ᠤᠩᠨᠢᠭᠤᠳ ᠬᠤᠪᠴᠠᠰᠦ ᠵᠠᠰᠠᠯ᠎ᠨᠢ ᠭᠡᠯᠪᠡᠷᠢ ᠮᠠᠶᠢᠭ ᠪᠠ ᠤᠷᠠᠯᠢᠭ ᠎ᠤᠨ ᠲᠠᠯ᠎ᠠ᠎ᠪᠠᠷ ᠦᠪᠦᠷ ᠮᠤᠨᠭᠭᠤᠯ᠎ᠤᠨ ᠬᠤᠷᠴᠢᠨ ᠪᠠᠭᠠᠷᠢᠨ᠎ᠤ ᠮᠤᠩᠭᠤᠯ ᠬᠤᠪᠴᠠᠰᠦ ᠵᠠᠰᠠᠯ᠎ᠳᠤ ᠬᠠᠷᠢᠶᠠᠯᠠᠭ᠍ᠳᠠᠳᠠᠭ ᠪᠤᠯᠪᠠᠴᠤ᠌᠂ ᠲᠡᠭᠦᠨ᠎ᠳᠤ ᠪᠠᠰᠠ ᠦᠭᠡᠷ᠎ᠡ ᠪᠤᠰᠤᠳ᠎ᠠᠴᠠ ᠢᠯᠠᠭᠠᠭ᠍ᠳᠠᠬᠤ ᠢᠯᠡ ᠲᠤᠳᠤ ᠦᠪᠡᠷᠮᠢᠴᠡ ᠭᠡᠪ ᠨᠠᠮᠪᠠ ᠲᠠᠢ ᠶᠤᠮ᠃  

ᠭᠠᠷᠴᠠᠭ᠄

ᠳᠡᠦᠬᠡᠨ ᠢᠷᠡᠯᠳᠡ

ᠳᠦᠷᠦᠯ ᠵᠦᠢᠯ

ᠰᠤᠶᠤᠯ᠎ᠤᠨ ᠪᠡᠯᠭᠡ ᠲᠡᠮᠳᠡᠭ

ᠤᠨᠴᠠᠯᠢᠭ ᠰᠢᠨᠵᠢ

ᠳᠡᠦᠬᠡᠨ ᠢᠷᠡᠯᠳᠡ

ᠤᠩᠨᠢᠭᠤᠳ᠎ᠤᠨ ᠬᠤᠪᠴᠠᠰᠦ ᠵᠠᠰᠠᠯ᠎ᠨᠢ ᠶᠡᠭᠡ ᠡᠷᠲᠡ᠎ᠳᠡᠭᠡᠨ ᠮᠤᠩᠭᠤᠯ ᠬᠤᠪᠴᠠᠰᠦ ᠵᠠᠰᠠᠯ᠎ᠲᠠᠢ ᠠᠳᠠᠯᠢᠬᠠᠨ ᠪᠠᠢᠭ᠍ᠰᠠᠨ ᠶᠤᠮ᠃ ᠴᠢᠩ ᠤᠯᠤᠰ᠎ᠤᠨ᠎ᠦᠶ᠎ᠡ᠎ᠳᠤ᠂ ᠮᠠᠨᠵᠤ ᠦᠨᠳᠦᠰᠦᠳᠡᠨ᠎ᠤ ᠨᠦᠯᠦᠭᠡ᠎ᠪᠠᠷ ᠮᠠᠨᠵᠤ ᠮᠠᠶᠢᠭ᠎ᠤᠨ ᠬᠤᠪᠴᠠᠰᠦ ᠵᠠᠰᠠᠯ᠎ᠤᠨ ᠬᠡᠯᠪᠡᠷᠢ᠎ᠶ᠋ᠢ ᠦᠪᠡᠷ᠎ᠤᠨ ᠬᠤᠪᠴᠠᠰᠦ᠎ᠳᠠᠭᠠᠨ ᠱᠢᠩᠭᠡᠨ ᠠᠪᠴᠤ᠌᠂ ᠡᠷᠡᠭ᠌ᠲᠠᠢᠴᠤᠳ ᠎ᠨᠢ ᠤᠭᠤᠳᠤᠷ ᠤᠤᠵᠢ （ᠬᠠᠨᠵᠢᠶᠠᠷᠢ）᠂ ᠡᠮᠡᠭ᠌ᠲᠠᠢᠴᠤᠳ᠎ᠨᠢ ᠤᠷᠳᠤ ᠤᠤᠵᠢ ᠡᠮᠦᠰᠭᠦ᠌ ᠪᠤᠯᠵᠤ᠂ ᠲᠡᠷᠯᠢᠭ᠎ᠢᠶᠠᠨ ᠴᠡᠭᠡᠵᠢ᠎ᠪᠠᠷ᠎ᠢᠶᠠᠨ ᠪᠠᠭ᠍ᠠᠨ ᠴᠢᠬᠤᠯ᠂ ᠲᠤᠤᠷ᠎ᠠ᠎ᠪᠠᠨ ᠤᠨᠤᠭᠤ᠎ᠲᠠᠢ ᠭᠢᠭᠦ᠌ ᠪᠤᠯᠵᠠᠢ᠃ ᠬᠤᠵᠢᠮ᠎ᠨᠢ ᠭᠢᠳᠠᠳ ᠬᠤᠪᠴᠠᠰᠦ ᠵᠠᠰᠠᠯ᠎ᠤᠨ ᠨᠦᠯᠦᠭᠡ᠎ᠶ᠋ᠢ ᠭᠦᠷᠳᠡᠵᠤ᠂ ᠬᠤᠪᠴᠠᠰᠦᠨ᠎ᠤ ᠴᠢᠮᠡᠭ᠌ᠯᠡᠯ ᠪᠤᠯᠬᠤ ᠬᠤᠸᠠᠷ ᠵᠢᠷᠤᠭ᠎ᠨᠢ ᠤᠯᠠᠮ ᠨᠠᠷᠢᠯᠢᠭ ᠪᠤᠯᠵᠤ᠂ ᠬᠠᠳᠭᠤᠮᠠᠯ ᠬᠠᠳᠭᠤᠬᠤ ᠤᠷ᠎ᠠ ᠮᠡᠷᠭᠡᠵᠢᠯ᠎ᠨᠢ ᠭᠤᠸ᠎ᠠ ᠰᠠᠢᠬᠠᠨ ᠪᠤᠯᠪᠠ᠃ ᠢᠯᠠᠩᠭᠤᠶ᠎ᠠ ᠱᠠᠬᠠᠢ ᠤᠶᠤᠬᠤ ᠤᠷ᠎ᠠ ᠮᠡᠷᠭᠡᠵᠢᠯ᠎ᠨᠢ ᠭᠢᠳᠠᠳ  ᠦᠨᠳᠦᠰᠦᠳᠡᠨ᠎ᠤ ᠭᠠᠷ᠎ᠢᠶᠠᠷ ᠤᠶᠤᠭ᠍ᠰᠠᠨ ᠬᠠᠳᠭᠤᠮᠠᠯ ᠬᠤᠸᠠᠷ᠎ᠲᠠᠢ ᠱᠠᠬᠠᠢ ᠵᠢᠨ ᠭᠡᠪ ᠶᠠᠩᠵᠤ ᠪᠠ ᠤᠶᠤᠳᠠᠯ᠎ᠤᠨ ᠤᠷ᠎ᠠ ᠮᠡᠷᠭᠡᠵᠢᠯ᠎ᠢ ᠠᠮᠢᠳᠤᠯᠢᠭ᠎ᠢᠶᠠᠷ ᠱᠢᠩᠭᠡᠨ ᠠᠪᠴᠦ᠍᠂ ᠦᠪᠡᠷ᠎ᠤᠨ ᠭᠡᠪ ᠨᠠᠮᠪᠠ᠎ᠲᠠᠢ ᠱᠠᠬᠠᠢ ᠭᠤᠳᠤᠯ᠎ᠢ ᠡᠭᠦᠳᠦᠨ ᠪᠦᠳᠦᠭᠡᠵᠤ ᠴᠢᠳᠠᠭ᠍ᠰᠠᠨ ᠶᠤᠮ᠃       

ᠳᠦᠷᠦᠯ ᠵᠦᠢᠯ

ᠨᠢᠭᠡ᠂ ᠤᠩᠨᠢᠭᠤᠳ ᠬᠤᠪᠴᠠᠰᠦ ᠵᠠᠰᠠᠯ᠎ᠤᠨ ᠲᠦᠷᠦᠯ ᠵᠦᠢᠯ   

ᠤᠩᠨᠢᠭᠤᠳ ᠬᠤᠪᠴᠠᠰᠤ ᠵᠠᠰᠠᠯ᠎ᠢ ᠡᠩ᠎ᠤᠨ ᠬᠤᠪᠴᠠᠰᠤ ᠵᠠᠰᠠᠯ᠂ ᠦᠩᠭᠡ᠎ᠶ᠋ᠢᠨ （ᠲᠦᠷᠦ᠍᠎ᠶ᠋ᠢᠨ） ᠬᠤᠪᠴᠠᠰᠤ ᠵᠠᠰᠠᠯ ᠭᠡᠵᠤ ᠬᠤᠶᠠᠷ ᠶᠡᠭᠡ ᠲᠦᠷᠦᠯ ᠬᠤᠪᠢᠶᠠᠵᠤ ᠪᠤᠯᠤᠨ᠎ᠠ᠃ ᠪᠠᠰᠠ ᠪᠦᠰᠡᠲᠠᠢ ᠭᠦᠮᠦᠨ᠎ᠤ ᠬᠤᠪᠴᠠᠰᠦ ᠵᠠᠰᠠᠯ᠂ ᠪᠦᠰᠡᠭᠦᠢ ᠭᠦᠮᠦᠨ᠎ᠤ ᠬᠤᠪᠴᠠᠰᠤ ᠵᠠᠰᠠᠯ᠂ ᠪᠡᠶ᠎ᠡ ᠭᠦᠢᠴᠡᠭ᠌ᠰᠡᠨ ᠬᠡᠤᠭᠡᠨᠴᠤᠳ᠎ᠤᠨ ᠬᠤᠪᠴᠠᠰᠤ ᠵᠠᠰᠠᠯ᠂ ᠱᠢᠨ᠎ᠡ ᠭᠦᠷᠭᠡᠨ ᠱᠢᠨ᠎ᠡ ᠪᠡᠷᠢ᠎ᠶ᠋ᠢᠨ ᠬᠤᠪᠴᠠᠰᠤ ᠵᠠᠰᠠᠯ᠂ ᠡᠷᠡᠭ᠌ᠲᠠᠢ ᠡᠮᠡᠭ᠌ᠲᠠᠢ ᠬᠡᠤᠬᠡᠳ᠎ᠤᠨ ᠬᠤᠪᠴᠠᠰᠤ ᠵᠠᠰᠠᠯ ᠭᠡᠵᠤ ᠬᠤᠪᠢᠶᠠᠵᠤ ᠪᠤᠯᠤᠨ᠎ᠠ᠃ ᠡᠭᠦᠨ᠎ᠠᠴᠠ ᠭᠠᠳᠠᠨ᠎ᠠ ᠪᠦᠭᠡᠴᠢᠨ᠎ᠤ ᠬᠤᠪᠴᠠᠰᠤ ᠵᠠᠰᠠᠯ᠂ ᠯᠠᠮᠠ᠎ᠨᠠᠷ᠎ᠤᠨ ᠬᠤᠪᠴᠠᠰᠤ ᠵᠠᠰᠠᠯ᠂ ᠨᠦᠭ᠌ᠴᠢᠭ᠌ᠰᠡᠳ᠎ᠤᠨ ᠮᠦᠩᠭᠡᠳᠡ᠎ᠶ᠋ᠢᠨ ᠬᠤᠪᠴᠠᠰᠤ ᠵᠠᠰᠠᠯ ᠭᠡᠵᠤ ᠪᠠᠢᠳᠠᠭ ᠪᠤᠯᠪᠠᠴᠤ᠌ ᠭᠤᠤᠯ ᠬᠤᠪᠴᠠᠰᠤ ᠵᠠᠰᠠᠯ᠎ᠳᠤ ᠤᠷᠤᠬᠤ ᠦᠭᠡᠢ ᠶᠤᠮ᠃  

ᠪᠦᠰᠡᠲᠠᠢ ᠭᠦᠮᠦᠨ᠎ᠤ ᠲᠦᠷᠪᠡᠨ ᠤᠯᠠᠷᠢᠯ᠎ᠤᠨ ᠬᠤᠪᠴᠠᠰᠤ᠎ᠳᠤ ᠠᠳᠠᠯᠢ ᠪᠤᠰᠤ ᠭᠡᠯᠪᠡᠷᠢ᠎ᠶ᠋ᠢᠨ ᠴᠠᠭᠠᠨ᠂ ᠭᠦᠭᠡ᠂ ᠴᠡᠩᠭᠡᠷ ᠵᠡᠷᠭᠡ ᠦᠩᠭᠡ᠎ᠶ᠋ᠢᠨ ᠦᠨᠳᠦᠷ ᠤᠭ᠍ᠳᠤᠷ ᠬᠤᠪᠴᠠᠰᠤ᠂ ᠲᠠᠷᠦᠢ ᠲᠡᠷᠯᠢᠭ᠂ ᠲᠡᠪᠡᠯ᠂ ᠴᠠᠮᠴᠠ᠂ ᠫᠠᠩᠬᠤ （ᠭᠦᠪᠦᠩ ᠲᠡᠷᠯᠢᠭ）᠂ ᠤᠯᠤᠩᠲᠠᠢ᠂ ᠬᠠᠨᠳᠠᠭᠠᠰᠤ᠂ ᠬᠠᠨᠵᠢᠶᠠᠷᠢ ᠵᠡᠷᠭᠡ ᠪᠠᠢᠳᠠᠭ᠃ ᠦᠮᠦᠳᠦ᠍᠎ᠳᠤᠨᠢ ᠠᠷᠤ ᠦᠪᠦᠷ᠎ᠨᠢ ᠢᠯᠭᠠᠭ᠎ᠠ ᠦᠭᠡᠢ ᠦᠨᠳᠦᠷ ᠵᠠᠬ᠎ᠠ᠎ᠲᠠᠢ᠂ ᠠᠭᠤᠵᠢᠮ ᠠᠯᠠ᠎ᠲᠠᠢ᠂ ᠱᠤᠪᠳᠤᠩ ᠱᠢᠷᠬᠤᠨᠠᠭ᠎ᠲᠠᠢ ᠠᠷᠠᠰᠤᠨ ᠦᠮᠦᠳᠦ᠂ ᠭᠦᠪᠦᠩ ᠦᠮᠦᠳᠦ᠂᠎ᠳ᠋ᠠᠡᠭ ᠦᠮᠦᠳᠦ᠂ ᠵᠢᠶᠠ ᠦᠮᠦᠳᠦ ᠪᠠ ᠲᠤᠤᠬᠤ ᠦᠮᠦᠳᠦ ᠪᠠᠢᠭ᠍ᠰᠠᠨ᠎ᠢᠶᠠᠨ ᠦᠨᠦ᠍ ᠪᠤᠯ ᠤᠳᠤ ᠮᠠᠶᠢᠭ᠎ᠤᠨ ᠦᠮᠦᠳᠦ ᠪᠤᠯᠵᠤ ᠬᠤᠪᠢᠷᠠᠵᠠᠢ᠃ ᠭᠤᠳᠤᠯ᠎ᠳᠤᠨᠢ ᠪᠤᠯᠢᠭᠠᠷᠢᠨ ᠭᠤᠳᠤᠯ᠂ ᠠᠷᠠᠰᠤᠨ ᠭᠤᠳᠤᠯ᠂ ᠢᠰᠡᠭᠡᠢ ᠭᠤᠳᠤᠯ᠂ ᠪᠦᠰ ᠭᠤᠳᠤᠯ ᠪᠠᠢᠳᠠᠭ᠃ ᠪᠦᠰ ᠭᠤᠳᠤᠯ᠎ᠢ ᠪᠠᠰᠠ ᠤᠯᠭᠤᠢ ᠭᠤᠳᠤᠯ᠂ ᠤᠷᠢᠶᠠᠮᠠᠯ ᠭᠤᠳᠤᠯ᠂ ᠰᠡᠢᠯᠡᠭᠦᠷ᠎ᠲᠠᠢ ᠭᠤᠳᠤᠯ᠂ ᠭᠦᠷᠭᠡᠯᠡᠭᠦ᠌ ᠭᠤᠳᠤᠯ᠂ ᠲᠤᠮᠤᠭ᠎ᠲᠠᠢ ᠭᠤᠳᠤᠯ᠎ᠭᠡᠵᠤ ᠤᠯᠠᠨ ᠵᠦᠢᠯ ᠬᠤᠪᠢᠶᠠᠳᠠᠭ᠃ ᠱᠠᠬᠠᠢ᠎ᠶ᠋ᠢ ᠪᠠᠰᠠ ᠠᠷᠠᠰᠤᠨ ᠱᠠᠬᠠᠢ᠂ ᠪᠦᠰ ᠱᠠᠬᠠᠢ ᠭᠡᠵᠤ ᠬᠤᠪᠢᠶᠠᠨ᠎ᠠ᠃ ᠪᠦᠰ ᠱᠠᠬᠠᠢ᠎ᠶ᠋ᠢ ᠤᠶᠤᠭ᠍ᠰᠠᠨ ᠤᠶᠤᠳᠠᠯ᠎ᠢᠶᠠᠷ᠎ᠨᠢ ᠤᠷᠢᠶᠠᠮᠠᠯ ᠱᠠᠬᠠᠢ᠂ ᠰᠡᠢᠯᠡᠭᠦᠷ᠎ᠲᠠᠢ ᠱᠠᠬᠠᠢ᠂ ᠤᠯᠭᠤᠢ ᠱᠠᠬᠠᠢ ᠭᠡᠵᠤ ᠬᠤᠪᠢᠶᠠᠨ᠎ᠠ᠃ ᠡᠰᠭᠡᠵᠤ ᠵᠤᠭᠢᠶᠠᠭ᠍ᠰᠠᠨ ᠭᠡᠯᠪᠡᠷᠢ᠎ᠪᠠᠷ᠎ᠨᠢ ᠵᠠᠯᠭᠠᠭᠤᠷ᠎ᠲᠠᠢ ᠱᠠᠬᠠᠢ᠂ ᠬᠠᠮ᠎ᠠ ᠱᠠᠬᠠᠢ᠂ ᠱᠤᠩᠬᠤ ᠬᠤᠩᠱᠢᠶᠠᠷ᠎ᠲᠠᠢ ᠱᠠᠬᠠᠢ ᠭᠡᠭᠦ᠌ ᠵᠡᠷᠭᠡ᠎ᠪᠠᠷ ᠬᠤᠪᠢᠶᠠᠨ᠎ᠠ᠃ ᠭᠤᠳᠤᠯ᠎ᠢ ᠪᠠᠰᠠ ᠬᠠᠮ᠎ᠠ ᠭᠤᠳᠤᠯ᠂ ᠡᠭᠡᠳᠡᠩ ᠭᠤᠳᠤᠯ᠂ ᠱᠤᠩᠬᠤ ᠬᠤᠩᠱᠢᠶᠠᠷ᠎ᠲᠠᠢ ᠭᠤᠳᠤᠯ᠂ ᠵᠠᠯᠭᠠᠭᠤᠷ᠎ᠲᠠᠢ ᠭᠤᠳᠤᠯ ᠭᠡᠵᠤ ᠬᠤᠪᠢᠶᠠᠨ᠎ᠠ᠃ ᠬᠡᠦᠬᠡᠳ᠎ᠤᠨ ᠱᠠᠬᠠᠢ᠎ᠳᠤ ᠪᠠᠷᠰ ᠱᠠᠬᠠᠢ᠂ ᠮᠤᠤᠷ ᠱᠠᠬᠠᠢ ᠭᠡᠵᠤ ᠪᠠᠢᠳᠠᠭ᠃ ᠤᠢᠮᠤᠰᠤ᠎ᠳᠤᠨᠢ ᠢᠰᠡᠭᠡᠢ ᠤᠢᠮᠤᠰᠤ᠂ ᠭᠦᠪᠦᠩ ᠤᠢᠮᠤᠰᠤ᠂ ᠵᠢᠶᠠ ᠤᠢᠮᠤᠰᠤ᠂ ᠨᠤᠤᠰᠤᠨ ᠤᠳᠠᠰᠤᠨ ᠤᠢᠮᠤᠰᠤ᠂ ᠤᠳᠠᠰᠤᠨ ᠤᠢᠮᠤᠰᠤ ᠭᠡᠵᠤ ᠪᠠᠢᠳᠠᠭ᠃ ᠮᠠᠯᠠᠭᠠᠢ᠎ᠳᠤᠨᠢ ᠦᠨᠡᠭᠡᠨ ᠠᠷᠠᠰᠤᠨ ᠮᠠᠯᠠᠭᠠᠢ᠂ ᠢᠰᠡᠭᠡᠢ ᠲᠤᠭᠤᠷᠴᠤᠭ᠂ ᠬᠤᠷᠠᠭᠠᠨ ᠠᠷᠠᠰᠤ ᠪᠤᠶᠤ ᠬᠠᠷ᠎ᠠ ᠦᠭᠡᠳᠡᠩ ᠬᠠᠳᠠᠭ᠍ᠰᠠᠨ ᠲᠦᠭᠦᠷᠢᠭ ᠮᠠᠯᠠᠭᠠᠢ᠂ ᠯᠢᠮᠤᠤ ᠮᠠᠯᠠᠭᠠᠢ᠂ ᠰᠡᠭᠦᠪᠴᠡᠳᠦ ᠰᠠᠷᠠᠪᠴᠢ᠎ᠲᠠᠢ ᠲᠦᠭᠦᠷᠢᠭ ᠮᠠᠯᠠᠭᠠᠢ᠂ ᠪᠦᠷᠭᠦ᠌ ᠮᠠᠯᠠᠭᠠᠢ᠂ ᠵᠠᠩᠵᠤᠨ ᠮᠠᠯᠠᠭᠠᠢ᠂ ᠮᠠᠬᠤᠵᠠ ᠮᠠᠯᠠᠭᠠᠢ ᠪᠠᠢᠳᠠᠭ᠃  

ᠪᠦᠰᠡᠭᠦᠢ ᠭᠦᠮᠦᠨ᠎ᠤ ᠲᠦᠷᠪᠡᠨ ᠤᠯᠠᠷᠢᠯ᠎ᠤᠨ ᠬᠤᠪᠴᠠᠰᠤ ᠵᠠᠰᠠᠯ᠎ᠨᠢ ᠭᠢᠯᠠᠰᠤᠮ᠎ᠠ ᠰᠠᠢᠬᠠᠨ ᠪᠠᠢᠳᠠᠭ᠃ ᠤᠩᠨᠢᠭᠤᠳ ᠡᠮᠡᠭ᠌ᠲᠠᠢᠴᠤᠳ ᠭᠦᠭᠡ᠂ ᠴᠡᠩᠭᠡᠷ᠂ ᠨᠤᠭᠤᠭᠠᠨ᠂ ᠬᠤᠨᠳᠠᠨ᠂ ᠴᠠᠭᠠᠨ ᠦᠩᠭᠡ᠎ᠲᠠᠢ ᠮᠠᠩᠨᠤᠭ ᠲᠡᠪᠡᠯ ᠪᠠ ᠪᠦᠰ ᠪᠤᠶᠤ ᠲᠤᠷᠭᠠᠨ ᠲᠡᠷᠯᠢᠭ ᠡᠮᠦᠰᠴᠦ᠍᠂ ᠭᠠᠳᠠᠭᠤᠷ᠎ᠨᠢ ᠬᠤᠸᠠᠷ ᠴᠡᠴᠡᠭ ᠬᠠᠳᠭᠤᠮᠠᠯᠯᠠᠭ᠍ᠰᠠᠨ ᠬᠠᠷ᠎ᠠ ᠲᠤᠷᠭᠠᠨ ᠤᠷᠳᠤ ᠤᠤᠵᠢ ᠲᠠᠪᠬᠤᠷᠯᠠᠨ ᠡᠮᠦᠰᠳᠡᠭ᠃ ᠪᠦᠰᠡᠭᠦᠢ ᠭᠦᠮᠦᠨ᠎ᠤ ᠬᠤᠪᠴᠠᠰᠤ᠎ᠳᠤ ᠲᠡᠷᠯᠢᠭ᠎ᠠᠴᠠ ᠭᠠᠳᠠᠨ᠎ᠠ ᠠᠷᠠᠰᠤᠨ ᠲᠡᠪᠡᠯ᠂ ᠵᠢᠶᠠ ᠴᠠᠮᠴᠠ᠂ ᠫᠠᠩᠬᠤ （ᠭᠦᠪᠤᠩ ᠲᠡᠷᠯᠢᠭ）᠂ ᠬᠠᠨᠳᠠᠭᠠᠰᠤ᠂ ᠬᠠᠨᠵᠢᠶᠠᠷᠢ ᠵᠡᠷᠭᠡ ᠪᠠᠢᠳᠠᠭ᠃ ᠪᠦᠰᠡᠭᠦᠢ ᠭᠦᠮᠦᠨ᠎ᠤ ᠦᠮᠦᠳᠦ᠍᠎ᠨᠢ ᠪᠦᠰᠡᠳᠠᠢ ᠭᠦᠮᠦᠨ᠎ᠤ᠎ᠬᠢ᠎ᠲᠠᠢ ᠦᠨᠳᠦᠰᠦᠨ᠎ᠳᠡᠭᠡᠨ ᠠᠳᠠᠯᠢ᠃ ᠦᠮᠦᠳᠦ᠍᠎ᠨᠢ ᠠᠷᠠᠰᠤᠨ ᠦᠮᠦᠳᠦ᠂ ᠤᠳᠠᠮᠠᠯ ᠠᠷᠠᠰᠤᠨ ᠦᠮᠦᠳᠦ᠂ ᠭᠦᠳᠡᠰᠤᠨ ᠠᠷᠠᠰᠤᠨ ᠦᠮᠦᠳᠦ᠂ ᠭᠦᠪᠦᠩ ᠦᠮᠦᠳᠦ᠂ ᠨᠤᠤᠰᠤᠨ ᠦᠮᠦᠳᠦ᠂ ᠵᠢᠶᠠ ᠦᠮᠦᠳᠦ᠂ ᠳ᠋ᠠᠩ ᠦᠮᠦᠳᠦ ᠵᠡᠷᠭᠡ ᠪᠠᠢᠳᠠᠭ᠃ ᠡᠮᠡᠭ᠌ᠳᠠᠢ ᠭᠦᠮᠦᠨ᠎ᠤ ᠭᠤᠳᠤᠯ ᠱᠠᠬᠠᠢ᠎ᠶ᠋ᠢᠨ ᠦᠨᠳᠦᠰᠦᠨ ᠭᠡᠯᠪᠡᠷᠢ᠎ᠨᠢ ᠡᠷᠡᠭ᠌ᠳᠠᠢ ᠭᠦᠮᠦᠨ᠎ᠤ᠎ᠬᠢ᠎ᠲᠠᠢ ᠠᠳᠠᠯᠢ ᠶᠤᠮ᠃ ᠢᠯᠭᠠᠭ᠎ᠠ᠎ᠨᠢ ᠭᠡᠷᠡᠭ᠌ᠯᠡᠭ᠌ᠰᠡᠨ᠎ᠮᠠᠲ᠋ᠧᠷᠢᠶᠠᠯ ᠪᠤᠯᠤᠨ ᠤᠶᠤᠭ᠍ᠰᠠᠨ ᠤᠶᠤᠳᠠᠯ᠎ᠳᠤᠨᠢ ᠪᠠᠢᠳᠠᠭ᠃ ᠡᠮᠡᠭ᠌ᠲᠠᠢ ᠭᠦᠮᠦᠨ᠎ᠤ ᠭᠤᠳᠤᠯ᠎ᠳᠤ ᠬᠠᠮ᠎ᠠ ᠭᠤᠳᠤᠯ᠂ ᠱᠤᠩᠬᠤ ᠭᠤᠳᠤᠯ ᠵᠡᠷᠭᠡ ᠪᠠᠢᠵᠤ᠂ ᠭᠤᠳᠤᠯ ᠲᠡᠭᠡᠷ᠎ᠡ᠎ᠪᠠᠨ ᠤᠷᠢᠶᠠᠮᠠᠯ ᠤᠷᠢᠶᠠᠬᠤ ᠪᠤᠶᠤ ᠬᠠᠳᠭᠤᠮᠠᠯ ᠬᠠᠳᠭᠤᠮᠠᠯᠯᠠᠵᠤ᠂   ᠤᠭᠠᠯᠵᠠ ᠬᠤᠸᠠᠷ᠎ᠢ ᠤᠷᠠᠯᠠᠨ ᠤᠶᠤᠳᠠᠭ᠃ ᠪᠦᠰᠭᠦᠢᠴᠤᠳ ᠪᠠᠰᠠ ᠰᠡᠢᠯᠡᠭᠦᠷ᠎ᠲᠠᠢ ᠭᠤᠳᠤᠯ ᠡᠮᠦᠰᠳᠡᠭ᠃ ᠪᠦᠰᠭᠦᠢᠴᠤᠳ ᠵᠤᠨ᠎ᠳᠠᠭᠠᠨ ᠬᠤᠸᠠᠷ᠎ᠲᠠᠢ ᠱᠠᠬᠠᠢ ᠡᠮᠦᠰᠳᠡᠭ᠃ ᠤᠩᠨᠢᠭᠤᠳ ᠡᠮᠡᠭ᠌ᠲᠢᠴᠤᠳ ᠭᠤᠳᠤᠯ ᠱᠠᠬᠠᠢ᠎ᠳᠠᠭᠠᠨ ᠡᠯ᠎ᠡ ᠵᠦᠢᠯ᠎ᠤᠨ ᠠᠷᠢᠶᠠᠳᠠᠨ ᠭᠦᠷᠦᠭᠡᠰᠦ᠂ ᠴᠡᠴᠡᠭ ᠬᠤᠸᠠᠷ ᠪᠤᠯᠤᠨ ᠭᠡ ᠤᠭᠠᠯᠵᠠ᠎ᠶ᠋ᠢ ᠡᠪ ᠲᠦᠢᠲᠠᠢ ᠮᠢᠷᠠᠯᠵᠠᠳᠠᠯ᠎ᠠ ᠰᠠᠢᠬᠠᠨ ᠬᠠᠳᠭᠤᠮᠠᠯᠯᠠᠨ ᠤᠶᠤᠳᠠᠭ᠃ ᠪᠦᠰᠡᠭᠦᠢ ᠭᠦᠮᠦᠨ᠎ᠤ ᠡᠮᠦᠰᠭᠦ ᠤᠢᠮᠤᠰᠤ᠎ᠨᠢ ᠪᠦᠰᠡᠲᠠᠢ ᠭᠦᠮᠦᠨ᠎ᠲᠠᠢ ᠦᠨᠳᠦᠰᠦᠨ᠎ᠳᠡᠭᠡᠨ  ᠠᠳᠠᠯᠢ᠃

ᠪᠦᠰᠡᠭᠦᠢ ᠭᠦᠮᠦᠨ ᠲᠤᠯᠤᠭᠠᠢ᠎ᠳᠠᠭᠠᠨ ᠬᠤᠶᠠᠷ ᠤᠭ ᠪᠤᠭᠤᠵᠤ᠂ ᠲᠠᠳᠠᠭᠤᠷ ᠲᠠᠳᠠᠨ᠂ ᠬᠠᠳᠭᠤᠭᠤᠷ ᠬᠠᠳᠭᠤᠨ᠂ ᠤᠨᠵᠢᠯᠭ᠎ᠠ ᠵᠡᠭᠦᠵᠤ᠂ ᠠᠯᠴᠢᠭᠤᠷ ᠤᠷᠢᠶᠠᠨ᠂ ᠴᠢᠭᠢᠨ᠎ᠳᠡᠭᠡᠨ ᠰᠦᠢᠭᠡ ᠵᠡᠭᠦᠨ᠎ᠡ᠃ ᠡᠪᠤᠯ ᠪᠤᠯ ᠲᠤᠯᠤᠭᠠᠢ᠎ᠳᠠᠭᠠᠨ ᠦᠨᠡᠭᠡᠨ ᠠᠷᠠᠰᠤ᠎ᠲᠠᠢ᠂ ᠬᠠᠳᠭᠤᠮᠠᠯ ᠬᠤᠸᠠᠷ᠎ᠲᠠᠢ ᠴᠢᠭᠢᠪᠴᠢ ᠪᠤᠶᠤ ᠦᠨᠡᠭᠡᠨ ᠠᠷᠠᠰᠤᠨ ᠮᠠᠯᠠᠭᠠᠢ ᠵᠠᠭᠦᠳᠡᠭ᠃ ᠲᠤᠯᠠᠭᠠᠨ ᠴᠠᠭ᠎ᠲᠤ ᠡᠮᠡᠭ᠌ᠲᠠᠢᠴᠤᠳ ᠱ᠌ᠢᠷᠦᠨ ᠮᠠᠯᠠᠭᠠᠢ᠂ ᠲᠤᠭᠤᠢ ᠮᠠᠯᠠᠭᠠᠢ᠂ ᠨᠠᠷᠠᠨ ᠮᠠᠯᠠᠭᠠᠢ ᠵᠡᠷᠭᠡ᠎ᠶ᠋ᠢ ᠲᠤᠯᠤᠭᠠᠢ᠎ᠳᠠᠭᠠᠨ ᠵᠡᠭᠦᠳᠡᠭ᠃ ᠬᠡᠦᠬᠡᠨ ᠭᠦᠮᠦᠨ᠎ᠤ ᠬᠤᠪᠴᠠᠰᠤ ᠬᠤᠨᠢᠷ᠎ᠨᠢ ᠵᠠᠯᠠᠭᠤ ᠪᠦᠰᠡᠭᠦᠢ ᠭᠦᠮᠦᠨ᠎ᠤ᠎ᠬᠢ᠎ᠲᠠᠢ ᠨᠡᠯᠢᠶᠡᠳ ᠲᠦᠰᠦᠭᠡᠲᠠᠢ᠃ ᠭᠤᠤᠯ ᠢᠯᠭᠠᠭ᠎ᠠ᠎ᠨᠢ ᠬᠡᠦᠬᠡᠨ ᠭᠦᠮᠦᠨ ᠪᠤᠯ ᠪᠦᠰᠡ ᠪᠦᠰᠡᠯᠡᠵᠤ᠂ ᠪᠦᠰᠡᠭᠦᠢ ᠭᠦᠮᠦᠨ ᠪᠤᠯ ᠪᠦᠰᠡ ᠪᠦᠰᠡᠯᠡᠳᠡᠭ ᠦᠭᠡᠢ ᠪᠠᠢᠵᠠᠢ᠃ ᠴᠢᠯᠦᠭᠡᠯᠡᠭ᠌ᠳᠡᠭ᠌ᠰᠡᠨ᠎ᠤ ᠲᠠᠷᠠᠭ᠎ᠠ ᠪᠦᠰᠡᠭᠦᠢᠴᠤᠳ ᠴᠤ᠌ ᠪᠦᠰᠡ ᠪᠦᠰᠡᠯᠡᠭᠦ᠌ ᠪᠤᠯᠪᠠ᠃ ᠬᠡᠤᠭᠡᠨ ᠭᠦᠮᠦᠨ ᠠᠷᠤᠨᠰᠢ᠎ᠪᠠᠨ ᠭᠠᠭ᠍ᠴᠠ ᠭᠡᠵᠢᠭᠡ ᠭᠦᠷᠦᠵᠤ᠂ ᠵᠤᠯᠠᠢ ᠲᠡᠭᠡᠭᠦᠷ᠎ᠢᠶᠠᠨ ᠳ᠋ᠠᠩ ᠱ᠌ᠢᠷᠦᠨ ᠲᠠᠳᠠᠭᠤᠷ ᠳᠠᠳᠠᠵᠤ᠂ ᠲᠤᠯᠤᠭᠠᠢ᠎ᠳᠠᠭᠠᠨ ᠬᠠᠯᠢᠭᠤ ᠬᠤᠷᠠᠭᠠᠨ ᠦᠰᠦ ᠬᠠᠳᠠᠭ᠍ᠰᠠᠨ ᠬᠤᠷᠭᠤᠢ ᠭᠦᠪᠦᠭᠡ᠎ᠲᠠᠢ ᠢᠰᠡᠭᠡᠢ ᠲᠤᠭᠤᠷᠴᠤᠭ ᠵᠠᠭᠦᠵᠤ᠂ ᠡᠩᠭᠡᠷ᠎ᠤᠨ ᠲᠤᠪᠴᠢᠨ ᠎ᠠᠴᠠ᠎ᠪᠠᠨ ᠬᠠᠳᠭᠤᠮᠠᠯ ᠬᠤᠸᠠᠷ᠎ᠲᠠᠢ ᠪᠦᠭᠡᠷᠡᠨ ᠬᠠᠪᠳᠠᠭ᠎ᠠ ᠵᠡᠭᠦᠵᠤ᠂ ᠳᠤᠳᠤᠷ᠎ᠠ᠎ᠨᠢ ᠦᠨᠦᠷᠳᠦ ᠡᠪᠡᠰᠦ ᠭᠢᠳᠡᠭ᠃ 

ᠤᠨᠴᠠᠯᠢᠭ ᠰᠢᠨᠵᠢ

ᠤᠩᠨᠢᠭᠤᠳ ᠬᠤᠪᠴᠠᠰᠤ ᠵᠠᠰᠠᠯ᠎ᠨᠢ ᠬᠤᠷᠴᠢᠨ ᠪᠠᠭᠠᠷᠢᠨ᠎ᠤ ᠬᠤᠪᠴᠠᠰᠤ ᠵᠠᠰᠠᠯ᠎ᠳᠤ ᠬᠠᠷᠢᠶᠠᠯᠠᠭ᠍ᠳᠠᠳᠠᠭ ᠪᠤᠯᠪᠠᠴᠤ᠌ ᠪᠤᠰᠤᠳ ᠬᠤᠱᠢᠭᠤ ᠨᠤᠳᠤᠭ᠎ᠠᠴᠠ ᠢᠯᠡ ᠲᠤᠳᠤ ᠢᠯᠠᠭᠠᠭ᠍ᠳᠠᠬᠤ ᠦᠪᠡᠷᠮᠢᠴᠡ ᠤᠨᠴᠠᠯᠢᠭ᠎ᠲᠠᠢ ᠶᠤᠮ᠃    

ᠡᠷᠡᠭ᠌ᠲᠠᠢ ᠡᠮᠡᠭ᠌ᠲᠠᠢ᠂᠂ ᠭᠦᠭ᠌ᠰᠢᠨ ᠵᠠᠯᠠᠭᠤ᠎ᠶ᠋ᠢᠨ ᠢᠯᠠᠭᠠᠯ ᠢᠯᠡ ᠲᠤᠳᠤ᠃ ᠵᠠᠯᠠᠭᠤᠴᠤᠳ ᠪᠤᠯ ᠬᠤᠷᠴᠠ ᠰᠤᠷᠭᠤᠭ ᠦᠩᠭᠡ᠎ᠶ᠋ᠢᠨ ᠲᠤᠷᠭ᠎ᠠ ᠲᠤᠷᠳᠠᠩ᠂ ᠦᠭᠡᠳᠡᠩ᠎ᠢ ᠰᠤᠩᠭᠤᠨ ᠬᠤᠪᠴᠠᠰᠤ ᠭᠢᠳᠡᠭ᠃ ᠨᠠᠰᠤᠲᠠᠢᠴᠤᠳ ᠪᠤᠯ ᠲᠠᠷᠤᠤ ᠪᠤᠷᠤᠭ᠍ᠵᠢᠭᠤᠨ ᠦᠩᠭᠡ᠎ᠶ᠋ᠢ ᠰᠤᠩᠭᠤᠵᠤ ᠬᠤᠪᠴᠠᠰᠤ ᠭᠢᠳᠡᠭ᠃    

ᠪᠦᠰᠡ ᠪᠦᠰᠡᠯᠡᠭᠦ᠎ᠳᠡᠭᠡᠨ ᠵᠠᠯᠠᠭᠤᠴᠤᠳ ᠪᠤᠯ ᠲᠤᠷᠭ᠎ᠠ ᠲᠤᠷᠳᠠᠩ᠂ ᠴᠢᠰᠴᠡᠦ ᠪᠦᠰᠡ ᠪᠦᠰᠡᠯᠡᠨ᠂ ᠠᠷᠤ ᠨᠢᠷᠤᠭᠤᠨ᠎ᠳᠠᠭᠠᠨ ᠴᠠᠴᠤᠭ ᠭᠠᠷᠭᠠᠳᠠᠭ᠃ ᠨᠠᠰᠤᠲᠠᠢᠴᠤᠳ ᠪᠤᠯ ᠵᠢᠶᠠᠨᠴᠠᠤ ᠪᠦᠰᠡ ᠪᠦᠰᠡᠯᠡᠵᠤ᠂ ᠴᠠᠴᠤᠭ ᠭᠠᠷᠭᠠᠳᠠᠭ ᠦᠭᠡᠢ᠃    

ᠤᠩᠨᠢᠭᠤᠳ ᠬᠤᠪᠴᠠᠰᠤᠨ᠎ᠤ ᠵᠠᠭᠠᠮ᠎ᠠ᠎ᠶ᠋ᠢᠨ ᠲᠤᠪᠴᠢ ᠵᠢᠨ ᠲᠤᠤᠷ᠎ᠠ ᠬᠤᠷᠤᠭᠤ ᠦᠷᠭᠡᠨ ᠠᠮᠢᠰᠭᠤᠯ ᠦᠯᠡᠳᠡᠭᠡᠵᠤ᠂ ᠲᠡᠪᠡᠯ ᠲᠡᠷᠯᠢᠭ᠎ᠲᠤ ᠳ᠋ᠠᠩ ᠱᠢᠯᠪᠢ ᠲᠤᠪᠴᠢ ᠬᠠᠳᠠᠵᠤ᠂ ᠰᠠᠮᠫᠠᠨ ᠵᠠᠩᠭᠢᠳᠭᠤ ᠪᠤᠶᠤ ᠭᠠᠤᠯᠢ᠂ ᠮᠦᠩᠭᠦᠨ ᠲᠤᠪᠴᠢ ᠬᠠᠳᠠᠳᠠᠭ᠃    

ᠤᠩᠨᠢᠭᠤᠳ ᠲᠡᠷᠯᠢᠭ ᠲᠡᠪᠡᠯ᠎ᠨᠢ ᠱᠢᠨᠠᠭ᠎ᠠ᠎ᠲᠠᠢ᠃ ᠮᠠᠨᠵᠤ ᠲᠡᠷᠯᠢᠭ ᠪᠠ ᠮᠠᠩᠨᠤᠭ ᠲᠡᠪᠡᠯ ᠪᠤᠯ ᠱᠢᠨᠠᠭ᠎ᠠ ᠤᠷᠤᠭᠤᠯᠳᠠᠭ ᠦᠭᠡᠢ᠃ ᠤᠩᠨᠢᠭᠤᠳ ᠲᠡᠷᠯᠢᠭ ᠲᠡᠪᠡᠯ ᠪᠤᠯ ᠤᠨᠤᠭᠤ ᠦᠭᠡᠢ ᠪᠤᠶᠤ ᠬᠤᠶᠠᠷ ᠤᠨᠤᠭᠤ᠎ᠲᠠᠢ᠃ ᠤᠷᠳᠤᠰ ᠲᠡᠷᠯᠢᠭ ᠪᠤᠯ ᠲᠦᠷᠪᠡᠨ ᠤᠨᠤᠭᠤ᠎ᠲᠠᠢ᠃    

ᠤᠩᠨᠢᠭᠤᠳ ᠮᠤᠩᠭᠤᠯᠴᠤᠳ ᠪᠦᠰᠡ ᠪᠦᠰᠡᠯᠡᠭᠦ᠎ᠳᠡᠭᠡᠨ ᠦᠵᠦᠮᠦᠴᠢᠨ ᠮᠤᠩᠭᠤᠯᠴᠤᠳ ᠰᠢᠭ ᠠᠭ᠍ᠰᠤᠵᠤ ᠪᠦᠰᠡᠯᠡᠳᠡᠭ ᠦᠭᠡᠢ ᠪᠤᠯᠬᠤᠷ ᠭᠤᠳᠤᠯ᠎ᠤᠨ ᠵᠤᠯᠠᠭ᠎ᠨᠢ ᠬᠤᠷᠮᠤᠢ ᠲᠤᠤᠭᠤᠷ ᠬᠠᠷᠠᠭ᠍ᠳᠠᠳᠠᠭ ᠦᠭᠡᠢ᠃    

ᠤᠩᠨᠢᠭᠤᠳ ᠲᠡᠷᠯᠢᠭ ᠲᠡᠪᠡᠯ᠎ᠨᠢ ᠳᠤᠳᠤᠭᠠᠳᠤ ᠡᠩᠭᠡᠷ᠎ᠲᠠᠢ᠃ ᠭᠡᠪᠡᠴᠤ᠌ ᠵᠠᠷᠢᠮ ᠭᠦᠮᠦᠨ ᠳᠤᠳᠤᠭᠠᠳᠤ ᠡᠩᠭᠡᠷ᠎ᠢᠶᠠᠨ ᠤᠭ᠍ᠳᠤᠷ ᠰᠢᠬ ᠭᠠᠷᠭᠠᠳᠠᠭ᠃    

ᠤᠩᠨᠢᠭᠤᠳ ᠭᠤᠳᠤᠯ᠎ᠤᠨ ᠪᠤᠷᠪᠢ᠎ᠠᠴᠠ ᠲᠡᠭᠡᠭ᠌ᠰᠢᠭᠢ ᠵᠤᠯᠠᠭ ᠲᠦᠷᠡᠢ᠎ᠶ᠋ᠢᠨ ᠵᠠᠯᠭᠠᠰᠤ ᠭᠡᠰᠡᠭ᠎ᠤᠨ ᠲᠠᠭᠢᠷ ᠤᠬᠤᠯᠠᠭᠠᠰᠤ᠎ᠨᠢ ᠨᠡᠯᠢᠶᠡᠳ ᠶᠡᠭᠡ᠂ ᠲᠦᠷᠡᠢ᠎ᠨᠢ ᠪᠠᠭ᠍ᠠᠨ ᠤᠭ᠍ᠳᠤᠷ ᠪᠠᠢᠳᠠᠭ᠃ ᠡᠨᠡ ᠲᠠᠯ᠎ᠠ᠎ᠪᠠᠷ ᠠᠷᠤ ᠬᠤᠷᠴᠢᠨ ᠬᠤᠪᠴᠠᠰᠦ ᠵᠠᠰᠠᠯ ᠵᠠᠷᠭᠡ᠎ᠠᠴᠠ ᠢᠯᠡ ᠲᠤᠳᠤ ᠢᠯᠠᠭᠠᠭ᠎ᠠ᠎ᠲᠠᠢ ᠶᠤᠮ᠃    

ᠤᠩᠨᠢᠭᠤᠳ ᠭᠡ ᠤᠭᠠᠯᠵᠠ ᠵᠢᠨ ᠲᠦᠷᠰᠦ ᠵᠢᠷᠤᠭ᠎ᠨᠢ ᠭᠤᠶᠤ᠂ ᠨᠠᠷᠢᠯᠢᠭ ᠪᠦᠭᠡᠳ ᠲᠦᠷᠦᠯ ᠵᠦᠢᠯ᠎ᠨᠢ ᠤᠯᠠᠨ ᠪᠠᠢᠳᠠᠭ᠃ ᠭᠡ ᠤᠭᠠᠯᠵᠠ᠎ᠶ᠋ᠢ ᠭᠡᠷᠡᠭ᠌ᠯᠡᠭᠦ᠌ ᠭᠠᠵᠠᠷ᠎ᠨᠢ ᠴᠤ᠌ ᠲᠤᠰ ᠲᠤᠰ᠎ᠤᠨ ᠴᠢᠩᠭ᠎ᠠ ᠱᠠᠭᠠᠷᠳᠠᠯᠭ᠎ᠠ᠎ᠲᠠᠢ ᠪᠠᠢᠳᠠᠭ᠃ ᠡᠳᠡᠭᠡᠷ ᠭᠡ ᠤᠭᠠᠯᠵᠠ᠎ᠨᠢ ᠤᠩᠨᠢᠭᠤᠳ ᠬᠤᠪᠴᠠᠰᠤ ᠵᠠᠰᠠᠯ᠎ᠤᠨ ᠰᠤᠶᠤᠯ᠎ᠤᠨ ᠪᠡᠯᠭᠡ ᠲᠡᠮᠳᠡᠭ᠎ᠢ ᠢᠯᠡᠷᠡᠭᠦᠯᠵᠤ ᠪᠠᠢᠳᠠᠭ᠃    

ᠤᠩᠨᠢᠭᠤᠳ ᠬᠤᠪᠴᠠᠰᠤ ᠵᠠᠰᠠᠯ᠎ᠤᠨ ᠤᠶᠤᠳᠠᠯ᠎ᠤᠨ ᠤᠷᠠᠨ ᠬᠠᠳᠭᠤᠮᠠᠯ᠎ᠤᠨ ᠤᠷ᠎ᠠ ᠮᠡᠷᠭᠡᠵᠢᠯ᠎ᠤᠨ ᠢᠯᠡᠷᠡᠭᠦᠯᠭᠦ᠌ ᠬᠠᠳᠭᠤᠮᠠᠯ᠎ᠤᠨ ᠠᠷᠭ᠎ᠠ ᠮᠠᠶᠢᠭ᠎ᠨᠢ ᠤᠯᠠᠨ ᠲᠦᠷᠦᠯ   ᠪᠠᠢᠳᠠᠭ᠃ ᠤᠩᠨᠢᠭᠤᠳ ᠤᠷᠠᠨ ᠬᠠᠳᠭᠤᠮᠠᠯᠴᠢᠨ᠎ᠤ ᠭᠠᠷ᠎ᠢᠶᠠᠷ ᠬᠠᠳᠭᠤᠮᠠᠯᠯᠠᠭ᠍ᠰᠠᠨ ᠤᠷᠠᠨ ᠪᠦᠳᠦᠭᠡᠯ᠎ᠨᠢ ᠦᠵᠡᠭᠦ᠎ᠳᠤ ᠭᠤᠶᠤ᠂ ᠠᠮᠢᠳᠤᠯᠢᠭ᠂ ᠪᠤᠰᠤᠭ᠎ᠠ ᠲᠦᠷᠰᠦᠳᠦ ᠲᠦᠷᠦᠭ᠌ᠳᠡᠯ᠎ᠢ ᠦᠭ᠌ᠳᠡᠭ᠃ ᠤᠷᠴᠢᠮ᠎ᠤᠨ ᠪᠦᠷᠢᠳᠭᠡᠯ᠎ᠢ ᠦᠨᠳᠦᠰᠦᠯᠡᠪᠡᠯ᠂ ᠤᠩᠨᠢᠭᠤᠳ ᠮᠤᠩᠭᠤᠯᠴᠤᠳ᠎ᠲᠤ ᠨᠡᠢᠳᠡ 33 ᠵᠦᠢᠯ᠎ᠤᠨ ᠤᠶᠤᠵᠤ ᠬᠠᠳᠭᠤᠮᠠᠯᠯᠠᠬᠤ ᠠᠷᠭ᠎ᠠ ᠪᠠᠢᠨ᠎ᠠ᠃ ᠬᠤᠸᠠᠷ ᠬᠠᠳᠭᠤᠮᠠᠯᠯᠠᠬᠤ᠎ᠳᠠᠭᠠᠨ ᠤᠩᠨᠢᠭᠤᠳ ᠮᠤᠩᠭᠤᠯ ᠤᠷᠠᠴᠤᠳ ᠪᠦᠰ （ᠲᠤᠷᠭ᠎ᠠ᠂ ᠦᠭᠡᠳᠡᠩ） ᠵᠢᠡᠨ ᠵᠢᠶᠠᠰᠠ ᠳᠡᠭᠡᠷ᠎ᠡ ᠲᠡᠯᠡᠵᠤ ᠳᠠᠳᠠᠵᠤ ᠪᠠᠢᠭᠠᠳ ᠬᠠᠳᠭᠤᠮᠠᠯ ᠬᠠᠳᠭᠤᠮᠠᠯᠯᠠᠳᠠᠭ᠃ ᠡᠨᠡ᠎ᠨᠢ ᠪᠤᠰᠤᠳ ᠭᠠᠵᠠᠷ᠎ᠤᠨ ᠪᠤᠷᠤ ᠮᠠᠲ᠋ᠧᠷᠢᠶᠠᠯ᠎ᠤᠨ᠎ᠢᠶᠠᠨ ᠠᠷᠤ ᠲᠠᠯ᠎ᠠ᠎ᠳᠤ ᠨᠠᠭᠠᠯᠳᠠ ᠲᠦᠷᠭᠢᠵᠤ᠂ ᠴᠠᠭᠠᠰᠤ ᠨᠠᠭᠠᠵᠤ ᠪᠠᠢᠭᠠᠳ ᠬᠠᠳᠭᠤᠮᠠᠯ ᠬᠠᠳᠭᠤᠮᠠᠯᠯᠠᠬᠤ᠎ᠠᠴᠠ ᠬᠤᠯᠠ ᠳᠠᠪᠱᠢᠩᠭᠤᠢ ᠶᠤᠮ᠃   

ᠤᠩᠨᠢᠭᠤᠳ ᠮᠤᠩᠭᠤᠯᠴᠤᠳ ᠤᠯᠠᠩᠭᠢ᠎ᠳᠠᠭᠠᠨ ᠲᠦᠭᠦᠷᠢᠭ ᠮᠦᠷᠦ᠍᠎ᠲᠠᠢ᠂ ᠨᠢᠳᠤᠷᠭ᠎ᠠ ᠦᠭᠡᠢ᠂ ᠪᠡᠯᠴᠢᠩ ᠦᠭᠡᠢ ᠲᠡᠷᠯᠢᠭ ᠲᠡᠪᠡᠯ ᠡᠮᠦᠰᠳᠡᠭ᠃     

ᠰᠤᠶᠤᠯ᠎ᠤᠨ ᠪᠡᠯᠭᠡ ᠲᠡᠮᠳᠡᠭ

ᠤᠩᠨᠢᠭᠤᠳ ᠬᠤᠪᠴᠠᠰᠤ ᠵᠠᠰᠠᠯ᠎ᠤᠨ ᠰᠤᠶᠤᠯ᠎ᠨᠢ ᠤᠷᠳᠤ ᠬᠤᠭᠤᠴᠠᠭᠠᠨ᠎ᠤ ᠭᠦᠭ᠌ᠵᠢᠯᠳᠡ᠎ᠶ᠋ᠢᠨ ᠶᠠᠪᠤᠴᠠ᠎ᠳᠠᠭᠠᠨ ᠦᠪᠡᠷ᠎ᠤᠨ ᠦᠪᠡᠷᠮᠢᠴᠡ ᠤᠨᠴᠠᠯᠢᠭ᠎ᠢᠶᠠᠨ ᠪᠦᠷᠢᠯᠳᠦᠭᠦᠯᠦᠭ᠌ᠰᠡᠨ ᠎ᠢᠶᠠᠷ ᠦᠯᠦ᠍ ᠪᠠᠷᠠᠨ᠂ ᠦᠪᠡᠷ᠎ᠤᠨ ᠰᠤᠶᠤᠯ᠎ᠤᠨ ᠪᠡᠯᠭᠡ ᠲᠡᠮᠳᠡᠭ᠎ᠲᠠᠢ ᠪᠤᠯᠤᠭ᠍ᠰᠠᠨ ᠪᠠᠢᠨ᠎ᠠ᠃    

ᠠᠭᠤᠳᠠᠮᠴᠢ ᠴᠢᠨᠠᠷ᠎ᠲᠠᠢ᠃ ᠤᠩᠨᠢᠭᠤᠳ ᠬᠤᠪᠴᠠᠰᠤ ᠵᠠᠰᠠᠯ ᠤᠯᠠᠮᠵᠢᠯᠠᠯᠳᠤ ᠮᠤᠩᠭᠤᠯ ᠬᠤᠪᠴᠠᠰᠤᠨ᠎ᠤ ᠰᠤᠶᠤᠯ᠎ᠢᠶᠠᠨ ᠵᠠᠯᠭᠠᠮᠵᠢᠯᠠᠵᠤ ᠴᠢᠳᠠᠭ᠍ᠰᠠᠨ ᠪᠦᠭᠡᠳ ᠮᠠᠨᠵᠤ᠂ ᠲᠦᠪᠡᠳ᠂ ᠭᠢᠳᠠᠳ᠂ ᠰᠤᠯᠤᠩᠭᠤᠰ ᠵᠡᠷᠭᠡ ᠤᠯᠠᠨ ᠦᠨᠳᠦᠰᠦᠳᠡᠨ᠎ᠤ ᠬᠤᠪᠴᠠᠰᠤ ᠵᠠᠰᠠᠯ᠎ᠤᠨ ᠤᠷᠠᠯᠠᠯ᠎ᠢ ᠠᠮᠵᠢᠯᠲᠠ᠎ᠲᠠᠢ᠎ᠪᠠᠷ ᠱᠢᠩᠭᠡᠨ ᠠᠪᠴᠤ᠌ ᠴᠢᠳᠠᠵᠠᠢ᠃ ᠡᠭᠦᠯᠡᠨ ᠤᠭᠠᠯᠵᠠ᠂ ᠬᠤᠷᠮᠤᠰᠲᠠ᠎ᠶ᠋ᠢᠨ ᠦᠵᠦᠭ （ᠯᠠᠨᠵᠠ ᠤᠭᠠᠯᠵᠠ）᠂ ᠵᠠᠭᠤᠰᠤᠨ ᠤᠭᠠᠯᠵᠠ᠂ ᠬᠠᠰ ᠲᠠᠮᠠᠭ᠎ᠠ ᠤᠭᠠᠯᠵᠠ᠂ ᠦᠯᠵᠡᠢ ᠵᠠᠩᠭᠢᠶ᠎ᠠ ᠤᠭᠠᠯᠵᠠ᠂ ᠫᠦᠰᠡᠨ ᠤᠭᠠᠯᠵᠠ᠂ ᠪᠠᠭ᠍ᠪᠠᠭᠠᠢ ᠤᠭᠠᠯᠵᠠ᠂ ᠡᠷᠪᠡᠭᠡᠢ ᠤᠭᠠᠯᠵᠠ ᠵᠡᠷᠭᠡ᠎ᠶ᠋ᠢ ᠪᠤᠯ ᠲᠤᠮᠳᠠᠳᠤ᠎ᠶ᠋ᠢᠨ ᠡᠯ᠎ᠡ ᠦᠨᠳᠦᠰᠦᠳᠡᠨ ᠪᠦᠷ ᠨᠡᠢᠳᠡᠮ ᠭᠡᠷᠡᠭ᠌ᠯᠡᠵᠤ ᠪᠠᠢᠳᠠᠭ᠃ ᠡᠳᠡᠭᠡᠷ ᠤᠭᠠᠯᠵᠠ᠎ᠶ᠋ᠢ ᠤᠩᠨᠢᠭᠤᠳ ᠮᠤᠩᠭᠤᠯᠴᠤᠳ᠎ᠤᠤᠵᠢ᠂ ᠲᠡᠷᠯᠢᠭ᠂ ᠭᠤᠳᠤᠯ᠂ ᠱᠠᠬᠠᠢ᠂ ᠱᠢᠭᠤᠲᠠᠢ ᠬᠠᠪᠳᠠᠭ᠎ᠠ᠂ ᠲᠠᠢᠯᠤᠤᠷ（ᠲᠠᠢᠯᠢᠩ）᠂ ᠪᠤᠭ᠍ᠴᠤ ᠵᠡᠷᠭᠡ᠎ᠳᠤ ᠦᠷᠭᠡᠨ᠎ᠢᠶᠠᠷ ᠤᠯᠠᠷᠢᠭᠤᠯᠤᠨ ᠭᠡᠷᠡᠭ᠌ᠯᠡᠵᠤ ᠪᠠᠢᠳᠠᠭ᠃ ᠡᠨᠡ᠎ᠨᠢ ᠤᠩᠨᠢᠭᠤᠳ ᠬᠤᠪᠴᠠᠰᠤ ᠵᠠᠰᠠᠯ᠎ᠤᠨ ᠰᠤᠶᠤᠯ᠎ᠤᠨ ᠠᠭᠤᠳᠠᠮ ᠪᠠᠭ᠍ᠳᠠᠭᠠᠮᠵᠢ᠎ᠲᠠᠢ ᠪᠠᠢᠬᠤ᠎ᠶ᠋ᠢ ᠬᠠᠷᠠᠭᠤᠯᠵᠤ ᠪᠠᠢᠳᠠᠭ᠃    

ᠡᠶ᠎ᠡ ᠵᠤᠭᠢᠴᠠᠯᠳᠤ ᠴᠢᠨᠠᠷ᠎ᠲᠠᠢ᠃ ᠤᠩᠨᠢᠭᠤᠳ ᠮᠤᠩᠭᠤᠯ ᠬᠤᠪᠴᠠᠰᠤ ᠵᠠᠰᠠᠯ᠎ᠤᠨ ᠵᠢᠷᠤᠭ᠎ᠲᠤ ᠠᠭᠤᠯᠠ ᠤᠰᠤ᠂ ᠠᠮᠢᠳᠠᠨ ᠤᠷᠭᠤᠮᠠᠯ᠂ ᠠᠷᠪᠠᠨ ᠬᠤᠶᠠᠷ ᠵᠢᠯ᠎ᠤᠨ ᠠᠮᠢᠳᠠᠨ ᠪᠠ ᠤᠯᠠᠨ ᠠᠷᠪᠢᠨ ᠵᠦᠢᠯ᠎ᠤᠨ ᠭᠡ ᠤᠭᠠᠯᠵᠠ᠎ᠶ᠋ᠢ ᠤᠷᠭᠠᠨᠢᠭ ᠰᠠᠢᠬᠠᠨ ᠵᠢᠷᠤᠵᠤ ᠬᠠᠳᠭᠤᠮᠠᠯᠯᠠᠬᠤ ᠪᠤᠶᠤ ᠰᠡᠢᠯᠡᠭᠦᠷ᠂ ᠤᠷᠢᠶᠠᠮᠠᠯ᠂ ᠨᠠᠭᠠᠮᠠᠯ᠂ ᠭᠠᠮᠠᠯ᠎ᠤᠨ ᠤᠷ᠎ᠠ ᠮᠡᠷᠭᠡᠵᠢᠯ᠎ᠢᠶᠠᠷ ᠤᠷᠠᠯᠠᠨ ᠤᠶᠤᠳᠠᠭ᠃ ᠡᠭᠦᠨ᠎ᠢᠶᠠᠷ ᠲᠠᠮᠵᠢᠭᠤᠯᠵᠤ ᠦᠪᠡᠷ᠎ᠤᠨ ᠡᠭᠡ ᠪᠠᠢᠭᠠᠯᠢ᠎ᠪᠠᠨ ᠱᠢᠳᠦᠵᠤ᠂ ᠪᠠᠢᠭᠠᠯᠢ᠎ᠶ᠋ᠢᠨ ᠡᠪᠡᠰᠦ ᠤᠷᠭᠤᠮᠠᠯ᠂ ᠠᠷᠢᠶᠠᠳᠠᠨ ᠵᠢᠭᠦᠷᠳᠡᠨ ᠎ᠲᠠᠢ ᠡᠶ᠎ᠡ ᠵᠤᠭᠢᠴᠠᠯ᠎ᠲᠠᠢ ᠠᠮᠢᠳᠤᠷᠠᠬᠤ᠎ᠶ᠋ᠢ ᠭᠦᠰᠡᠨ ᠮᠦᠷᠦᠭᠡᠳᠦᠭ᠌ᠰᠡᠨ᠂ ᠨᠤᠳᠤᠭ ᠤᠰᠤ᠎ᠪᠠᠨ ᠬᠠᠢᠷᠠᠯᠠᠵᠤ ᠬᠠᠮᠠᠭᠠᠯᠠᠬᠤ ᠰᠡᠳᠭᠢᠯᠭᠡ᠎ᠪᠠᠨ ᠢᠯᠡᠳᠭᠡᠵᠤ ᠪᠠᠢᠳᠠᠭ᠃    

ᠡᠪ ᠨᠠᠢᠷᠠᠮᠳᠠᠭᠤ ᠴᠢᠨᠠᠷ᠎ᠲᠠᠢ᠃ ᠬᠤᠪᠴᠠᠰᠤ᠂ ᠱᠢᠭᠤᠲᠠᠢ ᠬᠠᠪᠳᠠᠭ᠎ᠠ᠂ ᠲᠠᠢᠯᠤᠤᠷ ᠵᠡᠷᠭᠡ ᠳᠡᠭᠡᠷ᠎ᠡ ᠲᠠᠭ᠍ᠳᠠᠭ᠎ᠠ᠂ ᠪᠤᠭᠤ ᠵᠡᠷᠭᠡ᠎ᠶ᠋ᠢ ᠤᠶᠤᠵᠤ ᠪᠠᠢᠬᠤ᠎ᠨᠢ ᠡᠪ ᠨᠠᠢᠷᠠᠮᠳᠠᠯ᠎ᠢ ᠡᠷᠭᠢᠮᠯᠡᠵᠤ ᠪᠠᠢᠬᠤ ᠰᠡᠳᠭᠢᠯᠭᠡ᠎ᠪᠠᠨ ᠢᠯᠡᠳᠭᠡᠵᠤ ᠪᠠᠢᠬᠤ ᠶᠤᠮ᠃ 

ᠡᠷᠡᠯᠭᠡᠭ ᠪᠠᠭᠠᠳᠤᠷᠯᠢᠭ᠂ ᠬᠠᠳᠠᠨ ᠵᠤᠷᠢᠭ᠍ᠳᠤ ᠴᠢᠨᠠᠷ᠎ᠲᠠᠢ᠃ ᠪᠦᠭᠡᠴᠢᠨ᠎ᠤ ᠲᠤᠤᠬᠤ ᠪᠠ ᠡᠷᠡᠭ᠌ᠲᠠᠢ ᠡᠮᠡᠭ᠌ᠲᠠᠢ᠎ᠶ᠋ᠢᠨ ᠬᠤᠪᠴᠠᠰᠤᠨ ᠲᠡᠭᠡᠷ᠎ᠡ ᠯᠤᠤ ᠭᠠᠷᠤᠳᠠᠢ᠂ ᠲᠦᠷᠪᠡᠨ ᠭᠦᠴᠦᠳᠦ ᠠᠮᠢᠳᠠᠨ ᠵᠡᠷᠭᠡ᠎ᠶ᠋ᠢ ᠤᠷᠠᠯᠠᠨ ᠤᠶᠤᠵᠤ ᠪᠠᠢᠬᠤ᠎ᠨᠢ ᠡᠷᠡᠯᠭᠡᠭ ᠪᠠᠭᠠᠳᠤᠷᠯᠢᠭ᠂ ᠢᠯᠠᠭ᠍ᠳᠠᠰᠢ ᠦᠭᠡᠢ ᠬᠠᠳᠠᠨ ᠵᠤᠷᠢᠭ᠍ᠲᠠᠢ ᠪᠠᠢᠬᠤ᠎ᠶ᠋ᠢ ᠭᠦᠰᠡᠭ᠌ᠰᠡᠨ ᠪᠡᠯᠭᠡ ᠲᠡᠮᠳᠡᠭ ᠶᠤᠮ᠃    

ᠪᠠᠶᠠᠨ ᠴᠢᠨᠡᠭᠡᠯᠢᠭ᠎ᠢ ᠭᠦᠰᠡᠭᠦᠢᠴᠢ ᠴᠢᠨᠠᠷ᠎ᠲᠠᠢ᠃ ᠤᠩᠨᠢᠭᠤᠳ ᠮᠤᠩᠭᠤᠯᠴᠤᠳ ᠬᠤᠪᠴᠠᠰᠤ ᠵᠠᠰᠠᠯ ᠲᠡᠭᠡᠷ᠎ᠡ᠎ᠪᠠᠨ《ᠪᠤᠶᠠᠨ》 《ᠦᠯᠵᠡᠢ》 《ᠪᠠᠶᠠᠨ》 ᠭᠡᠭᠦ᠌ ᠮᠡᠳᠦ ᠦᠰᠦᠭ ᠤᠶᠤᠵᠤ᠂ ᠰᠡᠢᠯᠤᠭᠦᠷ ᠰᠡᠢᠯᠵᠤ ᠤᠶᠤᠬᠤ᠂ ᠨᠠᠭᠠᠮᠠᠯ ᠨᠠᠭᠠᠵᠤ ᠤᠶᠤᠬᠤ ᠪᠤᠶᠤ ᠤᠷᠠᠨ ᠬᠠᠳᠭᠤᠮᠠᠯ ᠬᠠᠳᠭᠤᠮᠠᠯᠯᠠᠵᠤ ᠤᠶᠤᠳᠠᠭ᠃ ᠬᠤᠪᠴᠠᠰᠤ ᠵᠠᠰᠠᠯ ᠳᠡᠭᠡᠷ᠎ᠡ ᠡᠨᠡ ᠮᠡᠳᠦ ᠪᠡᠯᠭᠡᠳᠡᠯ᠎ᠤᠨ ᠴᠢᠨᠠᠷ᠎ᠲᠠᠢ ᠵᠢᠷᠤᠭ ᠲᠦᠷᠰᠦ᠎ᠢ ᠤᠶᠤᠵᠤ ᠪᠠᠢᠭ᠎ᠠ ᠦᠵᠡᠭ᠌ᠳᠡᠯ ᠲᠤᠩ ᠤᠯᠠᠨ ᠪᠠᠢᠳᠠᠭ᠃ 

ᠢᠷᠡᠯᠳᠡ᠄ 《ᠮᠤᠨᠭᠭᠤᠯ ᠰᠤᠳᠤᠯᠤᠯ᠎ᠤᠨ ᠨᠡᠪᠳᠡᠷᠬᠡᠢ ᠳᠤᠯᠢ》 

ᠨᠠᠮᠲᠠᠢᠰᠦᠢ᠍ᠷᠦᠩ ᠎ᠤᠨ 《ᠤᠨᠭᠨᠢᠭᠤᠳ ᠮᠤᠨᠭᠭᠤᠯ ᠬᠤᠪᠴᠠᠰᠦ ᠵᠠᠰᠠᠯ᠎ᠤᠨ ᠳᠤᠬᠠᠢ》 ᠬᠡᠬᠦ ᠵᠤᠬᠢᠶᠡᠯ

ᠡᠮᠬᠢᠯᠡᠭᠴᠢ᠄ ᠦᠨᠡᠨᠵᠢᠷᠭᠠᠯ