《ᠪᠤᠷᠤ ᠠᠪᠳᠠᠷ᠎ᠠ᠎ᠳᠤ ᠨᠤᠮ ᠪᠤᠢ᠂ ᠪᠤᠭᠤᠷᠤᠯ ᠡᠮᠸ᠎ᠳᠤ ᠡᠷᠳᠡᠮ ᠪᠤᠢ》 ᠭᠡᠵᠦ ᠶᠠᠷᠢᠳᠠᠭ᠃ ᠲᠡᠭᠡᠪᠡᠯ ᠪᠤᠷᠤ ᠠᠪᠳᠠᠷ᠎ᠠ᠎ᠳᠡᠬᠢ ᠨᠤᠮ ᠲᠤᠲᠤᠷ᠎ᠠ ᠶᠠᠭᠤ ᠪᠠᠢᠳᠠᠭ ᠪᠤᠢ ᠭᠡᠵᠦ ᠠᠰᠠᠭᠤᠪᠠᠯ ᠬᠡᠨ ᠪᠦᠬᠦᠨ ᠦᠰᠦᠭ ᠵᠢᠷᠤᠭ ᠪᠤᠢ ᠭᠡᠵᠦ ᠬᠠᠷᠢᠭᠤᠯᠬᠤ ᠪᠠᠢᠬ᠎ᠠ᠃ ᠦᠨᠡᠨ᠎ᠳ᠋ᠡᠬᠡᠨ ᠪᠠᠰᠠ ᠦᠰᠦᠭ ᠵᠢᠷᠤᠭ ᠬᠤᠶᠠᠷ ᠯᠡ ᠬᠠᠷᠠᠭᠳᠠᠨ᠎ᠠ᠂ ᠭᠡᠪᠡᠴᠦ ᠨᠠᠷᠢᠨ ᠲᠤᠩᠭᠠᠪᠠᠯ ᠡᠭᠦᠨ ᠡᠴᠡ ᠴᠸ᠋ ᠶᠡᠬᠡ ᠵᠦᠢᠯ ᠪᠤᠢ᠃

ᠨᠤᠮ ᠲᠤᠲᠤᠷ᠎ᠠ ᠤᠳᠤᠨ ᠤᠷᠤᠨ ᠪᠤᠢ᠃ ᠪᠢᠳᠠ ᠨᠠᠷᠠ ᠰᠠᠷᠠ᠂ ᠳᠤᠬᠢᠭᠤᠷ ᠳᠤᠯᠤᠭᠠᠨ ᠤᠳᠤ ᠵᠢ ᠡᠭᠡᠯ ᠨᠢᠳᠤ ᠪᠠᠷ᠎ᠢᠶᠡᠨ ᠤᠯᠵᠦ ᠦᠵᠡᠳᠡᠭ᠃ ᠪᠤᠰᠤᠳ ᠤᠳᠤᠳ᠎ᠢ ᠬᠠᠷᠠᠬᠤ ᠭᠡᠬᠦᠯᠡᠷ ᠳᠠᠯᠠᠪᠴᠢ ᠤᠷᠭᠤᠭᠠᠳ ᠤᠳᠤᠨ ᠤᠷᠤᠨ᠎ᠢᠶᠡᠷ ᠠᠶᠠᠯᠠᠵᠦ ᠴᠢᠳᠠᠬᠤ ᠦᠬᠡᠢ᠂ ᠶᠠᠭᠠᠭᠢᠳᠠᠭ ᠪᠢᠯᠡ？ ᠡᠨᠡ ᠬᠠᠷᠢᠨ ᠠᠮᠠᠷᠬᠠᠨ᠂ ᠠᠯᠠᠭᠠᠨ ᠴᠢᠨᠡᠭᠡᠨ ᠨᠤᠮ ᠲᠤᠲᠤᠷ᠎ᠠ ᠠᠭᠠᠷ ᠤᠭᠲᠠᠷᠭᠤᠢ ᠪᠦᠷ ᠪᠠᠭᠳᠠᠵᠦ ᠡᠷᠬᠢᠯᠳᠦᠳᠡᠭ ᠰᠢᠦ᠃ ᠤᠳᠤᠨ ᠤᠷᠤᠨ᠎ᠤ ᠰᠤᠳᠤᠯᠤᠭᠴᠢᠳ᠎ᠤᠨ ᠰᠤᠳᠤᠯᠵᠤ ᠪᠢᠴᠢᠭᠰᠡᠨ ᠨᠤᠮ᠎ᠢᠶᠡᠷ ᠪᠢᠳᠠ ᠠᠶᠠᠯᠠᠬᠤ ᠶᠤᠮ ᠪᠤᠯ ᠨᠠᠷᠠ ᠴᠤᠬᠤᠮ ᠬᠡᠳᠦᠢ ᠬᠠᠯᠠᠭᠤᠨ ᠪᠤᠢ᠂ ᠤᠳᠤ ᠶᠠᠭᠠᠬᠢᠭᠠᠳ ᠬᠢᠯᠠᠯᠵᠠᠳᠠᠭ ᠪᠤᠢ᠂ ᠡᠭᠦᠯᠡ ᠶᠠᠭᠠᠬᠢᠵᠤ ᠨᠡᠭᠦᠳᠡᠯᠯᠡᠳᠡᠭ ᠪᠤᠢ ᠬᠡᠬᠦ ᠮᠡᠲᠤ ᠵᠢᠨ ᠠᠭᠤᠯᠭ᠎ᠠ ᠵᠢ ᠰᠠᠨᠰᠠᠷ ᠲᠸ᠋ ᠬᠦᠷᠬᠦ ᠦᠭᠡᠢ ᠪᠠᠷ ᠮᠡᠳᠡᠵᠦ ᠪᠤᠯᠤᠨ᠎ᠠ᠃

ᠨᠤᠮ ᠲᠤᠲᠤᠷ᠎ᠠ ᠠᠷᠢᠶᠠᠳᠠᠨ ᠠᠮᠢᠲᠠᠨ ᠰᠦᠷᠦᠭᠯᠡᠨ ᠠᠮᠢᠳᠤᠷᠠᠵᠦ ᠪᠤᠢ᠃ ᠪᠢ ᠶᠠᠭᠠᠬᠢᠭᠠᠳ ᠤᠯᠵᠦ ᠦᠵᠡᠬᠦ ᠦᠬᠡᠢ ᠪᠠᠢᠨ᠎ᠠ ᠪᠤᠢ ᠭᠡᠵᠦ ᠭᠠᠢᠬᠠᠵᠦ ᠪᠠᠢᠭ᠎ᠠ ᠪᠢᠵᠡ？ ᠠᠮᠢᠲᠠᠨ᠎ᠤ ᠲᠤᠬᠠᠢ ᠨᠤᠮ ᠦᠵᠡᠭᠰᠡᠨ ᠬᠡᠤᠬᠡᠳ ᠦᠨᠳᠦᠷ ᠳᠠᠭᠤᠨ᠎ᠢᠶᠡᠷ 《ᠲᠡᠢᠮᠦ ᠰᠢᠦ᠂ ᠪᠢ ᠡᠳᠦᠷ ᠪᠦᠷᠢ ᠦᠵᠡᠳᠡᠭ》 ᠭᠡᠵᠦ ᠬᠠᠷᠢᠭᠤᠯᠬᠤ ᠨᠢ ᠯᠠᠪ᠃ ᠤᠴᠢᠷ ᠨᠢ ᠠᠮᠢᠲᠠᠨ᠎ᠤ ᠲᠤᠬᠠᠢ ᠨᠤᠮ ᠲᠤᠲᠤᠷ᠎ᠠ ᠳᠠᠯᠠᠢ ᠳᠠᠩᠬᠢᠰ᠎ᠤᠨ ᠠᠮᠢᠲᠠᠨ᠂ ᠦᠨᠳᠦᠷ ᠠᠭᠤᠯᠠ ᠵᠢᠨ ᠠᠷᠢᠶᠠᠳᠠᠨ᠂ ᠭᠡᠷ᠎ᠤᠨ ᠲᠡᠵᠢᠭᠡᠪᠦᠷᠢ᠂ ᠳᠡᠬᠦᠯᠢᠨ ᠨᠢᠰᠬᠦ ᠰᠢᠪᠠᠭᠤ᠂ ᠮᠦᠬᠦᠭᠰᠡᠨ ᠬᠦᠮᠪᠢᠷ᠎ᠠ ᠵᠡᠷᠭᠡ ᠵᠢ ᠵᠢᠷᠤᠭ ᠦᠰᠦᠭ ᠲᠠᠢ ᠰᠠᠢᠬᠠᠨ ᠲᠠᠨᠢᠯᠴᠠᠭᠤᠯᠵᠦ ᠥᠭᠴᠡᠢ᠃ ᠬᠠᠷᠠᠭᠠᠴᠢ᠂ ᠲᠡᠡᠳᠡ ᠶᠠᠪᠠᠭᠠᠨ ᠭᠠᠯᠠᠭᠤ ᠲᠠᠯᠪᠠᠯᠵᠠᠨ ᠶᠠᠪᠤᠵᠦ ᠪᠠᠢᠨ᠎ᠠ᠂ ᠠᠹᠷᠢᠺᠠ ᠲᠢᠪ᠎ᠤᠨ ᠵᠠᠭᠠᠨ ᠲᠤᠭᠤᠯ᠎ᠢᠶᠡᠨ ᠳᠠᠭᠠᠭᠤᠯᠤᠨ ᠪᠡᠯᠴᠢᠵᠦ ᠪᠠᠢᠨ᠎ᠠ᠂ ᠮᠦᠬᠦᠭᠰᠡᠨ ᠬᠦᠮᠪᠢᠷ᠎ᠠ ᠨᠢᠰᠦᠭᠡᠳ ᠢᠷᠡᠯ᠎ᠠ᠂ ᠬᠠᠯᠢᠮᠤ ᠠᠩ᠎ᠳ᠋ᠠᠭᠠᠨ ᠭᠠᠷᠤᠯ᠎ᠠ ᠁

ᠨᠤᠮ ᠲᠤᠲᠤᠷ᠎ᠠ ᠵᠠᠮ ᠪᠤᠢ᠃ ᠭᠡᠷ ᠳᠡᠬᠡᠨ ᠬᠠᠷᠢᠬᠤ ᠵᠠᠮ᠂ ᠰᠠᠨᠰᠠᠷ᠎ᠢᠶᠡᠷ ᠨᠢᠰᠬᠦ ᠵᠠᠮ᠂ ᠢᠷᠡᠭᠡᠳᠦᠢ ᠪᠠᠨ ᠭᠡᠷᠡᠯᠲᠦᠬᠦᠯᠬᠦ ᠵᠠᠮ᠎ᠢ ᠨᠤᠮ ᠡᠴᠡ ᠤᠯᠳᠠᠭ ᠪᠢᠯᠡ᠃ ᠲᠡᠷᠡ ᠵᠠᠮ᠎ᠢ ᠯᠡ ᠤᠯᠬᠤ ᠭᠡᠵᠦ ᠪᠢᠳᠠ ᠠ ᠦᠰᠦᠭ ᠠᠷᠠᠪ ᠲᠤᠭ᠎ᠠ ᠵᠢ ᠰᠤᠷᠳᠠᠭ ᠰᠢᠦ᠃ ᠬᠠᠷᠢᠨ ᠬᠡᠳᠦᠢ ᠶᠡᠬᠡ ᠨᠤᠮ ᠦᠵᠡᠭᠰᠡᠨ᠎ᠢᠶᠡᠷ ᠴᠢᠨᠤ ᠢᠷᠡᠭᠡᠳᠦᠢ ᠵᠢᠨ ᠵᠠᠮ ᠲᠡᠳᠦᠢ ᠦᠷᠭᠡᠨ ᠮᠦᠷᠳᠡᠭᠡᠨ ᠳᠠᠷᠳᠠᠩ ᠪᠤᠯᠵᠤ ᠪᠤᠯᠤᠨ᠎ᠠ᠃ ᠨᠤᠮ ᠭᠡᠳᠡᠭ ᠵᠦᠪᠬᠡᠨ ᠬᠠᠭᠤᠳᠠᠰᠤ ᠬᠠᠭᠤᠳᠠᠰᠤ ᠦᠰᠦᠭᠳᠦ ᠴᠠᠭᠠᠰᠤ ᠪᠢᠰᠢ᠂ ᠲᠡᠷᠡ ᠬᠦ᠌ ᠨᠤᠮ᠎ᠤᠨ ᠬᠠᠭᠤᠳᠠᠰᠤ ᠪᠦᠷᠢ ᠨᠢ ᠬᠤᠵᠢᠮ᠎ᠤᠨ ᠠᠮᠢᠳᠤᠷᠠᠯ᠎ᠳ᠋ᠤ ᠲᠤᠯᠭᠠᠷᠠᠵᠤ ᠮᠡᠳᠡᠬᠦ ᠠᠰᠠᠭᠤᠳᠠᠯ᠎ᠢ ᠰᠢᠢᠳᠴᠦ ᠥᠭᠬᠦ ᠡᠷᠳᠡᠨᠢ᠎ᠶᠢᠨ ᠵᠡᠪᠰᠡᠭ ᠪᠤᠯᠬᠤ ᠤᠴᠢᠷᠳᠠᠢ᠃

ᠨᠤᠮ ᠲᠤᠲᠤᠷ᠎ᠠ ᠰᠢᠳᠢᠳᠦ ᠲᠦᠯᠬᠢᠭᠦᠷ ᠪᠤᠢ᠃ ᠲᠡᠷᠡ ᠲᠦᠯᠬᠢᠬᠦᠷ ᠴᠢᠨᠤ ᠨᠢᠳᠦᠨ᠎ᠳᠤ ᠦᠵᠡᠭᠳᠡᠵᠦ ᠭᠠᠷ ᠲᠸ᠋ ᠪᠠᠷᠢᠭᠳᠠᠬᠤ ᠲᠦᠯᠬᠢᠬᠦᠷ ᠲᠠᠢ ᠠᠳᠠᠯᠢ ᠦᠬᠡᠢ᠃ ᠦᠪᠡᠷ᠎ᠤᠨ ᠲᠤᠲᠤᠭᠠᠳᠤ ᠰᠡᠳᠬᠢᠯ᠎ᠢᠶᠡᠨ ᠨᠡᠭᠡᠭᠡᠬᠦ᠂ ᠠᠪᠢᠶᠠᠰ ᠪᠢᠯᠢᠭ᠎ᠢᠶᠡᠨ ᠬᠦᠭᠵᠢᠬᠦᠯᠬᠦ ᠰᠢᠳᠢᠳᠤ ᠲᠦᠯᠬᠢᠬᠦᠷ ᠨᠤᠮ᠎ᠤᠨ ᠬᠠᠭᠤᠳᠠᠰᠤᠨ ᠳ᠋ᠤ ᠨᠢᠭᠤᠭᠳᠠᠵᠦ ᠪᠤᠢ᠃ ᠲᠡᠷᠡ ᠶᠠᠭ ᠯᠡ ᠲᠦᠭᠡᠷᠢᠯ ᠤᠷᠳᠤᠨ ᠰᠢᠭ᠋ ᠂ ᠡᠷᠢᠬᠦ ᠲᠤᠰᠤᠮ ᠪᠠᠬ᠎ᠠ ᠵᠢ ᠴᠢᠨᠢ ᠲᠠᠲᠠᠵᠦ᠂ ᠡᠷᠢᠬᠦ ᠲᠤᠰᠤᠮ ᠬᠦᠨᠵᠡᠭᠡᠢᠷᠡᠳᠡᠭ ᠪᠢᠯᠡ᠃ ᠲᠡᠢᠮᠦ ᠡᠴᠡ ᠨᠤᠮ ᠶᠡᠬᠡ ᠤᠩᠰᠢᠭᠰᠠᠨ ᠬᠦᠮᠦᠨ ᠶᠢᠷᠲᠢᠨᠴᠦ᠎ᠶᠢᠨ ᠲᠠᠢᠯᠤᠭᠳᠠᠭ᠎ᠠ ᠦᠭᠡᠢ ᠤᠨᠢᠰᠤᠭ᠎ᠠ ᠵᠢ ᠲᠠᠢᠯᠬᠤ ᠲᠦᠯᠬᠢᠬᠦᠷ᠎ᠢ ᠠᠳᠬᠤᠭᠰᠠᠨ ᠲᠠᠢ ᠠᠳᠠᠯᠢ ᠶᠤᠮ᠃ ᠲᠡᠷᠡ ᠲᠦᠯᠬᠢᠬᠦᠷ ᠴᠢᠨᠤ ᠭᠠᠷ ᠲᠸ᠋ ᠪᠤᠢ᠂ ᠬᠡᠷᠬᠢᠨ ᠬᠡᠷᠡᠭᠯᠡᠬᠦ ᠭᠡᠳᠡᠭ ᠨᠢ ᠴᠢᠮ᠎ᠠ ᠡᠴᠡ ᠰᠢᠯᠲᠠᠭᠠᠯᠠᠭᠳᠠᠨ᠎ᠠ ᠰᠢᠦ᠃

ᠠᠩᠬᠠᠳᠠᠭ᠍ᠴᠢ 《ᠪᠥᠬᠥ ᠠᠷᠠᠳ᠎ᠤᠨ ᠤᠩᠰᠢᠯᠭ᠎ᠠ ᠵᠢᠨ ᠠᠵᠢᠯᠯᠠᠭ᠎ᠠ ᠵᠢᠨ ᠭᠠᠷᠠᠭ》 ᠬᠦᠷᠴᠦ ᠢᠷᠡᠬᠦ ᠲᠠᠰᠢᠷᠠᠮ᠎ᠢᠶᠠᠷ᠂ ᠥᠪᠥᠷ ᠮᠣᠩᠭᠣᠯ 《ᠪᠥᠬᠥ ᠠᠷᠠᠳ᠎ᠤᠨ ᠤᠩᠰᠢᠯᠭ᠎ᠠ᠎ᠶᠢ ᠬᠠᠮᠲᠤ᠎ᠪᠠᠷ ᠠᠬᠢᠭᠤᠯᠵᠤ ᠨᠤᠮ᠎ᠤᠨ ᠬᠡᠰᠢᠭᠳᠤ ᠨᠡᠢᠭᠡᠮ᠎ᠢ ᠬᠠᠮᠲᠤ᠎ᠪᠠᠷ ᠪᠦᠲᠦᠭᠡᠨ ᠪᠠᠶ᠋ᠢᠭᠤᠯᠤᠶ᠎ᠠ》 ᠬᠡᠬᠦ ᠭᠣᠣᠯ ᠰᠡᠳᠦᠪ ᠲᠤᠬᠳᠠᠭᠠᠵᠤ᠂ 2026 ᠣᠨ᠎ᠤ ᠪᠥᠬᠥ ᠠᠷᠠᠳ᠎ᠤᠨ ᠤᠩᠰᠢᠯᠭ᠎ᠠ ᠵᠢᠨ ᠠᠵᠢᠯᠯᠠᠭ᠎ᠠ ᠵᠢᠨ ᠭᠠᠷᠠᠭ᠎ᠢ᠎ᠡᠬᠢᠯᠡᠬᠦᠯᠪᠡ᠃ ᠬᠡᠤᠬᠡᠳ ᠪᠠᠭᠠᠴᠤᠳ ᠪᠢᠳᠠ ᠴᠸ᠋ ᠨᠤᠮ᠎ᠤᠨ ᠬᠡᠰᠢᠭᠲᠤ ᠨᠡᠢᠬᠡᠮ᠎ᠢ ᠬᠠᠮᠲᠤ ᠪᠠᠷ ᠪᠦᠲᠦᠭᠡᠨ ᠪᠠᠢᠭᠤᠯᠬᠤ ᠨᠢᠭᠡᠨ ᠬᠡᠰᠢᠬᠦᠨ ᠪᠤᠯᠤᠭᠰᠠᠨ᠎ᠤ ᠬᠤᠪᠢ᠎ᠳᠤ ᠨᠤᠮ ᠰᠠᠢᠨ ᠤᠩᠰᠢᠵᠠᠭᠠᠶ᠎ᠠ᠃ ᠨᠤᠮ ᠲᠤᠲᠤᠷ᠎ᠠ ᠶᠠᠭᠤ ᠪᠠᠢᠳᠠᠭ᠎ᠢ ᠮᠡᠳᠡᠶ᠎ᠡ᠂ ᠰᠤᠳᠤᠯᠤᠶ᠎ᠠ᠂ ᠳᠡᠯᠭᠡᠷᠡᠬᠦᠯᠦᠶ᠎ᠡ！

ᠨᠤᠮ ᠲᠤᠳᠤᠷ᠎ᠠ ᠁ ᠪᠤᠢ᠃