ᠪᠡᠯᠭᠡᠪᠠᠷ ᠢᠷᠡᠭ᠌ᠰᠡᠨ ᠪᠢᠯᠢᠭᠤᠨ ᠬᠤᠷᠠᠲᠠᠢ 2026 ᠣᠨᠤ ᠤᠯᠠᠭᠠᠨ ᠮᠣᠷᠢᠨ ᠵᠢᠯᠤᠨ ᠴᠠᠭᠠᠨ ᠰᠠᠷᠠᠶ᠋ᠢᠨ ᠲᠧᠯᠸᠢᠰ ᠦᠳᠡᠱᠢᠯᠡᠭᠡᠶ᠋ᠢ ᠰᠣᠨᠢᠷᠬᠠᠵᠤ ᠰᠠᠭᠤᠬᠤᠳᠤ 《ᠣᠳᠣᠨ ᠭᠢᠯᠪᠠᠭᠠᠲᠣ ᠱᠢᠯᠣᠭᠤᠨ ᠬᠦᠪᠡᠭᠡᠲᠦ ᠴᠠᠭᠠᠨ ᠬᠤᠱᠢᠭᠤ》 ᠣᠨᠴᠠ ᠦᠵᠡᠮᠦᠷᠢ ᠲᠠᠢ ᠰᠠᠨᠠᠭ᠍ᠳᠠᠯᠠ᠃
《ᠳᠠᠭᠤᠤ ᠬᠤᠭᠤᠷᠤᠨ ᠠᠶᠠᠯᠭᠤᠨᠢ ᠡᠭᠡᠱᠢᠭ᠌ᠯᠡᠭᠡᠳ ᠯᠡ ᠪᠠᠢᠨᠠ
ᠲᠤᠯᠭᠠᠶ᠋ᠢᠨ ᠤᠯᠠᠭᠠᠨ ᠭᠠᠯᠨᠢ ᠳᠦᠷᠡᠯᠵᠡᠭᠡᠳ ᠯᠡ ᠪᠠᠢᠨᠠ
ᠳᠤᠮᠳᠠᠷᠠᠰᠢ ᠦᠭᠡᠢ ᠪᠤᠶᠠᠨᠨᠢ ᠴᠠᠯᠬᠢᠯᠠᠭᠠᠳ ᠯᠡ ᠪᠠᠢᠨᠠ
ᠳᠠᠳᠠᠷᠠᠰᠢ ᠦᠭᠡᠢ ᠵᠢᠷᠭᠠᠯᠨᠢ ᠣᠨᠳᠣᠷᠣᠭᠠᠳ ᠯᠡ ᠪᠠᠢᠨᠠ》 ᠭᠡᠵᠦ᠍ 《ᠬᠡᠢᠮᠣᠷᠢ ᠬᠤᠷᠤᠢᠯᠠᠭ᠍ᠰᠠᠨ ᠴᠠᠭᠠᠨ ᠰᠠᠷᠠ》 ᠬᠡᠮᠡᠬᠦ᠌ ᠡᠬᠢᠯᠡᠯᠲᠡᠶ᠋ᠢᠨ ᠳᠠᠭᠤᠤᠪᠠᠷ ᠰᠠᠷᠠ ᠱᠢᠨᠡᠶ᠋ᠢᠨ ᠰᠠᠮᠪᠠᠢ ᠬᠠᠳᠠᠭᠢ ᠨᠠᠮᠢᠷᠠᠭᠤᠯᠣᠩᠬᠠᠨ᠂ ᠱᠢᠯᠤᠨ ᠪᠣᠯᠣᠷ ᠰᠠᠷᠬᠤᠳᠤᠨ ᠳᠡᠭᠡᠵᠢᠪᠠᠨ ᠡᠷᠬᠦᠩᠭᠡᠨ ᠣᠨᠤ ᠬᠦᠷᠳᠦ᠍ᠶ᠋ᠢᠨ ᠣᠷᠴᠢᠯᠳᠤ ᠤᠶᠠᠩᠭᠠ ᠡᠷᠬᠦᠨ ᠡᠬᠢᠯᠡᠵᠦ᠍ ᠪᠠᠢᠨᠠ᠃ ᠡᠨᠡ ᠡᠬᠢᠯᠡᠯᠲᠡᠠᠴᠠ ᠦᠳᠡᠱᠢᠯᠡᠭᠡᠶ᠋ᠢᠨ ᠤᠳᠤᠷᠢᠳᠤᠭᠠᠴᠢ ᠨᠠᠷᠤᠨ 《ᠥᠨᠳᠥᠷ ᠵᠣᠭ᠍ᠰᠣᠴᠠᠠᠴᠠ ᠳᠦᠰᠦᠪᠯᠡᠵᠦ᠍᠂ ᠥᠨᠳᠥᠷ ᠪᠠᠷᠢᠮᠵᠢᠶᠠᠪᠠᠷ ᠠᠬᠢᠭᠤᠯᠬᠤ》 ᠭᠡᠰᠡᠨ ᠵᠣᠷᠢᠭ ᠰᠠᠨᠠᠭᠠᠨᠤ ᠠᠢᠵᠠᠮ ᠰᠣᠨᠣᠷᠳᠠᠵᠤ ᠪᠤᠢ᠃ ᠳᠦᠮᠡᠨ ᠠᠯᠬᠤᠮᠤᠨ ᠳᠦᠷᠦᠬᠦᠦ ᠠᠯᠬᠤᠮ ᠬᠡᠴᠡᠬᠦᠦ᠂ ᠳᠠᠭᠤᠤ ᠪᠥᠵᠢᠭᠤᠨ ᠦᠳᠡᠱᠢᠯᠡᠭᠡᠶ᠋ᠢᠨ ᠡᠬᠢᠯᠡᠯᠲᠡᠶ᠋ᠢᠨ ᠬᠥᠱᠢᠭᠡ ᠭᠡᠳᠡᠭ ᠬᠡᠴᠡᠬᠦᠦ᠂ ᠦᠵᠡᠭ᠌ᠴᠢᠶ᠋ᠢᠨ ᠠᠩᠬᠠᠷᠤᠯᠢ ᠰᠣᠷᠢᠨᠵᠢᠯᠡᠨ ᠳᠠᠳᠠᠬᠤᠨᠢ ᠡᠬᠢᠯᠡᠯᠲᠡᠳᠤ ᠪᠠᠢᠭᠠ ᠶᠤᠮ᠃ ᠡᠨᠡ ᠡᠬᠢᠯᠡᠯᠲᠡ ᠰᠠᠢᠬᠠᠨ ᠪᠣᠯᠵᠠᠢ᠃ ᠰᠠᠢᠬᠠᠨᠨᠢ ᠳᠠᠭᠤᠣ ᠪᠦᠵᠢᠭ ᠬᠤᠣᠰᠯᠠᠭ᠍ᠰᠠᠨ᠂ ᠰᠠᠢᠬᠠᠨᠨᠢ ᠭᠠᠳᠠᠷ ᠦᠵᠡᠮᠵᠢ ᠳᠣᠳᠣᠷ ᠦᠵᠡᠭ᠌ᠳᠡᠯ ᠬᠠᠪᠰᠣᠷᠣᠭ᠍ᠰᠠᠨ᠂ ᠰᠠᠢᠬᠠᠨᠨᠢ ᠬᠦᠷ ᠨᠠᠷᠬᠢᠶᠠᠨ ᠪᠠ ᠬᠦᠭ ᠠᠢᠵᠠᠮ ᠣᠶᠠᠯᠳᠣᠭ᠍ᠰᠠᠨ᠂ ᠰᠠᠢᠬᠠᠨᠨᠢ ᠦᠪᠡᠷᠮᠢᠴᠡ ᠰᠣᠳᠣᠨ ᠨᠣᠲᠤᠭᠤᠨ ᠡᠭᠡᠱᠢᠭ᠌ᠯᠡᠭ ᠴᠣᠣᠷᠢᠶᠠᠳᠣᠭ᠍ᠰᠠᠨᠳᠤ ᠪᠠᠢᠨᠠ᠃ ᠳᠠᠷᠠᠭᠠᠯᠠᠪᠠᠯ᠂ 《ᠣᠳᠣᠨ ᠭᠢᠯᠪᠠᠭᠠᠲᠣ ᠱᠢᠯᠣᠭᠤᠨ ᠬᠦᠪᠡᠭᠡᠲᠦ ᠴᠠᠭᠠᠨ ᠬᠤᠱᠢᠭᠤ》 ᠦᠳᠡᠱᠢᠯᠡᠭᠡ ᠵᠢ ᠰᠤᠨᠢᠷᠬᠠᠬᠰᠠᠨ ᠲᠤᠬᠠᠢ ᠦᠵᠡᠯ ᠪᠤᠳᠤᠯ ᠵᠢᠡᠨ ᠬᠤᠪᠢᠶᠠᠯᠴᠠᠶᠠ᠃
ᠨᠢᠭᠡ᠂ ᠣᠳᠣᠨ ᠬᠡᠢᠮᠣᠷᠢ
ᠲᠣᠰ ᠦᠳᠡᠱᠢᠯᠡᠭᠡᠶ᠋ᠢᠨ ᠭᠤᠣᠯ ᠰᠡᠳᠦᠪᠢ 《ᠣᠳᠣᠨ ᠭᠢᠯᠪᠠᠭᠠᠲᠤ》 ᠭᠡᠵᠦ᠍ ᠠᠪᠤᠭ᠍ᠰᠠᠨᠨᠢ ᠴᠠᠭᠠᠨᠠᠪᠠᠨ ᠭᠦᠨ ᠳᠠᠪᠬᠤᠷᠭᠠᠶ᠋ᠢᠨ ᠰᠣᠶᠣᠯᠤᠨ ᠲᠠᠯᠠᠰ ᠨᠢᠭᠤᠭ᠍ᠳᠠᠵᠤ ᠪᠠᠢᠭᠠ ᠶᠤᠮ᠃ ᠳᠡᠯᠡᠬᠡᠢᠶ᠋ᠢᠨ ᠴᠠᠷᠠᠳᠤ ᠠᠯᠳᠠᠷᠢᠶᠠᠨ ᠮᠥᠩᠬᠡᠯᠡᠭ᠌ᠰᠡᠨ ᠣᠳᠣᠨ ᠣᠷᠣᠨᠤ ᠰᠣᠳᠣᠯᠭᠠᠳᠠᠨ ᠮᠢᠩᠭᠠᠨᠲᠣ ᠪᠣᠯ ᠡᠨᠡ ᠨᠤᠲᠤᠭᠤᠨ ᠬᠥᠮᠥᠨ ᠶᠤᠮ᠃ ᠱᠢᠯᠤᠭᠤᠨ ᠬᠥᠪᠡᠭᠡᠲᠦ ᠴᠠᠭᠠᠨ ᠬᠤᠱᠢᠭᠤᠨᠤ ᠲᠥᠪ ᠮᠢᠩᠭᠠᠨᠲᠣ ᠪᠠᠯᠭᠠᠰᠤᠶ᠋ᠢᠨ ᠨᠡᠷᠡ ᠪᠣᠯ ᠳᠠᠷᠤᠢ ᠡᠨᠡ ᠦᠯᠡᠮᠵᠢ ᠪᠢᠯᠢᠭ᠌ᠲᠦ ᠡᠷᠳᠡᠮᠳᠡᠨᠢ ᠳᠤᠷᠠᠰᠭᠠᠵᠤ ᠨᠡᠷᠡᠯᠡᠭ᠌ᠰᠡᠨ ᠪᠠᠢᠭᠠ ᠶᠤᠮ ᠃ ᠣᠭ᠍ᠳᠠᠷᠭᠤᠢᠳᠤ ᠬᠢᠯᠠᠯᠵᠠᠬᠤ ᠨᠢᠭᠡ ᠣᠳᠣᠨᠤ ᠨᠡᠷᠡᠶ᠋ᠢ ᠪᠠᠰᠠ 《ᠮᠢᠩᠭᠠᠲᠤ ᠣᠳᠣᠨ》 ᠭᠡᠳᠡᠭ᠃ ᠳᠠᠬᠢᠭᠠᠳ ᠬᠡᠯᠡᠪᠡᠯ ᠱᠢᠯᠤᠭᠤᠨ ᠬᠥᠪᠡᠭᠡᠲᠦ ᠴᠠᠭᠠᠨ ᠬᠤᠱᠢᠭᠤᠨᠤ ᠪᠠᠢᠭᠠᠯᠢᠯᠢᠭ ᠪᠠᠢᠷᠢᠱᠢᠯᠨᠢ ᠤᠮᠠᠷᠠᠲᠤ ᠥᠷᠭᠡᠷᠢᠭᠤᠨ42 ᠭᠷᠠᠳᠦ᠋ᠰᠲᠤ ᠣᠷᠣᠱᠢᠵᠦ᠍ ᠵᠣᠨ ᠨᠠᠮᠤᠷᠤᠨ ᠤᠯᠠᠷᠢᠯ ᠣᠭ᠍ᠳᠠᠷᠭᠤᠢᠶ᠋ᠢᠨ ᠣᠳᠣᠳᠢ ᠠᠵᠢᠭ᠍ᠯᠠᠬᠤᠳᠤ ᠠᠱᠢᠭ᠍ᠳᠠᠢ ᠨᠥᠬᠦᠴᠡᠯ ᠪᠣᠯᠣᠭ᠍ᠰᠠᠨ ᠮᠦᠷᠳᠡᠭᠡᠨ ᠱᠢᠯᠤᠭᠤᠨ ᠬᠥᠪᠡᠭᠡᠲᠦ ᠴᠠᠭᠠᠨ ᠬᠤᠱᠢᠭᠤᠨᠤ ᠴᠡᠪᠡᠷ ᠠᠭᠠᠷ ᠲᠤᠩᠭᠠᠯᠠᠭ ᠣᠭ᠍ᠳᠠᠷᠭᠤᠢᠨᠢ ᠣᠳᠣ ᠠᠵᠢᠭ᠍ᠯᠠᠬᠤ ᠬᠠᠩᠭᠠᠯᠳᠠᠳᠠᠢ ᠨᠥᠬᠦᠴᠡᠯ ᠪᠣᠯᠣᠭ᠍ᠰᠠᠨ ᠲᠤᠯᠠ ᠠᠳᠡ ᠣᠳᠣᠨ ᠣᠷᠣᠨᠤ ᠰᠡᠲ᠋ᠠᠨᠽᠢ ᠪᠠᠢᠭᠤᠯᠤᠭ᠍ᠳᠠᠵᠤ᠂ ᠵᠠᠯᠠᠭᠤᠴᠤᠳ ᠪᠠᠭᠠᠴᠤᠳᠤᠨ ᠱᠢᠨᠵᠢᠯᠡᠬᠦ᠌ ᠤᠬᠠᠭᠠᠨᠳᠤ ᠪᠠᠭ᠍ᠠᠳᠠᠢ ᠪᠣᠯᠵᠤ᠂ ᠱᠢᠨᠵᠢᠯᠡᠬᠦ᠌ ᠤᠬᠠᠭᠠᠨᠢ ᠬᠠᠢᠷᠠᠯᠠᠬᠤ ᠬᠥᠮᠥᠵᠢᠯᠤᠨ ᠰᠠᠭᠤᠷᠢᠨ ᠭᠠᠵᠠᠷ ᠪᠣᠯᠣᠭ᠍ᠰᠠᠨ ᠪᠠᠢᠨᠠ᠃ ᠡᠢᠮᠦ᠍ᠠᠴᠠ ᠡᠨᠡ ᠰᠣᠶᠣᠯ ᠪᠣᠯᠣᠨ ᠱᠢᠨᠵᠢᠯᠡᠬᠦ᠌ ᠤᠬᠠᠭᠠᠨᠤ ᠭᠤᠣᠯ ᠰᠡᠳᠦᠪᠢ ᠳᠣᠪᠣᠢᠯᠭᠠᠵᠤ ᠦᠳᠡᠱᠢᠯᠡᠭᠡᠳᠤ ᠡᠮᠡᠭ᠌ᠳᠡᠢᠶ᠋ᠢᠨ ᠭᠤᠷᠪᠠᠯᠠᠯ ᠳᠠᠭᠤᠤ《ᠮᠢᠩᠭᠠᠲᠤᠶ᠋ᠢᠨ ᠨᠤᠲᠤᠭ》 （ᠠᠷᠢᠭᠤᠨᠪᠢᠯᠢᠢᠠ᠋᠂ ᠠᠯᠲᠠᠨᠰᠤᠪᠤᠳ᠂ ᠵᠤᠯᠠ ᠨᠠᠷ ᠳᠠᠭᠤᠯᠠᠪᠠ）᠂ ᠬᠡᠦᠬᠡᠳᠤᠨ ᠨᠠᠢᠷᠠᠯ ᠳᠠᠭᠤᠤ 《ᠣᠳᠣᠨ ᠵᠡᠭᠦᠳᠦ》 （ᠱᠢᠯᠤᠭᠤᠨ ᠬᠥᠪᠡᠭᠡᠲᠦ ᠴᠠᠭᠠᠨ ᠬᠤᠱᠢᠭᠤᠨᠤ ᠬᠤᠶᠠᠳᠤᠭᠠᠷ ᠪᠠᠭᠠ ᠰᠤᠷᠭᠠᠭᠤᠯᠢᠶ᠋ᠢᠨ ᠰᠣᠷᠣᠭ᠍ᠴᠢᠳ ᠳᠠᠭᠤᠯᠠᠪᠠ）᠂ ᠭᠤᠴᠣᠯᠠᠯ ᠳᠠᠭᠤᠤ 《ᠣᠳᠣᠨ ᠭᠢᠯᠪᠠᠭᠠᠲᠤ ᠨᠤᠲᠤᠭ》 （ᠪᠠᠳᠦᠰᠦ᠋ᠬᠡ ᠳᠠᠭᠤᠯᠠᠪᠠ）᠂ ᠳᠠᠭᠤᠤ ᠪᠥᠵᠢᠭ 《ᠲᠡᠭ᠌ᠷᠢᠶ᠋ᠢᠨ ᠮᠡᠯᠮᠡᠢ》 （ᠪᠤᠶᠠᠨᠪᠠᠲᠤ᠌᠂ ᠤᠷᠢᠬᠠᠨ᠂ ᠰᠣᠷᠭᠤᠭ᠍ᠨᠠᠬᠢᠶᠠ ᠲᠣᠭ᠍ᠯᠠᠪᠠ） ᠵᠡᠷᠭᠡ ᠪᠦᠳᠦᠭᠡᠯ ᠭᠤᠣᠯ ᠠᠢᠵᠠᠮᠢ ᠬᠥᠭ᠌ᠵᠢᠮᠳᠡᠨ ᠳᠣᠭ᠍ᠯᠠᠭ᠍ᠳᠠᠭ᠍ᠰᠠᠨ ᠪᠠᠢᠨᠠ᠃ ᠲᠣ·ᠰᠡᠴᠡᠨᠪᠠᠶᠠᠷᠤᠨ ᠦᠭᠡ᠂ ᠣᠷᠬᠢᠯᠤᠨ ᠠᠶᠠᠯᠭᠤ ᠪᠦᠬᠦᠢ 《ᠮᠢᠩᠭᠠᠲᠤᠶ᠋ᠢᠨ ᠨᠤᠲᠤᠭ》 ᠳᠠᠭᠤᠤᠳᠤ᠄
《ᠥᠨᠳᠥᠷ ᠠᠭᠤᠯᠠᠨᠢ ᠴᠡᠩᠬᠡᠷᠯᠡᠨ ᠬᠠᠨᠠᠢᠭᠠᠳ
ᠥᠷᠭᠡᠨ ᠲᠠᠯᠠᠨᠢ ᠴᠡᠯᠡᠭᠡᠷᠯᠡᠨ ᠨᠠᠯᠠᠢᠭ᠍ᠰᠠᠨ
ᠠᠭᠤᠳᠠᠮ ᠱᠢᠯᠢᠨᠢ ᠰᠥᠷᠦᠭᠢᠶᠠᠷ ᠪᠢᠯᠬᠠᠭᠠᠳ
ᠤᠰᠤ ᠪᠤᠯᠠᠭᠨᠢ ᠤᠬᠠᠭᠠᠨᠢᠶᠠᠷ ᠷᠠᠱᠢᠶᠠᠯᠠᠭ᠍ᠰᠠᠨ
ᠱᠢᠨᠵᠢᠯᠡᠬᠦ᠌ ᠤᠬᠠᠭᠠᠨᠳᠠᠨ ᠮᠢᠩᠭᠠᠨᠲᠣᠶ᠋ᠢᠨ ᠨᠤᠲᠤᠭ
ᠱᠢᠯᠤᠭᠤᠨ ᠬᠥᠪᠡᠭᠡᠲᠦ ᠴᠠᠭᠠᠨ ᠬᠤᠱᠢᠭᠤ ᠮᠢᠨᠢ》 ᠭᠡᠵᠦ᠍ ᠳᠠᠭᠤᠯᠠᠭ᠍ᠳᠠᠨ ᠪᠠᠢᠨᠠ᠃ ᠠᠳᠡᠠᠴᠠ ᠴᠠᠬᠠᠷ ᠨᠤᠲᠤᠭᠤᠨ ᠥᠩ ᠥᠳᠭᠡᠨ ᠰᠣᠶᠣᠯᠢ ᠠᠮᠳᠠᠷᠬᠠᠨ ᠥᠷᠭᠡᠨ ᠲᠠᠯᠠ᠂ ᠥᠨᠳᠥᠷ ᠠᠭᠤᠯᠠ᠂ ᠠᠭᠤᠳᠠᠮ ᠱᠢᠯᠢ᠂ ᠤᠰᠤ ᠪᠤᠯᠠᠭᠤᠨ ᠰᠠᠢᠬᠠᠨᠳᠤ ᠪᠠᠭ᠍ᠠᠲᠣᠨ ᠲᠣᠨᠢᠷᠬᠠᠬᠤᠶ᠋ᠢᠨ ᠵᠠᠢᠳᠤ ᠠᠭᠤᠳᠠᠮ ᠣᠭ᠍ᠳᠠᠷᠭᠤᠢᠳᠤ ᠬᠢᠯᠠᠯᠵᠠᠬᠤ ᠮᠢᠩᠭᠠᠨᠲᠣ ᠣᠳᠣᠨᠢ ᠣᠯᠵᠤ ᠬᠠᠷᠠᠬᠤᠪᠠᠷ ᠬᠠᠷᠠᠭᠠ ᠪᠡᠯᠴᠢᠭᠡᠬᠦ᠌ᠳᠤ ᠳᠡᠭ᠌ᠷᠢ ᠭᠠᠵᠠᠷᠤᠨ ᠬᠤᠭᠤᠷᠣᠨᠳᠤᠬᠢ ᠠᠭᠤᠳᠠᠮ ᠵᠠᠢᠳᠤ ᠬᠥᠮᠥᠰᠤᠨ ᠬᠦᠰᠡᠯ ᠮᠥᠷᠥᠭᠡᠳᠦᠯ ᠲᠤᠶᠠᠭᠠᠷᠠᠵᠤ ᠬᠥᠷᠥᠨᠡ᠃
ᠮᠣᠷᠢᠨ ᠬᠤᠭᠤᠷ ᠬᠤᠪᠢᠰᠤᠨ ᠨᠠᠢᠷᠠᠯ ᠬᠥᠭ᠌ᠵᠢᠮ 《ᠬᠤᠨᠢ ᠬᠠᠢᠴᠢᠯᠠᠬᠤ ᠳᠠᠭᠤᠤ》 ᠵᠢ ᠲᠤᠬᠯᠠᠨ ᠦᠵᠡᠬᠦᠯᠤᠨᠠ
《ᠣᠳᠣᠨ ᠭᠢᠯᠪᠠᠭᠠᠲᠣ》 ᠦᠳᠡᠱᠢᠯᠡᠭᠡᠨᠢ ᠵᠦᠪᠬᠡᠨ ᠱᠢᠯᠣᠭᠤᠨ ᠬᠦᠪᠡᠭᠡᠲᠦ ᠴᠠᠭᠠᠨ ᠬᠤᠱᠢᠭᠤᠪᠠᠨ ᠯᠡ ᠮᠠᠭ᠍ᠳᠠᠨ ᠳᠠᠭᠤᠯᠣᠭ᠍ᠰᠠᠨ ᠪᠢᠰᠢ ᠬᠠᠷᠢᠨ ᠪᠦᠯᠬᠦᠮᠳᠡᠯ ᠨᠢᠭ᠍ᠲᠠᠷᠠᠯᠤᠨ ᠦᠨᠳᠦᠷ ᠵᠣᠭ᠍ᠰᠣᠴᠠ᠂ ᠬᠠᠮᠳᠣᠶ᠋ᠢᠨ ᠴᠣᠭ᠍ᠴᠠᠶ᠋ᠢᠨ ᠬᠠᠯᠠᠭᠤᠨ ᠣᠬᠠᠮᠰᠠᠷᠠᠴᠠ ᠡᠭᠦᠰᠴᠦ᠍ ᠬᠦᠳᠦᠯᠦᠭ᠌ᠴᠢᠠᠴᠠ ᠡᠬᠢᠯᠡᠨ ᠬᠤᠣᠰ ᠬᠡᠯᠡᠪᠠᠷ ᠬᠦᠳᠦᠯᠵᠦ᠍᠂ ᠡᠬᠡ ᠤᠯᠤᠰᠤᠨ ᠦᠷᠨᠢᠨ ᠬᠦᠭ᠌ᠵᠢᠬᠦ᠌ᠶ᠋ᠢ ᠪᠡᠯᠭᠡᠳᠡᠵᠦ᠍ ᠦᠭᠡᠳᠡᠲᠠᠢ ᠵᠢᠯᠤᠨ ᠦᠩᠭᠡᠲᠠᠢ ᠦᠳᠡᠱᠢᠯᠡᠭᠡ ᠪᠣᠯᠣᠭ᠍ᠰᠠᠨᠢ ᠳᠣᠷᠠᠳᠬᠤ ᠶᠣᠰᠣᠳᠠᠢ᠂ ᠵᠢᠱ᠌ᠢᠶᠡᠯᠡᠪᠡᠯ ᠦᠳᠡᠱᠢᠯᠡᠭᠡ ᠦᠨᠳᠦᠷᠯᠡᠬᠦ᠌ᠳᠤ ᠨᠠᠢᠷᠠᠯ ᠳᠠᠭᠤᠤ 《ᠡᠬᠡ ᠤᠯᠤᠰᠢᠶᠠᠨ ᠮᠠᠭ᠍ᠲᠠᠨ ᠳᠠᠭᠤᠯᠠᠶᠠ》 （ᠪᠥᠬᠦ᠌ ᠲᠣᠭ᠍ᠯᠠᠭ᠍ᠴᠢᠳ ᠬᠠᠮᠳᠣᠪᠡᠷ ᠲᠣᠭ᠍ᠯᠠᠪᠠ） ᠭᠡᠬᠦ᠌ ᠳᠠᠭᠤᠣ ᠡᠷᠬᠦᠭ᠌ᠰᠡᠨᠨᠢ ᠦᠳᠡᠱᠢᠯᠡᠭᠡᠶ᠋ᠢᠨ ᠠᠭᠤᠷ ᠠᠮᠢᠰᠭᠤᠯᠢ ᠳᠡᠷᠡᠭᠡᠨ ᠵᠠᠭᠤᠷᠠ ᠦᠨᠳᠦᠷ ᠲᠦᠪᠱᠢᠨᠳᠤ ᠵᠢᠷᠣᠭ᠍ᠯᠠᠨ ᠬᠦᠷᠭᠡᠵᠦ᠍ ᠲᠦᠷᠦ᠍ ᠳᠦᠪᠱᠢᠨ ᠲᠦᠮᠡᠨ ᠠᠮᠣᠭᠤᠯᠠᠩ ᠪᠠᠢᠬᠤ ᠣᠨᠤ ᠵᠦᠩᠨᠡᠯ ᠣᠳᠣᠨ ᠲᠧᠯᠸᠢᠰᠢᠶᠠᠷ ᠳᠠᠮᠵᠢᠨ ᠡᠬᠡ ᠤᠯᠤᠰᠤᠨ ᠦᠨᠴᠦᠭ ᠪᠣᠯᠣᠩ ᠬᠦᠷᠲᠡᠯᠡ ᠰᠠᠴᠣᠭ᠍ᠳᠠᠭ᠍ᠰᠠᠨ ᠬᠡᠳᠡᠭ ᠨᠢ ᠯᠠᠪᠳᠠᠢ᠃
ᠬᠤᠶᠠᠷ᠂ ᠮᠣᠷᠢᠲᠠᠢ ᠵᠢᠪᠬᠤᠭᠠ
ᠮᠣᠷᠢᠨ ᠵᠢᠯ ᠮᠣᠷᠢᠪᠠᠨ ᠳᠠᠭᠤᠯᠠᠬᠤ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ᠂ ᠢᠯᠠᠩᠭᠤᠶᠠ ᠥᠨᠥ᠍ ᠵᠢᠯ ᠪᠣᠯ 《ᠰᠦᠷᠢᠶᠠᠷ ᠳᠠᠷᠤᠭ᠍ᠴᠢ》 ᠬᠡᠮᠡᠬᠦ᠌ ᠭᠠᠯ ᠮᠣᠷᠢᠨ ᠵᠢᠯ᠂ ᠵᠢᠯᠤᠨ ᠥᠩᠭᠡ᠂ ᠱᠢᠯᠢᠶ᠋ᠢᠨ ᠥᠩᠲᠠᠢᠪᠠᠨ ᠬᠤᠣᠰᠯᠠᠨ ᠱᠢᠨᠡᠶ᠋ᠢᠨ ᠨᠠᠢᠷᠠᠯ ᠪᠣᠯᠵᠤ ᠳᠠᠭᠤᠯᠠᠭ᠍ᠳᠠᠬᠤᠨᠢ ᠵᠦᠢᠳᠡᠢ᠂ ᠮᠣᠷᠢ ᠪᠣᠯ ᠡᠷᠴᠢ ᠶᠤᠮ᠃ ᠮᠣᠷᠢ ᠪᠣᠯ ᠵᠢᠪᠬᠤᠭᠠ ᠶᠤᠮ᠃ ᠮᠣᠷᠢ ᠪᠣᠯ ᠰᠦᠯᠳᠡ ᠶᠤᠮ᠃ ᠮᠣᠷᠢ ᠪᠣᠯ ᠵᠣᠷᠢᠭ ᠰᠠᠨᠠᠭᠠ ᠶᠤᠮ᠃《ᠮᠣᠩᠭᠤᠯ ᠮᠣᠷᠢᠨᠤ ᠵᠣᠷᠢᠭ ᠰᠠᠨᠠᠭᠠ》 ᠭᠡᠳᠡᠭ ᠮᠣᠬᠤᠰᠢ ᠦᠭᠡᠢ ᠳᠠᠢᠴᠢᠨ᠂ ᠮᠢᠲᠠᠷᠠᠰᠢ ᠦᠭᠡᠢ ᠬᠠᠳᠠᠨ ᠪᠠᠢᠳᠠᠭᠢᠶᠠᠷᠢᠶᠠᠨ ᠠᠯᠳᠠᠷᠱᠢᠪᠠ᠃ ᠴᠠᠬᠠᠷ ᠨᠤᠲᠤᠭᠤᠨ ᠴᠠᠰᠦ ᠬᠦᠦᠷᠭᠡ ᠭᠢᠰᠭᠢᠯᠡᠵᠦ᠍ ᠮᠣᠩᠭᠤᠯ ᠮᠣᠷᠢ ᠳᠠᠪᠬᠢᠵᠦ᠍ ᠢᠷᠡᠭ᠌ᠰᠡᠨ ᠶᠤᠮ᠃ ᠳᠠᠢᠨᠤ ᠭᠠᠯ ᠳᠦᠷᠡᠯᠵᠡᠭ᠌ᠰᠡᠨ ᠳᠠᠢᠴᠢᠨ ᠡᠷᠡᠨᠳᠤ ᠳᠣᠮᠤᠭ ᠲᠤᠤᠯᠢᠰ ᠱᠢᠭ᠋ ᠮᠠᠰᠢ ᠤᠯᠠᠨ ᠮᠣᠷᠢᠳᠠᠢ ᠪᠦᠳᠦᠬᠡᠯ ᠮᠡᠨᠳᠦᠯᠡᠭ᠌ᠰᠡᠨ ᠶᠤᠮ᠃ ᠡᠨᠡ ᠦᠳᠡᠱᠢᠯᠡᠭᠡᠶ᠋ᠢᠨ ᠴᠡᠭᠡᠨ ᠬᠥᠱᠢᠭᠡᠪᠠᠷ ᠡᠳᠡᠬᠡᠷ ᠪᠦᠳᠦᠬᠡᠯ ᠡᠴᠡ ᠪᠥ᠋ᠵᠢᠭ 《ᠭᠠᠢᠬᠠᠮᠰᠢᠬᠳᠤ ᠮᠣᠩᠭᠤᠯ ᠮᠣᠷᠢ》 （ᠮᠦᠱᠢᠶᠡ ᠨᠠᠷᠠᠴᠠ ᠲᠣᠭ᠍ᠯᠠᠪᠠ）᠂ ᠳᠠᠭᠤᠤ 《ᠮᠣᠷᠢ ᠮᠢᠨᠢ》 （ᠱᠢᠯᠤᠭᠤᠨ ᠬᠥᠪᠡᠭᠡᠲᠦ ᠴᠠᠭᠠᠨ ᠬᠤᠱᠢᠭᠤᠨᠤ ᠬᠤᠪᠢᠰᠭᠠᠯᠲᠤ ᠤᠳᠤᠮᠱᠢᠯᠢ ᠵᠠᠯᠭᠠᠮᠵᠢᠯᠠᠬᠤ ᠨᠡᠢᠭᠡᠮᠯᠢᠭ ᠪᠣᠯᠣᠨ ᠲᠣᠯᠭᠠᠲᠠᠨ ᠬᠠᠮᠳᠣᠯᠢᠭ ᠳᠠᠭᠤᠯᠠᠪᠠ）᠂ ᠴᠠᠬᠠᠷ ᠠᠷᠠᠳᠤᠨ ᠳᠠᠭᠤᠤᠶ᠋ᠢᠨ ᠴᠦᠷᠬᠦᠯᠡᠭᠡ 《ᠰᠠᠩᠬᠠᠶᠤᠣ ᠬᠦᠯᠢᠮ》᠂ 《ᠵᠢᠭᠠᠬᠠᠨ ᠰᠠᠭᠠᠷᠠᠯ ᠮᠣᠷᠢ》᠂ 《ᠴᠠᠬᠠᠷ ᠨᠠᠢ᠍ᠮᠠᠨ ᠬᠤᠱᠢᠭᠤ》᠂ （ᠵᠢᠷᠤᠮᠲᠤ᠌᠂ ᠣᠳᠣᠮᠠ᠂ ᠪᠠᠲᠤᠨᠠᠰᠤᠨ ᠨᠠᠷ ᠳᠠᠭᠤᠯᠠᠪᠠ） ᠵᠡᠷᠭᠡ ᠪᠦᠳᠦᠭᠡᠯ ᠦᠵᠡᠭ᠌ᠴᠢᠶ᠋ᠢᠨ ᠠᠯᠳᠠᠨ ᠮᠡᠯᠮᠡᠢ ᠮᠢᠯᠢᠶᠠᠵᠤ ᠰᠣᠨᠣᠷᠤᠨ ᠴᠢᠮᠡᠭ ᠪᠣᠯᠣᠨ ᠳᠠᠭᠤᠯᠠᠭ᠍ᠳᠠᠯᠠ᠃ ᠡᠬᠦᠨᠳᠤ᠂ ᠲᠡᠭᠡᠷᠠ ᠵᠠᠭᠤᠨᠤ ᠳᠠᠪᠢᠭᠠᠳ ᠣᠨᠳᠤ ᠵᠣᠬᠢᠶᠠᠭ᠍ᠳᠠᠵᠤ ᠪᠥᠬᠦ᠌ ᠣᠷᠣᠨ ᠳᠠᠶᠠᠭᠠᠷ ᠶᠡᠬᠡᠳᠡ ᠳᠡᠯᠭᠡᠷᠡᠭ᠌ᠰᠡᠨ ᠭᠤ·ᠵᠠᠮᠰᠦ᠋ᠷᠦᠩᠵᠠᠪᠤᠨ ᠦᠭᠡ᠂ ᠳ᠋᠊· ᠷᠢᠨᠴᠢᠨᠤ ᠠᠶᠠᠯᠭᠤ ᠪᠦᠬᠦᠢ ᠳᠠᠭᠤᠤ《ᠮᠣᠷᠢ ᠮᠢᠨᠢ》 ᠳ᠋ᠤ᠄
《ᠠᠭᠤᠤ ᠤᠯᠤᠰᠢᠶᠠᠨ ᠴᠢᠯᠦᠭᠡᠯᠡᠬᠦ᠌ᠳᠤ
ᠠᠭ᠍ᠲᠠ ᠮᠣᠷᠢᠲᠠᠢᠪᠠᠨ ᠶᠠᠪᠤᠭ᠍ᠰᠠᠨ ᠶᠤᠮ
ᠠᠲᠠᠭᠠᠲᠠᠨ ᠳᠠᠢᠰᠦᠨᠢ ᠰᠥᠨᠥᠭᠡᠬᠦ᠌ᠳᠤ
ᠠᠮᠢ ᠭᠤᠣᠯᠲᠠᠢᠪᠠᠨ ᠬᠤᠯᠪᠣᠭ᠍ᠰᠠᠨ ᠶᠤᠮ
ᠠ ᠬᠥ᠋ ᠮᠣᠷᠢᠨᠳᠤᠪᠠᠨ ᠮᠣᠷᠳᠠᠭᠠᠳ ᠭᠠᠷᠪᠠᠯ
ᠡᠷᠡᠯᠬᠡᠭ ᠵᠣᠷᠢᠭᠢ ᠮᠢᠨᠢ ᠬᠥᠪᠴᠢᠯᠡᠨᠡ》 ᠭᠡᠮᠡᠨ ᠠᠬᠠᠮᠠᠳ ᠪᠠᠢᠯᠳᠤᠭ᠍ᠴᠢᠠᠴᠠ ᠮᠣᠷᠢᠲᠦ ᠴᠡᠷᠢᠭᠤᠨ ᠬᠦᠷᠮᠡᠪᠠᠨ ᠡᠮᠦᠰᠴᠦ᠍ ᠳᠠᠭᠤᠯᠠᠬᠤᠳᠤ ᠥᠪᠡᠷᠤᠨ ᠡᠷᠬᠡ ᠦᠭᠡᠢ ᠴᠢᠯᠦᠭᠡᠯᠡᠬᠦ᠌ ᠳᠠᠢᠨᠤ ᠳᠡᠷᠡ ᠬᠦ᠌ ᠳᠠᠷᠢᠶ᠋ᠢᠨ ᠣᠳᠤᠭᠠ ᠮᠠᠨᠠᠷᠠᠭ᠍ᠰᠠᠨ ᠭᠠᠯ ᠹᠷᠣᠨᠲᠤᠨ ᠪᠠᠢᠳᠠᠯ ᠮᠣᠷᠢᠨᠤ ᠬᠦᠶᠦᠳᠡᠯ ᠱᠢᠭ ᠣᠷᠣᠵᠤ ᠢᠷᠡᠨᠡ᠃ ᠠᠳᠡᠠᠴᠠ ᠴᠠᠬᠠᠷᠤᠨ ᠮᠣᠷᠢᠲᠦ ᠴᠡᠷᠢᠭᠤᠨ ᠴᠢᠯᠦᠭᠡᠯᠡᠬᠦ᠌ ᠳᠠᠢᠨᠤ ᠳᠤᠮᠳᠠ ᠦᠵᠡᠬᠦᠯᠦᠭ᠌ᠰᠡᠨ ᠳᠠᠢᠴᠢᠨ ᠵᠢᠳᠬᠦᠯ ᠳᠠᠷᠬᠠᠨ ᠭᠠᠪᠢᠶᠠᠶ᠋ᠢ ᠣᠯᠵᠤ ᠬᠠᠷᠠᠨᠠ᠃
ᠴᠠᠬᠠᠷ ᠨᠤᠲᠤᠭ ᠪᠣᠯ ᠡᠷᠲᠡᠨᠠᠴᠠ ᠨᠠᠭᠠᠰᠢ ᠠᠳᠤᠭᠤᠨ ᠰᠣᠶᠣᠯᠢ ᠬᠢᠮᠠᠭᠠᠳᠠᠵᠤ ᠶᠠᠪᠤᠭ᠍ᠰᠠᠨ ᠣᠷᠣᠨ ᠪᠣᠯᠬᠤ ᠶᠤᠮ᠃ ᠠᠳᠡ ᠠᠳᠤᠭᠤ ᠮᠣᠷᠢᠪᠠᠨ ᠪᠠᠭ᠍ᠠᠳᠤᠭ᠍ᠰᠠᠨ᠂ ᠮᠠᠭ᠍ᠳᠠᠭ᠍ᠰᠠᠨ ᠳᠠᠭᠤᠤ ᠣᠯᠠᠨ ᠪᠣᠢ᠃ ᠳᠡᠬᠦᠨᠤ ᠳᠤᠮᠳᠠ ᠠᠳᠤᠭᠤ ᠮᠣᠷᠢᠪᠠᠨ ᠪᠠᠭ᠍ᠠᠳᠤᠬᠤᠶ᠋ᠢᠨ ᠬᠠᠮᠲᠤ ᠭᠠᠯ ᠬᠠᠯᠠᠭᠤᠨ ᠠᠮᠢᠳᠤᠷᠠᠯᠤᠨ ᠥᠩᠭᠡ ᠪᠣᠳᠤᠭ ᠳᠣᠳᠣᠷᠠᠵᠣ ᠪᠠᠢᠳᠠᠭ᠃ ᠦᠳᠡᠱᠢᠯᠡᠭᠡᠳᠤ ᠳᠠᠭᠤᠯᠠᠭ᠍ᠳᠠᠭ᠍ᠰᠠᠨ 《ᠵᠢᠭᠠᠬᠠᠨ ᠰᠠᠭᠠᠷᠠᠯ ᠮᠣᠷᠢ》 ᠪᠣᠯ ᠣᠯᠠᠨᠳᠤ ᠳᠠᠰᠤᠯ ᠪᠣᠯᠣᠭ᠍ᠰᠠᠨ ᠳᠠᠭᠤᠤ ᠪᠣᠯᠣᠨᠠ᠃ ᠪᠠᠳᠣᠨᠠᠰᠣᠨ᠂ ᠣᠳᠣᠨᠮᠠᠶ᠋ᠢᠨ ᠳᠠᠭᠤᠯᠠᠭ᠍ᠰᠠᠨ《ᠵᠢᠭᠠᠬᠠᠨ ᠰᠠᠭᠠᠷᠠᠯ ᠮᠣᠷᠢ》ᠳ᠋ᠤ᠄
《ᠵᠢᠭᠠᠬᠠᠨ ᠰᠠᠭᠠᠷᠠᠯ ᠮᠣᠷᠢᠲᠠᠢ ᠬᠥ᠋
ᠵᠠᠮᠤᠨ ᠵᠢᠭᠠᠬᠠᠨ ᠰᠠᠢᠪᠤᠷᠲᠠᠢ ᠬᠥ᠋
ᠵᠠ ᠠᠢ ᠳ᠋ᠠ ᠬᠥ᠋
ᠵᠢᠭᠠᠯ ᠠᠬᠠᠶ᠋ᠢᠨ ᠭᠡᠷ ᠴᠢᠨᠢ ᠬᠠᠮᠢᠭᠠᠭᠤᠷ ᠪᠢᠯᠡ
ᠰᠡᠭᠦᠵᠢᠨ ᠪᠤᠯᠠᠭᠤᠨ ᠪᠠᠷᠠᠭᠤᠨ ᠳᠡᠭᠡᠷᠡ ᠬᠥ᠋
ᠰᠦᠮᠡᠲᠠᠢ ᠬᠤᠸᠠᠶ᠋ᠢᠨ ᠡᠩᠭᠡᠷ ᠳᠡᠭᠡᠷᠡ ᠬᠥ᠋
ᠵᠠ ᠠᠢ ᠳ᠋ᠠ ᠬᠥ᠋
ᠠᠪᠤᠶ᠋ᠢᠨ ᠪᠠᠢᠭᠤᠯᠤᠭ᠍ᠰᠠᠨ ᠬᠤᠶᠠᠷ ᠴᠠᠭᠠᠨ ᠭᠡᠷ ᠭᠦ᠋》 ᠭᠡᠵᠦ᠍ ᠠᠰᠠᠭᠤᠵᠤ ᠬᠠᠷᠢᠭᠤᠯᠬᠤ ᠬᠡᠯᠪᠡᠷᠢᠪᠠᠷ ᠳᠠᠭᠤᠯᠠᠭ᠍ᠰᠠᠨ ᠡᠨᠡ ᠳᠠᠭᠤᠤᠳᠤ ᠮᠠᠰᠢ ᠥᠳᠭᠡᠨ ᠣᠷᠣᠨ ᠨᠤᠲᠤᠭᠤᠨ ᠣᠨᠴᠠᠯᠢᠭᠲᠠᠢ ᠮᠥᠷᠲᠡᠭᠡᠨ ᠴᠠᠬᠠᠷᠤᠨ ᠵᠠᠯᠠᠭᠤᠰᠤᠨ ᠢᠨᠠᠭ ᠬᠠᠢᠷᠠᠪᠠᠨ ᠢᠯᠡᠳᠭᠡᠬᠦ᠌ᠶ᠋ᠢᠨ ᠤᠴᠢᠷ ᠤᠰᠤ ᠨᠤᠲᠤᠭᠢᠶᠠᠨ ᠠᠰᠠᠭᠤᠨ ᠮᠡᠳᠡᠯᠴᠡᠵᠦ᠍ ᠳᠠᠨᠢᠯ ᠳᠠᠰᠤᠯ ᠪᠣᠯᠵᠤ ᠪᠠᠢᠭᠠ ᠬᠤᠷᠣᠮᠬᠠᠨᠤ ᠦᠵᠡᠭ᠌ᠳᠡᠯᠢ ᠨᠢᠳᠦᠨᠳᠤ ᠦᠵᠡᠭ᠌ᠳᠡᠮᠡ ᠢᠯᠡᠳᠭᠡᠭ᠌ᠰᠡᠨ ᠪᠠᠢᠨᠠ᠃
《ᠵᠢᠷᠤᠭᠠ ᠶᠣ᠌ ᠰᠠᠢᠳᠠᠢ ᠮᠣᠷᠢ ᠮᠢᠨᠢ ᠪᠠᠢᠪᠠᠯ
ᠠᠪᠤᠭᠠᠳ ᠢᠷᠡ ᠳ᠋ᠠ ᠮᠥᠮᠥ᠍ ᠮᠢᠨᠢ ᠡ
ᠵᠠᠭᠤᠨ ᠯᠠᠩᠤᠨ ᠰᠠᠩᠬᠠᠶᠤᠤ ᠬᠦᠯᠢᠮ
ᠲᠡᠷᠡ ᠮᠣᠷᠢᠨᠤ ᠴᠢᠮᠡᠭ ᠶᠤᠮ ᠳ᠋ᠠ》 ᠭᠡᠵᠦ᠍ ᠵᠢᠷᠤᠮᠲᠤ ᠵᠢᠨ ᠲᠠᠭᠤᠯᠠᠬᠰᠠᠨ 《ᠰᠠᠩᠬᠠᠶᠤᠤ ᠬᠦᠯᠢᠮ》 ᠳᠠᠭᠤᠤᠳᠤ ᠮᠠᠰᠢ ᠣᠨᠴᠠᠯᠢᠭᠲᠠᠢ ᠮᠣᠷᠢᠨ ᠡᠳᠡᠯᠡᠯ ᠪᠣᠯᠬᠤ ᠡᠮᠡᠭᠡᠯᠢ ᠳᠠᠭᠤᠯᠠᠭ᠍ᠰᠠᠨ ᠠᠪᠠᠴᠦ᠍ ᠡᠮᠡᠭᠡᠯ ᠭᠡᠬᠦ᠌ ᠦᠭᠡ ᠣᠷᠤᠭᠠ ᠦᠭᠡᠢ᠂ ᠬᠠᠷᠢᠨ ᠡᠮᠡᠭᠡᠯᠤᠨ ᠬᠦᠯᠢᠮ ᠳᠠᠭᠤᠯᠠᠭ᠍ᠳᠠᠵᠤ ᠪᠠᠢᠨᠠ᠃ ᠬᠦᠯᠢᠮᠢ ᠳᠠᠭᠤᠯᠠᠬᠤᠪᠠᠷ ᠳᠠᠮᠵᠢᠭᠤᠯᠵᠤ 《ᠰᠠᠢᠨ ᠡᠬᠡᠨᠡᠷ ᠡᠷᠡᠶ᠋ᠢᠨ ᠴᠢᠮᠡᠭ᠂ ᠰᠠᠢᠨ ᠡᠮᠡᠭᠡᠯ ᠬᠥᠯᠥᠭᠤᠨ ᠴᠢᠮᠡᠭ》 ᠭᠡᠰᠡᠨ ᠡᠴᠢᠨᠡ ᠰᠠᠨᠠᠭᠠᠶ᠋ᠢ ᠭᠠᠷᠭᠠᠭ᠍ᠰᠠᠨ ᠪᠠᠢᠨᠠ᠃ ᠴᠠᠬᠠᠷ ᠨᠤᠲᠤᠭᠨᠢ ᠴᠠᠭᠠᠨ ᠬᠡᠷᠡᠮ ᠵᠠᠭᠠᠬᠯᠠᠵᠤ ᠰᠠᠭᠤᠭ᠍ᠰᠠᠨ ᠲᠤᠯᠠ ᠵᠠᠩᠴᠢᠬᠦᠦ ᠵᠡᠷᠭᠡ ᠬᠡᠷᠡᠮᠤᠨ ᠪᠣᠭᠤᠮᠲᠠ ᠬᠤᠲᠠᠲᠠᠢ ᠬᠢᠯᠢᠯᠡᠨ ᠲᠡᠨᠳᠡ ᠦᠢᠯᠡᠳᠪᠦᠷᠢᠯᠡᠭ᠌ᠰᠡᠨ ᠪᠤᠶᠤ ᠪᠣᠯᠪᠠᠰᠤᠷᠠᠭᠤᠯᠤᠭ᠍ᠰᠠᠨ ᠪᠤᠯᠢᠭᠠᠷᠢᠨ ᠠᠷᠠᠰᠤᠪᠠᠷ ᠡᠮᠡᠭᠡᠯᠤᠨ ᠬᠦᠯᠢᠮ ᠬᠢᠵᠦ᠍ ᠴᠢᠮᠡᠭ ᠵᠠᠰᠠᠯ ᠪᠣᠯᠭᠠᠳᠠᠭ ᠪᠠᠢᠪᠠ᠃ ᠡᠨᠡ ᠰᠠᠢᠬᠠᠨ ᠬᠦᠯᠢᠮᠢᠶᠠᠨ ᠪᠣᠷᠣᠭᠠᠨ ᠱᠢᠭᠦᠳᠡᠷᠢ᠂ ᠨᠠᠷᠠ ᠰᠠᠯᠬᠢᠠᠴᠠ ᠬᠢᠮᠠᠭᠠᠳᠠᠵᠤ ᠳᠤᠰᠤᠯᠠᠵᠤ ᠵᠠᠷᠤᠳᠠᠭ᠃ ᠳᠤᠰᠤᠯᠠᠬᠤᠳᠠᠭᠠᠨ ᠦᠬᠡᠷᠤᠨ ᠱᠢᠬᠢᠷᠡᠶ᠋ᠢᠨ ᠳᠣᠰᠤ᠂ ᠯᠠᠪᠤᠨ ᠲᠣᠰᠣ᠂ ᠤᠷᠭᠤᠮᠠᠯᠤᠨ ᠲᠣᠰᠣ ᠵᠡᠷᠭᠡ ᠭᠤᠷᠪᠠᠨ ᠵᠦᠢᠯᠤᠨ ᠳᠣᠰᠤᠶ᠋ᠢ ᠬᠤᠯᠢᠵᠤ ᠳᠤᠰᠤᠯᠠᠪᠠᠯ ᠬᠦᠯᠢᠮᠤᠨ ᠪᠤᠯᠢᠭᠠᠷᠢ ᠵᠥᠭᠡᠯᠡᠨ ᠮᠦᠷᠳᠡᠭᠡᠨ ᠪᠥᠬᠡᠯᠢᠭ᠂ ᠳᠠᠭᠠᠭᠠᠴᠠᠳᠠᠢ ᠪᠣᠯᠳᠠᠭ ᠲᠤᠯᠠ 《ᠰᠠᠩᠬᠠᠶᠤᠤ ᠬᠦᠯᠢᠮ》 ᠭᠡᠵᠡᠢ᠃ ᠴᠠᠬᠠᠷᠤᠨ ᠡᠷᠬᠢᠮᠰᠦᠭ ᠡᠳ᠋ᠯᠡᠯᠤᠨ ᠨᠢᠭᠡ ᠵᠦᠢᠯ ᠪᠣᠯᠳᠠᠭ᠃
ᠡᠳᠡᠭᠡᠷ ᠪᠣᠯ ᠮᠣᠷᠢᠨ ᠵᠢᠯ ᠳᠠᠭᠤᠯᠠᠭ᠍ᠳᠠᠭ᠍ᠰᠠᠨ ᠮᠣᠷᠢᠳᠠᠢ ᠳᠠᠭᠤᠤ᠂ ᠮᠣᠷᠢᠳᠠᠢ ᠳᠠᠭᠤᠤ ᠪᠣᠯᠪᠠᠴᠤ᠌ ᠮᠣᠷᠢᠪᠠᠨ ᠯᠡ ᠳᠠᠭᠤᠯᠠᠭᠠ ᠦᠬᠡᠢ᠂ ᠬᠠᠷᠢᠨ ᠴᠠᠬᠠᠷᠤᠨ ᠵᠠᠩ ᠦᠢᠯᠡ᠂ ᠠᠮᠢᠳᠤᠷᠠᠯ ᠠᠳᠠᠯ ᠳᠠᠭᠤᠯᠠᠭ᠍ᠳᠠᠵᠤ ᠪᠠᠢᠪᠠ᠃ ᠠᠮᠢᠳᠤᠷᠠᠯᠤᠨ ᠥᠩᠭᠡ ᠪᠣᠳᠤᠭ ᠥᠳᠭᠡᠨ ᠪᠣᠯᠣᠮᠠᠨᠵᠢᠨ ᠰᠠᠶᠢ ᠦᠳᠡᠱᠢᠯᠡᠭᠡᠶ᠋ᠢᠨ ᠲᠠᠳᠠᠬᠤ ᠬᠦᠴᠦᠨ ᠴᠢᠩᠭᠠ ᠪᠣᠯᠳᠠᠭ ᠤᠴᠢᠷᠲᠠᠢ᠃ ᠨᠡᠡᠭ ᠢᠯᠠᠡᠭᠭᠤᠶᠠ 《ᠴᠠᠬᠠᠷ ᠨᠠᠢ᠍ᠮᠠᠨ ᠬᠤᠱᠢᠭᠤ》 ᠵᠡᠷᠭᠡ ᠣᠷᠣᠨ ᠨᠣᠲᠤᠭᠤᠨ ᠣᠨᠴᠠᠯᠢᠭ ᠳᠣᠪᠣᠢᠮᠠ ᠴᠦᠷᠬᠦᠯᠡᠭᠡ ᠳᠠᠭᠤᠣᠨᠤᠭᠤᠳᠨᠢ ᠬᠦᠮᠦᠰᠤᠨ ᠰᠡᠳᠭᠢᠯᠤᠨ ᠬᠦᠪᠴᠢᠶ᠋ᠢ ᠳᠣᠷᠬᠢᠭᠤᠯᠵᠣ ᠰᠠᠨᠠᠬᠤᠠᠴᠠ ᠨᠣᠲᠤᠭ᠂ ᠰᠠᠨᠠᠭ᠍ᠳᠠᠬᠤᠠᠴᠠ ᠡᠵᠢ ᠭᠡᠬᠦ᠌ ᠬᠠᠢᠯᠭᠠᠨ ᠰᠠᠨᠠᠭᠠᠨᠤ ᠬᠠᠢᠷᠠᠶ᠋ᠢᠨ ᠳᠡᠭᠡᠵᠢ᠂ ᠴᠠᠢᠯᠭᠠᠨ ᠪᠣᠳᠣᠯᠤᠨ ᠴᠠᠢᠶ᠋ᠢᠨ ᠰᠦ ᠪᠣᠯᠵᠤ ᠴᠢᠳᠠᠵᠠᠢ᠃ ᠡᠨᠡ ᠨᠢ ᠣᠷᠣᠨ ᠨᠣᠲᠤᠭᠤᠨ ᠦᠳᠡᠱᠢᠯᠡᠭᠡ ᠪᠣᠯᠣᠭ᠍ᠰᠠᠨᠤ ᠬᠤᠪᠢᠳᠤ ᠵᠠᠪᠠᠯ ᠨᠣᠲᠤᠭ ᠣᠰᠣᠨᠤ ᠣᠨᠴᠠᠯᠢᠭ ᠢᠯᠡ ᠲᠣᠳᠣ ᠪᠠᠢᠮᠠᠨ ᠰᠠᠶᠢ ᠠᠮᠵᠢᠯᠲᠠ ᠣᠯᠵᠣ ᠴᠢᠳᠠᠨᠠ ᠭᠡᠳᠡᠭᠢ ᠳᠠᠬᠢᠨᠲᠠ ᠭᠡᠷᠡᠴᠢᠯᠡᠭ᠌ᠰᠡᠨ ᠪᠠᠢᠨᠠ᠃
ᠭᠤᠷᠪᠠ᠂ ᠤᠨᠠᠭᠠᠨ ᠦᠦᠷᠰᠡᠯ
ᠬᠡᠦᠬᠡᠳ ᠪᠣᠯ ᠬᠥᠮᠥᠨᠤ ᠨᠠᠷᠠ᠂ ᠬᠦᠰᠡᠯᠤᠨ ᠲᠤᠭ ᠪᠣᠯᠳᠠᠭ ᠤᠴᠢᠷᠲᠠᠢ᠂ ᠬᠡᠦᠬᠡᠳᠤᠨ ᠵᠢᠪᠬᠤᠭᠠᠠᠴᠠ ᠬᠦᠰᠡᠯ ᠢᠷᠡᠭᠡᠳᠦᠢᠪᠠᠨ ᠣᠯᠵᠤ ᠬᠠᠷᠠᠨᠠ᠃ ᠬᠡᠦᠬᠡᠳᠤᠨ ᠳᠠᠭᠤᠤᠠᠴᠠ ᠢᠷᠡᠵᠦ᠍ ᠪᠠᠢᠭᠠ ᠱᠢᠨᠡ ᠵᠢᠯᠤᠨ ᠨᠠᠷᠠᠨᠤ ᠰᠠᠴᠤᠷᠠᠭᠢ ᠣᠯᠵᠤ ᠬᠠᠷᠠᠨᠠ᠃ ᠬᠡᠦᠬᠡᠳᠤᠨ ᠪᠥᠵᠢᠭᠠᠴᠠ ᠬᠥᠭ᠌ᠵᠢᠵᠦ᠍ ᠪᠠᠢᠭᠠ ᠱᠢᠯᠤᠭᠤᠨ ᠬᠥᠪᠡᠭᠡᠲᠦ ᠴᠠᠭᠠᠨ ᠬᠤᠱᠢᠭᠤᠨᠤ ᠬᠦᠷᠬᠦ᠌ ᠮᠠᠷᠭᠠᠰᠢᠶ᠋ᠢᠨ ᠠᠯᠲᠠᠨ ᠵᠢᠯᠣᠭᠤᠶ᠋ᠢ ᠣᠯᠵᠤ ᠪᠠᠷᠢᠨᠠ᠃ ᠬᠡᠦᠬᠡᠳᠤᠨ ᠳᠠᠭᠤᠤ ᠪᠥᠵᠢᠭ 《ᠮᠢᠨᠥ᠍ ᠬᠥᠭᠡᠷᠦᠬᠦᠨ ᠴᠠᠬᠠᠷ ᠬᠤᠷᠠᠭᠠ》 （ᠠᠨᠣᠵᠢᠨ᠂ ᠲᠤᠤᠯᠢᠰ᠂ ᠦᠯᠡᠮᠵᠢ ᠨᠠᠷ ᠲᠣᠭ᠍ᠯᠠᠪᠠ）᠂ ᠮᠣᠷᠢᠨ ᠬᠤᠭᠤᠷ ᠬᠤᠪᠢᠰᠤᠨ ᠨᠠᠢᠷᠠᠯ ᠬᠥᠭ᠌ᠵᠢᠮ 《ᠬᠤᠨᠢ ᠬᠠᠢᠴᠢᠯᠠᠬᠤ ᠳᠠᠭᠤᠤ》 （ᠱᠢᠯᠤᠭᠤᠨ ᠬᠥᠪᠡᠭᠡᠲᠦ ᠴᠠᠭᠠᠨ ᠬᠤᠱᠢᠭᠤᠨᠤ ᠨᠢᠭᠡᠳᠦᠭᠡᠷ ᠪᠠᠭᠠ ᠰᠤᠷᠭᠠᠭᠤᠯᠢᠶ᠋ᠢᠨ ᠰᠣᠷᠣᠭ᠍ᠴᠢᠳ ᠲᠣᠭ᠍ᠯᠠᠪᠠ）᠂ ᠬᠡᠦᠬᠡᠳᠤᠨ ᠨᠠᠢᠷᠠᠯ ᠳᠠᠭᠤᠤ 《ᠣᠳᠣᠨ ᠵᠡᠭᠦᠳᠦ》 （ᠱᠢᠯᠤᠭᠤᠨ ᠬᠥᠪᠡᠭᠡᠲᠦ ᠴᠠᠭᠠᠨ ᠬᠤᠱᠢᠭᠤᠨᠤ ᠬᠤᠶᠠᠳᠤᠭᠠᠷ ᠪᠠᠭᠠ ᠰᠤᠷᠭᠠᠭᠤᠯᠢᠶ᠋ᠢᠨ ᠰᠣᠷᠣᠭ᠍ᠴᠢᠳ ᠳᠠᠭᠤᠯᠠᠪᠠ） ᠵᠡᠷᠭᠡ ᠤᠷᠠᠨ ᠪᠦᠳᠦᠭᠡᠯᠢ ᠴᠥᠮ ᠰᠤᠷᠭᠠᠭᠤᠯᠢᠳᠤ ᠪᠠᠢᠭᠠ ᠰᠣᠳᠣᠨ ᠨᠠᠬᠢᠶᠠ ᠰᠣᠷᠣᠭ᠍ᠴᠢᠳᠠᠴᠠ ᠲᠣᠭ᠍ᠯᠠᠭ᠍ᠰᠠᠨ ᠪᠠᠢᠨᠠ᠃ 《ᠬᠥᠯᠥᠭ ᠪᠣᠯᠬᠤᠳᠤ ᠤᠨᠠᠭᠠᠨᠠᠴᠠ᠂ ᠬᠥᠮᠥᠨ ᠪᠣᠯᠬᠤᠳᠤ ᠪᠠᠭᠠᠠᠴᠠ》 ᠭᠡᠳᠡᠭ ᠦᠨᠡᠨ ᠤᠷᠭᠤᠮᠠᠯᠤᠨ ᠦᠭᠡ ᠲᠡᠷᠭᠡᠯᠤᠨ ᠠᠶᠠᠯᠭᠤ ᠪᠦᠬᠦᠢ᠂ ᠳᠠᠭᠤᠤ ᠪᠥᠵᠢᠭ 《ᠮᠢᠨᠥ᠍ ᠬᠥᠭᠡᠷᠦᠬᠦᠨ ᠴᠠᠬᠠᠷ ᠬᠤᠷᠠᠭᠠ》 ᠳ᠋ᠤ᠄
《ᠬᠦᠬᠦᠷ ᠬᠠᠳᠠᠨᠤ ᠡᠩᠭᠡᠷᠲᠤ
ᠬᠥᠷ ᠪᠠᠶᠠᠷ ᠪᠢᠯᠬᠠᠨᠠ
ᠬᠥᠭᠡᠷᠦᠬᠦᠨ ᠴᠠᠭᠠᠨ ᠬᠤᠷᠠᠭᠠ ᠮᠢᠨᠢ
ᠬᠡᠦᠬᠡᠳ ᠳᠠᠭᠠᠭᠠᠳ ᠲᠣᠭ᠍ᠯᠠᠨᠠ
ᠮᠠᠢ ᠮᠠᠢ ᠮᠠᠢᠯᠠᠭᠠᠳ
ᠮᠠᠩᠨᠤᠭ ᠲᠠᠯᠠᠪᠠᠨ ᠴᠢᠮᠡᠨᠡ
ᠮᠢᠨᠳᠠᠰᠤ ᠵᠥᠭᠡᠯᠡᠨ ᠨᠣᠣᠰᠣᠲᠠᠢ
ᠮᠠᠨᠤ ᠴᠠᠬᠠᠷᠤᠨ ᠰᠤᠪᠤᠳ ᠶᠤᠮ》ᠭᠡᠬᠦ᠌ ᠬᠡᠦᠬᠡᠳᠤᠨ ᠳᠠᠭᠤᠤᠠᠴᠠ ᠬᠤᠷᠠᠭᠠᠶ᠋ᠢᠨ ᠮᠠᠢᠯᠠᠭᠠ ᠠᠨᠢᠷᠲᠤᠵᠤ ᠤᠰᠤ ᠨᠤᠲᠤᠭ 《ᠬᠦᠬᠦᠷ ᠬᠠᠳᠠ᠂ ᠨᠠᠢ᠍ᠮᠠᠶ᠋ᠢᠨ ᠠᠭᠤᠯᠠ》 ᠳᠠᠭᠤᠯᠠᠭ᠍ᠳᠠᠨ ᠲᠡᠷᠡ ᠪᠡᠯᠴᠢᠬᠡᠷᠲᠤ ᠲᠠᠪᠠᠪᠠᠷ ᠲᠣᠭ᠍ᠯᠠᠨ ᠥᠰᠦᠭᠡ 《ᠴᠠᠬᠠᠷᠤᠨ ᠴᠠᠭᠠᠨ ᠰᠤᠪᠤᠳ》 ᠴᠠᠢᠯᠵᠠᠨ ᠬᠠᠷᠠᠭ᠍ᠳᠠᠮᠠᠷ᠂ ᠡᠨᠡ ᠪᠣᠯ ᠤᠷᠠᠯᠢᠭ ᠂ ᠭᠬᠢᠷ ᠦᠭᠡᠢ ᠨᠢᠩᠵᠢᠨ ᠰᠡᠳᠭᠢᠯᠠᠴᠠ ᠣᠨᠳᠣᠷᠣᠭ᠍ᠰᠠᠨ ᠤᠨᠠᠭᠠᠨ ᠴᠠᠭᠠᠨ ᠦᠦᠷᠰᠡᠯ ᠶᠤᠮ᠃
ᠨᠠᠢ᠍ᠮᠠᠶ᠋ᠢᠨ ᠠᠭᠤᠯᠠ ᠪᠣᠯ ᠴᠠᠬᠠᠷ ᠨᠣᠲᠤᠭᠤᠨ ᠨᠡᠷᠡᠲᠦ ᠠᠭᠤᠯᠠ ᠶᠣᠮᠰᠠᠨ᠂ ᠠᠳᠡᠬᠢ ᠴᠠᠰᠤᠲᠦ ᠲᠠᠯᠠᠶ᠋ᠢᠨ ᠦᠵᠡᠮᠵᠢᠪᠠᠷ ᠠᠷᠣ ᠦᠵᠡᠭ᠌ᠳᠡᠯ ᠪᠣᠯᠭᠠᠵᠣ ᠲᠣᠭ᠍ᠯᠠᠭ᠍ᠰᠠᠨ ᠪᠦᠵᠢᠭᠨᠢ ᠬᠡᠳᠦᠢᠪᠡᠷ ᠲᠣᠭ᠍ᠯᠠᠭ᠍ᠴᠢᠳᠲᠤ ᠠᠪᠴᠦ᠍ ᠬᠡᠯᠡᠪᠡᠯ ᠬᠦᠢᠲᠡᠨᠳᠤ ᠳᠠᠭᠠᠷᠠᠵᠣ ᠵᠢᠩᠬᠢᠨᠡᠵᠦ᠍ ᠪᠠᠢᠭ᠍ᠰᠠᠨ ᠴᠤ᠌ ᠣᠷᠠᠯᠢᠭ ᠭᠡᠰᠡᠨ ᠭᠠᠭ᠍ᠴᠠ ᠬᠦᠭᠡᠭᠡᠴᠡᠯᠳᠦᠯᠨᠢ ᠲᠡᠳᠡᠨᠢ ᠳᠣᠯᠠᠭᠠᠴᠠᠭᠤᠯᠵᠣ᠂ ᠮᠦᠩᠬᠦᠨ ᠴᠠᠭᠠᠨ ᠪᠠᠢᠭᠠᠯᠢᠶ᠋ᠢᠨ ᠦᠵᠡᠮᠵᠢᠪᠠᠷ ᠮᠣᠷᠢᠨ ᠵᠢᠯᠢᠶᠠᠨ ᠣᠭ᠍ᠳᠣᠬᠤ ᠪᠠᠭ᠍ᠠᠳᠣᠯᠢ ᠠᠪᠴᠢᠷᠠᠪᠠ᠃ ᠵᠣᠭᠠᠴᠠᠯᠤᠨ ᠴᠡᠭ ᠪᠣᠯᠬᠤ ᠣᠳᠣᠳᠤ ᠣᠭ᠍ᠳᠠᠷᠭᠤᠢᠶ᠋ᠢᠨ ᠰᠣᠶᠣᠯ ᠵᠣᠭᠠᠴᠠᠯᠤᠨ ᠭᠠᠵᠠᠷ ᠡᠪᠦᠯᠤᠨ ᠣᠯᠠᠷᠢᠯᠤᠨ ᠮᠦᠰᠦ ᠴᠠᠰᠣᠨᠤ ᠴᠡᠩᠬᠡᠬᠦᠨᠤ ᠭᠠᠵᠠᠷᠤᠨ ᠦᠵᠡᠭ᠌ᠳᠡᠯᠨᠢ ᠬᠦᠮᠦᠨ ᠪᠠᠢᠭᠠᠯᠢᠶ᠋ᠢᠨ ᠡᠷᠦᠬᠡᠶ᠋ᠢᠨ ᠡᠵᠡᠨ ᠵᠣᠬᠢᠴᠠᠯᠤᠨ ᠲᠣᠣᠯᠢᠶ᠋ᠢ ᠬᠦᠭ᠌ᠵᠢᠮᠳᠡᠵᠦ᠍ ᠪᠠᠢᠭᠠᠯᠢᠳᠤ ᠠᠭᠤᠰᠭᠤ ᠪᠠᠭ᠍ᠠᠲᠣᠯᠳᠤ ᠰᠡᠳᠭᠢᠯᠢ ᠳᠦᠷᠦᠭ᠌ᠳᠡᠬᠦᠯᠵᠦ᠍ ᠴᠢᠳᠠᠭ᠍ᠰᠠᠨ ᠪᠠᠢᠨᠠ᠃ ᠡᠳᠡᠬᠡᠷ ᠭᠠᠳᠠᠷ ᠦᠵᠡᠭ᠌ᠳᠡᠯᠨᠢ ᠦᠳᠡᠱᠢᠯᠡᠭᠡᠳᠤ ᠠᠮᠢᠳᠣᠷᠠᠯᠤᠨ ᠠᠭᠤᠷ ᠠᠮᠢᠰᠭᠤᠯ ᠨᠡᠮᠡᠭ᠌ᠰᠡᠨ ᠮᠦᠷᠳᠡᠭᠡᠨ ᠠᠮᠢᠯᠠᠯ ᠳᠡᠭ᠌ᠵᠢᠯᠤᠨ ᠡᠷᠴᠢ ᠵᠣᠷᠢᠭ ᠨᠡᠮᠡᠭᠰᠡᠨ ᠪᠤᠯ ᠮᠣᠷᠢᠨ ᠬᠤᠭᠤᠷ ᠬᠤᠪᠢᠰᠤᠨ ᠨᠠᠢᠷᠠᠯ ᠬᠥᠭ᠌ᠵᠢᠮ 《ᠬᠤᠨᠢ ᠬᠠᠢᠴᠢᠯᠠᠬᠤ ᠳᠠᠭᠤᠤ》 ᠲᠣᠭ᠍ᠯᠠᠯᠲᠠᠨᠢ ᠨᠢᠭᠡ ᠲᠠᠯᠠᠪᠠᠷ ᠮᠠᠯᠵᠢᠬᠤ ᠠᠮᠢᠳᠣᠷᠠᠯᠢ ᠳᠣᠰᠭᠠᠵᠣ ᠴᠢᠳᠠᠭ᠍ᠰᠠᠨ ᠮᠦᠷᠳᠡᠭᠡᠨ ᠨᠦᠭᠦᠬᠡ ᠲᠠᠯᠠᠪᠠᠷ ᠬᠡᠦᠬᠡᠳ ᠪᠠᠭᠠᠴᠣᠳᠲᠤ ᠣᠯᠠᠮᠵᠢᠯᠠᠯᠲᠣ ᠨᠣᠲᠤᠭᠤᠨ ᠰᠣᠶᠣᠯᠢ ᠣᠯᠠᠮᠵᠢᠯᠠᠨ ᠵᠠᠯᠭᠠᠮᠵᠢᠯᠠᠭᠤᠯᠵᠣ ᠪᠠᠢᠭᠠ ᠬᠤᠯᠠᠴᠢ ᠣᠬᠠᠭᠠᠨᠢ ᠣᠯᠵᠣ ᠬᠠᠷᠠᠨᠠ᠃
ᠨᠣᠲᠤᠭ ᠣᠷᠣᠨᠤ ᠱᠢᠯᠢᠳᠡᠭ ᠰᠣᠶᠣᠯ ᠪᠣᠯ ᠳᠣᠮᠳᠠᠳᠣᠶ᠋ᠢᠨ ᠰᠣᠶᠣᠯᠤᠨ ᠨᠢᠭᠡ ᠬᠡᠰᠡᠭ ᠪᠣᠯᠬᠤ ᠶᠤᠮ᠃ ᠬᠡᠦᠬᠡᠳ ᠪᠠᠭᠠᠴᠣᠳᠲᠤ ᠰᠣᠶᠣᠯᠤᠨ ᠢᠳᠡᠭᠡᠯ ᠣᠯᠭᠤᠬᠤ ᠡᠭᠦᠳᠡᠨᠠᠴᠠ ᠡᠳᠡᠬᠡᠷ ᠪᠠᠭᠠ ᠰᠣᠷᠭᠠᠭᠤᠯᠢᠶ᠋ᠢᠨ ᠬᠡᠦᠬᠡᠳᠲᠤ ᠣᠷᠠᠯᠢᠭᠤᠨ ᠠᠮᠳᠠᠷᠬᠠᠯ᠂ ᠣᠷᠠᠯᠢᠭᠤᠨ ᠰᠣᠷᠭᠠᠯᠲᠠ᠂ ᠣᠷᠠᠯᠢᠭᠤᠨ ᠲᠠᠭᠠᠱᠢᠶᠠᠯ ᠦᠭ᠌ᠴᠦ ᠵᠠᠯᠭᠠᠮᠵᠢ ᠦᠶᠡᠶ᠋ᠢᠨ ᠵᠢᠪᠬᠤᠭᠠ ᠬᠡᠢᠮᠣᠷᠢᠶ᠋ᠢ ᠬᠤᠷᠤᠢᠯᠠᠪᠠ᠃
ᠶᠡᠷᠦᠩᠬᠡᠢᠯᠡᠪᠡᠯ᠂ 《ᠣᠳᠣᠨ ᠭᠢᠯᠪᠠᠭᠠᠲᠣ ᠱᠢᠯᠣᠭᠤᠨ ᠬᠦᠪᠡᠭᠡᠲᠦ ᠴᠠᠭᠠᠨ ᠬᠤᠱᠢᠭᠤ》 ᠬᠡᠮᠡᠬᠦ᠌ ᠳᠣᠰᠭᠠᠢ ᠳᠠᠯᠠᠪᠠᠢᠦᠳᠡᠱᠢᠯᠡᠭᠡᠨᠢ ᠱᠢᠨᠡᠶ᠋ᠢ ᠡᠭᠦᠳᠬᠦ᠂ ᠱᠢᠨᠡ ᠪᠦᠳᠦᠬᠡᠯᠢ ᠲᠠᠨᠢᠯᠴᠠᠭᠤᠯᠬᠤ᠂ ᠣᠷᠣᠨ ᠨᠣᠲᠤᠭᠤᠨ ᠰᠣᠶᠣᠯᠢ ᠣᠬᠠᠭᠤᠯᠬᠤ᠂ ᠣᠯᠠᠨ ᠲᠦᠮᠡᠨᠴᠢ ᠣᠷᠠᠯᠢᠭᠢ ᠳᠡᠯᠭᠡᠷᠡᠬᠦᠯᠬᠦ᠌ ᠵᠡᠷᠭᠡ ᠲᠠᠯᠠᠪᠠᠷ ᠴᠦᠮ ᠠᠮᠵᠢᠯᠲᠠ ᠣᠯᠣᠭ᠍ᠰᠠᠨ ᠰᠣᠳᠣᠨ ᠪᠦᠳᠦᠬᠡᠯ ᠪᠣᠯᠣᠭ᠍ᠰᠠᠨ ᠬᠡᠵᠤ ᠪᠢ ᠬᠤᠪᠢᠨᠳᠠᠭᠠᠨ ᠦᠵᠡᠵᠤ ᠪᠠᠢᠨᠠ᠃