ᠰᠡᠳᠭᠢᠯ ᠳ᠋ᠤ ᠮᠢᠨᠢ ᠨᠠᠷᠠ ᠲᠤᠶᠠᠭᠠᠷᠠᠭᠠᠳ
ᠪᠢ ᠨᠠᠷᠠᠨ ᠤ᠋ ᠰᠠᠳᠤᠨ
ᠬᠡᠷᠡᠯᠳᠦᠭ᠌ᠰᠡᠭᠡᠷ ᠪᠠᠢᠬᠤ ᠪᠣᠯᠣᠨᠠ
ᠰᠡᠳᠭᠢᠯ ᠳ᠋ᠤ ᠮᠢᠨᠢ ᠪᠣᠯᠣᠷ ᠲᠤᠩᠭᠠᠯᠠᠭ ᠤᠰᠤ ᠤᠷᠤᠰᠤᠭᠠᠳ
ᠪᠢ ᠤᠰᠤᠨ ᠤ᠋ ᠰᠠᠳᠤᠨ
ᠲᠤᠩᠭᠠᠯᠠᠭ ᠪᠠᠢᠬᠤ ᠪᠣᠯᠣᠨᠠ
ᠰᠡᠳᠭᠢᠯ ᠳ᠋ᠤ ᠮᠢᠨᠢ ᠰᠡᠪᠱᠢᠶᠡ ᠵᠥᠭᠡᠯᠡᠨ ᠰᠠᠯᠬᠢ ᠰᠡᠪᠢᠯᠵᠡᠭᠡᠳ
ᠪᠢ ᠰᠠᠯᠬᠢᠨ ᠤ᠋ ᠰᠠᠳᠤᠨ
ᠳᠤᠷᠠ ᠪᠠᠷ ᠶ᠋ᠢᠡᠨ ᠪᠠᠢᠬᠤ ᠪᠣᠯᠣᠨᠠ
ᠰᠡᠳᠭᠢᠯ ᠳ᠋ᠤ ᠮᠢᠨᠢ ᠪᠡᠯᠴᠢᠷ ᠬᠡᠦᠬᠡᠳ ᠲᠣᠭ᠍ᠯᠠᠭᠠᠳ
ᠪᠢ ᠶᠢᠷᠲᠢᠨᠴᠦ᠍ᠶᠢᠨ ᠰᠠᠳᠤᠨ
ᠳᠡᠯᠭᠡᠷᠡᠭ᠌ᠰᠡᠭᠡᠷ ᠪᠠᠢᠬᠤ ᠪᠣᠯᠣᠨᠠ
ᠰᠡᠳᠭᠢᠯ ᠳ᠋ᠤ ᠮᠢᠨᠢ ᠬᠤᠨ ᠴᠢᠨ ᠭᠠᠩᠭᠠᠨᠠᠯᠳᠤᠭᠠᠳ
ᠪᠢ ᠱᠢᠪᠠᠭᠤᠨ ᠤ᠋ ᠰᠠᠳᠤᠨ
ᠳᠠᠭᠤᠯᠠᠭ᠍ᠰᠠᠭᠠᠷ ᠪᠠᠢᠬᠤ ᠪᠣᠯᠣᠨᠠ
ᠰᠡᠳᠭᠢᠯ ᠳ᠋ᠤ ᠮᠢᠨᠢ ᠭᠠᠩᠭᠠᠩ ᠤᠯᠠᠭᠠᠨ ᠲᠡᠮᠡᠭᠡ ᠠᠯᠬᠤᠭᠠᠳ
ᠪᠢ ᠠᠮᠤᠷ ᠠᠮᠤᠭᠤᠯᠠᠩ ᠤ᠋ᠨ ᠰᠠᠳᠤᠨ
ᠵᠤᠯᠠ ᠬᠡᠷᠡᠯᠳᠦᠭ᠌ᠰᠡᠭᠡᠷ ᠪᠠᠢᠬᠤ ᠪᠣᠯᠣᠨᠠ
ᠰᠡᠳᠭᠢᠯ ᠳ᠋ᠤ ᠮᠢᠨᠢ ᠳᠡᠯᠡᠬᠡᠢ ᠪᠠᠭ᠍ᠲᠠᠭᠠᠳ
ᠠᠭᠠᠯᠵᠢᠶᠢᠨ ᠬᠤᠷᠢᠮ ᠳ᠋ᠤ ᠰᠣᠭ᠍ᠲᠣᠬᠤ ᠪᠣᠯᠣᠨᠠ
ᠡᠪᠡᠰᠦᠨ ᠤ᠋ ᠦᠨᠦᠷ ᠲᠤ᠌ ᠳᠣᠭ᠍ᠳᠣᠯᠬᠤ ᠪᠣᠯᠣᠨᠠ
ᠪᠣᠷᠣᠭᠠᠨ ᠤ᠋ ᠠᠨᠢᠷ ᠲᠤ᠌ ᠤᠬᠢᠯᠠᠬᠤ ᠪᠣᠯᠣᠨᠠ
ᠪᠢ ᠪᠥᠮᠪᠥᠷᠴᠡᠭ ᠤ᠋ᠨ ᠰᠠᠳᠤᠨ
ᠪᠦᠷᠭᠦᠳ ᠮᠡᠲᠦ ᠬᠦᠴᠦᠷᠬᠡᠭ ᠪᠠᠢᠬᠤ ᠪᠣᠯᠣᠨᠠ