ᠡᠪᠦᠭᠡ᠎ᠶ᠋ᠢᠨ ᠬᠠᠢᠯᠠᠳᠠᠭ ᠲᠤᠤᠯᠢ᠎ᠶ᠋ᠢᠨ ᠪᠠᠭᠠᠲᠤᠷ ᠱᠢᠭ᠋

ᠡᠪᠦᠯ᠎ᠤᠨ 《ᠮᠠᠩᠭᠤᠰ》 ᠎ᠢ᠋ ᠳᠠᠷᠤᠭᠠᠳ ᠢᠷᠡᠳᠡᠭ

ᠡᠮᠡᠭᠡ᠎ᠶ᠋ᠢᠨ ᠬᠡᠯᠡᠳᠡᠭ ᠦᠯᠢᠭᠡᠷ᠎ᠤᠨ ᠳᠠᠭᠢᠨᠢ ᠱᠢᠭ᠋

ᠦᠩᠭᠡ᠎ᠶ᠋ᠢᠨ ᠴᠡᠴᠡᠭ᠎ᠢᠶᠠᠨ ᠰᠠᠴᠤᠭᠠᠳ ᠢᠷᠡᠳᠡᠭ

ᠠᠪᠤ᠎ᠶ᠋ᠢᠨ ᠰᠤᠷᠭᠠᠭ᠍ᠰᠠᠨ ᠠᠷᠭᠤᠮᠠᠭ ᠬᠦᠯᠦᠭ ᠱᠢᠭ

ᠠᠯᠤᠰ᠎ᠬᠤᠯᠠ᠎ᠶ᠋ᠢ ᠲᠤᠪᠴᠢᠯᠠᠭᠠᠳ ᠢᠷᠡᠳᠡᠭ

ᠡᠵᠢ᠎ᠶ᠋ᠢᠨ ᠠᠶᠠᠯᠤᠭᠰᠠᠨ ᠪᠦᠪᠡᠢ᠎ᠶ᠋ᠢᠨ ᠡᠭᠡᠰᠢᠭ ᠰᠢᠭ

ᠤᠷᠴᠢᠯᠠᠩ᠎ᠤᠨ ᠵᠤᠯᠠᠢ᠎ᠶ᠋ᠢ ᠢᠯᠪᠢᠭᠡᠳ ᠢᠷᠡᠳᠡᠭ

ᠤᠷᠳᠤ᠎ᠶ᠋ᠢᠨ ᠲᠠᠭᠤᠤ ᠵᠢᠨ ᠠᠭᠤᠳᠠᠮ ᠱᠢᠷᠤᠩᠬᠠᠢ ᠱᠢᠭ᠋

ᠤᠭ᠍ᠲᠠᠷᠭᠤᠢ᠎ᠶ᠋ᠢᠨ ᠮᠠᠨᠳᠠᠯ᠎ᠢ ᠴᠡᠯᠮᠡᠭᠡᠳ ᠢᠷᠡᠳᠡᠭ

ᠮᠤᠷᠢᠨ ᠬᠤᠭᠤᠷ᠎ᠤᠨ ᠬᠢᠯᠭᠠᠰᠤᠨ ᠴᠢᠪᠬᠠᠳᠠᠰᠤ ᠱᠢᠭ᠋

ᠮᠦᠷᠡᠨ ᠭᠤᠤᠯ᠎ᠢ ᠴᠢᠪᠬᠠᠳᠠᠭᠠᠳ ᠢᠷᠡᠳᠡᠭ

ᠱᠠᠭ᠎ᠠ ᠬᠠᠶᠠᠯᠴᠠᠭ᠍ᠰᠠᠨ ᠬᠡᠦᠬᠡᠳ᠎ᠤᠨ ᠮᠦᠷᠦᠢ ᠱᠢᠭ

ᠱᠠᠩᠲᠤ ᠪᠤᠯᠠᠭ᠎ᠢ ᠱᠤᠤᠭᠢᠭᠤᠯᠤᠭᠠᠳ ᠢᠷᠡᠳᠡᠭ

ᠱᠤᠩ ᠡᠷᠭᠢᠯᠳᠦᠭ᠌ᠰᠡᠨ ᠱᠠᠭᠠᠵᠠᠭᠠᠢ᠎ᠶ᠋ᠢᠨ ᠱᠠᠭ᠍ᠰᠢᠯ ᠱᠢᠭ᠋

ᠰᠠᠢᠨ᠎ᠤ ᠢᠷᠦᠭᠡᠯ᠎ᠢ ᠪᠡᠯᠭᠡᠱᠢᠶᠡᠭᠡᠳ ᠢᠷᠡᠳᠡᠭ

ᠤᠰᠤᠨ᠎ᠳᠤ ᠶᠠᠪᠤᠭ᠍ᠰᠠᠨ ᠪᠦᠰᠡᠭᠦᠢ᠎ᠶ᠋ᠢᠨ ᠠᠯᠴᠢᠭᠤᠷ ᠱᠢᠭ᠋

ᠤᠬᠠᠭᠠᠨ ᠪᠤᠳᠤᠯ᠎ᠢ ᠳᠡᠷᠪᠡᠭᠦᠯᠦᠭᠡᠳ ᠢᠷᠡᠳᠡᠭ

ᠤᠷᠭ᠎ᠠ ᠲᠤᠯᠤᠭ᠍ᠰᠠᠨ ᠠᠳᠤᠭᠤᠴᠢᠨ᠎ᠤ ᠢᠰᠭᠡᠷᠦᠭᠡ ᠱᠢᠭ

ᠤᠷᠮ᠎ᠠ ᠵᠤᠷᠢᠭ᠎ᠢ ᠰᠡᠷᠭᠦᠭᠡᠭᠡᠳ ᠢᠷᠡᠳᠡᠭ

ᠬᠦᠷᠦᠭᠡᠳ ᠢᠷᠡᠳᠡᠭ ᠬᠠᠪᠤᠷ

ᠬᠦᠷ ᠨᠠᠢᠷ᠎ᠤᠨ ᠠᠶᠠᠯᠭᠤ᠎ᠲᠠᠢ

ᠬᠦᠮᠦᠨ ᠵᠤᠨ᠎ᠤ ᠰᠡᠳᠭᠢᠯ

ᠬᠦᠰᠡᠯ ᠮᠦᠷᠦᠭᠡᠳᠦᠯ᠎ᠤᠨ ᠠᠮᠲᠠ᠎ᠲᠠᠢ

ᠬᠦᠷᠦᠭᠡᠳ ᠢᠷᠡᠳᠡᠭ ᠬᠠᠪᠤᠷ

ᠬᠡᠢᠮᠤᠷᠢ ᠰᠦᠯᠳᠠ᠎ᠶ᠋ᠢᠨ ᠬᠤᠷᠤᠢ᠎ᠲᠠᠢ

ᠬᠦᠵᠢ ᠳᠡᠯᠡᠬᠡᠢ ᠪᠦᠭᠦᠳᠡ᠎ᠪᠠᠷ᠎ᠢᠶᠠᠨ

ᠬᠦᠭ᠌ᠵᠢᠯ ᠪᠠᠳᠠᠷᠠᠯ᠎ᠤᠨ ᠤᠷᠠᠢ᠎ᠲᠠᠢ