— ᠮᠤᠩᠭᠤᠯ ᠦᠨᠳᠦᠰᠦᠲᠡᠨ ᠎ᠦ ᠠᠯᠳᠠᠷᠳᠤ  ᠰᠤᠷᠪᠤᠯᠵᠢ ᠪᠢᠴᠢᠭ᠎ᠦᠨ  ᠰᠤᠳᠤᠯᠭᠠᠲᠠᠨ ᠴᠤᠢᠵᠢ  ᠭᠤᠸᠠᠢ᠎ᠶ᠋ᠢ ᠲᠤᠷᠠᠳᠭᠠᠬᠤ ᠨᠢ

ᠪᠢ ᠭᠤᠴᠢ ᠲᠦᠴᠢᠨ ᠵᠢᠯ ᠰᠤᠷᠪᠤᠯᠵᠢᠯᠠᠭ᠍ᠴᠢ ᠶᠠᠪᠤᠵᠤ᠂ ᠤᠯᠠᠨ ᠬᠦᠮᠦᠰ᠎ᠢ  ᠰᠤᠷᠪᠤᠯᠵᠢᠯᠠᠨ ᠪᠢᠴᠢᠵᠦ᠍ ᠰᠤᠨᠢᠨ ᠰᠡᠳᠭᠦᠯ ᠲᠡᠭᠡᠷ᠎ᠡ ᠨᠡᠢᠳᠡᠯᠡᠭᠦᠯᠦᠭ᠌ᠰᠡᠨ ᠪᠤᠯᠪᠠᠴᠤ᠌᠂  ᠦᠪᠡᠷ᠎ᠦᠨ ᠵᠢᠠᠨ ᠬᠠᠮᠤᠭ᠎ᠤᠨ ᠰᠠᠢᠨ ᠤᠢᠯᠠᠭᠠᠯᠴᠠᠵᠤ ᠮᠡᠲᠡᠯᠴᠡᠳᠡᠭ᠂ ᠶᠠᠪᠤᠯᠴᠠᠵᠤ ᠰᠠᠭᠤᠯᠴᠠᠳᠠᠭ  ᠪᠠᠢᠬ᠍ᠰᠠᠨ ᠨᠢᠭᠡ ᠬᠦᠮᠦᠨ  ᠵᠢᠠᠨ  ᠰᠡᠷᠡᠭᠦᠨ ᠲᠤᠩᠭᠠᠯᠠᠭ ᠠᠬᠤᠢ ᠳ᠋ᠤᠨᠢ ᠰᠤᠷᠪᠤᠯᠵᠢᠯᠠᠵᠤ ᠪᠢᠴᠢᠶ᠎ᠡ ᠭᠡᠳ ᠪᠢᠴᠢᠵᠦ᠍ ᠴᠢᠲᠠᠭ᠎ᠠ  ᠦᠭᠡᠢ  ᠶᠡᠷᠦᠨᠢ ᠰᠡᠳᠭᠢᠯ ᠲᠤᠨᠳᠠᠭᠤᠷ  ᠰᠠᠨᠠᠭ᠍ᠲᠠᠭᠠᠳ ᠪᠠᠢᠲᠠᠭ᠃ ᠤᠳᠤ ᠪᠢ 《 ᠬᠡᠷᠡᠭ᠎ᠡᠴᠡ ᠭᠠᠷᠴᠤ᠌ ᠴᠡᠷᠢᠭ ᠎ᠡᠴᠡ ᠪᠠᠭᠤᠬ᠍ᠰᠠᠨ》  ᠪᠤᠯᠪᠠᠴᠤ᠌᠂ ᠡᠨᠡ ᠬᠦ᠌ ᠬᠠᠷᠠᠮᠰᠠᠯ ᠎ᠢ ᠶᠠᠭᠠᠬᠢᠬ᠍ᠰᠠᠨ  ᠴᠤ᠌  ᠨᠦᠬᠦᠯ ᠦᠭᠡᠢ ᠪᠤᠯᠬᠤ ᠦᠭᠡᠢ ᠭᠡᠵᠦ᠍ ᠬᠦᠱᠢᠭᠦᠨ ᠪᠢᠷ᠎ᠢ ᠬᠦᠲᠡᠯᠭᠡᠵᠦ᠍ ᠪᠠᠢᠬᠤ ᠨᠢ ᠡᠨᠡ᠃ ᠮᠢᠨᠤ  ᠪᠢᠴᠢᠶ᠎ᠡ  ᠭᠡᠰᠡᠨ ᠡᠨᠡ ᠬᠦᠮᠦᠨ ᠪᠤᠯ ᠮᠤᠩᠭᠤᠯ ᠦᠨᠳᠦᠰᠦᠲᠡᠨ᠎ᠦ ᠠᠯᠳᠠᠷᠳᠤ ᠰᠤᠷᠪᠤᠯᠵᠢ ᠪᠢᠴᠢᠭ᠎ᠤᠨ ᠰᠤᠳᠤᠯᠭᠠᠲᠠᠨ ᠴᠤᠢᠵᠢ  ᠭᠤᠸᠠᠢ ᠪᠤᠯᠤᠨ᠎ᠠ᠃ ᠮᠢᠨᠤ ᠰᠤᠷᠪᠤᠯᠵᠢᠯᠠᠭ᠎ᠠ ᠨᠢ ᠡᠴᠤᠰ ᠰᠡᠭᠦᠯ᠎ᠳᠡᠭᠡᠨ ᠲᠤᠷᠠᠳᠭᠠᠯ ᠪᠤᠯᠵᠤ  ᠬᠤᠴᠤᠷᠤᠨ᠎ᠠ ᠭᠡᠮᠡᠨ ᠰᠠᠨᠠᠬ᠍ᠰᠠᠨ ᠦᠭᠡᠢ᠃

ᠴᠤᠢᠵᠢ ᠭᠤᠸᠠᠢ ᠎ᠶ᠋ᠢ  ᠪᠢ ᠦᠪᠡᠷ᠎ᠦᠨ ᠵᠢᠠᠨ ᠬᠠᠮᠤᠭ᠎ᠤᠨ ᠰᠠᠢᠨ ᠤᠢᠯᠠᠭᠠᠯᠴᠠᠵᠤ ᠮᠡᠲᠡᠯᠴᠡᠳᠡᠭ᠂  ᠶᠠᠪᠤᠯᠴᠠᠵᠤ ᠰᠠᠭᠤᠯᠴᠠᠳᠠᠭ  ᠪᠠᠢᠬ᠍ᠰᠠᠨ ᠨᠢᠭᠡ ᠬᠦᠮᠦᠨ  ᠭᠡᠲᠡᠭ ᠎ᠦᠨ  ᠤᠴᠢᠷ ᠨᠢ ᠪᠢᠳᠡ ᠬᠡᠳᠤᠨ ᠵᠢᠯ ᠨᠢᠭᠡ ᠪᠠᠢᠭᠤᠯᠭ᠎ᠠ᠎ᠳᠦ᠂ ᠲᠡᠷᠡ ᠪᠠᠢᠳᠤᠭᠠᠢ ᠨᠢᠭᠡ ᠠᠯᠪᠠᠨ ᠭᠡᠷ᠎ᠲᠦ  ᠱᠢᠷᠡᠭᠡ ᠡᠰᠡᠷᠭᠦᠯᠡᠨ ᠰᠠᠭᠤᠭᠠᠳ ᠬᠠᠮᠳᠤ  ᠠᠵᠢᠯᠯᠠᠵᠤ  ᠪᠠᠢᠬ᠍ᠰᠠᠨ ᠦᠩᠭᠡᠷᠡᠯᠳᠡ ᠲᠠᠢ᠃ ᠪᠢᠳᠡ ᠬᠡᠳᠤᠨ ᠵᠢᠯ ᠬᠠᠮᠳᠤ ᠠᠵᠢᠯᠯᠠᠵᠤ᠂ ᠴᠢᠨᠤ ᠮᠢᠨᠤ ᠦᠭᠡᠢ ᠡᠭᠡᠨᠡᠭ᠌ᠰᠢᠨ ᠲᠠᠰᠤᠯᠴᠠᠵᠤ ᠪᠢᠯᠡ᠃  ᠲᠡᠭᠡᠬᠦᠯᠡᠷ  ᠲᠡᠭᠦᠨ ᠎ᠦ  ᠪᠠᠢᠳᠠᠯ᠎ᠢ ᠰᠠᠢᠨ ᠮᠡᠳᠡᠨ᠎ᠡ᠃ ᠴᠤᠢᠵᠢ᠂  ᠪᠦᠲᠦᠨ ᠨᠡᠷ᠎ᠡ  ᠨᠢ ᠴᠤᠢᠵᠢᠺᠠᠸᠠ ᠭᠡᠳᠡᠭ᠃ ᠲᠡᠭᠦᠨ᠎ᠦ ᠲᠦᠭᠦᠮ ᠨᠠᠮᠳᠠᠷ ᠭᠡᠪᠡᠯ᠂ ᠴᠤᠢᠵᠢ 1941 ᠤᠨ᠎ᠤ 10 ᠰᠠᠷ᠎ᠠ ᠎ᠶ᠋ᠢᠨ 4 ᠎ᠳ᠋ᠦ ᠪᠠᠭᠠᠷᠢᠨ ᠵᠡᠭᠦᠨ ᠬᠤᠱᠢᠭᠤᠨ ᠎ᠤ ᠴᠠᠭᠠᠨ ᠤᠰᠤ ᠨᠤᠳᠤᠭ （ᠤᠳᠤ᠎ᠶ᠋ᠢᠨ ᠪᠠᠭᠠᠷᠢᠨ ᠪᠠᠷᠠᠭᠤᠨ ᠬᠤᠱᠢᠭᠤᠨ᠎ᠤ ᠵᠢᠷᠭᠠᠯ᠎ᠤᠨ ᠵᠠᠮ ᠰᠤᠮᠤ） ᠲᠸ᠋  ᠮᠡᠨᠳᠦᠯᠡᠵᠡᠢ᠃  ᠲᠡᠷᠡ  ᠪᠠᠭ᠎ᠠ ᠎ᠠᠴᠠ ᠪᠠᠨ ᠰᠤᠷᠭᠠᠭᠤᠯᠢ ᠰᠤᠶᠤᠯ᠎ᠤᠨ ᠮᠦᠷ᠎ᠢ ᠬᠦᠭᠡᠭᠡᠵᠦ᠍᠂  ᠨᠤᠲᠤᠭ᠎ᠤᠨ ᠵᠢᠠᠨ ᠪᠠᠭ᠎ᠠ ᠰᠤᠷᠭᠠᠭᠤᠯᠢ᠂ ᠠᠩᠬ᠎ᠠ ᠲᠤᠮᠲᠠᠳᠤ ᠪᠠᠨ ᠲᠡᠭᠦᠰᠭᠡᠵᠤ᠌᠂ 1960  ᠤᠨ᠎ᠳᠤ ᠤᠯᠠᠭᠠᠨᠬᠠᠳᠠ᠎ᠶ᠋ᠢᠨ ᠮᠤᠩᠭᠤᠯ ᠲᠤᠮᠲᠠᠳᠤ ᠰᠤᠷᠭᠠᠭᠤᠯᠢ᠎ᠠᠴᠠ ᠦᠨᠳᠦᠷ ᠲᠤᠮᠲᠠᠳᠤ ᠪᠠᠨ ᠲᠡᠭᠦᠰᠭᠡᠵᠤ ᠦᠪᠦᠷ ᠮᠤᠩᠭᠤᠯ᠎ᠤᠨ ᠶᠡᠬᠡ ᠰᠤᠷᠭᠠᠭᠤᠯᠢ᠎ᠶ᠋ᠢᠨ  ᠮᠤᠩᠭᠤᠯ ᠬᠡᠯᠡ ᠪᠢᠴᠢᠭ᠎ᠦᠨ ᠰᠠᠯᠪᠤᠷᠢ ᠎ᠳᠤ ᠱᠢᠯᠭᠠᠭᠤᠯᠤᠨ ᠤᠷᠤᠵᠤ᠂ 1965 ᠤᠨ ᠎ᠤ ᠨᠠᠮᠤᠷ ᠠᠵᠢᠯ᠎ᠤᠨ ᠢᠯᠡᠭᠡᠯᠲᠡ ᠠᠪᠴᠤ᠌  ᠪᠠᠶᠠᠨᠨᠠᠭᠤᠷ ᠠᠢᠮᠠᠭ᠎ᠤᠨ ᠷᠠᠳᠢᠤ᠋ ᠨᠡᠪᠲᠡᠷᠡᠭᠦᠯᠭᠡ᠎ᠶ᠋ᠢᠨ ᠬᠤᠷᠢᠶ᠎ᠠ᠎ᠳᠤ  ᠰᠤᠷᠪᠤᠯᠵᠢᠯᠠᠭ᠍ᠴᠢ ᠨᠠᠢᠷᠠᠭᠤᠯᠤᠭ᠍ᠴᠢ ᠪᠡᠷ ᠠᠵᠢᠯᠯᠠᠵᠤ ᠦᠩᠭᠡᠷᠡᠵᠡᠢ᠃ ᠪᠠᠭᠠᠷᠢᠨ ᠪᠠᠷᠠᠭᠤᠨ ᠬᠤᠱᠢᠭᠤᠨ᠎ᠳᠤ  ᠪᠠᠢᠬᠤ ᠦᠶ᠎ᠡ᠎ᠳᠦ ᠪᠢ ᠲᠡᠭᠦᠨ ᠲᠠᠢ ᠴᠤᠭ ᠬᠦᠳᠡᠭᠡ ᠪᠠᠭᠤᠭᠠᠳ ᠴᠠᠭᠠᠨ ᠤᠰᠤ ᠎ᠶ᠋ᠢᠨ ᠬᠦᠳᠡᠭᠡ ᠭᠡᠷ ᠲᠤᠨᠢ ᠬᠤᠨᠤᠵᠤ ᠴᠤ᠌ ᠦᠩᠭᠡᠷᠡᠭ᠌ᠰᠡᠨ᠃ ᠠᠪᠤ ᠨᠢ ᠨᠤᠲᠤᠭ ᠤᠰᠤᠨ᠎ᠳᠠᠭᠠᠨ ᠨᠡᠷᠡᠲᠡᠢ ᠰᠠᠢᠨ ᠮᠠᠯ ᠎ᠤᠨ ᠡᠮᠴᠢ᠂ ᠡᠵᠢ ᠨᠢ ᠬᠡᠦᠬᠡᠳ ᠪᠠᠭᠠᠴᠤᠳ᠎ᠢ ᠦᠵᠡᠪᠡᠯ  《ᠬᠦᠭᠡᠷᠦᠬᠦᠢ！》 ᠭᠡᠳ ᠯᠠ ᠡᠩᠬᠦᠷᠡᠢᠯᠡᠵᠦ᠍ ᠲᠠᠭᠤᠳᠠᠳᠠᠭ ᠦᠷᠦᠪᠴᠢ ᠡᠨᠡᠷᠢᠩᠭᠦᠢ ᠨᠠᠰᠤᠳᠠᠨ᠃  ᠴᠤᠢᠵᠢ ᠭᠤᠸᠠᠢ ᠠᠬ᠎ᠠ ᠲᠡᠬᠦᠦ ᠭᠤᠷᠪᠠᠭᠤᠯᠠ᠂  ᠶᠡᠬᠡ ᠲᠡᠭᠦᠦ  ᠳᠤᠷᠵᠢ 《 ᠵᠤᠤ ᠤᠳᠠ᠎ᠶ᠋ᠢᠨ ᠰᠤᠨᠢᠨ》 ᠎ᠤ᠋ ᠨᠠᠢᠷᠠᠭᠤᠯᠤᠭ᠍ᠴᠢ᠂ ᠪᠠᠭ᠎ᠠ ᠲᠡᠭᠦᠦ ᠲᠡᠭ᠌ᠵᠢᠷᠡᠬᠦ᠌ ᠨᠢ ᠪᠠᠭᠠᠷᠢᠨ ᠪᠠᠷᠠᠭᠤᠨ ᠬᠤᠱᠢᠭᠤᠨ᠎ᠤ ᠮᠤᠩᠭᠤᠯ ᠡᠮᠨᠡᠯᠭᠡ᠎ᠶ᠋ᠢᠨ  ᠬᠤᠷᠢᠶ᠎ᠠ᠎ᠶ᠋ᠢᠨ ᠡᠮᠴᠢ᠃

1971 ᠤᠨ ᠎ᠤ ᠡᠬᠢᠨ ᠵᠢᠡᠷ  ᠪᠢ ᠪᠠᠭᠠᠷᠢᠨ ᠪᠠᠷᠠᠭᠤᠨ ᠬᠤᠱᠢᠭᠤᠨ᠎ᠤ ᠨᠠᠮ᠎ᠤᠨ ᠬᠤᠷᠢᠶ᠎ᠠ᠎ᠶ᠋ᠢᠨ ᠤᠬᠠᠭᠤᠯᠬᠤ ᠬᠡᠯᠲᠡᠰ᠎ᠦᠨ ᠰᠤᠨᠢᠨ ᠮᠡᠳᠡᠭᠡᠨ᠎ᠦ ᠲᠤᠭᠤᠢᠯᠠᠩ᠎ᠳᠤ ᠠᠵᠢᠯ᠎ᠤᠨ ᠬᠤᠪᠢᠶᠠᠷᠢ ᠠᠪᠤᠭᠠᠳ ᠤᠴᠢᠬᠤ ᠎ᠳ᠋ᠦ ᠲᠤᠷᠠᠪᠳᠤᠷᠬᠠᠨ ᠬᠡᠪ  ᠳᠤᠮᠳᠠ᠎ᠶ᠋ᠢᠨ ᠪᠡᠶ᠎ᠡ ᠲᠠᠢ᠂  ᠡᠮᠦᠰᠭᠡᠯ ᠵᠡᠭᠦᠲᠡᠯ ᠲᠡᠷᠢ ᠲᠡᠭ᠌ᠰᠢ  ᠴᠡᠪᠡᠷ ᠴᠡᠮᠴᠡᠭᠡᠷ᠂  ᠱᠢᠷᠠᠪᠳᠤᠷᠬᠠᠨ ᠴᠢᠷᠠᠢ ᠲᠠᠢ᠂  ᠨᠢᠳᠤᠨ ᠱᠢᠯ ᠵᠡᠭᠦᠭ᠌ᠰᠡᠨ᠂ ᠪᠢᠴᠢᠭ᠎ᠦᠨ ᠬᠦᠮᠦᠨ᠎ᠦ ᠨᠠᠮᠪᠠ ᠲᠠᠢ  ᠨᠢᠭᠡᠨ ᠬᠦᠮᠦᠨ  ᠨᠠᠮ᠎ᠠ ᠎ᠶ᠋ᠢ  ᠬᠦᠯᠢᠶᠡᠨ ᠠᠪᠤᠪᠠ᠃ ᠡᠨᠡ ᠬᠦᠮᠦᠨ ᠴᠤᠢᠵᠢ ᠭᠤᠸᠠᠢ ᠪᠠᠢᠯ᠎ᠠ᠃ ᠴᠤᠢᠵᠢ ᠭᠤᠸᠠᠢ ᠴᠤ᠌ ᠲᠡᠷᠡ ᠦᠶᠡᠰ᠎ᠲᠦ ᠪᠠᠶᠠᠨᠨᠠᠭᠤᠷ ᠠᠢᠮᠠᠭ ᠎ᠠᠴᠠ ᠲᠦᠷᠦᠭ᠌ᠰᠡᠨ ᠨᠤᠲᠤᠭ ᠪᠠᠭᠠᠷᠢᠨ ᠪᠠᠷᠠᠭᠤᠨ ᠬᠤᠱᠢᠭᠤᠨ ᠎ᠳᠠᠭᠠᠨ ᠠᠵᠢᠯ ᠱᠢᠯᠵᠢᠵᠤ ᠢᠷᠡᠭᠡᠳ ᠤᠳᠠᠭ᠎ᠠ ᠦᠭᠡᠢ ᠠᠵᠢ᠃  ᠲᠡᠷᠡ ᠪᠠᠷ ᠨᠡᠯᠢᠶᠡᠳ ᠬᠡᠳᠦᠨ ᠵᠢᠯ  ᠰᠤᠨᠢᠨ ᠮᠡᠳᠡᠭᠡᠨ ᠎ᠦ  ᠲᠤᠰᠭᠠᠢ ᠮᠡᠷᠭᠡᠵᠢᠯ ᠵᠢᠠᠷ ᠠᠵᠢᠯᠯᠠᠬ᠍ᠰᠠᠨ ᠠᠬᠠᠮᠠᠳ ᠨᠦᠬᠦᠷ ᠪᠤᠯᠬᠤᠷ ᠮᠠᠨ ᠎ᠤ ᠰᠤᠨᠢᠨ  ᠮᠡᠳᠡᠭᠡᠨ᠎ᠦ ᠲᠤᠭᠤᠢᠯᠠᠩ ᠎ᠤᠨ ᠲᠠᠷᠤᠭ᠎ᠠ ᠪᠠᠷ ᠲᠤᠮᠢᠯᠠᠭ᠍ᠲᠠᠭ᠍ᠰᠠᠨ ᠪᠠᠢᠨ᠎ᠠ᠃ ᠴᠤᠢᠵᠢ ᠭᠤᠸᠠᠢ ᠪᠤᠯ ᠲᠠᠷᠤᠤ ᠬᠦᠩᠭᠡᠮᠰᠦᠭ ᠠᠪᠤᠷᠢ ᠲᠠᠢ᠂  ᠡᠶᠡᠯᠰᠡᠭ ᠵᠦᠭᠡᠯᠡᠨ ᠵᠠᠩ ᠲᠠᠢ ᠬᠦᠮᠦᠨ ᠪᠢᠯᠡ᠃ ᠭᠠᠷ ᠲᠤᠤᠷ᠎ᠠ ᠨᠢ ᠵᠠᠩ ᠵᠢᠦ ᠴᠢᠨ᠂  ᠰᠤᠷᠭᠠᠯᠳᠤ᠂ ᠦᠰᠭᠦᠪᠤᠶᠠᠨ᠂ ᠨᠠᠮ᠎ᠠ ᠲᠠᠢ ᠴᠦᠮ  ᠬᠤᠷᠢᠨ ᠬᠡᠳᠦᠳᠡᠢ  ᠱᠢᠷ  ᠭᠡᠰᠡᠨ ᠲᠦᠷᠪᠡᠨ ᠵᠠᠯᠠᠭᠤ ᠪᠠᠢᠯ᠎ᠠ᠂  ᠶᠡᠷᠦᠨᠢ ᠪᠢᠴᠢᠵᠤ ᠵᠢᠷᠤᠬᠤ᠎ᠳᠠᠭᠠᠨ ᠵᠡᠭᠡᠭ᠌ᠰᠡᠨ ᠭᠡᠲᠡᠭ  ᠪᠤᠯᠪᠠᠴᠤ᠌᠂  ᠰᠤᠨᠢᠨ ᠮᠡᠳᠡᠭᠡᠨ᠎ᠦ ᠤᠬᠠᠭᠠᠨ᠎ᠤ ᠲᠤᠰᠭᠠᠢ ᠪᠤᠯᠪᠠᠰᠤᠷᠠᠯ ᠬᠦᠷᠳᠡᠭᠡ ᠦᠭᠡᠢ 《ᠡᠮᠨᠢᠭ》 ᠦ᠋ᠳ ᠪᠠᠢᠵᠠᠢ᠃  ᠴᠤᠢᠵᠢ ᠭᠤᠸᠠᠢ  ᠮᠠᠨᠤᠰ ᠎ᠢ ᠲᠤᠲᠤᠮᠳᠠᠵᠤ  ᠴᠤᠭ ᠰᠤᠷᠪᠤᠯᠵᠢᠯᠠᠭ᠎ᠠ ᠬᠢᠨ᠎ᠡ᠂  ᠶᠠᠮᠠᠷ ᠭᠤᠤᠯ ᠰᠡᠳᠦᠪ᠎ᠢ ᠠᠳᠭᠤᠬᠤ ᠲᠤᠬᠠᠢ᠂ ᠶᠠᠭᠠᠬᠢᠵᠤ ᠪᠢᠴᠢᠬᠦ᠌ ᠲᠠᠯ᠎ᠠ ᠪᠡᠷ  ᠵᠢᠭᠠᠵᠤ ᠲᠤᠬᠢᠵᠤ ᠦᠭ᠌ᠭᠦᠨ᠎ᠡ᠂ ᠦᠪᠡᠷ᠎ᠦᠨ  ᠪᠡᠶ᠎ᠡ ᠪᠠᠷ ᠵᠢᠠᠨ ᠦᠯᠢᠭᠡᠷᠯᠡᠵᠦ᠍ ᠡᠬᠡ ᠪᠢᠴᠢᠭ  ᠪᠢᠴᠢᠨ᠎ᠡ᠂  ᠪᠠᠰᠠ  ᠮᠠᠨᠤᠰ᠎ᠤᠨ ᠪᠢᠴᠢᠭ᠌ᠰᠡᠨ ᠲᠦᠬᠦᠬᠡᠢ ᠪᠤᠯᠴᠢᠷᠬᠠᠢ ᠶᠠᠭᠤᠮᠠᠰ᠎ᠢ ᠵᠠᠰᠠᠵᠤ ᠵᠠᠯᠠᠵᠤ ᠦᠭ᠌ᠭᠦᠨ᠎ᠡ᠃  ᠡᠨᠡ ᠬᠦ᠌ ᠠᠭᠤᠯᠭ᠎ᠠ ᠠ᠋ᠴᠠ ᠠᠪᠴᠤ᠌ ᠬᠡᠯᠡᠪᠡᠯ᠂ ᠴᠤᠢᠵᠢ ᠭᠤᠸᠠᠢ ᠪᠤᠯ ᠨᠠᠮ᠎ᠠ᠎ᠶ᠋ᠢ ᠲᠠᠭᠠᠭᠤᠯᠵᠤ  ᠰᠤᠨᠢᠨ ᠮᠡᠳᠡᠭᠡᠨ᠎ᠦ ᠵᠠᠮ ᠎ᠳᠤ ᠬᠦᠲᠦᠯᠦᠨ ᠤᠷᠤᠭᠤᠯᠤᠬ᠍ᠰᠠᠨ ᠤᠤᠭᠠᠨ ᠪᠠᠭ᠍ᠰᠢ ᠮᠢᠨᠢ ᠪᠢᠯᠡ᠃

ᠪᠢ  ᠮᠦᠨ  ᠴᠤᠢᠵᠢ ᠭᠤᠸᠠᠢ  ᠪᠠᠷ ᠲᠠᠮᠵᠢᠵᠤ  ᠬᠤᠵᠢᠮ ᠨᠢ ᠦᠪᠦᠷ ᠮᠤᠩᠭᠤᠯ᠎ᠤᠨ  ᠦᠪᠡᠷᠲᠡᠭᠡᠨ ᠵᠠᠰᠠᠬᠤ ᠤᠷᠤᠨ᠎ᠤ ᠵᠠᠰᠠᠭ᠎ᠤᠨ ᠤᠷᠳᠤᠨ ᠎ᠤ ᠳᠡᠳ᠋ ᠲᠡᠷᠢᠭᠦᠯᠡᠭ᠌ᠴᠢ  ᠰᠠᠭᠤᠬ᠍ᠰᠠᠨ  ᠸᠠᠩ ᠹᠸᠩ ᠴᠢ ᠲᠠᠷᠤᠭ᠎ᠠ ᠲᠠᠢ ᠰᠠᠢᠬᠠᠨ ᠲᠠᠨᠢᠯᠴᠠᠭ᠍ᠰᠠᠨ ᠶᠤᠮ᠃ ᠲᠤᠬᠠᠢ ᠵᠢᠨ ᠦᠶ᠎ᠡ᠎ᠳᠦ᠂ ᠸᠠᠩ ᠹᠸᠩ ᠴᠢ ᠪᠠᠭᠠᠷᠢᠨ ᠪᠠᠷᠠᠭᠤᠨ ᠬᠤᠱᠢᠭᠤᠨ᠎ᠤ ᠨᠠᠮ᠎ᠤᠨ ᠬᠤᠷᠢᠶ᠎ᠠ᠎ᠶ᠋ᠢᠨ ᠤᠬᠠᠭᠤᠯᠬᠤ ᠬᠡᠯᠲᠡᠰ ᠲᠸ᠋ ᠲᠠᠷᠤᠭᠠᠯᠠᠵᠤ ᠪᠠᠢᠪᠠ᠃ ᠸᠠᠩ ᠹᠸᠩ ᠴᠢ᠂  ᠴᠤᠢᠵᠢ ᠦᠨᠲᠦᠷ ᠲᠤᠮᠳᠠᠳᠤ᠎ᠳᠠᠭᠠᠨ ᠨᠢᠭᠡ ᠠᠩᠭᠢ᠎ᠶ᠋ᠢᠨ ᠬᠠᠮᠳᠤ ᠰᠤᠷᠤᠭ᠍ᠴᠢ ᠪᠠᠢᠬ᠍ᠰᠠᠨ ᠪᠦᠭᠡᠳ ᠲᠡᠳᠡ ᠬᠤᠶᠠᠭᠤᠯᠠ᠎ᠶ᠋ᠢᠨ ᠬᠠᠷᠢᠴᠠᠭ᠎ᠠ ᠶᠡᠬᠡ ᠰᠠᠢᠨ᠂ ᠸᠠᠩ  ᠹᠸᠩ  ᠴᠢ ᠬᠠᠶᠠ  ᠮᠠᠨ ᠎ᠤ ᠠᠯᠪᠠᠨ ᠭᠡᠷ ᠲᠸ᠋  ᠤᠷᠤᠵᠤ ᠢᠷᠡᠭᠡᠳ ᠵᠢᠭᠠᠬᠠᠨ ᠰᠠᠭᠤᠵᠤ  ᠶᠠᠭᠠᠷᠠᠯᠳᠠᠢ ᠶᠠᠪᠤᠭᠠᠳ ᠦᠭ᠌ᠭᠦᠨ᠎ᠡ᠃  ᠵᠢᠯ ᠴᠠᠭᠠᠨ ᠰᠠᠷ᠎ᠠ  ᠮᠠᠨᠤᠰ᠎ᠢ ᠭᠡᠷ ᠲᠡᠭᠡᠨ ᠵᠠᠯᠠᠵᠤ ᠬᠠᠨᠵᠤᠨ ᠲᠡᠭᠡᠷ᠎ᠡ ᠱᠢᠷᠡᠭᠡ ᠲᠤᠭᠤᠷᠢᠨ ᠰᠠᠭᠤᠯᠴᠠᠭᠠᠳ᠂  ᠬᠤᠷᠤᠭᠤ ᠵᠢᠮᠡᠯᠴᠡᠨ ᠠᠷᠢᠬᠢ ᠤᠤᠭᠤᠵᠤ ᠨᠠᠷᠭᠢᠵᠤ ᠨᠠᠢᠷᠯᠠᠬ᠍ᠰᠠᠨ ᠤᠳᠠᠭ᠎ᠠ ᠲᠠᠢ᠃ ᠬᠤᠵᠢᠮ ᠨᠢ ᠸᠠᠩ ᠹᠸᠩ ᠴᠢ ᠵᠡᠷᠭᠡ ᠲᠤᠱᠢᠶᠠᠯ ᠲᠠᠰᠤᠷᠠᠯ ᠦᠭᠡᠢ ᠲᠡᠪᠱᠢᠵᠤ᠂ ᠪᠠᠭᠠᠷᠢᠨ ᠪᠠᠷᠠᠭᠤᠨ ᠬᠤᠱᠢᠭᠤᠨ᠎ᠤ ᠬᠤᠱᠢᠭᠤᠨ ᠲᠠᠷᠤᠭ᠎ᠠ᠂ ᠤᠯᠠᠭᠠᠨᠬᠠᠳᠠ ᠬᠤᠳᠠ᠎ᠶ᠋ᠢᠨ ᠨᠠᠮ᠎ᠤᠨ ᠬᠤᠷᠢᠶᠠᠨ᠎ᠤ ᠤᠬᠠᠭᠤᠯᠬᠤ ᠬᠡᠯᠲᠡᠰ᠎ᠦᠨ ᠲᠠᠷᠤᠭ᠎ᠠ᠂ ᠤᠯᠠᠭᠠᠨᠬᠠᠳᠠ ᠬᠤᠳᠠ᠎ᠶ᠋ᠢᠨ ᠳᠡᠳ᠋ ᠬᠤᠳᠠ᠎ᠶ᠋ᠢᠨ  ᠲᠠᠷᠤᠭ᠎ᠠ᠂ ᠪᠤᠭᠤᠳᠤ ᠬᠤᠳᠠ ᠎ᠶ᠋ᠢᠨ ᠬᠤᠳᠠ᠎ᠶ᠋ᠢᠨ ᠲᠠᠷᠤᠭ᠎ᠠ ᠪᠤᠯᠵᠤ᠂ ᠪᠦᠷ ᠰᠡᠭᠦᠯ᠎ᠳᠡᠭᠡᠨ ᠦᠪᠦᠷ ᠮᠤᠩᠭᠤᠯ᠎ᠤᠨ ᠦᠪᠡᠷᠲᠡᠭᠡᠨ ᠵᠠᠰᠠᠬᠤ ᠤᠷᠤᠨ᠎ᠤ ᠳᠡᠳ᠋ ᠲᠡᠷᠢᠭᠦᠯᠡᠭ᠌ᠴᠢ᠂ ᠠᠷᠠᠳ᠎ᠤᠨ ᠲᠦᠯᠦᠭᠡᠯᠡᠭ᠌ᠴᠢᠳ᠎ᠦᠨ ᠶᠡᠬᠡ ᠬᠤᠷᠠᠯ ᠎ᠤᠨ ᠪᠠᠢᠩᠭᠤ᠎ᠶ᠋ᠢᠨ ᠬᠤᠷᠢᠶᠠᠨ᠎ᠤ ᠳᠡᠳ᠋ ᠡᠷᠬᠢᠯᠡᠭ᠌ᠴᠢ ᠰᠠᠭᠤᠬ᠍ᠰᠠᠨ ᠬᠤᠢᠨ᠎ᠠ ᠴᠤ᠌ ᠬᠡᠵᠢᠶ᠎ᠡ᠂ ᠬᠠᠮᠢᠭ᠎ᠠ ᠨᠢᠭᠡ ᠠᠭᠤᠯᠵᠠᠪᠠᠴᠤ᠌ ᠨᠠᠮ᠎ᠠ ᠲᠠᠢ ᠬᠤᠶᠠᠷ ᠦᠭᠡ ᠰᠤᠯᠢᠵᠤ᠂ ᠠᠵᠢᠯ ᠠᠮᠢᠳᠤᠷᠠᠯ᠎ᠤᠨ ᠪᠠᠢᠳᠠᠯ᠎ᠢ ᠬᠠᠯᠠᠮᠵᠢᠯᠠᠨ ᠠᠰᠠᠭᠤᠳᠠᠭ᠃ ᠪᠢ ᠬᠦᠬᠡᠬᠤᠳᠠ᠎ᠳᠤ ᠢᠷᠡᠭ᠌ᠰᠡᠨ᠎ᠤ  ᠲᠠᠷᠠᠭ᠎ᠠ᠂  ᠨᠢᠭᠡ ᠵᠢᠯ᠎ᠦᠨ  ᠴᠠᠭᠠᠨ ᠰᠠᠷ᠎ᠠ᠎ᠳᠤ  ᠴᠤᠢᠵᠢ  ᠭᠤᠸᠠᠢ ᠨᠠᠮ᠎ᠠ᠎ᠶ᠋ᠢ ᠲᠠᠭᠠᠭᠤᠯᠵᠤ ᠸᠠᠩ ᠹᠸᠩ ᠴᠢ ᠲᠠᠷᠤᠭ᠎ᠠ᠎ᠶ᠋ᠢᠨ ᠭᠡᠷ ᠲᠤᠨᠢ ᠤᠴᠢᠬ᠍ᠰᠠᠨ ᠪᠠᠢᠬ᠍ᠰᠠᠨ᠃ ᠲᠡᠳ᠋ᠡᠡ ᠪᠤᠯ ᠮᠢᠨᠤ ᠠᠵᠢᠯ ᠦᠢᠯᠡᠰ᠎ᠦᠨ ᠵᠠᠮ᠎ᠳᠤ ᠮᠠᠰᠢ ᠶᠡᠬᠡ ᠠᠴᠢ ᠲᠤᠰᠠ ᠦᠵᠡᠬᠦᠯᠦᠭ᠌ᠰᠡᠨ᠂ 《ᠪᠤᠷᠬᠠᠨ᠎ᠠᠴᠠ ᠢᠯᠡᠭᠡᠭ᠌ᠰᠡᠨ ᠡᠷᠬᠢᠮ  ᠬᠦᠮᠦᠰ》 ᠶᠤᠮᠰᠠᠨ᠃ ᠵᠠ᠂  ᠡᠬᠦᠨ᠎ᠢ ᠴᠤᠬᠤᠰ ᠲᠤᠷᠠᠳᠤᠭᠠᠳ ᠡᠨᠳᠡ ᠲᠠᠯᠪᠢᠶ᠎ᠠ᠃

ᠰᠤᠨᠢᠨ ᠮᠡᠳᠡᠭᠡᠨ᠎ᠦ ᠲᠤᠭᠤᠢᠯᠠᠩ᠎ᠤᠨ ᠬᠢ ᠭᠡᠵᠦ᠍ ᠪᠢᠳᠠ ᠵᠠᠯᠭᠠᠭ᠎ᠠ ᠪᠡᠷ ᠬᠦᠳᠡᠭᠡ ᠪᠠᠭᠤᠵᠤ ᠰᠤᠷᠪᠤᠯᠵᠢᠯᠠᠭ᠎ᠠ ᠬᠢᠨ᠎ᠡ᠃ ᠲᠡᠷᠡ ᠦᠶ᠎ᠡ᠎ᠳᠤ ᠮᠦᠨ ᠯᠠ ᠤᠨᠴᠠᠭᠠᠢ ᠴᠠᠭ ᠦᠶ᠎ᠡ᠎ᠪᠠᠢᠬ᠍ᠰᠠᠨ ᠪᠤᠯᠬᠤᠷ᠂ ᠨᠡᠢᠭᠡᠮ᠎ᠦᠨ ᠬᠦᠭ᠌ᠵᠢᠯᠳᠡ ᠰᠠᠭᠠᠷᠠᠤ᠂ ᠠᠵᠤ ᠠᠬᠤᠢ ᠬᠤᠴᠤᠷᠤᠩᠭᠤᠢ᠂ ᠲᠡᠷᠭᠡ ᠬᠦᠰᠭᠡ ᠴᠦᠬᠡᠨ᠂  ᠬᠦᠳᠡᠭᠡ ᠪᠠᠭᠤᠵᠤ ᠰᠤᠷᠪᠤᠯᠵᠢᠯᠠᠭ᠎ᠠ ᠬᠢᠬᠦ᠌ ᠭᠡᠪᠠᠯ ᠬᠤᠯᠠ ᠪᠤᠯ ᠠᠶᠠᠨᠴᠢᠳ᠎ᠤᠨ ᠮᠠᠱᠢᠨ᠎ᠳᠤ ᠰᠠᠭᠤᠨ᠎ᠠ᠂ ᠤᠢᠷ᠎ᠠ ᠵᠠᠭᠤᠷ᠎ᠠ ᠬᠤᠷᠢ ᠭᠤᠴᠢᠨ ᠭᠠᠵᠠᠷ ᠶᠤᠮ ᠪᠤᠯ ᠳᠤᠭᠤᠢ ᠪᠡᠷ ᠶᠤᠮ ᠤᠤ᠂  ᠡᠰᠡᠭᠦᠯ᠎ᠡ ᠦᠬᠡᠷ ᠬᠠᠰᠠᠭ᠂ ᠡᠯᠵᠢᠭᠡᠨ ᠲᠡᠷᠭᠡ  ᠶᠠᠭᠤ ᠲᠠᠭᠠᠷᠠᠪᠠᠯ ᠶᠠᠭᠤᠨ ᠳ᠋ᠤᠨᠢ ᠤᠯᠵᠤ ᠰᠠᠭᠤᠭᠠᠳ᠂ ᠲᠡᠷᠡᠴᠢᠯᠡᠨ ᠭᠠᠬᠠᠢ ᠶᠠᠪᠠᠭᠠᠨ ᠵᠢᠠᠷ ᠭᠠᠷᠤᠭᠠᠳ ᠬᠦᠳᠡᠯᠳᠡᠭ᠃ ᠲᠡᠷᠡ ᠦᠶ᠎ᠡ᠎ᠳᠦ ᠪᠠᠭᠠᠷᠢᠨ ᠪᠠᠷᠠᠭᠤᠨ ᠬᠤᠱᠢᠭᠤᠨ᠎ᠤ ᠪᠠᠶᠠᠨᠬᠠᠨ  ᠨᠢᠭᠡᠳᠦᠯ᠎ᠦᠨ  ᠤᠯᠠᠭᠠᠨ ᠲᠤᠭ ᠪᠠᠷᠢᠭᠠᠳᠠ᠂  ᠪᠠᠶᠠᠨ᠌ᠡᠷᠳᠡᠨᠢ  ᠨᠢᠭᠡᠳᠦᠯ᠎ᠦᠨ  ᠪᠤᠯᠠᠭ  ᠪᠠᠷᠢᠭᠠᠳᠠ ᠭᠡᠵᠦ᠍  ᠨᠡᠷᠡᠲᠡᠢ ᠬᠤᠶᠠᠷ ᠲᠡᠷᠢᠭᠦᠨ᠎ᠦ ᠨᠢᠭᠡᠴᠡ  ᠪᠠᠢᠬ᠍ᠰᠠᠨ  ᠶᠤᠮ᠃  ᠲᠡᠭᠡᠷ᠎ᠡ  ᠱᠠᠳᠤᠨ᠎ᠠᠴᠠ ᠶᠠᠮᠠᠷ ᠱᠢᠨ᠎ᠡ ᠵᠢᠭᠠᠪᠤᠷᠢ᠂  ᠵᠤᠷᠢᠭ  ᠰᠠᠨᠠᠭ᠎ᠠ ᠪᠠᠭᠤᠵᠤ ᠢᠷᠡᠪᠡᠯ᠂ 《ᠪᠤᠰᠤᠨ ᠪᠤᠰᠤᠨ ᠪᠤᠷᠤ ᠲᠠᠭ᠎ᠠ ᠪᠠᠨ》 ᠭᠡᠲᠡᠭ᠌ᠴᠢᠯᠡᠨ᠂  ᠤᠯᠠᠭᠠᠨ ᠲᠤᠭ᠂ ᠪᠤᠯᠠᠭ ᠎ᠢ ᠰᠤᠷᠪᠤᠯᠵᠢᠯᠠᠬᠤ ᠭᠡᠳ ᠲᠡᠷᠡ ᠲᠡᠢᠰᠢ ᠬᠡᠳᠤᠢ ᠴᠤ᠌ ᠤᠳᠠᠭ᠎ᠠ ᠭᠦᠶᠦᠯᠭᠡᠵᠦ᠍ ᠪᠠᠢᠯ᠎ᠠ？ ᠴᠤᠢᠵᠢ ᠭᠤᠸᠠᠢ ᠪᠢᠳᠠ ᠬᠤᠶᠠᠭᠤᠯᠠ᠎ᠶ᠋ᠢᠨ ᠰᠤᠷᠪᠤᠯᠵᠢᠯᠠᠭ᠎ᠠ ᠬᠢᠬᠦ᠌ ᠭᠡᠵᠦ᠍ ᠬᠠᠮᠳᠤ ᠬᠦᠳᠡᠭᠡ ᠪᠠᠭᠤᠬ᠍ᠰᠠᠨ ᠴᠤᠬᠤᠮ ᠨᠢᠭᠡ ᠵᠤᠭᠠᠳᠠᠢ  ᠦᠯᠢᠭᠡᠷ ᠪᠠᠢᠳᠠᠭ ᠄

1971 ᠤᠨ᠎ᠤ 11 ᠰᠠᠷ᠎ᠠ ᠵᠢᠨ ᠲᠤᠮᠳᠠᠴᠢ ᠪᠡᠷ ᠪᠢᠯᠡ᠃  ᠴᠤᠢᠵᠢ  ᠭᠤᠸᠠᠢ ᠨᠠᠮ᠎ᠠ᠎ᠶ᠋ᠢ ᠲᠠᠭᠠᠭᠤᠯᠵᠤ᠂ ᠰᠤᠪᠤᠷᠭ᠎ᠠ ᠨᠢᠭᠡᠳᠦᠯ᠎ᠤᠨ  ᠷᠠᠱᠢᠶᠠᠨ  ᠠᠢᠯ ᠪᠠᠷᠢᠭᠠᠳᠠ᠎ᠶ᠋ᠢᠨ ᠮᠠᠯ ᠲᠠᠷᠢᠶᠠᠯᠠᠩ ᠤᠢ ᠱᠢᠭᠤᠢ᠎ᠶ᠋ᠢ ᠵᠡᠷᠭᠡ ᠪᠡᠷ ᠬᠦᠭ᠌ᠵᠢᠭᠦᠯᠦᠭ᠌ᠰᠡᠨ ᠲᠡᠷᠢᠭᠦᠨ᠎ᠦ ᠦᠢᠯᠡ ᠶᠠᠪᠤᠳᠠᠯ᠎ᠢ ᠰᠤᠷᠪᠤᠯᠵᠢᠯᠠᠨ ᠪᠢᠴᠢᠬᠦ᠌  ᠡᠭᠦᠷᠭᠡ᠎ᠲᠠᠭᠠᠭᠠᠵᠤ᠂ ᠬᠤᠱᠢᠭᠤᠨ ᠲᠦᠪ  ᠶᠡᠬᠡ ᠪᠠᠢᠱᠢᠩ᠎ᠠᠴᠠ ᠠᠶᠠᠨᠴᠢᠳ᠎ᠤᠨ ᠮᠠᠱᠢᠨ᠎ᠳᠤ ᠰᠠᠭᠤᠵᠤ ᠰᠤᠪᠤᠷᠭ᠎ᠠ ᠨᠢᠭᠡᠳᠦᠯ ᠲᠡᠭᠡᠷ᠎ᠡ ᠬᠦᠷᠦᠯ᠎ᠡ᠃ ᠨᠢᠭᠡᠳᠦᠯ᠎ᠤᠨ ᠰᠠᠭᠤᠭ᠎ᠠ ᠭᠠᠵᠠᠷ᠎ᠠᠴᠠ ᠷᠠᠱᠢᠶᠠᠨ  ᠠᠢᠯ ᠪᠠᠷᠢᠭᠠᠳᠠ  ᠬᠦᠷᠳᠡᠯ᠎ᠡ ᠵᠢᠷᠠ ᠲᠠᠯᠠᠨ ᠭᠠᠵᠠᠷ ᠵᠠᠢᠳᠠᠢ  ᠶᠤᠮ ᠭᠡᠨ᠎ᠡ᠂ ᠲᠡᠢᠮᠦ᠍ ᠬᠤᠯᠠ ᠠᠯᠬᠤᠵᠤ ᠤᠴᠢᠬᠤ ᠠᠮᠠᠷ ᠦᠭᠡᠢ ᠭᠡᠵᠦ᠍ ᠪᠠᠬᠠᠨ ᠪᠡᠷᠬᠡᠱᠢᠶᠡᠵᠤ᠂ ᠲᠡᠷᠭᠡ ᠤᠨᠤᠭ᠎ᠠ  ᠲᠠᠭᠠᠷᠠᠬᠤ ᠪᠤᠯᠪᠠ ᠤᠤ ᠭᠡᠵᠦ᠍ ᠭᠤᠷᠢᠳᠠᠵᠤ ᠪᠠᠢᠳᠠᠯ᠎ᠠ᠂  ᠨᠢᠭᠡᠳᠦᠯ᠎ᠤᠨ ᠨᠢᠭᠡ ᠺᠠᠳ᠋ᠷ ᠢᠷᠡᠭᠡᠳ᠄ 《ᠤᠯᠠᠭᠠᠨ  ᠱᠤᠷᠤᠩ ᠪᠠᠷᠢᠭᠠᠳᠠ᠎ᠠᠴᠠ ᠲᠷᠠᠺᠲ᠋ᠤᠷ  ᠢᠷᠡᠭᠡᠳ ᠦᠳᠡ᠎ᠶ᠋ᠢᠨ ᠬᠤᠢᠨ᠎ᠠ ᠪᠤᠴᠠᠬᠤ ᠭᠡᠵᠦ᠍ ᠪᠠᠢᠨ᠎ᠠ᠃ ᠲᠠ ᠬᠤᠶᠠᠭᠤᠯᠠ ᠰᠠᠭᠤᠭᠠᠳ ᠶᠠᠪᠤᠭᠠᠷᠠᠢ᠃ ᠲᠡᠨᠲᠡ ᠬᠦᠷᠴᠢᠬᠡᠪᠡᠯ ᠷᠠᠱᠢᠶᠠᠨ ᠠᠢᠯ ᠡᠴᠡ ᠤᠢᠷᠠᠬᠠᠨ ᠪᠤᠯᠴᠢᠬᠠᠨ᠎ᠠ》 ᠭᠡᠵᠦ᠍ ᠬᠡᠯᠡᠵᠦ᠍ ᠦᠭ᠌ᠪᠡ᠃  ᠦ᠂  ᠮᠠᠰᠢ ᠰᠠᠢᠨ ᠪᠤᠯᠤᠯ᠎ᠠ᠃  ᠲᠡᠷᠡ ᠦᠶᠡᠰ᠎ᠲᠦ ᠲᠷᠠᠺᠲ᠋ᠤᠷ ᠶᠤᠮ ᠤᠤ᠂  ᠮᠤᠷᠶ᠋ᠨ ᠲᠡᠷᠭᠡᠨ᠎ᠳᠦ ᠤᠯᠤᠭᠠᠳ ᠰᠠᠭᠤᠬᠤ ᠴᠢᠨᠢ ᠠᠮᠠᠷ ᠶᠤᠮ ᠤᠤ？ ᠪᠢᠳᠡ ᠬᠤᠶᠠᠭᠤᠯᠠ ᠴᠢᠨᠢ ᠮᠠᠰᠢ ᠪᠠᠶᠠᠷᠯᠠᠵᠤ ᠲᠦᠭᠦᠷᠲᠡᠯ᠎ᠡ ᠶᠠᠭᠤᠮ᠎ᠠ ᠬᠡᠤᠮ᠎ᠠ ᠠᠴᠢᠶᠠᠯᠠᠬ᠍ᠰᠠᠨ ᠨᠦᠭᠦᠭᠡ ᠲᠷᠠᠺᠲ᠋ᠤᠷ᠎ᠤᠨ ᠠᠷᠤ᠎ᠶ᠋ᠢᠨ ᠴᠢᠷᠦᠭᠦᠯ᠎ᠳᠤᠨᠢ ᠭᠠᠷᠴᠤ᠌ ᠰᠠᠭᠤᠭᠠᠳ᠂ ᠦᠯᠦᠨ ᠲᠤᠭᠤᠰᠤ ᠮᠠᠨᠠᠷᠠᠭ᠍ᠰᠠᠨ ᠬᠦᠳᠡᠭᠡ ᠎ᠶ᠋ᠢᠨ ᠮᠤᠷᠤᠢ ᠰᠠᠷᠤᠢ ᠡᠩᠬᠦᠯ ᠲᠤᠩᠬᠤᠯ ᠵᠠᠮ ᠵᠢᠡᠷ  ᠬᠤᠶᠠᠷ  ᠴᠠᠭ  ᠢᠯᠡᠬᠦᠦ ᠴᠤᠬ᠍ᠬᠢᠭᠤᠯᠵᠤ ᠨᠦᠳᠦᠭᠦᠯᠵᠦ᠍ ᠶᠠᠪᠤᠭᠠᠳ᠂ ᠲᠤᠭᠤᠰᠤ ᠱᠢᠷᠤᠢ᠎ᠳᠤ ᠲᠠᠷᠤᠬ᠍ᠳᠠᠬ᠍ᠰᠠᠨ ᠪᠢᠳᠡ ᠬᠤᠶᠠᠷ ᠲᠡᠱᠢᠩ ᠨᠠᠷᠠ ᠲᠠᠢ ᠤᠯᠠᠭᠠᠨ ᠱᠤᠷᠤᠩ ᠪᠠᠷᠢᠭᠠᠳᠠ᠎ᠳᠤ ᠬᠦᠷᠪᠡ᠃ 《ᠲᠤᠯᠤᠭ᠎ᠠ ᠨᠠᠢ᠍ᠮᠠᠨ ᠭᠠᠵᠠᠷ ᠵᠠᠮᠨᠠᠵᠤ ᠡᠮᠦᠨᠡᠳᠡᠢ ᠲᠠᠪᠠᠭ᠎ᠠ᠎ᠶ᠋ᠢ ᠭᠠᠷᠤᠬ᠍ᠰᠠᠭᠠᠷ ᠷᠠᠱᠢᠶᠠᠨ ᠠᠢᠯ  ᠪᠠᠷᠢᠭᠠᠳᠠ ᠎ᠳᠤ ᠬᠦᠷᠴᠢᠬᠡᠨ᠎ᠡ》 ᠬᠡᠵᠤ ᠬᠦᠮᠦᠨ ᠬᠡᠯᠡᠵᠦ᠍ ᠦᠭ᠌ᠴᠦ ᠪᠠᠢᠨ᠎ᠠ᠃ ᠪᠢᠳᠡ ᠬᠤᠶᠠᠭᠤᠯᠠ  ᠴᠠᠭ ᠭᠠᠷᠤᠢ  ᠵᠠᠮᠨᠠᠵᠤ ᠲᠠᠪᠠᠭ᠎ᠠ᠎ᠠᠴᠠ ᠪᠠᠭᠤᠵᠤ ᠷᠠᠱᠢᠶᠠᠨ ᠠᠢᠯ ᠪᠠᠷᠢᠭᠠᠳᠠ ᠎ᠳᠤ ᠬᠦᠷᠬᠦ᠌᠎ᠳᠦ ᠤᠨᠠᠬᠤ ᠨᠠᠷᠠ ᠠᠭᠤᠯᠠᠨ ᠲᠤᠯᠤᠭᠠᠢ ᠱᠢᠬᠦᠷᠴᠤ᠌ ᠪᠠᠢᠯ᠎ᠠ᠃ ᠪᠠᠷᠢᠭᠠᠳᠠ᠎ᠶ᠋ᠢᠨ ᠠᠯᠪᠠᠨ ᠭᠡᠷ ᠲᠡᠭᠡᠷ᠎ᠡ  ᠨᠢ ᠬᠦᠷᠪᠡᠯ  ᠲᠡᠮᠤᠷ  ᠴᠤᠤᠵᠢ᠎ᠶ᠋ᠢᠨ  ᠰᠠᠬᠢᠭᠤᠯ ᠲᠠᠢ᠃  ᠬᠦᠮᠦᠨ᠎ᠡᠴᠡ ᠰᠤᠷᠠᠬᠤ ᠎ᠳᠤ᠂  ᠪᠠᠷᠢᠭᠠᠳᠠ᠎ᠶ᠋ᠢᠨ ᠨᠠᠮ᠎ᠤᠨ ᠡᠬᠦᠷ᠎ᠦᠨ ᠱᠦᠵᠢ᠂  ᠪᠠᠷᠢᠭᠠᠳᠠ᠎ᠶ᠋ᠢᠨ  ᠲᠠᠷᠤᠭ᠎ᠠ ᠨᠢ ᠴᠦᠮ ᠭᠠᠳᠠᠭ᠍ᠰᠢ ᠭᠠᠷᠤᠬ᠍ᠰᠠᠨ ᠶᠤᠮ ᠭᠡᠨ᠎ᠡ᠃ 《ᠱᠦᠵᠢ᠂ ᠲᠠᠷᠤᠭ᠎ᠠ ᠨᠢ ᠪᠠᠢᠬᠤ ᠦᠭᠡᠢ᠎ᠳᠦ᠂ ᠪᠠᠷᠢᠭᠠᠳᠠ᠎ᠶ᠋ᠢᠨ ᠤᠳᠤᠷᠢᠳᠭᠤ ᠪᠠᠭ᠎ᠤᠨ ᠭᠡᠱᠢᠭᠦᠳ ᠭᠡᠵᠦ᠍ ᠪᠠᠢᠯᠭᠦᠢ》 ᠭᠡᠳ  ᠠᠰᠠᠭᠤᠪᠠᠯ᠂ 《ᠪᠠᠷᠢᠭᠠᠳᠠ᠎ᠶ᠋ᠢᠨ ᠰᠠᠩ ᠬᠠᠮᠢᠶᠠᠷᠤᠬ᠍ᠴᠢ ᠨᠢᠷᠪᠠ᠎ᠶ᠋ᠢᠨ ᠭᠡᠷ ᠲᠡᠨᠲᠡ ᠪᠤᠢ》 ᠭᠡᠵᠦ᠍  ᠵᠢᠭᠠᠵᠤ ᠦᠭ᠌ᠪᠡ᠃ ᠭᠡᠷ ᠲᠤᠨᠢ ᠬᠦᠷᠪᠡᠯ ᠲᠦᠴᠢᠭᠡᠳ ᠨᠠᠰᠤᠨ᠎ᠤ ᠬᠢᠵᠢᠶᠡᠯᠢ ᠬᠦᠮᠦᠨ ᠮᠠᠨ᠎ᠤ ᠦᠭᠡ᠎ᠶ᠋ᠢ ᠰᠤᠨᠤᠰᠴᠤ᠌ ᠪᠠᠷᠠᠯ ᠦᠭᠡᠢ ᠬᠠᠨᠵᠤᠨ᠎ᠠᠴᠠ ᠪᠠᠨ ᠪᠠᠭᠤᠮᠠᠬ᠍ᠴᠠ᠄ 《ᠬᠦᠢ᠂ ᠪᠢ ᠲᠡᠭᠦᠨ᠎ᠢ ᠬᠠᠮᠢᠶᠠᠷᠲᠠᠭ ᠬᠦᠮᠦᠨ ᠪᠢᠰᠢ᠃ ᠲᠠᠨᠤᠰ ᠬᠡᠨ᠎ᠢ ᠪᠠᠨ ᠡᠷᠢᠪᠡᠯ ᠡᠷᠢ！》 ᠭᠡᠴᠢᠬᠡᠭᠡᠳ ᠮᠠᠨ᠎ᠢ ᠲᠡᠭ᠌ᠰᠢᠬᠡᠨ ᠬᠠᠷᠠᠵᠤ ᠴᠤ᠌ ᠦᠵᠡᠯ ᠦᠭᠡᠢ ᠬᠠᠨᠴᠤᠢ ᠰᠠᠵᠢᠨ ᠭᠠᠷᠤᠭᠠᠳ  ᠶᠠᠪᠤᠴᠢᠬᠠᠯ᠎ᠠ᠃ ᠢᠷᠡᠭ᠌ᠰᠡᠨ ᠭᠡᠢᠴᠢᠨ ᠲᠠᠢ ᠮᠡᠨᠳᠦ ᠴᠤ᠌ ᠦᠭᠡᠢ ᠰᠠᠢᠨ ᠴᠤ᠌ ᠦᠭᠡᠢ ᠡᠢᠮᠦᠷᠬᠦᠦ ᠰᠤᠷᠲᠠᠯ ᠪᠤᠯᠪᠠᠰᠤᠷᠠᠯ ᠦᠭᠡᠢ ᠬᠦᠮᠦᠨ ᠪᠠᠰᠠ ᠪᠠᠢᠳᠠᠭ ᠶᠤᠮ ᠪᠠᠢᠨ᠎ᠠ᠃ ᠤᠷᠤᠬᠤ ᠭᠡᠷ ᠤᠭᠤᠴᠢᠬᠤ ᠠᠶᠠᠭ᠎ᠠ ᠦᠭᠡᠢ᠂ ᠤᠳᠤ ᠶᠠᠭᠠᠬᠢᠳᠠᠭ ᠪᠢᠯᠡ？ ᠦᠲᠡᠰᠢ᠎ᠶ᠋ᠢᠨ ᠬᠦᠱᠢᠭᠡ ᠠᠯᠭᠤᠷᠬᠠᠨ ᠪᠠᠭᠤᠵᠤ ᠪᠠᠢᠯ᠎ᠠ᠃ ᠬᠡᠭᠡᠷ᠎ᠡ ᠬᠤᠨᠤᠬᠤ᠎ᠳᠠᠭᠠᠨ ᠬᠦᠷᠪᠡ ᠤᠤ？ 《 ᠰᠠᠨᠳᠤᠷᠤᠬ᠍ᠰᠠᠨ ᠴᠠᠭ᠎ᠲᠤ  ᠰᠠᠳᠤᠨ  ᠵᠢᠠᠨ》 ᠭᠡᠭ᠌ᠴᠢ ᠪᠡᠷ ᠪᠢ ᠭᠡᠨᠡᠳᠳᠡ ᠡᠨᠡ ᠠᠢᠯ᠎ᠳᠤ ᠨᠢᠭᠡ ᠰᠠᠳᠤᠨ ᠪᠠᠢᠳᠠᠭ᠎ᠢ ᠰᠠᠨᠠᠵᠤ ᠤᠯᠤᠯ᠎ᠠ᠃ ᠮᠢᠨᠤ ᠡᠬᠡᠨᠡᠷ᠎ᠦᠨ ᠲᠦᠷᠬᠦᠮ᠎ᠦᠨ  ᠨᠤᠲᠤᠭ ᠪᠤᠯ  ᠮᠦᠨ ᠡᠨᠡ  ᠰᠤᠪᠤᠷᠭ᠎ᠠ᠎ᠶ᠋ᠢᠨ ᠬᠤᠯᠪᠤᠭᠠᠯᠵᠢ᠎ᠶ᠋ᠢᠨ ᠠᠢᠯ᠎ᠤᠨ ᠬᠢ ᠶᠤᠮ᠃ ᠲᠡᠭᠦᠨ᠎ᠦ ᠶᠡᠬᠡ ᠠᠪᠠᠭ᠎ᠠ ᠡᠵᠢ  ᠷᠢᠨᠴᠢᠨᠮ᠎ᠠ ᠨᠠᠰᠤᠳᠠᠨ ᠶᠠᠭ ᠡᠨᠡ ᠷᠠᠱᠢᠶᠠᠨ ᠠᠢᠯ᠎ᠳᠦ ᠪᠠᠢᠳᠠᠭ᠂ ᠪᠠᠭ᠎ᠠ ᠬᠦᠦ ᠨᠢ ᠰᠠᠮᠪᠠᠯᠨᠤᠷᠪᠤ ᠭᠡᠵᠦ᠍ ᠪᠠᠭᠠᠷᠢᠨ ᠵᠡᠭᠦᠨ ᠬᠤᠱᠢᠭᠤᠨ᠎ᠤ  ᠵᠡᠪᠰᠡᠭ᠌ᠲᠦ ᠬᠦᠴᠦᠨ᠎ᠦ ᠬᠡᠯᠲᠡᠰ᠎ᠲᠦ  ᠰᠠᠯᠠᠭᠠᠨ ᠲᠠᠷᠤᠭ᠎ᠠ ᠪᠡᠷ ᠠᠵᠢᠯᠯᠠᠳᠠᠭ ᠭᠡᠨ᠎ᠡ ᠭᠡᠵᠦ᠍  ᠲᠡᠳᠡᠨᠤᠰ ᠰᠠᠳᠤᠨ ᠲᠦᠷᠦᠯ ᠬᠤᠭᠤᠷᠤᠨᠳᠤ ᠪᠠᠨ ᠬᠡᠯᠡᠭᠡᠳ ᠪᠠᠢᠬ᠍ᠰᠠᠨ᠎ᠢ ᠨᠢ ᠰᠠᠨᠠᠭᠠᠨ᠎ᠳᠤ ᠤᠷᠤᠪᠠ᠃ ᠠᠢᠯ᠎ᠤᠨ ᠬᠦᠮᠦᠨ᠎ᠡᠴᠡ ᠰᠤᠷᠠᠬᠤᠯᠠᠷ ᠶᠠᠭ ᠮᠦᠨ ᠭᠡᠬᠦ᠌ ᠪᠦᠭᠡᠳ ᠲᠡᠳᠡᠨᠡᠢᠬᠢᠨ ᠠᠢᠯ᠎ᠤᠨ ᠬᠠᠮᠤᠭ᠎ᠤᠨ ᠪᠠᠷᠠᠭᠤᠨ ᠬᠤᠢᠨ᠎ᠠ ᠵᠠᠬ᠎ᠠ᠎ᠳᠤ ᠰᠠᠭᠤᠲᠠᠭ ᠭᠡᠵᠦ᠍ ᠭᠡᠷ᠎ᠢ ᠨᠢ ᠵᠢᠭᠠᠵᠤ ᠦᠭ᠌ᠭᠦᠯ᠎ᠡ᠃  ᠠᠷᠭ᠎ᠠ ᠪᠠᠨ ᠪᠠᠷᠠᠵᠤ ᠠᠯᠠᠭ᠎ᠠ ᠪᠠᠨ ᠮᠠᠭᠠᠵᠢᠬᠤ᠎ᠳᠤ ᠬᠦᠷᠦᠭᠡᠳ 《ᠠᠪᠤᠷᠠᠭ᠍ᠴᠢ ᠤᠳᠤᠨ》 ᠵᠢᠠᠨ ᠬᠠᠢᠭᠠᠳ ᠬᠦᠷᠦᠯ᠎ᠡ᠃  ᠨᠠᠷᠠ ᠰᠠᠯᠬᠢᠨ᠎ᠳᠤ ᠴᠤᠬᠢᠭᠤᠯᠤᠬ᠍ᠰᠠᠨ  ᠬᠦᠷᠡᠩ  ᠪᠤᠷᠤ ᠴᠢᠷᠠᠢ ᠲᠠᠢ ᠮᠠᠷᠢᠶᠠᠯᠢᠭ ᠭᠡᠭ᠌ᠴᠢ᠎ᠶ᠋ᠢᠨ ᠪᠤᠭᠤᠷᠤᠯ  ᠨᠠᠰᠤᠳᠠᠨ ᠡᠵᠢ ᠮᠠᠨ᠎ᠢ ᠲᠤᠰᠤᠨ ᠭᠠᠷᠴᠤ᠌ ᠢᠷᠡᠪᠡ᠃  ᠡᠨᠡ ᠬᠦᠮᠦᠨ ᠭᠠᠷᠴᠠᠭ᠎ᠠ ᠦᠭᠡᠢ ᠬᠠᠳᠠᠮ ᠠᠪᠠᠭ᠎ᠠ ᠡᠵᠢ ᠷᠢᠨᠴᠢᠨᠮ᠎ᠠ ᠨᠠᠰᠤᠳᠠᠨ ᠪᠠᠢᠭ᠎ᠠ᠃ ᠪᠢᠳᠡ ᠮᠡᠨᠳᠦ ᠰᠠᠢᠬᠠᠨ ᠵᠢᠠᠨ ᠠᠰᠠᠭᠤᠯᠴᠠᠬ᠍ᠰᠠᠨ ᠬᠤᠢᠨ᠎ᠠ 《ᠪᠢ ᠪᠤᠯ ᠬᠡᠨ ᠬᠡᠨ᠎ᠦ ᠬᠦᠷᠭᠡᠨ》 ᠭᠡᠵᠦ᠍ ᠪᠡᠶ᠎ᠡ ᠭᠠᠷᠤᠯ ᠵᠢᠠᠨ ᠲᠠᠨᠢᠯᠴᠠᠭᠤᠯᠤᠭᠠᠳ᠂ 《ᠭᠠᠴᠢᠭ᠍ᠳᠠᠬᠤ᠎ᠶ᠋ᠢᠨ ᠡᠷᠬᠡᠨ᠎ᠳᠦ ᠭᠠᠷ ᠬᠤᠭᠤᠰᠤᠨ ᠵᠢᠠᠷ ᠨᠠᠰᠤᠳᠠᠨ ᠲᠠᠨ᠎ᠢ ᠬᠠᠢᠭᠠᠳ ᠢᠷᠡᠯ᠎ᠡ》 ᠭᠡᠵᠦ᠍ ᠡᠪᠭᠦᠢᠷᠡᠨ ᠦᠨᠡᠨ ᠵᠢᠠᠨ ᠦᠴᠢᠪᠡ᠃  ᠲᠦᠷᠦᠯ ᠰᠠᠳᠤᠨ ᠪᠤᠯᠤᠨ᠎ᠠ ᠭᠡᠬᠦ᠌ ᠪᠡᠷ ᠬᠠᠱᠢᠯᠠ ᠠᠳᠠᠯᠢ ᠦᠭᠡᠢ᠂ ᠨᠠᠰᠤᠳᠠᠨ ᠮᠠᠰᠢ ᠬᠠᠯᠠᠭᠤᠮᠰᠤᠭ ᠵᠢᠠᠷ ᠮᠠᠨ᠎ᠢ ᠲᠤᠲᠤᠭ᠍ᠰᠢ ᠤᠷᠢᠵᠤ᠄ 《ᠬᠦᠭᠡᠷᠦᠬᠦᠢ᠂ ᠭᠠᠳᠠᠬ᠍ᠰᠢ ᠶᠠᠪᠤᠬᠤ ᠬᠦᠮᠦᠨ ᠭᠡᠷ ᠵᠢᠠᠨ ᠡᠭᠦᠷᠦᠭᠡᠳ ᠶᠠᠪᠤᠳᠠᠭ ᠬᠦᠮᠦᠨ ᠬᠠᠮᠢᠭ᠎ᠠ ᠪᠠᠢᠬᠤ ᠪᠤᠢ᠃ ᠨᠡᠩ ᠬᠡᠯᠡᠬᠦ᠌᠎ᠳᠦ ᠬᠦᠷᠭᠡᠨ ᠬᠦᠮᠦᠨ ᠬᠦᠨᠳᠦᠳᠡᠢ ᠭᠡᠲᠡᠭ ᠶᠤᠮ ᠱᠢᠦ᠃ ᠬᠦᠷᠭᠡᠨ ᠢᠷᠡᠵᠦ᠍ ᠪᠠᠢᠬᠤ᠎ᠳᠤ ᠁》 ᠭᠡᠴᠢᠬᠡᠭ᠌ᠰᠡᠨ ᠱᠢᠨ᠎ᠡ ᠴᠠᠢ ᠴᠢᠨᠠᠵᠤ᠂  ᠱᠢᠷᠡᠭᠡᠨ᠎ᠳᠡᠭᠡᠨ ᠴᠠᠭᠠᠨ ᠢᠲᠡᠭᠡ᠂ ᠪᠤᠤᠪᠤ ᠪᠤᠭᠤᠷᠰᠤᠭ ᠲᠠᠯᠪᠢᠵᠤ ᠂ ᠱᠢᠷ᠎ᠠ ᠲᠤᠰᠤ  ᠭᠦᠯᠲᠤᠬᠡᠨᠠᠭ᠌ᠰᠡᠨ ᠲᠤᠭᠤᠯ ᠲᠠᠩ ᠬᠢᠵᠦ᠍ ᠢᠲᠡᠭᠦᠯᠪᠡ᠃ ᠬᠤᠭᠤᠯᠠᠨ ᠎ᠤ ᠲᠠᠷᠠᠭ᠎ᠠ  ᠠᠪᠠᠭ᠎ᠠ ᠡᠵᠢ ᠯᠤᠭᠡ ᠤᠢᠷ᠎ᠠ ᠲᠦᠷᠦᠯ᠂ ᠤᠷᠤᠭ ᠰᠠᠳᠤᠨ ᠎ᠤ  ᠲᠤᠬᠠᠢ  ᠪᠠᠬᠠᠨ ᠵᠤᠭᠤᠭ᠍ᠳᠠᠵᠤ ᠰᠠᠭᠤᠭᠠᠳ᠂ ᠬᠤᠯᠠ ᠵᠠᠮ ᠬᠦᠭᠡᠭᠡᠵᠦ᠍ ᠶᠠᠳᠠᠷᠠᠭ᠍ᠰᠠᠨ ᠴᠤᠢᠵᠢ ᠪᠢᠳᠠ ᠬᠤᠶᠠᠷ ᠲᠡᠷᠡ ᠰᠦᠨᠢ ᠨᠢ ᠪᠦᠬᠡ ᠴᠤ᠌ ᠨᠤᠢᠷᠰᠤᠯ᠎ᠠ᠃ ᠮᠠᠷᠭᠠᠰᠢ ᠦᠷᠯᠦᠭᠡ ᠨᠢ ᠠᠪᠠᠭ᠎ᠠ ᠡᠵᠢ ᠮᠢᠬ᠎ᠠ ᠬᠦᠰᠭᠦᠯᠡᠭ᠌ᠰᠡᠨ ᠠᠭ᠍ᠰᠢᠭᠤᠨ ᠲᠤᠲᠤᠷᠭ᠎ᠠ ᠪᠤᠳᠠᠭ᠎ᠠ ᠪᠠᠵᠠᠭᠠᠵᠤ ᠢᠲᠡᠭᠦᠯᠵᠡᠢ᠃ ᠲᠡᠷᠡ ᠦᠶᠡᠰ ᠲᠸ᠋ ᠬᠢᠷᠢ ᠪᠠᠷᠤᠭ᠎ᠤᠨ ᠠᠢᠯ ᠡᠢᠮᠦ᠍ ᠲᠠᠩᠰᠤᠭ ᠰᠠᠢᠬᠠᠨ ᠬᠤᠭᠤᠯᠠ ᠪᠡᠯᠡᠳᠬᠦ᠌ ᠨᠦᠬᠦᠴᠡᠯ  ᠪᠠᠢᠬᠤ ᠦᠭᠡᠢ᠂  ᠦᠭ᠌ᠭᠢᠶᠡᠮᠦᠷᠴᠢ ᠨᠠᠰᠤᠳ᠋ᠠᠨ ᠮᠠᠨᠢ ᠴᠤᠬᠤᠮ ᠴᠤ᠌ ᠪᠠᠢᠳᠠᠭ ᠵᠢᠠᠨ ᠲᠡᠮᠲᠡᠷᠢᠵᠤ ᠠᠯᠢ ᠰᠠᠢᠨ ᠵᠢᠠᠨ ᠭᠠᠷᠭᠠᠵᠤ ᠮᠠᠨ᠎ᠢ ᠲᠠᠢᠯᠠᠬ᠍ᠰᠠᠨ ᠪᠢᠯᠡ᠃ ᠭᠡᠪᠡᠴᠤ᠌ ᠬᠠᠷᠢᠭᠤ ᠳ᠋ᠤᠨᠢ ᠪᠢ ᠲᠠᠯ᠎ᠠ ᠪᠤᠤᠪᠤ᠎ᠶ᠋ᠢᠨ ᠴᠤ᠌ ᠠᠴᠢ ᠬᠠᠷᠢᠭᠤᠯᠤᠯᠳᠠ ᠦᠭ᠌ᠴᠦ ᠴᠢᠳᠠᠭ᠎ᠠ ᠦᠭᠡᠢ ᠨᠢ ᠬᠠᠷᠠᠮᠰᠠᠯᠳᠠᠢ᠃  ᠴᠤᠢᠵᠢ ᠭᠤᠸᠠᠢ ᠪᠢᠳᠠ ᠬᠤᠶᠠᠷ ᠨᠠᠰᠤᠳᠠᠨ ᠡᠵᠢ᠎ᠳᠦ ᠴᠢᠩ ᠰᠡᠳᠭᠢᠯ᠎ᠡᠴᠡ ᠪᠠᠨ ᠲᠠᠯᠠᠷᠬᠠᠭᠠᠳ᠂ ᠲᠡᠨᠳᠠ᠎ᠠᠴᠠ ᠠᠶᠠᠷᠯᠠᠵᠤ ᠨᠢᠭᠡᠳᠦᠯ ᠵᠦᠭ ᠵᠢᠠᠨ ᠭᠠᠬᠠᠢ ᠶᠠᠪᠠᠭᠠᠨ ᠵᠢᠠᠷ ᠭᠠᠷᠤᠭᠠᠳ  ᠬᠦᠳᠡᠯᠪᠡ᠃  ᠲᠠᠷᠤᠭ᠎ᠠ ᠲᠠᠭᠠᠭᠠᠮᠠᠯ ᠨᠢ ᠪᠠᠢᠬᠤ ᠦᠭᠡᠢ ᠶᠤᠮ ᠴᠢᠨᠢ ᠠᠷᠭ᠎ᠠ ᠦᠭᠡᠢ᠂ ᠮᠠᠨ᠎ᠤ ᠰᠤᠷᠪᠤᠯᠵᠢᠯᠠᠭ᠎ᠠ ᠲᠡᠭᠡᠵᠦ᠍ ᠬᠤᠭᠤᠰᠤᠳᠠᠪᠠ᠃ ᠴᠤᠢᠵᠢ ᠭᠤᠸᠠᠢ ᠲᠡᠷᠡ ᠤᠳᠠᠭ᠎ᠠ ᠴᠤ᠋ ᠱᠢᠨ᠎ᠡ ᠠᠷᠠᠰᠤᠨ ᠭᠤᠳᠤᠯ ᠡᠮᠦᠰᠴᠤ᠌ ᠪᠠᠢᠬ᠍ᠰᠠᠨ ᠶᠤᠮ᠃  ᠬᠦᠳᠡᠭᠡ᠎ᠶ᠋ᠢᠨ ᠱᠢᠷ᠎ᠠ ᠵᠠᠮ ᠵᠢᠠᠷ ᠬᠠᠢᠷ ᠴᠢᠯᠠᠭᠤ᠎ᠳᠤ ᠮᠦᠷᠭᠦᠭᠦᠯᠵᠦ᠍᠂ ᠬᠢᠷᠮᠠᠭ ᠴᠠᠰᠤᠨ᠎ᠳᠤ ᠨᠤᠷᠤᠭ᠍ᠲᠠᠭᠠᠳ ᠬᠠᠯᠳᠠᠷ ᠪᠤᠯᠳᠠᠷ ᠪᠤᠯᠤᠬ᠍ᠰᠠᠨ ᠠᠷᠠᠰᠤᠨ ᠭᠤᠳᠤᠯ ᠵᠢᠠᠨ ᠬᠠᠷᠠᠭᠠᠳ᠄ 《ᠡᠩ！ ᠬᠠᠢᠷᠠᠨ ᠭᠤᠳᠤᠯ᠎ᠢ  ᠠᠯᠠᠭᠠᠳ ᠬᠠᠶᠠᠴᠢᠬᠠᠯ᠎ᠠ》 ᠭᠡᠵᠦ᠍ ᠴᠤᠢᠵᠢ ᠭᠤᠸᠠᠢ ᠵᠠᠮ᠎ᠳᠠᠭᠠᠨ ᠬᠠᠷᠠᠮᠰᠠᠨ ᠬᠠᠷᠠᠮᠰᠠᠨ ᠬᠡᠯᠡᠵᠦ᠍ ᠪᠠᠢᠬ᠍ᠰᠠᠨ᠎ᠢ ᠨᠢ ᠰᠠᠨᠠᠵᠤ ᠪᠠᠢᠨ᠎ᠠ᠃ ᠲᠡᠷᠲᠡᠭᠡ ᠯᠢᠶᠤᠤ ᠤᠯᠤᠰ᠎ᠤᠨ ᠦᠶ᠎ᠡ᠎ᠶ᠋ᠢᠨ ᠴᠢᠩᠵᠸᠤ ᠵᠢᠨ ᠴᠠᠭᠠᠨ ᠰᠤᠪᠤᠷᠭ᠎ᠠ ᠭᠡᠵᠦ᠍ ᠭᠤᠴᠢ ᠲᠦᠴᠢᠨ ᠭᠠᠵᠠᠷ᠎ᠤᠨ ᠬᠤᠯᠠ᠎ᠠᠴᠠ  ᠱᠤᠪᠬᠤ ᠤᠷᠤᠢ ᠨᠢ ᠬᠠᠷᠠᠭ᠍ᠳᠠᠬᠤ ᠪᠤᠯᠪᠠᠴᠤ᠌ ᠶᠠᠪᠤᠭᠠᠳ ᠶᠠᠪᠤᠭᠠᠳ ᠬᠦᠷᠲᠡᠭ ᠦᠭᠡᠢ᠂ 《ᠬᠤᠯᠠ᠎ᠶ᠋ᠢᠨ ᠵᠠᠮ᠎ᠳᠤ ᠬᠤᠶᠠᠷ ᠴᠢᠬᠢ ᠬᠦᠨᠳᠦ》  ᠭᠡᠭ᠌ᠴᠢ ᠪᠡᠷ᠂ ᠦᠷᠯᠦᠭᠡ᠎ᠶ᠋ᠢᠨ ᠨᠠᠢ᠍ᠮᠠ ᠶᠢᠰᠦᠨ ᠴᠠᠭ᠎ᠲᠤ ᠮᠤᠷᠳᠠᠵᠤ ᠭᠠᠷᠤᠬ᠍ᠰᠠᠨ ᠪᠢᠲᠠ ᠦᠳᠡ᠎ᠶ᠋ᠢᠨ ᠬᠤᠢᠨᠠᠬᠢ ᠬᠤᠶᠠᠷ᠂ ᠭᠤᠷᠪᠠᠨ ᠴᠠᠭ᠎ᠲᠤ ᠰᠠᠶᠢ ᠨᠢᠭᠡᠳᠦᠯ ᠲᠡᠭᠡᠷ᠎ᠡ ᠶᠡᠬᠡ ᠵᠦᠲᠡᠷᠡᠵᠦ᠍ ᠬᠦᠷᠦᠭ᠌ᠰᠡᠨ ᠪᠢᠯᠡ ᠁

ᠢᠩᠭᠢᠵᠦ᠍ ᠪᠢᠳᠠ ᠰᠤᠨᠢᠨ ᠮᠡᠳᠡᠭᠡᠨ᠎ᠦ ᠲᠤᠭᠤᠢᠯᠠᠩ᠎ᠳᠤ ᠬᠡᠳᠦᠨ ᠵᠢᠯ ᠬᠠᠮᠳᠤ ᠠᠵᠢᠯᠯᠠᠵᠤ᠂ ᠬᠦᠳᠡᠭᠡ ᠭᠠᠲᠠᠭ᠎ᠠ ᠰᠤᠷᠪᠤᠯᠵᠢᠯᠠᠨ ᠭᠦᠶᠦᠵᠦ᠍᠂ ᠬᠦᠢᠳᠡᠨ᠎ᠳᠦ ᠬᠦᠷᠦᠵᠦ᠍ ᠬᠠᠯᠠᠭᠤᠨ᠎ᠳᠤ ᠬᠠᠯᠠᠵᠤ ᠶᠠᠪᠤᠬ᠍ᠰᠠᠨ ᠶᠤᠮ᠃ 1974 ᠤᠨ᠎ᠳᠤ ᠪᠢ ᠠᠵᠢᠯ ᠱᠢᠯᠵᠢᠵᠤ ᠶᠠᠪᠤᠬ᠍ᠰᠠᠨ᠎ᠤ ᠲᠠᠷᠠᠭ᠎ᠠ ᠤᠳᠠᠭ᠎ᠠ ᠦᠭᠡᠢ᠂  ᠬᠤᠱᠢᠭᠤᠨ ᠎ᠤ ᠰᠤᠨᠢᠨ ᠮᠡᠳᠡᠭᠡᠨ᠎ᠦ ᠲᠤᠭᠤᠢᠯᠠᠩ ᠲᠠᠷᠠᠵᠤ᠂ ᠴᠤᠢᠵᠢ ᠭᠤᠸᠠᠢ ᠵᠤᠤ ᠤᠳᠠ᠎ᠶ᠋ᠢᠨ ᠷᠠᠳᠢᠤ᠋ ᠨᠡᠪᠲᠡᠷᠡᠭᠦᠯᠭᠡ᠎ᠶ᠋ᠢᠨ ᠬᠤᠷᠢᠶ᠎ᠠ᠎ᠶ᠋ᠢᠨ ᠪᠠᠭᠠᠷᠢᠨ ᠪᠠᠷᠠᠭᠤᠨ ᠬᠤᠱᠢᠭᠤᠨ᠎ᠳᠤ ᠰᠠᠭᠤᠭ᠎ᠠ ᠰᠤᠷᠪᠤᠯᠵᠢᠯᠠᠭ᠍ᠴᠢ ᠪᠤᠯᠤᠬ᠍ᠰᠠᠨ ᠪᠢᠯᠡ᠃

ᠮᠢᠨᠤ ᠰᠠᠭᠤᠬ᠍ᠳᠠᠯ᠎ᠳᠤ ᠴᠤᠢᠵᠢ ᠭᠤᠸᠠᠢ ᠪᠤᠯ  ᠨᠤᠮ ᠶᠡᠬᠡ ᠤᠩᠱᠢᠳᠠᠭ᠃  ᠬᠠᠶᠠ ᠯᠠ ᠬᠤᠱᠢᠭᠤᠨ᠎ᠤ ᠨᠤᠮ᠎ᠤᠨ ᠰᠠᠩ ᠠ᠋ᠴᠠ ᠵᠤᠵᠠᠭᠠᠨ  ᠵᠤᠵᠠᠭᠠᠨ ᠨᠤᠮ  ᠵᠢᠭᠡᠯᠡᠵᠦ᠍  ᠠᠪᠴᠢᠷᠠᠭᠠᠳ  ᠦᠵᠡᠳᠡᠭ᠂ ᠭᠤᠤᠯᠳᠠᠭᠤ ᠲᠡᠦᠬᠡ᠎ᠶ᠋ᠢᠨ ᠬᠠᠮᠢᠶ᠎ᠠ  ᠲᠠᠢ ᠰᠤᠳᠤᠷ  ᠪᠢᠴᠢᠭ  ᠨᠤᠭᠦᠳ᠂  ᠲᠡᠬᠦᠨ᠎ᠦ ᠲᠤᠲᠤᠷ᠎ᠠ 《ᠭᠠᠩᠭ᠎ᠠ ᠎ᠶ᠋ᠢᠨ ᠤᠷᠤᠰᠭᠠᠯ》᠂ ᠪᠠᠰᠠ 《ᠬᠠᠳ᠎ᠤᠨ ᠦᠨᠳᠦᠰᠦ᠎ᠶ᠋ᠢᠨ ᠬᠤᠷᠢᠶᠠᠩᠭᠤᠢ ᠲᠤᠪᠴᠢ》 ᠭᠡᠵᠦ᠍ ᠬᠠᠭᠤᠴᠢᠨ ᠰᠤᠳᠤᠷ ᠮᠡᠳᠦ  ᠬᠦᠬᠡ ᠬᠠᠪᠢᠰᠤᠳᠠᠢ ᠤᠷᠳᠤᠯᠵᠢᠨ ᠬᠡᠯᠪᠡᠷᠢᠲᠠᠢ  ᠨᠤᠮ ᠪᠠᠢᠬ᠍ᠰᠠᠨ᠃  ᠡᠷᠳᠡᠮ ᠨᠤᠮ ᠎ᠤᠨ  ᠬᠦᠮᠦᠨ ᠭᠡᠭ᠌ᠴᠢ  ᠬᠠᠱᠢᠯᠠ ᠠᠳᠠᠯᠢ ᠦᠭᠡᠢ᠃ ᠪᠢ ᠴᠤ᠌ ᠬᠠᠷᠢᠨ ᠡᠨᠡ ᠲᠤᠬᠠᠢ ᠤᠬᠠᠭᠠᠨ᠎ᠤ ᠰᠦᠪᠡ ᠴᠤ᠌ ᠨᠡᠬᠡᠭᠡᠭ᠌ᠲᠡᠭᠡ ᠦᠭᠡᠢ ᠤᠰᠤᠨ ᠲᠡᠨᠡᠭ ᠵᠢᠡᠷ ᠵᠢᠠᠨ ᠪᠠᠢᠵᠠᠢ᠂ ᠬᠡᠳᠦᠭᠦᠯᠡ ᠡᠨᠡ ᠲᠡᠷᠡ ᠶᠠᠷᠢᠵᠤ ᠬᠦᠭᠡᠷᠦᠯᠳᠦᠵᠦ᠍ ᠪᠠᠢᠬᠤ᠎ᠳᠤ ᠴᠤᠢᠵᠢ ᠭᠤᠸᠠᠢ ᠮᠦᠨ ᠠᠵᠢᠭ ᠴᠤ᠌ ᠦᠭᠡᠢ ᠨᠤᠮ ᠵᠢᠠᠨ ᠱᠠᠭᠠᠢᠵᠤ ᠯᠠ ᠪᠠᠢᠳᠠᠭ᠃ ᠭᠠᠷᠠᠭ᠎ᠤᠨ ᠡᠳᠦᠷ᠂  ᠪᠠᠶᠠᠷ ᠲᠤᠷᠠᠰᠭᠠᠯ᠎ᠤᠨ ᠡᠳᠦᠷ ᠲᠸ᠋  ᠴᠤ᠌ ᠠᠯᠪᠠᠨ ᠭᠡᠷ ᠲᠡᠭᠡᠨ ᠢᠷᠡᠭᠡᠳ ᠨᠤᠮ ᠪᠢᠴᠢᠭ ᠲᠠᠢ ᠬᠠᠨᠢᠰᠠᠨ ᠰᠠᠭᠤᠳᠠᠭ᠃ ᠭᠡᠷ ᠵᠠᠭᠤᠷ᠎ᠠ ᠵᠢᠨ ᠵᠢᠠᠨ ᠠᠷᠰᠠᠷ ᠠᠵᠢᠯ᠎ᠳᠤ ᠲᠡᠮᠡᠢ ᠭᠠᠷ ᠤᠷᠤᠳᠠᠭ ᠦᠭᠡᠢ ᠪᠤᠯᠤᠯᠳᠠᠢ᠂ 《ᠲᠤᠰᠤᠨ ᠯᠤᠩᠬᠤ ᠤᠩᠬᠤᠯᠢᠵᠤ ᠤᠨᠠᠬᠤ᠎ᠳᠤ ᠲᠦᠱᠢᠵᠤ ᠪᠤᠰᠭᠠᠳᠠᠭ ᠦᠭᠡᠢ》 ᠭᠡᠵᠦ᠍ ᠡᠬᠡᠨᠡᠷ ᠨᠢ ᠵᠠᠩᠨᠠᠵᠤ ᠪᠠᠢᠬ᠍ᠰᠠᠨ᠎ᠢ ᠨᠢᠭᠡ ᠪᠢᠰᠢ ᠤᠳᠠᠭ᠎ᠠ ᠰᠤᠨᠤᠰᠴᠤ᠌ ᠪᠠᠢᠬ᠍ᠰᠠᠨ᠃  ᠬᠤᠵᠢᠮ ᠨᠢ ᠪᠤᠳᠤᠵᠤ ᠦᠵᠡᠪᠡᠯ᠂  ᠴᠤᠢᠵᠢ ᠭᠤᠸᠠᠢ ᠠᠯᠢ ᠬᠡᠳᠦᠢᠨᠡᠢ᠎ᠡᠴᠡ  ᠠᠪᠤᠭᠠᠳ ᠲᠡᠦᠬᠡ᠎ᠶ᠋ᠢᠨ ᠰᠤᠳᠤᠯᠭᠠᠨ᠎ᠤ ᠲᠠᠯ᠎ᠠ ᠪᠠᠷ ᠠᠩᠬᠠᠷᠤᠯ ᠵᠢᠠᠨ ᠬᠠᠨᠳᠤᠭᠤᠯᠵᠤ᠂ ᠶᠡᠬᠡ ᠬᠡᠮᠵᠢᠶᠡᠨ᠎ᠦ ᠨᠤᠮ ᠰᠤᠳᠤᠷ ᠤᠩᠱᠢᠨ ᠲᠤᠭᠤᠯᠵᠤ᠂ ᠮᠡᠳᠡᠯᠭᠡ᠎ᠶ᠋ᠢᠨ ᠬᠤᠷᠠᠮᠳᠤᠯ ᠵᠢᠠᠨ ᠡᠬᠢᠯᠡᠬᠦᠯᠦᠭ᠌ᠰᠡᠨ  ᠶᠤᠮ ᠪᠠᠢᠨ᠎ᠠ᠃ 《ᠠᠵᠠ ᠲᠤᠬᠢᠶᠠᠯ ᠪᠡᠯᠡᠳᠭᠡᠯ ᠲᠠᠢ ᠬᠦᠮᠦᠨ᠎ᠢ ᠲᠤᠯᠳᠤᠢᠳᠠᠳᠠᠭ》 ᠭᠡᠭ᠌ᠴᠢ ᠪᠡᠷ᠂ 1978 ᠤᠨ ᠎ᠳᠤ  ᠴᠤᠢᠵᠢ ᠭᠤᠸᠠᠢ ᠦᠪᠦᠷ ᠮᠤᠩᠭᠤᠯ᠎ᠤᠨ ᠱᠢᠨᠵᠢᠯᠡᠬᠦ᠌ ᠤᠬᠠᠭᠠᠨ᠎ᠤ ᠬᠦᠷᠢᠶᠡᠯᠡᠩ᠎ᠦᠨ ᠲᠡᠦᠬᠡ᠎ᠶ᠋ᠢᠨ ᠰᠤᠳᠤᠯᠭᠠᠨ᠎ᠤ ᠭᠠᠵᠠᠷ ᠱᠢᠯᠵᠢᠨ ᠢᠷᠡᠵᠦ᠍᠂ ᠶᠤᠰᠤᠳᠠᠢ ᠦᠪᠡᠷ᠎ᠦᠨ ᠵᠢᠠᠨ ᠲᠤᠷ᠎ᠠ ᠰᠤᠨᠢᠷᠬᠠᠯ ᠲᠠᠢ ᠠᠵᠢᠯ ᠵᠢᠠᠨ ᠤᠯᠵᠤ  ᠬᠢᠭ᠌ᠰᠡᠨ ᠎ᠡᠴᠡ 《 ᠲᠡᠭ᠌ᠷᠢ ᠦᠨᠲᠦᠷ  ᠱᠢᠪᠠᠭᠤ ᠲᠠᠪᠠ ᠪᠠᠷ ᠵᠢᠠᠨ ᠨᠢᠰᠴᠤ᠌᠂  ᠭᠠᠵᠠᠷ ᠠᠭᠤᠳᠠᠮ ᠠᠭ᠍ᠲᠠ ᠲᠤᠷ᠎ᠠ  ᠪᠡᠷ ᠵᠢᠠᠨ ᠲᠠᠪᠬᠢᠨ᠎ᠠ 》 ᠭᠡᠭ᠌ᠴᠢ ᠨᠢ ᠪᠤᠯᠪᠠ᠃ ᠲᠡᠷᠡ ᠪᠡᠷ ᠡᠷᠳᠡᠮ ᠮᠡᠳᠡᠯᠭᠡ ᠭᠦᠨ  ᠪᠠᠶᠠᠯᠢᠭ᠂ ᠰᠠᠭᠤᠷᠢ ᠮᠡᠳᠡᠯᠭᠡ ᠪᠠᠳᠤ ᠪᠡᠬᠢ᠂ ᠮᠤᠩᠭᠤᠯ᠂ ᠬᠢᠲᠠᠳ᠂ ᠮᠠᠨᠵᠤ᠂  ᠲᠦᠪᠡᠳ ᠵᠡᠷᠭᠡ ᠤᠯᠠᠨ ᠬᠡᠯᠡ ᠲᠠᠢ ᠪᠦᠭᠡᠳ ᠤᠷᠤᠰ᠂ ᠠᠩᠭᠯᠢ᠂ ᠶᠠᠫᠤᠨ ᠬᠡᠯᠡ᠎ᠶ᠋ᠢ ᠴᠤ᠌ ᠡᠵᠡᠮᠱᠢᠭ᠌ᠰᠡᠨ ᠲᠠᠪᠠᠭᠤᠯᠢᠭ ᠵᠢᠠᠨ ᠪᠠᠳᠠᠷᠠᠭᠤᠯᠵᠤ᠂ ᠦᠪᠦᠷ ᠮᠤᠩᠭᠤᠯ᠎ᠤᠨ ᠱᠢᠨᠵᠢᠯᠡᠬᠦ᠌ ᠤᠬᠠᠭᠠᠨ᠎ᠤ ᠬᠦᠷᠢᠶᠡᠯᠡᠩ᠎ᠦᠨ ᠲᠡᠦᠬᠡ᠎ᠶ᠋ᠢᠨ ᠰᠤᠳᠤᠯᠭᠠᠨ᠎ᠤ ᠭᠠᠵᠠᠷ ᠠᠵᠢᠯᠯᠠᠬ᠍ᠰᠠᠨ 40  ᠭᠠᠷᠤᠢ ᠵᠢᠯ᠎ᠦᠨ ᠲᠤᠷᠰᠢ᠂ ᠮᠤᠩᠭᠤᠯ ᠲᠡᠦᠬᠡ᠎ᠶ᠋ᠢᠨ ᠰᠤᠷᠪᠤᠯᠵᠢ ᠪᠢᠴᠢᠭ ᠬᠠᠷᠭᠤᠭᠤᠯᠤᠨ ᠲᠠᠢᠯᠪᠤᠷᠢᠯᠠᠬ᠍ᠰᠠᠨ᠂ ᠬᠠᠷᠭᠤᠭᠤᠯᠤᠨ  ᠬᠢᠨᠠᠬ᠍ᠰᠠᠨ᠂ ᠤᠮᠠᠷᠠᠳᠤ ᠎ᠶ᠋ᠢᠨ ᠦᠨᠳᠦᠰᠦᠲᠡᠨ᠎ᠦ ᠲᠡᠦᠬᠡ᠂ ᠮᠤᠩᠭᠤᠯ ᠦᠨᠳᠦᠰᠦᠲᠡᠨ᠎ᠦ ᠲᠡᠦᠬᠡ᠂  ᠮᠤᠩᠭᠤᠯ ᠲᠡᠦᠬᠡᠨ ᠰᠤᠳᠤᠷ ᠪᠢᠴᠢᠭ᠂ ᠢᠯᠠᠩᠭᠤᠶ᠎ᠠ ᠮᠤᠩᠭᠤᠯ ᠪᠤᠷᠬᠠᠨ ᠱᠠᠱᠢᠨ᠎ᠤ ᠲᠡᠦᠬᠡ᠎ᠶ᠋ᠢᠨ ᠰᠤᠳᠤᠯᠭᠠᠨ᠎ᠤ ᠲᠠᠯ᠎ᠠ ᠪᠡᠷ ᠪᠦᠲᠦᠭᠡᠯ᠂ ᠡᠷᠳᠡᠮ ᠱᠢᠨᠵᠢᠯᠡᠭᠡᠨ᠎ᠦ ᠦᠬᠦᠯᠡᠯ᠂ ᠤᠷᠴᠢᠭᠤᠯᠭ᠎ᠠ᠂ ᠤᠳᠤᠷᠢᠳᠭᠠᠯ ᠪᠠ ᠱᠢᠬᠦᠮᠵᠢ ᠦᠭᠦᠯᠡᠯ ᠨᠤᠭᠦᠳ᠎ᠢ  ᠮᠠᠰᠢ ᠤᠯᠠᠨ ᠨᠠᠢᠷᠠᠭᠤᠯᠤᠨ ᠵᠤᠬᠢᠶᠠᠵᠤ᠂  ᠬᠡᠪᠯᠡᠬᠦᠯᠦᠨ ᠨᠡᠢᠲᠡᠯᠡᠵᠦ᠍᠂ ᠲᠡᠷᠭᠡ ᠪᠡᠷ ᠲᠡᠭᠡᠭᠡᠮ᠎ᠡ ᠲᠡᠮᠡᠭᠡ ᠪᠡᠷ ᠠᠴᠢᠮ᠎ᠠ  ᠵᠤᠬᠢᠶᠠᠯ ᠪᠦᠲᠦᠭᠡᠯ ᠵᠢᠠᠷ ᠵᠢᠠᠨ ᠱᠠᠭ᠍ᠰᠢᠬ᠍ᠳᠠᠵᠤ ᠶᠠᠪᠤᠬ᠍ᠰᠠᠨ᠃

ᠰᠤᠷᠪᠤᠯᠵᠢ ᠪᠢᠴᠢᠭ᠎ᠦᠨ ᠰᠤᠳᠤᠯᠭᠠᠨ᠎ᠤ ᠲᠠᠯ᠎ᠠ ᠪᠠᠷ ᠬᠢ ᠭᠤᠤᠯ ᠪᠦᠲᠦᠭᠡᠯ᠎ᠢ ᠨᠢ ᠴᠤᠬᠤᠰ ᠲᠤᠷᠠᠳᠪᠠᠯ᠄ 《〈ᠭᠠᠩᠭ᠎ᠠ ᠎ᠶ᠋ᠢᠨ ᠤᠷᠤᠰᠭᠠᠯ〉 ᠬᠠᠷᠭᠤᠭᠤᠯᠤᠨ  ᠲᠠᠢᠯᠪᠤᠷᠢᠯᠠᠪᠠ》᠂《〈 ᠠᠯᠳᠠᠨ ᠲᠤᠪᠴᠢ〉 ᠬᠠᠷᠭᠤᠭᠤᠯᠤᠨ  ᠲᠠᠢᠯᠪᠤᠷᠢᠯᠠᠪᠠ》᠂ 《〈ᠠᠯᠳᠠᠨ ᠬᠦᠷᠳᠤ ᠮᠢᠩᠭᠠᠨ ᠬᠡᠭᠡᠰᠤᠳᠤ〉 ᠬᠠᠷᠭᠤᠭᠤᠯᠤᠨ ᠲᠠᠢᠯᠪᠤᠷᠢᠯᠠᠪᠠ》᠂ 《〈 ᠠᠯᠳᠠᠨ ᠡᠷᠢᠬᠡ〉 ᠬᠠᠷᠭᠤᠭᠤᠯᠤᠨ  ᠲᠠᠢᠯᠪᠤᠷᠢᠯᠠᠪᠠ》 ᠵᠡᠷᠭᠡ ᠪᠤᠢ᠃ ᠮᠤᠩᠭᠤᠯ ᠪᠤᠷᠬᠠᠨ ᠱᠠᠱᠢᠨ᠎ᠤ ᠲᠡᠦᠬᠡ᠎ᠶ᠋ᠢᠨ ᠲᠠᠯ᠎ᠠ ᠪᠡᠷ ᠬᠢ ᠵᠤᠬᠢᠶᠠᠯ ᠪᠦᠲᠦᠭᠡᠯ ᠨᠢ ᠭᠡᠪᠡᠯ᠄ 《ᠮᠤᠩᠭᠤᠯ ᠪᠤᠷᠬᠠᠨ ᠱᠠᠱᠢᠨ᠎ᠤ ᠲᠡᠦᠬᠡ — ᠶᠡᠬᠡ  ᠮᠤᠩᠭᠤᠯ᠎ᠤᠨ ᠦᠶ᠎ᠡ （1206 —1271）》᠂ 《ᠮᠤᠩᠭᠤᠯ ᠪᠤᠷᠬᠠᠨ ᠱᠠᠱᠢᠨ᠎ᠤ ᠲᠡᠦᠬᠡ —  ᠶᠤᠸᠠᠨ ᠤᠯᠤᠰ᠎ᠤᠨ ᠦᠶ᠎ᠡ （1271—1368）》᠂ 《ᠮᠤᠩᠭᠤᠯ ᠪᠤᠷᠬᠠᠨ ᠱᠠᠱᠢᠨ᠎ᠤ ᠲᠡᠦᠬᠡ — ᠤᠮᠠᠷᠠᠳᠤ ᠶᠤᠸᠠᠨ ᠎ᠤ ᠦᠶ᠎ᠡ （1368 —1634）》᠂ 《ᠦᠪᠦᠷ ᠮᠤᠩᠭᠤᠯ᠎ᠳᠠᠬᠢ ᠲᠦᠪᠡᠳ ᠤᠯᠠᠮᠵᠢᠯᠠᠯ ᠲᠠᠢ ᠰᠦᠮ᠎ᠡ ᠬᠡᠢᠳ》᠂ 《ᠮᠤᠩᠭᠤᠯ ᠦᠨᠳᠦᠰᠦᠲᠡᠨ᠎ᠦ ᠪᠦᠷᠢᠨ ᠲᠡᠦᠬᠡ》（ᠱᠠᠱᠢᠨ᠎ᠤ ᠪᠤᠳᠢ）᠂ 《ᠮᠤᠩᠭᠤᠯ ᠦᠨᠳᠦᠰᠦᠲᠡᠨ᠎ᠦ ᠪᠦᠷᠢᠨ ᠲᠡᠦᠬᠡ》 （ᠰᠤᠷᠪᠤᠯᠵᠢ ᠪᠢᠴᠢᠭ᠎ᠦᠨ ᠪᠤᠳᠢ） ᠵᠡᠷᠭᠡ ᠪᠤᠢ᠃ ᠮᠤᠩᠭᠤᠯ᠎ᠤᠨ ᠲᠡᠦᠬᠡ᠂ ᠤᠮᠠᠷᠠᠳᠤ᠎ᠶ᠋ᠢᠨ ᠦᠨᠲᠦᠰᠦᠲᠡᠨ᠎ᠦ ᠲᠡᠦᠬᠡ᠎ᠶ᠋ᠢᠨ ᠲᠤᠬᠠᠢ ᠪᠦᠲᠦᠭᠡᠯ ᠭᠡᠪᠡᠯ《ᠡᠷᠲᠡᠨ᠎ᠦ ᠤᠮᠠᠷᠠᠳᠤ ᠠᠽᠢᠶ᠎ᠠ᠎ᠶ᠋ᠢᠨ ᠨᠡᠬᠦᠲᠡᠯᠴᠢ ᠦᠨᠲᠦᠰᠦᠲᠡᠨ — ᠦᠭᠡ ᠬᠡᠯᠡ ᠦᠰᠦᠭ ᠪᠢᠴᠢᠭ᠂ ᠰᠤᠷᠪᠤᠯᠵᠢ ᠪᠢᠴᠢᠭ᠂  ᠱᠠᠱᠢᠨ ᠰᠤᠷᠳᠠᠬᠤᠨ》᠂ 《ᠫᠠᠭ᠍ᠪᠠ ᠯᠠᠮ᠎ᠠ᠎ᠶ᠋ᠢᠨ ᠨᠠᠮᠳᠠᠷ 》᠂ 《ᠮᠤᠩᠭᠤᠯ ᠲᠡᠦᠬᠡ᠎ᠶ᠋ᠢᠨ ᠰᠤᠷᠪᠤᠯᠵᠢ ᠪᠢᠴᠢᠭ᠎ᠦᠨ ᠲᠤᠢᠮᠤᠴᠢᠯᠠᠯ》᠂ 《ᠦᠪᠦᠷ ᠮᠤᠩᠭᠤᠯ᠎ᠤᠨ ᠡᠷᠲᠡᠨ᠎ᠦ ᠬᠤᠳᠠ ᠨᠤᠭᠤᠳ》 ᠵᠡᠷᠭᠡ ᠪᠤᠢ᠃  ᠪᠤᠰᠤᠳ ᠯᠤᠭ᠎ᠠ ᠬᠠᠮᠳᠤᠷᠠᠨ ᠬᠤᠷᠱᠢᠬ᠍ᠰᠠᠨ ᠪᠦᠲᠦᠭᠡᠯ ᠭᠡᠪᠡᠯ 《ᠦᠪᠦᠷ ᠮᠤᠩᠭᠤᠯ᠎ᠤᠨ ᠰᠦᠮ᠎ᠡ ᠬᠡᠢᠳ》᠂《ᠲᠦᠪᠡᠳ᠎ᠡᠴᠡ ᠤᠯᠠᠮᠵᠢᠯᠠᠬ᠍ᠰᠠᠨ ᠪᠤᠷᠬᠠᠨ ᠱᠠᠱᠢᠨ ᠮᠤᠩᠭᠤᠯ ᠤᠷᠤᠨ᠎ᠳᠤ ᠲᠠᠷᠬᠠᠨ ᠲᠡᠯᠭᠡᠷᠡᠭ᠌ᠰᠡᠨ ᠲᠤᠬᠠᠢ ᠰᠤᠳᠤᠯᠭ᠎ᠠ》᠂ 《ᠲᠦᠮᠡᠳ᠎ᠦᠨ ᠲᠡᠦᠬᠡ》 ᠵᠡᠷᠭᠡ ᠪᠤᠢ᠃  ᠡᠭᠦᠨ᠎ᠡᠴᠡ ᠭᠠᠲᠠᠨ᠎ᠠ ᠴᠤᠢᠵᠢ ᠭᠤᠸᠠᠢ ᠪᠠᠰᠠ ᠤᠯᠤᠰ᠎ᠤᠨ ᠲᠤᠲᠤᠭᠠᠳᠤ ᠭᠠᠳᠠᠭᠠᠲᠤ᠎ᠶ᠋ᠢᠨ ᠰᠡᠳᠭᠦᠯ ᠲᠡᠭᠡᠷ᠎ᠡ 《ᠭᠦᠮᠪᠦᠵᠠᠪ ᠬᠢᠭᠡᠳ 〈ᠭᠠᠩᠭ᠎ᠠ ᠎ᠶ᠋ᠢᠨ ᠤᠷᠤᠰᠭᠠᠯ〉》᠂ 《〈ᠠᠯᠳᠠᠨ ᠬᠦᠷᠳᠤ ᠮᠢᠩᠭᠠᠨ ᠬᠡᠭᠡᠰᠤᠳᠤ〉 ᠵᠢᠴᠢ ᠲᠡᠬᠦᠨ᠎ᠦ ᠲᠡᠦᠬᠡ᠎ᠶ᠋ᠢᠨ ᠦᠨ᠎ᠡ ᠦᠷᠲᠡᠭ》᠂ 《ᠷᠠᠱᠢᠫᠤᠩᠰᠤᠭ᠎ᠤᠨ ᠨᠢᠭᠡ ᠨᠠᠰᠤᠨ᠎ᠤ ᠲᠤᠬᠠᠢ ᠬᠡᠳᠦᠨ ᠠᠰᠠᠭᠤᠳᠠᠯ》᠂ 《ᠱᠢᠷᠡᠭᠡᠲᠤ ᠭᠦᠤᠱ᠌ᠢ ᠴᠤᠷᠵᠢ᠎ᠶ᠋ᠢᠨ ᠨᠢᠭᠡ ᠨᠠᠰᠤᠨ᠎ᠤ ᠲᠤᠬᠠᠢ ᠨᠦᠬᠦᠪᠦᠷᠢ ᠲᠤᠭᠠᠴᠢᠯᠳᠠ》᠂ 《ᠮᠤᠩᠭᠤᠯ ᠲᠦᠪᠡᠳ ᠮᠠᠨᠵᠤ᠎ᠶ᠋ᠢᠨ ᠱᠠᠱᠢᠨ᠎ᠤ ᠬᠠᠷᠢᠴᠠᠭ᠎ᠠ᠎ᠶ᠋ᠢᠨ ᠲᠤᠬᠠᠢ ᠴᠢᠬᠤᠯᠠ ᠰᠤᠷᠪᠤᠯᠵᠢ ᠪᠢᠴᠢᠭ》᠂ 《ᠪᠠᠭᠠᠷᠢᠨ ᠠᠢᠮᠠᠭ᠎ᠤᠨ ᠡᠭᠦᠰᠦᠯ ᠰᠤᠷᠪᠤᠯᠵᠢ ᠵᠢᠴᠢ ᠪᠠᠭᠠᠷᠢᠨ ᠮᠤᠩᠭᠤᠯᠴᠤᠳ᠎ᠤᠨ ᠤᠪᠤᠭ》 ᠭᠡᠬᠦ ᠵᠡᠷᠭᠡ 60  ᠭᠠᠷᠤᠢ ᠡᠷᠳᠡᠮ ᠱᠢᠨᠵᠢᠯᠡᠭᠡᠨ᠎ᠦ ᠲᠤᠷᠪᠢᠯᠢᠭ ᠦᠭᠦᠯᠡᠯ ᠲᠤᠭᠤᠷᠪᠢᠨ ᠨᠡᠢᠲᠡᠯᠡᠭᠦᠯᠵᠡᠢ᠃

ᠲᠡᠭᠡᠷ᠎ᠡ ᠵᠠᠭᠤᠨ᠎ᠤ ᠨᠠᠶᠠᠭᠠᠳ ᠤᠨ ᠎ᠤ ᠰᠡᠭᠦᠯᠴᠢ ᠪᠡᠷ ᠪᠢ ᠬᠦᠬᠡᠬᠤᠳᠠ᠎ᠳᠤ ᠨᠡᠭᠦᠵᠦ᠍ ᠢᠷᠡᠭ᠌ᠰᠡᠨ ᠬᠤᠢᠨ᠎ᠠ᠂ ᠪᠠᠶᠠᠷ ᠲᠤᠷᠠᠰᠭᠠᠯ᠎ᠤᠨ ᠡᠳᠦᠷ ᠪᠤᠶᠤ ᠵᠢᠯ ᠴᠠᠭᠠᠨ ᠰᠠᠷ᠎ᠠ᠎ᠳᠠᠭᠠᠨ ᠴᠤᠢᠵᠢ ᠭᠤᠸᠠᠢ᠎ᠶ᠋ᠢᠨ ᠴᠢᠯᠦᠭᠡ ᠵᠠᠪ᠎ᠢ ᠨᠢ ᠦᠵᠡᠵᠦ᠍ ᠲᠡᠬᠦᠨ ᠲᠠᠢ ᠵᠤᠯᠭᠠᠬᠤ ᠪᠡᠷ ᠤᠴᠢᠳᠠᠭ᠂  ᠲᠡᠷᠡ ᠭᠤᠸᠠᠢ ᠮᠦᠨ ᠯᠠ ᠬᠠᠭᠤᠴᠢᠨ ᠵᠤᠷᠱᠢᠯ᠂ ᠤᠯᠠᠩᠬᠢ᠎ᠳᠠᠭᠠᠨ ᠠᠯᠪᠠᠨ ᠭᠡᠷ ᠲᠡᠬᠡᠨ ᠨᠤᠮ ᠪᠢᠴᠢᠭ ᠲᠠᠢ ᠪᠠᠨ ᠨᠤᠤᠷᠠᠯᠳᠤᠭᠠᠳ ᠯᠠ ᠰᠠᠭᠤᠵᠤ ᠪᠠᠢᠳᠠᠭ᠃ ᠬᠠᠶᠠ ᠬᠤᠶᠠᠭᠤᠯᠠ ᠪᠠᠰᠠ ᠨᠡᠢᠭᠡᠮ᠎ᠦᠨ ᠱᠢᠨᠵᠢᠯᠡᠬᠦ᠌ ᠤᠬᠠᠭᠠᠨ᠎ᠤ ᠬᠦᠷᠢᠶᠡᠯᠡᠩ᠎ᠲᠠᠢ ᠡᠰᠡᠷᠭᠦᠯᠡᠭ᠌ᠰᠡᠨ ᠪᠢᠴᠢᠬᠠᠨ ᠭᠤᠸᠠᠨᠵᠠᠨ᠎ᠳᠤ ᠤᠷᠤᠵᠤ᠂  ᠴᠠᠢ ᠤᠤᠭᠤᠨ ᠬᠡᠳᠦᠨ ᠬᠤᠨᠳᠠᠭ᠎ᠠ ᠱᠢᠮᠡᠵᠦ᠍ ᠵᠤᠭᠤᠭ ᠪᠠᠷᠢᠵᠤ ᠰᠠᠭᠤᠬᠤ᠎ᠳᠤ ᠲᠡᠷᠡ ᠮᠠᠨᠢ ᠭᠠᠳᠠᠷ ᠭᠦᠷᠦᠨ ᠨᠤᠭᠦᠳ ᠵᠢᠡᠷ ᠤᠴᠢᠭᠠᠳ ᠦᠵᠡᠵᠦ᠍ ᠰᠤᠨᠤᠰᠤᠭ᠍ᠰᠠᠨ ᠰᠤᠨᠢᠷᠬᠠᠯᠳᠠᠢ ᠶᠠᠪᠤᠳᠠᠯ ᠵᠢᠠᠨ ᠵᠤᠭᠤᠭ ᠪᠤᠯᠭᠠᠨ ᠶᠠᠷᠢᠳᠠᠭ᠃ ᠴᠤᠢᠵᠢ ᠭᠤᠸᠠᠢ ᠦᠪᠡᠷ᠎ᠦᠨ  ᠪᠦᠲᠦᠭᠡᠯ ᠡᠴᠡ  ᠪᠠᠨ ᠨᠠᠳᠠᠳᠤ ᠬᠡᠳᠦ ᠬᠡᠳᠦᠨ ᠨᠤᠮ ᠪᠡᠯᠡᠭ᠌ᠯᠡᠭ᠌ᠰᠡᠨ ᠶᠤᠮ᠂ ᠲᠡᠷᠡ ᠨᠢ ᠤᠳᠤ ᠴᠤ᠌ ᠮᠢᠨᠤ ᠪᠢᠴᠢᠭ᠎ᠦᠨ ᠬᠤᠷᠭᠤᠨ᠎ᠳᠤ ᠲᠠᠯᠪᠢᠭᠠᠰᠤᠳᠠᠢ᠃ ᠰᠡᠭᠦᠯ᠎ᠦᠨ ᠵᠢᠯ᠎ᠦᠳ᠎ᠲᠤ ᠪᠢ 《ᠴᠢᠩᠭᠢᠰ᠎ᠦᠨ ᠪᠢᠯᠢᠭ ᠰᠤᠷᠭᠠᠯ》᠂ 《ᠴᠢᠩᠭᠢᠰ ᠬᠠᠭᠠᠨ ᠬᠢᠭᠡᠳ ᠮᠤᠩᠭᠤᠯ ᠰᠤᠶᠤᠯ》᠂ 《ᠲᠡᠭ᠌ᠷᠢᠯᠢᠭ ᠤᠬ᠍ᠰᠠᠭᠠᠳᠠᠨ᠎ᠤ ᠬᠠᠭᠠᠨᠳᠤ ᠲᠦᠷᠦ᠍》 ᠭᠡᠬᠦ᠌ ᠬᠡᠳᠦᠨ ᠨᠤᠮ᠎ᠢ ᠤᠷᠴᠢᠭᠤᠯᠬᠤ ᠲᠤᠮᠳᠠ ᠪᠠᠨ ᠮᠡᠲᠡᠬᠦ᠌ ᠦᠭᠡᠢ ᠴᠢᠳᠠᠬᠤ ᠦᠭᠡᠢ ᠨᠡᠷ᠎ᠡ ᠲᠤᠮᠢᠶ᠎ᠠ ᠬᠠᠷᠭᠤᠪᠠᠯ ᠱᠢᠭᠤᠳ ᠯᠡ ᠴᠤᠢᠵᠢ ᠭᠤᠸᠠᠢ᠎ᠠᠴᠠ ᠠᠰᠠᠭᠤᠵᠤ ᠵᠢᠭᠠᠯᠭᠠᠨ᠎ᠠ᠃  ᠵᠠᠷᠢᠮ᠎ᠳᠠᠭᠠᠨ ᠤᠳᠠᠰᠤ ᠪᠠᠷ  ᠶᠠᠷᠢᠨ᠎ᠠ᠂  ᠵᠠᠷᠢᠮ᠎ᠳᠠᠭᠠᠨ ᠨᠤᠮ  ᠵᠢᠠᠨ ᠪᠠᠷᠢᠭᠠᠳ ᠠᠯᠪᠠᠨ ᠭᠡᠷ ᠲᠤᠨᠢ ᠲᠠᠯᠪᠢᠭᠠᠳ ᠬᠦᠷᠦᠨ᠎ᠡ᠃ ᠴᠤᠢᠵᠢ ᠭᠤᠸᠠᠢ ᠬᠡᠴᠢᠨᠠᠨ ᠶᠠᠭᠠᠷᠠᠯᠳᠠᠢ ᠪᠠᠢᠬ᠍ᠰᠠᠨ ᠴᠤ᠌ ᠭᠠᠷ ᠳᠡᠬᠢ ᠠᠵᠢᠯ ᠵᠢᠠᠨ ᠬᠠᠶᠠᠭᠠᠳ ᠡᠨᠡ ᠲᠡᠷᠡ ᠪᠢᠴᠢᠭ ᠤᠷᠪᠠᠭᠤᠯᠵᠤ ᠬᠠᠢᠵᠤ ᠦᠭ᠌ᠭᠦᠨ᠎ᠡ᠂ ᠲᠠᠢᠯᠪᠤᠷᠢᠯᠠᠵᠤ ᠦᠭ᠌ᠭᠦᠨ᠎ᠡ᠂ ᠲᠡᠭᠡᠭᠡᠳ ᠪᠠᠰᠠ ᠺᠠᠷᠲ ᠲᠡᠭᠡᠷ᠎ᠡ ᠨᠠᠷᠢᠨ ᠨᠢᠮᠪᠠᠢ  ᠪᠢᠴᠢᠭᠡᠳ ᠦᠭ᠌ᠳᠡᠭ᠃ 《ᠰᠤᠷᠭᠠᠬᠤᠢ ᠳ᠋ᠤ ᠬᠠᠯᠠᠱᠢᠷᠠᠬᠤ ᠦᠭᠡᠢ  ᠪᠠᠭ᠍ᠰᠢ ᠬᠦᠮᠦᠨ᠎ᠦ ᠵᠤᠷᠢᠬ ᠰᠠᠨᠠᠭ᠎ᠠ》 ᠭᠡᠵᠦ᠍ ᠡᠢᠮᠦ᠍ ᠯᠡ ᠪᠠᠢᠬ᠎ᠠ᠃ ᠴᠤᠢᠵᠢ ᠭᠤᠸᠠᠢ᠎ᠶ᠋ᠢᠨ ᠪᠢᠴᠢᠵᠤ ᠦᠭ᠌ᠭᠦᠭ᠌ᠰᠡᠨ ᠺᠠᠷᠲ ᠎ᠢ ᠪᠢ ᠮᠦᠨ ᠡᠷᠬᠢᠮᠨᠡᠨ ᠬᠠᠳᠠᠭᠠᠯᠠᠬ᠍ᠰᠠᠭᠠᠷ᠃

《ᠨᠤᠮ ᠎ᠤᠨ ᠤᠳᠭ᠎ᠠ ᠠᠨᠤ ᠲᠡᠭ᠌ᠷᠢ ᠮᠡᠳᠦ ᠠᠭᠤᠤ᠂  ᠲᠡᠯᠡᠬᠡᠢ ᠮᠡᠳᠦ ᠠᠭᠤᠳᠠᠮ᠂ ᠲᠠᠯᠠᠢ ᠮᠠᠳᠤ ᠭᠦᠨ᠃ ᠨᠤᠮ ᠤᠩᠱᠢᠬᠤ ᠠᠨᠤ ᠲᠡᠭ᠌ᠷᠢ ᠎ᠳᠦ ᠨᠢᠰᠴᠤ᠌᠂ ᠲᠡᠯᠡᠬᠡᠢ᠎ᠶ᠋ᠢ ᠲᠤᠭᠤᠷᠢᠬᠤ᠂  ᠲᠠᠯᠠᠢ᠎ᠳᠤ ᠬᠦᠪᠬᠦ᠌ ᠮᠡᠳᠤ》 ᠭᠡᠵᠦ᠍ ᠡᠷᠲᠡᠮᠲᠡᠨ ᠴ·ᠲᠠᠮᠳᠢᠨᠰᠦ᠋ᠷᠦᠩ ᠬᠡᠯᠡᠭ᠌ᠰᠡᠨᠴᠢᠯᠡᠨ᠂ ᠴᠤᠢᠵᠢ ᠭᠤᠸᠠᠢ ᠬᠡᠳᠦᠨ ᠠᠷᠪᠠᠨ ᠵᠢᠯ ᠨᠤᠮ᠎ᠤᠨ ᠲᠠᠯᠠᠢ᠎ᠳᠤ ᠱᠤᠩᠪᠠᠨ᠂ ᠡᠷᠳᠡᠮ᠎ᠤᠨ ᠠᠭᠤᠯᠠᠨ᠎ᠳᠤ ᠮᠠᠴᠤᠵᠤ᠂ ᠰᠤᠷᠤᠯᠭ᠎ᠠ ᠰᠤᠳᠤᠯᠭ᠎ᠠ᠎ᠳᠤ ᠱᠢᠭ᠌ᠳᠡᠷᠡᠵᠦ᠍᠂  ᠱᠢᠨᠳᠠᠷᠠᠰᠢ ᠦᠭᠡᠢ  ᠬᠠᠳᠠᠭᠤ  ᠵᠤᠷᠢᠭ᠂ ᠤᠢᠭ᠎ᠠ ᠦᠭᠡᠢ ᠬᠠᠳᠠᠨ ᠴᠢᠷᠮᠠᠢᠯᠭ᠎ᠠ ᠪᠡᠷ ᠵᠢᠠᠨ ᠤᠯᠤᠰ᠎ᠤᠨ ᠲᠤᠳᠤᠭᠠᠳᠤ ᠭᠠᠳᠠᠭᠠᠳᠤ᠎ᠳᠤ ᠠᠯᠳᠠᠷᠱᠢᠬ᠍ᠰᠠᠨ ᠮᠤᠩᠭᠤᠯ ᠲᠡᠦᠬᠡ᠎ᠶ᠋ᠢᠨ ᠰᠤᠷᠪᠤᠯᠵᠢ ᠪᠢᠴᠢᠭ ᠪᠠ ᠪᠤᠷᠬᠠᠨ ᠱᠠᠱᠢᠨ᠎ᠤ ᠰᠤᠳᠤᠯᠭᠠᠨ᠎ᠤ ᠡᠷᠳᠡᠮᠲᠡᠨ ᠪᠤᠯᠤᠬ᠍ᠰᠠᠨ ᠶᠤᠮ᠃ ᠲᠡᠷᠡ ᠪᠡᠷ ᠤᠯᠤᠰ᠎ᠤᠨ ᠲᠡᠰ᠎ᠦᠨ᠂  ᠮᠤᠵᠢ ᠶᠠᠮᠤᠨ᠎ᠤ ᠲᠡᠰ᠎ᠦᠨ ᠡᠷᠳᠡᠮ ᠱᠢᠨᠵᠢᠯᠡᠭᠡᠨ᠎ᠦ ᠰᠡᠳᠦᠪ᠎ᠢ ᠤᠯᠠᠨᠳᠠ ᠲᠠᠭᠠᠭᠠᠴᠢᠯᠠᠨ ᠪᠡᠶᠡᠯᠡᠭᠦᠯᠵᠦ᠍᠂ ᠭᠸᠷᠮᠠᠨ᠂ ᠢᠲ᠋ᠠᠯᠢ᠂  ᠤᠷᠤᠰ᠂  ᠮᠤᠩᠭᠤᠯ ᠤᠯᠤᠰ᠂ ᠶᠠᠫᠤᠨ ᠵᠡᠷᠭᠡ ᠤᠯᠤᠰ᠎ᠤᠳ ᠵᠢᠡᠷ ᠡᠷᠳᠡᠮ ᠱᠢᠨᠵᠢᠯᠡᠭᠡᠨ ᠎ᠦ ᠠᠢᠯᠴᠢᠯᠠᠯᠳᠠ ᠬᠢᠭ᠌ᠰᠡᠨ᠂  ᠬᠢᠴᠢᠶᠡᠯ ᠲᠠᠢᠯᠤᠨ ᠬᠢᠭ᠌ᠰᠡᠨ ᠪᠡ  ᠭᠸᠷᠮᠠᠨ  ᠤᠯᠤᠰ᠎ᠤᠨ DFG  ᠨᠡᠷᠡᠮᠵᠢᠳᠤ  ᠰᠤᠷᠤᠯᠭ᠎ᠠ᠎ᠶ᠋ᠢᠨ  ᠬᠦᠬᠢᠭᠦᠯᠤᠯ  ᠮᠦᠩᠭᠦ᠌ ᠎ᠶ᠋ᠢ ᠬᠤᠶᠠᠷ ᠤᠳᠠᠭ᠎ᠠ ᠲᠤᠰᠤᠭ᠍ᠰᠠᠨ ᠪᠠᠢᠨ᠎ᠠ᠃ ᠴᠤᠢᠵᠢ ᠭᠤᠸᠠᠢ ᠠᠮᠢᠳᠤ ᠰᠡᠷᠡᠭᠦᠨ ᠪᠠᠢᠬᠤ᠎ᠳ᠋ᠠᠭᠠᠠ  ᠦᠪᠦᠷ ᠮᠤᠩᠭᠤᠯ᠎ᠤᠨ ᠱᠢᠨᠵᠢᠯᠡᠬᠦ᠌ ᠤᠬᠠᠭᠠᠨ᠎ᠤ ᠬᠦᠷᠢᠶᠡᠯᠡᠩ ᠎ᠤᠨ ᠡᠷᠳᠡᠮ ᠱᠢᠨᠵᠢᠯᠡᠭᠡᠨ᠎ᠦ ᠺᠤᠮᠢᠰ᠎ᠤᠨ ᠳᠡᠳ᠋ ᠡᠷᠬᠢᠯᠡᠭ᠌ᠴᠢ᠂ ᠤᠯᠤᠰ᠎ᠤᠨ ᠰᠤᠷᠭᠠᠨ ᠬᠦᠮᠦᠵᠢᠯ᠎ᠦᠨ ᠺᠤᠮᠢᠰ᠎ᠤᠨ ᠵᠠᠭᠤᠨ ᠭᠤᠤᠯᠳᠠᠯᠭᠠᠳᠤ ᠰᠤᠳᠤᠯᠭᠠᠨ᠎ᠤ ᠰᠠᠭᠤᠷᠢᠨ ᠦᠪᠦᠷ ᠮᠤᠩᠭᠤᠯ᠎ᠤᠨ ᠶᠡᠬᠡ ᠰᠤᠷᠭᠠᠭᠤᠯᠢ᠎ᠶ᠋ᠢᠨ ᠮᠤᠩᠭᠤᠯ ᠰᠤᠳᠤᠯᠤᠯ ᠎ᠤᠨ ᠲᠦᠪ᠎ᠤᠨ ᠡᠷᠳᠡᠮ ᠱᠢᠨᠵᠢᠯᠡᠭᠡᠨ᠎ᠦ ᠺᠤᠮᠢᠰ᠎ᠤᠨ ᠭᠡᠱᠢᠭᠦᠨ᠂  ᠤᠯᠤᠰ᠎ᠤᠨ ᠰᠤᠷᠭᠠᠨ ᠬᠦᠮᠦᠵᠢᠯ᠎ᠦᠨ ᠺᠤᠮᠢᠰ᠎ᠤᠨ ᠦᠨᠳᠦᠰᠦᠲᠡᠨ᠎ᠦ ᠡᠷᠲᠡᠨ᠎ᠦ ᠰᠤᠷᠪᠤᠯᠵᠢ ᠪᠢᠴᠢᠭ᠎ᠦᠨ ᠰᠤᠳᠤᠯᠭᠠᠨ᠎ᠤ ᠲᠦᠪ᠎ᠤᠨ ᠡᠷᠳᠡᠮ ᠱᠢᠨᠵᠢᠯᠡᠭᠡᠨ᠎ᠦ ᠺᠤᠮᠢᠰ᠎ᠤᠨ ᠭᠡᠱᠢᠭᠦᠨ᠂  ᠲᠤᠮᠳᠠᠳᠤ ᠤᠯᠤᠰ᠎ᠤᠨ ᠮᠤᠩᠭᠤᠯ ᠲᠡᠦᠬᠡ᠎ᠶ᠋ᠢᠨ ᠰᠤᠳᠤᠯᠭᠠᠨ᠎ᠤ ᠨᠡᠢᠭᠡᠮᠯᠢᠭ᠎ᠦᠨ ᠳᠡᠳ᠋ ᠲᠠᠷᠤᠭ᠎ᠠ᠂  ᠤᠯᠠᠨ ᠤᠯᠤᠰ᠎ᠤᠨ  ᠠᠯᠳᠠᠢ᠎ᠶ᠋ᠢᠨ ᠰᠤᠳᠤᠯᠭᠠᠨ᠎ᠤ ᠨᠡᠢᠭᠡᠮᠯᠢᠭ᠎ᠦᠨ ᠭᠡᠱᠢᠬᠦᠨ ᠪᠠ ᠤᠯᠠᠨ ᠤᠯᠤᠰ᠎ᠤᠨ ᠮᠤᠩᠭᠤᠯ ᠰᠤᠳᠤᠯᠤᠯ᠎ᠤᠨ ᠡᠷᠳᠡᠮᠳᠡᠳ᠎ᠦᠨ ᠬᠤᠯᠪᠤᠭᠠᠳᠤ ᠬᠤᠷᠠᠯ᠎ᠤᠨ ᠭᠡᠱᠢᠭᠦᠨ ᠵᠡᠷᠭᠡ  ᠨᠡᠢᠭᠡᠮ᠎ᠦᠨ ᠲᠤᠱᠢᠶᠠᠯ᠎ᠳᠤ ᠭᠢᠯᠠᠷᠠᠭᠤᠯᠵᠤ ᠶᠠᠪᠤᠯ᠎ᠠ᠃

ᠪᠠᠭᠠᠷᠢᠨ᠎ᠤ ᠰᠤᠳᠤᠨ ᠬᠦᠪᠡᠭᠦᠨ᠂  ᠮᠤᠩᠭᠤᠯ ᠦᠨᠲᠦᠰᠦᠲᠡᠨ᠎ᠦ ᠠᠯᠲᠠᠷᠳᠤ ᠡᠷᠲᠡᠮᠲᠡᠨ ᠴᠤᠢᠵᠢ ᠭᠤᠸᠠᠢ 2022 ᠤᠨ᠎ᠤ 8 ᠰᠠᠷ᠎ᠠ᠎ᠶ᠋ᠢᠨ 17 ᠎ᠤ᠋ ᠡᠳᠦᠷ ᠬᠦᠬᠡᠬᠤᠳᠠᠨ᠎ᠠ  ᠶᠢᠷᠲᠢᠨᠴᠤ᠎ᠶ᠋ᠢᠨ ᠮᠦᠩᠬᠡ ᠪᠤᠰᠤ᠎ᠶ᠋ᠢ ᠦᠵᠡᠬᠦᠯᠪᠡ᠂ ᠨᠠᠰᠤᠨ ᠰᠡᠭᠦᠲᠡᠷ 81᠃  ᠤᠯᠠᠨ  ᠵᠢᠯ ᠎ᠦᠨ ᠲᠤᠷᠰᠢ᠂ ᠪᠢ ᠲᠡᠬᠦᠨ᠎ᠦ ᠦᠭᠡ ᠶᠠᠷᠢᠶ᠎ᠠ᠂ ᠦᠢᠯᠡ ᠠᠵᠢᠯᠯᠠᠭ᠎ᠠ᠂ ᠵᠤᠬᠢᠶᠠᠯ ᠪᠦᠲᠦᠭᠡᠯ᠎ᠡᠴᠡ ᠨᠢ ᠤᠯᠠᠨ ᠶᠠᠭᠤᠮ᠎ᠠ ᠰᠤᠷᠴᠤ᠌ ᠮᠡᠳᠡᠭ᠌ᠰᠡᠨ ᠰᠠᠨ᠃ ᠱᠢᠳᠤᠨ᠎ᠤ ᠴᠠᠭᠠᠨ᠎ᠠᠴᠠ ᠦᠰᠦᠨ᠎ᠦ ᠪᠤᠭᠤᠷᠤᠯ ᠪᠤᠯᠳᠠᠯ᠎ᠠ ᠡᠨᠡ ᠬᠦ᠌ ᠡᠷᠳᠡᠮ ᠨᠤᠮ ᠎ᠤᠨ ᠶᠡᠬᠡ ᠬᠦᠮᠦᠨ ᠯᠤᠭᠡ ᠲᠠᠨᠢᠯᠴᠠᠵᠤ ᠮᠡᠳᠡᠯᠴᠡᠵᠦ᠍ ᠶᠠᠪᠤᠬ᠍ᠰᠠᠨ ᠨᠢ ᠮᠢᠨᠤ ᠡᠨᠡ ᠨᠠᠰᠤᠨ᠎ᠤ ᠤᠯᠵᠠᠭᠤᠷᠬᠠᠯ ᠭᠡᠵᠦ᠍ ᠪᠢ ᠪᠤᠳᠤᠳᠠᠭ᠃ ᠴᠤᠢᠵᠢ ᠭᠤᠸᠠᠢ ᠨᠠᠰᠤ ᠪᠠᠷᠠᠬ᠍ᠰᠠᠨ ᠭᠠᠱᠢᠭᠤᠳᠠᠯᠳᠤ ᠴᠢᠮᠡᠭᠡ᠎ᠶ᠋ᠢ ᠤᠯᠵᠤ ᠰᠤᠨᠤᠰᠤᠭᠠᠳ ᠪᠢ ᠮᠠᠰᠢ ᠡᠮᠭᠡᠨᠢᠨ ᠵᠤᠪᠠᠬ᠍ᠰᠠᠨ᠃ ᠭᠡᠪᠡᠴᠦ᠍ ᠴᠤᠪᠤᠵᠤ ᠲᠦᠷᠦᠨ ᠰᠤᠪᠤᠷᠠᠵᠤ ᠮᠤᠷᠢᠯᠠᠳᠠᠭ ᠶᠢᠷᠲᠢᠨᠴᠦ᠍᠎ᠶ᠋ᠢᠨ  ᠬᠠᠳᠠᠭᠤ ᠵᠢᠮ᠎ᠡ ᠶᠤᠮ ᠬᠤᠢᠨ᠎ᠠ ᠶᠠᠭᠠᠬᠢᠶ᠎ᠠ ᠭᠡᠬᠦ᠌ ᠪᠤᠢ！ ᠲᠡᠷᠡ ᠦᠶᠡᠰ ᠲᠸ᠋ ᠶᠠᠭ ᠨᠦᠭᠦᠭᠡ ᠬᠢᠵᠢᠭ᠎ᠦᠨ ᠬᠦᠯ ᠬᠤᠷᠢᠭᠠᠲᠠᠢ  ᠠᠬ᠍ᠰᠠᠨ  ᠴᠠᠭ᠂ ᠪᠢ ᠤᠴᠢᠵᠤ ᠬᠠᠮᠤᠭ᠎ᠤᠨ ᠰᠡᠭᠦᠯ᠎ᠦᠨ ᠰᠠᠯᠬᠤ ᠶᠤᠰᠤ᠎ᠶ᠋ᠢ ᠴᠤ᠌ ᠭᠦᠢᠴᠡᠳᠭᠡᠵᠤ ᠴᠢᠳᠠᠭ᠎ᠠ ᠦᠭᠡᠢ᠂ ᠨᠠᠰᠤᠨ᠎ᠤ ᠬᠠᠷᠠᠮᠰᠠᠯ ᠪᠤᠯᠪᠠ᠃ ᠦᠨᠦᠳᠦᠷ ᠪᠢ ᠡᠨᠡ ᠬᠦ᠌ ᠪᠡᠰᠡᠷᠡᠭ ᠵᠤᠬᠢᠶᠠᠯ ᠵᠢᠡᠷ ᠵᠢᠠᠨ ᠲᠠᠮᠵᠢᠭᠤᠯᠵᠤ ᠴᠤᠢᠵᠢ ᠭᠤᠸᠠᠢ ᠪᠠᠨ ᠬᠦᠨᠳᠦᠳᠭᠡᠨ ᠪᠢᠱᠢᠷᠡᠬᠦ᠂ ᠭᠠᠱᠢᠭᠤᠳᠠᠨ ᠲᠤᠷᠠᠳᠭᠠᠬᠤ ᠰᠡᠳᠭᠢᠯᠭᠡ ᠪᠠᠨ ᠢᠯᠡᠳᠭᠡᠵᠦ᠍ ᠪᠠᠢᠨᠠᠮ᠃