ᠬᠦᠬᠡᠬᠣᠲᠠ᠎ᠶᠢᠨ ᠴᠠᠰᠣ ᠬᠦᠪ ᠬᠦᠩᠭᠡᠭᠡᠨ ᠬᠠᠶᠠᠯᠠᠨ᠎ᠠ

ᠬᠦᠰᠡᠯ᠎ᠤᠨ ᠬᠢᠵᠠᠭᠠᠷ ᠡᠴᠡ ᠪᠦᠵᠢᠬᠦ ᠴᠡᠴᠡᠭᠡᠰ ᠰᠢᠭ ᠨᠠᠮᠢᠷᠠᠨ᠎ᠠ

ᠲᠠᠯᠠᠨ ᠬᠠᠷ᠎ᠠ ᠠᠭᠣᠯᠠ᠎ᠶᠢᠨ ᠮᠦᠩᠬᠦᠨ ᠵᠣᠲᠣᠬ ᠨᠢ ᠬᠢᠯᠠᠯᠵᠠᠭᠠᠳ

ᠲᠡᠯᠡᠬᠡᠢ ᠶᠢᠷᠲᠢᠨᠴᠦ ᠰᠢᠨᠡᠲᠦᠭᠰᠡᠨ ᠮᠡᠲᠦ ᠴᠠᠪ ᠴᠠᠭᠠᠨ

ᠬᠦᠬᠡᠬᠣᠲᠠ᠎ᠶᠢᠨ ᠴᠠᠰᠣ ᠠᠶᠠᠷ ᠠᠶᠠᠷᠬᠠᠨ ᠪᠠᠭᠣᠨ᠎ᠠ

ᠬᠦᠪᠦᠩ ᠣᠩᠭᠠᠷᠢᠯ ᠦᠷᠦᠵᠦ ᠬᠠᠰ᠎ᠤᠨ ᠬᠡᠮᠬᠡᠳᠡᠭ ᠰᠢᠭ ᠯᠠᠪᠰᠠᠨ᠎ᠠ

ᠬᠦᠢᠲᠡᠨ ᠠᠭᠣᠷ ᠰᠠᠪᠰᠠᠭᠣᠯᠣᠨ ᠣᠯᠠᠷᠢᠯ᠎ᠤᠨ ᠵᠢᠰᠦ᠎ᠶᠢ ᠭᠠᠢᠬᠠᠭᠣᠯᠵᠦ

ᠬᠦᠭᠡᠭᠡ ᠡᠪᠦᠯ᠎ᠤᠨ ᠰᠣᠷᠠᠬ ᠲᠠᠮᠵᠢᠭᠣᠯᠣᠨ ᠢᠷᠦᠭᠡᠯ ᠪᠣᠯᠵᠦ ᠲᠡᠯᠭᠡᠷᠡᠨ᠎ᠡ

ᠬᠦᠬᠡᠬᠣᠲᠠ᠎ᠶᠢᠨ ᠴᠠᠰᠣ ᠨᠠᠮ ᠨᠠᠮᠣᠭᠣᠬᠠᠨ ᠣᠷᠣᠨ᠎ᠠ

ᠬᠦᠨᠲᠡᠯᠡᠨ᠎ᠤ ᠭᠠᠵᠠᠷ ᠲᠦ᠍ ᠨᠣᠲᠣᠬ ᠰᠠᠨᠠᠬᠲᠠᠭᠣᠯᠵᠦ ᠣᠢᠮᠣᠷᠠᠨ᠎ᠠ

ᠮᠢᠩᠭᠠᠨ ᠴᠠᠭᠠᠨ ᠡᠷᠪᠡᠬᠡᠢ ᠡᠬᠦᠯᠡᠨ ᠡᠴᠡ ᠲᠣᠷᠣᠬᠰᠢ ᠨᠢᠰᠴᠦ

ᠮᠦᠩᠬᠦᠨ ᠴᠠᠭᠠᠨ ᠢᠰᠡᠭᠡᠢ ᠡᠬᠦᠲᠡᠨ ᠡᠴᠡ ᠴᠢᠨᠠᠬᠰᠢ ᠲᠡᠯᠭᠡᠨ᠎ᠡ

ᠬᠦᠬᠡᠬᠣᠲᠠ᠎ᠶᠢᠨ ᠴᠠᠰᠣ ᠴᠢᠮᠡᠬᠡ ᠦᠭᠡᠢᠬᠡᠨ ᠪᠣᠲᠠᠷᠠᠨ᠎ᠠ

ᠬᠦᠷᠦᠰᠦᠨ᠎ᠤ ᠬᠦᠨ ᠳ᠋ᠦ ᠰᠢᠮᠡᠲᠦᠨ ᠣᠰᠣ ᠪᠣᠯᠵᠦ ᠦᠷᠬᠦᠯᠵᠢᠯᠡᠨ᠎ᠡ

ᠬᠦᠬᠡᠷᠡᠬᠦ ᠬᠠᠪᠣᠷ᠎ᠢ ᠣᠬᠲᠣᠨ ᠲᠦᠮᠡᠨ ᠦᠩᠭᠡ ᠪᠡᠷ ᠴᠡᠴᠡᠭᠯᠡᠬᠦ

ᠬᠦᠪᠦᠩ ᠰᠢᠭ ᠵᠦᠭᠡᠯᠡᠨ ᠴᠠᠰᠣ ᠯᠠᠪᠰᠠᠯᠠᠨ ᠬᠠᠶᠠᠯᠠᠨ᠎ᠠ