ᠥᠷ ᠴᠠᠢᠮᠠᠭᠴᠠ ᠵᠢᠶᠠᠩ ᠬᠤᠩ ᠢᠥᠢ ᠪᠤᠰᠤᠭᠠᠳ ᠴᠠᠢ ᠬᠤᠭᠤᠯᠠ ᠪᠠᠨ ᠪᠡᠯᠡᠳᠦᠨ᠂ ᠬᠡᠷ ᠦᠷᠦᠭᠡ ᠪᠠᠨ ᠴᠡᠪᠡᠷᠯᠡᠵᠦ ᠡᠬᠢᠯᠡᠯᠠ᠃ ᠲᠡᠷᠡ ᠤᠴᠢᠷ ᠦᠬᠡᠢ ᠪᠠᠢᠭᠰᠠᠨ ᠴᠤ᠌ ᠡᠷᠳᠡᠯᠡᠨ ᠪᠤᠰᠳᠠᠭ ᠵᠠᠩ ᠲᠠᠢ ᠪᠦᠭᠡᠳ ᠭᠡᠷ ᠴᠡᠪᠡᠷᠯᠡᠬᠦ ᠮᠡᠳᠦ ᠶ᠋ᠢᠨ ᠨᠠᠷᠢᠯᠢᠭ ᠠᠵᠢᠯ ᠳ᠋ᠤ ᠦᠭᠡᠷᠠ ᠪᠤᠰᠤᠳ ᠢ᠋ ᠤᠢᠷᠠᠳᠤᠭᠤᠯᠳᠠᠭ ᠦᠬᠡᠢ 《ᠰᠤᠨᠢᠨ ᠬᠦᠮᠦᠨ》 ᠶᠤᠮ᠃
ᠬᠢᠩᠭᠠᠨ ᠠᠢᠮᠠᠭ ᠤ᠋ᠨ ᠮᠡᠯᠳᠡᠬᠡᠨᠡᠭᠰᠡᠨ ᠳᠤᠳᠤᠷᠭᠠ ᠂ ᠳᠠᠪᠤᠰᠤᠯᠠᠭᠰᠠᠨ ᠮᠠᠨᠵᠢᠨ ᠂ ᠳᠠᠷᠤᠭᠰᠠᠨ ᠴᠠᠭᠠᠨ ᠨᠤᠭᠤᠭᠠ ᠁ ᠬᠦᠬᠡᠬᠤᠳᠠ ᠵᠢᠨ ᠮᠠᠰᠢ ᠤᠯᠠᠨ ᠬᠦᠮᠦᠨ ᠰᠠᠢᠬᠠᠨ ᠲᠤᠭᠤᠷᠢᠭ ᠤ᠋ᠨ ᠶᠡᠬᠡ ᠰᠤᠷᠭᠠᠭᠤᠯᠢ ᠵᠡᠬᠦᠨ ᠵᠠᠮ ᠤ᠋ᠨ ᠰᠢᠨᠠ ᠴᠦᠩᠬᠦᠷ ᠭᠤᠳᠤᠮᠵᠢ ᠳ᠋ᠤ ᠪᠠᠢᠷᠢᠯᠠᠭᠠ 《ᠬᠢᠩᠭᠠᠨ ᠠᠢᠮᠠᠭ ᠤ᠋ᠨ ᠤᠨᠴᠠ ᠭᠠᠷᠤᠯᠳᠠ》 ᠬᠡᠮᠡᠬᠦ ᠳᠡᠯᠭᠡᠬᠦᠷ ᠢ᠋ ᠰᠠᠢᠨ ᠮᠡᠳᠡᠨᠠ᠂ ᠮᠤᠲ᠋ᠤᠷ ᠵᠠᠢᠳᠠᠯᠠᠭᠠᠳ ᠳᠤᠳᠤᠷᠭᠠ ᠬᠦᠷᠭᠡᠳᠡᠭ ᠡᠵᠡᠨᠳᠡᠨ ᠢ᠋ ᠴᠤ᠌ ᠰᠠᠢᠨ ᠳᠠᠨᠢᠨᠠ᠃ ᠬᠤᠳᠠ ᠵᠠᠬᠠᠯᠠᠵᠦ ᠰᠠᠭᠤᠳᠠᠭ ᠬᠢᠷᠢᠨᠠ ᠳᠡᠳᠡᠨ ᠢ᠋ ᠵᠤᠷᠢᠭᠠᠳ ᠢᠷᠡᠳᠡᠭ ᠬᠦᠮᠦᠰ ᠤ᠋ᠨ ᠰᠡᠳᠬᠢᠯ ᠳ᠋ᠤ ᠨᠤᠲᠤᠭ ᠤ᠋ᠨ ᠮᠦᠷᠦᠭᠡᠳᠦᠯ᠂ ᠪᠠᠭᠠ ᠶ᠋ᠢᠨ ᠲᠤᠷᠠᠰᠤᠮᠵᠢ ᠪᠢᠯᠬᠠᠵᠦ᠂ ᠨᠡᠩ ᠴᠤ᠌ ᠳᠡᠯᠭᠡᠬᠦᠷ ᠤ᠋ᠨ ᠡᠵᠡᠨ ᠵᠢᠶᠠᠩ ᠬᠤᠩ ᠢᠥᠢ ᠶ᠋ᠢᠨ ᠬᠠᠯᠠᠭᠤᠮᠰᠤᠭ ᠦᠢᠯᠡᠴᠢᠯᠡᠭᠡ᠂ ᠴᠢᠨᠠᠷᠯᠢᠭ ᠪᠠᠷᠠᠭᠠ ᠬᠢᠭᠡᠳ ᠢᠳᠡᠭᠡᠯ ᠨᠠᠢᠳᠠᠪᠤᠷᠢ ᠨᠢ ᠳᠡᠳᠡᠨ ᠤ᠋ ᠰᠡᠳᠬᠢᠯ ᠳ᠋ᠤ ᠶᠡᠬᠡ ᠯᠡ ᠳᠠᠭᠠᠯᠠᠭᠳᠠᠵᠠᠢ᠃
ᠤᠰᠤᠨ ᠲᠤᠳᠤᠷᠭᠠ ᠵᠢᠨ ᠰᠠᠭᠤᠷᠢᠨ
ᠮᠤᠲ᠋ᠤᠷ ᠵᠠᠢᠳᠠᠯᠠᠭᠠᠳ ᠳᠤᠳᠤᠷᠭᠠ ᠬᠦᠷᠭᠡᠳᠡᠭ ᠵᠠᠯᠠᠭᠤ ᠵᠢᠶᠠᠩ ᠬᠤᠩ ᠢᠥᠢ ᠪᠤᠯ ᠬᠢᠩᠭᠠᠨ ᠠᠢᠮᠠᠭ ᠤ᠋ᠨ ᠵᠠᠯᠠᠢᠳ ᠬᠤᠰᠢᠭᠤᠨ ᠤ᠋ ᠪᠠᠶᠠᠠ ᠤᠯᠠᠭᠠᠨᠠ ᠰᠤᠮᠤ ᠶ᠋ᠢᠨ ᠮᠠᠯᠴᠢᠨ᠃ 1998 ᠤᠨ ᠳ᠋ᠤ ᠳᠡᠭᠡᠳᠦ ᠲᠤᠮᠳᠠᠳᠦ ᠪᠠᠨ ᠳᠡᠬᠦᠰᠦᠭᠡᠳ ᠬᠦᠰᠡᠵᠦ ᠰᠠᠨᠠᠭᠰᠠᠨ ᠶᠡᠬᠡ ᠰᠤᠷᠭᠠᠭᠤᠯᠢ ᠳ᠋ᠠᠭᠠᠨ ᠤᠷᠤᠵᠦ ᠴᠢᠳᠠᠭᠠ ᠦᠬᠡᠢ ᠴᠤ᠌ ᠬᠦᠮᠦᠨ ᠤ᠋ ᠲᠤᠭᠤᠰᠤᠨ ᠳ᠋ᠤ ᠦᠯᠦ ᠳᠠᠷᠤᠭᠳᠠᠬᠤ ᠬᠡᠮᠡᠭᠰᠡᠨ ᠬᠠᠳᠠᠭᠤ ᠵᠤᠷᠢᠭ ᠢ᠋ ᠡᠪᠦᠷᠯᠡᠨ ᠬᠦᠬᠡᠬᠤᠳᠠ ᠳ᠋ᠤ ᠢᠷᠡᠵᠦ ᠬᠦᠯᠦᠰᠦᠨ ᠠᠵᠢᠯ ᠬᠢᠵᠦ᠂ ᠵᠤᠷᠢᠭ ᠤᠬᠠᠭᠠᠨ ᠰᠤᠢᠵᠦ ᠡᠬᠢᠯᠡᠭᠰᠡᠨ ᠨᠢ 28 ᠵᠢᠯ ᠤ᠋ᠨ ᠲᠡᠷᠳᠡᠭᠡᠬᠢ ᠭᠠᠯᠳᠠᠢ ᠴᠤᠭᠳᠠᠢ ᠨᠠᠰᠤᠨ ᠤ᠋ ᠬᠢᠨᠢ ᠨᠠᠨᠳᠢᠨ ᠲᠤᠷᠠᠰᠤᠮᠵᠢ ᠪᠤᠯᠵᠠᠢ᠃
《ᠰᠠᠶᠢ ᠬᠦᠬᠡᠬᠤᠳᠠ ᠳ᠋ᠤ ᠢᠷᠡᠭᠡᠳ ᠪᠠᠷᠢᠯᠭᠠ ᠶ᠋ᠢᠨ ᠭᠠᠵᠠᠷ ᠤᠴᠢᠵᠦ᠂ ᠡᠳᠦᠷ ᠤ᠋ᠨ 15 ᠲᠦᠬᠦᠷᠢᠭ ᠤ᠋ᠨ ᠬᠠᠷᠠ ᠬᠦᠴᠦᠨ ᠤ᠋ ᠠᠵᠢᠯ ᠬᠢᠵᠦ ᠡᠬᠢᠯᠡᠭᠰᠡᠨ᠃ ᠤᠳᠤ ᠶ᠋ᠢᠨ ᠦᠪᠦᠷ ᠮᠤᠨᠭᠭᠤᠯ ᠤ᠋ᠨ ᠨᠤᠮ ᠤ᠋ᠨ ᠰᠠᠩ ᠤ᠋ᠨ ᠠᠰᠠᠷ ᠢ᠋ ᠲᠡᠷᠡ ᠦᠶᠠ ᠳ᠋ᠤ ᠪᠠᠷᠢᠵᠦ ᠪᠠᠢᠭᠰᠠᠨ ᠶᠤᠮ》 ᠭᠡᠳ ᠵᠢᠶᠠᠩ ᠬᠤᠩ ᠢᠥᠢ ᠲᠤᠷᠠᠰᠤᠮᠵᠢ ᠰᠡᠬᠦᠯᠠ᠃ ᠪᠠᠷᠢᠯᠭᠠ ᠶ᠋ᠢᠨ ᠭᠠᠵᠠᠷ ᠲᠤᠭᠤᠰᠬᠠ ᠴᠢᠯᠠᠭᠤ᠂ ᠰᠢᠪᠠᠷ ᠰᠢᠷᠤᠢ ᠲᠠᠢ ᠡᠳᠦᠷᠵᠢᠨ ᠨᠤᠴᠤᠯᠳᠤᠵᠦ᠂ ᠡᠷᠠ ᠶ᠋ᠢᠨ ᠵᠤᠷᠢᠭ᠂ ᠵᠠᠯᠠᠭᠤ ᠶ᠋ᠢᠨ ᠤᠮᠤᠭ ᠢ᠋ ᠪᠠᠷᠢᠵᠦ᠂ ᠬᠡᠳᠦᠨ ᠵᠢᠯ ᠶᠠᠮᠠᠷ ᠴᠦ᠍ ᠬᠠᠷᠠ ᠪᠤᠷᠤ ᠬᠦᠨᠳᠦ ᠬᠦᠴᠢᠷ ᠠᠵᠢᠯ ᠢ᠋ ᠭᠤᠯᠤᠯ ᠦᠬᠡᠢ ᠬᠢᠵᠦ᠂ ᠤᠷᠤᠢ ᠳ᠋ᠤᠨᠢ ᠭᠠᠷᠬᠤ ᠪᠡᠷ ᠬᠢᠴᠢᠶᠡᠨ ᠵᠢᠳᠬᠦᠵᠦ ᠶᠠᠪᠤᠭᠰᠠᠨ ᠴᠤ᠌ ᠶᠡᠷᠦ ᠨᠢ ᠶᠠᠪᠤᠬᠤ ᠳᠤᠳᠤᠮ ᠰᠠᠨᠠᠭᠰᠠᠨ ᠳ᠋ᠠᠭᠠᠨ ᠬᠦᠷᠬᠦ ᠵᠠᠮ ᠡᠴᠡ ᠵᠠᠢᠳᠠᠵᠦ ᠪᠠᠢᠭᠠ ᠪᠠᠨ ᠮᠡᠳᠡᠭᠰᠡᠨ ᠲᠡᠷᠡ ᠪᠡᠷ ᠠᠷᠠᠯᠵᠢᠶᠠ ᠮᠠᠢᠮᠠᠢ ᠬᠢᠬᠦ ᠵᠢ ᠰᠤᠪᠢᠵᠦ ᠰᠡᠳᠬᠢᠵᠦ ᠡᠬᠢᠯᠡᠵᠡᠢ᠃
ᠵᠢᠶᠠᠩ ᠬᠤᠩ ᠢᠤᠢ
《ᠪᠢ ᠶᠠᠮᠠᠷ ᠴᠤ᠌ ᠠᠵᠢᠯ ᠢ᠋ ᠪᠦᠷ ᠬᠢᠵᠦ ᠦᠩᠭᠡᠷᠡᠵᠡᠢ》 ᠭᠡᠳᠡᠭ ᠴᠦᠬᠡᠨ ᠬᠡᠳᠦᠬᠡᠨ ᠦᠬᠡᠨ ᠳ᠋ᠤᠨᠢ ᠵᠢᠶᠠᠩ ᠬᠤᠩ ᠢᠥᠢ ᠶ᠋ᠢᠨ ᠬᠤᠷᠢᠨ ᠬᠡᠳᠦᠨ ᠵᠢᠯ ᠤ᠋ᠨ ᠬᠠᠯᠠ ᠵᠢ ᠳᠠᠪᠠᠨ ᠬᠦᠨᠳᠦ ᠵᠢ ᠲᠤᠭᠤᠯᠤᠨ ᠶᠠᠪᠤᠭᠰᠠᠨ ᠮᠠᠷᠳᠠᠭᠳᠠᠰᠢ ᠦᠬᠡᠢ ᠤᠨ ᠴᠠᠭ ᠳᠤᠳᠤᠷᠠᠨ᠂ ᠬᠦᠮᠦᠨ ᠡᠴᠡ ᠳᠠᠪᠠᠮᠠᠭᠠᠢᠯᠠᠬᠤ ᠳᠡᠰᠪᠦᠷᠢ ᠳᠡᠪᠴᠢᠶᠡᠷᠢ᠂ ᠤᠬᠠᠭᠠᠨ ᠪᠤᠳᠤᠯ ᠠᠯᠢ ᠠᠯᠢ ᠨᠢ ᠮᠡᠳᠡᠷᠡᠭᠳᠡᠨᠠ᠃ ᠬᠠᠷᠠᠬᠠᠨ ᠪᠠᠭᠠ ᠡᠴᠡ ᠪᠠᠨ ᠵᠤᠷᠢᠭ ᠰᠦᠰᠦ ᠶᠡᠬᠡᠳᠡᠢ ᠪᠦᠭᠡᠳ ᠠᠵᠢᠯ ᠶᠠᠪᠤᠳᠠᠯ ᠳ᠋ᠤ ᠬᠢᠨᠠᠮᠠᠭᠠᠢ ᠬᠠᠨᠳᠤᠳᠠᠭ ᠵᠢᠶᠠᠩ ᠬᠤᠩ ᠢᠥᠢ ᠶ᠋ᠢᠨ ᠠᠷᠠᠯᠵᠢᠶᠠ ᠬᠢᠵᠦ ᠦᠢᠯᠡᠰ ᠪᠤᠰᠬᠠᠬᠤ ᠳ᠋ᠤ ᠤᠯᠠᠨ ᠰᠠᠢᠨ ᠠᠨᠳᠠ ᠨᠦᠬᠦᠳ᠂ ᠠᠬᠠᠰ ᠵᠠᠬᠠᠰ ᠨᠢ ᠲᠤᠰᠠ ᠳᠡᠮ ᠪᠤᠯᠵᠦ᠂ ᠢᠯᠠᠩᠭᠤᠶᠠ ᠠᠢᠯ ᠭᠡᠷ ᠪᠤᠯᠵᠦ᠂ ᠬᠠᠨᠢ ᠲᠠᠢ ᠬᠦᠦ ᠲᠠᠢ ᠪᠤᠯᠤᠭᠰᠠᠨ ᠨᠢ ᠲᠡᠬᠦᠨ ᠤ᠋ ᠡᠷᠴᠢ ᠵᠤᠷᠢᠭ ᠢ᠋ ᠤᠯᠠᠮ ᠬᠤᠷᠴᠠᠯᠠᠨ᠂ ᠦᠢᠯᠡᠰ ᠤ᠋ᠨ ᠲᠦᠷᠦᠬᠡᠨ ᠳ᠋ᠤᠨᠢ ᠦᠨᠳᠡᠢᠯᠭᠡᠵᠡᠢ᠃ ᠤᠷᠤᠯᠳᠤᠯᠭᠠ ᠰᠠᠢᠳᠠᠢ ᠲᠡᠷᠡ ᠪᠡᠷ ᠮᠡᠳᠡᠯᠭᠡ ᠮᠡᠷᠭᠡᠵᠢᠯ ᠰᠤᠷᠴᠤ ᠡᠵᠡᠮᠰᠢᠬᠦ ᠨᠢ ᠠᠵᠢᠯ ᠦᠢᠯᠡᠰ ᠪᠤᠰᠬᠠᠬᠤ ᠳ᠋ᠤ ᠶᠡᠬᠡ ᠲᠤᠰᠠ ᠳᠡᠮ ᠪᠤᠯᠵᠦ᠂ ᠰᠡᠳᠬᠢᠬᠦᠢ ᠲᠤᠷᠰᠢᠯᠭᠠ ᠶ᠋ᠢᠨ ᠬᠤᠷᠠᠮᠳᠤᠯᠭᠠ ᠪᠤᠯᠵᠤ ᠪᠤᠯᠬᠤ ᠵᠢ ᠮᠡᠳᠡᠭᠡᠳ᠂ ᠠᠵᠢᠯ ᠤ᠋ᠨ ᠰᠤᠯᠠ ᠰᠡᠯᠡᠬᠦᠦ ᠴᠠᠭ ᠶ᠋ᠢᠡᠨ ᠠᠰᠢᠭᠯᠠᠨ ᠦᠨᠳᠦᠷ ᠵᠡᠷᠭᠡ ᠶ᠋ᠢᠨ ᠠᠵᠢᠯ ᠮᠡᠷᠭᠡᠵᠢᠯ ᠤ᠋ᠨ ᠳᠡᠭᠡᠳᠦ ᠰᠤᠷᠭᠠᠭᠤᠯᠢ ᠳ᠋ᠤ ᠦᠢᠯᠡᠳᠪᠦᠷᠢ ᠬᠤᠳᠠᠯᠳᠤᠭᠠᠨ ᠤ᠋ ᠮᠡᠷᠭᠡᠵᠢᠯ ᠰᠤᠷᠴᠤ᠂ ᠦᠪᠡᠷ ᠢ᠋ ᠪᠠᠨ ᠳᠡᠬᠦᠯᠳᠡᠷᠵᠢᠬᠦᠯᠵᠦ ᠶᠠᠪᠤᠭᠰᠠᠨ ᠨᠢ ᠤᠯᠵᠠᠭᠤᠷᠬᠠᠯ ᠪᠤᠯᠤᠭᠰᠠᠨ ᠪᠢᠯᠡ᠃
2008 ᠤᠨ ᠳ᠋ᠤ ᠵᠢᠶᠠᠩ ᠬᠤᠩ ᠢᠥᠢ ᠵᠠᠷ ᠮᠡᠳᠡᠭᠡᠨ ᠤ᠋ ᠺᠤᠮᠫᠠᠨᠢ ᠪᠠᠨ ᠪᠠᠢᠭᠤᠯᠵᠦ᠂ ᠭᠤᠤᠯᠳᠠᠭᠤ ᠳᠡᠭᠡᠳᠦ ᠳᠡᠰ ᠤ᠋ᠨ ᠪᠠᠭᠤᠳᠠᠯ᠂ ᠬᠤᠭᠤᠯᠠᠨ ᠭᠡᠷ ᠲᠤ᠌ ᠵᠤᠷᠢᠭᠤᠯᠤᠭᠰᠠᠨ ᠵᠠᠭᠤᠰᠢᠨ ᠤ᠋ ᠵᠠᠬᠢᠶᠠᠯᠠᠭᠠ ᠶ᠋ᠢᠨ ᠡᠯᠧᠺᠲ᠋ᠷᠤᠨ ᠰᠤᠹᠲ ᠲᠦᠬᠦᠭᠡᠷᠦᠮᠵᠢ ᠬᠢᠵᠠᠢ᠃ 《ᠲᠡᠷᠡ ᠬᠦ᠌ ᠰᠤᠹᠲ ᠲᠦᠬᠦᠭᠡᠷᠦᠮᠵᠢ ᠵᠢ ᠲᠤᠰᠬᠠᠢᠯᠠᠨ ᠭᠤᠧᠠᠩᠳ᠋ᠦ᠋ᠩ ᠳ᠋ᠤ ᠬᠦᠷᠴᠦ 50 ᠲᠦᠮᠡ ᠭᠠᠷᠤᠢ ᠲᠦᠬᠦᠷᠢᠭ ᠶ᠋ᠢᠡᠷ ᠠᠪᠴᠤ ᠢᠷᠡᠭᠰᠡᠨ ᠶᠤᠮ᠃ ᠬᠡᠳᠦᠨ ᠵᠢᠯ ᠤᠷᠤᠭᠰᠢᠳᠠᠢ ᠬᠢᠵᠦ 2012 ᠤᠨ ᠪᠤᠯᠬᠤ ᠳ᠋ᠤ ᠵᠠᠬᠠ ᠳᠡᠯᠭᠡᠬᠦᠷ ᠤ᠋ᠨ ᠲᠦᠷᠢᠯᠳᠡ᠂ ᠠᠵᠤ ᠠᠬᠤᠢ ᠶ᠋ᠢᠨ ᠬᠤᠪᠢᠰᠤᠯᠳᠠ ᠡᠴᠡ ᠪᠤᠯᠤᠭᠠᠳ ᠬᠤᠭᠤᠯᠠᠨ ᠬᠡᠷ ᠤ᠋ᠳ ᠤ᠋ᠨ ᠠᠷᠠᠯᠵᠢᠶᠠ ᠮᠠᠢᠮᠠᠢ ᠶᠡᠬᠡ ᠪᠡᠷ ᠦᠬᠡᠷᠡᠳᠤᠵᠤ᠂ ᠮᠠᠨ ᠤ᠋ ᠵᠠᠷ ᠮᠡᠳᠡᠭᠡᠨ ᠤ᠋ ᠠᠷᠠᠯᠵᠢᠶᠠ ᠴᠤ᠌ ᠪᠦᠳᠦᠬᠦ ᠪᠠᠨ ᠪᠤᠯᠢᠵᠠᠢ᠃ ᠠᠷᠭᠠ ᠪᠤᠰᠤ 50 ᠲᠦᠮᠡ ᠭᠠᠷᠤᠢ ᠲᠦᠬᠦᠷᠢᠭ ᠤ᠋ᠨ ᠲᠦᠬᠦᠬᠡᠷᠦᠮᠵᠢ ᠪᠡᠨ ᠲᠡᠮᠦᠷ ᠤ᠋ᠨ ᠦᠨᠠ ᠪᠡᠷ ᠪᠤᠳᠤᠭᠠᠳ 2 ᠲᠦᠮᠡ ᠭᠠᠷᠤᠢ ᠲᠦᠬᠦᠷᠢᠭ ᠶ᠋ᠢᠡᠷ ᠬᠤᠳᠠᠯᠳᠤᠴᠢᠬᠠᠭᠰᠠᠨ ᠰᠢᠳᠡ》 ᠭᠡᠵᠤ ᠵᠢᠶᠠᠩ ᠬᠤᠩ ᠢᠥᠢ ᠠᠷᠭᠠ ᠪᠠᠷᠠᠭᠳᠠᠭᠰᠠᠨ ᠪᠠᠢᠳᠠᠯ ᠲᠠᠢ ᠢᠨᠢᠶᠡᠨᠠ᠃
ᠲᠤᠰᠭᠠᠢ ᠬᠤᠳᠠᠯᠳᠤᠭᠠᠨᠤ ᠳᠡᠯᠭᠡᠭᠦᠷᠲᠦ
ᠺᠤᠮᠫᠠᠨᠢ ᠨᠢ ᠳᠠᠮᠫᠤᠷᠠᠭᠰᠠᠨ ᠬᠠᠭᠠᠰ ᠵᠢᠯ ᠤ᠋ᠨ ᠳᠤᠳᠤᠷᠠ ᠲᠡᠷᠡ ᠭᠤᠨᠢᠵᠦ ᠭᠤᠳᠤᠷᠠᠵᠦ ᠦᠪᠡᠷ ᠢ᠋ ᠪᠠᠨ ᠲᠠᠶᠠᠭᠳᠠᠭᠰᠠᠨ ᠦᠬᠡᠢ᠂ ᠬᠠᠷᠢᠨ ᠢᠯᠠᠭᠳᠠᠯ ᠡᠴᠡ ᠪᠠᠨ ᠰᠤᠷᠭᠠᠮᠵᠢ ᠠᠪᠴᠤ᠂ ᠪᠤᠰᠤᠳ ᠡᠴᠡ ᠳᠠᠪᠠᠮᠠᠭᠠᠢ ᠰᠡᠳᠬᠢᠯ ᠤ᠋ᠨ ᠲᠠᠷ ᠳᠡᠩᠬᠡᠬᠡ ᠪᠡᠷ ᠦᠪᠡᠷ ᠢ᠋ ᠪᠠᠨ ᠬᠢᠨᠠᠨ ᠰᠢᠬᠦᠵᠦ᠂ ᠦᠪᠡᠷ ᠤ᠋ᠨ ᠪᠠᠶᠠ ᠳ᠋ᠡᠬᠡᠨ ᠤᠯᠠᠮ ᠰᠠᠢᠨ ᠲᠤᠬᠢᠷᠠᠬᠤ ᠦᠢᠯᠡᠰ ᠤ᠋ᠨ ᠵᠠᠮ ᠢ᠋ ᠪᠤᠳᠤᠵᠦ ᠶᠠᠪᠤᠵᠠᠢ᠃
ᠲᠦᠷᠦᠭᠰᠡᠨ ᠨᠤᠲᠤᠭ ᠤ᠋ᠨ ᠬᠦᠮᠦᠨ ᠠᠷᠠᠳ᠂ ᠠᠭᠤᠯᠠ ᠤᠰᠤ ᠤᠷᠭᠤᠮᠠᠯ ᠠᠮᠢᠳᠠᠨ ᠨᠢ ᠬᠦᠷᠳᠡᠯᠠ ᠮᠤᠬᠤᠷᠳᠠᠭᠰᠠᠨ ᠴᠠᠭ ᠲᠤ᠌ ᠰᠡᠳᠬᠢᠯ ᠳᠡᠭᠰᠢᠯᠡᠬᠦ ᠷᠢᠳᠢ ᠰᠢᠳᠢ ᠲᠠᠢ ᠬᠡᠮᠡᠨ ᠤᠷᠠᠨ ᠵᠤᠬᠢᠶᠠᠯ ᠳ᠋ᠤ ᠪᠢᠴᠢᠳᠡᠭ ᠰᠢᠭ᠌ ᠶ᠋ᠢᠡᠷ᠂ ᠵᠢᠶᠠᠩ ᠬᠤᠩ ᠢᠥᠢ ᠨᠢᠭᠡ ᠤᠳᠠᠭᠠ ᠨᠤᠲᠤᠭ ᠲᠠᠭᠠᠨ ᠬᠠᠷᠢᠵᠦ᠂ ᠲᠦᠷᠦᠯ ᠰᠠᠳᠤᠨ ᠨᠠᠢᠵᠠ ᠨᠦᠬᠦᠳ ᠲᠠᠢ ᠪᠠᠨ ᠠᠭᠤᠯᠵᠠᠨ ᠵᠤᠯᠭᠠᠵᠦ ᠶᠠᠪᠤᠬᠤ ᠳ᠋ᠠᠭᠠᠨ ᠨᠤᠲᠤᠭ ᠤ᠋ᠨ ᠬᠦᠮᠦᠰ ᠤ᠋ᠨ ᠳᠠᠷᠢᠭᠰᠠᠨ ᠲᠤᠳᠤᠷᠭᠠ ᠨᠢ ᠮᠠᠰᠢ ᠠᠮᠳᠠᠳᠠᠢ ᠰᠠᠨᠠᠭᠳᠠᠭᠰᠠᠨ ᠶ᠋ᠢᠡᠷ ᠲᠡᠬᠦᠨ ᠤ᠋ ᠲᠤᠳᠤᠷᠠ ᠬᠢᠩᠭᠠᠨ ᠠᠢᠮᠠᠭ ᠤ᠋ᠨ ᠲᠤᠳᠤᠷᠭᠠ ᠪᠠᠨ ᠭᠠᠳᠠᠭᠰᠢ ᠤᠬᠠᠭᠤᠯᠵᠦ ᠪᠤᠷᠤᠯᠠᠭᠤᠯᠬᠤ ᠪᠤᠳᠤᠯ ᠬᠢᠯᠠᠰᠬᠢᠨ ᠪᠠᠭᠤᠯᠠ᠃
ᠵᠤᠷᠢᠭ ᠰᠢᠭᠤᠳᠪᠠᠯ ᠬᠢᠳᠡᠭ ᠡᠷᠡᠮᠡᠭᠡᠢ ᠵᠠᠩ ᠶ᠋ᠢᠡᠷ ᠶ᠋ᠢᠡᠨ ᠵᠢᠶᠠᠩ ᠬᠤᠩ ᠢᠥᠢ 2013 ᠤᠨ ᠡᠴᠡ ᠨᠤᠲᠤᠭ ᠤ᠋ᠨ ᠶ᠋ᠢᠡᠨ ᠲᠤᠳᠤᠷᠭᠠ ᠵᠢ ᠬᠦᠬᠡᠬᠤᠳᠠ ᠳ᠋ᠤ ᠪᠤᠷᠤᠯᠠᠭᠤᠯᠵᠦ ᠡᠬᠢᠯᠡᠪᠠ᠃ 《ᠰᠠᠶᠢ ᠡᠬᠢᠯᠡᠭᠡᠳ ᠬᠤᠳᠠᠯᠳᠤᠵᠦ ᠪᠠᠢᠬᠤ ᠳ᠋ᠤ ᠵᠠᠷᠢᠮ ᠬᠦᠮᠦᠨ ᠬᠢᠩᠭᠠᠨ ᠠᠢᠮᠠᠭ ᠭᠡᠵᠦ ᠬᠠᠮᠢᠭᠠᠬᠢ ᠭᠠᠵᠠᠷ ᠢ᠋ ᠴᠤ᠌ ᠮᠡᠳᠡᠬᠦ ᠦᠬᠡᠢ᠂ ᠬᠠᠷᠢᠨ ᠤᠯᠠᠭᠠᠨᠬᠤᠳᠠ ᠶᠤᠮ ᠤᠤ ᠡᠰᠡᠬᠦᠯᠠ ᠪᠤᠤ ᠠᠨ ᠵᠤᠤ ᠶ᠋ᠢᠨ ᠳᠤᠳᠤᠷᠭᠠ ᠭᠡᠪᠡᠯ ᠵᠠᠷᠢᠮ ᠨᠢ ᠮᠡᠳᠡᠳᠡᠭ ᠪᠠᠢᠭᠰᠠᠨ》 ᠭᠡᠵᠤ ᠵᠢᠶᠠᠩ ᠬᠤᠩ ᠢᠥᠢ ᠢᠨᠢᠶᠡᠮᠰᠦᠭᠯᠡᠨ ᠶᠠᠷᠢᠨᠠ᠃
ᠲᠦᠮᠡᠨ ᠶᠠᠪᠤᠳᠠᠯ ᠤ᠋ᠨ ᠲᠦᠷᠦᠬᠦᠦ ᠠᠯᠬᠤᠮ ᠢ᠋ ᠵᠤᠷᠢᠭᠳᠠᠢ ᠠᠯᠬᠤᠭᠰᠠᠨ ᠵᠢᠶᠠᠩ ᠬᠤᠩ ᠢᠥᠢ ᠳᠤᠳᠤᠷᠭᠠ ᠪᠠᠨ ᠬᠤᠳᠠᠯᠳᠤᠬᠤ ᠭᠡᠵᠦ ᠵᠢᠵᠢᠬᠭᠡᠨ ᠵᠠᠷ ᠮᠡᠳᠡᠭᠡᠨ ᠤ᠋ ᠬᠠᠭᠤᠳᠠᠰᠤ ᠬᠢᠴᠢᠬᠡᠭᠡᠳ ᠬᠤᠷᠢᠶᠠᠯᠠᠯ ᠳᠠᠷᠠᠭᠠᠯᠠᠨ ᠶᠠᠪᠤᠵᠦ᠂ ᠡᠷᠦᠬᠡ ᠳᠠᠷᠠᠭᠠᠯᠠᠨ ᠲᠦᠭᠡᠭᠡᠵᠦ᠂ ᠬᠡᠨ ᠨᠢᠭᠡ ᠨᠢ ᠤᠳᠠᠰᠤ ᠢᠷᠡᠵᠦ ᠳᠤᠳᠤᠷᠭᠠ ᠵᠠᠬᠢᠶᠠᠯᠠᠪᠠᠯ ᠲᠡᠷᠡ ᠲᠠᠷᠤᠢ ᠳ᠋ᠤᠨᠢ ᠬᠦᠷᠭᠡᠳᠡᠭ ᠪᠠᠢᠯᠠ᠃ 《ᠦᠪᠡᠷ ᠶ᠋ᠢᠡᠨ ᠵᠠᠷ ᠮᠡᠳᠡᠭᠡᠨ ᠤ᠋ ᠺᠤᠮᠫᠠᠨᠢ ᠬᠢᠵᠦ ᠪᠠᠢᠭᠰᠠᠨ ᠤ᠋ ᠰᠠᠢᠨ ᠶ᠋ᠢᠡᠷ ᠤᠬᠠᠭᠤᠯᠭᠠ ᠬᠢᠬᠦ᠂ ᠵᠠᠷ ᠳᠠᠷᠬᠠᠭᠠᠬᠤ ᠶ᠋ᠢᠨ ᠴᠢᠬᠤᠯᠠ ᠴᠢᠨᠠᠷ ᠢ᠋ ᠮᠡᠳᠡᠨᠠ᠃ ᠲᠡᠷᠡ ᠦᠶᠠ ᠳ᠋ᠤ ᠬᠦᠬᠡᠬᠤᠳᠠ ᠳ᠋ᠤ 300 ᠲᠦᠮᠡ ᠰᠢᠬᠠᠮ ᠬᠦᠮᠦᠨ ᠠᠮᠠ ᠲᠠᠢ ᠪᠡᠷ ᠪᠤᠳᠤᠭᠠᠳ ᠭᠤᠷᠪᠠᠨ ᠤ᠋ ᠨᠢᠭᠡ ᠬᠤᠪᠢ ᠶ᠋ᠢᠨ ᠠᠢᠯ ᠬᠢᠩᠭᠠᠨ ᠠᠢᠮᠠᠭ ᠤ᠋ᠨ ᠳᠤᠳᠤᠷᠭᠠ ᠵᠢ ᠢᠳᠡᠬᠦ ᠪᠤᠯᠪᠠᠯ ᠮᠢᠨᠤ ᠠᠷᠠᠯᠵᠢᠶᠠ ᠶᠠᠮᠠᠷ ᠬᠡᠮᠵᠢᠶᠡᠨ ᠳ᠋ᠤ ᠬᠦᠷᠬᠦ ᠵᠢ ᠪᠤᠤ ᠮᠡᠳᠡ ᠬᠡᠵᠤ ᠪᠤᠳᠤᠵᠦ ᠪᠠᠢᠭᠰᠠᠨ》 ᠭᠡᠳ ᠵᠢᠶᠠᠩ ᠬᠤᠩ ᠢᠥᠢ ᠪᠤᠳᠤᠯ ᠶ᠋ᠢᠡᠨ ᠳᠡᠯᠭᠡᠨᠠ᠃ ᠤᠯᠠᠨ ᠢ᠋ ᠰᠦᠪᠡᠭᠴᠢᠯᠡᠵᠦ᠂ ᠬᠤᠯᠠ ᠵᠢ ᠪᠤᠳᠤᠳᠠᠭ ᠲᠡᠷᠡ ᠪᠡᠷ 2015 ᠤᠨ ᠳ᠋ᠤ ᠬᠢᠩᠭᠠᠨ ᠠᠢᠮᠠᠭ ᠤ᠋ᠨ ᠲᠤᠳᠤᠷᠭᠠ ᠪᠠᠨ ᠰᠠᠭᠤᠭᠠᠯᠢ ᠠᠷᠠᠳ ᠤ᠋ᠨ ᠬᠤᠷᠢᠶᠠᠯᠠᠯ ᠤ᠋ᠨ ᠵᠢᠵᠢᠭ ᠳᠡᠯᠭᠡᠭᠦᠷ ᠤ᠋ᠳ᠂ ᠲᠤᠮᠤ ᠲᠤᠮᠤ ᠬᠡᠳᠦ ᠳᠡᠯᠭᠡᠬᠦᠷ ᠲᠤ᠌ ᠳᠠᠯᠪᠢᠵᠦ ᠬᠤᠳᠠᠯᠳᠤᠬᠤ ᠭᠡᠰᠡᠨ ᠳ᠋ᠤ ᠵᠠᠷᠤᠳᠠᠯ ᠨᠢ ᠬᠡᠳᠦ ᠶᠡᠬᠡ ᠪᠤᠯᠬᠤᠷ ᠪᠦᠷ ᠪᠦᠳᠦᠭᠰᠡᠨ ᠦᠬᠡᠢ᠃
ᠬᠠᠮ ᠪᠠᠷᠠᠭᠠ
ᠵᠢᠯᠤᠭᠤ ᠰᠤᠩᠭᠠᠭᠰᠠᠨ ᠦᠢᠯᠡᠰ᠂ ᠵᠤᠷᠢᠭ ᠡᠷᠴᠢᠯᠡᠭᠰᠡᠨ ᠵᠦᠭ ᠲᠡᠭᠡᠨ ᠬᠦᠷᠬᠦ ᠭᠡᠵᠦ ᠵᠢᠶᠠᠩ ᠬᠤᠩ ᠢᠥᠢ ᠤᠯᠠ ᠶ᠋ᠢᠨ ᠬᠦᠯᠦᠰᠦ ᠪᠠᠨ ᠤᠷᠤᠢ ᠳ᠋ᠠᠭᠠᠨ ᠭᠠᠷᠳᠠᠯᠠ ᠵᠢᠳᠬᠦᠵᠦ ᠶᠠᠪᠤᠵᠠᠢ᠃ ᠦᠷᠯᠦᠬᠡ ᠡᠷᠳᠡᠯᠡᠨ ᠪᠤᠰᠴᠤ᠂ ᠳᠤᠳᠤᠷᠭᠠ ᠪᠠᠨ ᠲᠤᠮᠤ ᠵᠢᠵᠢᠭ ᠤᠯᠠᠨ ᠶᠠᠩᠵᠦ ᠪᠡᠷ ᠰᠠᠪᠠᠯᠠᠨ᠂ ᠡᠷᠳᠡ ᠶ᠋ᠢᠨ ᠵᠠᠬᠠ ᠳ᠋ᠤ ᠬᠦᠷᠴᠦ ᠨᠢᠭᠡᠳ ᠨᠢᠭᠡ ᠪᠡᠷ ᠳᠠᠨᠢᠯᠴᠠᠭᠤᠯᠤᠨ ᠬᠤᠳᠠᠯᠳᠤᠭᠰᠠᠨ ᠪᠦᠬᠡᠳ ᠳᠤᠳᠤᠷᠭᠠ ᠶ᠋ᠢᠨ ᠤᠭᠤᠳᠠᠨ ᠳᠤᠳᠤᠷᠠ ᠵᠠᠷ ᠮᠡᠳᠡᠭᠡᠨ ᠤ᠋ ᠬᠠᠭᠤᠳᠠᠰᠤ ᠪᠠᠨ ᠳᠠᠭᠠᠯᠳᠤᠭᠤᠯᠤᠨ ᠦᠭᠴᠦ᠂ ᠬᠡᠷᠡᠭᠯᠡᠭᠴᠢᠳ ᠶ᠋ᠢᠡᠨ ᠨᠢᠭᠡ ᠨᠢᠭᠡ ᠪᠡᠷ ᠨᠡᠮᠡᠭᠳᠡᠬᠦᠯᠵᠦ ᠠᠪᠴᠠᠢ᠃ ᠤᠷᠤᠢ ᠨᠢ ᠠᠵᠢᠯ ᠡᠴᠡ ᠪᠠᠭᠤᠬᠤ ᠴᠠᠭ ᠢ᠋ ᠲᠤᠬᠢᠶᠠᠨ᠂ ᠲᠤᠮᠤᠬᠠᠨ ᠰᠢᠬ ᠰᠠᠭᠤᠭᠠᠯᠢ ᠠᠷᠠᠳ ᠤ᠋ᠨ ᠬᠤᠷᠢᠶᠠᠯᠠᠯ ᠤ᠋ᠨ ᠡᠬᠦᠳᠡᠨ ᠳ᠋ᠤ ᠬᠦᠷᠴᠦ ᠳᠤᠳᠤᠷᠭᠠ ᠪᠠᠨ ᠳᠡᠯᠭᠡᠨ ᠬᠤᠳᠠᠯᠳᠤᠨᠠ᠃ ᠳᠡᠭᠡᠬᠦ ᠳ᠋ᠤ ᠲᠡᠬᠦᠨ ᠤ᠋ ᠦᠨᠡᠨᠴᠢ ᠢᠳᠡᠭᠡᠮᠵᠢ ᠪᠤᠯᠤᠨ ᠬᠢᠩᠭᠠᠨ ᠠᠢᠮᠠᠭ ᠤ᠋ᠨ ᠳᠤᠳᠤᠷᠭᠠ ᠶ᠋ᠢᠨ ᠠᠮᠳᠠ ᠰᠢᠮᠠ ᠠᠭᠠᠵᠢᠮ ᠶ᠋ᠢᠡᠷ ᠬᠦᠮᠦᠰ ᠲᠤ᠌ ᠮᠡᠳᠡᠷᠡᠭᠳᠡᠵᠦ᠂ ᠨᠡᠩ ᠤᠯᠠᠨ ᠬᠦᠮᠦᠨ ᠬᠢᠩᠭᠠᠨ ᠠᠢᠮᠠᠭ ᠤ᠋ᠨ ᠳᠤᠳᠤᠷᠭᠠ ᠢᠳᠡᠬᠦ ᠪᠤᠯᠤᠭᠰᠠᠨ ᠶ᠋ᠢᠡᠷ ᠵᠢᠶᠠᠩ ᠬᠤᠩ ᠢᠥᠢ ᠶ᠋ᠢᠨ ᠠᠷᠠᠯᠵᠢᠶᠠ ᠴᠦ᠍ ᠡᠳᠦᠷ ᠡᠴᠡ ᠡᠳᠦᠷ ᠦᠭᠡᠳᠡᠯᠡᠵᠡᠢ᠃
ᠠᠷᠠᠯᠵᠢᠶᠠ ᠰᠠᠢᠵᠢᠷᠠᠵᠤ ᠬᠡᠷᠡᠭᠴᠡᠭᠡ ᠨᠡᠮᠡᠭᠳᠡᠬᠦ ᠵᠢ ᠳᠠᠭᠠᠯᠳᠤᠨ ᠲᠡᠷᠡ 《ᠬᠢᠩᠭᠠᠨ ᠠᠢᠮᠠᠭ ᠤ᠋ᠨ ᠳᠤᠳᠤᠷᠭᠠ》 ᠬᠡᠮᠡᠬᠦ ᠠᠩᠬᠠᠨ ᠤ᠋ ᠳᠡᠯᠭᠡᠬᠦᠷ ᠶ᠋ᠢᠡᠨ ᠨᠡᠭᠡᠭᠡᠵᠦ᠂ ᠳᠤᠳᠤᠷᠭᠠ ᠪᠡᠷ ᠭᠤᠤᠯᠳᠠᠭᠤᠯᠤᠭᠰᠠᠨ ᠬᠢᠩᠭᠠᠨ ᠠᠢᠮᠠᠭ ᠤ᠋ᠨ ᠲᠠᠷᠢᠶᠠᠯᠠᠩ ᠤ᠋ᠨ ᠪᠦᠳᠦᠭᠡᠭᠳᠡᠬᠦᠨ ᠤᠨᠴᠠ ᠭᠠᠷᠤᠯᠳᠠ ᠪᠡᠨ ᠬᠤᠳᠠᠯᠳᠤᠵᠦ ᠡᠬᠢᠯᠡᠪᠠ᠃ 《ᠪᠢ ᠶᠡᠷᠤ ᠨᠢ ᠲᠤᠭᠳᠠᠮᠠᠯ ᠬᠡᠷᠡᠭᠯᠡᠭᠴᠢ ᠲᠠᠢ ᠪᠤᠯᠬᠤ ᠵᠢ ᠠᠩᠬᠠᠷᠴᠤ᠂ ᠢᠳᠡᠭᠡᠯ ᠢ᠋ ᠡᠷᠬᠢᠮᠯᠡᠳᠡᠭ᠃ ᠠᠩᠬᠠ ᠡᠬᠢᠯᠡᠭᠡᠳ ᠬᠦᠮᠦᠨ ᠬᠦᠯᠦᠰᠦᠯᠡᠨ ᠨᠤᠲᠤᠭ ᠤ᠋ᠨ ᠳᠠᠬᠢᠶᠠᠨ ᠮᠢᠬᠠ᠂ ᠦᠨᠳᠡᠭᠡ᠂ ᠹᠧᠨᠲ᠋ᠢᠶᠤᠤᠷ᠂ ᠳᠠᠪᠤᠰᠤᠯᠠᠭᠰᠠᠨ ᠨᠤᠭᠤᠭᠠ᠂ ᠬᠠᠳᠠᠭᠠᠭᠰᠠᠨ ᠪᠤᠷᠴᠠᠭ ᠵᠡᠷᠭᠡ ᠤᠯᠠᠨ ᠲᠦᠷᠦᠯ ᠤ᠋ᠨ ᠪᠦᠳᠦᠭᠡᠭᠳᠡᠬᠦᠨ ᠢ᠋ ᠨᠤᠲᠤᠭ ᠤ᠋ᠨ ᠬᠦᠮᠦᠰ ᠡᠴᠡ ᠵᠠᠬᠠ ᠳᠡᠯᠬᠡᠬᠦᠷ ᠤ᠋ᠨ ᠦᠨᠠ ᠡᠴᠡ ᠲᠠᠬᠡᠬᠦᠷ ᠬᠤᠳᠠᠯᠳᠤᠨ ᠠᠪᠤᠭᠤᠯᠵᠦ᠂ ᠬᠦᠬᠡᠬᠤᠳᠠ ᠳ᠋ᠤ ᠵᠠᠷᠤᠳᠠᠭ ᠪᠠᠢᠭᠰᠠᠨ᠃ ᠤᠷᠴᠢᠮ ᠤ᠋ᠨ ᠬᠤᠶᠠᠷ ᠵᠢᠯ ᠡᠴᠡ ᠮᠠᠨ ᠤ᠋ ᠨᠤᠲᠤᠭ ᠤ᠋ᠨ ᠳᠠᠬᠢᠶᠠᠨ ᠤ᠋ ᠡᠬᠦᠯᠳᠡᠷ ᠦᠭᠡᠷᠡᠳᠦᠭᠰᠡᠨ ᠡᠴᠡ ᠪᠢ ᠬᠤᠳᠠᠯᠳᠤᠬᠤ ᠪᠠᠨ ᠵᠤᠭᠰᠤᠭᠰᠠᠨ ᠶᠤᠮ》 ᠭᠡᠵᠦ ᠵᠢᠶᠠᠩ ᠬᠤᠩ ᠢᠥᠢ ᠬᠡᠯᠡᠨᠠ᠃
ᠵᠢᠶᠠᠩ ᠬᠤᠩ ᠢᠤᠢ ᠲᠤᠳᠤᠷᠭᠠᠪᠠᠨ ᠤᠬᠠᠭᠤᠯᠵᠤ ᠪᠠᠢᠭᠠ ᠨᠢ
ᠬᠢᠩᠭᠠᠨ ᠠᠢᠮᠠᠭ ᠤ᠋ᠨ ᠵᠠᠰᠠᠭ ᠤ᠋ᠨ ᠤᠷᠳᠤᠨ 2018 ᠤᠨ ᠡᠴᠡ ᠡᠬᠢᠯᠡᠨ 《ᠬᠢᠩᠭᠠᠨ ᠠᠢᠮᠠᠭ ᠤ᠋ᠨ ᠲᠤᠳᠤᠷᠭᠠ》 ᠲᠦᠷᠦᠯ ᠳᠡᠮᠳᠡᠭ ᠢ᠋ ᠴᠤᠭᠴᠠᠯᠠᠵᠤ᠂ 《ᠬᠢᠩᠭᠠᠨ ᠠᠢᠮᠠᠭ ᠤ᠋ᠨ ᠳᠤᠳᠤᠷᠭᠠ》 ᠶ᠋ᠢᠨ ᠤᠬᠠᠭᠤᠯᠭᠠ ᠪᠤᠷᠤᠯᠠᠭᠤᠯᠭᠠ ᠵᠢ ᠶᠡᠬᠡ ᠪᠡᠷ ᠴᠢᠬᠤᠯᠠᠴᠢᠯᠠᠨ ᠬᠢᠭᠰᠡᠨ ᠨᠢ ᠵᠢᠶᠠᠩ ᠬᠤᠩ ᠢᠥᠢ ᠶ᠋ᠢᠨ ᠦᠢᠯᠡᠰ ᠤ᠋ᠨ ᠵᠠᠮ ᠳ᠋ᠤ ᠬᠤᠪᠢᠰᠤᠯᠳᠠ ᠠᠪᠴᠢᠷᠠᠯᠠ᠃ ᠲᠡᠷᠡ ᠡᠨᠡ ᠬᠦ᠌ ᠬᠤᠪᠤᠷ ᠨᠠᠨᠳᠢᠨ ᠠᠵᠠ ᠲᠤᠬᠢᠶᠠᠯ ᠢ᠋ ᠠᠳᠬᠤᠨ ᠵᠠᠯᠠᠢᠳ ᠬᠤᠰᠢᠭᠤᠨ ᠤ᠋ ᠱᠦᠢ ᠲᠢᠶᠠᠨ ᠭᠤᠤ ᠢ ᠠᠮᠤ ᠪᠤᠳᠠᠭᠠᠨ ᠤ᠋ ᠺᠤᠮᠫᠠᠨᠢ ᠲᠠᠢ ᠬᠠᠮᠳᠤᠷᠠᠨ ᠦᠯᠦᠬᠡᠢ ᠨᠤᠲᠤᠭ ᠳᠠᠭᠠᠨ ᠵᠠᠯᠠᠢᠳ ᠬᠤᠰᠢᠭᠤᠨ ᠤ᠋ ᠨᠦᠩ ᠢᠥᠢ ᠲᠠᠷᠢᠶᠠᠯᠠᠩ ᠮᠠᠯ ᠠᠵᠤ ᠠᠬᠤᠢ ᠶ᠋ᠢᠨ ᠲᠤᠰᠬᠠᠢ ᠬᠤᠷᠰᠢᠶᠠ ᠶ᠋ᠢ ᠪᠠᠢᠭᠤᠯᠤᠭᠰᠠᠨ ᠪᠦᠬᠡᠳ 3 ᠲᠦᠮᠡ ᠭᠠᠷᠤᠢ ᠮᠣ᠌ ᠵᠢᠨ ᠤᠰᠤᠨ ᠲᠤᠳᠤᠷᠭᠠ ᠵᠢᠨ ᠰᠠᠭᠤᠷᠢᠨ ᠭᠠᠷᠭᠠᠵᠦ᠂ ᠤᠳᠤ ᠶ᠋ᠢᠨ ᠪᠠᠢᠭᠠ 《ᠬᠢᠩᠭᠠᠨ ᠠᠢᠮᠠᠭ ᠤ᠋ᠨ ᠤᠨᠴᠠ ᠭᠠᠷᠤᠯᠳᠠ》 ᠬᠡᠬᠦ ᠲᠤᠮᠤ ᠳᠡᠯᠭᠡᠭᠦᠷ ᠶ᠋ᠢᠡᠨ ᠨᠡᠭᠡᠭᠡᠵᠠᠢ᠃ ᠳᠡᠯᠬᠡᠬᠦᠷ ᠤ᠋ᠨ ᠵᠢᠡᠨ ᠬᠤᠢᠳᠦ ᠬᠠᠨᠠᠨ ᠳᠡᠭᠡᠷᠠ ᠪᠤᠭᠳᠠ ᠠᠭᠤᠯᠠ ᠶ᠋ᠢᠨ ᠵᠢᠷᠤᠭ ᠢ᠋ ᠡᠯᠬᠦᠵᠤ᠂ ᠡᠮᠦᠨᠠ ᠬᠠᠨᠠᠨ ᠳᠡᠭᠡᠷᠡ ᠴᠤᠤᠯ ᠭᠤᠤᠯ ᠤ᠋ᠨ ᠭᠤᠷᠪᠠᠨ ᠤᠯᠠᠷᠢᠯ ᠤ᠋ᠨ ᠦᠵᠡᠮᠵᠢ ᠶ᠋ᠢᠨ ᠵᠢᠷᠤᠭ ᠢ᠋ ᠡᠯᠬᠦᠨ᠂ ᠲᠡᠬᠦᠨ ᠡᠴᠡ ᠪᠠᠨ ᠳᠠᠭᠠᠯᠳᠤᠭᠤᠯᠤᠨ ᠬᠢᠩᠭᠠᠨ ᠨᠤᠲᠤᠭ ᠤ᠋ᠨ ᠠᠭᠤᠯᠠ ᠤᠰᠤ᠂ ᠠᠮᠤ ᠲᠠᠷᠢᠶᠠ᠂ ᠮᠠᠯ ᠰᠦᠷᠦᠭ ᠤ᠋ᠨ ᠵᠢᠷᠤᠭ ᠢ᠋ ᠡᠯᠬᠦᠵᠤ᠂ ᠬᠠᠷᠠᠭᠰᠠᠨ ᠪᠤᠯᠭᠠᠨ ᠳ᠋ᠤ ᠪᠤᠬᠢᠷᠳᠤᠯ ᠦᠬᠡᠢ ᠠᠮᠤ ᠳᠠᠷᠢᠶᠠ ᠢᠳᠡᠭᠡᠨ ᠤᠮᠳᠠᠭᠠᠨ ᠤ᠋ ᠦᠨᠦᠷ ᠠᠮᠳᠠ ᠵᠢ ᠮᠡᠳᠡᠷᠡᠬᠦᠯᠦᠨᠠ᠃ 《ᠪᠢ ᠪᠤᠯ ᠨᠤᠳᠤᠭ ᠤ᠋ᠨ ᠵᠢᠡᠨ ᠪᠤᠭᠳᠠ ᠠᠭᠤᠯᠠᠨ ᠳ᠋ᠤ ᠠᠪᠠᠷᠢᠵᠦ᠂ ᠴᠤᠤᠯ ᠭᠤᠤᠯ ᠳ᠋ᠤ ᠤᠮᠪᠠᠵᠦ ᠦᠰᠦᠭᠰᠡᠨ ᠬᠦᠮᠦᠨ ᠶᠤᠮ》 ᠭᠡᠳ ᠵᠢᠶᠠᠩ ᠬᠤᠩ ᠢᠥᠢ ᠪᠠᠬᠠᠷᠬᠠᠯ ᠲᠦᠷᠦᠨᠠ᠃
ᠤᠨᠠᠭᠰᠠᠨ ᠰᠢᠷᠤᠢ ᠠᠯᠳᠠ᠂ ᠤᠤᠭᠤᠭᠰᠠᠨ ᠤᠰᠤ ᠷᠠᠰᠢᠶᠠᠨ ᠭᠡᠳᠡᠭᠴᠢᠯᠡᠨ ᠵᠢᠶᠠᠩ ᠬᠤᠩ ᠢᠥᠢ ᠵᠦᠪᠬᠡᠨ ᠳᠤᠳᠤᠷᠭᠠ ᠬᠤᠳᠠᠯᠳᠤᠭᠠᠳ ᠠᠮᠢ ᠪᠠᠨ ᠪᠤᠷᠤᠯᠠᠭᠤᠯᠵᠦ ᠶᠠᠪᠤᠭᠠ ᠦᠬᠡᠢ᠂ ᠦᠯᠦᠬᠡᠢ ᠨᠤᠳᠤᠭ ᠤ᠋ᠨ ᠵᠢᠡᠨ ᠪᠠᠢᠭᠠᠯᠢ ᠠᠬᠤᠢ᠂ ᠮᠠᠯ ᠤ᠋ᠨ ᠠᠰᠢᠭ ᠰᠢᠮᠠ ᠲᠠᠷᠢᠶᠠᠯᠠᠩ ᠤ᠋ᠨ ᠪᠦᠳᠦᠭᠡᠬᠳᠡᠬᠦᠨ᠂ ᠤᠨᠴᠠ ᠭᠠᠷᠤᠯᠳᠠ ᠶ᠋ᠢᠨ ᠨᠡᠷᠠ ᠨᠦᠯᠦᠬᠡ ᠵᠢ ᠦᠷᠬᠡᠳᠬᠡᠨ᠂ ᠪᠤᠷᠤᠯᠠᠭᠤᠯᠭᠠ ᠰᠤᠷᠳᠠᠯᠴᠢᠯᠠᠭᠠ ᠵᠢ ᠬᠤᠤᠰᠯᠠᠭᠤᠯᠤᠨ ᠤᠢᠭᠠ ᠦᠬᠡᠢ ᠬᠦᠴᠦ ᠬᠦᠳᠡᠯᠮᠦᠷᠢ ᠪᠠᠨ ᠵᠠᠷᠤᠴᠠᠭᠤᠯᠵᠦ ᠶᠠᠪᠤᠨᠠ᠃ ᠲᠡᠷᠡ ᠬᠢᠩᠭᠠᠨ ᠠᠢᠮᠠᠭ ᠤ᠋ᠨ ᠪᠠᠷᠠᠭᠠ ᠪᠦᠳᠦᠭᠡᠭᠳᠡᠬᠦᠨ ᠶ᠋ᠢᠡᠷ ᠭᠤᠤᠯᠳᠠᠭᠤᠯᠤᠨ ᠪᠦᠬᠦ ᠤᠷᠤᠨ ᠤ᠋ 12 ᠠᠢᠮᠠᠭ ᠬᠤᠳᠠ ᠶ᠋ᠢᠨ ᠰᠤᠳᠤᠨ ᠪᠠᠷᠠᠭᠠ᠂ ᠦᠪᠡᠷ ᠤ᠋ᠨ ᠺᠤᠮᠫᠠᠨᠢ ᠶ᠋ᠢᠨ ᠪᠤᠷᠴᠠ᠂ ᠴᠠᠭᠠᠨ ᠢᠳᠡᠭᠡᠨ ᠶ᠋ᠢᠡᠨ ᠴᠤ᠌ ᠳᠠᠭᠠᠯᠳᠤᠭᠤᠯᠤᠨ ᠬᠤᠳᠠᠯᠳᠤᠵᠦ ᠪᠤᠢ᠃
ᠤᠳᠤ ᠵᠢᠶᠠᠩ ᠬᠤᠩ ᠢᠥᠢ ᠬᠢᠩᠭᠠᠨ ᠠᠢᠮᠠᠭ ᠤ᠋ᠨ ᠵᠠᠰᠠᠭ ᠤ᠋ᠨ ᠤᠷᠳᠤᠨ ᠡᠴᠡ ᠡᠷᠬᠡ ᠤᠯᠭᠤᠭᠰᠠᠨ 《ᠬᠢᠩᠭᠠᠨ ᠠᠢᠮᠠᠭ ᠤ᠋ᠨ ᠤᠨᠴᠠ ᠭᠠᠷᠤᠯᠳᠠ》 ᠬᠡᠮᠡᠬᠦ ᠲᠤᠮᠤ ᠳᠡᠯᠭᠡᠬᠦᠷ ᠢ᠋ ᠡᠵᠡᠩᠨᠡᠬᠦ ᠵᠢᠨ ᠬᠠᠮᠳᠤ ᠵᠠᠯᠠᠢᠳ ᠬᠤᠰᠢᠭᠤᠨ ᠤ᠋ ᠱᠦᠢ ᠲᠢᠶᠠᠨ ᠭᠤᠤ ᠢ ᠠᠮᠤ ᠪᠤᠳᠠᠭᠠᠨ ᠤ᠋ ᠺᠤᠮᠫᠠᠨᠢ ᠶ᠋ᠢᠨ ᠬᠦᠬᠡᠬᠤᠳᠠ ᠳ᠋ᠡᠬᠢ ᠲᠦᠯᠦᠭᠡᠯᠡᠭᠴᠢ ᠪᠡᠷ ᠠᠵᠢᠯᠯᠠᠵᠦ᠂ ᠲᠦᠷᠦᠯ ᠵᠦᠢᠯ᠂ ᠳᠡᠯᠭᠡᠨ ᠪᠤᠷᠤᠯᠠᠭᠤᠯᠭᠠ᠂ ᠡᠵᠡᠩᠨᠡᠨ ᠪᠤᠷᠤᠯᠠᠭᠤᠯᠭᠠ᠂ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠲᠧᠭᠨᠢᠭ ᠮᠡᠷᠭᠡᠵᠢᠯ ᠤ᠋ᠨ ᠰᠤᠷᠤᠯᠴᠠᠯᠭᠠ ᠰᠤᠯᠢᠯᠴᠠᠭᠠ ᠵᠢ ᠬᠤᠪᠢᠳᠠᠨ ᠬᠠᠮᠢᠶᠠᠷᠴᠤ᠂ ᠵᠠᠬᠠ ᠲᠠᠯᠬᠡᠬᠦᠷ ᠤ᠋ᠨ ᠠᠷᠠᠯᠵᠢᠶᠠ ᠦᠷᠢᠰᠦᠯᠳᠦᠬᠡᠨ ᠳ᠋ᠤ ᠤᠬᠠᠭᠠᠨ ᠳᠠᠮᠢᠷ ᠰᠤᠷᠢᠵᠦ ᠶᠠᠪᠤᠨᠠ᠃
ᠠᠮᠢᠳᠤᠷᠠᠯ ᠤ᠋ᠨ ᠵᠠᠮ ᠳ᠋ᠤ ᠰᠤᠩᠭᠤᠯᠳᠠ ᠤᠯᠠᠨ ᠲᠤᠬᠢᠶᠠᠯᠳᠤᠳᠠᠭ᠃ 《ᠬᠡᠵᠢᠶᠠ ᠬᠠᠮᠢᠭᠠ ᠠᠮᠢᠳᠤᠷᠠᠵᠦ᠂ ᠶᠠᠭᠤ ᠬᠢᠭᠰᠡᠨ ᠴᠤ᠌ ᠳᠡᠰᠪᠦᠷᠢᠳᠡᠢ ᠴᠢᠷᠮᠠᠢᠯᠭᠠ᠂ ᠦᠨᠡᠨᠴᠢ ᠢᠳᠡᠭᠡᠯ ᠢ᠋ ᠡᠷᠬᠢᠮᠯᠡᠪᠡᠯ ᠯᠠᠪᠳᠠᠢ ᠠᠮᠵᠢᠯᠳᠠ ᠳ᠋ᠤ ᠬᠦᠷᠴᠦ ᠴᠢᠳᠠᠨᠠ ᠭᠡᠵᠦ ᠪᠢ ᠪᠤᠳᠤᠳᠠᠭ᠃ ᠮᠠᠨ ᠤ᠋ ᠨᠢᠭᠡ ᠠᠬᠠ ᠵᠢᠨ 〈ᠴᠢ ᠳᠤᠳᠤᠷᠭᠠ ᠪᠠᠨ ᠬᠤᠳᠠᠯᠳᠤᠵᠦ ᠯᠡ ᠪᠠᠢᠪᠠᠯ ᠳᠤᠳᠤᠷᠭᠠ ᠴᠢᠮᠠ ᠵᠢ ᠳᠠᠨᠢᠬᠤ ᠡᠳᠦᠷ ᠪᠠᠢᠬᠤ ᠶᠤᠮ〉 ᠭᠡᠰᠡᠨ ᠦᠬᠡ ᠨᠠᠳᠠ ᠳ᠋ᠤ ᠶᠡᠬᠡ ᠵᠤᠷᠢᠭᠵᠢᠭᠤᠯᠤᠯ ᠪᠤᠯᠤᠭᠰᠠᠨ》 ᠭᠡᠵᠦ ᠵᠢᠶᠠᠩ ᠬᠤᠩ ᠢᠥᠢ ᠤᠴᠢᠷᠳᠠᠢ ᠬᠡᠯᠡᠨᠠ᠃ ᠲᠡᠬᠦᠨ ᠤ᠋ ᠠᠯᠬᠤᠭᠰᠠᠨ ᠮᠦᠷ ᠪᠦᠳᠦᠭᠡᠭᠰᠡᠨ ᠦᠢᠯᠡᠰ ᠬᠡᠨ ᠨᠢᠭᠡᠨ ᠳ᠋ᠤ ᠰᠡᠩᠬᠡᠷᠡᠬᠦᠯᠦᠯ ᠵᠤᠷᠢᠭᠵᠢᠭᠤᠯᠤᠯ ᠪᠤᠯᠬᠤ ᠨᠢ ᠳᠠᠮᠵᠢᠭ ᠦᠬᠡᠢ᠃
ᠤᠳᠠᠰᠤ ᠲᠤᠤᠭᠠᠷᠴᠤ ᠵᠠᠬᠢᠶᠠᠯᠠᠭᠠ ᠢᠷᠡᠪᠡ᠃ ᠵᠢᠶᠠᠩ ᠬᠤᠩ ᠢᠥᠢ ᠪᠠᠷᠠᠭᠠ ᠪᠠᠨ ᠠᠴᠢᠵᠦ ᠰᠤᠷᠤᠭᠰᠠᠨ ᠵᠠᠩ ᠶ᠋ᠢᠡᠷ ᠶ᠋ᠢᠡᠨ ᠮᠤᠲ᠋ᠤᠷ ᠶ᠋ᠢᠡᠨ ᠤᠨᠤᠵᠦ ᠶᠠᠭᠠᠷᠠᠪᠴᠢᠯᠠᠨ ᠮᠤᠷᠳᠠᠯᠠ ᠁