ᠡᠵᠢᠶ᠋ᠢᠨ ᠮᠢᠨᠢ ᠬᠠᠢᠷᠠ ᠪᠤᠯ ᠬᠤᠢᠲᠦ ᠨᠠᠭᠤᠷᠤᠨ ᠤᠰᠤᠨ᠃ ᠵᠡᠭᠡᠰᠦ ᠬᠤᠯᠤᠰᠤ ᠬᠠᠯᠢᠭᠤᠷᠠᠭ᠍ᠰᠠᠨ ᠴᠡᠯᠡᠭᠡᠷ ᠲᠡᠨᠵᠢᠨᠳᠤᠨᠢ ᠭᠠᠯᠠᠭᠤ ᠱᠢᠪᠠᠭᠤ ᠦᠨᠳᠡᠭᠡ ᠵᠤᠯᠵᠠᠭᠠᠪᠠᠨ ᠨᠡᠪᠴᠢᠬᠦᠯᠦᠨ ᠭᠠᠩᠭᠠᠨᠠᠨ ᠪᠦᠵᠢᠳᠡᠭ ᠠᠮᠤᠭᠤᠯᠠᠩ ᠤᠷᠤᠨ᠃ ᠠᠷᠤ ᠪᠤᠮᠪᠠᠶ᠋ᠢᠨ ᠤᠷᠤᠨᠤ ᠲᠤᠤᠯᠢᠶ᠋ᠢᠨ ᠦᠵᠡᠰᠭᠦᠯᠡᠩᠲᠦ ᠬᠠᠲᠤᠨ ᠭᠤᠸᠠ ᠵᠢᠷᠤᠭ᠃
ᠡᠵᠢᠶ᠋ᠢᠨ ᠮᠢᠨᠢ ᠬᠠᠢᠷᠠ ᠪᠤᠯ ᠡᠮᠦᠨᠡ ᠭᠤᠤᠯᠤᠨ ᠤᠰᠤᠨ᠃ ᠲᠤᠩᠭᠠᠯᠠᠭ ᠤᠷᠤᠰᠭᠠᠯᠳᠤᠨᠢ ᠵᠢᠭᠠᠰᠤ ᠵᠢᠷᠠᠭᠠᠬᠠᠢ ᠢᠷᠠᠯᠵᠠᠨ ᠱᠤᠩᠪᠠᠵᠦ᠍ ᠡᠷᠭᠢ ᠲᠣᠬᠤᠢᠶ᠋ᠢᠨ ᠨᠤᠮᠢᠨ ᠵᠦᠯᠬᠡᠨᠳᠤᠨᠢ ᠢᠱᠢᠬᠡ ᠬᠤᠷᠠᠭᠠ ᠨᠤᠵᠤᠭᠤᠷᠠᠨ ᠡᠷᠬᠡᠯᠡᠳᠡᠭ ᠪᠦᠪᠡᠢᠶ᠋ᠢᠨ ᠳᠠᠭᠤᠤ ᠵᠦᠰᠡᠷᠡᠭ᠌ᠰᠡᠨ ᠽᠠᠮᠪᠤᠯᠢᠩᠤᠨ ᠵᠦᠭᠡᠯᠡᠨ ᠠᠶᠠᠯᠭᠤ᠃ ᠠᠮᠠᠷᠠᠭ ᠰᠠᠯᠬᠢᠨ ᠬᠦᠯᠢᠶᠠᠨ ᠲᠤᠱᠠᠵᠦ᠍ ᠰᠤᠬ᠍ᠳᠤᠭᠤᠷᠠᠳᠠᠭ ᠠᠷᠢᠭᠤᠬᠠᠨ ᠮᠦᠷᠦᠬᠡᠳᠦᠯᠤᠨ ᠤᠷᠠᠨ ᠡᠬᠡᠱᠢᠭ᠃
ᠡᠵᠢᠶ᠋ᠢᠨ ᠮᠢᠨᠢ ᠬᠠᠢᠷᠠ ᠪᠤᠯ ᠮᠦᠰᠦ ᠴᠠᠰᠤᠨᠤ ᠲᠤᠤᠭᠤᠷ ᠢᠯᠪᠢᠯᠵᠠᠨ ᠤᠷᠤᠰᠳᠠᠭ ᠬᠠᠷᠠᠵᠠᠨᠤ ᠤᠰᠤ᠃ ᠡᠩ ᠦᠭᠡᠢ ᠶᠡᠭᠡ ᠬᠠᠢᠷᠠᠶ᠋ᠢᠨ ᠠᠯᠠᠭᠠᠨᠳᠠᠭᠠᠨ ᠬᠠᠬᠢᠷ ᠡᠪᠦᠯᠢ ᠤᠶᠠᠰᠭᠠᠨ ᠲᠡᠪᠡᠷᠢᠵᠦ᠍ ᠬᠠᠭ᠍ᠳᠠ ᠡᠪᠡᠰᠦ᠂ ᠬᠠᠨᠳᠠᠭᠠᠢ ᠪᠤᠭᠤ᠂ ᠬᠠᠨᠠᠭᠠᠷ ᠲᠡᠯᠡᠬᠡᠢᠪᠠᠨ ᠤᠮᠳᠠᠯᠠᠨ ᠱᠢᠮᠡᠵᠢᠬᠦᠯᠳᠡᠭ ᠡᠩᠭᠡᠶ᠋ᠢᠨ ᠰᠠᠷᠠᠭᠤᠯ ᠵᠠᠶᠠᠭᠠ᠃ ᠬᠠᠢᠷᠠᠶ᠋ᠢᠨ ᠮᠦᠩᠭᠦᠨ ᠴᠡᠭᠡᠯᠳᠡᠭᠡᠨ ᠠᠮᠢ ᠡᠰᠡᠨᠢᠯ ᠲᠦᠯᠵᠢᠬᠦᠯᠳᠡᠭ᠂ ᠡᠷᠭᠢᠶ᠋ᠢᠨ ᠲᠡᠨᠢᠬᠡᠷ ᠴᠢᠯᠠᠭᠤᠨᠳᠠᠭᠠᠨ ᠮᠦᠰᠦ ᠠᠷᠠᠨᠱᠢᠨᠢ ᠲᠠᠪᠳᠠᠳᠠᠭ ᠵᠦᠬᠡᠯᠡᠨ ᠬᠠᠷᠬᠢᠶᠠ᠃
ᠡᠵᠢᠶ᠋ᠢᠨ ᠮᠢᠨᠢ ᠬᠠᠢᠷᠠ ᠪᠤᠯ ᠷᠠᠱᠢᠶᠠᠨ ᠪᠤᠯᠠᠭᠤᠨ ᠮᠦᠩᠭᠡᠶ᠋ᠢᠨ ᠤᠰᠤᠨ᠃ ᠦᠷᠦᠪᠴᠢ ᠴᠠᠢᠯᠭᠠᠨ ᠰᠡᠳᠭᠢᠯᠠᠴᠠ ᠤᠨᠳᠤᠷᠤᠬ᠍ᠰᠠᠨ ᠦᠭ᠌ᠭᠢᠶᠡᠮᠦᠷ ᠬᠠᠢᠷᠠᠶ᠋ᠢᠨ ᠬᠠᠯᠬᠢᠶᠠ᠃ ᠠᠯᠳᠠᠷ ᠲᠠᠭᠤᠳᠠᠯᠭᠠᠶ᠋ᠢᠨ ᠠᠯᠳᠠᠨ ᠲᠢᠳᠢᠮᠢᠶᠠᠷ ᠭᠠᠩᠭᠠᠯᠠᠬ᠍ᠰᠠᠨ ᠠᠭᠤᠤ ᠶᠡᠭᠡᠶ᠋ᠢᠨ ᠪᠦᠷᠢᠯᠸᠠ᠃ ᠡᠬᠡᠯ ᠪᠤᠷᠤᠬᠠᠨ ᠡᠳᠦᠷ ᠬᠤᠨᠤᠭᠤᠳᠢᠶᠠᠷ ᠡᠰᠭᠡᠵᠦ᠍ ᠤᠷᠠᠯᠠᠬ᠍ᠰᠠᠨ ᠠᠮᠢᠳᠤᠷᠠᠬᠤᠢᠶ᠋ᠢᠨ ᠤᠬᠠᠭᠠᠨ᠃ ᠤᠬᠠᠭᠠᠨᠠᠴᠠ ᠤᠬᠠᠭᠠᠨ ᠤᠨᠳᠤᠷᠤᠭᠤᠯᠤᠬ᠍ᠰᠠᠨ ᠶᠢᠷᠳᠢᠨᠴᠦ᠍ᠶ᠋ᠢᠨ ᠨᠢᠭᠡᠨ ᠭᠠᠢᠬᠠᠮᠱᠢᠭ᠃
ᠡᠵᠢᠶ᠋ᠢᠨ ᠮᠢᠨᠢ ᠬᠠᠢᠷᠠ ᠪᠤᠯ ᠦᠷᠡᠳᠡᠭᠡᠨ ᠢᠪᠢᠯᠦᠭ᠌ᠰᠡᠨ ᠰᠦᠨ ᠬᠦᠷᠬᠢᠷᠡ᠃ ᠠᠩᠭᠢᠷ ᠤᠭᠤᠷᠠᠭ ᠠᠰᠭᠠᠷᠠᠭᠤᠯᠤᠬ᠍ᠰᠠᠨ ᠡᠩᠭᠦᠷᠡᠢ ᠤᠶᠠᠬᠠᠨ ᠳᠡᠯᠡᠬᠡᠢ᠃ ᠰᠠᠭᠠᠯᠢᠶ᠋ᠢᠨ ᠦᠨᠦᠷ ᠬᠠᠩᠬᠤᠯᠵᠦ᠍ ᠴᠠᠢ ᠪᠤᠳᠠᠭᠠ ᠢᠳᠡᠭᠡᠱᠢᠭ᠌ᠰᠡᠨ ᠠᠮᠢᠳᠤᠷᠠᠯᠤᠨ ᠲᠠᠩᠰᠤᠭ ᠠᠮᠳᠠ᠃ ᠪᠤᠭᠤᠷᠤᠯ ᠰᠡᠪᠡᠯᠭᠡᠨᠠᠴᠠᠨᠢ ᠰᠠᠴᠤᠷᠠᠬᠤ ᠰᠦᠨ ᠴᠠᠭᠠᠨ ᠭᠡᠷᠡᠯ ᠲᠤᠶᠠᠭᠠᠨᠳᠤ ᠠᠷᠭᠠᠮᠵᠢᠭ᠍ᠳᠠᠭᠰᠠᠨ ᠬᠤᠩᠭᠤᠷ ᠦᠷᠡᠰᠨᠢ ᠲᠤᠭᠤᠨᠤᠲᠤ ᠡᠷᠳᠡᠨᠢᠶ᠋ᠢᠨ ᠨᠠᠷᠠᠲᠠᠢ ᠪᠢᠯᠡ᠃
ᠡᠵᠢᠶ᠋ᠢᠨ ᠬᠠᠢᠷᠠ ᠪᠤᠯ ᠱᠢᠯᠦᠭ ᠲᠠᠭᠤᠯᠠᠯ ᠪᠢᠰᠢ᠂ ᠱᠢᠯᠦᠭ ᠲᠠᠭᠤᠯᠠᠯ ᠤᠨᠳᠤᠷᠤᠭᠤᠯᠤᠨ ᠴᠢᠮᠡᠭᠡ ᠦᠭᠡᠢ ᠮᠢᠷᠠᠯᠵᠠᠬᠤ ᠭᠤᠷᠤᠬᠠᠶ᠋ᠢᠨ ᠤᠰᠤᠨ᠃ ᠡᠵᠢᠶ᠋ᠢᠨ ᠬᠠᠢᠷᠠ ᠪᠤᠯ ᠤᠷᠠᠨ ᠵᠤᠬᠢᠶᠠᠯᠤᠨ ᠮᠦᠩᠭᠡᠶ᠋ᠢᠨ ᠰᠡᠳᠦᠪ ᠲᠡᠳᠦᠢ ᠪᠢᠰᠢ᠂ ᠤᠷᠠᠨ ᠵᠤᠬᠢᠶᠠᠯᠴᠢᠳᠤᠨ ᠪᠢᠷᠢ ᠤᠮᠳᠠᠯᠠᠳᠠᠭ ᠱᠢᠭᠦᠳᠡᠷᠢᠶ᠋ᠢᠨ ᠤᠰᠤᠨ᠃ ᠡᠵᠢ ᠬᠡᠮᠡᠬᠦ᠌ ᠤᠰᠤᠨᠠᠴᠠ ᠠᠳᠢᠰᠯᠠᠨ᠂ ᠡᠵᠢ ᠬᠡᠮᠡᠬᠦ᠌ ᠤᠰᠤᠨᠳᠤ ᠰᠦᠵᠢᠷᠡᠨ ᠪᠢᠳᠡ ᠦᠷᠬᠦᠯᠵᠢᠯᠡᠨᠡ᠃