— ᠠᠵᠢᠶᠠᠶᠢᠨᠢᠶᠡᠨ ᠨᠠᠶᠠᠨ ᠲᠠᠪᠤᠨ ᠨᠠᠰᠤᠨᠤ ᠪᠠᠶᠠᠷᠲᠤ᠌
ᠡᠴᠢᠭᠡ ᠡᠬᠡ᠂ ᠦᠷᠡ ᠬᠡᠦᠬᠡᠳ ᠦᠨ ᠬᠠᠶ᠋ᠢᠷᠠ ᠭᠡᠳᠡᠭ ᠪᠡᠶᠡ ᠪᠡᠶᠡ ᠵᠦᠭᠢᠶᠡᠨ ᠲᠡᠮᠡᠦᠯᠦᠨ ᠵᠢᠳᠬᠦᠳᠡᠭ᠂ ᠪᠡᠶᠡ ᠪᠡᠶᠡ ᠳ᠋ᠡᠭᠡᠨ ᠠᠭᠤᠰᠤᠨ ᠰᠢᠩᠭᠡᠳᠡᠭ ᠥᠯᠥ᠍ ᠦᠵᠡᠭᠳᠡᠬᠦ᠌ ᠤᠷᠤᠰᠬᠠᠯ ᠶᠤᠮ᠃ ᠲᠡᠷᠡ ᠬᠦ᠌ ᠤᠷᠤᠰᠬᠠᠯ ᠤᠨ ᠵᠢᠮᠡ ᠪᠡᠷ ᠦᠷᠡ ᠬᠡᠦᠬᠡᠳ ᠨᠢ ᠠᠪᠤ ᠡᠵᠢᠳ᠋ᠡᠬᠡᠨ ᠬᠡᠵᠢᠶᠡᠳᠡ ᠪᠠᠭᠠ ᠪᠠᠯᠴᠢᠷ ᠢᠶᠠᠷᠢᠶᠠᠨ ᠪᠠᠶ᠋ᠢᠬᠤᠳᠤ᠂ ᠠᠪᠤ ᠡᠵᠢ ᠨᠢ ᠦᠷᠡᠶᠢᠨ ᠵᠢᠷᠦᠬᠡᠨ ᠳᠦ ᠶᠢᠷᠲᠢᠨᠴᠦ ᠶᠢᠨ ᠬᠠᠮᠤᠭ ᠤᠨ ᠠᠭᠤᠤ ᠣᠷᠣᠰᠢᠬᠤᠢ ᠪᠣᠯᠵᠤ ᠰᠦᠨᠳᠡᠷᠯᠡᠳᠡᠭ ᠳ᠋ᠡ᠃
ᠤᠬᠠᠭᠠ ᠣᠷᠣᠭᠠᠳ ᠠᠩᠬᠠ ᠬᠠᠷᠠᠬᠤᠳᠤ ᠠᠵᠢᠶᠠ ᠮᠢᠨᠢ ᠣᠯᠠᠨᠤ ᠳᠣᠲᠣᠷᠠᠠᠴᠠ ᠬᠠᠮᠤᠭᠤᠨ ᠥᠨᠳᠥᠷ᠂ ᠬᠠᠮᠤᠭᠤᠨ ᠰᠠᠶ᠋ᠢᠬᠠᠨ ᠡᠷᠡ ᠬᠥᠮᠥᠨᠢᠶᠠᠷ ᠲᠠᠨᠢᠭᠳᠠᠭᠰᠠᠨ ᠰᠠᠨ᠃ ᠠᠵᠢᠶᠠ ᠮᠢᠨᠢ ᠦᠨᠡᠬᠡᠷ ᠴᠦ᠍ ᠭᠡᠷᠡᠯᠲᠦ᠍ ᠥᠷᠭᠥᠭᠡᠨᠦᠪᠡᠨ ᠲᠣᠭᠣᠨᠣᠶᠢ ᠭᠡᠷᠭᠡᠢ ᠲᠠᠢᠪᠠᠨ ᠡᠷᠭᠦᠭᠰᠡᠨ ᠬᠣᠣᠰ ᠪᠠᠭᠠᠨᠠᠶᠢᠨ ᠭᠤᠶ᠋ᠢᠪᠢᠰᠢ ᠦᠭᠡᠢ ᠨᠢᠭᠡ ᠨᠢ᠂ ᠭᠠᠷᠤᠨ ᠲᠠᠪᠤᠨ ᠬᠤᠷᠤᠭᠤ ᠰᠢᠭ᠋ ᠲᠠᠪᠤᠨ ᠦᠷᠡᠶᠢᠨᠢᠶᠠᠨ ᠬᠠᠨ ᠠᠭᠤᠯᠠ ᠰᠢᠭ᠋ ᠬᠠᠶ᠋ᠢᠷᠠ ᠶᠢᠨ ᠪᠠᠲᠤ᠌ ᠲᠦᠰᠢᠭ ᠳ᠋ᠡ᠃ ᠪᠢ ᠠᠬᠠ ᠳᠡᠭᠦᠦ ᠳᠠᠪᠤᠭᠤᠯᠠᠶᠢᠨᠢᠶᠡᠨ ᠲᠣᠮᠣ ᠨᠢ᠃ ᠤᠤᠭᠠᠨ ᠦᠷᠡᠶᠢᠨ ᠵᠤᠯᠠᠢ ᠦᠨᠦᠷᠯᠡᠵᠦ᠍᠂ ᠴᠣᠯᠮᠣᠨ ᠣᠳᠣ ᠭᠠᠷᠴᠤ᠌ ᠪᠠᠶ᠋ᠢᠬᠤᠳᠤ ᠲᠥᠷᠥᠭᠰᠡᠨ ᠪᠣᠯᠬᠣᠷ ᠠᠮᠢᠳᠤᠷᠠᠯᠤᠨ ᠵᠠᠮᠳᠠᠭᠠᠨ ᠭᠢᠯᠠᠯᠵᠠᠵᠤ ᠶᠠᠪᠤᠬᠤᠶᠢ ᠪᠡᠯᠭᠡᠳᠡᠨ ᠠᠪᠤ ᠮᠢᠨᠢ ᠨᠠᠳᠠᠳᠤ 《ᠦᠷᠦᠨ ᠴᠣᠯᠮᠣᠨ》 ᠭᠡᠳᠡᠭ ᠨᠡᠷᠡ ᠥᠭᠴᠡᠢ᠃ ᠨᠠᠰᠤᠨᠳᠠᠭᠠᠨ ᠠᠷᠢᠬᠢᠶᠢ ᠲᠣᠭᠠ ᠲᠠᠢ ᠠᠮᠰᠠᠭᠰᠠᠨ ᠠᠵᠢᠶᠠ ᠮᠢᠨᠢ ᠦᠷᠡ ᠲᠠᠢ ᠪᠣᠯᠵᠤ ᠪᠠᠶᠠᠷᠯᠠᠭᠠᠳ ᠠᠶ᠋ᠢᠯ ᠤᠨ ᠵᠢᠨᠨ ᠬᠥᠮᠥᠨ ᠲᠠᠢ ᠵᠢᠭᠠᠬᠠᠨ ᠶᠠᠭᠤᠮᠠ ᠲᠠᠲᠠᠴᠢᠬᠠᠭᠠᠳ ᠠᠩᠬᠠ ᠰᠣᠭᠲᠣᠭᠰᠠᠨᠢᠶᠠᠨ ᠨᠠᠳᠠᠳᠤ ᠨᠢᠳᠤᠨᠤᠨ ᠰᠠᠶᠢ ᠶᠠᠷᠢᠭᠰᠠᠨ ᠶᠤᠮ᠃ ᠠᠶ᠋ᠢᠯ ᠭᠡᠷ᠂ ᠠᠮᠢᠳᠤᠷᠠᠯᠢᠶᠠᠨ ᠤᠬᠠᠭᠠᠨ ᠬᠠᠶ᠋ᠢᠷᠠᠪᠠᠷᠢᠶᠠᠨ ᠥᠭᠡᠳᠡ ᠨᠢ ᠲᠠᠲᠠᠵᠤ᠂ ᠦᠷᠡ ᠬᠡᠦᠬᠡᠳᠢᠶᠡᠨ ᠬᠥᠮᠥᠨ ᠤ ᠳᠤᠮᠳᠠ ᠥᠭᠡᠳᠡ ᠲᠠᠢ ᠶᠠᠪᠤᠭᠤᠯᠬᠤ ᠭᠡᠵᠦ᠍ ᠬᠠᠶ᠋ᠢᠷᠠᠶᠢᠨ ᠳᠡᠭᠡᠳᠦᠪᠠᠷᠢᠶᠠᠨ ᠢᠪᠡᠭᠡᠭᠰᠡᠨᠢ ᠨᠢ ᠬᠡᠦᠬᠡᠳ ᠨᠢ ᠪᠢᠳᠠ ᠡᠳᠦᠷ ᠤᠳᠠᠭᠠᠨᠳᠤ ᠮᠡᠳᠡᠷᠡᠨ ᠲᠠᠨᠢᠵᠤ᠂ ᠠᠪᠤ ᠡᠵᠢᠶᠢᠨᠢᠶᠡᠨ ᠠᠴᠢ ᠡᠨᠡᠷᠢᠯᠢ ᠠᠮᠢᠳᠤᠷᠠᠯᠤᠨᠢᠶᠠᠨ ᠬᠠᠯᠠᠭᠤᠨ ᠳᠤᠯᠠᠭᠠᠨ᠂ ᠠᠵᠢᠯ ᠦᠢᠯᠡᠰᠦᠨᠢᠶᠡᠨ ᠠᠯᠳᠠᠷ ᠭᠡᠷᠡᠯᠢᠶᠡᠷ ᠬᠠᠷᠢᠭᠤᠯᠬᠤ ᠰᠠᠨ ᠭᠡᠵᠦ᠍ ᠵᠢᠳᠬᠦᠭᠰᠡᠭᠡᠷ ᠶᠠᠪᠤᠭᠠ᠃
ᠬᠠᠷᠠᠴᠠᠨᠠᠴᠠ ᠨᠢᠭᠡ ᠬᠥᠮᠥᠨᠦ ᠳᠣᠲᠣᠭᠠᠳᠤ ᠶᠢᠷᠲᠢᠨᠴᠦ᠍ ᠮᠡᠳᠡᠷᠡᠭᠳᠡᠳᠡᠭ᠃ ᠠᠵᠢᠶᠠ ᠶᠢᠨ ᠢᠶᠡᠨ ᠤᠬᠠᠭᠠᠨ ᠰᠡᠶ᠋ᠢᠯᠦᠭᠰᠡᠨ ᠬᠠᠷᠠᠴᠠᠨᠠᠴᠠ ᠨᠢ ᠬᠠᠶ᠋ᠢᠷᠠᠶᠢᠨ ᠭᠦᠨ ᠢ ᠮᠡᠳᠡᠷᠡᠨ᠂ ᠤᠴᠢᠷᠯᠢᠭ ᠬᠡᠳᠦᠬᠡᠨ ᠦᠭᠡᠡᠴᠡ ᠨᠢ ᠰᠡᠳᠬᠢᠯᠦᠨ ᠬᠢᠨᠢ ᠳᠣᠲᠣᠭᠠᠳᠤ ᠲᠠᠮᠢᠷᠢ ᠤᠬᠠᠭᠠᠷᠠᠨ ᠵᠣᠷᠢᠭᠵᠢᠵᠤ᠂ ᠲᠣᠮᠣᠭᠠᠵᠢᠭᠰᠠᠨ ᠮᠢᠨᠢ ᠮᠢᠨᠤ ᠠᠵᠠ᠃ ᠮᠣᠩᠭᠣᠯ ᠡᠷᠡᠶᠢᠨ ᠮᠣᠷᠢᠲᠠᠢ ᠬᠡᠶ᠋ᠢᠮᠣᠷᠢᠪᠡᠷ ᠦᠷᠡᠰᠦᠨᠢᠶᠡᠨ ᠵᠢᠷᠦᠬᠡᠨ ᠳᠦ ᠬᠠᠨᠠᠶ᠋ᠢᠭᠰᠠᠨ ᠠᠵᠢᠶᠠ ᠮᠢᠨᠢ ᠨᠡᠭᠡᠷᠡᠨ 《ᠠᠷᠳᠠᠭ ᠡᠮᠨᠢᠭᠦᠨ ᠲᠣᠯᠣᠭᠠᠢ ᠶᠢᠨ ᠤᠷᠭᠠ ᠠᠯᠳᠠᠵᠤ ᠦᠵᠡᠭᠡ ᠦᠭᠡᠢ \ ᠠᠭᠰᠤᠮᠤᠨ ᠬᠥᠯᠥᠭᠦᠨ ᠲᠤᠶ᠋ᠢᠯᠠᠭᠠᠨᠳᠤ ᠳᠥᠷᠥᠭᠡ ᠠᠯᠳᠠᠵᠤ ᠡᠨᠳᠡᠭᠡ ᠦᠭᠡᠢ \ ᠠᠯᠤᠰ ᠣᠶ᠋ᠢᠷᠠᠶᠢᠨ ᠠᠶᠠᠨᠳᠤ ᠵᠠᠮ ᠠᠯᠳᠠᠵᠤ ᠭᠡᠨᠡᠳᠡᠭᠡ ᠦᠭᠡᠢ \ ᠠᠮᠢᠳᠤᠷᠠᠯ ᠦᠢᠯᠡᠰᠦᠨ ᠵᠠᠮᠳᠠᠭᠠᠨ ᠵᠦᠭ ᠠᠯᠳᠠᠵᠤ ᠲᠥᠭᠡᠷᠢᠭᠡ ᠦᠭᠡᠢ》ᠶᠠᠪᠤᠭᠰᠠᠨ᠃ ᠠᠵᠢᠶᠠ ᠮᠢᠨᠢ ᠠᠭᠲᠠ ᠬᠥᠯᠥᠭᠦᠨ ᠬᠡᠶ᠋ᠢᠮᠣᠷᠢᠯᠢ᠍ᠭ᠂ ᠣᠷᠣᠭᠠ᠂ ᠲᠣᠭᠰᠢᠨᠢ ᠤᠨᠤᠳᠠᠭ ᠪᠠᠶ᠋ᠢᠭᠰᠠᠨᠢ ᠨᠢ ᠪᠣᠳᠣᠬᠤᠪᠠᠷ ᠥᠪᠡᠷᠦᠨ ᠡᠷᠬᠡ ᠦᠭᠡᠢ ᠣᠮᠣᠭᠰᠢᠯ ᠲᠥᠷᠥᠳᠡᠭ᠃ ᠣᠷᠣᠭᠠ᠂ ᠳᠣᠭᠰᠢᠨ ᠪᠥᠭᠡᠳ ᠤᠨᠤᠭᠠᠳ ᠴᠤᠴᠠᠳᠠᠭ ᠦᠭᠡᠢ ᠰᠢᠨᠳᠠᠰᠤ ᠲᠠᠢ ᠬᠣᠶᠠᠷ ᠰᠠᠶ᠋ᠢᠬᠠᠨ ᠬᠠᠯᠲᠠᠷ ᠮᠣᠷᠢ ᠪᠣᠯ ᠢᠲᠡᠭᠡᠯᠲᠦ᠍ ᠤᠨᠤᠭᠠ ᠨᠢ ᠪᠠᠶ᠋ᠢᠭᠰᠠᠨ᠃ ᠳᠥᠷᠥᠭᠡᠨ ᠳᠠᠭᠤᠪᠠᠷ ᠠᠳᠤᠭᠤᠨ ᠳᠣᠲᠣᠷᠠᠠᠴᠠ ᠲᠣᠯᠣᠭᠠᠢ ᠨᠢ ᠭᠣᠵᠤᠯᠵᠠᠭᠠᠳ ᠢᠷᠡᠳᠡᠭ᠂ ᠭᠠᠭᠴᠠ ᠳᠣᠬᠢᠭᠠᠳ ᠤᠷᠭᠠᠯᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯ ᠡᠶ᠋ᠢᠯᠦᠭᠡᠳ᠂ ᠰᠠᠷᠠᠪᠠᠷ ᠠᠳᠤᠭᠤᠨᠳᠤ ᠣᠷᠣᠵᠤ ᠢᠷᠡᠳᠡᠭ ᠦᠭᠡᠢ᠂ ᠤᠷᠭᠠᠯᠠᠭᠠᠳ ᠠᠪᠬᠤ ᠲᠠᠪᠠᠭᠯᠠᠭᠠᠳ ᠵᠢᠳᠬᠦᠨᠡ ᠭᠡᠳᠡᠭ ᠨᠢ ᠪᠦᠷ ᠬᠡᠴᠡᠭᠦᠦ ᠪᠣᠯᠬᠣᠷ ᠤᠷᠭᠠᠴᠢᠳ ᠤᠷᠭᠠᠯᠠᠬᠤ ᠠᠴᠠ ᠪᠠᠨ ᠬᠠᠯᠢᠷᠠᠳᠠᠭ᠂ ᠭᠠᠳᠠᠭᠠ ᠴᠢᠳᠦᠷᠯᠡᠭᠡᠳ ᠲᠠᠯᠪᠢᠴᠢᠬᠠᠬᠤ ᠳᠤ ᠬᠥᠮᠥᠨᠡᠴᠡ ᠳᠠᠯᠳᠠ ᠣᠷᠣᠲᠠᠯᠠ ᠲᠠᠭᠰᠢᠳᠠᠭ ᠲᠡᠷᠡ ᠮᠣᠷᠢᠳ ᠨᠢ ᠡᠵᠡᠨᠦᠪᠡᠨ ᠬᠡᠶ᠋ᠢᠮᠣᠷᠢ ᠵᠣᠯᠪᠣᠭᠠᠶᠢᠨ ᠪᠡᠯᠭᠡᠳᠡᠯ ᠪᠠᠶ᠋ᠢᠭᠰᠠᠨ ᠪᠠᠶ᠋ᠢᠬᠠ ᠭᠡᠵᠦ᠍ ᠪᠢ ᠳᠣᠲᠣᠷᠠᠪᠠᠨ ᠪᠠᠬᠠᠷᠬᠠᠨ ᠰᠠᠨᠠᠳᠠᠭ᠃ ᠠᠵᠢᠶᠠ ᠮᠢᠨᠢ ᠠᠳᠤᠭᠤ ᠤᠷᠭᠠᠯᠠᠵᠤ᠂ ᠡᠮᠨᠢᠭᠢᠶᠡᠨ ᠰᠤᠷᠭᠠᠨ᠂ ᠨᠤᠲᠤᠭᠤᠨᠢᠶᠠᠨ ᠨᠠᠶ᠋ᠢᠷ ᠲᠤ᠌ ᠪᠠᠷᠢᠯᠳᠤᠵᠤ ᠶᠠᠪᠤᠭᠰᠠᠨ ᠵᠢᠩᠬᠢᠨᠢ ᠮᠣᠩᠭᠣᠯ ᠡᠷᠡ ᠬᠥᠮᠥᠨ᠃ ᠨᠢᠭᠡ ᠤᠳᠠᠭᠠ ᠲᠠᠤᠯᠠᠢᠶᠢᠨ ᠵᠣ ᠲᠠᠢ ᠴᠢᠨᠳᠠᠭᠠᠨ ᠴᠠᠭᠠᠨ ᠮᠣᠷᠢ ᠲᠠᠢ ᠠᠳᠤᠭᠤ ᠤᠷᠭᠠᠯᠠᠨ᠂ ᠮᠣᠷᠢᠪᠠᠨ ᠰᠠᠭᠤᠯᠭᠠᠭᠠᠳ ᠲᠠᠲᠠᠬᠤᠶᠢ ᠨᠢ ᠬᠠᠷᠠᠬᠤᠳᠤ ᠦᠯᠢᠭᠡᠷ ᠲᠣᠮᠣᠭᠲᠤ᠌ ᠭᠠᠷᠳᠠᠭ ᠪᠠᠭᠠᠲᠤᠷ ᠢᠳᠡᠲᠡᠨ ᠰᠢᠭ ᠭᠠᠶ᠋ᠢᠬᠠᠯᠲᠠᠢ ᠬᠠᠷᠠᠭᠳᠠᠭᠰᠠᠨ ᠰᠠᠨ᠃ ᠲᠡᠭᠡᠭᠡᠳ ᠯᠡ ᠪᠣᠳᠣᠯ ᠵᠡᠭᠦᠳᠦᠨᠳ᠋ᠡᠬᠡᠨ ᠠᠵᠢᠶᠠ ᠰᠢᠭ᠋ᠢᠶᠠᠨ ᠯᠠ ᠬᠥᠯᠥᠭ ᠦᠨ ᠰᠠᠶ᠋ᠢᠬᠠᠨᠢ ᠤᠨᠤᠵᠤ᠂ ᠭᠢᠯᠠᠯᠵᠠᠭᠤᠯᠤᠭᠰᠠᠨ ᠡᠷᠡ ᠬᠥᠮᠥᠨ ᠪᠣᠯᠬᠤ ᠰᠠᠨ ᠭᠡᠵᠦ ᠳᠣᠲᠣᠷᠠᠪᠠᠨ ᠪᠣᠳᠣᠵᠤ ᠮᠥᠷᠥᠭᠡᠳᠴᠦ᠍ ᠶᠠᠪᠤᠳᠠᠭ ᠪᠣᠯᠣᠭᠰᠠᠨ ᠶᠤᠮ᠃
ᠠᠵᠢᠶᠠᠶᠢᠨ ᠮᠢᠨᠢ ᠲᠣᠮᠣ ᠭᠠᠷ ᠶᠠᠭᠤᠮᠠ ᠪᠦᠬᠦᠨᠳᠦ ᠬᠦᠷᠬᠦ᠌ᠳᠦ ᠡᠪᠲᠡᠢ ᠳᠡᠮ ᠲᠠᠢ ᠨᠢ ᠭᠠᠶ᠋ᠢᠬᠠᠯᠲᠠᠢ᠃ ᠰᠤᠷ ᠡᠯᠳᠡᠵᠦ᠍ ᠵᠦᠰᠦᠨᠡ᠂ ᠬᠠᠵᠠᠭᠠᠷ ᠴᠢᠳᠦᠷ ᠢᠶᠡᠨ ᠵᠠᠩᠭᠢᠳᠤᠨᠠ᠂ ᠡᠮᠡᠭᠡᠯ ᠲᠥᠬᠥᠭᠡᠷᠥᠨᠡ᠂ ᠠᠪᠳᠠᠷᠠ ᠱᠦᠭᠦᠢ ᠪᠡᠨ ᠪᠣᠳᠣᠵᠤ ᠶᠠᠩᠵᠤᠯᠠᠨᠠ᠂ ᠪᠢᠳᠠᠨᠤ ᠴᠣᠭᠣᠷᠬᠠᠢ ᠭᠤᠲᠤᠯᠢ ᠲᠠᠬᠠᠯᠠᠨᠠ᠂ ᠦᠰᠦ ᠭᠡᠵᠢᠭᠡᠶᠢ ᠰᠠᠶ᠋ᠢᠬᠠᠨ ᠵᠠᠰᠠᠵᠤ ᠥᠭᠭᠦᠨᠡ᠃ ᠲᠡᠷᠡ ᠯᠡ ᠲᠣᠮᠣ ᠭᠠᠷᠤᠨ ᠬᠠᠶ᠋ᠢᠷᠠᠶᠢᠨ ᠵᠥᠭᠡᠯᠡᠨ ᠠᠯᠠᠭᠠᠨ ᠳᠡᠭᠡᠷᠡ ᠦᠷᠡᠰ ᠬᠥᠮᠥᠨ ᠪᠣᠯᠭᠠᠵᠤ᠂ ᠡᠷᠴᠢ ᠰᠢᠷᠪᠦᠰᠦ ᠵᠠᠩᠭᠢᠷᠠᠭᠰᠠᠨ ᠲᠡᠷᠡ ᠯᠡ ᠲᠣᠮᠣ ᠭᠠᠷᠤᠨ ᠢᠳᠡ ᠬᠦᠴᠦᠪᠡᠷ ᠠᠮᠢᠳᠤᠷᠠᠯᠢᠶᠡᠨ ᠡᠷᠭᠦᠭᠰᠡᠨ ᠠᠶ᠋ᠢᠯ ᠭᠡᠷᠦᠨᠢᠶᠡᠨ ᠨᠣᠶᠠᠨ ᠨᠢᠷᠤᠭᠤ ᠪᠣᠯᠵᠤ ᠶᠠᠪᠤᠭᠰᠠᠨ ᠪᠢᠯᠡ᠃
ᠠᠵᠢᠶᠠ ᠮᠢᠨᠢ ᠪᠠᠭᠠᠳᠠᠭᠠᠨ ᠨᠤᠲᠤᠭᠤᠨᠢᠶᠠᠨ ᠵᠠᠷᠠᠭᠠ ᠰᠦᠮᠡᠶᠢᠨ ᠶᠣᠨᠳᠣᠨ ᠭᠡᠭᠴᠢ ᠡᠷᠳᠡᠮᠲᠦ᠍ ᠬᠥᠮᠥᠨᠳᠦ ᠱᠠᠪᠢᠯᠠᠨ᠂ ᠮᠣᠩᠭᠣᠯ ᠲᠥᠪᠡᠳ ᠴᠠᠭᠠᠨ ᠲᠣᠯᠣᠭᠠᠢ ᠨᠢᠳᠦᠯᠡᠵᠦ᠍᠂ ᠮᠣᠩᠭᠣᠯ ᠠᠨᠠᠭᠠᠬᠤ ᠤᠬᠠᠭᠠᠨᠤ ᠠᠩᠬᠠᠨᠤ ᠮᠡᠳᠡᠯᠭᠡᠶᠢ ᠰᠤᠷᠤᠭᠰᠠᠨᠢᠶᠠᠷᠢᠶᠠᠨ ᠪᠣᠶ᠋ᠢᠳᠠ ᠨᠤᠲᠤᠭᠤᠨ ᠰᠣᠶᠣᠯ ᠲᠠᠢ ᠬᠥᠮᠥᠨ ᠪᠣᠯᠪᠠ᠃ ᠤᠳᠠᠯ ᠦᠭᠡᠢ ᠪᠠᠷᠢᠭᠠᠳᠠᠶᠢᠨᠢᠶᠡᠨ ᠵᠥᠪᠯᠡᠯᠳᠦ ᠰᠢᠯᠢᠭᠳᠡᠨ ᠣᠷᠣᠵᠤ᠂ ᠨᠢᠭᠲᠠᠯᠠᠨ ᠪᠣᠳᠣᠭᠴᠢ᠂ ᠪᠠᠷᠢᠭᠠᠳᠠᠶᠢᠨ ᠳᠡᠳ᠋ ᠳᠠᠷᠤᠭᠠ᠂ ᠳᠠᠷᠤᠭᠠ᠂ ᠱᠦᠵᠢᠪᠠᠷ ᠣᠯᠠᠨ ᠵᠢᠯ ᠠᠵᠢᠯᠯᠠᠵᠤ᠂ ᠨᠤᠲᠤᠭ ᠤᠰᠤᠨᠦ ᠪᠡᠨ ᠠᠷᠠᠳ ᠲᠦᠮᠡᠨᠢ ᠤᠳᠤᠷᠢᠳᠤᠨ᠂ ᠪᠠᠶᠠᠵᠢᠯ ᠴᠢᠨᠡᠭᠡᠯᠢᠭᠵᠢᠯᠦᠨ ᠵᠠᠮᠢᠶᠠᠷ ᠬᠥᠲᠥᠯᠥᠭᠰᠡᠨ ᠳᠠᠭᠠᠭᠤᠯᠤᠭᠴᠢ᠃ ᠡᠵᠢ ᠮᠢᠨᠢ ᠠᠩᠬᠠ ᠵᠡᠷᠭᠡᠶᠢᠨ ᠳᠤᠮᠳᠠᠳᠤ ᠰᠤᠷᠭᠠᠭᠤᠯᠢ ᠲᠡᠭᠦᠰᠦᠭᠰᠡᠨ ᠨᠤᠲᠤᠭᠤᠨᠢᠶᠠᠨ ᠬᠠᠮᠤᠭᠤᠨ ᠠᠩᠬᠠᠨᠤ ᠬᠥᠮᠥᠨ᠂ ᠠ ᠦᠰᠦᠭ ᠨᠢᠳᠦᠯᠡᠭᠦᠯᠦᠨ᠂ ᠬᠡᠦᠬᠡᠳᠢᠶᠡᠨ ᠡᠷᠳᠡᠮᠦᠨ ᠴᠠᠭᠠᠨ ᠵᠠᠮᠳᠤ ᠨᠢ ᠬᠥᠲᠥᠯᠥᠭᠰᠡᠨ ᠪᠠᠭᠰᠢ ᠬᠥᠮᠥᠨ᠃ ᠠᠪᠤ ᠡᠵᠢ ᠬᠣᠶᠠᠷᠤᠨ ᠮᠢᠨᠢ ᠢᠲᠡᠭᠡᠯ ᠰᠡᠳᠬᠢᠯᠢᠶᠡᠷᠢᠶᠡᠨ ᠭᠣᠯᠣᠮᠲᠠᠪᠠᠨ ᠪᠠᠳᠠᠷᠠᠭᠠᠭᠰᠠᠨ ᠥᠭᠡᠳᠡ ᠲᠠᠢ᠂ ᠥᠩᠭᠡ ᠲᠠᠢ᠂ ᠬᠡᠶ᠋ᠢᠮᠣᠷᠢ ᠲᠠᠢ᠂ ᠰᠣᠶᠣᠯ ᠲᠠᠢ ᠭᠡᠷ ᠪᠦᠯᠢᠶᠢᠨ ᠠᠮᠢᠳᠤᠷᠠᠯ ᠦᠷᠡ ᠬᠡᠦᠬᠡᠳ ᠪᠢᠳᠡᠨᠦᠪᠡᠨ ᠤᠬᠠᠭᠠᠵᠢᠯ᠂ ᠲᠣᠮᠣᠭᠠᠵᠢᠯᠤᠨ ᠲᠠᠭᠠᠲᠠᠢ ᠳᠤᠯᠠᠭᠠᠨ ᠥᠯᠥᠭᠡᠢ ᠪᠠᠶ᠋ᠢᠯᠠ᠃ 1981 ᠣᠨᠤ ᠨᠠᠮᠤᠷ ᠪᠢ ᠶᠡᠬᠡ ᠰᠤᠷᠭᠠᠭᠤᠯᠢᠳᠤ᠂ ᠮᠢᠨᠤ ᠳᠡᠭᠦᠦ ᠭᠡᠷᠡᠯᠲᠦ᠍ ᠪᠠᠭᠰᠢᠶᠢᠨ ᠲᠤᠰᠬᠠᠢ ᠮᠡᠷᠭᠡᠵᠢᠯ ᠦᠨ ᠰᠤᠷᠭᠠᠭᠤᠯᠢ ᠳ᠋ᠦ ᠰᠢᠯᠭᠠᠭᠳᠠᠨ ᠣᠷᠣᠭᠠᠳ᠂ ᠰᠥᠨᠢᠳ ᠦᠨ ᠤᠤᠭᠠᠯ ᠮᠠᠯᠴᠢᠨᠤ ᠠᠶ᠋ᠢᠯᠠᠴᠠ ᠨᠢᠭᠡ ᠵᠢᠯ ᠳᠦ ᠬᠣᠶᠠᠷ ᠬᠡᠦᠬᠡᠳ ᠨᠢ ᠰᠤᠷᠭᠠᠭᠤᠯᠢᠳᠦ ᠶᠠᠪᠤᠭᠰᠠᠨ ᠪᠠᠶᠠᠷᠲᠤ᠌ ᠤᠴᠠᠷᠠᠯ ᠬᠣᠯᠠ ᠣᠶ᠋ᠢᠷᠠᠶᠢᠨ ᠬᠢᠨᠢ ᠪᠠᠬᠠᠷᠬᠠᠭᠤᠯᠤᠨ ᠱᠤᠤᠭᠢᠭᠤᠯᠤᠭᠰᠠᠨ ᠳ᠋ᠠ᠃
ᠠᠵᠢᠶᠠ ᠮᠢᠨᠢ ᠬᠣᠰᠢᠭᠤ᠂ ᠠᠶ᠋ᠢᠮᠠᠭ᠂ ᠣᠷᠣᠨ᠂ ᠤᠯᠤᠰᠤᠨ ᠬᠥᠳᠡᠯᠮᠦᠷᠢᠶᠢᠨ ᠵᠢᠱ᠌ᠢᠶᠡᠴᠢ᠂ ᠰᠢᠯᠢᠳᠡᠭ ᠤᠳᠤᠷᠢᠳᠤᠯᠭᠠᠶᠢᠨ ᠬᠥᠬᠢᠭᠦᠯᠦᠯ ᠱᠠᠩᠨᠠᠯᠢ ᠣᠯᠠᠨᠲᠠ ᠬᠦᠷᠲᠡᠨ᠂ ᠠᠯᠤᠰ ᠣᠶ᠋ᠢᠷᠠ ᠤᠯᠤᠰ ᠣᠷᠣᠨᠳᠤ ᠰᠠᠶ᠋ᠢᠬᠠᠨ ᠠᠯᠳᠠᠷᠢᠶᠠᠨ ᠮᠠᠨᠳᠤᠭᠤᠯᠤᠭᠰᠠᠨ ᠨᠡᠷᠡᠲᠦ᠍ ᠬᠥᠮᠥᠨ᠂ ᠠᠮᠢ ᠨᠠᠰᠤᠨᠤᠪᠠᠨ ᠤᠳᠬᠠ ᠴᠢᠨᠠᠷᠢᠶᠠᠷ ᠨᠡᠶ᠋ᠢᠭᠡᠮᠳᠦ ᠲᠠᠨᠢᠭᠳᠠᠭᠰᠠᠨ ᠵᠢᠩᠬᠢᠨᠢ 《ᠥᠨᠳᠥᠷ ᠬᠥᠮᠥᠨ》 ᠰᠠᠨ᠃
ᠪᠢᠳᠠᠨᠢ ᠪᠠᠭᠠ ᠪᠠᠶ᠋ᠢᠬᠤᠳᠤ ᠠᠵᠢᠶᠠ ᠮᠢᠨᠢ ᠲᠤᠵᠢ ᠯᠡ ᠭᠠᠳᠠᠭᠰᠢ ᠳᠣᠲᠣᠭᠰᠢᠪᠠᠨ ᠶᠠᠪᠤᠨᠠ᠂ ᠬᠠᠶᠠ ᠭᠡᠷᠲᠦ᠍ ᠰᠠᠭᠤᠬᠤᠪᠠᠷ ᠯᠠ ᠣᠶ᠋ᠢᠷᠠ ᠵᠠᠭᠤᠷᠠ ᠶᠢᠨ ᠠᠵᠢᠯ ᠢᠶᠠᠨ ᠭᠢᠯᠠᠯᠵᠠᠭᠤᠯᠤᠨᠠ᠃ ᠪᠠᠷᠢᠭᠠᠳᠠᠶᠢᠨᠢᠶᠡᠨ ᠠᠶ᠋ᠢᠯ ᠤᠳ ᠢᠶᠠᠷ ᠲᠣᠭᠣᠷᠢᠵᠤ᠂ ᠮᠠᠯᠤᠨ ᠲᠣᠭᠠᠯᠠᠯᠭᠠ ᠬᠢᠨᠡ᠂ ᠬᠥᠳᠡᠯᠮᠦᠷᠢᠶᠢᠨ ᠬᠤᠪᠢ ᠪᠣᠳᠣᠨᠠ᠂ ᠮᠠᠯᠵᠢᠬᠤ ᠦᠢᠯᠡᠳᠪᠦᠷᠢᠯᠡᠯ ᠪᠠᠶ᠋ᠢᠳᠠᠯᠢ ᠣᠶ᠋ᠢᠯᠠᠭᠠᠨᠠ᠂ ᠬᠠᠮᠲᠤ᠌ ᠣᠯᠠᠨ ᠲᠠᠢᠪᠠᠨ ᠦᠢᠯᠡᠳᠪᠦᠷᠢᠯᠡᠯᠦᠨ ᠪᠦᠲᠦᠭᠡᠨ ᠪᠠᠶ᠋ᠢᠭᠤᠯᠤᠯᠲᠠ ᠬᠢᠨᠡ᠂ ᠬᠣᠰᠢᠭᠤ ᠨᠢᠭᠡᠳᠦᠯᠳᠦ ᠪᠠᠶ᠋ᠢᠩᠭᠤ ᠶᠠᠪᠤᠨᠠ᠃ ᠠᠶ᠋ᠢᠮᠠᠭ᠂ ᠣᠷᠣᠨ᠂ ᠭᠠᠳᠠᠨᠠ ᠮᠤᠵᠢ ᠬᠣᠲᠠᠳᠤ ᠶᠠᠪᠤᠬᠤ ᠠᠵᠢᠯ ᠭᠠᠷᠪᠠᠯ ᠠᠵᠢᠶᠠ ᠯᠠ ᠪᠠᠷᠤᠭ ᠶᠠᠪᠤᠨᠠ᠃1963 ᠣᠨᠠᠴᠠ1966 ᠣᠨᠤ ᠬᠣᠭᠣᠷᠣᠨᠳᠤ ᠰᠥᠨᠢᠳᠲᠤ᠌ ᠪᠣᠯᠣᠭᠰᠠᠨ ᠭᠠᠩ ᠭᠠᠮᠰᠢᠭ᠂ 1977 ᠣᠨᠤ 《ᠲᠡᠮᠦᠷ ᠵᠤᠳ》 ᠭᠡᠳ ᠠᠯᠢ ᠢᠵᠠᠭᠤᠷ ᠣᠯᠠᠨ ᠭᠠᠮᠰᠢᠭ ᠵᠤᠳᠢ ᠨᠤᠲᠤᠭᠤᠨ ᠲᠦᠮᠡᠨᠢᠶᠡᠨ ᠤᠳᠤᠷᠢᠳᠤᠨ ᠲᠤᠭᠤᠯᠤᠭᠰᠠᠨ ᠶᠤᠮ᠃ ᠪᠠᠷᠢᠭᠠᠳᠠᠶᠢᠨ ᠠᠯᠪᠠᠨ ᠭᠡᠷ᠂ ᠰᠤᠷᠭᠠᠭᠤᠯᠢᠶᠢᠨ ᠮᠣᠳᠣᠶᠢ ᠲᠡᠭᠡᠭᠡᠵᠦ᠍ ᠠᠪᠴᠢᠷᠠᠬᠤᠪᠠᠷ ᠰᠢᠯᠤᠭᠤᠨ ᠬᠥᠬᠡ ᠬᠣᠰᠢᠭᠤᠪᠠᠷ ᠶᠠᠪᠤᠬᠤᠳᠠᠭᠠᠨ ᠬᠡᠳᠦᠨ ᠠᠷᠪᠠᠨ ᠭᠠᠵᠠᠷᠤᠨ ᠵᠠᠮᠢ ᠶᠠᠪᠠᠭᠠᠨ ᠲᠤᠭᠤᠯᠵᠤ ᠪᠠᠶ᠋ᠢᠭᠰᠠᠨ ᠭᠡᠳᠡᠭ᠃ 1983ᠣᠨᠤ ᠬᠠᠪᠤᠷ᠂ ᠨᠠᠮᠠᠶ᠋ᠢ ᠣᠶᠤᠲᠠᠨ ᠪᠠᠶ᠋ᠢᠬᠤᠳᠤ ᠶᠡᠬᠡ ᠰᠠᠯᠬᠢᠨ ᠲᠠᠢ ᠡᠳᠦᠷ ᠬᠥᠬᠡᠬᠣᠲᠠ ᠠᠴᠠ ᠪᠠᠷᠢᠭᠠᠳᠠᠶᠢᠨ ᠨᠡᠶ᠋ᠢᠲᠡᠶᠢᠨ ᠬᠦᠷᠢᠶᠡᠨᠦ ᠲᠣᠣᠷᠢ ᠲᠡᠭᠡᠭᠡᠵᠦ᠍ ᠶᠠᠪᠤᠭᠠᠳ᠂ ᠲᠡᠷᠭᠡ ᠨᠢ ᠬᠥᠷᠪᠡᠵᠦ᠍ ᠪᠠᠶ᠋ᠢᠭᠰᠠᠨ ᠤᠳᠠᠭᠠ ᠲᠠᠢ᠃ ᠢᠩᠭᠢᠵᠦ᠍ ᠬᠠᠮᠲᠤ᠌ ᠨᠡᠶ᠋ᠢᠲᠡᠶᠢᠨ ᠲᠥᠯᠥᠭᠡ ᠦᠨᠡᠨᠴᠢ ᠰᠢᠳᠤᠷᠭᠤᠪᠠᠷ ᠵᠢᠳᠬᠦᠵᠦ᠍ ᠶᠠᠪᠤᠭᠰᠠᠨ ᠨᠢ ᠬᠡᠦᠬᠡᠳ ᠪᠢᠳᠠᠨᠤ ᠣᠮᠣᠭᠰᠢᠯ᠂ ᠨᠤᠲᠤᠭ ᠤᠰᠤᠨᠤ ᠪᠠᠬᠠᠷᠬᠠᠯ ᠶᠤᠮ᠃ ᠠᠵᠢᠶᠠᠶᠢᠨ ᠮᠢᠨᠢ ᠳᠠᠭᠠᠭᠤᠯᠭᠠᠪᠠᠷ ᠪᠠᠶᠠᠨᠲᠠᠯᠠ ᠪᠠᠷᠢᠭᠠᠳᠠᠶᠢᠨ ᠠᠶ᠋ᠢᠯ ᠪᠦᠭᠦᠳᠡ ᠢᠰᠡᠭᠡᠢ ᠭᠡᠷᠲᠡᠬᠡᠨ ᠶᠠᠪᠠᠭᠠᠨ ᠮᠣᠳᠣᠨ ᠣᠷᠣ ᠲᠠᠢ᠂ ᠠᠶ᠋ᠢᠯ ᠪᠣᠯᠭᠠᠨ ᠲᠸᠯᠸᠢᠰ ᠲᠠᠢ᠂ ᠭᠠᠳᠠᠨᠠᠪᠠᠨ ᠰᠠᠯᠬᠢᠨᠤ ᠬᠦᠴᠦᠪᠡᠷ ᠴᠠᠬᠢᠯᠭᠠᠨ ᠭᠠᠷᠭᠠᠬᠤ ᠮᠠᠰᠢᠨ ᠲᠠᠢ᠂ ᠡᠷᠦᠬᠡ ᠪᠣᠯᠭᠠᠨ ᠹᠯᠤᠷᠢ ᠴᠡᠪᠡᠷᠰᠢᠭᠦᠯᠦᠭᠰᠡᠨ ᠤᠰᠤᠨᠤ ᠮᠠᠰᠢᠨ ᠲᠠᠢ ᠪᠣᠯᠵᠤ᠂ ᠥᠪᠥᠷ ᠮᠣᠩᠭᠣᠯᠤᠨ ᠮᠠᠯᠵᠢᠬᠤ ᠣᠷᠣᠨᠤ ᠲᠡᠷᠢᠭᠦᠨᠦ ᠦᠯᠢᠭᠡᠷ ᠳᠠᠭᠤᠷᠢᠶᠠᠯ᠂ ᠨᠡᠷᠡᠲᠦ᠍ ᠨᠤᠲᠤᠭ ᠪᠣᠯᠵᠤ ᠠᠯᠳᠠᠷᠰᠢᠭᠰᠠᠨ ᠳ᠋ᠠ᠃
ᠬᠠᠲᠠᠭᠤ ᠴᠠᠭ ᠤᠨ ᠰᠠᠭᠠᠳ᠂ ᠬᠣᠣᠷᠯᠠᠯᠢ ᠤᠬᠠᠭᠠᠨ ᠰᠠᠮᠪᠠᠭᠠ᠂ ᠬᠥᠮᠥᠨ ᠴᠢᠨᠠᠷ᠂ ᠢᠲᠡᠭᠡᠯ ᠵᠣᠷᠢᠭᠢᠶᠠᠷᠢᠶᠠᠨ ᠲᠤᠭᠤᠯᠤᠭᠰᠠᠨ ᠠᠵᠢᠶᠠ ᠮᠢᠨᠢ ᠰᠢᠨᠲᠠᠷᠠᠰᠢ ᠦᠭᠡᠢ ᠰᠡᠳᠬᠢᠯᠦᠨ ᠲᠠᠮᠢᠷᠢᠶᠠᠷᠢᠶᠠᠨ ᠨᠤᠲᠤᠭᠤᠨᠢᠶᠠᠨ ᠵᠠᠯᠠᠭᠤᠰ ᠤᠨ ᠦᠢᠯᠡᠰ ᠦᠨ ᠢᠲᠡᠭᠡᠯᠢ ᠬᠥᠪᠴᠢᠯᠡᠳᠡᠭ᠃ 1985 ᠣᠨᠳᠤ ᠬᠣᠰᠢᠭᠤᠨ ᠤ ᠨᠠᠮ᠂ ᠵᠠᠰᠠᠭᠤᠨ ᠳᠠᠭᠠᠭᠠᠯᠭᠠᠪᠤᠷᠢ ᠨᠠᠶ᠋ᠢᠳᠠᠯᠭᠠᠪᠠᠷ 《ᠮᠠᠯᠴᠢᠳᠤᠨ ᠬᠦᠢᠲᠡᠨ ᠬᠥᠮᠥᠷᠭᠡ》 ᠪᠠᠶ᠋ᠢᠭᠤᠯᠵᠤ᠂ ᠶᠡᠷᠡᠭᠡᠳ ᠣᠨᠳᠤ ᠰᠢᠶᠠᠮᠸᠨ ᠬᠣᠲᠠᠶᠢᠨ ᠭᠦ᠋ ᠯᠠᠩ ᠢᠦᠢ ᠠᠷᠠᠯ ᠳᠡᠭᠡᠷᠡ ᠢᠰᠡᠭᠡᠢ ᠭᠡᠷ ᠲᠠᠢ ᠮᠣᠩᠭᠣᠯ ᠵᠢᠭᠤᠯᠴᠢᠯᠠᠯᠤᠨ ᠭᠠᠵᠠᠷ ᠭᠠᠷᠭᠠᠭᠰᠠᠨ ᠵᠡᠷᠭᠡ ᠦᠢᠯᠡ ᠠᠵᠢᠯᠯᠠᠭᠠ ᠨᠢ ᠰᠢᠨᠡᠶᠢ ᠰᠦᠪᠡᠭᠴᠢᠯᠡᠵᠦ᠍᠂ ᠴᠠᠭ ᠡᠷᠢᠨᠦ ᠬᠠᠨᠳᠤᠯᠭᠠᠶᠢ ᠨᠠᠷᠢᠨ ᠰᠤᠪᠢᠳᠠᠭ ᠠᠵᠢᠶᠠᠶᠢᠨ ᠮᠢᠨᠢ ᠨᠤᠲᠤᠭ ᠤᠰᠤᠨᠤ ᠠᠷᠠᠳ ᠲᠦᠮᠡᠨᠦ ᠠᠮᠢᠳᠤᠷᠠᠯᠤᠨ ᠳᠡᠭᠵᠢᠷᠡᠯᠦᠨ ᠲᠥᠯᠥᠭᠡ ᠭᠡᠬᠦ᠌ ᠦᠨᠡᠨᠴᠢ᠂ ᠰᠡᠷᠭᠡᠭ ᠰᠦᠪᠡᠭᠴᠢᠯᠡᠯ ᠬᠠᠶ᠋ᠢᠯᠲᠠᠶᠢᠨ ᠵᠣᠷᠢᠭ ᠰᠠᠨᠠᠭᠠᠶᠢ ᠬᠠᠷᠠᠭᠤᠯᠵᠤ᠂ ᠲᠦᠮᠡᠨᠦ ᠳᠤᠮᠳᠠ ᠦᠯᠢᠭᠡᠷ ᠪᠣᠯᠣᠨ ᠶᠠᠷᠢᠭᠳᠠᠭᠰᠠᠭᠠᠷ ᠪᠤᠢ᠃
ᠥᠲᠡᠯᠦᠭᠡ ᠨᠠᠰᠤᠨ ᠤ ᠳᠠᠪᠠᠭᠠᠨ ᠳᠡᠭᠡᠷᠡ ᠠᠵᠢᠶᠠ ᠮᠢᠨᠢ ᠬᠥᠯᠢᠶᠡᠨ ᠬᠤᠮᠢᠨ᠂ ᠬᠡᠪᠢᠶᠡᠨ ᠰᠠᠬᠢᠵᠤ ᠳᠤᠭᠤᠢ ᠰᠠᠭᠤᠯ ᠦᠭᠡᠢ᠂ ᠤᠳᠠᠭᠠᠨ ᠵᠢᠯᠦᠨ ᠠᠵᠢᠯ ᠦᠢᠯᠡᠰᠦᠨ ᠲᠤᠷᠰᠢᠯᠭᠠ᠂ ᠰᠦᠪᠡᠭᠴᠢᠯᠡᠯ᠂ ᠪᠣᠳᠣᠯᠬᠢᠯᠠᠯᠢᠶᠠᠨ ᠣᠯᠠᠨᠤ ᠬᠦᠷᠲᠡᠭᠡᠯ ᠪᠣᠯᠭᠠᠬᠤᠶᠢᠨ ᠲᠤᠰᠠᠳᠠ ᠨᠣᠮ ᠪᠦᠲᠦᠭᠡᠬᠦ᠌ ᠠᠶᠠᠨᠢᠶᠠᠨ ᠡᠬᠢᠯᠡᠭᠦᠯᠪᠡ᠃ 2008ᠣᠨᠳᠤ ᠪᠡᠭᠡᠵᠢᠩᠳᠦ ᠮᠠᠯᠵᠢᠬᠤ ᠣᠷᠣᠨ ᠤ ᠲᠣᠭᠲᠠᠪᠤᠷᠢᠲᠠᠢ ᠬᠥᠭᠵᠢᠯ ᠦᠨ ᠰᠤᠳᠤᠯᠤᠨ ᠶᠠᠷᠢᠯᠴᠠᠬᠤ ᠬᠤᠷᠠᠯ ᠳᠤ ᠤᠷᠢᠭᠳᠠᠨ ᠣᠷᠣᠯᠴᠠᠵᠤ᠂ ᠥᠪᠡᠷᠦᠨ ᠦᠨᠳᠦᠰᠦᠨ ᠱᠠᠲᠤᠨ ᠤ ᠠᠵᠢᠯᠤᠨ ᠲᠤᠷᠰᠢᠯᠭᠠ᠂ ᠮᠠᠯᠵᠢᠬᠤ ᠣᠷᠣᠨᠤ ᠬᠤᠪᠢᠷᠠᠯᠲᠠᠶᠢᠨ ᠦᠨᠡᠨ ᠪᠣᠳᠠᠲᠤ᠌ ᠪᠠᠶ᠋ᠢᠳᠠᠯᠢ ᠶᠠᠷᠢᠬᠤᠳᠤ ᠨᠢ ᠵᠠᠷᠢᠮ ᠡᠷᠳᠡᠮᠲᠡᠨ ᠡᠳᠡᠭᠡᠷ ᠵᠦᠢᠯᠢᠶᠡᠨ ᠨᠣᠮ ᠪᠣᠯᠭᠠᠬᠤᠶᠢ ᠨᠢ ᠨᠠᠶ᠋ᠢᠳᠠᠨ ᠬᠦᠰᠡᠵᠡᠢ᠃ ᠡᠶ᠋ᠢᠨ ᠬᠦ᠌ 《ᠪᠠᠶᠠᠨᠲᠠᠯᠠᠶᠢᠨ ᠲᠠᠯᠠ ᠨᠤᠲᠤᠭᠤᠨ ᠲᠡᠦᠬᠡᠨ ᠬᠤᠪᠢᠷᠠᠯᠲᠠᠶᠢᠨ ᠲᠡᠮᠳᠡᠭᠯᠡᠯ》 ᠨᠣᠮᠢᠶᠠᠨ ᠪᠢᠴᠢᠬᠦ᠌ᠪᠡᠷ ᠪᠣᠯᠣᠭᠰᠠᠨ ᠶᠤᠮ᠃ ᠲᠡᠭᠡᠭᠡᠳ ᠪᠠᠶᠠᠨᠲᠠᠯᠠᠶᠢᠨ ᠠᠳᠠᠯᠢ ᠪᠤᠰᠤ ᠴᠠᠭᠤᠨ ᠳᠠᠩᠰᠠ ᠲᠡᠮᠳᠡᠭᠯᠡᠯ᠂ ᠪᠣᠳᠣᠯ ᠰᠦᠪᠡᠭᠴᠢᠯᠡᠯᠦᠨ ᠬᠡᠰᠡᠭ ᠪᠤᠰᠠᠭ ᠲᠡᠮᠳᠡᠭᠯᠡᠯ ᠵᠡᠷᠭᠡᠪᠡᠨ ᠨᠠᠳᠠᠳᠦ ᠥᠭᠭᠦᠭᠰᠡᠨ ᠨᠢ ᠡᠨᠡ ᠬᠦ᠌ ᠨᠣᠮᠤᠨ ᠦᠨᠳᠦᠰᠦᠨ ᠮᠠᠲ᠋ᠧᠷᠢᠶᠠᠯ ᠪᠠᠶ᠋ᠢᠪᠠ᠃ ᠲᠡᠷᠡ ᠪᠦᠬᠦᠨᠢ ᠨᠢ ᠪᠢ ᠡᠮᠬᠢᠯᠡᠨ ᠨᠠᠶ᠋ᠢᠷᠠᠭᠤᠯᠵᠤ᠂ ᠠᠵᠢᠶᠠ ᠲᠠᠢᠪᠠᠨ ᠵᠥᠪᠯᠡᠨ᠂ ᠵᠠᠷᠢᠮ ᠴᠢᠬᠤᠯᠠ ᠮᠠᠲ᠋ᠧᠷᠢᠶᠠᠯᠢ ᠣᠷᠴᠢᠭᠤᠯᠤᠨ ᠳᠠᠭᠠᠯᠳᠤᠭᠤᠯᠤᠯ ᠨᠡᠮᠡᠵᠦ᠍᠂ ᠪᠦᠷᠢᠨ ᠪᠦᠲᠦᠨ ᠡᠬᠡ ᠪᠣᠯᠭᠠᠭᠠᠳ᠂ ᠰᠤᠷᠭᠠᠨ ᠬᠥᠮᠥᠵᠢᠯᠦᠨ ᠬᠡᠪᠯᠡᠯᠦᠨ ᠬᠣᠷᠢᠶᠠᠶᠢᠨ ᠨᠠᠶ᠋ᠢᠷᠠᠭᠤᠯᠤᠭᠴᠢ ᠪᠠᠲᠤᠵᠢᠶᠠᠭᠠ ᠲᠠᠢ ᠬᠠᠷᠢᠯᠴᠠᠵᠤ ᠬᠡᠪᠯᠡᠭᠦᠯᠦᠭᠰᠡᠨ ᠶᠤᠮ᠃ ᠨᠡᠷᠡᠲᠦ᠍ ᠲᠡᠦᠬᠡᠶᠢᠨ ᠡᠷᠳᠡᠮᠲᠡᠨ ᠬᠣᠤ ᠸᠸᠢ ᠮᠢᠨ ᠫᠷᠣᠹᠧᠰᠰᠣᠷ ᠠᠭᠰᠠᠨ ᠵᠢᠡᠷ ᠣᠷᠣᠰᠢᠯ ᠪᠢᠴᠢᠵᠦ᠍᠂ ᠲᠤᠰ ᠨᠣᠮᠤᠨ ᠲᠡᠦᠬᠡᠨ ᠦᠨᠡᠨᠦ ᠦᠨᠡ ᠥᠷᠲᠡᠭᠢ ᠥᠨᠳᠥᠷ ᠦᠨᠡᠯᠡᠬᠦ᠌ᠶᠢᠨ ᠳᠠᠭᠠᠤ 《ᠵᠣᠬᠢᠶᠠᠭᠴᠢ ᠪᠣᠯ ᠡᠷᠬᠢᠮ ᠳᠡᠭᠡᠲᠦ ᠦᠵᠡᠯ ᠰᠠᠨᠠᠭᠠᠲᠠᠶ᠂ ᠡᠷᠡᠰ ᠪᠠᠲᠤ᠌ ᠵᠣᠷᠢᠭ ᠢᠲᠡᠭᠡᠯ ᠲᠠᠢ᠂ ᠨᠤᠭᠤᠷᠠᠰᠢ ᠦᠭᠡᠢ ᠲᠡᠮᠡᠴᠡᠭᠴᠢ ᠡᠪ ᠬᠠᠮᠲᠤ᠌ ᠨᠠᠮᠤᠨ ᠭᠡᠰᠢᠭᠦᠨ᠂ ᠪᠠᠶᠠᠨᠲᠠᠯᠠᠶᠢᠨ ᠲᠡᠦᠬᠡᠨ ᠬᠤᠪᠢᠷᠠᠯᠤᠨ ᠠᠶᠠᠨ ᠵᠠᠮᠳᠤ ᠥᠪᠡᠷᠦᠨ ᠬᠢᠨᠢ ᠮᠥᠷ ᠭᠢᠯᠠᠯᠵᠠᠨᠠ᠃ ᠲᠡᠭᠦᠨᠦ ᠠᠯᠳᠠᠷ ᠭᠡᠷᠡᠯ ᠰᠠᠴᠤᠷᠠᠭᠰᠠᠨ ᠨᠢᠭᠡ ᠨᠠᠰᠤ ᠪᠣᠯ ᠬᠠᠲᠠᠭᠤᠵᠢᠨ ᠲᠡᠮᠡᠴᠡᠭᠰᠡᠨ ᠣᠯᠠᠨ ᠰᠠᠶ᠋ᠢᠬᠠᠨ ᠦᠢᠯᠡ ᠠᠵᠢᠯᠯᠠᠭᠠ᠂ ᠴᠠᠭ ᠦᠶᠡᠶᠢᠨ ᠵᠣᠯᠪᠣᠭᠠ ᠰᠠᠴᠤᠷᠠᠭᠰᠠᠨ ᠦᠩᠭᠡ ᠭᠡᠷᠡᠯᠢᠶᠡᠷ ᠴᠢᠮᠡᠭᠳᠡᠭᠰᠡᠨ ᠮᠠᠯᠵᠢᠬᠤ ᠣᠷᠣᠨᠤ ᠰᠠᠶ᠋ᠢᠨ ᠰᠠᠶ᠋ᠢᠬᠠᠨᠤ ᠲᠥᠯᠥᠭᠡ ᠬᠡᠮᠡᠬᠦ᠌ ᠬᠦᠰᠡᠯ ᠪᠢᠯᠬᠠᠭᠰᠠᠨ ᠲᠡᠮᠡᠦᠯᠦᠯ ᠶᠤᠮ》 ᠬᠡᠮᠡᠨ ᠪᠢᠴᠢᠭᠰᠡᠨ ᠪᠢᠯᠡ᠃ ᠨᠣᠮ ᠬᠡᠪᠯᠡᠭᠳᠡᠭᠰᠡᠨᠦ ᠳᠠᠷᠠᠭᠠ ᠪᠢ ᠳᠤᠷᠠᠳᠤᠨ ᠰᠠᠨᠠᠭᠠᠴᠢᠯᠠᠵᠤ᠂ ᠬᠣᠯᠪᠣᠭᠳᠠᠬᠤ ᠪᠠᠶ᠋ᠢᠭᠤᠯᠭᠠ ᠲᠠᠢ ᠬᠠᠷᠢᠴᠠᠨ᠂ 2011 ᠣᠨᠤ11 ᠰᠠᠷᠠᠶᠢᠨ25 ᠤ᠋ ᠡᠳᠦᠷ ᠥᠪᠥᠷ ᠮᠣᠩᠭᠣᠯᠤᠨ ᠪᠠᠭᠰᠢᠶᠢᠨ ᠶᠡᠬᠡ ᠰᠤᠷᠭᠠᠭᠤᠯᠢᠳᠤ ᠡᠷᠳᠡᠮᠲᠡᠳᠢ ᠤᠷᠢᠨ᠂ ᠮᠠᠯᠴᠢᠨ ᠠᠪᠤᠶᠢᠨᠢᠶᠡᠨ ᠨᠣᠮᠤᠨ ᠨᠡᠭᠡᠭᠡᠯᠲᠡ ᠪᠠ ᠡᠷᠳᠡᠮ ᠰᠢᠨᠵᠢᠯᠡᠭᠡᠨᠤ ᠬᠤᠷᠠᠯ ᠡᠷᠬᠢᠯᠡᠨ ᠬᠢᠵᠡᠢ᠃ ᠠᠵᠢᠶᠠᠶᠢᠨ ᠮᠢᠨᠢ ᠨᠣᠮ ᠡᠷᠳᠡᠮᠲᠡᠳᠦᠨ ᠦᠨᠡᠯᠡᠭᠡᠶᠢ ᠣᠯᠵᠤ᠂ ᠤᠩᠰᠢᠭᠴᠢᠳ ᠤᠨ ᠠᠩᠬᠠᠷᠤᠯᠳᠤ ᠣᠷᠣᠭᠰᠠᠨ ᠪᠥᠭᠡᠳ ᠥᠪᠡᠷ ᠤᠨ ᠬᠢᠨᠢ ᠠᠮᠢᠳᠤᠷᠠᠯ ᠦᠢᠯᠡᠰᠦᠨ ᠵᠠᠮᠳᠠᠬᠢ ᠭᠡᠷᠡᠯᠲᠦ᠍ ᠬᠥᠰᠢᠶᠡ ᠪᠣᠯᠣᠭᠰᠠᠨ ᠪᠢᠯᠡ᠃ ᠡᠭᠦᠨᠡᠴᠡ ᠰᠡᠭᠦᠯᠡᠷ ᠠᠵᠢᠶᠠ ᠮᠢᠨᠢ ᠲᠥᠪᠦᠨ ᠦᠨᠳᠦᠰᠦᠲᠡᠨᠦ ᠬᠡᠷᠡᠭ ᠡᠷᠬᠢᠯᠡᠬᠦ ᠵᠥᠪᠯᠡᠯ᠂ ᠥᠪᠥᠷ ᠮᠣᠩᠭᠣᠯᠤᠨ ᠶᠡᠬᠡ ᠰᠤᠷᠭᠠᠭᠤᠯᠢ᠂ ᠥᠪᠥᠷ ᠮᠣᠩᠭᠣᠯᠤᠨ ᠲᠠᠷᠢᠶᠠᠯᠠᠩᠤᠨ ᠶᠡᠬᠡ ᠰᠤᠷᠭᠠᠭᠤᠯᠢ ᠵᠡᠷᠭᠡ ᠪᠠᠶ᠋ᠢᠭᠤᠯᠭᠠᠳᠤ ᠤᠷᠢᠭᠳᠠᠨ᠂ ᠮᠠᠯᠵᠢᠬᠤ ᠣᠷᠣᠨᠤ ᠠᠵᠤ ᠠᠬᠤᠢᠶᠢᠨ ᠥᠭᠡᠷᠡᠴᠢᠯᠡᠯᠲᠡᠶᠢᠨ ᠲᠤᠬᠠᠢ ᠣᠯᠠᠨ ᠤᠳᠠᠭᠠ ᠶᠠᠷᠢᠶᠠ ᠬᠢᠭᠰᠡᠨ ᠪᠥᠭᠡᠳ ᠰᠤᠳᠤᠯᠤᠨ ᠰᠢᠨᠵᠢᠯᠡᠬᠦ᠌ ᠠᠵᠢᠯᠢᠶᠠᠨ ᠦᠷᠭᠦᠯᠵᠢᠯᠡᠭᠦᠯᠵᠦ᠍ 《ᠰᠥᠨᠢᠳ ᠵᠡᠭᠦᠨ ᠬᠣᠰᠢᠭᠤᠨᠤ ᠬᠥᠳᠡᠭᠡ ᠠᠵᠤ ᠠᠬᠤᠢᠶᠢᠨ ᠳᠠᠯᠠᠨ ᠵᠢᠯ》 ᠭᠡᠬᠦ᠌ ᠨᠣᠮᠤᠨ ᠴᠢᠬᠤᠯᠠ ᠬᠡᠰᠡᠭ ᠢ ᠪᠢᠴᠢᠭᠰᠡᠨ ᠪᠠᠢᠭᠠ᠃ ᠣᠳᠣ ᠴᠤ᠌ ᠣᠷᠣᠨ ᠨᠤᠲᠤᠭᠤᠨ ᠰᠣᠶᠣᠯ ᠲᠡᠦᠬᠡ᠂ ᠨᠤᠲᠤᠭᠤᠨ ᠠᠷᠠᠳᠤᠨ 《ᠭᠡᠷᠦᠨ ᠤᠭᠤᠨ ᠪᠢᠴᠢᠭ》 ᠵᠡᠷᠭᠡᠶᠢ ᠨᠠᠶ᠋ᠢᠷᠠᠭᠤᠯᠤᠨ ᠪᠢᠴᠢᠬᠦ᠌ ᠠᠵᠢᠯᠳᠤ ᠰᠢᠮᠳᠠᠵᠤ ᠪᠤᠢ᠃
ᠮᠣᠩᠭᠣᠯ᠂ ᠬᠢᠲᠠᠳ ᠪᠢᠴᠢᠭᠢ ᠥᠪᠡᠷᠢᠶᠡᠨ ᠰᠤᠷᠤᠭᠰᠠᠨ ᠪᠠᠶ᠋ᠢᠵᠤ᠂ ᠨᠠᠶᠠᠨ ᠲᠠᠪᠤᠨ ᠨᠠᠰᠤᠨᠤ ᠥᠨᠳᠥᠷ ᠳᠠᠪᠠᠭᠠ ᠥᠭᠰᠥᠵᠦ᠍ ᠶᠠᠪᠤᠭᠠ ᠮᠠᠯᠴᠢᠨ ᠠᠪᠤᠶᠢᠨ ᠮᠢᠨᠢ ᠪᠤᠰᠤᠳᠤᠨ ᠲᠥᠯᠥᠭᠡ ᠵᠢᠳᠬᠦᠳᠡᠭ ᠥᠭᠭᠢᠶᠡᠮᠦᠷ ᠰᠡᠳᠬᠢᠯ᠂ ᠰᠢᠨᠲᠠᠷᠠᠰᠢ ᠦᠭᠡᠢ ᠵᠣᠷᠢᠭ ᠰᠠᠨᠠᠭᠠ ᠨᠢ ᠦᠷᠡ ᠬᠡᠦᠬᠡᠳ ᠪᠢᠳᠠᠨᠤ ᠪᠠᠨ ᠢᠲᠡᠭᠡᠯ ᠵᠣᠷᠢᠭᠢ ᠬᠥᠪᠴᠢᠯᠡᠭᠰᠡᠭᠡᠷ ᠪᠠᠶ᠋ᠢᠨᠠ᠃
ᠠᠵᠢᠶᠠ ᠮᠢᠨᠢ ᠦᠷᠡ ᠬᠡᠦᠬᠡᠳᠲᠡᠬᠡᠨ ᠤᠷᠲᠤ᠌ ᠨᠠᠰᠤᠯᠠᠵᠤ᠂ ᠤᠳᠠᠭᠠᠨ ᠵᠢᠷᠭᠠᠵᠤ ᠬᠠᠶ᠋ᠢᠷᠠᠯᠠᠭᠠᠷᠠᠢ！