ᠬᠥᠯᠴᠦᠭᠡᠬᠦ᠌ᠳᠤ ᠬᠤᠪᠣᠩ ᠲᠣᠭᠤᠭᠠᠨᠢ ᠨᠠᠷᠠ ᠱᠢᠭ᠋ ᠰᠠᠨᠠᠭ᠍ᠳᠠᠳᠠᠭ
ᠬᠥᠳᠡᠭᠡᠶ᠋ᠢᠨ ᠮᠢᠨᠢ ᠡᠪᠦᠯ ᠦᠨᠡᠭᠡᠨ ᠯᠣᠪᠣᠣᠵᠠᠲᠠᠢ ᠢᠷᠡᠳᠡᠭ
ᠬᠥᠷ ᠴᠠᠰᠤᠨᠢ ᠭᠠᠵᠠᠷᠤᠨᠢᠶᠠᠨ ᠢᠯᠴᠢᠪᠠᠷ ᠮᠠᠨᠠᠨᠲᠤᠵᠤ
ᠬᠥᠯᠦᠭ ᠮᠣᠷᠢᠳᠨᠢ ᠬᠦᠢᠲᠡᠨ ᠠᠮᠠᠭᠠᠢᠪᠠᠨ ᠵᠠᠵᠢᠯᠤᠭᠠᠳ ᠰᠦᠷᠲᠠᠢ ᠬᠠᠷᠠᠭ᠍ᠳᠠᠳᠠᠭ
ᠨᠠᠮᠤᠷᠤᠨ ᠱᠢᠪᠠᠭᠤᠳᠢᠶᠠᠨ ᠮᠥᠷᠦᠭᠡᠳᠦᠭ᠌ᠰᠡᠨ ᠨᠠᠭᠤᠷᠨᠢ ᠬᠠᠷᠠᠵᠠᠲᠠᠢ ᠮᠡᠯᠲᠡᠷᠡᠵᠦ᠍
ᠨᠠᠢᠭᠤᠭᠠᠯ ᠵᠡᠭᠡᠰᠦᠶ᠋ᠢ ᠰᠠᠯᠬᠢᠨᠢ ᠵᠢᠩᠭᠢᠨᠡᠲᠡᠯᠡ ᠬᠤᠭᠤᠷᠳᠠᠵᠤ ᠬᠥᠭ᠌ᠯᠡᠯᠳᠦᠭ᠌ᠰᠡᠨ
ᠨᠠᠪᠴᠢᠨᠤ ᠣᠷᠣᠨᠳᠤ ᠪᠣᠯᠵᠣᠮᠣᠷᠤᠳ ᠳᠠᠭᠤᠯᠠᠵᠤ ᠮᠣᠳᠣᠳᠢ ᠠᠷᠭᠠᠳᠠᠵᠤ
ᠨᠠᠷᠠ ᠡᠷᠭᠢᠬᠦ᠌ ᠬᠠᠪᠤᠷᠢ ᠳᠠᠯᠠᠯᠵᠤ ᠪᠡᠭᠡᠷᠡᠭ᠌ᠰᠡᠨ ᠬᠤᠱᠢᠭᠤᠳ ᠱᠣᠯᠣᠭᠠᠨᠠᠯᠳᠤᠨᠠ
ᠦᠯᠢᠭᠡᠷ ᠬᠡᠯᠡᠬᠦ᠌ ᠶᠤᠮ ᠱᠢᠭ ᠴᠠᠰᠤᠲᠠᠢ ᠲᠣᠯᠤᠭᠠᠳ ᠵᠠᠪᠢᠯᠠᠨ ᠨᠡᠮᠦᠢᠵᠦ᠍
ᠥᠴᠦᠭᠡᠳᠦᠷᠬᠡᠨ ᠶᠤᠮ ᠱᠢᠭ ᠨᠠᠮᠤᠷᠵᠢᠶᠠ ᠪᠠᠭᠤᠴᠠ ᠢᠯᠴᠢ ᠲᠦᠦᠭᠡᠨ ᠬᠠᠯᠲᠠᠷᠲᠤᠵᠤ
ᠥᠯᠢᠶ᠋ᠢᠨ ᠬᠥᠲᠥᠯ ᠲᠡᠮᠡᠭᠡᠨ ᠵᠢᠩ ᠱᠢᠭ᠋ ᠬᠤᠯᠠᠳᠠᠵᠤ ᠬᠠᠷᠠᠭ᠍ᠳᠠᠵᠤ
ᠥᠪᠦᠢᠭ᠌ᠰᠡᠨ ᠨᠠᠷᠠ ᠱᠠᠭᠠᠨᠲᠤᠶ᠋ᠢᠨ ᠲᠣᠯᠤᠭᠠᠢ ᠱᠢᠭ᠋ ᠵᠥᠪ ᠡᠷᠭᠢᠵᠦ᠍ ᠶᠣᠯᠲᠤᠯᠵᠠᠨᠠ
ᠮᠠᠯᠤᠨ ᠴᠣᠪᠤᠭᠠ ᠨᠠᠷᠠᠨᠤ ᠰᠠᠴᠤᠷᠠᠯ ᠱᠢᠭ᠋ ᠳᠥᠷᠪᠡᠨ ᠵᠦᠭ ᠰᠤᠨᠤᠯᠵᠠᠵᠤ
ᠮᠠᠨᠤᠳᠤ ᠢᠷᠡᠬᠦ᠌ ᠬᠠᠳᠠᠭᠲᠠᠢ ᠭᠡᠢᠴᠢᠨ ᠱᠢᠭ ᠰᠡᠯᠡᠮᠡᠨ ᠡᠪᠡᠷ ᠭᠢᠯᠲᠠᠯᠵᠠᠨᠠ
ᠮᠠᠯᠠᠭᠠᠢᠯᠠᠭ᠍ᠰᠠᠨ ᠴᠠᠰᠤ ᠦᠷᠢᠶᠠᠷ ᠪᠠᠭᠤᠵᠤ ᠰᠡᠮᠡᠵᠡᠨ ᠥᠭᠡᠬᠦ᠌ ᠱᠢᠭ ᠴᠡᠴᠡᠷᠬᠡᠨᠡᠵᠦ᠍
ᠮᠠᠷᠲᠠᠵᠤ ᠬᠤᠨᠣᠭ᠍ᠰᠠᠨ ᠦᠯᠢᠭᠡᠷᠤᠨ ᠵᠠᠯᠭᠠᠮᠵᠢ ᠱᠢᠭ᠋ ᠬᠠᠷᠠᠭ᠍ᠳᠠᠨᠠ
ᠴᠠᠰᠤᠲᠠᠢ ᠬᠥᠨᠳᠡᠢᠶ᠋ᠢᠨ ᠢᠰᠭᠡᠷᠦᠭ᠌ᠰᠡᠨ ᠰᠠᠯᠬᠢ ᠴᠠᠳᠤᠨ ᠪᠦᠷᠢᠶᠡ ᠱᠢᠭ ᠣᠷᠬᠢᠷᠠᠵᠤ
ᠴᠠᠭᠠᠮᠠᠯ ᠠᠷᠠᠰᠤᠨ ᠳᠡᠪᠡᠯᠲᠠᠢ ᠮᠣᠷᠢᠲᠠᠨᠤ ᠳᠣᠮᠤᠭᠢ ᠬᠥᠭᠡᠷᠬᠦ᠌ ᠱᠢᠭ ᠰᠠᠨᠠᠭ᠍ᠳᠠᠵᠤ
ᠴᠠᠢᠳᠠᠮ ᠵᠦᠰᠦᠭ᠌ᠰᠡᠨ ᠬᠠᠰᠠᠭᠤᠨ ᠵᠠᠮ ᠭᠤᠲᠤᠯᠤᠨ ᠲᠠᠰᠤᠮ ᠱᠢᠭ᠋ ᠬᠠᠯᠲᠠᠷᠲᠣᠵᠤ
ᠴᠠᠩᠲᠠᠢ ᠡᠪᠦᠯ ᠱᠢᠯᠢᠶ᠋ᠢ ᠳᠠᠪᠠᠵᠤ ᠡᠪᠦᠯᠵᠢᠶᠡ ᠵᠣᠷᠢᠭ᠍ᠰᠠᠨ ᠪᠣᠳᠣᠭ᠍ᠳᠠᠨᠠ
ᠠᠯᠤᠰᠢ ᠵᠣᠷᠢᠭ᠍ᠰᠠᠨ ᠵᠠᠮ ᠪᠡᠭᠡᠷᠡᠭ᠌ᠰᠡᠨ ᠱᠢᠭ ᠴᠠᠰᠤᠨ ᠳᠠᠬᠤᠨᠳᠤ ᠱᠢᠷᠭᠤᠵᠤ
ᠠᠶᠠᠨᠤ ᠬᠦᠮᠦᠨᠤ ᠬᠥᠭᠡᠷᠦᠭ᠌ᠰᠡᠨ ᠵᠣᠭᠤᠭ ᠭᠠᠷᠤᠩᠭᠤᠲᠠ ᠬᠥᠯᠳᠡᠭ᠌ᠰᠡᠨ ᠱᠢᠭ ᠵᠢᠩᠭᠢᠨᠡᠵᠦ᠍
ᠠᠢᠯᠤᠨ ᠨᠣᠬᠠᠳᠤᠨ ᠬᠤᠴᠠᠬᠤ ᠳᠠᠭᠤᠨ ᠲᠡᠷᠲᠡᠭᠡᠳᠤ ᠬᠥᠨᠳᠡᠢ ᠬᠦᠩᠭᠢᠨᠡᠵᠦ᠍
ᠠᠷᠠᠰᠤᠨ ᠳᠡᠪᠡᠯᠢ ᠬᠥᠮᠦᠷᠢᠭᠡᠳ ᠲᠠᠯᠪᠢᠭ᠍ᠰᠠᠨ ᠱᠢᠭ᠋ ᠴᠠᠩᠢᠶᠠᠷ ᠪᠤᠷᠠᠭ᠍ᠰᠠᠨ ᠬᠥᠳᠡᠭᠡ
ᠮᠦᠩᠭᠦᠨ ᠰᠠᠬᠠᠯᠳᠠᠭᠠᠨ ᠭᠢᠯᠮᠠᠭᠠ ᠭᠢᠯᠲᠦᠭᠡᠨᠡᠭᠦᠯᠦᠭ᠌ᠰᠡᠨ ᠭᠠᠵᠠᠷᠤᠨ ᠡᠪᠦᠭᠡ ᠱᠢᠭ ᠣᠪᠣᠭᠠ
ᠮᠥᠨᠲᠥᠯ ᠲᠠᠷᠪᠠᠭᠠᠪᠠᠨ ᠭᠠᠵᠠᠷᠲᠠᠭᠠᠨ ᠨᠢᠭᠤᠭ᠍ᠰᠠᠨ ᠬᠦᠯᠡᠮᠵᠢ ᠳᠤᠯᠠᠭᠠᠨ ᠬᠥᠷᠥᠰᠥ᠍
ᠮᠥᠷᠢᠶᠠᠷᠢᠶᠠᠨ ᠴᠣᠭᠤᠴᠢᠵᠤ ᠴᠠᠰᠤ ᠴᠣᠬᠤᠷᠯᠠᠭ᠍ᠰᠠᠨ ᠢᠯᠴᠢᠪᠠᠷ ᠲᠦᠦᠭᠡᠭ᠌ᠰᠡᠨ ᠰᠦᠷᠦᠭ
ᠮᠥᠰᠦᠲᠦ ᠬᠡᠭᠡᠷᠡᠶ᠋ᠢᠨ ᠣᠷᠢᠪᠠᠨ ᠵᠡᠭᠦᠳᠦᠯᠡᠭ᠌ᠰᠡᠨ ᠨᠠᠮ ᠵᠢᠮᠬᠡᠨ ᠳᠣᠭ᠍ᠳᠣᠯᠣᠯ
ᠳᠡᠪᠡᠯᠤᠨ ᠬᠠᠪᠤᠭ᠍ᠰᠠᠨ ᠤᠷᠠᠨ ᠣᠷᠣᠮᠢᠶᠠᠷ ᠬᠦᠢᠲᠡᠨᠤ ᠢᠯᠴᠢ ᠪᠣᠭ᠍ᠵᠣᠷᠠᠵᠤ
ᠳᠡᠭᠡᠪᠦᠷᠲᠤ ᠵᠠᠭᠤᠷᠠᠭ᠍ᠰᠠᠨ ᠱᠢᠯᠦᠨ ᠬᠥᠯᠮᠦᠭ ᠴᠠᠢᠶ᠋ᠢᠨ ᠰᠠᠪᠰᠠᠯᠭᠠᠨᠳᠤ ᠬᠥᠯᠦᠷᠡᠨᠡ
ᠳᠡᠯᠪᠢᠭᠡᠯᠡᠵᠦ᠍ ᠪᠠᠭᠤᠭ᠍ᠰᠠᠨ ᠲᠡᠭ᠌ᠷᠢᠶ᠋ᠢᠨ ᠴᠡᠴᠡᠭᠡᠰ ᠬᠤᠯᠠᠩᠢᠶᠠᠷ ᠱᠢᠯᠦᠰᠦ ᠱᠢᠭ ᠰᠠᠪᠢᠷᠠᠵᠤ
ᠳᠠᠷᠭᠢᠯᠲᠠᠯᠠ ᠪᠣᠴᠠᠯᠤᠭ᠍ᠰᠠᠨ ᠲᠣᠭᠤᠭᠠᠲᠠᠢ ᠱᠥᠯᠥᠨᠳᠤ ᠶᠢᠰᠦᠶ᠋ᠢᠨ ᠡᠷᠴᠢᠮ ᠰᠤᠯᠠᠷᠠᠨᠠ
ᠱᠢᠪᠡᠭᠡᠨ ᠳᠡᠭᠡᠷᠡ ᠰᠠᠭᠤᠭ᠍ᠰᠠᠨ ᠱᠠᠭᠠᠵᠠᠭᠠᠢ ᠴᠥᠪᠦᠳᠡᠯ ᠥᠭᠡᠬᠦᠨᠳᠤ ᠱᠠᠭ᠍ᠰᠢᠵᠤ
ᠱᠢᠨᠡᠬᠡᠨ ᠵᠠᠷᠤᠭ᠍ᠰᠠᠨ ᠦᠬᠦᠴᠡᠨᠤ ᠳᠡᠭᠡᠵᠢ ᠨᠠᠪᠳᠠᠭ ᠰᠠᠪᠲᠠᠬᠢ ᠪᠠᠶᠠᠰᠭᠠᠨᠠ
ᠱᠢᠩᠭᠡᠨ ᠬᠤᠭᠤᠯᠠᠢᠪᠠᠷ ᠵᠢᠷᠤᠭᠠᠶ᠋ᠢᠨ ᠵᠢᠷᠤᠭᠠᠶ᠋ᠢ ᠣᠳᠣᠳ ᠭᠡᠭᠢᠯᠵᠡᠲᠡᠯᠡ ᠴᠢᠮᠴᠢᠭᠢᠨᠠᠭᠦᠯᠬᠦ᠌ᠳᠤ
ᠱᠢᠨᠡᠳᠤᠨ ᠰᠠᠷᠠ ᠱᠢᠭ᠋ ᠬᠥᠭᠡᠷᠦᠬᠦᠨ ᠠᠮᠠᠷᠠᠭ ᠰᠡᠳᠭᠢᠯ ᠰᠡᠨᠵᠡᠷᠡᠭᠦᠯᠦᠨ ᠡᠪᠦᠯᠵᠢᠨᠡ
ᠬᠥᠳᠡᠭᠡ ᠨᠤᠲᠤᠭᠤᠨ ᠮᠢᠨᠢ ᠡᠪᠦᠯ ᠬᠤᠪᠣᠩ ᠳᠡᠭᠡᠷᠡ ᠬᠠᠭ᠍ᠰᠠᠭᠠᠭ᠍ᠰᠠᠨ ᠥᠷᠦᠮᠡ
ᠬᠦᠷᠵᠡᠩᠲᠠᠢ ᠥᠶᠦᠭ᠌ᠬᠡᠨ ᠡᠪᠦᠯᠵᠢᠶᠡᠨᠤ ᠴᠠᠭᠠᠨ ᠰᠦᠨᠤ ᠢᠵᠠᠮᠠᠭ
ᠬᠦᠷᠦᠭᠡᠳ ᠣᠴᠢᠬᠤᠳᠤ ᠨᠥᠮᠵᠦᠭ᠌ᠬᠡᠨ ᠪᠣᠷᠤᠭ᠍ᠵᠢᠭᠤᠨ ᠠᠮᠢᠳᠤᠷᠠᠯᠤᠨ ᠦᠨᠦᠷ
ᠬᠥᠨᠦᠭᠲᠠᠢ ᠰᠦᠪᠠᠷᠢᠶᠠᠨ ᠳᠠᠯᠠᠯᠤᠭ᠍ᠰᠠᠨ ᠬᠦᠮᠦᠨ ᠬᠠᠢᠷᠠᠶ᠋ᠢᠨ ᠢᠪᠢᠯᠦᠯ᠃