠬᠠ ᠳᠡᠯᠭᠡᠭᠦᠷ ᠦ᠋ᠨ ᠬᠦᠷᠢᠶᠡᠯᠡᠯ ᠢ᠋ ᠣᠯᠵᠤ᠂ ᠬᠠᠷᠢᠯᠴᠠᠨ ᠬᠠᠪᠰᠤᠷᠤᠯᠴᠠᠬᠤ ᠪᠠᠷ ᠡᠪ ᠨᠠᠢᠷ ᠤ᠋ᠨ ᠬᠦᠴᠦᠨ ᠢ᠋ ᠳᠠᠮᠵᠢᠭᠤᠯᠵᠤ ᠪᠠᠢᠨᠠ᠃ ᠲᠡᠭᠦᠨ ᠤ᠋ ᠳᠡᠯᠭᠡᠭᠦᠷ ᠤᠳᠠᠯ ᠥᠬᠡᠶ ᠡᠭᠦᠳᠡ ᠪᠡᠨ ᠨᠡᠭᠡᠭᠡᠨ ᠡᠷᠦᠬᠡ ᠪᠡᠨ ᠰᠡᠭᠦᠵᠦ ᠂ ᠨᠠᠩ ᠣᠯᠠᠨ ᠨᠤᠳᠤᠭ ᠤ᠋ᠨ ᠭᠠᠷᠤᠯᠳᠠ ᠪᠠᠨ ᠬᠦᠬᠡᠬᠣᠲᠠ ᠶ᠋ᠢᠨ ᠬᠡᠷᠡᠭ᠌ᠯᠡᠭ᠌ᠴᠢᠳ ᠲᠦ᠍ ᠬᠦᠷᠳᠡᠬᠡᠨ᠂ ᠨᠠᠩ ᠣᠯᠠᠨ ᠨᠤᠲᠤᠭ ᠤ᠋ᠨ ᠠᠬᠠ ᠳᠡᠭᠦᠦ᠍ ᠨᠡᠷ ᠵᠢᠡᠨ ᠳᠠᠢᠴᠢᠯᠠᠨ ᠬᠠᠮᠲᠤ ᠪᠠᠷ ᠪᠠᠶᠠᠵᠢᠬᠤ ᠵᠠᠮ ᠶ᠋ᠢᠡᠷ ᠵᠠᠮᠨᠠᠵᠤ ᠂ ᠦᠢᠯᠡᠰ ᠤ᠋ᠨ ᠮᠦᠷ ᠵᠢᠡᠨ ᠬᠥᠬᠡᠬᠣᠲᠠ ᠶ᠋ᠢᠨ ᠬᠠᠯᠠᠭᠤᠨ ᠬᠦᠷᠤᠰᠤᠨ ᠳ᠋ᠤ ᠨᠠᠩ ᠬᠦᠨ ᠲᠠᠮᠠᠭᠠᠯᠠᠬᠤ ᠵᠢ ᠬᠦᠰᠡᠨ ᠵᠦᠩᠨᠡᠶᠠ！