— ᠮᠣᠩᠭᠤᠯ ᠰᠣᠶᠣᠯᠤᠨ ᠮᠣᠨᠲᠠᠭ ᠭᠠᠪᠢᠶᠠᠲᠠᠨ ᠪᠠᠯᠵᠢᠨᠢᠮᠠ ᠪᠠᠭ᠍ᠰᠢᠲᠠᠨᠢ ᠲᠣᠷᠠᠳᠭᠠᠬᠤᠨᠢ
ᠲᠤᠪᠴᠢ ᠨᠠᠮᠳᠠᠷ᠄
ᠪᠠᠯᠵᠢᠨᠢᠮᠠ （1938 — 2020 ᠤᠨ）᠂ ᠮᠤᠩᠭᠤᠯ ᠦᠨᠳᠦᠰᠦᠳᠡᠨ᠂ ᠬᠢᠩᠭᠠᠨ ᠠᠢᠮᠠᠭᠤᠨ ᠬᠤᠷᠴᠢᠨ ᠪᠠᠷᠠᠭᠤᠨ ᠭᠠᠷᠤᠨ ᠳᠤᠮᠳᠠᠳᠤ ᠬᠤᠱᠢᠭᠤᠨᠳᠤ ᠳᠦᠷᠦᠵᠠᠢ᠃ 1963 ᠣᠨᠳᠤ ᠥᠪᠥᠷ ᠮᠣᠩᠭᠤᠯᠤᠨ ᠶᠡᠭᠡ ᠰᠤᠷᠭᠠᠭᠤᠯᠢᠠᠴᠠ ᠲᠡᠭᠦᠰᠪᠠ᠃ ᠰᠤᠳᠤᠯᠭᠠᠳᠠᠨ᠂ ᠴᠢᠩᠬᠢᠰ ᠬᠠᠭᠠᠨᠤ ᠰᠤᠷᠪᠤᠯᠵᠢ ᠪᠢᠴᠢᠭᠤᠨ ᠲᠤᠰᠭᠠᠢ ᠮᠡᠷᠬᠡᠵᠢᠯᠳᠡᠨ᠃ ᠲᠡᠷᠡᠪᠠᠷ᠂ ᠥᠪᠥᠷ ᠮᠣᠩᠭᠤᠯᠤᠨ ᠡᠳᠦᠷᠤᠨ ᠰᠣᠨᠢᠨᠤ ᠬᠤᠷᠢᠶᠠᠶ᠋ᠢᠨ ᠳᠡᠭᠡᠳᠦ ᠵᠡᠷᠭᠡᠶ᠋ᠢᠨ ᠰᠤᠷᠪᠤᠯᠵᠢᠯᠠᠭ᠍ᠴᠢ᠂ 《ᠴᠢᠩᠭᠢᠰ ᠬᠠᠭᠠᠨᠤ ᠰᠤᠷᠪᠤᠯᠵᠢ ᠪᠢᠴᠢᠭᠤᠨ ᠮᠦᠽᠧᠢ》 ᠶ᠋ᠢᠨ ᠳᠠᠷᠤᠭᠠ᠂ ᠥᠪᠥᠷ ᠮᠣᠩᠭᠤᠯᠤᠨ ᠶᠡᠭᠡ ᠰᠤᠷᠭᠠᠭᠤᠯᠢᠶ᠋ᠢᠨ ᠲᠤᠱᠢᠶᠠᠯ ᠬᠠᠪᠰᠤᠷᠭᠠᠭ᠍ᠰᠠᠨ ᠫᠷᠤᠹᠧᠰᠰᠤᠷ ᠵᠡᠷᠬᠡ ᠲᠤᠱᠢᠶᠠᠯᠢ ᠡᠬᠦᠷᠬᠡᠯᠡᠵᠦ᠍ ᠦᠡᠭ᠌ᠬᠡᠷᠡᠪᠡ᠃
《ᠮᠢᠩᠭᠠᠨ ᠵᠢᠯᠤᠨ ᠲᠤᠨᠵᠢ ᠬᠦᠮᠦᠨ — ᠲᠡᠯᠡᠬᠡᠢᠶ᠋ᠢᠨ ᠲᠤᠮᠤᠴᠤᠤᠯᠤᠨ ᠬᠠᠷᠠᠭᠠᠨᠳᠠᠬᠢ ᠴᠢᠩᠭᠢᠰ ᠬᠠᠭᠠᠨ》᠂ 《ᠭᠠᠲᠠᠭᠠᠳᠤᠶ᠋ᠢᠨ ᠬᠦᠮᠦᠰᠤᠨ ᠬᠠᠷᠠᠭᠠᠨᠳᠠᠬᠢ ᠴᠢᠩᠭᠢᠰ ᠬᠠᠭᠠᠨ》᠂ 《ᠴᠢᠩᠭᠢᠰ ᠬᠠᠭᠠᠨᠤ ᠪᠦᠲᠦᠭᠡᠭ᠌ᠰᠡᠨ ᠲᠡᠯᠡᠬᠡᠢᠶ᠋ᠢᠨ ᠠᠷᠪᠠᠨ ᠬᠤᠶᠠᠷ ᠲᠤᠨᠵᠢ》 ᠵᠡᠷᠭᠡ ᠣᠯᠠᠨ ᠪᠦᠲᠦᠭᠡᠯᠢ ᠨᠠᠢᠷᠠᠭᠤᠯᠤᠨ ᠪᠢᠴᠢᠪᠡ᠃
ᠲᠡᠷᠡᠪᠠᠷ ᠠᠩᠬᠠᠳᠤᠭᠠᠷ ᠬᠤᠭᠤᠴᠠᠭᠠᠨᠤ ᠥᠪᠥᠷ ᠮᠣᠩᠭᠤᠯᠤᠨ ᠥᠪᠡᠷᠲᠡᠭᠡᠨ ᠵᠠᠰᠠᠬᠤ ᠣᠷᠣᠨᠤ ᠰᠣᠨᠢᠨ ᠮᠡᠳᠡᠭᠡᠨᠤ ᠡᠲᠡᠭᠡᠳᠤᠨ ᠭᠠᠷᠮᠠᠭᠠᠶ ᠬᠤᠪᠢ ᠨᠡᠮᠡᠷᠢᠶ᠋ᠢᠨ ᠱᠠᠩᠨᠠᠯ᠂ ᠮᠣᠩᠭᠤᠯ ᠤᠯᠤᠰᠤᠨ 《ᠠᠯᠲᠠᠨ ᠭᠠᠳᠠᠰᠤ》 ᠣᠳᠣᠨ ᠭᠠᠪᠢᠶᠠᠨ ᠲᠡᠮᠳᠡᠭ ᠵᠡᠷᠬᠡᠪᠠᠷ ᠡᠩᠬᠡᠷᠢᠶᠠᠨ ᠮᠢᠯᠢᠶᠠᠯᠭᠠᠵᠦ᠍ ᠶᠠᠪᠤᠪᠠ᠃
ᠪᠠᠯᠵᠢᠨᠢᠮᠠ ᠭᠤᠸᠠᠢᠯᠤᠭᠠ ᠤᠴᠠᠷᠠᠵᠤ ᠲᠠᠨᠢᠯᠴᠠᠬ᠍ᠰᠠᠨᠠᠴᠠ ᠨᠠᠭᠠᠰᠢ ᠲᠦᠴᠢᠭᠡᠳ ᠵᠢᠯᠤᠨ ᠲᠤᠷᠰᠢ ᠪᠢᠲᠡ ᠦᠶᠡ ᠵᠠᠢ ᠦᠭᠡᠢ ᠨᠦᠬᠦᠷᠯᠡᠨ ᠲᠦᠷᠦᠭ᠌ᠰᠡᠨᠠᠴᠠ ᠲᠤᠲᠠᠭᠤ ᠦᠭᠡᠢ ᠡᠯᠢᠭᠡᠱᠢᠭ ᠲᠤᠲᠤᠨᠤ ᠶᠠᠪᠤᠯᠴᠠᠬ᠍ᠰᠠᠨ ᠰᠠᠨ᠃
ᠦᠨᠡᠨᠢ ᠬᠡᠯᠡᠬᠦ᠌ᠳᠤ᠂ ᠪᠠᠯᠵᠢᠨᠢᠮᠠ ᠭᠡᠲᠡᠭ ᠬᠦᠮᠦᠨᠤ ᠠᠰᠤᠨ ᠪᠡᠶᠡᠲᠠᠢᠨᠢ ᠠᠭᠤᠯᠵᠠᠬᠤᠠᠴᠠ ᠡᠮᠦᠨᠡ ᠠᠯᠲᠠᠷ ᠨᠡᠷᠡᠶ᠋ᠢᠨᠢ ᠠᠯᠢ ᠬᠡᠲᠦᠢᠨ ᠲᠤᠭᠤᠯᠵᠤ ᠪᠢᠱᠢᠷᠡᠵᠦ᠍ ᠪᠠᠢᠬ᠍ᠰᠠᠨ ᠪᠢᠯᠡ᠃ 1978 ᠤᠨᠤ ᠦᠶᠡᠪᠠᠷ᠂ ᠪᠢ ᠯᠢᠶᠤᠤᠨᠢᠩᠤᠨ ᠡᠲᠦᠷᠤᠨ ᠰᠤᠨᠢᠨᠤ ᠬᠤᠷᠢᠶᠠᠶ᠋ᠢᠨ ᠵᠤᠤ ᠤᠲᠠ ᠠᠢᠮᠠᠭᠲᠤ ᠰᠠᠭᠤᠭᠠ ᠰᠤᠷᠪᠤᠯᠵᠢᠯᠠᠬ᠍ᠴᠢᠶ᠋ᠢᠨ ᠦᠷᠲᠡᠭᠡᠨᠳᠤ ᠠᠵᠢᠯᠯᠠᠵᠦ᠍ ᠪᠠᠢᠬᠤᠳᠠᠭᠠᠨ᠂ 《ᠦᠪᠦᠷ ᠮᠤᠩᠭᠤᠯᠤᠨ ᠡᠲᠦᠷᠤᠨ ᠰᠤᠨᠢᠨ》 ᠤ ᠰᠤᠷᠪᠤᠯᠵᠢᠯᠠᠬ᠍ᠴᠢ ᠪᠠᠯᠵᠢᠨᠢᠮᠠᠶ᠋ᠢᠨ ᠪᠢᠴᠢᠭ᠌ᠰᠡᠨ 《ᠨᠤᠲᠤᠭ ᠪᠡᠯᠴᠢᠭᠡᠷᠢ ᠲᠤᠷᠠ ᠲᠠᠪᠠᠪᠠᠷᠢᠶᠠᠨ ᠬᠠᠭᠠᠯᠪᠤᠷᠢᠯᠠᠵᠤ ᠪᠤᠯᠬᠤ ᠦᠭᠡᠢ》 ᠭᠡᠲᠡᠭ ᠵᠤᠬᠢᠶᠠᠯ 《ᠠᠷᠠᠳᠤᠨ ᠡᠲᠦᠷᠤᠨ ᠰᠤᠨᠢᠨ》 ᠤ ᠲᠦᠷᠦᠬᠦᠦ ᠨᠢᠭᠤᠷᠤᠨ ᠲᠦᠷᠦᠬᠦᠦ ᠵᠤᠷᠪᠤᠰᠲᠤ 《ᠨᠠᠢᠷᠠᠭᠤᠯᠤᠬ᠍ᠴᠢᠶ᠋ᠢᠨ ᠴᠤᠬᠤᠯᠠᠪᠤᠷᠢ》 ᠬᠠᠲᠠᠵᠤ ᠨᠡᠢᠲᠡᠯᠡᠭ᠌ᠲᠡᠭ᠌ᠰᠡᠨᠢ ᠬᠠᠷᠠᠭᠠᠳ ᠲᠤᠲᠤᠷᠠ ᠲᠤᠯᠭᠢᠰᠴᠤ᠌ ᠠᠪᠤᠬ᠍ᠰᠠᠨᠢᠶᠠᠨ ᠮᠠᠷᠲᠠᠬᠤ ᠦᠭᠡᠢ᠃ ᠰᠤᠨᠢᠨ ᠮᠡᠲᠡᠭᠡᠨᠤ ᠠᠵᠢᠯ ᠮᠡᠷᠭᠡᠵᠢᠯ ᠨᠢᠭᠡᠲᠡᠨᠤ ᠬᠤᠪᠢᠳᠤ᠂ ᠮᠤᠵᠢᠶ᠋ᠢᠨ ᠲᠡᠰᠤᠨ ᠰᠤᠨᠢᠨᠤ ᠰᠤᠷᠪᠤᠯᠵᠢᠯᠠᠬ᠍ᠴᠢ᠂ ᠲᠡᠭᠡᠬᠦ᠌ ᠮᠦᠷᠲᠡᠭᠡᠨ ᠮᠠᠨᠤ ᠮᠤᠩᠭᠤᠯ ᠰᠤᠷᠪᠤᠯᠵᠢᠯᠠᠬ᠍ᠴᠢ 《ᠠᠷᠠᠳᠤᠨ ᠡᠲᠦᠷᠤᠨ ᠰᠤᠨᠢᠨ》 ᠳᠤ ᠲᠦᠷᠦᠬᠦᠦ ᠨᠢᠭᠤᠷᠤᠨ ᠲᠦᠷᠦᠬᠦᠦ ᠵᠤᠷᠪᠤᠰᠢᠶᠠᠷ ᠡᠬᠡ ᠪᠢᠴᠢᠭ ᠨᠡᠢᠲᠡᠯᠡᠬᠦᠯᠦᠭ᠌ᠰᠡᠨᠢᠨᠢ ᠬᠡᠯᠡᠬᠦ᠌ᠳᠤ᠂ ᠠᠭᠤᠯᠠ ᠠᠪᠠᠷᠢᠬ᠍ᠴᠢ ᠲᠡᠯᠡᠬᠡᠢᠶ᠋ᠢᠨ ᠨᠤᠶᠠᠨ ᠤᠷᠬᠢᠯ ᠵᠦᠮᠦᠯᠠᠩᠮᠠᠳᠤ ᠭᠠᠷᠤᠬ᠍ᠰᠠᠨᠯᠤᠭᠠ ᠠᠳᠠᠯᠢ ᠨᠠᠳᠠᠳᠤ ᠰᠠᠨᠠᠬ᠍ᠲᠠᠵᠠᠢ᠃ ᠢᠩᠭᠢᠭᠡᠳ ᠪᠠᠯᠵᠢᠨᠢᠮᠠ ᠭᠡᠲᠡᠭ ᠨᠡᠷᠡ ᠮᠢᠨᠤ ᠴᠡᠭᠡᠵᠢᠨᠳᠤ ᠬᠠᠲᠠᠬ᠍ᠲᠠᠵᠤ ᠪᠢᠯᠡ᠃ 1979 ᠤᠨᠳᠤ᠂ ᠪᠢ ᠴᠤ᠌ ᠪᠡᠶᠡ ᠠᠬᠤᠢ ᠬᠤᠪᠢᠯᠵᠤ ᠦᠪᠦᠷ ᠮᠤᠩᠭᠤᠯᠤᠨ ᠡᠲᠦᠷᠤᠨ ᠰᠤᠨᠢᠨᠤ ᠬᠤᠷᠢᠶᠠᠶ᠋ᠢᠨ ᠵᠤᠤ ᠤᠲᠠ ᠠᠢᠮᠠᠭᠲᠤ ᠰᠠᠭᠤᠭᠠ ᠰᠤᠷᠪᠤᠯᠵᠢᠯᠠᠬ᠍ᠴᠢᠶ᠋ᠢᠨ ᠦᠷᠲᠡᠭᠡᠨᠳᠤ ᠰᠤᠷᠪᠤᠯᠵᠢᠯᠠᠬ᠍ᠴᠢ ᠪᠤᠯᠤᠬ᠍ᠰᠠᠨᠢᠶᠠᠨ᠂ ᠪᠢᠱᠢᠷᠡᠨ ᠬᠦᠨᠲᠦᠳᠭᠡᠵᠦ᠍ ᠶᠠᠪᠤᠲᠠᠭ ᠪᠠᠯᠵᠢᠨᠢᠮᠠ ᠭᠤᠸᠠᠢᠲᠠᠢ ᠬᠠᠯᠠᠭᠤᠨ ᠨᠢᠭᠤᠷᠢᠶᠠᠷᠢᠶᠠᠨ ᠠᠭᠤᠯᠵᠠᠵᠤ ᠲᠠᠨᠢᠯᠴᠠᠬ᠍ᠰᠠᠨ ᠪᠦᠭᠡᠳ ᠰᠤᠨᠢᠨᠤ ᠬᠤᠷᠢᠶᠠᠶ᠋ᠢᠨ ᠰᠤᠷᠪᠤᠯᠵᠢᠯᠠᠬ᠍ᠴᠢᠶ᠋ᠢᠨ ᠬᠡᠯᠲᠡᠰᠲᠤ ᠬᠠᠮᠳᠤ ᠠᠵᠢᠯᠯᠠᠬᠤ ᠬᠤᠪᠢ ᠢᠷᠦᠭᠡᠯ ᠲᠠᠭᠠᠷᠠᠬ᠍ᠰᠠᠨ ᠰᠠᠨ᠃ ᠦᠨᠲᠦᠷᠬᠡᠨ ᠲᠤᠷᠠᠩᠬᠠᠢ ᠪᠡᠶᠡᠲᠠᠢ᠂ ᠲᠡᠭ᠌ᠰᠢ ᠨᠢᠷᠤᠭᠤᠲᠠᠢ᠂ ᠲᠦᠴᠢ ᠲᠦᠷᠦᠭᠡᠯᠡᠭ᠌ᠰᠡᠨ ᠬᠢᠵᠢᠶᠡᠯᠢ ᠨᠠᠰᠤᠨᠤ ᠬᠦᠮᠦᠨ ᠬᠢᠷᠢᠨᠢᠶᠠᠨ ᠶᠠᠪᠤᠵᠤ ᠰᠠᠭᠤᠬᠤᠨᠢ ᠵᠠᠯᠠᠭᠤᠴᠤᠳᠠᠴᠠ ᠲᠤᠯᠢᠲᠠᠯ ᠦᠭᠡᠢ ᠪᠤᠱᠢᠭᠤ ᠱᠠᠯᠠᠮᠠᠭᠠᠢ᠂ ᠶᠠᠷᠢᠵᠤ ᠬᠡᠯᠡᠬᠦ᠌ᠠᠴᠠᠨᠢ ᠨᠤᠮᠤᠨ ᠤᠳᠭᠠ ᠬᠠᠩᠬᠤᠯᠬᠤᠪᠠᠷ ᠰᠤᠶᠤᠯ ᠪᠤᠯᠪᠠᠰᠤᠷᠠᠯᠤᠨ ᠦᠨᠲᠦᠷ ᠲᠦᠪᠱᠢᠨᠳᠤ ᠬᠦᠷᠦᠭ᠌ᠰᠡᠨ ᠬᠦᠮᠦᠨ ᠭᠡᠭ᠌ᠴᠢᠨᠢ ᠭᠠᠲᠠᠷᠯᠠᠭ᠍ᠲᠠᠨᠠ᠃ ᠡᠨᠡᠨᠢ ᠪᠠᠯᠵᠢᠨᠢᠮᠠᠶ᠋ᠢᠨ ᠨᠠᠳᠠᠳᠤ ᠦᠭ᠌ᠭᠦᠭ᠌ᠰᠡᠨ ᠠᠩᠬᠠᠨᠤ ᠰᠠᠭᠤᠬ᠍ᠲᠠᠯ᠃
ᠪᠠᠯᠵᠢᠨᠢᠮᠠ ᠪᠠᠭ᠍ᠰᠢᠲᠠᠨ
ᠪᠠᠯᠵᠢᠨᠢᠮᠠ 1963 ᠤᠨᠳᠤ ᠦᠪᠦᠷ ᠮᠤᠩᠭᠤᠯᠤᠨ ᠶᠡᠭᠡ ᠰᠤᠷᠭᠠᠭᠤᠯᠢᠠᠴᠠ ᠲᠡᠬᠦᠰᠦᠭᠡᠳ᠂ ᠰᠤᠨᠢᠨ ᠰᠡᠳᠬᠦᠯᠤᠨ ᠹᠷᠤᠨᠲᠲᠤ ᠤᠯᠠᠨ ᠵᠢᠯ ᠠᠵᠢᠯᠯᠠᠴᠢᠬᠠᠬ᠍ᠰᠠᠨ ᠪᠠᠶᠠᠯᠢᠭ ᠲᠤᠷᠱᠢᠯᠭᠠ ᠡᠯᠪᠡᠭ ᠦᠢᠯᠡᠲᠦᠯᠭᠡᠲᠠᠢ ᠰᠤᠨᠢᠨ ᠮᠡᠲᠡᠭᠡᠨᠤ ᠠᠵᠢᠯᠲᠠᠨᠤ ᠨᠢᠭᠡᠨ᠃ ᠲᠠᠨᠢᠯᠴᠠᠬ᠍ᠰᠠᠨᠠᠴᠠ ᠬᠤᠢᠱᠢᠬᠢ ᠤᠯᠠᠨ ᠵᠢᠯᠤᠨ ᠲᠤᠷᠰᠢ ᠪᠢ ᠪᠠᠯᠵᠢᠨᠢᠮᠠ ᠭᠤᠸᠠᠢᠶ᠋ᠢ ᠲᠠᠭᠠᠵᠤ ᠤᠯᠠᠨᠲᠠ ᠰᠤᠷᠪᠤᠯᠵᠢᠯᠠᠭᠠᠶ᠋ᠢᠨ ᠦᠢᠯᠡᠲᠦᠯᠭᠡᠳᠤ ᠤᠷᠤᠯᠴᠠᠬ᠍ᠰᠠᠨ᠂ ᠪᠢ ᠲᠡᠬᠦᠨᠤ ᠪᠡᠶᠡ ᠲᠡᠭᠡᠷᠡᠠᠴᠠ ᠤᠯᠠᠨ ᠶᠠᠭᠤᠮᠠ ᠰᠤᠷᠴᠤ᠌ ᠮᠡᠲᠡᠵᠦ᠍ ᠤᠬᠠᠭᠠ ᠴᠤᠭᠤᠷᠤᠬ᠍ᠰᠠᠨ᠃ ᠲᠡᠷᠡ ᠪᠤᠯ ᠮᠢᠨᠤ ᠰᠤᠨᠢᠨ ᠮᠡᠲᠡᠭᠡᠨᠤ ᠦᠢᠯᠡᠰᠤᠨ ᠵᠠᠮᠳᠠᠬᠢ ᠰᠠᠢᠨ ᠬᠦᠲᠦᠯᠦᠭ᠌ᠴᠢ᠂ ᠵᠢᠯᠤᠭᠤᠲᠤᠬ᠍ᠴᠢ᠂ ᠮᠢᠨᠤ ᠠᠴᠢᠲᠤ ᠪᠠᠭ᠍ᠰᠢ ᠲᠤᠰᠠᠳᠤ ᠨᠦᠬᠦᠷ ᠶᠤᠮᠰᠠᠨ᠃
1982 ᠤᠨᠤ 7 ᠰᠠᠷᠠᠶ᠋ᠢᠨ ᠰᠡᠬᠦᠯᠴᠢᠪᠠᠷ᠂ ᠬᠡᠤ ᠶᠤᠤ ᠪᠠᠩ ᠲᠡᠷᠢᠬᠦᠯᠡᠭ᠌ᠴᠢ ᠲᠤᠬᠠᠢᠶ᠋ᠢᠨ ᠦᠶᠡᠶ᠋ᠢᠨ ᠵᠤᠤ ᠤᠲᠠ ᠠᠢᠮᠠᠭᠲᠤ ᠤᠴᠢᠵᠤ ᠱᠢᠨᠵᠢᠯᠡᠨ ᠪᠠᠢᠴᠠᠭᠠᠬ᠍ᠰᠠᠨ ᠪᠢᠯᠡ᠃ 8 ᠰᠠᠷᠠᠶ᠋ᠢᠨ ᠡᠬᠢᠨᠢᠶᠠᠷ᠂ ᠪᠠᠯᠵᠢᠨᠢᠮᠠ ᠭᠤᠸᠠᠢ ᠤᠯᠠᠭᠠᠨᠬᠠᠳᠠᠳᠤ ᠬᠦᠷᠴᠦ᠍ ᠤᠴᠢᠪᠠ᠃ 《ᠨᠠᠮ ᠲᠦᠷᠦᠶ᠋ᠢᠨ ᠤᠳᠤᠷᠢᠳᠤᠬ᠍ᠴᠢ ᠡᠨᠡ ᠤᠲᠠᠭᠠ ᠵᠤᠤ ᠤᠳᠠᠳᠤ ᠢᠷᠡᠭᠡᠳ᠂ ᠮᠠᠯᠵᠢᠬᠤ ᠤᠷᠤᠨᠠᠴᠠ ᠪᠠᠶᠠᠨᠲᠠᠯᠠ ᠰᠤᠮᠤ᠂ ᠲᠠᠷᠢᠶᠠᠯᠠᠬᠤ ᠤᠷᠤᠨᠠᠴᠠ ᠳ᠋ᠠ ᠯᠢᠶᠠᠩ ᠭᠸᠦ ᠮᠧᠨ ᠱᠢᠶᠠᠩᠢ ᠰᠤᠩᠭᠤᠵᠤ ᠤᠴᠢᠬ᠍ᠰᠠᠨᠨᠢ ᠵᠦᠭᠡᠷ ᠨᠢᠭᠡ ᠲᠤᠭᠤᠷᠢᠨ ᠦᠵᠡᠭ᠌ᠰᠡᠨ ᠶᠠᠪᠤᠲᠠᠯ ᠪᠢᠰᠢ ᠱᠢᠦ᠃ ᠵᠢᠭᠠᠪᠤᠷᠢ ᠵᠠᠬᠢᠶᠠᠨᠢ ᠪᠦᠬᠦ᠌ ᠤᠯᠤᠰᠤᠨ ᠬᠦᠲᠡᠭᠡ ᠲᠤᠰᠭᠤᠨ ᠮᠠᠯᠵᠢᠬᠤ ᠤᠷᠤᠨᠳᠤ ᠴᠢᠭ᠌ᠯᠡᠯᠤᠨ ᠴᠢᠨᠠᠷᠲᠠᠢ ᠴᠢᠬᠤᠯᠠ ᠤᠳᠭᠠ ᠠᠭᠤᠯᠭᠠᠲᠠᠢ ᠶᠠᠪᠤᠲᠠᠯ ᠶᠤᠮ᠃ ᠪᠢᠲᠡ ᠬᠤᠶᠠᠭᠤᠯᠠ ᠲᠡᠷᠢᠬᠦᠯᠡᠭ᠌ᠴᠢᠶ᠋ᠢᠨ ᠮᠦᠷᠢᠶᠠᠷ ᠮᠦᠷᠲᠡᠨ ᠰᠤᠷᠪᠤᠯᠵᠢᠯᠠᠵᠤ᠂ ᠰᠤᠨᠢᠨᠤ ᠲᠤᠯᠤᠭᠠᠢᠶ᠋ᠢᠨᠢ ᠲᠤᠬ᠍ᠰᠢᠵᠤ ᠪᠠᠢᠭᠠᠳ ᠲᠦᠷᠦᠬᠦᠦ ᠨᠢᠭᠤᠷᠤᠨ ᠲᠦᠷᠦᠬᠦᠦ ᠪᠠᠢᠷᠢᠳᠤ ᠨᠡᠢᠲᠡᠯᠡᠬᠦ᠌ ᠬᠡᠲᠦᠨ ᠡᠬᠡ ᠪᠢᠴᠢᠭ ᠪᠢᠴᠢᠶᠡ》 ᠭᠡᠵᠦ᠍ ᠪᠢᠯᠡ᠃ ᠬᠤᠶᠠᠭᠤᠯᠠ ᠲᠡᠭᠡᠭᠡᠳ ᠪᠠᠭᠠᠷᠢᠨ ᠪᠠᠷᠠᠭᠤᠨ ᠬᠤᠱᠢᠭᠤᠨᠤ ᠪᠠᠶᠠᠨᠲᠠᠯᠠ ᠨᠢᠭᠡᠲᠦᠯ᠂ ᠤᠯᠠᠭᠠᠨᠬᠠᠲᠠ ᠱᠢᠶᠠᠨᠤ ᠳ᠋ᠠ ᠯᠢᠶᠠᠩ ᠭᠸᠦ ᠮᠧᠨ ᠱᠢᠶᠠᠩᠳᠤ ᠲᠤᠰ ᠲᠤᠰ ᠬᠦᠷᠴᠦ᠍᠂ 《ᠪᠠᠶᠠᠨᠲᠠᠯᠠ ᠨᠢᠭᠡᠲᠦᠯ ᠨᠤᠲᠤᠭ ᠪᠡᠯᠴᠢᠭᠡᠷᠤᠨ ᠦᠨᠲᠦᠰᠦᠨ ᠪᠦᠲᠦᠭᠡᠨ ᠪᠠᠢᠭᠤᠯᠤᠯᠲᠠᠪᠠᠷ ᠮᠠᠯᠵᠢᠬᠤ ᠦᠢᠯᠡᠳᠪᠦᠷᠢᠯᠡᠯᠳᠤ ᠬᠦᠭ᠌ᠵᠢᠯᠤᠨ ᠪᠠᠳᠤᠯᠠᠭᠠ ᠬᠠᠩᠭᠠᠬ᠍ᠰᠠᠨᠠᠴᠠ ᠪᠦᠬᠦ᠌ ᠨᠢᠭᠡᠲᠦᠯᠤᠨ ᠮᠠᠯᠤᠨ ᠲᠤᠭᠠ ᠲᠤᠯᠤᠭᠠᠢ ᠠᠩᠬᠠ ᠤᠳᠠᠭᠠ 10 ᠲᠦᠮᠡᠶ᠋ᠢᠨ ᠲᠠᠪᠠᠭᠠᠶ᠋ᠢ ᠲᠠᠪᠠᠯᠠ》᠂ 《ᠨᠤᠲᠤᠭ ᠪᠡᠯᠴᠢᠭᠡᠷᠢ ᠪᠦᠲᠦᠭᠡᠨ ᠪᠠᠢᠭᠤᠯᠬᠤ ᠰᠠᠢᠨ ᠨᠢᠭᠡ ᠬᠡᠯᠪᠡᠷᠢ — ᠪᠠᠭᠠᠷᠢᠨ ᠪᠠᠷᠠᠭᠤᠨ ᠬᠤᠱᠢᠭᠤᠨᠤ ᠡᠷᠦᠬᠡ ᠬᠤᠯᠪᠤᠭᠠᠯᠠᠨ ᠡᠪᠡᠰᠦᠨ ᠬᠦᠷᠢᠶᠡ ᠪᠠᠢᠭᠤᠯᠤᠬ᠍ᠰᠠᠨ ᠲᠤᠬᠠᠢ ᠪᠠᠢᠴᠠᠭᠠᠯᠲᠠᠶ᠋ᠢᠨ ᠮᠡᠲᠡᠬᠦᠯᠦᠯᠲᠡ》 ᠪᠠ ᠳ᠋ᠠ ᠯᠢᠶᠠᠩ ᠭᠸᠦ ᠮᠧᠨ ᠲᠤᠰᠭᠤᠨ ᠰᠠᠭᠠᠯᠢᠶ᠋ᠢᠨ ᠢᠮᠠᠭᠠ ᠲᠡᠵᠢᠭᠡᠵᠦ᠍᠂ ᠲᠠᠷᠢᠶᠠᠯᠠᠬᠤ ᠤᠷᠤᠨ ᠲᠠᠷᠢᠮᠠᠯ ᠪᠡ ᠲᠡᠵᠢᠭᠡᠪᠦᠷᠢᠶ᠋ᠢᠨ ᠦᠢᠯᠡᠰᠢ ᠵᠡᠷᠭᠡᠪᠡᠷ ᠬᠦᠭ᠌ᠵᠢᠬᠦᠯᠵᠦ᠍ ᠪᠠᠢᠭᠠ ᠵᠡᠷᠬᠡ 3 ᠡᠬᠡ ᠪᠢᠴᠢᠭ ᠪᠢᠴᠢᠭᠡᠳ ᠶᠠᠪᠤᠭᠤᠯᠤᠬ᠍ᠰᠠᠨᠳᠤ᠂ ᠦᠨᠡᠬᠡᠷ ᠪᠠᠯᠵᠢᠨᠢᠮᠠ ᠭᠤᠸᠠᠢᠶ᠋ᠢᠨ ᠬᠡᠯᠡᠭ᠌ᠰᠡᠨᠠᠴᠠ ᠭᠠᠷᠤᠭᠠ ᠦᠭᠡᠢ᠂ ᠮᠠᠨᠤ 《ᠦᠪᠦᠷ ᠮᠤᠩᠭᠤᠯᠤᠨ ᠡᠲᠦᠷᠤᠨ ᠰᠤᠨᠢᠨ》 ᠤ ᠲᠦᠷᠦᠬᠦᠦ ᠨᠢᠭᠤᠷᠤᠨ ᠲᠦᠷᠦᠬᠦᠦ ᠪᠠᠢᠷᠢᠳᠤ ᠠᠷᠤ ᠠᠷᠤᠠᠴᠠᠪᠠᠨ ᠨᠡᠢᠲᠡᠯᠡᠭ᠌ᠲᠡᠵᠡᠢ᠃ 《ᠰᠤᠨᠢᠨ ᠮᠡᠲᠡᠭᠡᠨᠳᠤ ᠤᠬᠠᠭᠠᠯᠠᠵᠤ ᠲᠦᠰᠦᠪᠯᠡᠬᠦ᠌ ᠮᠠᠰᠢ ᠴᠢᠬᠤᠯᠠ᠃ ᠭᠤᠤᠯ ᠰᠡᠳᠦᠪᠢᠶᠠᠨ ᠲᠤᠭ᠍ᠲᠠᠭᠠᠬᠤ᠂ ᠬᠠᠷᠠᠭᠠᠰᠤᠪᠠᠨ ᠰᠤᠩᠭᠤᠬᠤ᠂ ᠴᠠᠭ ᠲᠤᠬᠢᠶᠠᠯᠢ ᠡᠵᠡᠮᠲᠡᠬᠦ᠌ ᠭᠤᠷᠪᠠ ᠪᠤᠯ ᠤᠷᠭᠠᠨᠢᠭ ᠬᠤᠯᠪᠤᠭᠠᠲᠠᠢ᠃ ᠭᠡᠬᠦ᠌ᠳᠤ ᠴᠠᠭ ᠲᠤᠬᠢᠶᠠᠯᠢ ᠡᠵᠡᠮᠲᠡᠬᠦ᠌ ᠪᠤᠯ ᠬᠠᠮᠤᠭᠤᠨ ᠵᠠᠩᠭᠢᠯᠠᠭᠠ ᠪᠤᠯᠤᠨᠠ》 ᠭᠡᠵᠦ᠍ ᠪᠠᠯᠵᠢᠨᠢᠮᠠ ᠭᠤᠸᠠᠢ ᠡᠨᠡ ᠤᠳᠠᠭᠠᠶ᠋ᠢᠨ ᠰᠤᠷᠪᠤᠯᠵᠢᠯᠠᠭᠠᠶ᠋ᠢᠨ ᠲᠤᠬᠠᠢ ᠳ᠋ᠦᠩᠨᠡᠵᠦ᠍ ᠶᠠᠷᠢᠬ᠍ᠰᠠᠨᠨᠢ ᠮᠢᠨᠤ ᠬᠠᠭᠠᠬ᠍ᠲᠠᠬ᠍ᠰᠠᠨ ᠤᠶᠤᠨᠤ ᠴᠤᠩᠬᠤ ᠤᠩᠭᠤᠢᠵᠤ ᠭᠡᠷᠡᠯ ᠭᠡᠭᠡ ᠲᠤᠰᠤᠬ᠍ᠰᠠᠨ ᠮᠡᠲᠦ᠍᠃
ᠰᠤᠨᠢᠨ ᠮᠡᠲᠡᠭᠡᠨᠳᠤ ᠤᠬᠠᠭᠠᠯᠠᠵᠤ ᠲᠦᠰᠦᠪᠯᠡᠬᠦ᠂ ᠴᠠᠭ ᠲᠤᠬᠢᠶᠠᠯᠢ ᠡᠵᠡᠮᠲᠡᠬᠦ᠌ ᠪᠤᠲᠠᠳᠤ ᠦᠢᠯᠡᠲᠦᠯᠭᠡᠶ᠋ᠢᠨ ᠵᠢᠱ᠌ᠢᠶᠡᠪᠠᠨ ᠪᠠᠯᠵᠢᠨᠢᠮᠠ ᠭᠤᠸᠠᠢ ᠪᠠᠰᠠ ᠨᠢᠭᠡ ᠤᠲᠠᠭᠠ ᠦᠵᠡᠬᠦᠯᠦᠭᠡᠳ ᠦᠭ᠌ᠴᠡᠢ᠃ 1985 ᠤᠨᠤ ᠬᠠᠪᠤᠷ᠂ ᠰᠤᠷᠪᠤᠯᠵᠢᠯᠠᠬ᠍ᠴᠢᠳᠤᠨ ᠠᠵᠢᠯᠤᠨ ᠬᠤᠷᠠᠯᠢᠶᠠᠷ ᠪᠢ ᠬᠦᠬᠡᠬᠤᠳᠠᠳᠤ ᠢᠷᠡᠭᠡᠳ ᠪᠠᠯᠵᠢᠨᠢᠮᠠ ᠭᠤᠸᠠᠢᠲᠠᠢ ᠠᠭᠤᠯᠵᠠᠵᠤ᠂ 《ᠤᠢᠷᠠᠳᠤ ᠶᠠᠭᠤ ᠪᠢᠴᠢᠭᠡᠳ ᠶᠠᠭᠠᠷᠠᠵᠤ ᠪᠠᠢᠨᠠ ᠪᠤᠢ？》 ᠭᠡᠵᠦ᠍ ᠠᠰᠠᠭᠤᠬᠤᠳᠤ᠂ 《ᠴᠤᠬᠤᠮ ᠨᠢᠭᠡ ᠰᠠᠢᠬᠠᠨ ᠨᠡᠢᠲᠡᠯᠢᠭ ᠵᠢᠱ᠌ᠢᠶᠡ ᠤᠯᠵᠤ ᠰᠤᠷᠪᠤᠯᠵᠢᠯᠠᠬ᠍ᠰᠠᠨ》 ᠬᠡᠯᠠ᠃ ᠲᠡᠬᠡᠬᠡᠳ ᠵᠤᠬᠢᠶᠠᠯᠤᠨ ᠭᠤᠤᠯ ᠲᠦᠷᠢ ᠪᠤᠯᠬᠤ ᠸᠠᠩ ᠱᠢᠶᠠᠨ ᠼᠠᠢ ᠭᠡᠲᠡᠭ ᠬᠦᠮᠦᠨ ᠲᠠᠪᠢᠭᠠᠳ ᠤᠨᠠᠴᠠ ᠡᠬᠢᠯᠡᠵᠦ᠍ 400 ᠭᠠᠷᠤᠢ ᠲᠦᠮᠡᠨ ᠦᠰᠦᠭ ᠪᠦᠬᠦᠢ 10 ᠪᠤᠳᠢᠶ᠋ᠢᠨ ᠲᠡᠯᠡᠬᠡᠢᠶ᠋ᠢᠨ ᠠᠨᠠᠭᠠᠬᠤ ᠤᠬᠠᠭᠠᠨᠤ ᠰᠤᠩᠭᠤᠲᠠᠭ ᠪᠦᠲᠦᠭᠡᠯ 《ᠰᠧᠱᠢᠯᠤᠨ ᠲᠤᠲᠤᠷ ᠡᠮᠨᠡᠯᠬᠡᠶ᠋ᠢᠨ ᠤᠬᠠᠭᠠᠨ》 ᠢ ᠮᠦᠷᠲᠡᠨ ᠠᠩᠭ᠌ᠯᠢ ᠬᠡᠯᠡᠨᠠᠴᠠ ᠬᠢᠲᠠᠳᠴᠢᠯᠠᠵᠤ᠂ 《ᠪᠠᠷᠠᠭᠤᠨᠲᠠᠨ》 ᠢᠶᠠᠷ ᠴᠤᠬᠢᠬ᠍ᠲᠠᠬ᠍ᠰᠠᠨ᠂ ᠲᠡᠷᠡᠴᠢᠯᠠᠨ ᠬᠢᠨᠲᠠᠨᠳᠤ ᠬᠤᠷᠢᠬ᠍ᠲᠠᠵᠤ ᠬᠦᠲᠡᠯᠮᠦᠷᠢᠶ᠋ᠢᠨ ᠦᠭᠡᠷᠡᠴᠢᠯᠡᠯᠲᠡ ᠬᠢᠵᠦ᠍ ᠪᠠᠢᠬᠤᠳᠠᠭᠠᠨ ᠡᠨᠡ ᠠᠵᠢᠯᠢᠶᠠᠨ ᠵᠤᠬ᠍ᠰᠤᠭᠠ ᠦᠭᠡᠢ ᠡᠲᠦᠷ ᠰᠦᠨᠢᠶ᠋ᠢ ᠵᠠᠯᠭᠠᠭᠤᠯᠤᠨ ᠦᠷᠯᠦᠭᠡ ᠦᠲᠡᠰᠢᠶ᠋ᠢ ᠲᠡᠮᠡᠴᠡᠨ ᠤᠷᠴᠢᠭᠤᠯᠵᠤ ᠲᠠᠭᠤᠰᠤᠭᠠᠳ ᠦᠪᠦᠷ ᠮᠤᠩᠭᠤᠯᠤᠨ ᠠᠷᠠᠳᠤᠨ ᠬᠡᠪᠯᠡᠯᠤᠨ ᠬᠤᠷᠢᠶᠠᠠᠴᠠ ᠬᠡᠪᠯᠡᠬᠦᠯᠦᠭ᠌ᠰᠡᠨ ᠲᠤᠬᠠᠢ ᠮᠠᠰᠢ ᠲᠤᠭ᠍ᠲᠤᠯᠤᠨ ᠶᠠᠷᠢᠵᠤ ᠦᠭ᠌ᠴᠦ ᠪᠢᠯᠡ᠃ ᠬᠠᠭᠠᠰ ᠰᠠᠷᠠ ᠠᠷᠠᠢ ᠪᠤᠯᠤᠭᠠ ᠦᠭᠡᠢ᠂ 《ᠬᠠᠲᠠᠭᠤᠵᠢᠯᠲᠠᠢ ᠲᠡᠮᠡᠴᠡᠭ᠌ᠴᠢ ᠨᠢᠭᠡᠨ ᠬᠦᠮᠦᠨᠤ ᠤᠯᠠ ᠮᠦᠷ》 ᠭᠡᠬᠦ᠌ ᠤᠷᠲᠤ ᠴᠢᠮᠡᠭᠡᠯᠡᠯᠨᠢ 《ᠲᠤᠰ ᠰᠤᠨᠢᠨᠤ ᠤᠨᠴᠠ ᠤᠷᠢᠬ᠍ᠰᠠᠨ ᠰᠤᠷᠪᠤᠯᠵᠢᠯᠠᠬ᠍ᠴᠢ ᠪᠠᠯᠵᠢᠨᠢᠮᠠ》 ᠭᠡᠬᠦ᠌ ᠨᠡᠷᠡᠪᠠᠷ 《ᠭᠤᠸᠠᠩᠮᠢᠩ ᠡᠲᠦᠷᠤᠨ ᠰᠤᠨᠢᠨ》 ᠳᠤ ᠲᠦᠷᠦᠬᠦᠦ ᠨᠢᠭᠤᠷᠤᠨ ᠲᠦᠷᠦᠬᠦᠦ ᠪᠠᠢᠷᠢᠪᠠᠷ ᠱᠢᠬᠦᠮᠵᠢᠯᠡᠭ᠌ᠴᠢᠶ᠋ᠢᠨ ᠦᠭᠡ ᠬᠠᠪᠰᠤᠷᠭᠠᠨ ᠦᠪᠡᠲᠡᠭ᠌ᠰᠢ ᠶᠡᠬᠡᠪᠡᠷ ᠨᠡᠢᠲᠡᠯᠡᠭ᠌ᠲᠡᠯᠡ᠃ ᠪᠢ ᠠᠮᠲᠠᠷᠬᠠᠨ ᠤᠩᠱᠢᠬᠤ ᠵᠠᠭᠤᠷᠠ ᠵᠤᠬᠢᠶᠠᠯᠤᠨ ᠪᠠᠭᠠᠳᠤᠷᠤᠨ ᠦᠢᠯᠡ ᠶᠠᠪᠤᠲᠠᠯᠳᠤ ᠰᠡᠳᠭᠢᠯᠤᠨ ᠶᠤᠩᠬᠤᠷᠢᠶᠠᠨ ᠬᠦᠨᠲᠡᠬᠦᠯᠵᠦ᠍ ᠬᠡᠲᠦ ᠴᠤ᠌ ᠤᠲᠠᠭᠠ ᠠᠨᠢᠰᠭᠠ ᠴᠢᠭᠢᠭ᠌ᠲᠡᠵᠦ᠍ ᠠᠬ᠍ᠰᠠᠨ ᠪᠢᠯᠡ᠃ ᠲᠤᠰ ᠴᠢᠮᠡᠭᠡᠯᠡᠯ ᠪᠦᠬᠦ᠌ ᠤᠯᠤᠰᠲᠤ᠌᠂ ᠢᠯᠠᠩᠭᠤᠶᠠ ᠦᠷᠭᠡᠨ ᠤᠯᠠᠨ ᠡᠷᠲᠡᠮᠲᠡᠨ ᠰᠡᠭᠡᠭᠡᠲᠡᠳᠤᠨ ᠲᠤᠮᠳᠠ ᠴᠢᠩᠭᠠ ᠲᠤᠰᠭᠠᠯ ᠭᠠᠷᠴᠤ᠌᠂ 《ᠭᠤᠸᠠᠩᠮᠢᠩ ᠡᠲᠦᠷᠤᠨ ᠰᠤᠨᠢᠨ》 ᠲᠡᠭᠡᠷᠡ ᠲᠤᠰᠭᠠᠢ ᠪᠤᠯᠤᠩᠢᠶᠠᠷ ᠶᠠᠷᠢᠯᠴᠠᠭᠠ ᠦᠷᠨᠢᠬᠦᠯᠦᠭ᠌ᠰᠡᠨ ᠶᠤᠮ᠃ ᠡᠨᠡ ᠪᠤᠯ 《ᠰᠤᠶᠤᠯᠤᠨ ᠶᠡᠭᠡ ᠬᠤᠪᠢᠰᠭᠠᠯ》 ᠲᠤᠮᠲᠠ ᠲᠠᠯᠬᠢᠬ᠍ᠲᠠᠬ᠍ᠰᠠᠨ ᠰᠡᠭᠡᠭᠡᠲᠡᠳᠤᠨ ᠲᠤᠬᠠᠢ ᠲᠦᠷᠦᠶ᠋ᠢᠨ ᠪᠤᠲᠤᠯᠭᠠ ᠲᠠᠬᠢᠨ ᠰᠡᠷᠭᠦᠭᠡᠭ᠌ᠲᠡᠵᠦ᠍᠂ ᠡᠷᠲᠡᠮᠲᠡᠨᠢ ᠬᠦᠨᠲᠦᠳᠭᠡᠵᠦ᠍ ᠴᠢᠲᠠᠪᠤᠷᠢᠲᠠᠨᠢ ᠴᠢᠬᠤᠯᠠᠴᠢᠯᠠᠬᠤ ᠪᠤᠯᠤᠬ᠍ᠰᠠᠨ ᠴᠠᠭᠤᠨ ᠪᠠᠢᠲᠠᠯᠢ ᠰᠡᠷᠭᠡᠭᠢᠶᠠᠷ ᠲᠠᠨᠢᠵᠤ᠂ ᠠᠵᠠ ᠲᠤᠬᠢᠶᠠᠯᠢ ᠡᠵᠡᠮᠲᠡᠭ᠌ᠰᠡᠨ ᠪᠠᠯᠵᠢᠨᠢᠮᠠ ᠭᠤᠸᠠᠢᠶ᠋ᠢᠨ ᠨᠢᠭᠡ 《ᠡᠷᠲᠡᠮ》᠃ ᠲᠡᠭᠦᠨᠠᠴᠠ ᠬᠤᠢᠰᠢ᠂ ᠪᠦᠬᠦ᠌ ᠤᠯᠤᠰᠤᠨ ᠱᠢᠯᠢᠲᠡᠭ ᠰᠤᠨᠢᠨ ᠮᠡᠲᠡᠭᠡᠨᠤ ᠭᠤᠷᠪᠠᠳᠤᠭᠠᠷ ᠲᠡᠰᠤᠨ ᠱᠠᠩᠨᠠᠯ ᠬᠦᠷᠲᠡᠭ᠌ᠰᠡᠨ ᠦᠪᠦᠷ ᠮᠤᠩᠭᠤᠯᠳᠤ 《ᠡᠯᠡᠰᠦ ᠤᠷᠤᠬ᠍ᠰᠢᠯᠠᠵᠤ ᠬᠦᠮᠦᠨ ᠤᠬᠤᠷᠢᠲᠠᠭ ᠪᠠᠢᠬ᠍ᠰᠠᠨᠠᠴᠠ ᠤᠳᠤ ᠬᠦᠮᠦᠨ ᠤᠷᠤᠬ᠍ᠰᠢᠯᠠᠵᠤ ᠡᠯᠡᠰᠦ ᠤᠬᠤᠷᠢᠯᠠ》 ᠭᠡᠬᠦ᠌ ᠮᠡᠲᠦᠶ᠋ᠢᠨ ᠴᠠᠭᠢ ᠡᠵᠡᠯᠡᠭ᠌ᠰᠡᠨ ᠠᠯᠢ ᠤᠯᠠᠨ ᠮᠡᠲᠡᠭᠡ ᠴᠢᠮᠡᠭᠡᠯᠠᠯᠨᠦᠭᠦᠳᠨᠢ ᠴᠦᠮ ᠪᠠᠯᠵᠢᠨᠢᠮᠠ ᠭᠤᠸᠠᠢᠶ᠋ᠢᠨ ᠰᠤᠨᠢᠨ ᠮᠡᠲᠡᠭᠡᠯᠡᠯᠤᠨ ᠤᠬᠠᠭᠠᠯᠠᠨ ᠲᠦᠰᠦᠪᠯᠡᠬᠦ᠌ 《ᠡᠷᠲᠡᠮ》 ᠳᠤ ᠰᠠᠭᠤᠷᠢᠯᠠᠬ᠍ᠰᠠᠨ ᠪᠠᠢᠲᠠᠭ᠃
ᠪᠠᠯᠵᠢᠨᠢᠮᠠ ᠪᠠᠭ᠍ᠰᠢᠲᠠᠨ ᠭᠡᠷᠬᠡᠢ ᠵᠠᠩ ᠵᠶ᠋ᠢ ᠱᠢᠶᠠᠲᠠᠢᠪᠠᠨ ᠬᠠᠮᠲᠣ
1983 ᠤᠨᠤ ᠬᠠᠪᠤᠷ᠂ ᠪᠢᠲᠠ ᠬᠦᠬᠡᠬᠤᠲᠠᠳᠤ ᠬᠤᠷᠠᠯᠳᠤ ᠰᠠᠭᠤᠵᠤ ᠪᠠᠢᠲᠠᠯᠠ᠂ ᠠᠯᠲᠠᠷᠲᠤ ᠲᠤᠬ᠍ᠯᠠᠬ᠍ᠴᠢ ᠰᠡᠴᠡᠩᠭᠤᠸᠠ 《ᠲᠡᠮᠡᠭᠡ ᠱᠢᠶᠠᠩᠽᠢ》 ᠭᠡᠲᠡᠭ ᠺᠢᠨᠣ᠋ᠳᠤ ᠬᠡᠤ ᠨᠢᠦᠶ᠋ᠢᠨ ᠲᠦᠷᠢᠶ᠋ᠢ ᠠᠮᠵᠢᠯᠲᠠᠲᠠᠢ ᠲᠤᠬ᠍ᠯᠠᠭᠠᠳ᠂ ᠲᠤᠮᠲᠠᠳᠤ ᠤᠯᠤᠰᠤᠨ ᠺᠢᠨᠣ᠋ᠶ᠋ᠢᠨ 《ᠠᠯᠲᠠᠨ ᠲᠠᠬᠢᠶᠠ》 ᠪᠠ 《ᠦᠨᠢᠷ ᠴᠡᠴᠡᠭ》 ᠬᠤᠤᠰ ᠱᠠᠩᠨᠠᠯ ᠤᠯᠤᠬ᠍ᠰᠠᠨ ᠴᠢᠮᠡᠭᠡᠶ᠋ᠢ ᠰᠤᠨᠤᠰᠤᠮᠠᠬ᠍ᠴᠠ᠂ 《ᠬᠤᠷᠠᠯᠢᠶᠠᠨ ᠪᠠᠷᠠᠪᠠᠯ ᠬᠤᠶᠠᠭᠤᠯᠠ ᠰᠡᠴᠡᠩᠭᠤᠸᠠᠶ᠋ᠢ ᠰᠤᠷᠪᠤᠯᠵᠢᠯᠠᠬᠤᠪᠠᠷ ᠪᠡᠭᠡᠵᠢᠩᠳᠤ ᠶᠠᠪᠤᠶᠠ》 ᠭᠡᠵᠦ᠍ ᠪᠠᠯᠵᠢᠨᠢᠮᠠ ᠭᠤᠸᠠᠢ ᠨᠠᠳᠠᠳᠤ ᠬᠡᠯᠡᠪᠡ᠃ ᠪᠢ ᠵᠢᠭᠠᠬᠠᠨ ᠲᠠᠳᠠᠭᠠᠯᠵᠠᠬᠤᠯᠠᠷ᠂ ᠪᠠᠯᠵᠢᠨᠢᠮᠠ ᠭᠤᠸᠠᠢ 《ᠨᠡᠷᠡᠲᠦ ᠰᠤᠷᠪᠤᠯᠵᠢᠯᠠᠬ᠍ᠴᠢ ᠪᠤᠯᠤᠶᠠ ᠭᠡᠪᠡᠯ ᠨᠡᠷᠡᠲᠦ ᠬᠦᠮᠦᠨᠢ ᠰᠤᠷᠪᠤᠯᠵᠢᠯᠠᠬᠤ ᠶᠤᠮ ᠱᠢᠤ》 ᠭᠡᠲᠡᠭ 《ᠤᠨᠤᠯ》 ᠢᠶᠠᠨ ᠨᠤᠮᠯᠠᠬ᠍ᠰᠠᠨ ᠪᠠᠢᠲᠠᠭ᠃ ᠪᠢ ᠲᠡᠬᠦᠨᠢᠨᠢ 《ᠪᠠᠯᠵᠢᠨᠢᠮᠠᠶ᠋ᠢᠨ ᠤᠨᠤᠯ》 ᠭᠡᠵᠦ᠍ ᠨᠡᠷᠡᠯᠡᠭ᠌ᠰᠡᠨ ᠶᠤᠮ᠃ ᠰᠡᠴᠡᠩᠭᠤᠸᠠ ᠲᠡᠷᠡ ᠦᠶᠡᠰᠲᠤ ᠶᠠᠭ 《ᠲᠠᠬᠢᠨᠲᠠ ᠠᠮᠢᠯᠠᠬ᠍ᠰᠠᠨ ᠭᠠᠵᠠᠷ》 ᠭᠡᠬᠦ᠌ ᠺᠢᠨᠣ᠋ᠳᠤ ᠴᠢᠬᠤᠯᠠ ᠲᠦᠷᠢ ᠲᠤᠬ᠍ᠯᠠᠭᠠᠳ ᠮᠠᠰᠢ ᠶᠠᠭᠠᠷᠠᠤ ᠪᠠᠢᠵᠠᠢ᠃ ᠬᠡᠪᠡᠴᠦ᠍ 《ᠬᠡᠲᠦᠢ ᠶᠠᠭᠠᠷᠠᠤ ᠠᠬ᠍ᠰᠠᠨ ᠴᠤ᠌ ᠨᠤᠲᠤᠭᠠᠴᠠ ᠢᠷᠡᠭ᠌ᠰᠡᠨ ᠰᠤᠷᠪᠤᠯᠵᠢᠯᠠᠬ᠍ᠴᠢᠪᠠᠨ ᠭᠤᠮᠤᠲᠠᠭᠠᠬᠤ ᠦᠭᠡᠢ》 ᠭᠡᠵᠦ᠍ ᠰᠡᠴᠡᠩᠭᠤᠸᠠ ᠵᠠᠪ ᠴᠢᠯᠦᠭᠡᠪᠠᠨ ᠵᠠᠢᠴᠢᠯᠠᠵᠤ ᠰᠤᠷᠪᠤᠯᠵᠢᠯᠠᠭᠠᠶ᠋ᠢ ᠬᠦᠯᠢᠶᠡᠭ᠌ᠰᠡᠨ ᠶᠤᠮ᠃ ᠲᠡᠬᠦᠨᠠᠴᠠ ᠬᠤᠢᠰᠢ᠂ ᠪᠠᠯᠵᠢᠨᠢᠮᠠ ᠪᠠᠭ᠍ᠰᠢᠶ᠋ᠢᠨ ᠲᠠᠭᠠᠭᠤᠯᠭᠠᠪᠠᠷ ᠪᠢ ᠪᠡᠭᠡᠵᠢᠩᠳᠤ ᠬᠡᠲᠦᠨᠲᠡ ᠤᠴᠢᠬ᠍ᠰᠠᠨᠳᠠᠭᠠᠨ ᠮᠠᠨᠵᠤᠶ᠋ᠢᠨ ᠫᠦᠶᠢ ᠬᠠᠭᠠᠨᠤ ᠲᠡᠬᠦᠦ ᠬᠦᠷᠭᠡᠨ᠂ ᠲᠠᠢᠸᠠᠨᠠᠴᠠ ᠰᠠᠶᠢᠬᠠᠨ ᠡᠬᠡ ᠬᠠᠭᠤᠷᠠᠢᠳᠠᠭᠠᠨ ᠪᠤᠴᠠᠵᠤ ᠢᠷᠡᠭ᠌ᠰᠡᠨ ᠵᠤᠤ ᠴᠢ ᠹᠠᠨ ᠠᠪᠤᠭᠠᠢ᠂ ᠠᠯᠲᠠᠷᠲᠤ ᠵᠤᠬᠢᠶᠠᠯᠴᠢ᠂ ᠰᠤᠷᠪᠤᠯᠵᠢᠯᠠᠬ᠍ᠴᠢ᠂ ᠤᠷᠴᠢᠭᠤᠯᠤᠬ᠍ᠴᠢ ᠱᠢᠶᠤᠤ ᠴᠢᠶᠠᠨ ᠠᠪᠤᠭᠠᠢ᠂ ᠤᠯᠠᠭᠠᠨᠬᠦᠦ ᠲᠡᠷᠢᠬᠦᠯᠡᠭ᠌ᠴᠢᠶ᠋ᠢᠨ ᠬᠤᠶᠠᠳᠤᠭᠠᠷ ᠬᠦᠪᠡᠬᠦᠨ᠂ ᠠᠯᠲᠠᠷᠲᠤ ᠴᠡᠷᠢᠭ ᠵᠡᠪᠰᠡᠭᠤᠨ ᠰᠤᠳᠤᠯᠤᠭᠠᠴᠢ ᠦᠬᠡᠷ ᠠᠪᠤᠭᠠᠢ᠂ ᠮᠤᠩᠭᠤᠯ ᠶᠤᠸᠠᠨᠤ ᠲᠡᠦᠬᠡᠶ᠋ᠢᠨ ᠰᠤᠲᠤᠯᠭᠠᠲᠠᠨᠤ ᠠᠪᠤᠷᠭᠤ ᠼᠠᠢ ᠮᠸᠢ ᠪᠢᠶᠤᠤ ᠠᠪᠤᠭᠠᠢ᠂ ᠮᠤᠩᠭᠤᠯ ᠦᠨᠲᠦᠰᠦᠲᠡᠨᠤ ᠠᠯᠲᠠᠷᠲᠤ ᠢᠷᠠᠭᠤ ᠨᠠᠢᠷᠠᠬ᠍ᠴᠢ ᠴᠠᠭᠠᠨ ᠵᠡᠷᠭᠡ ᠮᠠᠰᠢ ᠤᠯᠠᠨ ᠨᠡᠷᠡᠲᠦ ᠬᠦᠮᠦᠰᠲᠠᠢ ᠠᠭᠤᠯᠵᠠᠵᠤ ᠲᠠᠨᠢᠯᠴᠠᠵᠤ᠂ ᠰᠤᠷᠪᠤᠯᠵᠢᠯᠠᠵᠤ ᠪᠢᠴᠢᠭ᠌ᠰᠡᠨ ᠰᠠᠨ᠃
ᠠᠮᠢᠳᠤᠷᠠᠯᠳᠠᠭᠠᠨ ᠰᠠᠢᠨ ᠡᠬᠡᠨᠡᠷ ᠤᠯᠵᠦ᠍᠂ ᠠᠯᠪᠠᠨᠳᠠᠭᠠᠨ ᠰᠠᠢᠨ ᠤᠳᠤᠷᠢᠳᠤᠯᠭᠠᠲᠠᠢ ᠲᠠᠭᠠᠷᠠᠬᠤ ᠭᠡᠭ᠌ᠴᠢ ᠠᠮᠠᠷ ᠦᠭᠡᠢ᠃ ᠡᠨᠡ ᠬᠤᠶᠠᠷ ᠵᠤᠯᠲᠠᠢ ᠶᠠᠪᠤᠲᠠᠯ ᠪᠠᠯᠵᠢᠨᠢᠮᠠ ᠭᠤᠸᠠᠢᠳᠤ ᠵᠡᠷᠭᠡᠪᠠᠷ ᠲᠠᠭᠠᠷᠠᠵᠠᠢ᠃ 《ᠠᠮᠵᠢᠯᠲᠠᠳᠤ ᠬᠦᠷᠦᠭ᠌ᠰᠡᠨ ᠡᠷᠡ ᠬᠦᠮᠦᠨᠤ ᠠᠷᠤᠳᠤ ᠯᠠᠪᠲᠠᠢ ᠨᠢᠭᠡ ᠮᠡᠷᠭᠡᠨ ᠴᠢᠬᠡᠴᠢ ᠡᠬᠡᠨᠡᠷ ᠪᠠᠢᠲᠠᠭ》 ᠭᠡᠲᠡᠭ ᠦᠭᠡ ᠪᠤᠢ᠃ ᠭᠡᠷᠭᠡᠢᠨᠢ ᠵᠠᠩ ᠵᠶ᠋ᠢ ᠱᠢᠶᠠ ᠪᠤᠯ ᠪᠠᠯᠵᠢᠨᠢᠮᠠ ᠭᠤᠸᠠᠢᠶ᠋ᠢᠨ ᠠᠵᠢᠯ ᠦᠢᠯᠡᠰᠤᠨ ᠲᠡᠮᠵᠢᠭ᠌ᠴᠢ ᠵᠦᠪᠯᠡᠭ᠌ᠴᠢ ᠶᠤᠮᠰᠠᠨ᠃ ᠲᠡᠬᠢᠪᠡᠯ ᠲᠤᠬᠠᠢᠶ᠋ᠢᠨ ᠦᠶᠡᠶ᠋ᠢᠨ ᠰᠤᠨᠢᠨᠤ ᠬᠤᠷᠢᠶᠠᠨᠤ ᠨᠠᠮᠤᠨ ᠬᠤᠷᠢᠶᠠᠶ᠋ᠢᠨ ᠱᠦᠵᠢ ᠪᠤᠤᠱᠢᠶᠠᠩ ᠲᠠᠷᠤᠭᠠ ᠭᠡᠵᠤ ᠪᠤᠶᠠᠨᠢᠶᠠᠷ ᠲᠠᠭᠠᠷᠠᠬ᠍ᠰᠠᠨ ᠪᠤᠷᠬᠠᠨ ᠰᠡᠳᠭᠢᠯᠲᠦ ᠰᠠᠢᠨ ᠲᠠᠷᠤᠭᠠ ᠶᠤᠮ ᠡ᠃ ᠮᠢᠨᠤ ᠮᠡᠲᠡᠬᠦ᠌ᠪᠠᠷ᠂ 1987 ᠤᠨᠳᠤ᠂ ᠰᠤᠨᠢᠨᠤ ᠨᠠᠮᠤᠨ ᠬᠤᠷᠢᠶᠠᠠᠴᠠ ᠪᠠᠯᠵᠢᠨᠢᠮᠠᠶ᠋ᠢ ᠮᠤᠩᠭᠤᠯ ᠰᠤᠨᠢᠨᠤ ᠮᠠᠯ ᠲᠠᠷᠢᠶᠠᠯᠠᠩᠤᠨ ᠬᠡᠯᠲᠡᠰᠤᠨ ᠲᠡᠳ᠋ ᠡᠷᠬᠢᠯᠡᠭ᠌ᠴᠢ （ᠲᠡᠳ᠋ ᠭᠠᠵᠠᠷᠤᠨ ᠲᠠᠷᠤᠭᠠᠶ᠋ᠢᠨ ᠲᠡᠰ） ᠲᠤᠱᠢᠶᠠᠯᠳᠤ ᠲᠡᠪᠱᠢᠬᠦᠯᠬᠦ᠌ ᠭᠡᠰᠡᠨᠳᠤ᠂ ᠪᠠᠯᠵᠢᠨᠢᠮᠠ ᠦᠪᠡᠰᠦᠪᠡᠨ ᠲᠠᠲᠠᠭᠠᠯᠵᠠᠵᠤ᠂ 《ᠪᠢ ᠨᠦᠬᠦᠭᠡ ᠠᠵᠢᠯ ᠠᠯᠪᠠᠨᠳᠤ ᠠᠷᠭᠠᠮᠵᠢᠬ᠍ᠲᠠᠪᠠᠯ ᠦᠪᠡᠷᠤᠨ ᠬᠢᠶᠡ ᠭᠡᠰᠡᠨ ᠶᠠᠭᠤᠮᠠᠪᠠᠨ ᠬᠢᠵᠦ᠍ ᠴᠢᠲᠠᠬᠤ ᠦᠭᠡᠢ ᠪᠤᠯᠴᠢᠬᠠᠨᠠ》 ᠭᠡᠳ ᠪᠤᠤᠱᠢᠶᠠᠩ ᠲᠠᠷᠤᠭᠠᠶ᠋ᠢ ᠡᠷᠢᠵᠦ᠍ 《ᠪᠡᠯᠡᠳᠭᠡᠯ ᠰᠤᠷᠪᠤᠯᠵᠢᠯᠠᠬ᠍ᠴᠢ》 ᠪᠤᠯᠬᠤᠪᠠᠷ ᠭᠤᠶᠤᠴᠢᠯᠠᠪᠠ᠃ ᠪᠤᠤ ᠲᠠᠷᠤᠭᠠ ᠲᠡᠬᠦᠨᠤ ᠭᠤᠶᠤᠴᠢᠯᠠᠯᠢ ᠵᠦᠪᠱᠢᠶᠡᠷᠡᠭ᠌ᠰᠡᠨᠤ ᠰᠠᠢᠨᠢᠶᠠᠷ᠂ ᠪᠠᠯᠵᠢᠨᠢᠮᠠ ᠭᠤᠸᠠᠢ ᠠᠵᠢᠯᠠᠴᠠᠪᠠᠨ ᠲᠠᠷᠬᠠᠯᠠᠬ᠍ᠲᠠᠬᠤᠠᠴᠠ ᠡᠮᠦᠨᠡᠬᠢ ᠠᠷᠪᠠᠭᠠᠳ ᠵᠢᠯᠳᠤ ᠪᠦᠬᠦ᠌ ᠤᠯᠤᠰᠤᠨ ᠲᠠᠢᠸᠠᠨ ᠮᠤᠵᠢᠶ᠋ᠢ ᠭᠠᠷᠭᠠᠪᠠᠯ᠂ 31 ᠮᠤᠵᠢ᠂ ᠬᠤᠲᠠ᠂ ᠦᠪᠡᠷᠲᠡᠭᠡᠨ ᠵᠠᠰᠠᠬᠤ ᠤᠷᠤᠨᠳᠤ ᠤᠯᠠ ᠮᠦᠷᠢᠶᠠᠨ ᠦᠯᠡᠲᠡᠭᠡᠵᠦ᠍᠂ ᠴᠤᠬᠤᠮ ᠴᠦ᠍ ᠡᠬᠡ ᠤᠯᠤᠰᠤᠨ ᠡᠯᠡ ᠭᠠᠵᠠᠷᠢᠶᠠᠷ ᠰᠤᠷᠪᠤᠯᠵᠢᠯᠠᠵᠦ᠍ ᠶᠠᠪᠤᠬ᠍ᠰᠠᠨ᠃ ᠮᠦᠨ ᠴᠤ᠌ ᠡᠨᠡ ᠬᠤᠭᠤᠴᠠᠭᠠᠨᠳᠤ ᠬᠤᠵᠢᠮᠤᠨᠢᠶᠠᠨ ᠠᠭᠤᠤ ᠦᠢᠯᠡᠰᠢᠶᠠᠨ ᠤᠬᠠᠭᠠᠯᠠᠨ ᠲᠦᠰᠦᠪᠯᠡᠵᠦ᠍᠂ ᠰᠠᠭᠤᠷᠢᠶ᠋ᠢᠨᠢ ᠲᠠᠯᠪᠢᠬ᠍ᠰᠠᠨ ᠪᠠᠢᠭᠠ ᠶᠤᠮ᠃
ᠡᠨᠡ ᠠᠭᠤᠤ ᠶᠡᠭᠡ ᠦᠢᠯᠡᠰᠤᠨ ᠡᠬᠢᠯᠡᠯᠲᠡ ᠪᠤᠯ ᠪᠠᠯᠵᠢᠨᠢᠮᠠ᠂ ᠬᠠᠨ ᠭᠧᠨ ᠴᠠᠩ ᠪᠠᠭ᠍ᠰᠢᠶ᠋ᠢᠨ ᠰᠡᠳᠦᠵᠦ᠍ ᠡᠬᠦᠰᠭᠡᠭ᠌ᠰᠡᠨ᠂ ᠪᠤᠤᠱᠢᠶᠠᠩ ᠲᠠᠷᠤᠭᠠᠶ᠋ᠢᠨ ᠵᠦᠪᠱᠢᠶᠡᠷᠡᠯᠢᠶᠠᠷ ᠶᠠᠪᠤᠬ᠍ᠲᠠᠬ᠍ᠰᠠᠨ 《ᠡᠬᠡ ᠤᠯᠤᠰᠤᠨ ᠡᠯᠡ ᠭᠠᠵᠠᠷᠲᠠᠬᠢ ᠮᠤᠩᠭᠤᠯᠴᠤᠳ》 ᠭᠡᠬᠦ᠌ ᠱᠢᠷᠢᠰ ᠮᠡᠲᠡᠭᠡᠯᠡᠯ ᠪᠤᠯᠤᠨᠠ᠃ ᠪᠢ ᠪᠠᠰᠠ ᠠᠵᠠᠪᠠᠷ ᠡᠨᠡ ᠬᠦ᠌ ᠲᠤᠭᠤᠢᠯᠠᠩᠳᠤ ᠤᠷᠤᠯᠴᠠᠵᠤ᠂ 1989 ᠤᠨᠤ ᠨᠠᠮᠤᠷ ᠪᠠᠯᠵᠢᠨᠢᠮᠠ᠂ ᠬᠠᠨ ᠭᠧᠨ ᠴᠠᠩ ᠪᠠᠭ᠍ᠰᠢᠶ᠋ᠢᠨ ᠬᠠᠮᠳᠤ ᠱᠢᠨᠵᠢᠶᠠᠩᠳᠤ ᠰᠠᠷᠠ ᠭᠠᠷᠤᠢ ᠰᠤᠷᠪᠤᠯᠵᠢᠯᠠᠭᠠ ᠬᠢᠭ᠌ᠰᠡᠨ ᠶᠤᠮ᠃ ᠱᠢᠷᠢᠰ ᠮᠡᠲᠡᠭᠡᠯᠡᠯᠨᠢ ᠵᠠᠷᠤᠲᠠᠯ ᠮᠦᠩᠭᠦ᠌᠂ ᠬᠦᠮᠦᠨᠤ ᠬᠦᠴᠦ᠍ ᠡᠨᠡ ᠲᠡᠷᠡᠠᠴᠠ ᠱᠢᠯᠲᠠᠭᠠᠯᠠᠵᠤ᠂ ᠬᠡᠲᠦᠨ ᠵᠢᠯ ᠲᠠᠰᠤᠭ ᠪᠤᠰᠠᠭ ᠦᠷᠬᠦᠯᠵᠢᠯᠡᠵᠦ᠍ ᠪᠠᠢᠬ᠍ᠰᠠᠨᠢᠶᠠᠨ᠂ ᠢᠯᠠᠩᠭᠤᠶᠠ ᠪᠤᠤᠱᠢᠶᠠᠩ ᠲᠠᠷᠤᠭᠠ ᠱᠢᠯᠵᠢᠵᠦ᠍᠂ ᠬᠠᠨ ᠭᠧᠨ ᠴᠠᠩ᠂ ᠪᠠᠯᠵᠢᠨᠢᠮᠠ ᠪᠠᠭ᠍ᠰᠢ ᠠᠷᠤ ᠠᠷᠤᠠᠴᠠᠪᠠᠨ ᠠᠵᠢᠯᠠᠴᠠᠪᠠᠨ ᠲᠠᠷᠬᠠᠯᠠᠬ᠍ᠲᠠᠬ᠍ᠰᠠᠨᠠᠴᠠ ᠲᠤᠲᠠᠭᠤ ᠲᠤᠷᠭᠤᠨ ᠵᠤᠬ᠍ᠰᠤᠬ᠍ᠰᠠᠨ ᠤᠬᠠᠭᠠᠨ ᠲᠠᠢ᠃ ᠬᠡᠲᠦᠢ ᠲᠡᠢᠮᠦ᠍ ᠪᠤᠯᠪᠠᠴᠤ᠌ ᠪᠠᠯᠵᠢᠨᠢᠮᠠ ᠭᠤᠸᠠᠢ ᠪᠤᠯ ᠶᠠᠭᠤᠮᠠᠶ᠋ᠢ ᠲᠤᠲᠠᠭᠤ ᠲᠤᠷᠭᠤᠨ ᠬᠠᠶᠠᠲᠠᠭ ᠦᠭᠡᠢ᠂ ᠲᠡᠬᠦᠨᠤ 《ᠤᠬᠠᠭᠠᠯᠠᠨ ᠲᠦᠰᠦᠪᠯᠡᠬᠦ᠌》 ᠡᠷᠲᠡᠮᠨᠢ ᠪᠠᠰᠠ ᠨᠢᠭᠡ ᠤᠲᠠᠭᠠ ᠦᠢᠯᠡᠲᠦᠯ ᠦᠵᠡᠬᠦᠯᠪᠡ᠃ ᠲᠡᠷᠡᠪᠠᠷ ᠰᠤᠷᠪᠤᠯᠵᠢᠯᠠᠵᠤ ᠪᠢᠴᠢᠭ᠌ᠰᠡᠨ ᠬᠦᠮᠦᠰᠤᠨᠢᠶᠠᠨ ᠲᠤᠲᠤᠷᠠᠠᠴᠠ 32 ᠪᠠᠢᠭᠠᠯᠢᠶ᠋ᠢᠨ ᠱᠢᠨᠵᠢᠯᠡᠬᠦ᠌ ᠤᠬᠠᠭᠠᠨᠲᠠᠨᠢ ᠰᠤᠩᠭᠤᠵᠤ 《ᠮᠤᠩᠭᠤᠯ ᠦᠨᠲᠦᠰᠦᠲᠡᠨᠤ ᠱᠢᠨᠵᠢᠯᠡᠬᠦ᠌ ᠤᠬᠠᠭᠠᠨᠲᠠᠳ》 ᠭᠡᠬᠦ᠌ ᠨᠤᠮᠢᠶᠠᠨ ᠬᠢᠲᠠᠳ ᠮᠤᠩᠭᠤᠯ ᠬᠤᠶᠠᠷ ᠬᠡᠯᠡᠪᠠᠷ ᠨᠠᠢᠷᠠᠭᠤᠯᠵᠤ ᠬᠡᠪᠯᠡᠬᠦᠯᠦᠭ᠌ᠰᠡᠨ ᠰᠠᠨ᠃ ᠰᠡᠬᠦᠯᠳᠤᠨᠢ ᠨᠤᠮᠤᠨᠢᠶᠠᠨ ᠠᠭᠤᠯᠭᠠᠳᠤ ᠨᠡᠮᠡᠯᠲᠡ ᠬᠠᠰᠤᠯᠲᠠ ᠬᠢᠵᠦ᠍᠂ ᠨᠡᠢᠲᠡ 64 ᠬᠦᠮᠦᠨᠢ ᠪᠠᠭ᠍ᠲᠠᠭᠠᠬ᠍ᠰᠠᠨ 《ᠮᠤᠩᠭᠤᠯ ᠦᠨᠲᠦᠰᠦᠲᠡᠨᠤ ᠱᠢᠨᠵᠢᠯᠡᠬᠦ᠌ ᠤᠬᠠᠭᠠᠨᠲᠠᠳ》 ᠭᠡᠬᠦ᠌ ᠨᠤᠮ ᠪᠤᠯᠭᠠᠵᠤ᠂ 2005 ᠤᠨᠳᠤ ᠬᠤᠶᠠᠳᠤᠭᠠᠷ ᠤᠲᠠᠭᠠ ᠬᠡᠪᠯᠡᠬᠦᠯᠦᠭ᠌ᠰᠡᠨ ᠪᠦᠭᠡᠳ 2008 ᠤᠨᠳᠤ ᠦᠪᠦᠷ ᠮᠤᠩᠭᠤᠯ ᠤᠷᠤᠨᠳᠤ ᠲᠠᠷᠬᠠᠭᠠᠯᠲᠠᠪᠠᠷ ᠬᠠᠮᠤᠭᠤᠨ ᠦᠷᠭᠡᠨ 《ᠤᠮᠠᠷᠠᠲᠤᠶ᠋ᠢᠨ ᠱᠢᠨᠡ ᠰᠤᠨᠢᠨ》 ᠢᠶᠠᠷ ᠲᠠᠮᠵᠢᠭᠤᠯᠤᠨ᠂ ᠮᠤᠩᠭᠤᠯ ᠦᠨᠲᠦᠰᠦᠲᠡᠨᠤ 10 ᠰᠤᠳᠤᠨ ᠱᠢᠨᠵᠢᠯᠡᠬᠦ᠌ ᠤᠬᠠᠭᠠᠨᠲᠠᠳᠢ ᠱᠢᠯᠭᠠᠷᠠᠭᠤᠯᠬᠤ ᠠᠵᠢᠯᠯᠠᠭᠠ ᠦᠷᠨᠢᠬᠦᠯᠵᠠᠢ᠃ ᠡᠨᠡ ᠰᠠᠭᠤᠷᠢᠨ ᠲᠡᠭᠡᠷᠡᠪᠠᠨ ᠮᠤᠩᠭᠤᠯ ᠦᠨᠲᠦᠰᠦᠲᠡᠨᠤ 10 ᠰᠤᠳᠤᠨ ᠱᠢᠨᠵᠢᠯᠡᠬᠦ᠌ ᠤᠬᠠᠭᠠᠨᠲᠠᠳᠤᠨ ᠬᠦᠷᠦᠭᠲᠤ ᠲᠠᠨᠢᠯᠴᠠᠭᠤᠯᠭᠠ ᠬᠠᠲᠠᠨ ᠬᠡᠪᠯᠡᠵᠤ᠂ 8 ᠮᠤᠵᠢ ᠤᠷᠤᠨᠤ ᠲᠦᠮᠡ ᠭᠠᠷᠤᠢ ᠮᠤᠩᠭᠤᠯ ᠲᠤᠮᠲᠠᠳᠤ᠂ ᠪᠠᠭᠠ ᠰᠤᠷᠭᠠᠭᠤᠯᠢᠳᠤ ᠪᠡᠯᠡᠭ᠌ᠯᠡᠨ᠂ ᠮᠤᠩᠭᠤᠯ ᠦᠨᠲᠦᠰᠦᠲᠡᠨᠤ ᠱᠢᠨᠵᠢᠯᠡᠬᠦ᠌ ᠤᠬᠠᠭᠠᠨᠲᠠᠳᠢ ᠮᠤᠩᠭᠤᠯᠴᠤᠳᠤᠨ ᠬᠤᠢᠴᠢ ᠦᠶᠡᠶ᠋ᠢᠨ ᠵᠢᠷᠦᠬᠡ ᠰᠡᠳᠭᠢᠯᠳᠤ ᠬᠠᠲᠠᠩᠱᠢᠭᠤᠯᠤᠨ ᠨᠦᠯᠦᠭᠡᠯᠡᠬᠦ᠌ ᠭᠡᠰᠡᠨ ᠠᠯᠤᠰ ᠬᠡᠲᠦᠶ᠋ᠢᠨ ᠪᠤᠲᠤᠯᠭᠠᠪᠠᠨ ᠱᠢᠩᠭᠡᠭᠡᠵᠦ᠍᠂ ᠰᠤᠷᠲᠠᠯᠴᠢᠯᠠᠨ ᠲᠠᠨᠢᠯᠴᠠᠭᠤᠯᠬᠤ ᠠᠵᠢᠯᠯᠠᠭᠠᠪᠠᠨ ᠤᠷᠢᠲᠤ ᠡᠮᠦᠨᠡ ᠪᠠᠢᠭᠠ ᠦᠭᠡᠢ ᠱᠢᠨᠡ ᠨᠢᠭᠡᠨ ᠲᠦᠪᠱᠢᠨᠳᠤ ᠬᠦᠷᠭᠡᠵᠡᠢ᠃ ᠡᠨᠡ ᠶᠠᠪᠤᠲᠠᠯ ᠢᠩᠭᠢᠭᠡᠳ ᠵᠤᠬ᠍ᠰᠤᠨᠠ ᠭᠡᠵᠦ᠍ ᠲᠠᠭᠠᠪᠠᠯ ᠪᠠᠰᠠ ᠠᠳᠡᠬᠦᠦ ᠪᠤᠯᠤᠨᠡ᠃ ᠡᠬᠦᠨᠤ ᠵᠡᠷᠭᠡᠪᠠᠷ ᠪᠠᠰᠠ ᠨᠢᠭᠡᠨ ᠪᠦᠲᠦᠮᠵᠢᠲᠡᠢ ᠤᠬᠠᠭᠠᠯᠠᠯ ᠲᠦᠰᠦᠪᠯᠡᠯ ᠶᠠᠪᠤᠭ᠍ᠲᠠᠵᠤ ᠠᠬ᠍ᠰᠠᠨ ᠪᠢᠯᠡ᠃ ᠪᠠᠯᠵᠢᠨᠢᠮᠠ ᠭᠤᠸᠠᠢ 《ᠮᠤᠩᠭᠤᠯ ᠦᠨᠲᠦᠰᠦᠲᠡᠨᠤ ᠱᠢᠨᠵᠢᠯᠡᠬᠦ᠌ ᠤᠬᠠᠭᠠᠨᠲᠠᠳ》 ᠨᠤᠮᠤᠨ ᠲᠤᠲᠤᠷᠠᠠᠴᠠ ᠴᠢᠩ ᠤᠯᠤᠰᠤᠨ ᠠᠯᠲᠠᠷᠲᠤ ᠱᠢᠨᠵᠢᠯᠡᠬᠦ᠌ ᠤᠬᠠᠭᠠᠨᠲᠠᠨ ᠮᠢᠩᠭᠠᠨᠳᠤᠶ᠋ᠢ ᠰᠤᠩᠭᠤᠵᠤ᠂ 《ᠪᠢᠯᠢᠭ᠌ᠲᠦ ᠤᠳᠤᠨ ᠮᠢᠩᠭᠠᠨᠳᠤ》 ᠨᠤᠮᠢ ᠠᠰᠲᠤᠨᠢ ᠨᠠᠢᠷᠠᠭᠤᠯᠵᠤ ᠬᠡᠪᠯᠡᠬᠦᠯᠦᠭ᠌ᠰᠡᠨ ᠪᠦᠭᠡᠳ ᠮᠢᠩᠭᠠᠨᠳᠤᠶ᠋ᠢᠨ ᠲᠡᠭᠡᠲᠦᠶ᠋ᠢᠨ ᠨᠤᠲᠤᠭ ᠪᠤᠯ ᠦᠪᠦᠷ ᠮᠤᠩᠭᠤᠯᠤᠨ ᠬᠦᠪᠡᠭᠡᠲᠦ ᠴᠠᠭᠠᠨ ᠬᠤᠱᠢᠭᠤ ᠪᠤᠯᠤᠨᠠ ᠭᠡᠲᠡᠭᠠᠴᠠ ᠤᠷᠭᠤᠭᠤᠯᠵᠤ᠂ ᠬᠦᠪᠡᠭᠡᠲᠦ ᠴᠠᠭᠠᠨ ᠬᠤᠱᠢᠭᠤᠨᠤ ᠵᠠᠰᠠᠭᠤᠨ ᠤᠷᠲᠤᠨᠢ ᠲᠤᠮᠲᠠᠳᠤ ᠤᠯᠤᠰᠤᠨ ᠱᠢᠨᠵᠢᠯᠡᠬᠦ᠌ ᠤᠬᠠᠭᠠᠨᠤ ᠬᠦᠷᠢᠶᠡᠯᠡᠩ ᠪᠤᠯᠤᠨ ᠤᠯᠤᠰᠤᠨ ᠤᠳᠤᠨ ᠤᠷᠤᠨᠤ ᠬᠦᠷᠢᠶᠡᠯᠡᠩᠳᠤ ᠮᠡᠲᠡᠬᠦᠯᠦᠯᠲᠡ ᠪᠢᠴᠢᠬᠦᠯᠦᠨ᠂ 《ᠮᠢᠩᠭᠠᠨᠳᠤ ᠤᠳᠤᠨ》 ᠨᠡᠷᠡᠢᠳᠬᠦ᠌ ᠠᠵᠢᠯᠯᠠᠭᠠᠶ᠋ᠢ ᠰᠡᠲᠤᠨ ᠡᠬᠦᠰᠭᠡᠪᠡ᠃ 《ᠬᠡᠲᠦᠨ ᠵᠢᠯᠤᠨ ᠲᠠᠷᠠᠭᠠ᠂ ᠲᠤᠲᠤᠷᠠᠭᠤᠯᠵᠤ ᠬᠡᠯᠡᠪᠡᠯ᠂ 2002 ᠤᠨᠤ 5 ᠰᠠᠷᠠᠳᠤ ᠲᠤᠮᠲᠠᠳᠤ ᠤᠯᠤᠰᠤᠨ ᠢᠯᠡᠷᠡᠬᠦᠯᠵᠦ᠍ ᠮᠡᠲᠡᠭ᠌ᠰᠡᠨ 28242 ᠨᠤᠮᠧᠷᠲᠦ ᠵᠢᠵᠢᠭ ᠭᠠᠷᠠᠭ ᠤᠳᠤᠶ᠋ᠢ 《ᠮᠢᠩᠭᠠᠨᠳᠤ ᠤᠳᠤᠨ》 ᠬᠡᠮᠡᠨ ᠨᠡᠷᠡᠢᠳᠪᠡ᠃ ᠡᠨᠡ ᠪᠤᠯ ᠮᠠᠨᠤ ᠤᠯᠤᠰ ᠠᠩᠬᠠ ᠤᠲᠠᠭᠠ ᠴᠦᠬᠡᠨ ᠲᠤᠭᠠᠳᠤ ᠦᠨᠲᠦᠰᠦᠲᠡᠨᠤ ᠱᠢᠨᠵᠢᠯᠡᠬᠦ᠌ ᠤᠬᠠᠭᠠᠨᠲᠠᠨᠤ ᠨᠡᠷᠡᠪᠠᠷ ᠭᠠᠷᠠᠭ ᠤᠳᠤᠶ᠋ᠢ ᠨᠡᠷᠡᠢᠳᠦᠭ᠌ᠰᠡᠨ ᠶᠠᠪᠤᠲᠠᠯ ᠪᠤᠯᠬᠤ . ᠶᠤᠮ᠃ ᠭᠠᠷᠠᠭ ᠤᠳᠤᠨᠢ ᠨᠡᠷᠡᠢᠳᠬᠦ᠌ᠶ᠋ᠢ ᠲᠤᠮᠲᠠᠳᠤ ᠤᠯᠤᠰ ᠲᠤᠬ᠍ᠲᠠᠭᠠᠵᠤ ᠲᠡᠢᠯᠲᠡᠭ ᠪᠢᠰᠢ᠂ ᠡᠷᠬᠡᠪᠰᠢ ᠤᠯᠠᠨ ᠤᠯᠤᠰᠤᠨ ᠤᠳᠤᠨ ᠤᠷᠤᠨᠤ ᠰᠤᠲᠤᠯᠤᠯᠤᠨ ᠬᠠᠮᠳᠤᠷᠠᠬ᠍ᠰᠠᠨ ᠨᠡᠢᠭᠡᠮᠯᠢᠭᠤᠨ ᠵᠢᠵᠢᠭ ᠤᠳᠤᠨᠢ ᠨᠡᠷᠡᠢᠳᠬᠦ᠌ ᠵᠦᠪᠯᠡᠯᠳᠤ ᠮᠡᠲᠡᠬᠦᠯᠵᠦ᠍ ᠵᠦᠪᠱᠢᠶᠡᠷᠡᠬᠦᠯᠲᠡᠭ ᠶᠤᠮ ᠪᠠᠢᠨᠠ᠃ ᠬᠡᠯᠡᠬᠦ᠌ᠳᠤ ᠪᠠᠯᠵᠢᠨᠢᠮᠠ᠂ ᠵᠠᠩ ᠵᠶ᠋ᠢ ᠱᠢᠶᠠ ᠡᠷᠡ ᠡᠮᠡ ᠬᠤᠶᠠᠭᠤᠯᠠᠶ᠋ᠢᠨ ᠤᠬᠠᠭᠠᠯᠠᠵᠤ ᠰᠡᠲᠦᠭ᠌ᠰᠡᠨ ᠦᠢᠯᠡᠲᠦᠯ ᠭᠠᠪᠢᠶᠠᠶ᠋ᠢ ᠬᠠᠷᠢᠨ ᠦᠭᠡᠢᠰᠭᠡᠬᠦ᠌ᠶ᠋ᠢᠨ ᠠᠷᠭᠠ ᠦᠭᠡᠢ᠃ ᠮᠦᠨ ᠲᠡᠲᠡᠨᠡᠷᠤᠨ ᠤᠬᠠᠭᠠᠯᠠᠯ ᠰᠡᠲᠦᠯᠭᠡᠪᠠᠷ᠂ ᠬᠦᠪᠡᠭᠡᠲᠦ ᠴᠠᠭᠠᠨ ᠬᠤᠱᠢᠭᠤᠨᠤ ᠬᠤᠱᠢᠭᠤᠨ ᠲᠦᠪᠤᠨ ᠨᠡᠷᠡᠶ᠋ᠢ 《ᠮᠢᠩᠭᠠᠨᠳᠤ ᠪᠠᠯᠭᠠᠰᠤ》 ᠬᠡᠮᠡᠨ ᠬᠠᠯᠠᠵᠤ᠂ ᠲᠤᠮᠲᠠᠳᠤ ᠤᠯᠤᠰᠤᠨ ᠱᠢᠨᠵᠢᠯᠡᠬᠦ᠌ ᠤᠬᠠᠭᠠᠨᠤ ᠬᠦᠷᠢᠶᠡᠯᠡᠩ ᠪᠤᠯᠤᠨ ᠤᠯᠤᠰᠤᠨ ᠤᠳᠤᠨ ᠤᠷᠤᠨᠤ ᠬᠦᠷᠢᠶᠡᠯᠡᠩ 4500 ᠲᠦᠮᠡᠨ ᠲᠦᠬᠦᠷᠢᠭᠤᠨ ᠪᠡᠯᠡ ᠤᠷᠤᠭᠤᠯᠵᠤ᠂ ᠱᠢᠯᠤᠭᠤᠨ ᠴᠠᠭᠠᠨ ᠬᠤᠱᠢᠭᠤᠨᠳᠤ ᠤᠳᠤᠨ ᠤᠷᠤᠨᠤ ᠠᠵᠢᠬ᠍ᠯᠠᠯᠲᠠᠶ᠋ᠢᠨ ᠦᠷᠲᠡᠭᠡ ᠪᠠᠢᠭᠤᠯᠵᠤ᠂ ᠱᠢᠯᠤᠭᠤᠨ ᠴᠠᠭᠠᠨ ᠬᠤᠱᠢᠭᠤᠨᠤ ᠨᠡᠷᠡ ᠠᠯᠲᠠᠷᠱᠢᠯᠢ ᠶᠡᠬᠡᠪᠡᠷ ᠮᠠᠨᠳᠤᠭᠤᠯᠤᠬ᠍ᠰᠠᠨ ᠪᠠᠢᠨᠠ᠃ ᠡᠨᠡ ᠪᠤᠯ ᠲᠠᠷᠤᠢ ᠪᠠᠯᠵᠢᠨᠢᠮᠠᠶ᠋ᠢᠨ 《ᠡᠷᠲᠡᠮ》᠂ ᠪᠠᠯᠵᠢᠨᠢᠮᠠᠶ᠋ᠢᠨ 《ᠠᠪᠲᠠᠯ》᠃
ᠪᠠᠯᠵᠢᠨᠢᠮᠠ ᠪᠠᠭ᠍ᠰᠢᠲᠠᠨᠤ ᠪᠦᠲᠦᠭᠡᠯᠤᠳ
ᠱᠢᠨᠡ ᠵᠠᠭᠤᠨᠳᠤ ᠤᠷᠤᠬ᠍ᠰᠠᠨ ᠲᠡᠷᠡ ᠵᠢᠯ ᠪᠠᠯᠵᠢᠨᠢᠮᠠ ᠭᠤᠸᠠᠢ 62 ᠨᠠᠰᠤᠳᠠᠢ᠃ ᠡᠩᠤᠨ ᠵᠦᠢᠪᠠᠷ ᠪᠤᠯ ᠡᠨᠡ ᠨᠠᠰᠤᠨᠤ ᠦᠨᠲᠦᠷᠯᠢᠭᠲᠤ ᠭᠠᠷᠤᠬ᠍ᠰᠠᠳ ᠦᠷᠡᠠᠴᠠ ᠭᠠᠷᠤᠬ᠍ᠰᠠᠨ ᠦᠷᠡᠪᠠᠨ ᠡᠪᠦᠲᠦᠭ ᠲᠤᠭᠤᠷᠢᠭᠤᠯᠤᠨ ᠦᠷᠪᠡᠭᠡᠶ᠋ᠢᠨᠢ ᠦᠨᠦᠷᠯᠡᠨ᠂ ᠦᠲᠡᠯᠦᠭᠡ ᠨᠠᠰᠤᠨᠤ ᠬᠠᠪᠤ ᠵᠢᠷᠭᠠᠯᠢ ᠡᠳ᠋ᠯᠡᠵᠦ᠍ ᠰᠠᠭᠤᠨᠠ᠃ ᠭᠡᠪᠡᠴᠦ᠍ ᠪᠠᠯᠵᠢᠨᠢᠮᠠ ᠭᠡᠲᠡᠭ ᠬᠦᠮᠦᠨ ᠭᠠᠷ ᠬᠤᠮᠢᠵᠤ ᠵᠦᠭᠡᠷ ᠰᠠᠭᠤᠵᠤ ᠴᠢᠲᠠᠲᠠᠭ ᠦᠭᠡᠢ᠃ ᠲᠡᠷᠡᠪᠠᠷ ᠱᠢᠨᠡ ᠵᠠᠭᠤᠨᠢᠶᠠᠷ ᠪᠡᠯᠭᠡ ᠲᠡᠮᠲᠡᠭ ᠪᠤᠯᠭᠠᠵᠤ᠂ ᠠᠵᠢᠯ ᠦᠢᠯᠡᠰᠤᠨᠢᠶᠠᠨ ᠱᠢᠨᠡ ᠠᠶᠠᠨᠳᠤ ᠮᠤᠷᠲᠠᠪᠠ᠃ 1995 ᠤᠨᠤ 12 ᠰᠠᠷᠠᠶ᠋ᠢᠨ 31 ᠤ ᠡᠲᠦᠷ᠂ ᠠᠮᠧᠷᠢᠺᠠᠶ᠋ᠢᠨ 《ᠸᠠᠱᠢᠩᠲ᠋ᠤᠨ ᠫᠤᠰᠲ ᠰᠤᠨᠢᠨ》 ᠠᠴᠠ 《ᠬᠡᠨ ᠪᠦᠮᠪᠦᠷᠴᠡᠭᠢ ᠵᠢᠵᠢᠭ᠌ᠷᠡᠬᠦᠯᠵᠦ᠍᠂ ᠶᠢᠷᠲᠢᠨᠴᠦᠶ᠋ᠢ ᠤᠢᠷᠠᠲᠤᠭᠤᠯᠤᠬ᠍ᠰᠠᠨ ᠪᠤᠢ》 ᠭᠡᠬᠦ᠌ ᠵᠠᠷᠴᠢᠮᠢᠶᠠᠷ ᠬᠦᠮᠦᠨ ᠲᠦᠷᠦᠯᠬᠢᠲᠡᠨᠤ ᠪᠤᠯᠪᠠᠰᠤᠨᠤ ᠲᠡᠦᠬᠡᠨ ᠲᠡᠭᠡᠷᠡᠬᠢ ᠬᠤᠶᠠᠳᠤᠭᠠᠷ ᠮᠢᠩᠭᠠᠨᠤ ᠲᠤᠨᠵᠢ ᠬᠦᠮᠦᠨᠢ ᠱᠢᠯᠭᠠᠷᠠᠭᠤᠯᠤᠬ᠍ᠰᠠᠨᠳᠤ ᠴᠢᠩᠬᠢᠰ ᠬᠠᠭᠠᠨ ᠨᠢᠬᠡᠲᠦᠭᠡᠷᠲᠤ ᠲᠤᠲᠤᠷᠠᠬ᠍ᠰᠠᠨ ᠶᠠᠪᠤᠲᠠᠯᠨᠢ ᠴᠢᠩᠭᠢᠰ ᠬᠠᠭᠠᠨᠤ ᠲᠦᠷᠪᠡᠲᠦᠭᠡᠷ ᠬᠦᠦ ᠲᠤᠯᠤᠢᠶ᠋ᠢᠨ 33 ᠳ᠋ᠤᠭᠠᠷ ᠦᠶᠡᠶ᠋ᠢᠨ ᠬᠤᠢᠴᠢᠰ᠂ ᠪᠤᠷᠵᠢᠬᠢᠨ ᠤᠪᠤᠭᠤᠨ ᠪᠠᠯᠵᠢᠨᠢᠮᠠᠶ᠋ᠢᠨ ᠡᠪᠴᠢᠬᠦᠦ ᠲᠦᠬᠦᠷᠡᠩ ᠬᠠᠯᠠᠭᠤᠨ ᠴᠢᠰᠤᠶ᠋ᠢ ᠤᠷᠬᠢᠯᠤᠭᠤᠯᠵᠤ᠂ ᠡᠪᠦᠭᠡ ᠲᠡᠭᠡᠲᠦᠰᠤᠨᠢᠶᠠᠨ ᠤᠯᠠ ᠮᠦᠷᠢ ᠬᠠᠢᠬᠤ ᠤᠷᠲᠤ ᠠᠶᠠᠨᠳᠤ ᠦᠢᠯᠡᠰᠤᠨ ᠵᠢᠯᠤᠭᠤ ᠰᠤᠩᠭᠠᠪᠠ᠃ ᠲᠡᠭᠦᠨᠠᠴᠠ ᠨᠠᠭᠠᠱᠢᠬᠢ ᠬᠤᠷᠢ ᠭᠠᠷᠤᠢ ᠵᠢᠯᠤᠨ ᠲᠤᠷᠰᠢ ᠪᠠᠯᠵᠢᠨᠢᠮᠠ ᠭᠤᠸᠠᠢ ᠭᠡᠷᠭᠡᠢ ᠵᠠᠩ ᠵᠶ᠋ᠢ ᠱᠢᠶᠠᠲᠠᠢᠪᠠᠨ ᠬᠠᠮᠳᠤ ᠲᠠᠪᠢ ᠵᠢᠷᠠᠨ ᠤᠯᠤᠰ ᠭᠦᠷᠦᠨᠢᠶᠠᠷ ᠶᠠᠪᠤᠵᠤ᠂ ᠴᠢᠩᠭᠢᠰ ᠬᠠᠭᠠᠨᠤ ᠲᠤᠬᠠᠢ ᠪᠠ ᠴᠢᠩᠭᠢᠰ ᠬᠠᠭᠠᠨᠯᠤᠭᠠ ᠬᠤᠯᠪᠤᠬ᠍ᠲᠠᠯ ᠪᠦᠬᠦᠢ ᠨᠤᠮ ᠪᠢᠴᠢᠭᠢ 15000 ᠭᠠᠷᠤᠢ ᠱᠢᠷᠬᠡᠭ ᠴᠤᠭ᠍ᠯᠠᠭᠤᠯᠵᠠᠢ᠃ ᠡᠨᠡ ᠬᠦ᠌ ᠶᠠᠪᠤᠴᠠᠳᠤ ᠬᠦᠷᠦᠩᠭᠡ ᠮᠦᠩᠭᠦᠪᠠᠨ ᠬᠦᠨᠲᠤᠷᠦᠭ᠌ᠰᠠᠨ ᠴᠤ᠌ ᠬᠡᠦᠬᠡᠳ ᠠᠴᠢᠷᠢᠶᠠᠨ ᠲᠠᠢᠴᠢᠯᠠᠵᠤ᠂ ᠬᠦᠴᠢᠷ ᠪᠡᠷᠬᠡᠱᠢᠶᠡᠯᠢ ᠢᠯᠠᠨ ᠲᠠᠪᠠᠭ᠍ᠰᠠᠨᠢ ᠨᠢᠭᠡᠳ ᠨᠢᠭᠡᠳ ᠲᠤᠭᠠᠴᠠᠪᠠᠯ ᠦᠭᠡ ᠤᠯᠠᠳᠠᠨᠠ᠃
《ᠴᠢᠩᠭᠢᠰ ᠬᠠᠭᠠᠨ ᠪᠤᠯ ᠮᠢᠨᠤ ᠰᠡᠳᠭᠢᠯ ᠵᠢᠷᠤᠬᠡᠨᠤ ᠱᠢᠲᠦᠯᠭᠡ᠂ ᠴᠢᠩᠭᠢᠰᠤᠨ ᠲᠤᠬᠠᠢ ᠨᠤᠮ ᠴᠤᠭ᠍ᠯᠠᠭᠤᠯᠵᠤ ᠬᠠᠳᠠᠭᠠᠯᠠᠬᠤ᠂ ᠴᠢᠩᠭᠢᠰ ᠬᠠᠭᠠᠨᠤ ᠲᠤᠬᠠᠢ ᠰᠤᠳᠤᠯᠭᠠ ᠬᠢᠬᠦ᠌ᠨᠢ ᠮᠢᠨᠤ ᠨᠢᠭᠡ ᠨᠠᠰᠤᠨᠤ ᠬᠦᠭᠡᠭᠡᠴᠡᠯᠳᠦᠯ᠃ ᠪᠢ ᠵᠠᠪᠠᠯ ᠮᠠᠰᠢ ᠴᠢᠬᠤᠯᠠ ᠲᠤᠮᠤ᠂ ᠮᠠᠰᠢ ᠤᠴᠢᠷ ᠠᠭᠤᠯᠭᠠᠲᠠᠢ ᠨᠢᠭᠡ ᠶᠠᠪᠤᠲᠠᠯ ᠬᠢᠵᠤ ᠦᠯᠡᠲᠡᠭᠡᠨᠡ》᠂ ᠪᠠᠯᠵᠢᠨᠢᠮᠠ ᠢᠩᠭᠢᠵᠦ᠍ ᠬᠡᠯᠡᠭ᠌ᠰᠡᠨ᠂ ᠮᠦᠨ ᠢᠩᠭᠢᠵᠦ᠍ ᠬᠢᠭ᠌ᠰᠡᠨ᠃ ᠴᠢᠩᠭᠢᠰ ᠬᠠᠭᠠᠨᠤ ᠲᠤᠬᠠᠢ ᠪᠠ ᠴᠢᠩᠭᠢᠰ ᠬᠠᠭᠠᠨᠯᠤᠭᠠ ᠬᠤᠯᠪᠤᠬ᠍ᠲᠠᠯ ᠪᠦᠬᠦᠢ ᠨᠤᠮ ᠪᠢᠴᠢᠭᠢ ᠴᠤᠬ᠍ᠯᠠᠭᠤᠯᠤᠬ᠍ᠰᠠᠨᠨᠢ ᠪᠠᠯᠵᠢᠨᠢᠮᠠᠶ᠋ᠢᠨ ᠡᠨᠡ ᠨᠠᠰᠤᠨᠤ ᠠᠵᠢᠯ ᠦᠢᠯᠡᠰᠤᠨ ᠬᠢᠨᠢ ᠨᠤᠶᠠᠨ ᠤᠷᠬᠢᠯ ᠪᠤᠯᠬᠤ ᠰᠠᠨ᠃ ᠡᠬᠦᠨᠳᠤ ᠲᠤᠮᠲᠠ᠂ ᠪᠠᠯᠵᠢᠨᠢᠮᠠ ᠤᠬᠠᠭᠠᠯᠠᠵᠤ ᠲᠦᠰᠦᠪᠯᠡᠬᠦ᠌ ᠤᠷᠠ ᠠᠪᠢᠶᠠᠰ᠂ ᠡᠷᠲᠡᠮ ᠴᠢᠲᠠᠪᠤᠷᠢᠪᠠᠨ ᠴᠤ᠌ ᠭᠤᠢᠲᠠ ᠪᠠᠲᠠᠷᠠᠭᠤᠯᠤᠬ᠍ᠰᠠᠨ ᠪᠠᠢᠨᠠ᠃ ᠴᠢᠩᠭᠢᠰ ᠬᠠᠭᠠᠨᠤ ᠲᠤᠬᠠᠢ ᠪᠠ ᠴᠢᠩᠭᠢᠰ ᠬᠠᠭᠠᠨᠯᠤᠭᠠ ᠬᠤᠯᠪᠤᠬ᠍ᠲᠠᠯ ᠪᠦᠬᠦᠢ ᠨᠤᠮ ᠪᠢᠴᠢᠭᠢ ᠴᠤᠭ᠍ᠯᠠᠭᠤᠯᠤᠬ᠍ᠰᠠᠨ ᠲᠤᠭᠠ ᠬᠡᠮᠵᠢᠶᠡᠪᠠᠷ ᠲᠡᠬᠦᠨᠯᠦᠭᠡ ᠡᠭᠡᠮ ᠰᠠᠴᠠᠭᠤᠯᠤᠬ᠍ᠴᠢ ᠶᠢᠷᠲᠢᠨᠴᠦᠳᠤ ᠠᠯᠠᠭᠠ᠃ ᠲᠡᠭᠡᠬᠦ᠌ ᠮᠦᠷᠲᠡᠭᠡᠨ ᠪᠠᠯᠵᠢᠨᠢᠮᠠᠶ᠋ᠢᠨ ᠨᠤᠮᠤᠨ ᠬᠠᠲᠠᠭᠠᠯᠠᠮᠵᠢ ᠬᠠᠷᠢᠴᠠᠭᠤᠯᠦᠰᠢ ᠦᠭᠡᠢ᠂ ᠲᠠᠪᠲᠠᠭ᠍ᠲᠠᠰᠢ ᠦᠭᠡᠢ ᠬᠡᠮᠵᠢᠶᠡᠨᠳᠤ ᠬᠦᠷᠦᠭ᠌ᠰᠡᠨ ᠪᠠᠢᠲᠠᠭ᠃ ᠡᠬᠦᠨᠤ ᠤᠴᠢᠷᠨᠢ ᠭᠡᠪᠡᠯ᠂ ᠪᠠᠯᠵᠢᠨᠢᠮᠠᠶ᠋ᠢᠨ ᠴᠤᠭ᠍ᠯᠠᠭᠤᠯᠤᠬ᠍ᠰᠠᠨᠨ ᠵᠠᠷᠢᠮ ᠨᠤᠮᠨᠢ 《ᠭᠠᠵᠠᠷ ᠲᠡᠭᠡᠷᠡᠬᠢ ᠭᠠᠭ᠍ᠴᠠ ᠲᠡᠪᠲᠡᠷ》᠂ ᠵᠠᠷᠢᠮᠨᠢ ᠨᠤᠮᠤᠨ ᠵᠤᠬᠢᠶᠠᠬ᠍ᠴᠢᠶ᠋ᠢᠨ ᠠᠮᠢᠲᠤ ᠰᠡᠷᠡᠬᠦᠨ ᠦᠶᠡᠶ᠋ᠢᠨ ᠭᠠᠷ ᠪᠢᠴᠢᠮᠡᠯᠤᠨ ᠦᠲᠡᠪᠦᠷᠢ᠂ ᠵᠠᠷᠢᠮᠨᠢ ᠲᠡᠭᠡᠷᠡ ᠵᠠᠭᠤᠨᠤ ᠭᠤᠴᠢ ᠲᠦᠴᠢᠭᠡᠳ ᠤᠨᠤ ᠦᠶᠡᠶ᠋ᠢᠨ ᠭᠠᠷ ᠬᠠᠭᠤᠯᠪᠤᠷᠢ᠃ ᠶᠠᠷᠢᠶᠠᠨ ᠦᠭᠡᠢ ᠬᠤᠵᠢᠮᠤᠨ ᠬᠦᠮᠦᠰ ᠲᠡᠯᠡᠬᠡᠢᠶ᠋ᠢᠨ ᠲᠠᠪᠢ᠂ ᠵᠢᠷᠠᠨ ᠤᠯᠤᠰ ᠪᠠᠢᠳᠤᠭᠠᠢ᠂ ᠵᠠᠭᠤᠨ ᠤᠯᠤᠰᠲᠤ ᠴᠤ᠌ ᠤᠴᠢᠵᠤ ᠪᠤᠯᠤᠨᠠ᠃ ᠭᠡᠪᠡᠴᠦ᠍ ᠡᠲᠡᠭᠡᠷ ᠵᠦᠢᠯᠢ ᠲᠠᠬᠢᠭᠠᠳ ᠤᠯᠤᠨᠠ ᠭᠡᠲᠡᠭ ᠴᠢᠨᠢ ᠴᠢᠲᠠᠰᠢ ᠦᠭᠡᠢ ᠬᠡᠷᠡᠭ᠃
《ᠨᠤᠮ ᠬᠠᠲᠠᠭᠠᠯᠠᠬᠤ ᠢᠨᠤ ᠤᠩᠱᠢᠬᠤᠶ᠋ᠢᠨ ᠲᠦᠯᠦᠭᠡ᠂ ᠨᠤᠮ ᠤᠩᠱᠢᠬᠤ ᠢᠨᠤ ᠬᠡᠷᠡᠭ᠌ᠯᠡᠬᠦ᠌ᠶ᠋ᠢᠨ ᠲᠦᠯᠦᠭᠡ᠂ ᠡᠨᠡ ᠪᠤᠯᠪᠠᠰᠤ ᠨᠤᠮ ᠬᠠᠲᠠᠭᠠᠯᠠᠬᠤᠶ᠋ᠢᠨ ᠬᠠᠮᠤᠭᠤᠨ ᠲᠡᠭᠡᠲᠦ ᠠᠨᠢᠰᠤ》 ᠭᠡᠰᠡᠨ ᠦᠭᠡ ᠪᠠᠢᠲᠠᠭ᠃ ᠭᠡᠬᠦ᠌ᠳᠤ᠂ ᠪᠠᠯᠵᠢᠨᠢᠮᠠ ᠭᠤᠸᠠᠢ ᠨᠤᠮ ᠴᠤᠭ᠍ᠯᠠᠭᠤᠯᠬᠤᠶ᠋ᠢᠨ ᠲᠦᠯᠦᠭᠡ ᠴᠤᠭ᠍ᠯᠠᠭᠤᠯᠤᠬ᠍ᠰᠠᠨ ᠪᠢᠰᠢ᠂ ᠬᠦᠮᠦᠷᠬᠡᠳᠡᠭᠡᠨ ᠤᠪᠤᠭᠠᠯᠠᠭᠠᠳ ᠱᠠᠬ᠍ᠰᠢᠭᠠᠳ ᠰᠠᠭᠤᠬ᠍ᠰᠠᠨ ᠪᠢᠰᠢ᠂ ᠬᠠᠷᠢᠨ ᠡᠨᠡ 《ᠠᠯᠲᠠᠨ ᠠᠭᠤᠷᠬᠠᠢ》 ᠶ᠋ᠢ ᠨᠡᠬᠡᠭᠡᠨ ᠠᠱᠢᠬ᠍ᠯᠠᠵᠤ᠂ ᠨᠡᠢᠭᠡᠮᠤᠨ ᠦᠷᠡ ᠨᠦᠯᠦᠭᠡ ᠬᠢᠭᠡᠳ ᠠᠵᠤ ᠠᠬᠤᠢᠶ᠋ᠢᠨ ᠦᠷᠡ ᠠᠱᠢᠭᠢ ᠬᠠᠮᠤᠭᠤᠨ ᠶᠡᠭᠡ ᠬᠡᠮᠵᠢᠶᠡᠨᠳᠤ ᠬᠦᠷᠭᠡᠵᠦ᠍᠂ 《ᠶᠠᠭᠤᠮᠠᠪᠠᠨ ᠶᠠᠭᠤᠮᠠ ᠪᠤᠯᠭᠠᠵᠤ》 ᠴᠢᠲᠠᠬ᠍ᠰᠠᠨ ᠬᠦᠮᠦᠨ᠃ ᠡᠨᠡ ᠠᠭᠤᠯᠭᠠᠠᠴᠠ ᠬᠡᠯᠡᠪᠡᠯ᠂ ᠪᠠᠯᠵᠢᠨᠢᠮᠠ ᠡᠩᠤᠨ 《ᠨᠤᠮ ᠴᠤᠭ᠍ᠯᠠᠭᠤᠯᠤᠬ᠍ᠴᠢ》᠂ ᠲᠡᠷᠡᠴᠢᠯᠡᠨ ᠰᠤᠳᠤᠯᠭᠠᠲᠠᠨ᠂ ᠡᠷᠲᠡᠮᠲᠡᠨᠤ ᠲᠡᠭ᠌ᠲᠡᠷᠠᠴᠠ ᠦᠭ᠌ᠰᠦᠬᠦᠯᠵᠦ᠍᠂ ᠪᠤᠲᠤᠯᠭᠠᠲᠠᠨᠤ ᠲᠦᠪᠱᠢᠨᠳᠤ ᠬᠦᠷᠦᠭ᠌ᠰᠡᠨ ᠪᠠᠢᠲᠠᠭ᠃ 《ᠤᠬᠠᠭᠠᠯᠠᠵᠤ ᠲᠦᠰᠦᠪᠯᠡᠬᠦ᠌》 ᠶ᠋ᠢᠨ ᠴᠢᠮᠦᠭᠡᠨᠢ ᠪᠤᠲᠤᠯᠭᠠᠳᠤ ᠪᠤᠢ᠃ ᠪᠤᠳᠤᠵᠤ ᠭᠠᠷᠪᠠᠯ ᠵᠠᠮ ᠭᠠᠷᠤᠨᠠ᠂ ᠪᠤᠲᠤᠯᠭᠠ ᠬᠡᠲᠦ ᠬᠤᠯᠠ ᠪᠤᠯᠬᠤ ᠲᠤᠰᠤᠮᠢᠶᠠᠨ ᠵᠠᠮ ᠨᠡᠩ ᠬᠤᠯᠠ ᠪᠤᠯᠤᠨᠠ᠃
ᠡᠲᠡᠭᠡᠷ ᠵᠢᠯᠤᠳᠲᠤ᠌᠂ ᠪᠠᠯᠵᠢᠨᠢᠮᠠ ᠭᠤᠸᠠᠢ ᠡᠨᠡ 《ᠠᠯᠲᠠᠨ ᠠᠭᠤᠷᠬᠠᠢ》 ᠶ᠋ᠢ ᠨᠡᠬᠡᠭᠡᠨ ᠠᠱᠢᠬ᠍ᠯᠠᠵᠤ᠂ ᠤᠷᠢᠳ ᠬᠤᠵᠢᠳ ᠬᠡᠲᠦᠨ ᠠᠷᠪᠠᠨ ᠵᠦᠢᠯᠤᠨ ᠨᠤᠮ ᠨᠠᠢᠷᠠᠭᠤᠯᠵᠤ ᠬᠡᠪᠯᠡᠬᠦᠯᠦᠭ᠌ᠰᠡᠨ ᠶᠤᠮ᠃ ᠡᠬᠦᠨᠤ ᠲᠤᠲᠤᠷᠠᠠᠴᠠ ᠬᠠᠮᠤᠭᠤᠨ ᠲᠦᠷᠦᠬᠦᠨᠳᠤ ᠲᠤᠷᠠᠳᠤᠬ᠍ᠲᠠᠬᠤ᠂ ᠮᠦᠨ ᠨᠡᠷᠡ ᠨᠦᠯᠦᠭᠡᠪᠠᠷ ᠬᠠᠮᠤᠭᠤᠨ ᠦᠷᠭᠡᠨ ᠲᠡᠯᠭᠡᠷᠨᠢ ᠭᠡᠪᠡᠯ᠂ ᠪᠠᠯᠵᠢᠨᠢᠮᠠ᠂ ᠵᠠᠩ ᠵᠶ᠋ᠢ ᠱᠢᠶᠠ᠂ ᠡᠷᠲᠡᠨᠢᠵᠠᠪ ᠨᠠᠷᠤᠨ 8 ᠵᠢᠯᠤᠨ ᠴᠠᠭ ᠤᠷᠤᠭᠤᠯᠵᠤ ᠡᠮᠬᠢᠳᠭᠡᠨ ᠨᠠᠢᠷᠠᠭᠤᠯᠵᠤ ᠭᠠᠷᠭᠠᠬ᠍ᠰᠠᠨ 《ᠮᠢᠩᠭᠠᠨ ᠵᠢᠯᠤᠨ ᠲᠤᠨᠵᠢ ᠬᠦᠮᠦᠨ — ᠲᠡᠯᠡᠬᠡᠢᠶ᠋ᠢᠨ ᠲᠤᠮᠤᠴᠤᠤᠯᠤᠨ ᠬᠠᠷᠠᠭᠠᠨᠳᠠᠬᠢ ᠴᠢᠩᠭᠢᠰ ᠬᠠᠭᠠᠨ》 ᠭᠡᠲᠡᠭ 80 ᠲᠦᠮᠡᠨ ᠦᠰᠦᠭ ᠪᠦᠬᠦᠢ ᠠᠪᠤᠷᠭᠤ ᠪᠦᠲᠦᠭᠡᠯ ᠪᠤᠯᠬᠤ ᠶᠤᠮ᠃ ᠲᠤᠰ ᠨᠤᠮᠤᠨ ᠠᠩᠬᠠᠨᠤ ᠬᠡᠪᠯᠡᠯᠳᠡᠭᠡᠨ 10000 ᠱᠢᠷᠬᠡᠭ ᠬᠡᠪᠯᠡᠵᠦ᠍᠂ ᠲᠠᠬᠢᠵᠤ ᠬᠡᠪᠯᠡᠭ᠌ᠰᠡᠨ ᠪᠠ ᠮᠤᠩᠭᠤᠯᠴᠢᠯᠠᠵᠤ ᠬᠡᠪᠯᠡᠬᠦᠯᠦᠭ᠌ᠰᠡᠨ ᠪᠦᠬᠦ᠌ ᠲᠤᠭᠠ ᠨᠡᠢᠯᠡᠭᠡᠳ 30000 ᠱᠢᠷᠬᠡᠭᠲᠤ ᠬᠦᠷᠴᠦ᠍᠂ ᠨᠤᠮ ᠬᠡᠪᠯᠡᠯᠤᠨ ᠲᠡᠦᠬᠡᠨᠳᠤ ᠱᠢᠨᠡ ᠲᠡᠮᠲᠡᠭ᠌ᠯᠡᠯᠢ ᠡᠭᠦᠳᠴᠦ᠍᠂ ᠤᠷᠤᠨᠤ ᠭᠠᠲᠠᠨᠠ ᠲᠤᠲᠤᠨᠠ᠂ ᠤᠯᠤᠰᠤᠨ ᠲᠤᠲᠤᠨᠠ ᠭᠠᠲᠠᠨᠠ ᠮᠠᠰᠢ ᠶᠡᠭᠡ ᠨᠦᠯᠦᠭᠡ ᠲᠤᠰᠭᠠᠯ ᠭᠠᠷᠤᠬ᠍ᠰᠠᠨ ᠪᠦᠭᠡᠳ ᠲᠤᠰ ᠨᠤᠮᠨᠢ ᠦᠪᠦᠷ ᠮᠤᠩᠭᠤᠯᠤᠨ ᠦᠪᠡᠷᠲᠡᠭᠡᠨ ᠵᠠᠰᠠᠬᠤ ᠤᠷᠤᠨ ᠬᠢᠭᠡᠳ ᠬᠦᠬᠡᠬᠤᠲᠠᠶ᠋ᠢᠨ ᠬᠤᠶᠠᠷ ᠲᠡᠰᠤᠨ ᠠᠷᠠᠳᠤᠨ ᠵᠠᠰᠠᠭᠤᠨ ᠤᠷᠲᠤᠨᠠᠴᠠ ᠬᠦᠨᠲᠦᠲᠦ ᠵᠤᠴᠢᠳᠲᠤ ᠪᠡᠯᠡᠭ᠌ᠯᠡᠬᠦ᠌ ᠭᠠᠷ ᠪᠡᠯᠡᠭᠤᠨ ᠬᠤᠪᠢᠳᠤ ᠲᠤᠰ ᠨᠤᠮ ᠤᠯᠪᠠᠰᠤ ᠵᠤᠬᠢᠬᠤ ᠡᠷᠬᠢᠮ ᠲᠡᠭᠡᠲᠦ ᠬᠦᠨᠲᠦᠳᠭᠡᠯᠤᠨ ᠪᠠᠢᠷᠢᠳᠤ ᠰᠠᠭᠠᠲᠠᠬ᠍ᠰᠠᠨ ᠭᠡᠯᠲᠡᠢ᠃ ᠲᠡᠭᠦᠨᠠᠴᠠ ᠤᠷᠭᠤᠭᠤᠯᠤᠭᠠᠳ᠂ ᠪᠠᠯᠵᠢᠨᠢᠮᠠ᠂ ᠵᠠᠩ ᠵᠶ᠋ᠢ ᠱᠢᠶᠠ ᠨᠠᠷᠤᠨ ᠭᠠᠷᠢᠶᠠᠷ ᠡᠮᠬᠢᠳᠭᠡᠨ ᠨᠠᠢᠷᠠᠭᠤᠯᠤᠬ᠍ᠰᠠᠨ 《ᠭᠠᠲᠠᠭᠠᠳᠤᠶ᠋ᠢᠨ ᠬᠦᠮᠦᠰᠤᠨ ᠬᠠᠷᠠᠭᠠᠨᠳᠠᠬᠢ ᠴᠢᠩᠭᠢᠰ ᠬᠠᠭᠠᠨ》᠂ 《ᠴᠢᠩᠭᠢᠰ ᠬᠠᠭᠠᠨᠤ ᠪᠦᠲᠦᠭᠡᠭ᠌ᠰᠡᠨ ᠲᠡᠯᠡᠬᠡᠢᠶ᠋ᠢᠨ ᠠᠷᠪᠠᠨ ᠬᠤᠶᠠᠷ ᠲᠤᠨᠵᠢ》 （ᠤᠯᠤᠰᠤᠨ ᠲᠤᠲᠤᠭᠠᠳᠤᠬᠢ 9 ᠲᠦᠷᠦᠯᠤᠨ ᠦᠰᠦᠭ ᠪᠢᠴᠢᠭ）᠂ 《ᠴᠢᠩᠭᠢᠰ ᠬᠠᠭᠠᠨᠤ ᠰᠤᠩᠭᠤᠲᠠᠭ ᠰᠤᠷᠪᠤᠯᠵᠢ ᠪᠢᠴᠢᠭ ᠮᠠᠲ᠋ᠧᠷᠢᠶᠠᠯᠤᠨ ᠡᠮᠬᠢᠳᠭᠡᠯ》᠂ 《ᠴᠢᠩᠭᠢᠰ ᠬᠠᠭᠠᠨᠤ ᠵᠢᠷᠤᠬ᠍ᠲᠤ ᠨᠠᠮᠲᠠᠷ》᠂ 《ᠳ᠋ᠠᠷᠠ ᠡᠬᠡ — ᠠᠯᠤᠨ ᠭᠤᠸᠠ》᠂ 《ᠲᠤᠷᠤᠨᠠᠳᠠᠬᠢᠨᠠᠴᠠ ᠢᠷᠡᠭ᠌ᠰᠡᠨ ᠱᠢᠲᠦᠯᠭᠡ》᠂ 《ᠲᠤᠮᠲᠠᠳᠤ ᠤᠯᠤᠰᠤᠨ ᠲᠡᠦᠬᠡᠨᠳᠠᠬᠢ ᠠᠭᠤᠤ ᠶᠡᠭᠡ ᠬᠠᠭᠠᠨᠳᠤ ᠬᠦᠷᠦᠨ — ᠶᠤᠸᠠᠨ ᠤᠯᠤᠰ》 ᠵᠡᠷᠭᠡ ᠠᠷᠪᠠᠭᠠᠳ ᠨᠤᠮᠨᠤᠭᠤᠳ ᠠᠷᠤ ᠠᠷᠤᠠᠴᠠᠪᠠᠨ ᠬᠡᠪᠯᠡᠭ᠌ᠲᠡᠵᠡᠢ᠃
ᠡᠬᠦᠨᠤ ᠵᠡᠷᠭᠡᠪᠠᠷ᠂ ᠪᠠᠯᠵᠢᠨᠢᠮᠠ ᠭᠤᠸᠠᠢ ᠬᠠᠭᠠᠨᠤ ᠲᠤᠬᠠᠢ ᠨᠤᠮ ᠪᠢᠴᠢᠭ᠂ ᠬᠦᠷᠦᠭ ᠵᠢᠷᠤᠭ᠂ ᠡᠬᠡ ᠨᠤᠤᠷᠠᠭᠨᠤᠭᠤᠳᠢᠶᠠᠨ ᠨᠡᠢᠭᠡᠮ ᠨᠡᠢᠲᠡᠳᠤ ᠲᠡᠯᠭᠡᠨ ᠦᠵᠡᠬᠦᠯᠬᠦ᠂ ᠲᠠᠨᠢᠭᠤᠯᠬᠤ ᠵᠤᠷᠢᠯᠭᠠᠪᠠᠷ 《ᠴᠢᠩᠭᠢᠰ ᠬᠠᠭᠠᠨᠤ ᠰᠤᠷᠪᠤᠯᠵᠢ ᠪᠢᠴᠢᠭᠤᠨ ᠮᠦᠽᠸᠢ》 ᠪᠠᠢᠭᠤᠯᠬᠤ ᠭᠡᠵᠦ᠍ ᠴᠢᠷᠮᠠᠢᠬ᠍ᠰᠠᠭᠠᠷ ᠪᠠᠢᠭᠠᠳ ᠰᠡᠲᠦᠭ᠌ᠰᠡᠨ ᠶᠠᠪᠤᠲᠠᠯᠨᠢ ᠰᠡᠳᠭᠢᠯᠴᠢᠯᠡᠨ ᠪᠦᠲᠦᠵᠦ᠍᠂ 2013 ᠤᠨᠳᠤ ᠮᠦᠽᠸᠢᠨᠢ ᠡᠬᠦᠲᠡᠪᠠᠨ ᠨᠡᠬᠡᠭᠡᠵᠦ᠍ ᠡᠷᠦᠬᠡᠪᠠᠨ ᠰᠡᠬᠦᠯᠡ᠃ ᠲᠡᠷᠡᠨᠢ ᠪᠠᠯᠵᠢᠨᠢᠮᠠᠶ᠋ᠢᠨ ᠢᠲᠡᠭᠡᠯ ᠪᠢᠱᠢᠷᠡᠯᠢᠶᠠᠷ ᠰᠦᠮᠪᠦᠷᠯᠡᠭ᠌ᠰᠡᠨ ᠮᠦᠩᠬᠡᠶ᠋ᠢᠨ ᠬᠦᠱᠢᠶᠡ᠂ ᠤᠶᠤᠨ ᠰᠠᠨᠠᠭᠠᠨᠤ ᠬᠢᠨᠢ ᠠᠷᠢᠭᠤᠨ ᠲᠠᠬ᠍ᠰᠢᠨ ᠤᠷᠲᠤᠨᠢ ᠪᠤᠯᠤᠬ᠍ᠰᠠᠨ ᠠᠵᠤᠭᠤ᠃ 《ᠴᠢᠩᠭᠢᠰ ᠬᠠᠭᠠᠨᠤ ᠰᠤᠷᠪᠤᠯᠵᠢ ᠪᠢᠴᠢᠭᠤᠨ ᠮᠦᠽᠸᠢ》 ᠳᠤ ᠪᠢ ᠤᠯᠠᠨᠲᠠ ᠤᠴᠢᠲᠠᠭ ᠪᠠᠢᠬ᠍ᠰᠠᠨ᠃ ᠤᠴᠢᠬᠤ ᠪᠤᠯᠭᠠᠨ ᠲᠡᠨᠲᠡ ᠲᠤᠭᠤᠷᠢᠨ ᠦᠵᠡᠭ᠌ᠰᠡᠳ ᠲᠠᠰᠤᠷᠠᠬᠤ ᠦᠭᠡᠢ ᠪᠠᠢᠳᠠᠭ᠃ ᠪᠠᠯᠵᠢᠨᠢᠮᠠ ᠭᠤᠸᠠᠢ ᠮᠦᠽᠸᠢᠶ᠋ᠢᠨᠢᠶᠠᠨ ᠡᠯᠡ ᠲᠠᠰᠤᠭᠢ ᠦᠵᠡᠬᠦᠯᠵᠦ᠍᠂ ᠬᠤᠪᠤᠷ ᠨᠤᠮ᠂ ᠰᠤᠨᠢᠷᠬᠠᠯᠲᠠᠢ ᠨᠤᠮ ᠪᠠ ᠲᠡᠬᠦᠨᠢᠶᠠᠨ ᠴᠤᠬ᠍ᠯᠠᠭᠤᠯᠤᠬ᠍ᠰᠠᠨ ᠦᠯᠢᠭᠡᠷᠨᠦᠭᠦᠳᠢᠶᠠᠨ ᠤᠷᠮᠠᠲᠠᠢ ᠲᠠᠨᠢᠯᠴᠠᠭᠤᠯᠤᠨ ᠶᠠᠷᠢᠬᠤᠳᠤ᠂ ᠲᠤᠬᠠᠢᠶ᠋ᠢᠨ ᠦᠶᠡᠳᠤ ᠨᠤᠮᠤᠨ ᠡᠷᠢᠯᠢᠶᠠᠷ ᠬᠡᠯᠡ ᠠᠮᠠ ᠨᠡᠪᠲᠡᠷᠡᠯᠴᠡᠬᠦ᠌ ᠦᠭᠡᠢ ᠬᠦᠮᠦᠨᠤ ᠭᠠᠵᠠᠷ ᠬᠦᠨᠲᠡᠯᠡᠨ ᠨᠤᠲᠤᠭᠲᠤ ᠲᠦᠭᠡᠷᠢᠵᠤ ᠲᠤᠬ᠍ᠰᠢᠵᠤ᠂ ᠦᠢᠯᠡᠪᠠᠨ ᠦᠵᠡᠵᠦ᠍ ᠦᠰᠦᠪᠠᠨ ᠲᠤᠭᠠᠯᠠᠵᠤ ᠶᠠᠪᠤᠬ᠍ᠰᠠᠨ ᠶᠠᠲᠠᠷᠠᠭᠤ ᠵᠦᠲᠡᠷᠡᠬᠦᠦ ᠶᠠᠪᠤᠲᠠᠯᠤᠳᠨᠢ ᠤᠷᠤ ᠦᠭᠡᠢ ᠤᠮᠠᠷᠲᠠᠭ᠍ᠲᠠᠵᠤ᠂ ᠴᠢᠷᠠᠢᠳᠤᠨᠢ ᠤᠯᠵᠠ ᠤᠮᠤᠭ ᠪᠠᠶᠠᠷ ᠪᠠᠭ᠍ᠠᠲᠤᠯᠤᠨ ᠲᠤᠶᠠᠭᠠ ᠲᠠᠲᠠᠨᠠ ᠪᠢᠯᠡ᠃
《ᠤᠳᠤ ᠬᠦᠭ᠌ᠰᠢᠨ ᠪᠢᠲᠡ ᠬᠤᠶᠠᠭᠤᠯᠠ ᠨᠠᠶᠠ ᠲᠦᠬᠦᠵᠦ᠍ ᠶᠠᠪᠤᠭᠠ ᠤᠯᠤᠰ᠃ ᠪᠢᠲᠡ ᠦᠬᠦᠪᠡᠯ ᠡᠨᠡ ᠮᠦᠽᠸᠢᠶ᠋ᠢ ᠠᠪᠰᠠᠨᠳᠠᠭᠠᠨ ᠠᠪᠤᠭᠠᠳ ᠶᠠᠪᠤᠯᠲᠠᠢ ᠪᠢᠰᠢ᠃ ᠡᠷᠲᠡ ᠤᠷᠤᠢ ᠦᠭᠡᠢ ᠨᠡᠢᠭᠡᠮᠳᠤ ᠲᠤᠱᠢᠶᠠᠨᠠ᠂ ᠰᠠᠢᠨ 〈ᠡᠵᠡᠨ〉 ᠤᠯᠵᠤ ᠦᠭ᠌ᠭᠦᠨᠡ》 ᠭᠡᠵᠦ᠍ ᠪᠠᠯᠵᠢᠨᠢᠮᠠ ᠪᠠᠭ᠍ᠰᠢᠲᠠᠨᠤ ᠰᠡᠬᠦᠯᠤᠨ ᠵᠢᠯᠤᠳᠲᠤ ᠬᠡᠯᠡᠬᠦ᠌ᠶ᠋ᠢᠨᠢ ᠪᠢ ᠨᠢᠭᠡ ᠪᠢᠰᠢ ᠤᠯᠠᠨ ᠤᠲᠠᠭᠠ ᠰᠤᠨᠤᠰᠤᠬ᠍ᠰᠠᠨ ᠶᠤᠮ᠃ ᠲᠡᠭᠡᠭᠡᠳ ᠤᠲᠠᠯ ᠦᠭᠡᠢ ᠮᠦᠽᠸᠢᠪᠠᠨ ᠱᠢᠯᠢᠶ᠋ᠢᠨ ᠭᠤᠤᠯᠤᠨ ᠠᠵᠢᠯ ᠮᠡᠷᠭᠡᠵᠢᠯᠤᠨ ᠲᠡᠭᠡᠲᠦ ᠰᠤᠷᠭᠠᠭᠤᠯᠢᠳᠤ ᠱᠢᠯᠵᠢᠬᠦᠯᠵᠦ᠍ ᠦᠭ᠌ᠭᠦᠯᠡ ᠭᠡᠵᠦ᠍ ᠲᠤᠭᠤᠯᠤᠬ᠍ᠰᠠᠨ ᠰᠠᠨ᠃
ᠪᠠᠯᠵᠢᠨᠢᠮᠠ ᠪᠠᠭ᠍ᠰᠢᠲᠠᠨ ᠦᠨᠡᠬᠡᠷ ᠴᠢᠩᠭᠢᠰ ᠪᠤᠬ᠍ᠲᠠᠶ᠋ᠢ ᠠᠯᠲᠠᠷᠱᠢᠭᠤᠯᠬᠤ᠂ ᠦᠨᠲᠦᠰᠦᠲᠡᠨᠤᠪᠠᠨ ᠲᠡᠦᠬᠡ ᠰᠤᠶᠤᠯᠢᠶᠠᠨ ᠪᠠᠲᠠᠷᠠᠭᠠᠨ ᠬᠦᠭ᠌ᠵᠢᠭᠦᠯᠭᠦᠳᠤ ᠮᠠᠰᠢ ᠴᠢᠬᠤᠯᠠ ᠲᠤᠮᠤ᠂ ᠮᠠᠰᠢ ᠤᠴᠢᠷ ᠠᠭᠤᠯᠭᠠᠲᠠᠢ ᠶᠠᠪᠤᠲᠠᠯ ᠬᠢᠵᠦ᠍ ᠪᠦᠲᠦᠭᠡᠭ᠌ᠰᠡᠨ᠃ ᠴᠢᠩᠭᠢᠰ ᠬᠠᠭᠠᠨᠠᠴᠠ ᠨᠠᠭᠠᠱᠢᠬᠢ 800 ᠭᠠᠷᠤᠢ ᠵᠢᠯᠤᠨ ᠲᠤᠷᠱᠢᠬᠢ ᠲᠡᠭᠡᠲᠦᠰᠤᠨᠢᠶᠠᠨ ᠤᠶᠤᠨ ᠰᠠᠨᠠᠭᠠᠨᠤ ᠬᠦᠷᠦᠩᠭᠡᠶ᠋ᠢ ᠬᠠᠢᠨ ᠴᠤᠭ᠍ᠯᠠᠭᠤᠯᠬᠤ ᠭᠡᠵᠦ᠍ ᠴᠠᠩᠭᠠᠬ᠍ᠰᠠᠨ ᠵᠠᠭᠠᠨᠠ ᠤᠰᠤᠨᠳᠤᠷ ᠵᠢᠳᠭᠦᠯᠡᠬᠦ᠌ ᠮᠡᠲᠦ ᠨᠢᠭᠡᠨ ᠦᠵᠦᠬᠦᠷᠲᠦ ᠰᠡᠳᠭᠢᠯᠢᠶᠠᠷ᠂ ᠲᠠᠢᠯᠤᠭ ᠲᠡᠮᠡᠭᠡ ᠱᠢᠭ ᠲᠠᠪᠠᠭᠢᠶᠠᠨ ᠡᠯᠡᠲᠡᠯᠡ᠂ ᠲᠠᠰ ᠪᠦᠷᠬᠦᠳ ᠱᠢᠭ ᠲᠠᠯᠠᠪᠴᠢᠪᠠᠨ ᠡᠴᠡᠲᠡᠯᠡ ᠪᠠᠷᠢᠮᠲᠠᠯᠠᠯᠢᠶᠠᠷ ᠪᠦᠮᠪᠦᠷᠴᠡᠭᠢ ᠪᠠᠷᠠᠲᠠᠯᠠ ᠱᠢᠬᠠᠮ ᠶᠠᠪᠤᠵᠤ ᠪᠠᠢᠭᠠᠳ ᠡᠢᠮᠦ᠍ ᠠᠭᠤᠤ ᠶᠡᠭᠡ ᠦᠢᠯᠡᠰᠢ ᠪᠦᠲᠦᠭᠡᠭ᠌ᠰᠡᠨ ᠬᠦᠮᠦᠨ ᠪᠠᠯᠵᠢᠨᠢᠮᠠ ᠭᠤᠸᠠᠢᠠᠴᠠ ᠤᠨᠳᠤᠤ ᠬᠡᠲᠦ ᠪᠠᠢᠬᠤ ᠪᠢᠯᠡ？ ᠪᠠᠯᠵᠢᠨᠢᠮᠠ ᠪᠠᠭ᠍ᠰᠢᠲᠠᠨᠤ ᠬᠤᠷᠠᠮᠳᠤᠭᠤᠯᠵᠤ ᠴᠤᠭ᠍ᠯᠠᠭᠤᠯᠤᠬ᠍ᠰᠠᠨ᠂ ᠬᠢᠮᠠᠭᠠᠲᠠᠵᠤ ᠦᠯᠡᠲᠡᠭᠡᠭ᠌ᠰᠡᠨ ᠶᠠᠭᠤᠮᠠᠰᠨᠢ ᠲᠠᠶᠠᠭᠠᠷ ᠮᠤᠩᠭᠤᠯᠴᠤᠳᠲᠠᠭᠠᠨ᠂ ᠲᠡᠷᠡᠴᠢᠯᠡᠨ ᠬᠦᠵᠢ ᠶᠢᠷᠲᠢᠨᠴᠤᠳᠤ ᠶᠠᠨᠲᠠᠰᠢ ᠦᠭᠡᠢ ᠦᠨᠡ ᠦᠷᠲᠡᠭ ᠪᠦᠬᠦᠢ ᠬᠤᠪᠤᠷ ᠨᠠᠨᠳᠢᠨ ᠦᠪ ᠬᠦᠷᠦᠩᠭᠡ ᠪᠤᠯᠵᠤ ᠬᠤᠴᠤᠷᠤᠯᠠ᠃
ᠪᠠᠯᠵᠢᠨᠢᠮᠠ ᠪᠠᠭ᠍ᠰᠢᠲᠠᠨ ᠠᠮᠢᠲᠤ ᠲᠤᠩᠭᠠᠯᠠᠭ ᠪᠠᠢᠬᠤᠳᠠᠭᠠᠨ ᠦᠪᠦᠷ ᠮᠤᠩᠭᠤᠯᠤᠨ ᠦᠪᠡᠷᠲᠡᠭᠡᠨ ᠵᠠᠰᠠᠬᠤ ᠤᠷᠤᠨᠤ ᠠᠷᠠᠳᠤᠨ ᠵᠠᠰᠠᠭᠤᠨ ᠤᠷᠲᠤᠨᠤ ᠠᠯᠲᠠᠨ ᠮᠧᠳᠠᠯᠢᠶᠠᠷ᠂ ᠮᠤᠩᠭᠤᠯ ᠤᠯᠤᠰᠤᠨ 《ᠠᠯᠲᠠᠨ ᠭᠠᠲᠠᠰᠤ》 ᠤᠳᠤᠨ ᠲᠡᠮᠲᠡᠭᠢᠶᠠᠷ ᠡᠩᠭᠡᠷᠢᠶᠠᠨ ᠮᠢᠯᠢᠶᠠᠯᠭᠠᠬ᠍ᠰᠠᠨ᠃ ᠠᠯᠲᠠᠨ ᠮᠧᠳᠠᠯ᠂ ᠠᠯᠲᠠᠨ ᠤᠳᠤᠨ ᠪᠠᠢᠳᠤᠭᠠᠢ᠂ ᠠᠯᠲᠠᠨ ᠬᠦᠱᠢᠶᠡ ᠪᠤᠰᠭᠠᠭᠠᠳ ᠦᠭ᠌ᠬᠦᠳᠤ ᠡᠨᠡ ᠬᠦᠮᠦᠨᠤ ᠭᠠᠪᠢᠶᠠᠳᠤ ᠢᠯᠡᠬᠦᠲᠡᠬᠦ᠌ ᠦᠭᠡᠢ᠃ ᠨᠢᠭᠡ ᠰᠠᠢᠨᠨᠢ ᠡᠨᠡ ᠠᠯᠲᠠᠨ ᠬᠦᠱᠢᠶᠡ ᠠᠯᠢ ᠡᠷᠲᠡ ᠠᠷᠠᠳ ᠲᠦᠮᠡᠨᠤ ᠰᠡᠳᠭᠢᠯᠳᠤ ᠰᠡᠬᠦ᠋ᠢᠨ ᠰᠦᠨᠲᠡᠷᠯᠡᠭ᠌ᠰᠡᠨ ᠪᠠᠢᠲᠠᠭ᠃
《ᠪᠢ ᠶᠠᠭᠠᠷᠠᠭᠠᠳ ᠪᠦᠷ ᠡᠪᠡᠳᠴᠢᠨ ᠬᠦᠷᠬᠦ᠌ ᠵᠠᠪ ᠦᠭᠡᠢ》 ᠭᠡᠵᠦ᠍ ᠬᠡᠯᠡᠭᠡᠳ ᠢᠨᠢᠶᠡᠳᠡᠭ᠂ ᠲᠠᠩᠲᠠ ᠱᠢᠨᠡ ᠰᠡᠳᠦᠪ ᠰᠡᠳᠦᠭᠡᠳ ᠮᠤᠩᠭᠠᠨᠢᠭᠠᠳ ᠬᠦᠶᠦᠲᠡᠭ ᠪᠠᠭ᠍ᠰᠢᠲᠠᠨ ᠮᠠᠨᠢ ᠮᠠᠰᠢ ᠭᠡᠨᠡᠦᠡᠲᠡᠪᠠᠷ ᠶᠠᠪᠤᠭᠠᠳ ᠦᠭ᠌ᠭᠦᠯᠡ᠃ ᠪᠠᠭ᠍ᠰᠢ ᠮᠠᠨᠢ ᠮᠠᠰᠢ ᠵᠦᠲᠡᠷᠡᠭ᠌ᠰᠡᠨ ᠪᠠᠢᠵᠠᠢ ᠱᠢᠦ᠃ ᠰᠠᠢᠨ ᠬᠦᠮᠦᠨᠤ ᠠᠷᠤᠠᠴᠠ ᠬᠡᠨ ᠴᠤ᠌ ᠭᠡᠰᠡᠨ ᠦᠭᠡᠢᠯᠡᠨᠡ᠂ ᠬᠠᠷᠠᠮᠰᠠᠨᠠ᠃ ᠭᠡᠪᠡᠴᠦ᠍ ᠤᠬᠢᠯᠠᠵᠤ ᠢᠷᠡᠵᠦ᠍ ᠤᠬᠢᠯᠠᠭᠤᠯᠵᠤ ᠶᠠᠪᠤᠲᠠᠭ ᠬᠤᠷᠸᠠᠶ᠋ᠢᠨ ᠬᠠᠲᠠᠭᠤ ᠵᠢᠮᠡ ᠶᠤᠮ ᠬᠤᠢᠨᠠ ᠶᠠᠭᠠᠬᠢᠯᠲᠠᠢ ᠪᠢᠯᠡ᠃ ᠪᠠᠯᠵᠢᠨᠢᠮᠠ ᠪᠠᠭ᠍ᠰᠢᠲᠠᠨ ᠮᠠᠨᠢ ᠮᠤᠩᠭᠤᠯᠳᠠᠭᠠᠨ ᠲᠠᠬᠢᠵᠤ ᠢᠷᠡᠵᠦ᠍ ᠵᠠᠶᠠᠭᠠᠰᠠᠢ ᠭᠡᠵᠦ᠍ ᠲᠠᠭᠠᠳᠭᠠᠨ ᠵᠠᠯᠪᠠᠷᠢᠨᠠᠮ！ ᠬᠡᠯᠡᠬᠦ᠌ᠳᠤ᠂ 83 ᠨᠠᠰᠤᠨᠤ ᠦᠨᠲᠦᠷᠯᠢᠭᠲᠤ ᠭᠠᠷᠤᠨᠠ ᠭᠡᠲᠡᠭ ᠮᠦᠨ ᠠᠮᠠᠷ ᠦᠭᠡᠢ᠂ ᠲᠡᠭᠡᠬᠦ᠌ ᠮᠦᠷᠲᠡᠭᠡᠨ ᠲᠡᠷᠡ ᠮᠠᠨᠢ ᠤᠵᠢᠭ ᠡᠪᠡᠳᠴᠢᠨᠳᠤ ᠤᠷᠢᠶᠠᠴᠢᠯᠠᠬ᠍ᠲᠠᠵᠤ ᠤᠲᠠᠭᠠᠨ ᠲᠠᠷᠴᠢᠯᠠᠵᠤ ᠬᠡᠪᠲᠡᠭᠡ ᠦᠭᠡᠢ᠂ ᠦᠪᠡᠷ ᠪᠤᠰᠤᠳᠢ ᠵᠤᠪᠠᠭᠠᠬ᠍ᠰᠠᠨ ᠦᠭᠡᠢ᠂ ᠪᠠᠰᠠ ᠪᠤᠲᠤᠪᠠᠯ ᠪᠤᠶᠠᠨᠲᠠᠢ ᠬᠦᠮᠦᠨ ᠡ᠃
ᠤᠢᠷᠠᠳᠤ ᠪᠠᠯᠵᠢᠨᠢᠮᠠ ᠪᠠᠭ᠍ᠰᠢᠲᠠᠨᠢ ᠬᠡᠲᠦ ᠤᠲᠠᠭᠠ ᠵᠡᠬᠦᠲᠦᠯᠡᠯᠡ᠂ 《ᠵᠢᠷᠦᠬᠡᠨᠠᠴᠠ ᠵᠢᠷᠦᠬᠡᠨᠳᠤ ᠬᠦᠷᠲᠡᠭᠨᠢ ᠬᠠᠢᠷᠠ ᠭᠡᠲᠡᠭ ᠶᠤᠮ᠂ ᠵᠡᠬᠦᠲᠦᠨᠠᠴᠠ ᠵᠡᠬᠦᠲᠦᠨᠳᠤ ᠬᠦᠷᠲᠡᠭᠨᠢ ᠮᠦᠷᠦᠭᠡᠲᠦᠯ ᠭᠡᠲᠡᠭ ᠶᠤᠮ》᠃ ᠰᠠᠢᠨ ᠬᠦᠮᠦᠨᠤ ᠲᠤᠬᠠᠢ ᠰᠠᠢᠬᠠᠨ ᠲᠤᠷᠠᠳᠭᠠᠯ ᠰᠠᠷᠠᠨᠤ ᠭᠡᠷᠡᠯ ᠮᠡᠲᠤ ᠭᠡᠭᠡᠭᠡᠨ᠃
ᠪᠠᠯᠵᠢᠨᠢᠮᠠ ᠪᠠᠭ᠍ᠰᠢᠲᠠᠨ ᠮᠠᠨᠢ ᠠᠮᠤᠷᠯᠢᠩᠭᠤᠢ ᠨᠦᠢᠷᠰᠤᠭᠠᠷᠠᠢ！