ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠥᠪᠡᠷᠲᠡᠭᠡᠨ ᠵᠠᠰᠠᠬᠤ ᠣᠷᠣᠨ ᠤ᠋ ᠲᠡᠦᠬᠡ ᠶ᠋ᠢᠨ ᠳᠤᠷᠠᠰᠭᠠᠯᠲᠤ ᠵᠦᠶ᠋ᠯ ᠬᠠᠭᠤᠴᠢ ᠰᠤᠳᠤᠯᠤᠯ ᠤ᠋ᠨ ᠬᠦᠷᠢᠶᠡᠯᠡᠩ 2025 ᠣᠨ ᠳ᠋ᠦ ᠶᠤᠸᠠᠨ ᠤ᠋ ᠳᠡᠭᠡᠳᠦ ᠨᠡᠢᠰᠯᠡᠯ ᠤ᠋ᠨ ᠪᠠᠭᠤᠷᠢ ᠶ᠋ᠢᠨ ᠬᠠᠭᠤᠴᠢ ᠰᠤᠳᠤᠯᠤᠯ ᠤ᠋ᠨ ᠠᠭᠤᠳᠠᠯᠤᠨ ᠮᠠᠯᠲᠠᠬᠤ ᠠᠵᠢᠯ ᠢ᠋ ᠳᠠᠬᠢᠨ ᠡᠬᠢᠯᠡᠭᠦᠯᠵᠦ᠍᠂ ᠶᠤᠸᠠᠨ ᠤ᠋ ᠳᠡᠭᠡᠳᠦ ᠨᠡᠢᠰᠯᠡᠯ ᠤ᠋ᠨ ᠳ᠋ᠠ ᠯᠦᠩ ᠭᠤᠸᠠᠩ ᠬᠤᠸᠠ ᠶᠠᠨ ᠰᠧᠬᠡᠢᠳ ᠤ᠋ᠨ ᠪᠠᠭᠤᠷᠢ ᠵᠢ ᠠᠭᠤᠳᠠᠯᠤᠨ ᠮᠠᠯᠲᠠᠭᠠᠳ ᠴᠢᠬᠤᠯᠠ ᠦᠷᠡ ᠪᠦᠲᠦᠮᠵᠢ ᠤᠯᠵᠠᠢ᠃
ᠡᠨᠡ ᠤᠳᠠᠭᠠ ᠵᠢᠨ ᠬᠠᠭᠤᠴᠢ ᠰᠤᠳᠤᠯᠤᠯ ᠤ᠋ᠨ ᠠᠭᠤᠳᠠᠯᠤᠨ ᠮᠠᠯᠳᠠᠯᠳᠠ ᠬᠢᠭ᠌ᠰᠡᠨ ᠳ᠋ᠠ ᠯᠦᠩ ᠭᠤᠸᠠᠩ ᠬᠤᠸᠠ ᠶᠠᠨ ᠰᠧ ᠬᠡᠢᠳ ᠤ᠋ᠨ ᠪᠠᠭᠤᠷᠢ ᠨᠢ ᠶᠤᠸᠠᠨ ᠤ᠋ ᠳᠡᠭᠡᠳᠦ ᠨᠡᠢᠰᠯᠡᠯ ᠤ᠋ᠨ ᠬᠠᠭᠠᠨ ᠤ᠋ ᠬᠣᠲᠠ ᠶ᠋ᠢᠨ ᠵᠡᠭᠦᠨ ᠬᠣᠢᠲᠤ ᠥᠨᠴᠥᠭ ᠲᠦ᠍ ᠪᠠᠢᠷᠢᠯᠠᠵᠤ᠂ ᠣᠷᠳᠣ ᠳᠥᠷᠪᠡᠯᠵᠢᠨ ᠬᠡᠯᠪᠡᠷᠢᠲᠡᠶ᠂ ᠭᠤᠷᠪᠠᠨ ᠳᠠᠪᠬᠤᠷ ᠬᠦᠷᠢᠶᠡ ᠲᠡᠶ ᠶᠤᠮ᠃ 2025 ᠤᠨ ᠳ᠋ᠤ ᠭᠣᠣᠯᠳᠠᠭᠤ ᠳᠤᠮᠳᠠ ᠬᠦᠷᠢᠶᠨᠯᠡᠩ ᠤ᠋ᠨ ᠲᠣᠮᠣ ᠬᠡᠯᠪᠡᠷᠢ ᠶ᠋ᠢᠨ ᠪᠠᠷᠢᠯᠭᠠ ᠶ᠋ᠢᠨ ᠰᠠᠭᠤᠷᠢ ᠭᠠᠵᠠᠷ ᠢ᠋ ᠠᠭᠤᠳᠠᠯᠤᠨ ᠮᠠᠯᠲᠠᠵᠤ᠂ ᠤᠯᠳᠠᠭᠰᠠᠨ ᠪᠣᠳᠠᠰ ᠨᠢ ᠭᠣᠣᠯᠳᠠᠭᠤ ᠰᠠᠭᠤᠷᠢ ᠳᠡᠭᠡᠷᠡ ᠨᠤᠷᠠᠵᠤ ᠣᠪᠣᠭᠠᠷᠠᠭ᠍ᠰᠠᠨ ᠪᠠᠷᠢᠯᠭᠠ ᠶ᠋ᠢᠨ ᠮᠠᠲ᠋ᠧᠷᠢᠶᠠᠯ ᠤ᠋ᠳ ᠪᠣᠯᠤᠨᠠ᠃ ᠡᠬᠦᠨ ᠳ᠋ᠤ ᠸᠠᠭᠠᠷ᠂ ᠲᠤᠰᠬᠤᠭᠤᠷ ᠸᠠᠭᠠᠷ᠂ ᠤᠨᠵᠢᠬᠢᠷ ᠸᠠᠭᠠᠷ᠂ ᠲᠣᠭᠣᠰᠭᠠ᠂ ᠴᠢᠯᠠᠭᠤᠨ ᠯᠤᠤ ᠶ᠋ᠢᠨ ᠲᠡᠷᠢᠬᠦᠨ᠂ ᠬᠡᠷᠡᠰᠭᠡ ᠵᠡᠷᠭᠡ ᠡᠳ᠋ ᠪᠠᠢᠵᠦ᠂ ᠣᠯᠠᠩᠬᠢ ᠸᠠᠭᠠᠷ ᠨᠢ ᠫᠠᠯᠠᠩ ᠲᠠᠢ ᠸᠠᠭᠠᠷ᠂ ᠲᠤᠰᠬᠤᠭᠤᠷ ᠸᠠᠭᠠᠷ ᠪᠠᠢᠵᠤ᠂ ᠤᠨᠵᠢᠬᠢᠷ ᠸᠠᠭᠠᠷ ᠤ᠋ᠨ ᠬᠡ ᠨᠢ ᠯᠤᠤ ᠶ᠋ᠢᠨ ᠬᠡ ᠪᠡᠷ ᠭᠤᠤᠯᠯᠠᠵᠤ᠂ ᠭᠠᠷᠤᠳᠢ ᠶ᠋ᠢᠨ ᠬᠡᠪᠠᠭᠳᠠᠵᠠᠢ᠃ ᠪᠤᠰᠤᠳ ᠦᠯᠡᠳᠡᠭ᠌ᠳᠡᠯ ᠪᠣᠳᠠᠰ ᠳᠣᠲᠣᠷᠠ ᠶᠡᠬᠡ ᠬᠡᠮᠵᠢᠶᠡᠨᠦ ᠱᠤᠭᠤᠮᠠᠯ ᠰᠡᠢᠯᠦᠮᠡᠯ ᠤ᠋ᠨ ᠦᠯᠡᠳᠡᠭᠳᠡᠯ ᠪᠠᠢᠵᠦ᠂ ᠬᠠᠭᠤᠴᠢ ᠰᠤᠳᠤᠯᠭᠠᠳᠠᠳ ᠤ᠋ᠨ ᠲᠠᠭᠠᠮᠠᠭᠯᠠᠬᠤ ᠪᠡᠷ ᠡᠨᠡ ᠨᠢ ᠪᠠᠷᠢᠯᠭᠠ ᠪᠤᠶᠤ ᠪᠤᠷᠬᠠᠨ ᠤ᠋ ᠬᠦᠷᠦᠭ ᠤ᠋ᠨ ᠴᠢᠮᠡᠭ᠌ᠯᠡᠯ ᠤ᠋ᠨ ᠡᠳ᠋ ᠪᠠᠢᠬᠤ ᠪᠤᠯᠤᠯᠴᠠᠭᠠ ᠲᠠᠢ᠃
ᠶᠤᠸᠠᠨ ᠤ᠋ ᠳᠡᠭᠡᠳᠦ ᠨᠡᠢᠰᠯᠡᠯ ᠤ᠋ᠨ ᠪᠠᠭᠤᠷᠢ ᠱᠢᠯᠢ ᠶ᠋ᠢᠨ ᠭᠣᠣᠯ ᠠᠢᠮᠠᠭ ᠤ᠋ᠨ ᠱᠢᠯᠤᠭᠤᠨ ᠬᠦᠬᠡ ᠬᠣᠱᠢᠭᠤᠨ ᠳ᠋ᠦ ᠪᠠᠢᠷᠢᠯᠠᠵᠤ᠂ 2012 ᠣᠨ ᠳ᠋ᠦ ᠳᠡᠯᠡᠬᠡᠢ ᠶ᠋ᠢᠨ ᠥᠪ ᠤ᠋ᠨ ᠨᠡᠷᠡᠰ ᠲᠦ᠍ ᠵᠢᠭ᠍ᠰᠠᠭᠠᠭ᠍ᠳᠠᠵᠠᠢ᠃ ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠲᠡᠦᠬᠡ ᠶ᠋ᠢᠨ ᠳᠤᠷᠠᠰᠭᠠᠯᠲᠤ ᠵᠦᠶ᠋ᠯ ᠬᠠᠭᠤᠴᠢ ᠰᠤᠳᠤᠯᠤᠯ ᠤ᠋ᠨ ᠬᠦᠷᠢᠶᠡᠯᠡᠩ ᠤ᠋ᠨ ᠳᠡᠳ᠋ ᠳᠠᠷᠤᠭᠠ ᠰᠥᠩ ᠭᠦᠸᠧ ᠳ᠋ᠦᠩ ᠤ᠋ᠨ ᠲᠠᠨᠢᠯᠴᠠᠭᠤᠯᠤᠭ᠍ᠰᠠᠨ ᠢ᠋ᠶ᠋ᠠᠷ᠂ ᠳ᠋ᠠ ᠯᠦᠩ ᠭᠤᠸᠠᠩ ᠬᠤᠸᠠ ᠶᠠᠨ ᠰᠧᠬᠡᠢᠳ ᠤ᠋ᠨ ᠪᠠᠭᠤᠷᠢ ᠪᠤᠯ ᠶᠤᠸᠠᠨ ᠤ᠋ ᠳᠡᠭᠡᠳᠦ ᠨᠡᠢᠰᠯᠡᠯ ᠤ᠋ᠨ ᠬᠠᠭᠠᠨ ᠤ᠋ ᠬᠣᠲᠠ ᠶ᠋ᠢᠨ ᠳᠣᠲᠣᠷᠠᠬᠢ ᠬᠡᠪᠴᠢᠶᠡ ᠪᠡᠷ ᠨᠡᠯᠢᠶᠡᠳ ᠶᠡᠬᠡ᠂ ᠨᠡᠯᠢᠶᠡᠳ ᠥᠨᠳᠥᠷ ᠪᠠᠷᠢᠯᠭᠠ ᠶ᠋ᠢᠨ ᠰᠠᠭᠤᠷᠢ ᠶ᠋ᠢᠨ ᠨᠢᠭᠡ ᠪᠤᠯᠤᠨᠠ᠃ ᠪᠠᠷᠢᠯᠭᠠ ᠶ᠋ᠢᠨ ᠪᠠᠢᠷᠢᠱᠢᠭᠤᠯᠤᠯᠲᠠ ᠪᠠ ᠭᠠᠷ ᠤᠷᠠᠯᠠᠯ ᠤ᠋ᠨ ᠮᠡᠷᠭᠡᠵᠢᠯ ᠤ᠋ᠨ ᠲᠠᠯᠠ ᠪᠠᠷ ᠲᠠᠩ ᠤᠯᠤᠰ ᠰᠦᠩ ᠤᠯᠤᠰ ᠡᠴᠡ ᠨᠠᠭᠠᠱᠢᠬᠢ ᠱᠢᠷᠣᠶ ᠮᠣᠳᠣᠨ ᠤ᠋ ᠪᠠᠷᠢᠯᠭᠠ ᠶ᠋ᠢᠨ ᠤᠯᠠᠮᠵᠢᠯᠠᠯ ᠢ᠋ ᠵᠠᠯᠭᠠᠮᠵᠢᠯᠠᠵᠦ᠂ ᠮᠠᠯᠲᠠᠵᠤ ᠭᠠᠷᠭᠠᠭ᠍ᠰᠠᠨ ᠸᠠᠭᠠᠷ ᠤ᠋ᠨ ᠯᠤᠤ ᠶ᠋ᠢᠨ ᠬᠡ ᠤᠭᠠᠯᠵᠠ᠂ ᠭᠠᠷᠤᠳᠢ ᠶ᠋ᠢᠨ ᠬᠡ ᠤᠭᠠᠯᠵᠠ ᠵᠡᠷᠭᠡ ᠴᠢᠮᠡᠭ᠌ᠯᠡᠯ ᠤ᠋ᠨ ᠰᠡᠳᠦᠪᠯᠡᠬᠦᠨ ᠨᠢ ᠴᠥᠮ ᠳᠤᠮᠳᠠᠳᠤ ᠣᠷᠣᠨ ᠤ᠋ ᠰᠣᠶᠣᠯ ᠤ᠋ᠨ ᠱᠢᠰᠲ᠋ᠧᠮ ᠡᠴᠡ ᠢᠷᠡᠯᠲᠡ ᠲᠡᠶ ᠪᠠᠢᠵᠤ᠂ ᠶᠤᠸᠠᠨ ᠤᠯᠤᠰ ᠤ᠋ᠨ ᠳᠡᠭᠡᠳᠦ ᠲᠠᠰ ᠤ᠋ᠨ ᠱᠠᠱᠢᠨ ᠰᠤᠷᠲᠠᠬᠤᠨ ᠤ᠋ ᠪᠠᠷᠢᠯᠭᠠ ᠪᠠ ᠤᠷᠳᠤᠨ ᠤ᠋ ᠪᠠᠷᠢᠯᠭᠠ ᠶ᠋ᠢᠨ ᠲᠦᠷᠢᠮ ᠢ᠋ ᠭᠦᠨᠵᠡᠭᠡᠶ ᠰᠤᠳᠤᠯᠬᠤ ᠳ᠋ᠦ ᠬᠠᠭᠤᠴᠢ ᠰᠤᠳᠤᠯᠤᠯ ᠤ᠋ᠨ ᠴᠢᠬᠤᠯᠠ ᠦᠨᠳᠦᠰᠦᠯᠡᠯ ᠬᠠᠩᠭᠠᠵᠠᠢ᠃