— ᠤᠯᠠᠭᠠᠨ ᠮᠤᠷᠢᠨ ᠵᠢᠯᠤᠨ ᠴᠠᠭᠠᠨ ᠰᠠᠷᠠᠳᠤ ᠵᠤᠷᠢᠭᠤᠯᠤᠭᠰᠠᠨ ᠤᠨᠴᠠ ᠤᠬᠠᠭᠠᠯᠠᠯ （ᠳᠤᠯᠤᠭᠠ）
ᠮᠤᠷᠢ ᠬᠦᠮᠦᠨ ᠲᠦᠷᠦᠯᠬᠢᠳᠡᠨᠤ ᠰᠤᠶᠤᠯ ᠪᠤᠯᠪᠠᠰᠤᠨᠤ ᠨᠢᠭᠡ ᠭᠡᠰᠡᠭ ᠪᠤᠯᠤᠭᠰᠠᠨᠤ ᠨᠢᠭᠡᠨ ᠪᠤᠳᠠᠳᠤ ᠵᠢᠱ᠌ᠢᠶᠡ ᠨᠢ ᠠᠳᠤᠭᠤᠨ ᠴᠡᠩᠭᠡᠬᠦᠨ ᠪᠤᠯᠤᠨᠠ᠃ ᠠᠳᠤᠭᠤ ᠵᠢ ᠠᠮᠢᠳᠤᠷᠠᠯᠤᠨ ᠵᠢᠡᠨ ᠦᠨᠳᠦᠰᠦᠨ ᠵᠦᠢᠯᠢ ᠬᠠᠩᠭᠠᠬᠤ ᠠᠰᠢᠬ ᠰᠢᠮᠠ ᠵᠢ ᠡᠳ᠋ᠯᠡᠵᠦ ᠪᠠᠢᠭᠰᠠᠨ ᠡᠴᠡ ᠪᠠᠨ ᠤᠨᠤᠵᠦ᠂ ᠲᠡᠷᠭᠡᠨᠳᠤ ᠬᠦᠯᠵᠦ᠂ ᠠᠨᠵᠢᠰᠤᠨᠳᠤ ᠬᠦᠯᠵᠦ᠂ ᠦᠢᠯᠡᠳᠪᠦᠷᠢᠯᠡᠯᠳᠡᠭᠡᠨ ᠭᠡᠷᠡᠭᠯᠡᠵᠦ ᠡᠬᠢᠯᠡᠭᠰᠡᠨ ᠪᠦᠭᠡᠳ ᠤᠳᠠᠯ ᠦᠭᠡᠢ ᠭᠠᠵᠠᠷ ᠨᠤᠲᠤᠭ ᠵᠢᠡᠨ ᠬᠠᠮᠠᠭᠠᠯᠠᠬᠤ᠂ ᠦᠷᠭᠡᠳᠭᠡᠬᠦ ᠵᠡᠷᠭᠡ ᠲᠠᠢᠨ ᠪᠠᠢᠯᠳᠤᠭᠠᠨᠳᠤ ᠭᠡᠷᠡᠭᠯᠡᠵᠦ ᠡᠬᠢᠯᠡᠪᠡ᠃ ᠡᠬᠦᠨᠤ ᠲᠠᠷᠠᠭᠠ ᠪᠠᠷ ᠲᠦᠪᠰᠢᠨ ᠠᠮᠢᠳᠤᠷᠠᠯᠤᠨ ᠵᠤᠭᠠ ᠴᠡᠩᠭᠡᠯᠢ ᠡᠳ᠋ᠯᠡᠬᠦ ᠪᠤᠶᠤ ᠴᠡᠷᠢᠭ ᠵᠢᠡᠨ ᠪᠤᠯᠪᠠᠰᠤᠷᠠᠭᠤᠯᠬᠤ ᠡᠬᠦᠳᠡᠨ ᠡᠴᠡ ᠮᠤᠷᠢ ᠵᠢ ᠴᠡᠩᠬᠡᠬᠦᠨᠳᠤ ᠭᠡᠷᠡᠭᠯᠡᠬᠦ ᠪᠤᠯᠪᠠ᠃ ᠡᠬᠦᠨᠴᠡ ᠮᠤᠷᠢ ᠬᠦᠮᠦᠨ ᠲᠠᠢ ᠨᠡᠩ ᠢᠯᠡᠬᠦᠦ ᠬᠠᠷᠢᠴᠠᠭᠠ ᠬᠦᠨ ᠪᠤᠯᠵᠦ᠂ 《ᠴᠡᠷᠢᠭ ᠮᠤᠷᠢ》 ᠭᠡᠬᠦ ᠬᠤᠯᠪᠤᠭᠠ ᠦᠭᠡ ᠴᠦ᠍ ᠪᠤᠢ ᠪᠤᠯᠵᠠᠢ᠃ ᠲᠠᠷᠤᠢ ᠮᠤᠷᠢ ᠨᠢᠭᠡᠨᠳᠡ ᠬᠦᠮᠦᠨ ᠲᠠᠢ ᠵᠡᠷᠭᠡᠴᠡᠭᠰᠡᠨ ᠬᠠᠷᠢᠴᠠᠭᠠ ᠲᠠᠢ ᠪᠤᠯᠪᠠ᠃ ᠲᠡᠯᠡᠬᠡᠢ ᠵᠢᠨ ᠡᠯᠡ ᠦᠨᠳᠦᠰᠦᠳᠡᠨᠤ ᠬᠦᠭᠵᠢᠯᠳᠡ ᠵᠢᠨ ᠲᠡᠦᠭᠡᠨᠳᠤ ᠮᠤᠷᠢ ᠤᠷᠤᠯᠳᠤᠭᠤᠯᠵᠦ ᠪᠠᠢᠭᠰᠠᠨ ᠲᠡᠦᠭᠡ ᠪᠦᠷ ᠲᠡᠮᠳᠡᠭᠯᠡᠭᠡᠰᠦᠳᠡᠢ᠃ ᠲᠤᠮᠳᠠᠳᠤ ᠵᠢᠨ ᠡᠷᠳᠡᠨᠤ ᠤᠷᠠᠨ ᠵᠢᠷᠤᠭ ᠲᠦ᠍ ᠮᠤᠷᠢ ᠤᠷᠤᠯᠳᠤᠭᠤᠯᠵᠦ ᠪᠠᠢᠭᠰᠠᠨ ᠲᠡᠦᠭᠡ ᠵᠢ ᠲᠡᠮᠳᠡᠭᠯᠡᠭᠰᠡᠨ ᠬᠤᠪᠤᠷ ᠨᠠᠨᠳᠢᠨ ᠤᠷᠠᠨ ᠵᠢᠷᠤᠭ ᠮᠠᠰᠢ ᠤᠯᠠᠨ ᠪᠠᠢᠳᠠᠭ ᠪᠦᠭᠡᠳ ᠮᠤᠷᠢᠨ ᠤᠷᠤᠯᠳᠤᠭᠠᠨ ᠨᠢ ᠤᠳᠤᠬᠠᠨ ᠴᠦ᠍ ᠭᠡᠰᠡᠨ ᠨᠢᠭᠡ ᠵᠦᠢᠯᠤᠨ ᠠᠵᠦ ᠦᠢᠯᠡᠰ ᠪᠤᠯᠵᠦ᠂ ᠲᠡᠯᠡᠬᠡᠢ ᠵᠢᠨ ᠭᠡᠪᠴᠢᠶᠡᠨᠤ ᠤᠷᠤᠯᠳᠤᠭᠠᠨ ᠴᠡᠩᠭᠡᠬᠦᠨ ᠤᠯᠠᠨᠳᠠ ᠶᠠᠪᠤᠭᠳᠠᠳᠠᠭ ᠪᠤᠯᠬᠤᠷ ᠰᠠᠢᠨ ᠡᠬᠦᠯᠳᠡᠷᠤᠨ ᠮᠤᠷᠢᠨᠤ ᠦᠨᠡ ᠬᠠᠩᠰᠢ ᠶᠠᠪᠤᠬᠤ ᠲᠤᠳᠤᠮ ᠦᠨᠳᠦᠷ ᠪᠤᠯᠤᠭᠰᠠᠭᠠᠷ ᠪᠠᠢᠵᠦ᠂ ᠤᠷᠤᠯᠳᠤᠭᠠᠨ ᠮᠤᠷᠢ ᠠᠷᠠᠴᠢᠯᠠᠬᠤ ᠨᠢ ᠨᠢᠭᠡᠨᠳᠡ ᠨᠢᠭᠡᠨ ᠠᠵᠦ ᠦᠢᠯᠡᠰᠤᠨ ᠬᠡᠯᠬᠢᠶᠡ ᠪᠤᠯᠵᠦ ᠪᠦᠷᠢᠯᠳᠦᠭᠰᠡᠨ ᠪᠠᠢᠨᠠ᠃ ᠡᠳᠡᠭᠡᠷ ᠤᠷᠤᠯᠳᠤᠭᠠᠨᠤ ᠲᠤᠳᠤᠷᠠ ᠮᠤᠷᠢᠨ ᠮᠡᠷᠭᠡᠵᠢᠯᠤᠨ ᠤᠷᠤᠯᠳᠤᠭᠠᠨ᠂ ᠬᠤᠷᠳᠤᠨ ᠮᠤᠷᠢᠨᠤ ᠤᠷᠤᠯᠳᠤᠭᠠᠨ᠂ ᠰᠠᠭᠠᠳ ᠲᠠᠪᠠᠬᠤ ᠤᠷᠤᠯᠳᠤᠭᠠᠨ ᠨᠡᠯᠢᠶᠡᠳ ᠪᠠᠢᠩᠭᠤ ᠬᠠᠷᠠᠭᠳᠠᠳᠠᠭ ᠪᠦᠭᠡᠳ ᠲᠦᠷᠢᠮ ᠭᠤᠷᠢᠮ ᠨᠢ ᠴᠦ᠍ ᠲᠤᠩ ᠲᠡᠭᠦᠯᠳᠡᠷᠵᠢᠵᠦ᠂ ᠤᠯᠢᠮᠫᠢᠺ ᠤ᠋ᠨ ᠲᠠᠮᠢᠷ ᠤ᠋ᠨ ᠴᠤᠭᠯᠠᠭᠠᠨ ᠤ᠋ ᠲᠦᠷᠦᠯ ᠵᠦᠢᠯ ᠴᠦ᠍ ᠪᠤᠯᠤᠭᠰᠠᠨ ᠪᠠᠢᠳᠠᠭ᠃
ᠮᠤᠩᠭᠤᠯ ᠦᠨᠳᠦᠰᠦᠳᠡᠨᠤ ᠮᠤᠷᠢ ᠤᠷᠤᠯᠳᠤᠭᠤᠯᠵᠦ ᠪᠠᠢᠭᠰᠠᠨ ᠲᠡᠦᠭᠡ ᠨᠡᠯᠢᠶᠡᠳ ᠡᠷᠳᠡᠨ ᠡᠴᠡ ᠡᠬᠢᠯᠡᠭᠰᠡᠨ ᠪᠦᠭᠡᠳ ᠲᠦᠷᠦᠯ ᠵᠦᠢᠯ ᠨᠢ ᠮᠠᠰᠢ ᠤᠯᠠᠨ ᠪᠠᠢᠳᠠᠭ᠃ ᠬᠤᠷᠳᠤ ᠰᠢᠯᠭᠠᠬᠤ ᠬᠤᠯᠠ᠂ ᠤᠢᠷᠠ ᠵᠠᠢ ᠵᠢᠨ ᠬᠤᠷᠳᠤᠨ ᠮᠤᠷᠢᠨ ᠤ᠋ ᠤᠷᠤᠯᠳᠤᠭᠠᠨ； ᠬᠦᠶᠦᠳᠡᠯ ᠬᠢᠰᠭᠢᠳᠡᠯ ᠵᠢᠡᠷ ᠨᠢ ᠵᠢᠷᠤᠭᠠ ᠬᠠᠲᠠᠷᠢᠶᠠ ᠮᠤᠷᠢᠨᠤ ᠤᠷᠤᠯᠳᠤᠭᠠᠨ； ᠮᠤᠷᠢ ᠪᠠ ᠬᠦᠮᠦᠨ ᠤ᠋ ᠮᠡᠷᠭᠡᠵᠢᠯ ᠢ᠋ ᠰᠢᠯᠭᠠᠬᠤ ᠬᠠᠳᠠᠭ ᠰᠢᠬᠦᠷᠬᠦ᠂ ᠨᠠᠮᠨᠠᠭᠠ ᠵᠢᠨ ᠤᠷᠤᠯᠳᠤᠭᠠᠨ； ᠬᠦᠴᠦᠨ ᠴᠢᠳᠠᠯ ᠠᠪᠬᠠᠯᠵᠢ ᠰᠠᠮᠪᠠᠭᠠ ᠶ᠋ᠢ ᠰᠢᠯᠭᠠᠬᠤ ᠡᠮᠨᠢᠭ ᠰᠤᠷᠭᠠᠬᠤ᠂ ᠠᠳᠤᠭᠤ ᠤᠷᠭᠠᠯᠠᠬᠤ ᠵᠡᠷᠭᠡ ᠲᠦᠷᠦᠯ ᠳ᠋ᠤ ᠬᠤᠪᠢᠶᠠᠵᠤ ᠪᠤᠯᠳᠠᠭ᠃ ᠤᠷᠤᠯᠳᠤᠭᠠᠨ ᠡᠴᠡ ᠭᠠᠳᠠᠨᠠ ᠮᠤᠷᠢᠨᠤ ᠶᠠᠪᠤᠳᠠᠯᠢ ᠲᠠᠭᠤᠷᠢᠶᠠᠭᠰᠠᠨ ᠪᠦᠵᠢᠭ ᠵᠤᠬᠢᠶᠠᠵᠦ ᠪᠦᠵᠢᠭᠯᠡᠬᠦ᠂ ᠮᠤᠷᠢᠨ ᠮᠡᠷᠭᠡᠵᠢᠯᠢ ᠠᠰᠢᠭᠯᠠᠨ ᠪᠤᠳᠠᠳᠤ ᠦᠵᠡᠭᠳᠡᠯᠳᠤ ᠵᠦᠴᠦᠭᠡ ᠲᠤᠭᠯᠠᠬᠤ ᠵᠡᠷᠭᠡ ᠪᠡᠷ ᠰᠢᠨᠠ ᠴᠠᠭ ᠦᠶᠡᠳᠤ ᠮᠤᠷᠢ ᠬᠦᠮᠦᠨ ᠲᠦᠷᠦᠯᠬᠢᠳᠡᠨᠤ ᠪᠤᠯᠪᠠᠰᠤᠨᠳᠤ ᠨᠡᠩ ᠬᠦᠨᠴᠡ ᠲᠠᠢ ᠠᠭᠤᠰᠴᠤ ᠡᠬᠢᠯᠡᠭᠰᠡᠨ ᠪᠠᠢᠨᠠ᠃
ᠬᠤᠷᠳᠤᠨ ᠮᠤᠷᠢᠨ ᠤ᠋ ᠤᠷᠤᠯᠳᠤᠭᠠᠨ
ᠬᠤᠷᠳᠤᠨ ᠮᠤᠷᠢᠨ ᠤ᠋ ᠤᠷᠤᠯᠳᠤᠭᠠᠨ ᠪᠤᠯ ᠬᠦᠯᠦᠭ ᠤ᠋ᠨ ᠰᠠᠢᠨ ᠢ᠋ ᠰᠢᠯᠭᠠᠨ ᠰᠢᠨᠳᠠᠰᠤ ᠰᠢᠷᠪᠤᠰᠤ ᠵᠢᠨ ᠢᠳᠡ ᠶ᠋ᠢ ᠦᠵᠡᠳᠡᠭ ᠤᠷᠤᠯᠳᠤᠭᠠᠨ ᠪᠤᠯᠬᠤᠷ ᠬᠤᠷᠳᠤᠴᠠ ᠶ᠋ᠢ ᠦᠵᠡᠬᠦ ᠲᠡᠳᠦᠢ ᠦᠭᠡᠢ ᠲᠡᠰᠪᠦᠷᠢ ᠳᠠᠭᠠᠭᠠᠴᠠ ᠶ᠋ᠢ ᠴᠤ᠌ ᠰᠢᠯᠭᠠᠳᠠᠭ᠃ 《ᠡᠷᠡ ᠵᠢᠨ ᠭᠤᠷᠪᠠᠨ ᠨᠠᠭᠠᠳᠤᠮ》 ᠤ᠋ᠨ ᠨᠢᠭᠡ ᠪᠤᠯᠤᠭᠰᠠᠨ ᠬᠤᠷᠳᠤᠨ ᠮᠤᠷᠢᠨ ᠤ᠋ ᠤᠷᠤᠯᠳᠤᠭᠠᠨ ᠳ᠋ᠤ ᠠᠵᠢᠷᠭᠠ ᠤᠷᠤᠯᠳᠤᠭᠤᠯᠬᠤ᠂ ᠦᠷᠢᠶᠡ ᠤᠷᠤᠯᠳᠤᠭᠤᠯᠬᠤ᠂ ᠲᠡᠷᠡᠴᠢᠯᠡᠨ ᠮᠤᠷᠢᠳ ᠢ᠋ ᠨᠠᠰᠤ ᠢᠯᠭᠠᠨ ᠳᠠᠭᠠ᠂ ᠰᠢᠳᠦᠯᠡᠩ᠂ ᠬᠢᠵᠠᠭᠠᠯᠠᠩ᠂ ᠰᠤᠶᠤᠭᠠᠯᠠᠩ ᠮᠤᠷᠢᠳ ᠤ᠋ᠨ ᠤᠷᠤᠯᠳᠤᠭᠠᠨ ᠭᠡᠵᠤ ᠤᠷᠤᠯᠳᠤᠭᠤᠯᠳᠠᠭ ᠪᠤᠯᠪᠠ᠃
ᠶᠡᠬᠡ ᠨᠠᠰᠤᠨ ᠤ᠋ ᠮᠤᠷᠢᠳ ᠤ᠋ᠨ ᠤᠷᠤᠯᠳᠤᠭᠠᠨ （ᠪᠦᠳᠦᠭᠦᠨ ᠮᠤᠷᠢᠳ ᠤ᠋ᠨ ᠤᠷᠤᠯᠳᠤᠭᠠᠨ） ᠪᠠ ᠠᠵᠢᠷᠭᠠ ᠵᠢᠨ ᠤᠷᠤᠯᠳᠤᠭᠠᠨ ᠢ᠋ 30 — 40 ᠭᠠᠵᠠᠷ ᠤ᠋ᠨ ᠬᠤᠯᠠ ᠵᠠᠢ ᠳ᠋ᠤ ᠤᠷᠤᠯᠳᠤᠭᠤᠯᠵᠤ᠂ ᠳᠠᠭᠠ ᠵᠢᠨ ᠤᠷᠤᠯᠳᠤᠭᠠᠨ ᠢ᠋ 12 ᠭᠠᠵᠠᠷ ᠤᠷᠴᠢᠮ ᠤ᠋ᠨ ᠤᠢᠷᠠ ᠵᠠᠢ ᠳ᠋ᠤ ᠤᠷᠤᠯᠳᠤᠭᠤᠯᠤᠨ᠂ ᠦᠷᠢᠶᠡ ᠮᠤᠷᠢᠳ ᠤ᠋ᠨ ᠤᠷᠤᠯᠳᠤᠭᠠᠨ ᠢ᠋ ᠨᠠᠰᠤ ᠢᠯᠭᠠᠨ 20 — 28 ᠭᠠᠵᠠᠷ ᠤᠷᠴᠢᠮ ᠤ᠋ᠨ ᠵᠠᠢ ᠳ᠋ᠤ ᠤᠷᠤᠯᠳᠤᠭᠤᠯᠳᠠᠭ᠃ 2005 ᠤᠨ ᠳ᠋ᠤ ᠦᠵᠦᠮᠦᠴᠢᠨ ᠨᠤᠲᠤᠭ ᠲᠤ᠌ ᠪᠤᠯᠤᠭᠰᠠᠨ《ᠠᠵᠢᠨᠠᠢ ᠬᠦᠯᠦᠭ》 ᠤ᠋ᠨ ᠶᠡᠬᠡ ᠨᠠᠢᠷ ᠲᠤ᠌ 800 ᠮᠤᠷᠢ ᠤᠷᠤᠯᠳᠤᠭᠤᠯᠵᠤ᠂ ᠳᠡᠯᠡᠬᠡᠢ ᠵᠢᠨ ᠭᠢᠨᠢᠰ ᠤ᠋ᠨ ᠲᠡᠮᠳᠡᠭᠯᠡᠯ ᠳ᠋ᠤ ᠲᠡᠮᠳᠡᠭᠯᠡᠭᠳᠡᠵᠠᠢ᠃
ᠬᠠᠳᠠᠭ ᠰᠢᠬᠦᠷᠬᠦ ᠤᠷᠤᠯᠳᠤᠭᠠᠨ
ᠬᠠᠳᠠᠭ ᠰᠢᠬᠦᠷᠬᠦ ᠤᠷᠤᠯᠳᠤᠭᠠᠨ ᠮᠤᠷᠢᠨ ᠮᠡᠷᠭᠡᠵᠢᠯ ᠤ᠋ᠨ ᠤᠷᠤᠯᠳᠤᠭᠠᠨ ᠤ᠋ ᠨᠢᠭᠡ ᠵᠦᠢᠯ ᠪᠠᠢᠵᠤ᠂ 2020 ᠤᠨ ᠡᠴᠡ ᠦᠪᠦᠷ ᠮᠤᠩᠭᠤᠯ ᠤ᠋ᠨ ᠤᠯᠠᠨ ᠤᠯᠤᠰ ᠤ᠋ᠨ ᠮᠤᠷᠢᠨ ᠮᠡᠷᠭᠡᠵᠢᠯ ᠤ᠋ᠨ ᠨᠠᠢᠷ ᠲᠤ᠌ ᠬᠠᠮᠤᠷᠤᠭᠳᠠᠪᠠ᠃ ᠬᠠᠳᠠᠭ ᠰᠢᠬᠦᠷᠬᠦ ᠤᠷᠤᠯᠳᠤᠭᠠᠨ ᠢ᠋ 100 ᠮᠸᠲᠷ ᠤᠷᠲᠤ᠂ 3 — 5 ᠮᠸᠲᠷ ᠦᠷᠭᠡᠨ ᠭᠠᠵᠠᠷ ᠲᠤ᠌ 10 ᠪᠤᠶᠤ 20 ᠬᠠᠳᠠᠭ ᠢ᠋ ᠤᠷᠤᠯᠳᠤᠭᠠᠨ ᠤ᠋ ᠵᠠᠮ ᠤ᠋ᠨ ᠬᠤᠶᠠᠷ ᠲᠠᠯᠠ ᠳ᠋ᠤ ᠲᠤᠭᠲᠠᠭᠰᠠᠨ ᠵᠠᠢ ᠳ᠋ᠤ ᠲᠠᠯᠪᠢᠵᠤ᠂ ᠤᠨᠤᠭᠠᠴᠢ ᠬᠠᠳᠠᠭ ᠤ᠋ᠨ ᠬᠠᠵᠠᠭᠤ ᠪᠡᠷ ᠰᠠᠯᠬᠢ ᠲᠠᠲᠠᠭᠤᠯᠤᠨ ᠦᠩᠭᠡᠷᠡᠬᠦ ᠳ᠋ᠡᠭᠡᠨ ᠲᠤᠩᠭᠤᠢᠵᠤ ᠦᠷᠦᠭᠡᠰᠦᠨ ᠭᠠᠷ ᠵᠢᠡᠷ ᠵᠢᠡᠨ ᠬᠠᠳᠠᠭ ᠢ᠋ ᠰᠢᠭᠦᠷᠤᠨ ᠠᠪᠴᠤ᠂ ᠲᠡᠭᠦᠰᠭᠡᠯ ᠤ᠋ᠨ ᠴᠡᠭ ᠲᠤ᠌ ᠬᠦᠷᠬᠦ ᠳ᠋ᠤ ᠵᠠᠷᠤᠴᠠᠭᠤᠯᠤᠭᠰᠠᠨ ᠴᠠᠭ ᠵᠢᠴᠢ ᠰᠢᠬᠦᠷᠴᠤ ᠠᠪᠤᠭᠰᠠᠨ ᠬᠠᠳᠠᠭ ᠤ᠋ᠨ ᠲᠤᠭᠠ ᠪᠡᠷ ᠳ᠋ᠤᠭᠠᠷᠯᠠᠳᠠᠭ᠃ ᠬᠠᠳᠠᠭ ᠰᠢᠭᠦᠷᠬᠦ ᠤᠷᠤᠯᠳᠤᠭᠠᠨ ᠨᠢ ᠤᠨᠤᠭᠠᠴᠢ ᠵᠢᠨ ᠤᠷᠠ᠂ ᠮᠤᠷᠢᠨ ᠤ᠋ ᠬᠤᠷᠳᠤᠴᠠ ᠵᠢᠴᠢ ᠤᠨᠤᠭᠠᠴᠢ ᠮᠤᠷᠢ ᠬᠤᠶᠠᠷ ᠤ᠋ᠨ ᠬᠠᠮᠵᠢᠯᠴᠠᠭᠠ ᠶ᠋ᠢ ᠱᠠᠭᠠᠷᠳᠠᠳᠠᠭ ᠪᠤᠯᠬᠤᠷ ᠮᠠᠰᠢ ᠬᠤᠷᠴᠠ ᠰᠢᠷᠦᠭᠦᠨ ᠪᠦᠭᠡᠳ ᠰᠤᠨᠢᠷᠬᠠᠯᠲᠠᠢ ᠪᠠᠢᠳᠠᠭ᠃
ᠠᠵᠢᠷᠭᠠ ᠵᠢᠨ ᠤᠷᠤᠯᠳᠤᠭᠠᠨ
ᠤᠷᠳᠤᠰ ᠨᠤᠲᠤᠭ ᠲᠡᠬᠢ ᠪᠦᠰᠡᠲᠡᠢ ᠬᠦᠮᠦᠰ ᠡᠵᠡᠨ ᠴᠢᠩᠭᠢᠰ ᠤ᠋ᠨ ᠤᠩᠭᠤᠨ ᠤ᠋ ᠬᠠᠵᠠᠭᠤ ᠳ᠋ᠤ ᠲᠦᠮᠡᠨ ᠠᠳᠤᠭᠤᠨ ᠤ᠋ ᠲᠦᠷᠦᠭᠦᠦ ᠪᠤᠯᠬᠤ ᠠᠵᠢᠷᠭᠠ ᠤᠷᠤᠯᠳᠤᠭᠤᠯᠳᠠᠭ᠃ ᠭᠤᠷᠪᠠᠨ ᠰᠠᠷᠠ ᠵᠢᠨ ᠬᠤᠷᠢᠨ ᠨᠢᠭᠡᠨ ᠤ᠋ ᠴᠢᠩᠭᠢᠰ ᠤ᠋ᠨ ᠴᠠᠭᠠᠨ ᠰᠦᠷᠦᠭ ᠤ᠋ᠨ ᠲᠠᠢᠯᠭᠠ ᠪᠠ ᠵᠤᠨ ᠤ᠋ ᠵᠤᠯᠤᠭ ᠤ᠋ᠨ ᠨᠠᠢᠷ ᠲᠤ᠌ ᠡᠷᠬᠡᠪᠰᠢ ᠠᠵᠢᠷᠭᠠ ᠤᠷᠤᠯᠳᠤᠭᠤᠯᠳᠠᠭ ᠵᠠᠩᠰᠢᠯ ᠲᠠᠢ᠃ ᠮᠠᠨ ᠤ᠋ ᠤᠷᠤᠨ ᠳ᠋ᠤ ᠤᠤᠯ ᠨᠢ ᠠᠵᠢᠷᠭᠠᠨ ᠤ᠋ ᠤᠷᠤᠯᠳᠤᠭᠠᠨ ᠬᠠᠷᠢᠴᠠᠩᠭᠤᠢ ᠴᠦᠬᠡᠨ ᠪᠠᠢᠭᠰᠠᠨ ᠵᠢᠡᠨ ᠤᠢᠷᠠ ᠵᠢᠨ ᠵᠢᠯ ᠡᠴᠡ ᠡᠯᠡ ᠠᠢᠮᠠᠭ ᠬᠤᠲᠠ ᠬᠤᠰᠢᠭᠤ ᠨᠠᠢᠷ ᠵᠢᠡᠷ ᠴᠤ᠌ ᠤᠷᠤᠯᠳᠤᠭᠤᠯᠳᠠᠭ ᠪᠤᠯᠵᠤ᠂ ᠶᠡᠬᠡᠪᠴᠢᠯᠡᠨ 30 — 40 ᠭᠠᠵᠠᠷ ᠤᠷᠴᠢᠮ ᠤ᠋ᠨ ᠵᠠᠢ ᠳ᠋ᠤ ᠲᠠᠯᠪᠢᠳᠠᠭ᠃
ᠵᠢᠷᠤᠭᠠ ᠮᠤᠷᠢᠨ ᠤ᠋ ᠤᠷᠤᠯᠳᠤᠭᠠᠨ
ᠮᠤᠷᠢᠨ ᠤ᠋ ᠬᠤᠷᠳᠤᠴᠠ ᠵᠢᠴᠢ ᠳᠡᠰᠪᠦᠷᠢ ᠳᠠᠭᠠᠭᠠᠴᠠ ᠶ᠋ᠢ ᠰᠢᠯᠭᠠᠬᠤ ᠬᠤᠷᠳᠤᠨ ᠮᠤᠷᠢᠨ ᠤ᠋ ᠤᠷᠤᠯᠳᠤᠭᠠᠨ ᠡᠴᠡ ᠭᠠᠳᠠᠨᠠ᠂ ᠮᠤᠷᠢᠨ ᠤ᠋ ᠶᠠᠪᠤᠳᠠᠯ ᠬᠢᠰᠬᠢᠳᠡᠯ ᠤ᠋ᠨ ᠤᠷᠠᠨ ᠪᠠ ᠬᠤᠷᠳᠤᠴᠠ ᠶ᠋ᠢ ᠰᠢᠯᠭᠠᠬᠤ ᠵᠢᠷᠤᠭᠠ ᠮᠤᠷᠢᠨ ᠤ᠋ ᠤᠷᠤᠯᠳᠤᠭᠠᠨ᠂ ᠬᠠᠲᠠᠷᠢᠶᠠ ᠮᠤᠷᠢᠨ ᠤ᠋ ᠤᠷᠤᠯᠳᠤᠭᠠᠨ ᠭᠡᠵᠤ ᠪᠤᠢ᠂ ᠡᠨᠡ ᠬᠦ᠌ ᠮᠤᠷᠢᠨ ᠤ᠋ ᠤᠷᠤᠯᠳᠤᠭᠠᠨ ᠳ᠋ᠤ ᠮᠤᠷᠢᠨ ᠤ᠋ ᠨᠠᠰᠤ ᠶ᠋ᠢ ᠢᠯᠭᠠᠳᠠᠭ ᠦᠭᠡᠢ᠃
ᠵᠢᠷᠤᠭᠠ ᠮᠤᠷᠢᠨ ᠤ᠋ ᠶᠠᠪᠤᠳᠠᠯ ᠬᠢᠰᠭᠢᠳᠡᠯ ᠬᠤᠷᠳᠤᠨ ᠮᠤᠷᠢ ᠲᠠᠢ ᠢᠯᠭᠠᠭᠠ ᠲᠠᠢ᠂ ᠬᠤᠯᠠ ᠵᠠᠮ ᠳ᠋ᠤ ᠵᠢᠷᠤᠭᠠ ᠮᠤᠷᠢ ᠤᠷᠤᠯᠳᠤᠪᠠᠯ ᠬᠦᠬᠡ ᠮᠢᠬᠠ᠂ ᠪᠤᠯᠴᠢᠩ ᠨᠢ ᠬᠦᠰᠢᠭᠡᠳ ᠵᠢᠷᠤᠭᠠᠯᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠤᠯᠴᠢᠬᠠᠳᠠᠭ ᠤᠴᠢᠷ ᠵᠢᠷᠤᠭᠠ ᠮᠤᠷᠢ ᠶ᠋ᠢ ᠬᠤᠯᠠ ᠤᠷᠤᠯᠳᠤᠭᠤᠯᠳᠠᠭ ᠦᠭᠡᠢ᠂ ᠶᠡᠬᠡᠪᠴᠢᠯᠡᠨ 300᠂ 500᠂ 1000᠂ 1500 ᠮᠸᠲᠷ ᠮᠡᠲᠤᠴᠢᠯᠡᠨ ᠤᠢᠷᠠ ᠵᠠᠢ ᠳ᠋ᠤ ᠤᠷᠤᠯᠳᠤᠭᠤᠯᠳᠠᠭ ᠪᠦᠭᠡᠳ ᠲᠤᠮᠤᠴᠤᠳ ᠤᠨᠤᠳᠠᠭ᠃ ᠮᠤᠷᠢᠨ ᠤ᠋ ᠵᠢᠷᠤᠭᠠ ᠶ᠋ᠢ ᠬᠤᠨᠢᠨ ᠵᠢᠷᠤᠭᠠ᠂ ᠤᠰᠤᠨ ᠲᠡᠯᠡᠮᠡᠨ ᠵᠢᠷᠤᠭᠠ᠂ ᠲᠡᠮᠡᠭᠡᠨ ᠵᠢᠷᠤᠭᠠ ᠬᠡᠮᠡᠨ ᠠᠩᠭᠢᠯᠠᠵᠤ᠂ ᠵᠢᠷᠤᠭᠠ ᠮᠤᠷᠢ ᠰᠢᠯᠭᠠᠷᠠᠭᠤᠯᠬᠤ ᠳ᠋ᠤ ᠤᠷᠤᠯᠳᠤᠭᠠᠨ ᠳᠤᠮᠳᠠ ᠬᠦᠯ ᠰᠤᠯᠪᠢᠴᠠᠨ ᠵᠢᠷᠤᠭᠠ ᠪᠡᠨ ᠠᠯᠳᠠᠬᠤ ᠡᠰᠡᠬᠦ ᠶ᠋ᠢ ᠰᠢᠯᠭᠠᠳᠠᠭ᠃
ᠬᠠᠲᠠᠷᠢᠶᠠ ᠮᠤᠷᠢᠨ ᠤ᠋ ᠤᠷᠤᠯᠳᠤᠭᠠᠨ
ᠬᠠᠲᠠᠷᠢᠶᠠ ᠪᠤᠯ ᠰᠠᠢᠪᠤᠷ ᠪᠤᠯᠤᠨ ᠵᠢᠷᠤᠭᠠ ᠵᠢᠨ ᠳᠤᠮᠳᠠᠬᠢ ᠤᠷᠠᠨ ᠬᠦᠳᠡᠯᠤᠯ ᠶᠤᠮ᠃ ᠬᠠᠲᠠᠷᠢᠶᠠ ᠮᠤᠷᠢᠨ ᠤ᠋ ᠶᠠᠪᠤᠳᠠᠯ ᠨᠢ ᠦᠵᠡᠮᠤᠷᠢᠲᠠᠢ ᠰᠠᠢᠬᠠᠨ᠂ ᠡᠪᠯᠢᠭ ᠵᠦᠭᠡᠯᠡᠨ ᠵᠢᠡᠷ ᠵᠢᠡᠨ ᠤᠨᠴᠠᠯᠢᠭᠳᠠᠳᠠᠭ᠃ ᠤᠨᠴᠠ ᠵᠢᠨ ᠰᠠᠢᠬᠠᠨ ᠬᠠᠲᠠᠷᠢᠶᠠ ᠲᠠᠢ ᠮᠤᠷᠢᠨ ᠤ᠋ ᠬᠤᠨᠳᠤᠯᠠᠢ ᠳᠡᠭᠡᠷᠡ ᠠᠶᠠᠭᠠ ᠲᠠᠢ ᠤᠰᠤ ᠲᠠᠯᠪᠢᠬᠤ ᠳ᠋ᠤ ᠴᠠᠯᠬᠢᠯᠠᠳᠠᠭ ᠦᠭᠡᠢ ᠬᠡᠳᠡᠭ᠃
ᠬᠠᠲᠠᠷᠢᠶᠠ ᠮᠤᠷᠢᠨ ᠤ᠋ ᠡᠮᠤᠨᠡ ᠬᠦᠯ ᠨᠢ ᠬᠠᠮᠤᠷᠤᠯᠲᠠ ᠰᠠᠢᠲᠠᠢ ᠪᠤᠯ ᠶᠠᠪᠤᠳᠠᠯ ᠨᠢ ᠲᠦᠷᠭᠡᠨ ᠪᠠᠢᠵᠤ᠂ ᠶᠡᠷᠦᠩᠬᠡᠢ ᠳ᠋ᠡᠭᠡᠨ 1500 — 3000 ᠮᠸᠲᠷ ᠤ᠋ᠨ ᠵᠠᠢ ᠳ᠋ᠤ ᠤᠷᠤᠯᠳᠤᠭᠤᠯᠳᠠᠭ᠃ ᠬᠠᠲᠠᠷᠢᠶᠠ ᠮᠤᠷᠢᠳ ᠤ᠋ᠨ ᠤᠷᠤᠯᠳᠤᠭᠠᠨ ᠳ᠋ᠤ ᠤᠷᠠᠨ ᠬᠦᠳᠡᠯᠤᠯ ᠬᠢᠰᠬᠢᠳᠡᠯ ᠢ᠋ ᠦᠵᠡᠬᠦ ᠮᠦᠷᠲᠡᠭᠡᠨ ᠬᠤᠯᠠ ᠵᠠᠢ ᠳ᠋ᠤ ᠲᠡᠰᠪᠦᠷᠢ ᠲᠠᠢ ᠡᠰᠡᠬᠦ ᠶ᠋ᠢ ᠰᠢᠯᠭᠠᠳᠠᠭ᠃ ᠬᠠᠲᠠᠷᠢᠶᠠ ᠮᠤᠷᠢᠨ ᠤ᠋ ᠤᠷᠤᠯᠳᠤᠭᠠᠨ ᠤ᠋ ᠶᠠᠪᠤᠴᠠ ᠳ᠋ᠤ ᠮᠤᠷᠢ ᠶᠠᠪᠤᠳᠠᠯ ᠵᠢᠡᠨ ᠠᠯᠳᠠᠭᠠᠳ 30 ᠮᠸᠲᠷ ᠤ᠋ᠨ ᠳᠤᠲᠤᠷᠠ ᠳᠠᠬᠢᠵᠤ ᠶᠠᠪᠤᠳᠠᠯ ᠳ᠋ᠠᠭᠠᠨ ᠤᠷᠤᠬᠤ ᠦᠭᠡᠢ ᠪᠤᠯ ᠤᠷᠤᠯᠳᠤᠭᠠᠨ ᠤ᠋ ᠡᠷᠬᠡ ᠶ᠋ᠢ ᠬᠠᠰᠤᠵᠤ ᠪᠤᠯᠳᠠᠭ᠃ ᠲᠦᠷ ᠵᠠᠭᠤᠷᠠ ᠬᠦᠯ ᠡᠭᠡᠳᠡᠷᠡᠵᠤ᠂ 30 ᠮᠸᠲᠷ ᠤ᠋ᠨ ᠳᠤᠲᠤᠷᠠ ᠳᠠᠬᠢᠵᠤ ᠬᠢᠰᠬᠢᠳᠡᠯ ᠵᠦᠪᠳᠡᠪᠡᠯ ᠶᠠᠪᠤᠳᠠᠯ ᠠᠯᠳᠠᠭᠰᠠᠨ ᠵᠢᠡᠷ ᠪᠤᠳᠤᠬᠤ ᠦᠭᠡᠢ᠂ ᠬᠡᠬᠦ ᠳ᠋ᠡᠭᠡᠨ ᠡᠨᠡ ᠬᠦ᠌ ᠠᠯᠳᠠᠰᠢ ᠶ᠋ᠢ ᠪᠦᠬᠦ ᠤᠷᠤᠯᠳᠤᠭᠠᠨ ᠤ᠋ ᠶᠠᠪᠤᠴᠠ ᠳ᠋ᠤ 5 ᠤᠳᠠᠭᠠ ᠡᠴᠡ ᠢᠯᠡᠭᠦᠦ ᠪᠠᠢᠯᠭᠠᠵᠤ ᠪᠤᠯᠬᠤ ᠦᠭᠡᠢ ᠭᠡᠵᠤ ᠦᠪᠦᠷ ᠮᠤᠩᠭᠤᠯ ᠤ᠋ᠨ ᠨᠠᠢᠷ ᠨᠠᠭᠠᠳᠤᠮ ᠳ᠋ᠤ ᠬᠡᠷᠡᠭᠵᠢᠬᠦᠯᠵᠤ ᠪᠤᠢ᠃
ᠳᠠᠭᠠ ᠵᠢᠨ ᠤᠷᠤᠯᠳᠤᠭᠠᠨ
ᠨᠡᠭᠦᠳᠡᠯᠴᠢᠨ ᠠᠷᠠᠳ ᠲᠦᠮᠡᠨ ᠡᠷᠲᠡᠨ ᠡᠴᠡ ᠶᠡᠬᠡ ᠨᠠᠰᠤᠨ ᠤ᠋ ᠮᠤᠷᠢ ᠭᠤᠤᠯᠴᠢᠯᠠᠨ ᠤᠷᠤᠯᠳᠤᠭᠤᠯᠵᠤ ᠪᠠᠢᠭᠰᠠᠨ ᠪᠤᠯ ᠬᠤᠵᠢᠮ ᠨᠢ ᠬᠤᠷᠳᠤᠨ ᠮᠤᠷᠢ ᠪᠠ ᠬᠡᠦᠬᠡᠳ ᠢ᠋ ᠪᠠᠭᠠ ᠡᠴᠡ ᠨᠢ ᠳᠠᠰᠬᠠᠯᠵᠢᠭᠤᠯᠬᠤ ᠵᠤᠷᠢᠯᠲᠠ ᠪᠡᠷ ᠳᠠᠭᠠ ᠤᠷᠤᠯᠳᠤᠭᠤᠯᠳᠠᠭ ᠪᠤᠯᠵᠠᠢ᠃ ᠬᠤᠶᠠᠷ ᠨᠠᠰᠤ ᠲᠠᠢ ᠮᠤᠷᠢᠨ ᠤ᠋ ᠤᠷᠤᠯᠳᠤᠭᠠᠨ ᠢ᠋ ᠳᠠᠭᠠ ᠵᠢᠨ ᠤᠷᠤᠯᠳᠤᠭᠠᠨ ᠭᠡᠵᠤ᠂ ᠮᠤᠷᠢ ᠶ᠋ᠢ ᠪᠠᠭᠠ ᠡᠴᠡ ᠨᠢ ᠰᠤᠷᠭᠠᠬᠤ ᠵᠢᠨ ᠲᠦᠯᠦᠭᠡ ᠳᠠᠭᠠ ᠤᠷᠤᠯᠳᠤᠭᠤᠯᠬᠤ ᠶ᠋ᠢ ᠡᠷᠬᠢᠮᠯᠡᠳᠡᠭ᠃
ᠳᠠᠭᠠ ᠵᠢᠨ ᠤᠷᠤᠯᠳᠤᠭᠠᠨ ᠢ᠋ ᠶᠡᠬᠡᠪᠴᠢᠯᠡᠨ 12 ᠭᠠᠵᠠᠷ ᠤ᠋ᠨ ᠤᠷᠴᠢᠮ ᠲᠠᠯᠪᠢᠵᠤ ᠬᠡᠦᠬᠡᠳ ᠤᠨᠤᠵᠤ ᠤᠷᠤᠯᠳᠤᠭᠤᠯᠤᠨ᠂ ᠬᠡᠦᠬᠡᠳ ᠪᠠ ᠳᠠᠭᠠ ᠬᠤᠶᠠᠷ ᠤ᠋ᠨ ᠠᠯᠢ ᠠᠯᠢᠨ ᠢ᠋ ᠨᠢ ᠰᠤᠷᠢᠳᠠᠭ᠃ 《ᠠᠮᠠᠨ ᠤ᠋ ᠪᠡᠯᠭᠡ ᠡᠴᠡ ᠠᠰᠢᠳᠠ ᠵᠢᠨ ᠪᠡᠯᠭᠡ》 ᠭᠡᠳᠡᠭᠴᠢᠯᠡᠨ ᠳᠠᠭᠠ ᠵᠢᠨ ᠤᠷᠤᠯᠳᠤᠭᠠᠨ ᠳ᠋ᠤ ᠠᠢᠷᠠᠭ ᠤ᠋ᠨ ᠲᠠᠪᠤ ᠳ᠋ᠤ ᠬᠤᠷᠳᠤᠯᠠᠭᠰᠠᠨ ᠳᠠᠭᠠ ᠵᠢᠨ ᠴᠤᠯᠠ ᠶ᠋ᠢ ᠳᠠᠭᠤᠳᠠᠬᠤ ᠡᠴᠡ ᠭᠠᠳᠠᠨᠠ ᠤᠷᠤᠯᠳᠤᠭᠠᠨ ᠳ᠋ᠤ ᠬᠤᠴᠤᠷᠤᠭᠰᠠᠨ ᠳᠠᠭᠠ ᠶ᠋ᠢ 《ᠪᠠᠶᠠᠨ ᠬᠤᠳᠤᠭᠤᠳᠤ》 ᠬᠡᠮᠡᠨ ᠨᠡᠷᠡᠯᠡᠵᠤ᠂ 《ᠡᠨᠡ ᠬᠦᠯᠦᠭ ᠤ᠋ᠨ ᠡᠵᠡᠨ ᠨᠢ ᠡᠨᠳᠡᠭᠦᠷᠡᠵᠤ ᠲᠠᠰᠢᠶᠠᠷᠠᠵᠤ ᠪᠤᠳᠤᠭᠰᠠᠨ ᠡᠴᠡ᠂ ᠤᠨᠤᠭᠰᠠᠨ ᠬᠡᠦᠬᠡᠳ ᠨᠢ ᠪᠠᠭᠠᠳᠠᠭᠠᠳ ᠪᠠᠷᠢᠭᠰᠠᠨ ᠲᠠᠰᠢᠭᠤᠷ ᠨᠢ ᠪᠤᠭᠤᠨᠢᠳᠠᠭᠠᠳ᠂ ᠦᠯᠢ ᠵᠢᠨ ᠮᠠᠩᠬᠠ ᠳᠠᠭᠠᠷᠠᠯᠳᠤᠭᠠᠳ ᠦᠷᠭᠦᠯᠵᠢ ᠰᠠᠭᠠᠳᠠᠯ ᠲᠤᠬᠢᠶᠠᠯᠳᠤᠭᠠᠳ᠂ ᠡᠷᠬᠢ ᠮᠠᠩᠬᠠ ᠳᠠᠭᠠᠷᠠᠯᠳᠤᠭᠠᠳ ᠡᠯᠳᠡᠪ ᠬᠠᠳᠤᠤᠷᠠᠯ ᠲᠤᠬᠢᠶᠠᠯᠳᠤᠭᠠᠳ᠂ ᠦᠰᠦᠷᠴᠤ ᠭᠠᠷᠤᠭᠰᠠᠨ ᠪᠤᠯᠪᠠᠴᠤ ᠦᠬᠡᠷ ᠲᠡᠷᠭᠡ ᠰᠢᠭ ᠬᠤᠴᠤᠷᠴᠤ᠂ ᠡᠨᠡ ᠵᠢᠯ ᠤ᠋ᠨ ᠪᠠᠶᠠᠨ ᠬᠤᠳᠤᠭᠤᠳᠤ ᠢᠷᠡᠬᠦ ᠵᠢᠯ ᠤ᠋ᠨ ᠪᠠᠶᠠᠷ ᠤ᠋ᠨ ᠮᠠᠩᠨᠠᠢ ᠪᠠᠲᠤ ᠲᠦᠮᠡᠨ ᠤ᠋ ᠡᠬᠡ ᠡ》 ᠬᠡᠮᠡᠨ ᠬᠦᠯᠦᠭ ᠤ᠋ᠨ ᠰᠢᠨᠵᠢ᠂ ᠤᠶᠠᠭᠠ ᠰᠤᠢᠯᠭᠠ᠂ ᠤᠷᠤᠯᠳᠤᠭᠰᠠᠨ ᠪᠠᠢᠳᠠᠯ ᠵᠡᠷᠭᠡ ᠶ᠋ᠢ ᠶᠦᠮᠦᠷᠯᠢᠭ ᠵᠢᠡᠷ ᠢᠯᠡᠳᠭᠡᠬᠦ ᠵᠢᠨ ᠬᠠᠮᠲᠤ ᠲᠦᠷᠦᠭᠦᠯᠡᠭᠰᠡᠨ ᠳᠠᠭᠠ ᠲᠠᠢ ᠠᠳᠠᠯᠢ ᠱᠠᠩᠨᠠᠯ ᠦᠭᠴᠤ ᠤᠷᠮᠠᠰᠢᠭᠤᠯᠤᠨ ᠵᠤᠷᠢᠭᠵᠢᠭᠤᠯᠵᠤ᠂ ᠪᠡᠯᠭᠡᠰᠢᠶᠡᠨ ᠵᠦᠩᠨᠡᠬᠦ ᠡᠭᠦᠳᠡᠨ ᠡᠴᠡ ᠬᠤᠢᠲᠤᠨ ᠵᠢᠯ ᠤ᠋ᠨ ᠲᠤᠷᠭᠤᠨ ᠵᠢᠯᠤᠭᠤ ᠲᠤᠳᠤ ᠮᠠᠩᠨᠠᠢ ᠪᠤᠯᠬᠤ ᠵᠢᠨ ᠦᠯᠵᠡᠢ ᠲᠠᠢ ᠢᠷᠦᠭᠡᠯ ᠢ᠋ ᠳᠡᠪᠰᠢᠭᠦᠯᠤᠨ ᠴᠤᠯᠠ ᠶ᠋ᠢ ᠨᠢ ᠳᠠᠭᠤᠳᠠᠳᠠᠭ ᠠᠵᠠᠢ᠃
ᠨᠠᠮᠨᠠᠭᠠ ᠤᠷᠤᠯᠳᠤᠭᠠᠨ
ᠨᠠᠮᠨᠠᠭᠠ ᠭᠡᠵᠤ ᠮᠤᠷᠢᠨ ᠮᠡᠷᠭᠡᠵᠢᠯ ᠤ᠋ᠨ ᠤᠷᠤᠯᠳᠤᠭᠠᠨ ᠤ᠋ ᠪᠠᠰᠠ ᠨᠢᠭᠡᠨ ᠵᠦᠢᠯ ᠪᠠᠢᠵᠤ᠂ ᠮᠠᠨ ᠤ᠋ ᠤᠷᠤᠨ ᠤ᠋ ᠶᠡᠬᠡ ᠪᠠᠭᠠ ᠨᠠᠢᠷ ᠨᠠᠭᠠᠳᠤᠮ ᠳ᠋ᠤ ᠪᠠᠢᠩᠭᠤ ᠬᠠᠷᠠᠭᠳᠠᠳᠠᠭ ᠪᠦᠭᠡᠳ ᠪᠦᠬᠦ ᠤᠯᠤᠰ ᠤ᠋ᠨ ᠴᠦᠬᠡᠨ ᠲᠤᠭᠠᠲᠤ ᠦᠨᠳᠦᠰᠦᠲᠡᠨ ᠤ᠋ ᠤᠯᠠᠮᠵᠢᠯᠠᠯᠲᠤ ᠪᠡᠶᠠ ᠵᠢᠨ ᠲᠠᠮᠢᠷ ᠤ᠋ᠨ ᠬᠦᠳᠡᠯᠭᠡᠭᠡᠨ ᠤ᠋ ᠵᠢᠩᠬᠢᠨᠢ ᠤᠷᠤᠯᠳᠤᠭᠠᠨ ᠤ᠋ ᠲᠦᠷᠦᠯ ᠪᠤᠯᠤᠨᠠ᠃ ᠨᠡᠮᠨᠠᠭᠠ ᠭᠡᠳᠡᠭ ᠨᠢ ᠮᠤᠷᠢᠨ ᠭᠦᠶᠦᠳᠡᠯ ᠳᠡᠭᠡᠷᠡ ᠡᠴᠡ ᠰᠤᠷ ᠬᠠᠷᠪᠤᠬᠤ ᠶ᠋ᠢ ᠵᠢᠭᠠᠵᠤ᠂ ᠨᠠᠮᠨᠠᠭᠠ ᠳ᠋ᠤ ᠮᠤᠷᠢ ᠶ᠋ᠢ ᠵᠢᠯᠤᠭᠤ ᠪᠡᠷ ᠪᠢᠰᠢ ᠬᠠᠷᠢᠨ ᠡᠪᠦᠳᠦᠭ ᠵᠢᠡᠷ ᠵᠢᠡᠨ ᠵᠠᠯᠠᠵᠤ ᠰᠤᠷᠭᠠᠳᠠᠭ᠃ ᠨᠠᠮᠨᠠᠭᠠᠴᠢᠳ ᠰᠤᠷ ᠬᠠᠷᠪᠤᠬᠤ ᠳ᠋ᠠᠭᠠᠨ ᠵᠢᠯᠤᠭᠤ ᠪᠡᠨ ᠪᠦᠰᠡ ᠪᠤᠶᠤ ᠡᠮᠡᠭᠡᠯ ᠤ᠋ᠨ ᠪᠦᠭᠦᠷᠭᠡᠨ ᠳ᠋ᠤ ᠲᠤᠷᠭᠤᠵᠤ ᠭᠠᠷ ᠵᠢᠡᠨ ᠰᠤᠯᠠᠯᠠᠵᠤ ᠨᠠᠮᠨᠠᠳᠠᠭ᠂ ᠡᠨᠡ ᠨᠢ ᠵᠤᠭᠰᠤᠭᠠ ᠬᠠᠷᠪᠤᠭᠠ ᠰᠢᠬ ᠤᠨᠤᠪᠴᠢᠲᠠᠢ ᠪᠦᠭᠡᠳ ᠵᠦᠪ ᠰᠤᠯᠤᠭᠠᠢ ᠬᠤᠶᠠᠷ ᠲᠠᠯᠠ ᠪᠡᠷ ᠴᠢᠯᠦᠭᠡᠲᠡᠢ ᠬᠠᠷᠪᠤᠵᠤ ᠴᠢᠳᠠᠳᠠᠭ᠃ ᠨᠠᠮᠨᠠᠭᠠ ᠵᠢᠨ ᠤᠷᠤᠯᠳᠤᠭᠠᠨ ᠨᠢ ᠪᠠᠷᠢᠮᠵᠢᠶᠠᠵᠢᠭᠰᠠᠨ ᠨᠠᠮᠨᠠᠭᠠᠯᠲᠠ ᠵᠢᠨ ᠵᠠᠮ ᠳᠡᠭᠡᠷᠡ 2 ᠫᠠᠢ ᠶ᠋ᠢ ᠲᠤᠬᠢᠷᠠᠭᠤᠯᠵᠤ （ᠡᠬᠢᠯᠡᠯᠲᠡ ᠵᠢᠨ ᠴᠡᠭ ᠡᠴᠡ 40 ᠮᠸᠲᠷ ᠵᠠᠢᠲᠠᠢ ）᠂ ᠤᠨᠤᠭᠠᠴᠢ ᠲᠤᠭᠲᠠᠭᠰᠠᠨ ᠬᠤᠭᠤᠴᠠᠭᠠᠨ ᠳ᠋ᠤ ᠫᠠᠢ ᠵᠢᠨ ᠡᠮᠤᠨᠡᠭᠦᠷ ᠮᠤᠷᠢᠲᠠᠢ ᠳᠠᠭᠠᠷᠢᠵᠤ ᠭᠠᠷᠬᠤ ᠭᠱᠠᠨ ᠳ᠋ᠤ ᠱᠠᠯᠠᠮᠠᠭᠠᠢ ᠪᠦᠭᠡᠳ ᠤᠨᠤᠪᠴᠢᠲᠠᠢ ᠪᠡᠷ ᠫᠠᠢ ᠶ᠋ᠢ ᠤᠨᠤᠭᠠᠵᠤ ᠬᠠᠷᠪᠤᠬᠤ ᠶ᠋ᠢ ᠱᠠᠭᠠᠷᠳᠠᠳᠠᠭ᠃
ᠠᠵᠢᠷᠭᠠ ᠰᠢᠷᠭᠤᠭᠤᠯᠬᠤ ᠤᠷᠤᠯᠳᠤᠭᠠᠨ
ᠠᠵᠢᠷᠭᠠ ᠰᠢᠷᠭᠤᠭᠤᠯᠬᠤ ᠤᠷᠤᠯᠳᠤᠭᠠᠨ ᠭᠤᠤᠯᠳᠠᠭᠤ ᠦᠵᠦᠮᠦᠴᠢᠨ ᠨᠤᠲᠤᠭ ᠵᠢᠡᠷ ᠲᠦᠭᠡᠮᠡᠯ ᠬᠠᠷᠠᠭᠳᠠᠳᠠᠭ ᠤᠷᠤᠯᠳᠤᠭᠠᠨ ᠴᠡᠩᠭᠡᠬᠦᠨ ᠪᠤᠯᠤᠨᠠ᠃ ᠠᠵᠢᠷᠭᠠ ᠰᠢᠷᠭᠤᠭᠤᠯᠬᠤ ᠪᠤᠯ ᠠᠳᠤᠭᠤᠴᠢᠨ ᠤ᠋ ᠡᠷᠡ ᠴᠢᠳᠠᠯ᠂ ᠤᠬᠠᠭᠠᠨ ᠰᠠᠮᠪᠠᠭᠠ᠂ ᠡᠷᠴᠢ ᠵᠤᠷᠢᠭ ᠢ᠋ ᠬᠠᠷᠠᠭᠤᠯᠤᠭᠰᠠᠨ ᠨᠢᠭᠡ ᠵᠦᠢᠯ ᠤ᠋ᠨ ᠨᠠᠭᠠᠳᠤᠮ ᠪᠠᠢᠵᠤ᠂ ᠮᠠᠯᠴᠢᠳ ᠬᠠᠪᠤᠷᠤᠨ ᠤᠯᠠᠷᠢᠯᠳᠦ ᠠᠳᠤᠭᠤ ᠪᠡᠨ ᠬᠦᠯᠦᠰᠦᠯᠡᠨ᠂ ᠠᠳᠤᠭᠤᠴᠢᠨ ᠤᠷᠭᠠᠴᠢᠳᠤᠷᠠ ᠤᠬᠠᠭᠠᠨ᠂ ᠪᠢᠷᠠᠲᠡᠩᠬᠡᠬᠡ ᠪᠡᠨ ᠰᠢᠯᠭᠠᠵᠤᠳᠤᠬᠯᠠᠳᠠᠭ᠃
ᠠᠵᠢᠷᠭᠠ ᠰᠢᠷᠭᠤᠭᠤᠯᠬᠤ ᠳ᠋ᠤ ᠭᠤᠤᠯᠳᠠᠭᠤ ᠠᠵᠢᠷᠭᠠ ᠶ᠋ᠢ ᠶᠠᠪᠠᠭᠠᠨ ᠵᠢᠡᠷ ᠭᠤᠤᠯᠳᠠᠢ ᠤᠷᠭᠠᠯᠠᠳᠠᠭ ᠪᠤᠯᠬᠤᠷ ᠪᠠᠰᠠ ᠬᠤᠭᠤᠯᠠᠢ ᠰᠢᠷᠭᠤᠭᠠ ᠬᠡᠮᠡᠨ ᠨᠡᠷᠡᠯᠡᠵᠤ᠂ ᠠᠳᠤᠭᠤᠴᠢᠳ ᠠᠳᠤᠭᠤᠨ ᠰᠦᠷᠦᠭ ᠡᠴᠡ ᠪᠡᠨ ᠬᠡᠬᠡᠯ ᠦᠭᠡᠢ ᠭᠡᠭᠦᠦ ᠪᠠᠢᠳᠠᠰᠤ ᠶ᠋ᠢ ᠪᠦᠭᠡᠮᠨᠡᠷᠡᠭᠦᠯᠦᠨ ᠲᠠᠭᠤᠵᠤ᠂ ᠬᠤᠶᠠᠷ ᠭᠠᠷᠯᠠᠵᠤ ᠵᠤᠬᠰᠤᠬᠰᠠᠨ ᠤᠷᠭᠠᠴᠢᠳᠤᠨ ᠳᠤᠮᠳᠠᠭᠤᠷ ᠤᠷᠤᠭᠤᠯᠬᠤᠳᠦ ᠤᠷᠭᠠᠴᠢᠳ ᠮᠤᠷᠢᠳᠢ ᠤᠷᠭᠠᠯᠠᠵᠤ ᠬᠠᠶᠠᠵᠤ ᠨᠠᠭᠠᠳᠳᠠᠭ᠃ ᠮᠡᠷᠭᠡᠵᠢᠯ ᠰᠠᠢᠳᠠᠢ ᠤᠷᠭᠠᠴᠢᠳ ᠨᠢ ᠤᠷᠭᠠᠯᠠᠬᠰᠠᠨ ᠮᠤᠷᠢᠳ ᠵᠢᠨᠨ ᠬᠠᠶᠠᠬᠤ ᠪᠤᠶᠤ ᠡᠷᠬᠢᠬᠦᠯᠵᠦ ᠴᠢᠳᠠᠳᠠᠭ᠂ ᠡᠪ ᠳ᠋ᠦᠢ ᠨᠢ ᠲᠠᠭᠠᠷᠠᠬᠤ ᠦᠭᠡᠢ ᠪᠤᠯ ᠤᠷᠭᠠ ᠪᠡᠨ ᠠᠯᠳᠠᠳᠠᠬ ᠤᠷᠭᠠᠴᠢᠳᠴᠦ ᠤᠯᠠᠨ ᠪᠤᠢ᠃
ᠠᠳᠤᠭᠤ ᠤᠷᠭᠠᠯᠠᠬᠤ ᠤᠷᠤᠯᠳᠤᠭᠠᠨ
ᠠᠳᠤᠭᠤ ᠤᠷᠭᠠᠯᠠᠬᠤ ᠭᠡᠵᠤ ᠤᠷᠭᠠ ᠪᠡᠷ ᠠᠳᠤᠭᠤ ᠶ᠋ᠢ ᠪᠠᠷᠢᠵᠤ᠂ ᠤᠨᠤᠯᠭᠠ ᠡᠳ᠋ᠯᠡᠭᠡ ᠳ᠋ᠤ ᠰᠤᠷᠭᠠᠬᠤ ᠶ᠋ᠢ ᠵᠢᠭᠠᠵᠤ᠂ ᠠᠳᠤᠭᠤ ᠤᠷᠭᠠᠯᠠᠬᠤ ᠳ᠋ᠤ ᠮᠤᠷᠢᠲᠠᠢ ᠤᠷᠭᠠᠯᠠᠬᠤ ᠪᠠ ᠶᠠᠪᠠᠭᠠᠨ ᠤᠷᠭᠠᠯᠠᠬᠤ ᠭᠡᠵᠤ ᠬᠤᠪᠢᠶᠠᠨᠠ᠃ ᠠᠳᠤᠭᠤ ᠤᠷᠭᠠᠯᠠᠬᠤ ᠳ᠋ᠤ ᠲᠤᠯᠤᠭᠠᠢ ᠠᠯᠳᠠᠬᠤ ᠦᠭᠡᠢ ᠤᠷᠭᠠᠯᠠᠵᠤ ᠴᠢᠳᠠᠳᠠᠭ ᠬᠦᠮᠦᠨ ᠢ᠋ ᠮᠡᠷᠭᠡᠨ ᠤᠷᠭᠠᠴᠢ ᠬᠡᠳᠡᠭ᠃ ᠠᠳᠤᠭᠤ ᠤᠷᠭᠠᠯᠠᠬᠤ ᠳ᠋ᠤ ᠰᠢᠪᠦᠭᠡᠳᠡᠵᠤ ᠬᠠᠶᠠᠬᠤ᠂ ᠦᠷᠦᠮᠳᠡᠵᠤ ᠬᠠᠶᠠᠬᠤ᠂ ᠡᠷᠬᠢᠬᠦᠯᠵᠤ ᠬᠠᠶᠠᠬᠤ᠂ ᠤᠭᠯᠠᠵᠤ ᠬᠠᠶᠠᠬᠤ ᠭᠡᠬᠦ ᠮᠡᠳᠤ ᠤᠯᠠᠨ ᠶᠠᠩᠵᠤ ᠵᠢᠨ ᠬᠠᠶᠠᠯᠭᠠ ᠲᠠᠢ᠃ ᠠᠳᠤᠭᠤ ᠤᠷᠭᠠᠯᠠᠬᠤ ᠳ᠋ᠤ ᠤᠷᠭᠠᠯᠠᠭᠰᠠᠨ ᠮᠤᠷᠢ ᠪᠡᠨ ᠲᠦᠭᠵᠢᠭᠡ ᠰᠠᠭᠤᠯᠭᠠᠬᠤ᠂ ᠳᠠᠭᠠᠭᠤᠯᠵᠤ ᠲᠠᠲᠠᠬᠤ᠂ ᠭᠠᠨᠵᠤᠭᠠᠯᠠᠵᠤ ᠲᠠᠲᠠᠬᠤ ᠭᠤᠷᠪᠠᠨ ᠵᠦᠢᠯ ᠤ᠋ᠨ ᠲᠠᠲᠠᠬᠤ ᠡᠷᠳᠡᠮ ᠲᠠᠢ᠃ ᠰᠠᠢᠨ ᠤᠷᠭᠠᠴᠢ ᠮᠢᠩᠭᠠᠨ ᠠᠳᠤᠭᠤᠨ ᠳ᠋ᠤ ᠤᠷᠭᠠ ᠬᠤᠭᠤᠯᠳᠠᠭ ᠦᠭᠡᠢ ᠭᠡᠳᠡᠭ᠃
ᠡᠮᠨᠢᠭ ᠰᠤᠷᠭᠠᠬᠤ ᠤᠷᠤᠯᠳᠤᠭᠠᠨ
ᠡᠮᠨᠢᠭ ᠭᠡᠵᠤ ᠡᠳ᠋ᠯᠡᠭᠡ ᠦᠭᠡᠢ ᠵᠡᠷᠯᠢᠭᠰᠢᠭᠦᠦ ᠮᠤᠷᠢᠳ ᠢ᠋ ᠵᠢᠭᠠᠵᠤ᠂ ᠡᠮᠨᠢᠭ ᠰᠤᠷᠭᠠᠬᠤ ᠪᠤᠯ ᠮᠠᠯᠴᠢᠨ ᠵᠠᠯᠠᠭᠤᠰ ᠤ᠋ᠨ ᠪᠢᠷᠡ ᠴᠢᠳᠠᠯ᠂ ᠤᠬᠠᠭᠠᠨ ᠰᠠᠮᠪᠠᠭᠠ ᠶ᠋ᠢ ᠰᠢᠯᠭᠠᠬᠤ ᠡᠷᠡ ᠲᠠᠢ ᠪᠢᠷᠡ ᠲᠠᠢ ᠵᠠᠯᠠᠭᠤᠰ ᠤ᠋ᠨ ᠠᠵᠢᠯ ᠶᠤᠮ᠃ ᠡᠮᠨᠢᠭ ᠰᠤᠷᠭᠠᠬᠤ ᠳ᠋ᠤ ᠬᠠᠪᠤᠷ ᠠᠬᠢ ᠨᠢᠳᠤᠯᠡᠵᠤ ᠦᠰᠦ ᠲᠠᠭᠠᠬᠢ ᠨᠢ ᠭᠤᠭᠤᠵᠢᠵᠤ ᠤᠨᠠᠬᠤ ᠦᠶᠡ ᠪᠤᠶᠤ ᠨᠤᠭᠤᠭᠠᠨ ᠳ᠋ᠤ ᠴᠠᠳᠴᠤ ᠮᠢᠬᠠᠯᠠᠵᠤ ᠲᠠᠷᠭᠤᠯᠠᠬᠤ ᠡᠴᠡ ᠨᠢ ᠡᠮᠤᠨᠡ ᠰᠤᠷᠭᠠᠪᠠᠯ ᠲᠤᠬᠢᠷᠠᠮᠵᠢᠲᠠᠢ᠃ ᠮᠠᠯᠴᠢᠳ ᠮᠤᠷᠢ ᠶ᠋ᠢ ᠨᠠᠰᠤ ᠳᠠᠷᠠᠭᠠᠯᠠᠨ ᠡᠷᠡᠮᠪᠡ ᠲᠠᠢ ᠰᠤᠷᠭᠠᠳᠠᠭ ᠶᠤᠮ᠃ ᠡᠮᠨᠢᠭ ᠢ᠋ ᠪᠠᠷᠢᠵᠤ ᠠᠪᠤᠮᠠᠭᠴᠠ ᠰᠢᠭᠤᠳ ᠤᠨᠤᠬᠤ ᠪᠠ ᠠᠭᠠᠵᠢᠮ ᠳᠠᠰᠬᠠᠨ ᠰᠤᠷᠭᠠᠬᠤ ᠬᠤᠶᠠᠷ ᠵᠦᠢᠯ ᠪᠤᠢ᠃ ᠡᠮᠨᠢᠭ ᠢ᠋ ᠰᠠᠢᠨ ᠰᠤᠷᠭᠠᠳᠠᠭ ᠬᠦᠮᠦᠨ ᠡᠮᠨᠢᠭ ᠤ᠋ᠨ ᠪᠡᠶᠡ ᠳ᠋ᠤᠨᠢ ᠭᠡᠮ ᠰᠠᠭᠤᠯᠭᠠᠬᠤ ᠦᠭᠡᠢ᠂ ᠤᠬᠠᠭᠠᠨ ᠳ᠋ᠤᠨᠢ ᠭᠬᠢᠷ ᠰᠠᠭᠤᠯᠭᠠᠬᠤ ᠦᠭᠡᠢ᠂ ᠠᠭᠠᠰᠢ ᠵᠠᠩ ᠢ᠋ ᠨᠢ ᠰᠠᠢᠨ ᠵᠠᠰᠠᠵᠤ ᠤᠨᠤᠰᠢ ᠶᠠᠪᠤᠳᠠᠯ ᠳ᠋ᠤᠨᠢ ᠭᠦᠢᠴᠡᠳ ᠤᠷᠤᠭᠤᠯᠳᠠᠭ᠃
ᠪᠤᠳᠠᠳᠤ ᠦᠵᠡᠭᠳᠡᠯᠳᠤ ᠵᠦᠴᠦᠭᠡ
《ᠪᠤᠭᠤᠷᠤᠯ ᠲᠡᠤᠭᠡ ᠵᠢᠨ ᠬᠦᠯᠦᠭ ᠤ᠋ᠨ ᠮᠠᠭ᠍ᠲᠠᠭᠠᠯ》 ᠪᠤᠯ ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠤᠷᠠᠯᠢᠭ᠋ ᠵᠦᠴᠦᠭᠡ ᠵᠢᠨ ᠬᠦᠷᠢᠶᠡᠯᠡᠩ ᠤ᠋ᠨ ᠪᠦᠲᠦᠭᠡᠭ᠌ᠰᠡᠨ᠂ ᠰᠤᠶᠤᠯ ᠪᠠ ᠵᠢᠭᠤᠯᠴᠢᠯᠠᠯ ᠢ᠋ ᠬᠦᠨᠵᠡᠭᠡᠢ ᠠᠭᠤᠰᠤᠯᠴᠠᠭᠤᠯᠵᠤ᠂ ᠡᠵᠡᠨ ᠪᠠ ᠬᠦᠯᠦᠭ ᠤ᠋ᠨ ᠬᠦᠨ ᠰᠡᠳᠭᠢᠯᠭᠡ ᠪᠠᠳᠤ ᠪᠠᠷᠢᠯᠳᠤᠯᠭᠠᠶᠢ ᠬᠠᠷᠠᠭᠤᠯᠤᠭᠰᠠᠨ᠂ ᠲᠤᠮᠳᠠᠳᠤ ᠤᠯᠤᠰ ᠤ᠋ᠨ ᠠᠩᠬᠠᠳᠠᠬ᠍ᠴᠢ ᠲᠤᠮᠤ ᠬᠡᠯᠪᠡᠷᠢ ᠵᠢᠨ ᠪᠤᠳᠠᠳᠤ ᠦᠵᠡᠭᠳᠡᠯᠲᠤ ᠮᠤᠷᠢᠨ ᠮᠡᠷᠭᠡᠵᠢᠯ ᠤ᠋ᠨ ᠪᠦᠵᠢᠭᠲᠤ ᠵᠦᠴᠦᠭᠡ ᠪᠠᠢᠵᠤ᠂ 《ᠡᠵᠡᠨ ᠬᠦᠯᠦᠭ ᠤ᠋ᠨ ᠪᠠᠷᠢᠯᠳᠤᠯᠭᠠ》᠂ 《ᠮᠤᠷᠢᠳᠠᠨ ᠤ᠋ ᠦᠯᠦᠭᠡᠢ》᠂ 《ᠮᠤᠷᠢᠳᠠᠢ ᠲᠤᠮᠤᠭ》 ᠂ 《ᠡᠷᠭᠡ ᠴᠢᠯᠦᠭᠡᠳᠦ ᠲᠡᠭᠷᠢᠶᠢᠨ ᠤᠨᠠᠭᠠ》 ᠳᠦᠷᠪᠡᠨ ᠬᠡᠰᠡᠭ ᠡᠴᠡ ᠪᠦᠷᠢᠯᠳᠤᠪᠠ᠃
《ᠪᠤᠭᠤᠷᠤᠯ ᠲᠡᠤᠭᠡ ᠵᠢᠨ ᠬᠦᠯᠦᠭ ᠤ᠋ᠨ ᠮᠠᠭ᠍ᠲᠠᠭᠠᠯ》 ᠢ᠋ ᠵᠢᠯ ᠳ᠋ᠤ 100 ᠢᠯᠡᠭᠦᠦ ᠲᠠᠯᠠᠪᠠᠢ ᠲᠤᠭᠯᠠᠵᠤ᠂ ᠨᠢᠭᠡᠨᠲᠡ 20 ᠭᠠᠷᠤᠢ ᠤᠯᠤᠰ ᠪᠠ ᠭᠠᠵᠠᠷ ᠤᠷᠤᠨ ᠤ᠋ ᠦᠵᠡᠭᠴᠢᠳ ᠢ᠋ ᠬᠦᠯᠢᠶᠡᠨ ᠠᠪᠴᠠᠢ᠃ 2014 ᠤᠨ ᠤ᠋ ᠤᠯᠤᠰ ᠤ᠋ᠨ ᠲᠤᠳᠤᠭᠠᠳᠦᠶᠢᠨ ᠠᠳᠤᠭᠤᠨ ᠤ᠋ ᠦᠢᠯᠡᠰ ᠤ᠋ᠨ ᠠᠷᠪᠠᠨ ᠶᠡᠭᠡ ᠰᠤᠨᠢᠨ ᠮᠡᠳᠡᠭᠡᠶᠢᠨ ᠵᠢᠬ᠍ᠰᠠᠭᠠᠯᠳᠠᠳᠤ ᠲᠤᠳᠤᠷᠠᠵᠤ᠂ ᠨᠢ᠋ᠮᠠᠳᠤᠭᠠᠷ ᠬᠤᠭᠤᠴᠠᠭᠠᠨ ᠤ᠋ ᠳᠤᠮᠳᠠᠳᠤ ᠤᠯᠤᠰ ᠤ᠋ᠨ ᠵᠢᠭᠤᠯᠴᠢᠯᠠᠯ ᠪᠡᠯᠡ ᠤᠷᠤᠭᠤᠯᠤᠯᠲᠠ 《ITIA》 ᠱᠠᠩᠨᠠᠯ ᠤ᠋ᠨ ᠳᠤᠮᠳᠠᠳᠤ ᠤᠯᠤᠰ ᠤ᠋ᠨ ᠬᠠᠮᠤᠭ ᠤ᠋ᠨ ᠰᠢᠯᠢᠳᠡᠭ ᠵᠢᠭᠤᠯᠴᠢᠯᠠᠯ ᠲᠤᠭᠯᠠᠯᠲᠠ ᠵᠢᠨ ᠲᠦᠷᠦᠯ ᠵᠦᠢᠯ ᠤ᠋ᠨ ᠠᠯᠲᠠᠨ ᠱᠠᠩᠨᠠᠯ᠂ ᠤᠯᠤᠰ ᠤ᠋ᠨ ᠰᠤᠶᠤᠯ ᠪᠠ ᠵᠢᠭᠤᠯᠴᠢᠯᠠᠯ ᠤ᠋ᠨ ᠶᠠᠮᠤᠨ ᠤ᠋ 《ᠵᠢᠭᠤᠯᠴᠢᠯᠠᠯ ᠤ᠋ᠨ ᠠᠵᠤ ᠦᠢᠯᠡᠰ ᠤ᠋ᠨ ᠨᠦᠯᠦᠭᠡᠯᠡᠬᠦ ᠬᠦᠴᠦᠨ ᠪᠦᠬᠦᠢ ᠵᠢᠭᠤᠯᠴᠢᠯᠠᠯ ᠲᠤᠭᠯᠠᠯᠲᠠ ᠵᠢᠨ ᠱᠠᠩᠨᠠᠯ》᠂ 《ᠲᠤᠮᠳᠠᠳᠤ ᠤᠯᠤᠰ ᠤ᠋ᠨ ᠠᠳᠤᠭᠤᠨ ᠰᠤᠶᠤᠯ ᠢ᠋ ᠰᠤᠷᠳᠠᠯᠴᠢᠯᠠᠬ᠍ᠰᠠᠨ ᠱᠠᠩᠨᠠᠯ》 ᠵᠡᠷᠭᠡ ᠶ᠋ᠢ ᠬᠦᠷᠲᠡᠨ᠂ ᠦᠪᠦᠷ ᠮᠤᠩᠭᠤᠯ ᠤ᠋ᠨ ᠰᠤᠶᠤᠯ ᠤ᠋ᠨ ᠠᠵᠤ ᠦᠢᠯᠡᠰ ᠤ᠋ᠨ ᠭᠤᠤᠯᠳᠠᠯᠭᠠᠲᠠᠢ ᠲᠦᠷᠦᠯ ᠵᠦᠢᠯᠵᠢᠡᠷ ᠰᠤᠩᠭᠤᠭᠳᠠᠵᠤ᠂ ᠪᠦᠬᠦ ᠤᠯᠤᠰ ᠤ᠋ᠨ ᠵᠢᠭᠤᠯᠴᠢᠯᠠᠯ ᠤ᠋ᠨ ᠰᠤᠳᠤᠨ ᠲᠤᠭᠯᠠᠯᠲᠠ ᠪᠡᠷ ᠰᠤᠩᠭᠤᠭᠳᠠᠪᠠ᠃
ᠪᠦᠵᠢᠭ ᠤᠷᠠᠯᠢᠬ
ᠬᠦᠮᠦᠨ ᠬᠢᠬᠡᠳ ᠮᠤᠷᠢᠨ ᠤ᠋ ᠬᠠᠷᠢᠴᠠᠭᠠ ᠪᠤᠯ ᠳᠤᠮᠳᠠᠳᠤ ᠵᠢᠨ ᠰᠤᠶᠤᠯ ᠤ᠋ᠨ ᠪᠦᠷᠢᠯᠳᠦᠬᠦᠨ ᠪᠤᠯᠬᠤ ᠲᠠᠯᠠ ᠨᠤᠲᠤᠭ ᠤ᠋ᠨ ᠰᠤᠶᠤᠯ ᠤᠷᠠᠯᠢᠭ ᠤ᠋ᠨ ᠮᠦᠩᠬᠡ ᠵᠢᠨ ᠰᠡᠳᠦᠪ᠂ ᠤᠢᠷᠠ ᠵᠢᠨ ᠵᠢᠯ ᠮᠠᠨ ᠤ᠋ ᠤᠷᠤᠨ ᠤ᠋ ᠡᠯᠠ ᠠᠢᠮᠠᠭ ᠬᠤᠲᠠ ᠵᠢᠨ 《ᠮᠤᠷᠢ》 ᠪᠡᠷ ᠭᠤᠤᠯ ᠰᠡᠳᠦᠪ ᠪᠤᠯᠭᠠᠭᠰᠠᠨ ᠮᠤᠷᠢᠨ ᠪᠦᠵᠢᠭ ᠤ᠋ᠳ ᠬᠤᠢᠨᠠ ᠬᠤᠢᠨᠠ ᠡᠴᠡ ᠪᠡᠨ ᠴᠤᠯᠭᠤᠷᠠᠨ ᠭᠠᠷᠴᠠᠢ᠃
ᠰᠢᠯᠢ ᠵᠢᠨ ᠭᠤᠤᠯ ᠠᠵᠢᠯ ᠮᠡᠷᠭᠡᠵᠢᠯ ᠤ᠋ᠨ ᠳᠡᠭᠡᠳᠤ ᠰᠤᠷᠭᠠᠭᠤᠯᠢ ᠵᠢᠨ ᠵᠤᠬᠢᠶᠠᠨ ᠪᠦᠲᠦᠭᠡᠭᠰᠡᠨ ᠲᠤᠮᠤ ᠬᠡᠯᠪᠡᠷᠢ ᠵᠢᠨ ᠪᠤᠳᠠᠲᠤ ᠦᠵᠡᠭᠳᠡᠯᠲᠤ ᠮᠤᠷᠢᠨ ᠵᠦᠴᠦᠭᠡ 《ᠮᠤᠩᠭᠤᠯ ᠮᠤᠷᠢ》᠂ ᠳᠤᠮᠳᠠᠳᠤ ᠤᠯᠤᠰ ᠤ᠋ᠨ 《ᠯᠢᠩᠬᠤᠠ ᠱᠠᠩᠨᠠᠯ》 ᠢ᠋ ᠲᠤᠰᠤᠭᠰᠠᠨ ᠦᠪᠦᠷ ᠮᠤᠩᠭᠤᠯ ᠤ᠋ᠨ ᠦᠨᠳᠦᠰᠦᠲᠡᠨ ᠤ᠋ ᠤᠷᠠᠯᠢᠭ ᠵᠦᠴᠦᠭᠡ ᠵᠢᠨ ᠬᠦᠷᠢᠶᠡᠯᠡᠩ ᠤ᠋ᠨ ᠪᠦᠲᠦᠭᠡᠭᠰᠡᠨ ᠦᠨᠳᠦᠰᠦᠲᠡᠨ ᠤ᠋ ᠪᠦᠵᠢᠭᠲᠤ ᠵᠦᠴᠦᠭᠡ 《ᠮᠤᠷᠢᠲᠤ ᠴᠡᠷᠢᠭ》 ᠪᠠ ᠤᠷᠳᠤᠰ ᠬᠤᠲᠠ ᠵᠢᠨ ᠡᠵᠡᠨ ᠬᠤᠷᠤᠭᠠ ᠬᠤᠰᠢᠭᠤᠨ ᠤ᠋ ᠤᠯᠠᠭᠠᠨᠮᠦ᠋ᠴᠢᠷ ᠤ᠋ᠨ ᠵᠤᠬᠢᠶᠠᠭᠰᠠᠨ 《ᠮᠤᠷᠢᠨ ᠬᠤᠩᠬᠤᠨ ᠤ᠋ ᠵᠢᠷᠭᠠᠯᠠᠩᠲᠤ ᠡᠭᠡᠰᠢᠭ》 ᠁ ᠡᠳᠡᠭᠡᠷ ᠮᠤᠷᠢ ᠪᠡᠷ ᠰᠢᠵᠢᠮ ᠪᠤᠯᠭᠠᠭᠰᠠᠨ ᠰᠤᠳᠤᠨ ᠪᠦᠲᠦᠭᠡᠯ ᠨᠢ ᠬᠦᠮᠦᠨ ᠲᠦᠷᠦᠯᠬᠢᠲᠡᠨ ᠬᠢᠭᠡᠳ ᠮᠤᠷᠢᠨ ᠤ᠋ ᠡᠶᠡ ᠵᠤᠬᠢᠴᠠᠯᠲᠤ ᠬᠠᠷᠢᠴᠠᠭᠠ ᠪᠠ ᠶᠡᠷᠦᠩᠬᠡᠢ ᠱᠦᠵᠢ ᠰᠢ ᠵᠢᠨ ᠫᠢᠩ ᠤ᠋ᠨ ᠳᠤᠷᠠᠳᠤᠭᠰᠠᠨ 《ᠮᠤᠩᠭᠤᠯ ᠮᠤᠷᠢᠨ ᠤ᠋ ᠵᠤᠷᠢᠭ ᠰᠠᠨᠠᠭᠠ》 ᠶ᠋ᠢ ᠪᠦᠵᠢᠭ ᠤ᠋ᠨ ᠬᠡᠯᠪᠡᠷᠢ ᠪᠡᠷ ᠤᠷᠠᠨ ᠳᠦᠷᠰᠦᠯᠢᠭ ᠬᠠᠷᠠᠭᠤᠯᠪᠠ᠃