ᠲᠤᠩᠭᠠᠯᠠᠭ ᠰᠠᠢᠬᠠᠨ ᠵᠤᠨᠤ ᠦᠷᠯᠦᠭᠡ᠂ ᠯᠢᠨ ᠾᠧ ᠲᠤᠭᠤᠷᠢᠭᠤᠨ ᠤᠯᠠᠭᠠᠨᠳᠤᠭ ᠪᠠᠯᠭᠠᠰᠤᠶ᠋ᠢᠨ ᠱᠢᠶᠠᠨ ᠨᠦᠩ ᠤᠳᠤᠬᠢᠴᠢᠯᠠᠭ᠍ᠰᠠᠨ ᠲᠦᠭᠦᠭᠡᠷᠦᠮᠵᠢᠲᠦ ᠲᠠᠷᠢᠶᠠᠯᠠᠩᠤᠨ ᠶᠡᠷᠦᠩᠬᠡᠢᠯᠡᠭ᠌ᠰᠡᠨ ᠬᠦᠷᠢᠶᠡᠯᠡᠩᠳᠤ ᠬᠦᠷᠬᠦ᠌ᠳᠤ᠂ ᠱᠢᠨᠡ ᠰᠤᠷᠭᠤᠭ ᠵᠢᠮᠢᠰ ᠨᠤᠭᠤᠭᠠᠶ᠋ᠢᠨ ᠦᠨᠦᠷ ᠬᠠᠩᠬᠤᠯᠤᠨ ᠲᠠᠷᠢᠶᠠᠴᠢᠨ ᠵᠥ᠍ ᠶᠤᠤ ᠹᠸᠢ ᠲᠤᠯᠠᠭᠠᠨ ᠬᠦᠯᠡᠮᠵᠢᠳᠡᠭᠡᠨ ᠦᠷᠭᠡᠰᠦᠲᠦ ᠬᠡᠮᠬᠡᠪᠠᠨ ᠬᠤᠷᠢᠶᠠᠵᠤ ᠪᠠᠢᠯᠠ᠃ ᠴᠡᠯ ᠨᠤᠭᠤᠭᠠᠨ ᠦᠷᠭᠡᠰᠦᠳᠦ ᠬᠡᠮᠭᠡ ᠦᠵᠡᠭ᠌ᠰᠡᠨ ᠪᠦᠭᠦᠨᠢ ᠱᠢᠯᠤᠰᠤ ᠬᠤᠷᠠᠭᠤᠯᠤᠨᠡ᠃
《ᠮᠢᠨᠤ ᠭᠦᠯᠡᠮᠵᠢᠶ᠋ᠢᠨ ᠲᠠᠯᠠᠪᠠᠢ 1.5 ᠮᠦ᠍᠂ ᠨᠢᠭᠡ ᠡᠭᠡᠯᠵᠢᠳᠤ 4 ᠲᠦᠮᠡᠨ ᠵᠢᠩ ᠦᠷᠭᠡᠰᠦᠲᠦ ᠬᠡᠮᠬᠡ ᠬᠤᠷᠢᠶᠠᠳᠠᠭ᠂ ᠵᠢᠩ ᠪᠦᠷᠢᠳᠡᠭᠡᠨ 3.5 ᠲᠦᠭᠦᠷᠢᠭᠢᠶᠠᠷ ᠬᠤᠳᠠᠯᠳᠤᠬᠤᠳᠤ ᠨᠢᠬᠡ ᠯᠠ ᠡᠬᠡᠯᠵᠢᠳᠤ 14 ᠲᠦᠮᠡᠨ ᠲᠦᠭᠦᠷᠢᠭᠤᠨ ᠤᠷᠤᠯᠭᠠ ᠤᠯᠤᠨᠠ᠃ ᠡᠯᠡ ᠵᠦᠢᠯᠤᠨ ᠵᠠᠷᠤᠳᠠᠯ ᠰᠦᠢᠳᠭᠡᠯᠢᠶᠠᠨ ᠭᠠᠷᠭᠠᠭᠠᠳ ᠴᠡᠪᠡᠷ ᠤᠷᠤᠯᠭᠠ ᠡᠩᠤᠨ ᠵᠠᠳᠠᠭᠠᠢ ᠲᠠᠷᠢᠶᠠ ᠲᠠᠷᠢᠭ᠍ᠰᠠᠨᠠᠴᠠ ᠬᠡᠳᠦᠨ ᠲᠠᠬᠢᠨ ᠢᠯᠡᠭᠦᠦ ᠱᠢᠦ》 ᠬᠡᠵᠦ᠍ ᠵᠦ᠍ ᠶᠤᠤ ᠹᠧᠢ ᠢᠨᠢᠶᠡᠮᠰᠦᠭ᠌ᠯᠡᠨ ᠶᠠᠷᠢᠨᠠ᠃
ᠤᠯᠠᠭᠠᠨᠳᠤᠭ ᠪᠠᠯᠭᠠᠰᠤᠶ᠋ᠢᠨ ᠤᠯᠠᠨ ᠡᠷᠦᠬᠡ ᠵᠥ᠍ ᠶᠤᠤ ᠹᠸᠢ ᠱᠢᠭ ᠱᠢᠶᠠᠨ ᠨᠦᠩ ᠺᠤᠮᠫᠠᠨᠢᠶ᠋ᠢᠨ ᠬᠦᠯᠡᠮᠵᠢᠶ᠋ᠢ ᠲᠦᠷᠢᠶᠡᠰᠦᠯᠡᠵᠥ᠍᠂ ᠢᠳᠡᠱᠢᠨ ᠨᠤᠭᠤᠭᠠ ᠵᠢᠮᠢᠰ ᠲᠠᠷᠢᠵᠤ ᠪᠠᠢᠳᠠᠭ᠃ ᠱᠢᠶᠠᠨ ᠨᠦᠩ ᠺᠤᠮᠫᠠᠨᠢᠶ᠋ᠢᠨ ᠳᠡᠳ᠋ ᠶᠡᠷᠦᠩᠬᠡᠢ ᠲᠠᠭᠠᠭᠠᠮᠠᠯ ᠼᠦᠢ ᠮᠢᠨᠤ ᠲᠠᠨᠢᠯᠴᠠᠭᠤᠯᠬᠤᠪᠠᠷ᠂ ᠺᠤᠮᠫᠠᠨᠢᠨᠢ 《ᠠᠵᠤ ᠠᠬᠤᠢ᠍ᠢᠯᠠᠯ ᠬᠠᠷᠢᠭᠤᠴᠠᠨ ᠪᠠᠢᠭᠤᠯᠵᠤ᠂ ᠲᠠᠷᠢᠶᠠᠴᠢᠨ ᠲᠦᠷᠢᠶᠡᠰᠦᠯᠡᠨ ᠬᠡᠷᠡᠭ᠌ᠯᠡᠬᠦ᠌》 ᠬᠡᠯᠪᠡᠷᠢᠶ᠋ᠢ ᠬᠡᠷᠡᠭ᠌ᠵᠢᠭᠦᠯᠵᠦ᠍᠂ ᠵᠢᠯ ᠪᠦᠷᠢ ᠮᠦ᠍ ᠪᠦᠷᠢᠶ᠋ᠢᠨ 800 ᠲᠦᠭᠦᠷᠢᠭᠤᠨ ᠦᠨᠡᠪᠠᠷ ᠲᠠᠷᠢᠶᠠᠴᠢᠳᠤᠨ ᠲᠠᠷᠢᠶᠠᠨ ᠭᠠᠵᠠᠷᠤᠨ ᠡᠵᠡᠩᠨᠡᠯᠲᠡᠶ᠋ᠢᠨ ᠡᠷᠭᠡᠶ᠋ᠢ ᠱᠢᠯᠵᠢᠭᠦᠯᠦᠨ ᠠᠪᠴᠠᠢ᠃ ᠲᠤᠯᠠᠭᠠᠨ ᠬᠦᠯᠡᠮᠵᠢᠶ᠋ᠢ ᠪᠠᠢᠭᠤᠯᠤᠭ᠍ᠰᠠᠨᠤ ᠲᠠᠷᠠᠭᠠ᠂ ᠺᠤᠮᠫᠠᠨᠢᠠᠴᠠ ᠨᠢᠭᠡ ᠬᠡᠰᠡᠭᠢ ᠡᠵᠡᠩᠨᠡᠬᠦ᠌ᠠᠴᠠ ᠭᠠᠳᠠᠨᠠ᠂ ᠤᠯᠠᠩᠬᠢ ᠬᠦᠯᠡᠮᠵᠢᠪᠠᠨ ᠲᠠᠷᠢᠶᠠᠴᠢᠳᠲᠤ ᠪᠤᠴᠠᠭᠠᠨ ᠲᠦᠷᠢᠶᠡᠰᠦᠯᠡᠭᠦᠯᠵᠦ᠍᠂ ᠺᠤᠮᠫᠠᠨᠢᠠᠴᠠ ᠲᠦᠬᠦᠬᠡᠷᠦᠮᠵᠢᠳᠦ ᠲᠠᠷᠢᠶᠠᠯᠠᠩᠤᠨ ᠪᠠᠷᠢᠮᠵᠢᠶᠠᠪᠠᠷ ᠲᠤᠯᠠᠭᠠᠨ ᠬᠦᠯᠡᠮᠵᠢᠶ᠋ᠢᠨ ᠢᠳᠡᠱᠢᠨ ᠨᠤᠭᠤᠭᠠᠶ᠋ᠢᠨ ᠲᠠᠷᠢᠵᠦ᠍ ᠠᠷᠠᠴᠢᠯᠠᠬᠤ ᠪᠦᠬᠦ᠌ ᠶᠠᠪᠤᠴᠠᠶ᠋ᠢᠨ ᠮᠡᠷᠭᠡᠵᠢᠯᠤᠨ ᠵᠢᠯᠤᠭᠤᠳᠤᠮᠵᠢᠶ᠋ᠢᠨ ᠦᠢᠯᠡᠴᠢᠯᠡᠭᠡᠶ᠋ᠢ ᠬᠠᠷᠢᠭᠤᠴᠠᠵᠤ᠂ ᠪᠠᠰᠠ ᠺᠤᠮᠫᠠᠨᠢᠶ᠋ᠢᠨᠢᠶᠠᠨ ᠪᠡᠯᠡᠨ ᠪᠠᠢᠭᠠ ᠪᠤᠷᠤᠯᠠᠭᠤᠯᠭᠠᠶ᠋ᠢᠨ ᠰᠦᠯᠵᠢᠶᠡᠪᠠᠨ ᠠᠱᠢᠭ᠍ᠯᠠᠨ᠂ ᠲᠠᠷᠢᠵᠤ ᠪᠤᠯᠪᠠᠰᠤᠷᠠᠭ᠍ᠰᠠᠨ ᠵᠢᠮᠢᠰ ᠨᠤᠭᠤᠭᠠᠶ᠋ᠢ ᠬᠤᠷᠢᠶᠠᠨ ᠠᠪᠴᠤ᠌ ᠪᠤᠷᠤᠯᠠᠭᠤᠯᠳᠠᠭ ᠪᠠᠢᠨᠠ᠃
ᠬᠡᠬᠦ᠌ᠳᠡᠭᠡᠨ ᠬᠤᠳᠠᠯᠳᠤᠨ ᠠᠪᠬᠤ ᠦᠨᠡᠨᠢ ᠲᠤᠬᠠᠢᠶ᠋ᠢᠨ ᠭᠠᠵᠠᠷᠤᠨ ᠵᠠᠬᠠ ᠲᠡᠯᠭᠡᠭᠦᠷᠤᠨ ᠪᠦᠬᠡᠮᠢᠶᠠᠷ ᠪᠤᠷᠤᠯᠠᠭᠤᠯᠬᠤ ᠦᠨᠡᠠᠴᠠ ᠦᠨᠳᠦᠷ ᠪᠠᠢᠵᠤ᠂ ᠪᠦᠭᠦᠨᠢ ᠪᠡᠭᠡᠵᠢᠩ ᠲᠢᠶᠠᠨᠵᠢᠨ ᠵᠡᠷᠭᠡ ᠲᠤᠮᠤ ᠬᠤᠲᠠ ᠤᠷᠤᠭᠤ ᠪᠤᠷᠤᠯᠠᠭᠤᠯᠳᠠᠭ ᠪᠠᠢᠨᠠ᠃
ᠯᠢᠨ ᠾᠧ ᠲᠤᠭᠤᠷᠢᠭᠤᠨᠶ᠋ᠢᠨ ᠪᠦᠸᠧ ᠯᠢ ᠲᠠᠷᠢᠶᠠᠯᠠᠩᠤᠨ ᠲᠠᠯᠠᠪᠠᠢᠨᠢ ᠭᠧᠷᠮᠠᠨᠤ ᠡᠬᠢ ᠪᠠᠶᠠᠯᠢᠭᠤᠨ ᠱᠢᠰᠲ᠋ᠧᠮᠢ ᠠᠱᠢᠭ᠍ᠯᠠᠨ ᠡᠨᠧᠷᠬᠢᠶ᠋ᠢᠨ ᠬᠤᠷᠤᠭ᠍ᠳᠠᠯᠢ ᠪᠠᠭᠠᠰᠭᠠᠵᠤ᠂ ᠢᠰᠷᠧᠯᠤᠨ ᠤᠶᠤᠨᠲᠤ ᠤᠰᠤ ᠪᠤᠷᠳᠤᠭᠤᠷᠢ ᠨᠢᠭᠡ ᠴᠤᠭ᠍ᠴᠠᠵᠢᠭᠤᠯᠬᠤ ᠮᠡᠷᠭᠡᠵᠢᠯᠢ ᠤᠷᠤᠭᠤᠯᠵᠤ ᠠᠪᠴᠢᠷᠠᠨ 70% ᠶ᠋ᠢᠨ ᠤᠰᠤ᠂ ᠪᠤᠷᠳᠤᠭᠤᠷᠢ ᠠᠷᠪᠢᠯᠠᠵᠤ᠂ 50% ᠠᠴᠠ ᠲᠡᠭᠡᠭ᠌ᠰᠢᠬᠢ ᠲᠠᠷᠢᠶᠠᠨᠤ ᠡᠮᠢ ᠪᠠᠭᠠᠰᠭᠠᠵᠤ᠂ 0.01 ᠮᠢᠯᠢᠮᠧᠲᠷᠤᠨ ᠱᠢᠨᠡ ᠤᠯᠠᠨ ᠤᠯᠤᠰᠤᠨ ᠪᠠᠷᠢᠮᠵᠢᠶᠠᠲᠤ ᠲᠠᠷᠢᠶᠠᠨᠤ ᠪᠦᠷᠬᠦᠪᠴᠢᠶ᠋ᠢ ᠬᠡᠷᠡᠭ᠌ᠯᠡᠵᠦ᠍᠂ ᠪᠤᠷᠳᠤᠭᠤᠷᠢ ᠬᠢᠵᠠᠭᠠᠷᠯᠠᠵᠤ ᠦᠷᠡ ᠠᠱᠢᠭᠢ ᠨᠡᠮᠡᠭ᠌ᠳᠡᠭᠦᠯᠬᠦ᠂ ᠤᠰᠤᠶ᠋ᠢ ᠬᠢᠵᠠᠭᠠᠷᠯᠠᠨ ᠬᠤᠷᠤᠭ᠍ᠳᠠᠯᠢ ᠪᠠᠭᠠᠰᠭᠠᠬᠤ᠂ ᠡᠮᠢ ᠬᠢᠵᠠᠭᠠᠷᠯᠠᠨ ᠬᠤᠤᠷ ᠬᠦᠨᠦᠭᠡᠯᠢ ᠪᠠᠭᠠᠰᠭᠠᠬᠤ ᠵᠤᠷᠢᠯᠭᠠᠳᠠᠭᠠᠨ ᠬᠦᠷᠪᠡ᠃ ᠲᠦᠬᠦᠭᠡᠷᠦᠮᠵᠢᠲᠦ ᠲᠠᠷᠢᠶᠠᠯᠠᠩᠤᠨ ᠦᠢᠯᠡᠳᠪᠦᠷᠢᠯᠡᠯᠤᠨ ᠱᠠᠭᠠᠷᠳᠠᠯᠭᠠᠲᠠᠢ ᠤᠶᠠᠯᠳᠤᠭᠤᠯᠤᠨ᠂ ᠯᠢᠨ ᠾᠧ ᠲᠤᠭᠤᠷᠢᠭ 2 ᠰᠠᠭᠤᠷᠢ ᠦᠨᠳᠦᠷ ᠪᠠᠷᠢᠮᠵᠢᠶᠠᠲᠤ ᠤᠳᠤᠬᠢᠴᠢᠯᠠᠭ᠍ᠰᠠᠨ ᠲᠦᠭᠦᠭᠡᠷᠦᠮᠵᠢᠲᠦ ᠲᠠᠷᠢᠶᠠᠯᠠᠩᠤᠨ ᠱᠢᠨᠡ ᠡᠭᠦᠯᠳᠡᠷ ᠱᠢᠨᠡ ᠮᠡᠷᠭᠡᠵᠢᠯᠤᠨ ᠦᠵᠡᠰᠭᠦᠯᠡᠩᠤᠨ ᠲᠢᠩᠬᠢᠮ᠂ 6 ᠰᠠᠭᠤᠷᠢ ᠴᠢᠬᠢ ᠪᠤᠢᠵᠢᠭᠤᠯᠬᠤ ᠲᠦᠪᠢ ᠪᠠᠢᠭᠤᠯᠪᠠ᠃ ᠢᠩᠬᠢᠵᠤ ᠤᠳᠤᠬᠢᠴᠢᠯᠠᠭ᠍ᠰᠠᠨ ᠲᠡᠭᠡᠳᠦ ᠱᠢᠨᠡ ᠮᠡᠷᠭᠡᠵᠢᠯᠤᠨ ᠲᠠᠷᠢᠶᠠᠯᠠᠩᠤᠨ ᠵᠢᠱ᠌ᠢᠶᠡ ᠦᠵᠡᠭᠦᠯᠬᠦ᠌ ᠬᠦᠷᠢᠶᠡᠯᠡᠩᠢᠶᠠᠷ ᠠᠴᠢᠶᠠᠯᠠᠭ᠍ᠴᠢ ᠪᠤᠯᠭᠠᠭ᠍ᠰᠠᠨᠢᠶᠠᠷ ᠡᠨᠡ ᠵᠢᠯ ᠯᠢᠨ ᠾᠧ ᠲᠤᠭᠤᠷᠢᠭᠤᠨ ᠲᠦᠬᠦᠭᠡᠷᠦᠮᠵᠢᠲᠦ ᠲᠠᠷᠢᠶᠠᠯᠠᠩᠤᠨ ᠲᠠᠯᠠᠪᠠᠢ ᠱᠢᠨᠡᠪᠠᠷ 6000 ᠭᠠᠷᠤᠢ ᠮᠦ᠍ ᠨᠡᠮᠡᠭ᠌ᠳᠡᠬᠦ᠌ ᠪᠤᠯᠤᠨᠠ᠃
ᠯᠢᠨ ᠾᠧ ᠲᠤᠭᠤᠷᠢᠭᠤᠨ ᠲᠦᠭᠦᠭᠡᠷᠦᠮᠵᠢᠲᠦ ᠲᠠᠷᠢᠶᠠᠯᠠᠩᠤᠨ ᠬᠦᠭ᠌ᠵᠢᠯᠲᠡᠶ᠋ᠢᠨ ᠪᠠᠢᠳᠠᠯᠨᠢ ᠪᠠᠶᠠᠨᠨᠠᠭᠤᠷ ᠬᠤᠲᠠᠶ᠋ᠢᠨ ᠲᠦᠭᠦᠭᠡᠷᠦᠮᠵᠢᠲᠦ ᠲᠠᠷᠢᠶᠠᠯᠠᠩᠤᠨ ᠬᠦᠭ᠌ᠵᠢᠯᠲᠡᠶ᠋ᠢᠨ ᠨᠢᠭᠡᠨ ᠬᠤᠷᠢᠶᠠᠩᠭᠤᠢ ᠲᠦᠷᠰᠦ ᠪᠤᠯᠤᠨᠠ᠃
ᠤᠢ᠍ᠢᠷᠠᠶ᠋ᠢᠨ ᠵᠢᠯᠠᠴᠠ᠂ ᠪᠠᠶᠠᠨᠨᠠᠭᠤᠷ ᠬᠤᠲᠠ ᠲᠦᠭᠦᠭᠡᠷᠦᠮᠵᠢᠲᠦ ᠲᠠᠷᠢᠶᠠᠯᠠᠩᠢ ᠤᠳᠤ ᠦᠶᠡᠶ᠋ᠢᠨ ᠲᠠᠷᠢᠶᠠᠯᠠᠩᠢ ᠬᠦᠭ᠌ᠵᠢᠭᠦᠯᠬᠦ᠂ ᠲᠠᠷᠢᠶᠠᠯᠠᠩᠤᠨ ᠬᠠᠩᠭᠠᠯᠭᠠᠶ᠋ᠢᠨ ᠲᠠᠯᠠᠶ᠋ᠢᠨ ᠪᠦᠲᠦᠴᠡᠶ᠋ᠢᠨ ᠴᠢᠨᠠᠷᠲᠠᠢ ᠦᠭᠡᠷᠡᠴᠢᠯᠡᠯᠲᠡᠶ᠋ᠢ ᠠᠬᠢᠭᠤᠯᠬᠤ ᠪᠤᠯᠤᠨ ᠮᠦ᠍ ᠪᠦᠷᠢᠶ᠋ᠢᠨ ᠲᠤᠮᠳᠠᠴᠢ ᠦᠢᠯᠡᠳᠪᠦᠷᠢᠯᠡᠯᠤᠨ ᠦᠷᠳᠡᠭᠢ 2 ᠲᠦᠮᠡᠨ ᠲᠦᠭᠦᠷᠢᠭᠲᠤ ᠬᠦᠷᠭᠡᠬᠦ᠌ ᠬᠠᠷᠠᠯᠳᠠᠶ᠋ᠢ ᠪᠡᠶᠡᠯᠡᠬᠦᠯᠬᠦ᠌ ᠭᠤᠤᠯ ᠠᠷᠭᠠ ᠵᠠᠮ ᠪᠤᠯᠭᠠᠵᠤ ᠪᠠᠢᠨᠠ᠃ ᠤᠳᠤᠬᠠᠨ ᠪᠤᠯᠲᠠᠯᠠ᠂ ᠪᠦᠬᠦ᠌ ᠬᠤᠲᠠᠶ᠋ᠢᠨ ᠲᠦᠭᠦᠭᠡᠷᠦᠮᠵᠢᠲᠦ ᠲᠠᠷᠢᠶᠠᠯᠠᠩᠤᠨ ᠡᠵᠡᠯᠡᠭ᠌ᠰᠡᠨ ᠲᠠᠯᠠᠪᠠᠢ 15.02 ᠲᠦᠮᠡᠨ ᠮᠦ᠍᠂ ᠦᠢᠯᠡᠳᠪᠦᠷᠢᠯᠡᠯᠤᠨ ᠲᠠᠯᠠᠪᠠᠢᠨᠢ 9.5 ᠲᠦᠮᠡᠨ ᠮᠦ᠍ᠳᠤ ᠬᠦᠷᠴᠦ᠍᠂ ᠲᠦᠬᠦᠭᠡᠷᠦᠮᠵᠢᠲᠦ ᠲᠠᠷᠢᠶᠠᠯᠠᠩᠤᠨ ᠪᠦᠲᠦᠭᠡᠨ ᠪᠠᠢᠭᠤᠯᠤᠯᠲᠠᠳᠤ ᠤᠷᠤᠯᠴᠠᠭ᠍ᠰᠠᠨ ᠠᠵᠤ ᠠᠬᠤᠢ᠍ᠢᠯᠠᠯ 30᠂ ᠲᠤᠰᠭᠠᠢ ᠬᠤᠷᠱᠢᠶᠠ 37 ᠪᠤᠯᠵᠤ᠂ ᠲᠦᠬᠦᠭᠡᠷᠦᠮᠵᠢᠲᠦ ᠲᠠᠷᠢᠶᠠᠯᠠᠩ ᠡᠷᠬᠢᠯᠡᠭ᠌ᠰᠡᠨ ᠲᠠᠷᠢᠶᠠᠴᠢᠨ 1.2 ᠲᠦᠮᠡᠨ ᠬᠦᠮᠦᠨ ᠪᠤᠯᠪᠠ᠃ ᠪᠦᠬᠦ᠌ ᠬᠤᠲᠠᠪᠠᠷᠢᠶᠠᠨ ᠨᠡᠢᠲᠡ 10 ᠰᠠᠭᠤᠷᠢ ᠲᠦᠮᠡᠨ ᠮᠦ᠍ᠶ᠋ᠢᠨ ᠲᠦᠭᠦᠭᠡᠷᠦᠮᠵᠢᠲᠦ ᠲᠠᠷᠢᠶᠠᠯᠠᠩᠤᠨ ᠬᠦᠷᠢᠶᠡᠯᠡᠩᠢ ᠪᠦᠲᠦᠭᠡᠨ ᠪᠠᠢᠭᠤᠯᠵᠤ᠂ ᠤᠳᠤ ᠯᠢᠨ ᠾᠧ ᠲᠤᠭᠤᠷᠢᠭᠤᠨ ᠤᠯᠠᠭᠠᠨᠳᠤᠭ ᠪᠠᠯᠭᠠᠰᠤ᠂ ᠳ᠋ᠧᠩᠺᠧᠦ ᠱᠢᠶᠠᠨᠤ ᠯᠦᠩ ᠱᠧᠩ ᠾᠧ ᠪᠠᠯᠭᠠᠰᠤ᠂ ᠦᠶᠦᠸᠠᠨ ᠱᠢᠶᠠᠨᠤ ᠯᠦᠩ ᠱᠢᠩ ᠴᠠᠩ ᠪᠠᠯᠭᠠᠰᠤᠶ᠋ᠢᠨ 3 ᠰᠠᠭᠤᠷᠢ ᠲᠦᠮᠡᠨ ᠮᠦ᠍ᠶ᠋ᠢᠨ ᠲᠦᠬᠦᠭᠡᠷᠦᠮᠵᠢᠲᠦ ᠲᠠᠷᠢᠶᠠᠯᠠᠩᠤᠨ ᠬᠦᠷᠢᠶᠡᠯᠡᠩᠢ ᠨᠢᠭᠡᠨᠲᠡ ᠪᠠᠢᠭᠤᠯᠵᠤ ᠲᠠᠭᠤᠰᠪᠠ᠃ ᠡᠭᠦᠨᠠᠴᠠ ᠭᠠᠳᠠᠨᠠ᠂ ᠪᠦᠬᠦ᠌ ᠬᠤᠲᠠᠶ᠋ᠢᠨ ᠲᠦᠬᠦᠬᠡᠷᠦᠮᠵᠢᠳᠦ ᠲᠠᠷᠢᠶᠠᠯᠠᠩᠤᠨ ᠬᠦᠷᠢᠶᠡᠯᠡᠩ 400 ᠭᠠᠷᠤᠢ ᠪᠤᠯᠵᠤ᠂ 1000 ᠮᠦ᠍ᠠᠴᠠ ᠲᠡᠭᠡᠭ᠌ᠰᠢᠬᠢ ᠲᠦᠭᠦᠭᠡᠷᠦᠮᠵᠢᠲᠦ ᠲᠠᠷᠢᠶᠠᠯᠠᠩᠤᠨ ᠬᠦᠷᠢᠶᠡᠯᠡᠩ 16 ᠪᠤᠯᠵᠤ᠂ ᠶᠡᠷᠦᠩᠬᠡᠢ ᠲᠠᠯᠠᠪᠠᠢᠶ᠋ᠢᠨ 36% ᠶ᠋ᠢ ᠡᠵᠡᠯᠡᠪᠡ᠃
ᠬᠠᠩᠭᠢᠨ ᠬᠤᠢᠲᠤ ᠬᠤᠱᠢᠭᠤᠨᠤ ᠱᠠᠮᠪᠠ ᠪᠠᠯᠭᠠᠰᠤᠶ᠋ᠢᠨ ᠵᠦᠩ ᠨᠠᠨ ᠴᠢᠦᠢ ᠲᠤᠰᠭᠤᠨᠤ ᠶᠢᠰᠦᠳᠦᠭᠡᠷ ᠲᠤᠭᠤᠢ᠍ᠢᠯᠠᠩᠤᠨ 200 ᠭᠠᠷᠤᠢ ᠰᠠᠭᠤᠷᠢ ᠲᠤᠯᠠᠭᠠᠨ ᠬᠦᠯᠡᠮᠵᠢᠳᠤ ᠡᠯᠡ ᠵᠦᠢᠯᠤᠨ ᠭᠤᠸᠠ ᠨᠤᠭᠤᠭᠠᠶ᠋ᠢᠨ ᠨᠢᠯᠬᠠ ᠴᠢᠬᠢ ᠤᠷᠭᠤᠵᠤ᠂ ᠠᠮᠢᠵᠢᠷᠠᠯᠤᠨ ᠬᠦᠴᠦᠨᠢᠶᠠᠷ ᠪᠢᠯᠬᠠᠨᠠ᠃
《ᠮᠠᠨᠤ ᠲᠤᠰᠭᠤᠨ ᠠᠳᠡ ᠵᠠᠬᠢᠶᠠᠯᠠᠭᠠᠶ᠋ᠢᠨ ᠴᠢᠬᠢ ᠪᠤᠢᠵᠢᠭᠤᠯᠳᠠᠭ᠂ ᠠᠮᠲᠠᠲᠤ ᠬᠡᠮᠬᠡ᠂ ᠲᠠᠷᠪᠤᠰ᠂ ᠲᠦᠪᠡᠳ ᠬᠠᠰᠢ᠂ ᠦᠷᠭᠡᠰᠦᠲᠦ ᠬᠡᠮᠬᠡ᠂ ᠭᠤᠱᠤᠭᠤᠨ ᠨᠤᠭᠤᠭᠠ᠂ ᠬᠠᠰᠢ᠂ ᠨᠠᠷᠠᠨ ᠬᠤᠸᠠᠷ ᠬᠦᠷᠲᠡᠯᠡ ᠪᠦᠷ ᠪᠤᠢ᠃ ᠶᠡᠷᠦᠳᠡᠭᠡᠨ ᠴᠢᠬᠢ ᠪᠤᠢᠵᠢᠭᠤᠯᠬᠤ ᠬᠤᠭᠤᠴᠠᠭᠠᠨᠢ 2 ᠰᠠᠷᠠ ᠤᠷᠴᠢᠮ᠂ ᠤᠳᠤ ᠮᠠᠨᠤ ᠲᠤᠰᠭᠤᠨᠤ 90% ᠠᠴᠠ ᠲᠡᠭᠡᠭ᠌ᠰᠢᠬᠢ ᠲᠤᠰᠭᠤᠨᠤ ᠠᠷᠠᠳ ᠡᠨᠡ ᠬᠦ᠌ ᠪᠠᠶᠠᠵᠢᠨ ᠴᠢᠨᠡᠭᠡᠯᠢᠭ᠌ᠵᠢᠭᠦᠯᠬᠦ᠌ ᠠᠵᠤ ᠦᠢᠯᠡᠰᠤᠨ ᠬᠡᠯᠬᠢᠶᠡᠳᠤ ᠤᠷᠤᠯᠴᠠᠵᠤ᠂ ᠨᠢᠭᠡ ᠪᠦᠯᠦᠭ ᠲᠤᠮᠤ ᠡᠷᠦᠬᠡᠶ᠋ᠢᠨ ᠵᠢᠯᠤᠨ ᠤᠷᠤᠯᠭᠠᠨᠢ ᠪᠦᠷ 30 — 40 ᠲᠦᠮᠡᠨ ᠲᠦᠭᠦᠷᠢᠭ ᠬᠦᠷᠳᠡᠭ》 ᠬᠡᠵᠦ᠍ ᠵᠦᠡᠭ ᠨᠠᠨ ᠴᠢᠤᠢ ᠲᠤᠰᠭᠤᠨᠤ ᠶᠢᠰᠦᠳᠦᠬᠡᠷ ᠲᠤᠭᠤᠢ᠍ᠢᠯᠠᠩᠤᠨ ᠲᠠᠷᠤᠭᠠ ᠸᠠᠩ ᠬᠤᠩ ᠶᠠᠷᠢᠨᠡ᠃
ᠲᠦᠬᠦᠭᠡᠷᠦᠮᠵᠢᠲᠦ ᠲᠠᠷᠢᠶᠠᠯᠠᠩᠨᠢ ᠨᠢᠭᠡ ᠵᠦᠢᠯᠤᠨ ᠤᠷᠤᠭᠤᠯᠤᠯᠲᠠ ᠶᠡᠭᠡᠲᠠᠢ ᠪᠦᠭᠡᠳ ᠭᠠᠷᠤᠯᠲᠠ ᠶᠡᠭᠡᠲᠠᠢ ᠠᠵᠤ ᠦᠢᠯᠡᠰ ᠪᠤᠯᠤᠨᠠ᠃ ᠨᠠᠷᠠᠨᠤ ᠭᠡᠷᠡᠯᠤᠨ ᠲᠤᠯᠠᠭᠠᠨ ᠬᠦᠯᠡᠮᠵᠢᠳᠤ ᠨᠢᠭᠡ ᠵᠢᠯ ᠬᠤᠶᠠᠷ ᠡᠭᠡᠯᠵᠢ ᠲᠠᠷᠢᠮᠠᠯ ᠲᠠᠷᠢᠬᠤᠳᠤ᠂ ᠮᠦ᠍ ᠪᠦᠷᠢᠶ᠋ᠢᠨ ᠲᠤᠮᠳᠠᠴᠢ ᠦᠷᠡ ᠠᠱᠢᠭᠨᠢ 4 — 6 ᠲᠦᠮᠡᠨ ᠲᠦᠭᠦᠷᠢᠭ ᠪᠠᠢᠵᠤ᠂ ᠡᠩᠤᠨ ᠲᠠᠷᠢᠶᠠᠨᠤ ᠦᠷᠡ ᠠᠱᠢᠭᠤᠨ 25 — 30 ᠲᠠᠬᠢᠨᠲᠠᠢ ᠲᠡᠩᠴᠡᠨᠡ᠃ ᠰᠦᠯᠢᠶᠤᠤ ᠪᠦᠬᠦᠭᠡᠭᠲᠤ ᠨᠢᠭᠡ ᠵᠢᠯ ᠬᠤᠶᠠᠷ ᠡᠭᠡᠯᠵᠢ ᠲᠠᠷᠢᠬᠤᠳᠤ ᠮᠦ᠍ ᠪᠦᠷᠢᠶ᠋ᠢᠨ ᠦᠷᠡ ᠠᠱᠢᠭᠨᠢ 2 ᠲᠦᠮᠡᠨ ᠲᠦᠭᠦᠷᠢᠭ ᠤᠷᠴᠢᠮ ᠪᠠᠢᠵᠤ᠂ ᠡᠩᠤᠨ ᠲᠠᠷᠢᠶᠠᠨᠤ ᠦᠷᠡ ᠠᠱᠢᠭᠤᠨ 10 ᠲᠠᠬᠢᠨᠲᠠᠢ ᠲᠡᠩᠴᠡᠨᠡ᠃ ᠪᠠᠶᠠᠨᠨᠠᠭᠤᠷ ᠬᠤᠲᠠᠶ᠋ᠢᠨ ᠲᠦᠬᠦᠭᠡᠷᠦᠮᠵᠢᠲᠤ ᠲᠠᠷᠢᠶᠠᠯᠠᠩᠤᠨ ᠬᠦᠭ᠌ᠵᠢᠯᠲᠡᠨᠢ ᠲᠠᠷᠢᠶᠠᠯᠠᠩᠤᠨ ᠪᠦᠳᠦᠴᠡᠶ᠋ᠢᠨ ᠲᠤᠬᠢᠷᠠᠭᠤᠯᠤᠯᠲᠠᠶ᠋ᠢᠨ ᠠᠷᠭᠠ ᠵᠠᠮᠢ ᠦᠷᠭᠡᠳᠭᠡᠵᠦ᠍᠂ ᠤᠯᠠᠮᠵᠢᠯᠠᠯᠲᠤ ᠲᠠᠷᠢᠶᠠᠯᠠᠩᠠᠴᠠ ᠤᠳᠤ ᠦᠶᠡᠶ᠋ᠢᠨ ᠪᠤᠬᠢᠷᠳᠤᠯ ᠦᠭᠡᠢ ᠦᠷᠡ ᠠᠱᠢᠭ ᠰᠠᠢᠲᠠᠢ ᠲᠠᠷᠢᠶᠠᠯᠠᠩ ᠦᠭᠡᠳᠡ ᠬᠤᠪᠢᠷᠠᠬᠤᠶ᠋ᠢ ᠠᠬᠢᠭᠤᠯᠵᠤ᠂ ᠦᠢᠯᠡᠳᠪᠦᠷᠢᠯᠡᠯᠤᠨ ᠬᠡᠯᠪᠡᠷᠢᠶ᠋ᠢᠨ ᠬᠤᠪᠢᠷᠠᠯᠲᠠ ᠪᠠ ᠲᠠᠷᠢᠶᠠᠴᠢᠨᠤ ᠦᠵᠡᠯ ᠰᠠᠨᠠᠭᠠ ᠤᠢ᠍ᠢᠯᠠᠭᠠᠭ᠍ᠳᠠᠬᠤᠨᠢ ᠱᠢᠨᠡᠴᠢᠯᠡᠬᠦ᠌ᠶ᠋ᠢ ᠲᠠᠢᠴᠢᠯᠠᠵᠤ᠂ ᠲᠠᠷᠢᠶᠠᠴᠢᠳᠤᠨ ᠤᠷᠤᠯᠭᠠᠶ᠋ᠢ ᠢᠯᠡᠷᠬᠡᠢ ᠨᠡᠮᠡᠭ᠌ᠳᠡᠭᠦᠯᠦᠬᠡᠳ ᠪᠤᠷᠤᠳᠤᠬᠤᠢᠶ᠋ᠢᠨ ᠡᠯᠢᠬᠡᠨᠳᠤ ᠪᠠᠶᠠᠵᠢᠯ ᠴᠢᠨᠡᠬᠡᠯᠢᠭ᠌ᠵᠢᠯᠤᠨ ᠤᠶᠠᠩᠭᠠᠶ᠋ᠢ ᠬᠠᠩᠬᠢᠨᠠᠭᠤᠯᠤᠭ᠍ᠰᠠᠨ ᠪᠠᠢᠨᠠ᠃